《台語講世事》2018.08~10文字稿

# 《台語講世事》2018.08~10文字稿 ※ 頁面索引，在頁面左側下方，淺灰色格子裡 ## 每一集的標頭共點落去，有Youtube的影片連結 ## [2018.08.09《台語講世事》：台語火星文](https://youtu.be/pj_jEXxgokc) 一、看新聞講台語：洗身軀sé/sué-sin-khu 　◎宜蘭偏漳腔「洗渾軀」 sé-hûn-su：毋是「洗魂舒」，這是台語火星文。　　渾軀hûn-su，規个身軀，是文的講法。　　＊翻譯　1.華語：冬天冷颼颼，洗洗溫泉。　　台語：寒天冷吱吱，來浸溫泉/ 磺水。　　﹡袂當講「泡phàu」溫泉，咱是用「浸tsìm」的，嘛毋是用「洗」的。　　﹡「溫泉」有兩種講法，「溫泉」是對日語詞過來的，「磺水」是真傳統　　　在地的講法。　　﹡為啥物袂當講「泡」溫泉？　　　一是華語的用法，　　　第二，「泡」佇咱台語的意思內底，是你浸佇啥物物件內底了，　　　　　　會產生一个變化的過程，按呢才是「泡」。就是共水沖落去了後，　　　　　　伊會產生一寡變化，譬如講「泡」牛奶、「泡」咖啡、「泡」茶。　　　所以，愛講「浸溫泉」，「洗溫泉」嘛是會使，袂使講泡溫泉。　　2.華語：整個人暖起來。　　台語：規个人燒烙起來。　　　　　Kui-ê lâng sio-lō--khí-lâi. 　　『暖起來』就是「燒烙」起來。這个詞閣共抾轉來用。　　3.華語：洗澡。　　台語：除了宜蘭「洗渾軀sé-hûn-su」以外，咱一般講　　　　　洗身軀sé/sué-sing/sin-khu、洗浴sé/sué-i̍k。　　　　　佇浴間仔內底洗浴。　　　　　洗身軀的所在：洗身軀間。　　4.華語：大家習慣都說　　台語：逐家攏慣勢講　　　　　Ta̍k-ke lóng kuàn-sì kóng… 　　　　　會當直接講：慣勢講… 　　﹡「慣勢」毋是「習慣」顛倒過來的，「習慣」是名詞的用法，　　　「慣勢」是動詞的用法，佇咱台語內底，「習慣」是名詞。　　﹡「慣勢」按怎、「慣勢」做啥物代誌。我有按怎按怎的「習慣」，　　　毋過我攏「慣勢」按怎按怎。這兩个詞逐家愛分予清楚。　　﹡「勢」有「sì」佮「sè」兩个音，咱若咧講彼號啥物所在，　　　一般會講啥物「東勢sì」、「南勢sì」、「北勢sì」，嘛有人講「歹勢sì」呢！　　5.華語：婆婆媽媽耳熟能詳　　台語：較有歲的攏真熟似　　　　　Khah ū-huè/hè--ê lóng tsin si̍k-sāi. 　　﹡莫講性別，其實咱是講「較有歲的」，當然毋是講「足老」的意思，　　　所以咱用「較khah」按呢，「較有歲的」，「淡薄仔較有歲的」。　　6.華語：民眾一聽“霧煞煞” 　　台語：民眾聽甲霧嗄嗄　　　　　Bîn-tsiòng thiann kah bū-sà-sà 　　﹡足濟疊詞其實彼兩字，有當時仔是形容聲音，形容啥物物件，　　　不一定是漢語的物件，所以你欲揣講真適當的漢字來寫，有當時仔真僫揣。　　﹡若是欲寫「煞」，伊干焦有「suah」佮「sannh」的音，伊無「sà」的音。　　7.華語：洗得一身舒暢　　台語：洗甲規身軀感覺足四序爽快　　　　　Sé/sué kah kui sing/sin-khu kám-kak tsiok sù-sī sóng-khuài 　二、講予你知：台語火星文　◎「語」佮「文」是無仝款的。　＊咱節目字卡的呈現方式：攏是以台語漢字、台語羅馬字，算是漢羅濫的方式　　來呈現，而且用的攏是教育部《教典》內面的標準字。每一集的字卡，　　阮攏足斟酌、真認真咧校正，就是希望予逐家一个標準化的感覺。因為台語，　　雖然咱自細漢就會曉講，但是你欲共寫出來，咱是自細漢攏毋捌學過。　　頭一个，欲提醒講咱會使看節目字卡呈現的方式，是漢羅濫。　　◎「台語火星文」是啥物：火星文到底是啥物物件？　＊用倚音的符號、數字來表達　　咱欲用一个字詞的時陣，是去掠另外一个語言伊倚音的符號，抑是數字來表達。　＊呈現趣味抑心適　　有人講「火星文」就是會當表現一種心適，抑是趣味的感覺，這無啥物毋好啊！　　＊台語火星文的例　　火星文　　　台語漢字　　　台語羅馬字（簡稱：台羅）　．歐北共　　　烏白講　　　　oo-pe̍h-kóng 　．促咪　　　　趣味　　　　　tshù-bī 　．母湯　　　　毋通　　　　　m̄-thang 　．呷奔　　　　食飯　　　　　tsia̍h-pn̄g 　．青菜　　　　凊彩　　　　　tshìn-tshái 　　註：「青菜」按華語唸是「菜蔬」的意思，遮是借音表達「凊彩」　　◎火星文的問題　＊書面意思照華語讀袂通：咱拄才看彼的「歐北共」三个字合起來，　　咱就毋知影伊是啥物意思。　＊用華語音讀，聯想相關的台語詞　＊台、華語音結構無仝，表達有限制：　　譬如拄才的「歐北共」，華語是「ㄡ」，台語是「烏oo」；　　「趣味」的時陣，華語是「咪ㄇ一」台語是「味bī」的音，　　華語無法度完全來表達咱台語的音，就是講完全揣袂著仝音的字來表達，　　所以講這種表達有限制。　＊毋是規範化的書面文字，無系統性：若是一个人真正欲來學台語的時陣，　　伊會感覺講臆這嘛臆毋著，臆彼嘛臆毋著，有的人按呢寫，有的人按呢寫，　　就無法度認真來學習。　　◎台語標準化、一致化的要緊　＊語言/文字的分別：語言是自然生成的物件，咱自細漢用聽的，咱可能就會曉講，　　但是欲叫你共台語寫落來，因為咱自細漢毋捌學過，學校嘛無認真咧教，所以自然　　就是袂曉，這就是語言佮文字的無仝款。　　所以，有真濟人講我足會曉講台語，這馬你講欲共台語書寫標準化，伊無贊成，　　因為伊看無，這其實是一種偏見，因為咱自細漢就毋捌學過。　＊會曉講--的嘛愛學，才會曉讀：　　這點咱就愛共同來拍拚，希望政府、規个社會對這點有閣較濟的認同。　　若是講一个語言，會當好好仔共伊寫出來，按呢毋才湠會開，才留會長，才袂走音去。　＊初學者袂困擾：若是一致化了後，初學者就袂困擾。　＊伍佰《釘仔花》的例：伍佰幾若年前有一張專輯號做《釘仔花》，　　這張專輯是台語的專輯，伍佰就共逐家講，以前伊袂曉寫台語的時陣，　　攏愛避開一寡伊袂曉寫的字，但是這馬伊以這个標準化的方式來寫台語了後，　　一寡較活跳跳的字，伊攏會當用佇歌詞內面。　＊學習台語文的資源　　你若欲學台語文，有足濟資源　　◎網路的台語文資源　＊民報：台語世界　＊李江却台語文教基金會：一個月出一擺的《台文通訊BONG報》　＊ＦＢ粉絲專頁：世界台Sè-kài Tâi、失控的台語課…等專頁　＊你若認真看咱的《台語講世事》嘛會當學著真濟這就是今仔日共逐家講的「台語文書寫標準化的重要性」。　　◎語詞　．漢字Hàn-jī 　．羅馬字Lô-má-jī 　．白話字Pe̍h-uē-jī 　．漢羅濫Hàn-Lô-lām 　．漢羅合用Hàn-Lô ha̍p-iōng 　　＊台、華語仝字無仝意思--ê 　．垃圾lah-sap：仝款意思的「足驚人的kiann-lâng—ê」，「足癩“疒哥”的thái-ko—ê」，　　有幾若種程度，小可仔有精差，但是攏是「垃圾」的意思。　．斟酌tsim-tsiok：　　你愛較斟酌一下。意思是「你可能愛較“細膩“」抑是「愛較注意啥物代誌」。　　華語的「斟酌」，咱台語「愛節一下，程度較大抑是較細。」　．大家ta-ke：華語佮台語用漢字的狀況無仝。　　＊華語無濁音(lô-im)、入聲(ji̍p-siann) 　　火星文無法度去寫真濟台語的字，因為可比講華語無「濁音」，ｂ、ｇ、ｚ這種攏無，　　「入聲」四款無仝喙型的入聲嘛攏無，若拄著彼款字的時陣，當然火星文凊彩掠，　　亻因認為敢若倚音的字提來用，結果攏走音。　　．憢疑giâu-gî 　．壓力ap-li̍k 　　親像這種字，根本火星文無法度寫，你欲去揣一个華語的詞來鬥，揣無，就揣一个較近的，　　但是根本就走音去，這就是火星文上大的問題，咱就是希望講寫起來，會當共音留落去，　　結果留毋著去，有當時仔，連意思嘛走精，　　親像「凍蒜」，你用「冷凍的蒜頭」，彼有啥物意思？　　「凍蒜」就是彼兩字「當選」，台華共用。　三、看戲齣(hì-tshut)講台語　◎這款代誌予伊主意就好。　　Tsit-khuán tāi-tsì hōo i tsú-ì tō hó. 　．這句是欲看「主意tsú-ì」，這馬「主意」逐家攏袂曉用，大部份攏講「決定」、「做主」。　　「做主tsò-tsú」嘛會使，毋過，「主意」嘛是一種講法。　．這个「主意」和華語的「主意」是無仝款的用法，所以咱嘛愛「注意tsù-ì」一下。　．「主意tsú-ì」、「注意tsù-ì」，無仝字，無仝意思。　　◎風聲嗙影無一定是真的。　　Hong-siann-pòng-iánn bô-it-tīng sī tsin--ê. 　．這四字算是台語的俗語「風聲嗙影」，可能小可有感覺一个風的聲，小可眼著一个影，　　這不一定是事實的代誌。　　◎先得先，後得後　　Sing tit sing, hiō tit hiō. 　．萬項代誌攏有一个前後，較先到位，較慢到位的順序，咧強調講啥物代誌攏應該　　照彼號順序。若是換做較無形講，就是所謂倫理這方面。慧盈老師提醒逐家，咱台語已經有書寫系統，咱毋通閣用火星文來表達矣，無，咱台語流傳落去，錯誤會愈來愈濟。 ## [2018.08.16《台語講世事》：家庭暴力](https://youtu.be/qD9RPtohqoo) 一、看新聞講台語：家庭暴力　＊翻譯　1.華語：努力安撫　　台語：骨力咧共安搭　　　　　Kut-la̍t leh kā an-tah 　　　　　拚勢咧共安搭　　　　　Piànn-sè leh kā an-tah 　　　﹡「骨力」你欲共換做其它類似意思的詞，嘛是會使。親像有的人可能想講　　　敢會當講「拍拚」？但是「拍拚」佇遮有較奇怪。　　　有的可能會當用「拚勢piànn-sè」，意思是「想盡辦法，真拚命欲共伊　　　做啥物安搭的動作」，可能「拚勢」猶閣勉強會使，啊若「拍拚」就較奇怪　　　用佇遮，雖然意思可能差不多，毋過愛看是咧講啥物代誌，抑是啥物狀況。　　　（註：「拚勢piànn-sè」是根據《教典》，　　　　　　影片內底，豐惠老師的發音是「拚勢piànn-sì」。）　　　﹡『安撫』就是「安搭an-tah」　　﹡「搭tah」就是「嬰仔共伊搭搭咧」的「搭」。　　﹡「咧共」：情境是講「發生啥物款狀況的“彼的時陣”，當咧做啥物款代誌」，　　　所以咱這馬是講彼的過程，伊是當咧進行，所以講「當咧共按怎」，抑是　　　「咧共按怎」，咧強調現在進行式。　　　「咧按怎按怎」就是「ing」。(<<<🤣，這个我上愛用的。) 　　　現代進行式，「咧共安搭」就是共啥物人安搭，彼的「啥物人」共省略無講。　　2.華語：情緒激動，還對妻子動手　　台語：當佇風火頭，對“亻因”某起跤動手　　　　　　Tng tī hong-hué-thâu, tuì in bóo khí-kha-tāng-tshiú.　　　　　　彼的狀況就是「足受氣」，所以咱就講「當佇咧風火頭」，　　　　　氣怫怫(khì-phut-phut)，所以就對人「起跤動手」。　　　﹡激動kik-tōng，又唸作ki̍k-tōng：有足濟款激動，歡喜嘛激動，受氣嘛激動，　　　所以若是講「激動」分袂清楚。　　3.華語：腳踏車倒地　　台語：鐵馬坦倒　　　　　thih-bé thán-tó 　　　　　毋是講「倒咧塗跤」，是「坦倒」。　　　　　咱有一寡動作，咱其實是一直共袂記得，所以這个愛共抾轉來用。　　﹡坦倒：若是物件是倒咧的狀況，攏會使講「坦倒」。　　　你若講人「坦倒」嘛是會使，啥物物件「坦倒」攏會使用。　　　例：我共伊「捒」「坦倒」。你閣加一个動作會使。　　﹡坦徛thán-khiā：就是予伊是「徛咧」的狀況。　　4.華語：拿椅子朝老婆身上砸　　台語：閣提椅仔共“亻因”某掔　　　　　koh the̍h í-á kā in bóo khian. 　　﹡『拿椅子』就是「提椅仔」　　﹡掔khian：（豐惠老師做動作，雙手攑半懸，對後向前擲。）　　　　　　　看野球，看啥物球，掔球嘛猶有咧用。　　　　　　　這馬逐家較捷用的是「擲tàn」，可是「擲tàn」有另外一个　　　　　　　「擲掉」的意思，有兩款意思。　　　《教典》：『投擲、扔』。例：掔石頭khian tsio̍h-thâu（扔石頭）　　5.華語：被吵架聲吵醒，都嚇壞了！　　台語：予冤家聲吵精神，活欲驚--死！　　　　　Hōo uan-ke siann tshá tsing-sîn, ua̍h-beh kiann--sí! 　　　﹡「精神」有兩款意思，一个是「醒起來」彼款，一个是「足有元氣」彼款。　　　咱無講「吵醒」，咱是講「吵精神」。　　﹡「你精神未？」，就是講「你醒矣未？」　　﹡「活欲驚--死」、「強欲驚--死」，這就會出現輕聲的狀況。　　　「活欲按怎」、「強欲按怎」，這款句型愛共抾轉來用，「活欲驚--死」、　　　「活欲氣--死」、「活欲暢--死」，無一定是䆀的代誌。　　﹡字後壁兩條短橫線，這就是「輕聲符號」，若有看著兩條短橫線這款符號　　　的時陣，愛會記得「輕聲符號」頭前彼字是重點，就是「驚」是重點。　　　（「驚」讀本調，「死」讀輕聲）　　　6.華語：酒醉後不理性　　台語：啉酒啉甲馬西馬西　　　　　lim-tsiú lim kah má-se-má-se 　　﹡咱有一个咧形容酒醉抑是啥物，酒醉是主要的形容，毋過，嘛有時仔其它的　　　狀況下，你若講致使到頭殼無蓋清楚，咱會講「馬西馬西」，人講這是　　　南島語來的，無理性，啥物攏毋知影，頭殼無清楚矣。　　7.華語：有過一次的糾紛　　台語：捌有一擺交繚　　　　　bat ū tsi̍t pái kau-liâu 　　﹡交繚kau-liâu：糾紛，混亂，交雜。《台日大辭典》　　8.華語：不滿妻子對他碎唸，才會氣得動手打人　　台語：“亻因”某tsha̍p-tsha̍p唸，伊不滿，tsua̋nn氣甲拍--人　　　　　in bóo tsha̍p-tsha̍p-liām, i put-buán, tsua̋nn khì kah phah--lâng 　　　﹡「tsua̋nn」就是「就按呢tsiū-án-ne/ni」的連音。　　﹡「拍--人」佮「驚—死」，佇遮毋免講「拍“人”」，因為對象一定是「人」，　　　毋是「拍“狗”」，重點佇「拍」，氣甲「拍--人」。「人」讀輕聲。(輕聲符走袂出來) 　二、講予你知：家庭暴力（pō-li̍k，又唸作po̍k-li̍k）　◎《家庭暴力防治法》　＊1998年6--月開始實施：到這陣拄好20冬。　　＊二十冬來通報量逐年增加：根據衛生福利部統計發現的。　　保護令核准的數量，嘛是逐年攏咧增加。　　按呢敢是講家庭暴力的數量，愈來愈濟？不是按呢講。這是表示，這20冬以來，　　逐家對家庭暴力這款代誌，觀念是愈來愈正確，因為佇咧過去，咱會感覺講這就是　　毋通講予別人知，這是厝內的，無人知較好，別人的代誌，咱嘛莫共插，這攏是　　錯誤的觀念。　　＊113專線　　這馬逐家攏知影這款代誌，會當請政府種種的單位來共咱做協助。　　譬如講有一个專線「113專線」，閣來，你若是去派出所等等，嘛會當有一般流程　　的程序，來進行，會當共逐家做幫助。　　＊外國配偶、男性、老大人的保護服務　　咱「113專線」，嘛會當針對外國配偶、男性、老大人等等，無仝款的受害者，　　做保護的服務。　　◎家庭暴力的現況　＊肢體、精神、經濟佮性的暴力　　若是照家庭暴力無仝款的類型，會當分做肢體上、精神上、經濟上佮性方面的　　暴力。你可能會想講這四種，到底佗一種較濟？你可能想是肢體頂懸可能較濟，　　但是其實是精神上的暴力，較捷看著。　　＊四分之一婦人人捌夆施暴　　譬如講政府嘛有資料共咱講，四个內面就有一个捌去夆施暴。　　＊精神暴力上捷看--著　　譬如講罵人啦，去夆罵啦，去夆威脅啦，抑是講無愛插伊啦等等，這攏會使算是　　「精神暴力」。　　＊受暴者無一定致覺--著　　雖然講咱這馬有法律，但是家庭暴力其實有足濟問題，其中一个足重要，就是　　受暴者無一定會發現伊是去受著暴力，有的人會感覺講這是小可代誌，佇咧厝內面　　予對方罵足久的，精神威脅足久的，伊嘛無一定感覺講這是一種暴力，伊就袂去　　尋求外口的支援。　　◎施暴者心理　＊若開始就會愈來愈捷出現　　這種代誌若有開始，就會愈來愈捷出現。　＊施暴者無想欲共關係扯煞　　佇咧學術上的一寡統計佮研究，發現講因為施暴者其實伊一點仔都無想欲共關係　　扯煞去，所以，伊逐回若是有這款暴力的代誌發生了後，伊就會道歉，希望對方　　共伊原諒，但是原諒是原諒，慢慢仔猶閣長長短短閣來出現仝款的代誌。　　＊施暴者比受暴者閣較需要對方　　所以施暴者絕對無希望這个關係去扯煞去。有真濟受暴者心一軟，就無去處理。　＊按怎防治：主動通報掠外，閣需要起造「社會安全網」　　咱這馬有真濟的通報系統，逐家會當敲拄才彼支電話（113專線）主動通報，　　予外口的人知影，你嘛會使揣朋友來了解。　　這馬有通報系統，咱會當敲電話去，有的人會講有當時仔咱聽著隔壁敢若有拍人　　的聲音，敢好去共通報？伊敢會知影是我通報的？等等，這个觀念愛講予逐家　　知影。這个通報報出去了後，就是咱的政府的社工單位會來做處理，你的名對方　　絕對毋知影，這个通報嘛無一定會成案，只是這个單位會去做了解。　　　所以，咱愛知影「社會安全網」愛共建立起來，逐家愛有致覺，發揮咱家婆的　　心情，共規个社區，毋但家己的厝內面，嘛攏愛有真安全的安全網。　◎語詞　．家庭暴力ka-tîng pō-li̍k 　．見笑代kiàn-siàu-tāi 　　厝內面若是講暴力的代誌發生，是見笑代，就是因為彼種心理，認為是見笑代，　　就無想欲通報，嘛毋敢予人知。　　這个所謂的見笑代，當然咱這馬咧學這个詞，毋過佇觀念上，伊毋是見笑代，　　無應該怪家己，就是講夆拍彼个，抑是講夆施加暴力彼的受害者，無應該當做講　　彼的是伊家己的見笑代，抑是講規个家庭　見笑代，應該攏愛揣外口的人來幫忙。　　．侮辱bú-jio̍k 　　語言頂懸嘛是一種的家庭暴力，譬如講會去夆「侮辱」，佇語言上的，就是　　有可能「𧮙姦撟tshoh-kàn-kiāu」、共你用足歹聽的話罵的狀況，抑是牽涉著　　對人格的侮辱。　　咱這个詞，看起來無講蓋深，毋過發音上可能愛較注意一下，就是　　「b」佮「j」的音，濁音佮入聲發音要特別注意。　　．威脅ui-hia̍p：「脅hia̍p」是合喙音的入聲，喙愛合起來，咱特別注意一下，　　應該嘛毋是講足困難。　　．吞忍thun-lún 　　咱若一般較濟歲的，較傳統的口語講法，應該是「吞忍」。　　一般會講：你就較吞忍，為著囡仔吞忍，為著家庭吞忍。這个吞忍的意思，　　通常是包涵較闊，對較濟項代誌、較濟方面的一種「忍受、忍耐」綜合的講法。　　．忍耐jím/lím-nāi 　　譬如講「會疼」，小忍耐的。這个講的層面比較較細，範圍比較較細，抑是　　針對某一个代誌、某一點咧講「忍耐」。　　﹡這兩个猶是小可有差別的，有淡薄仔無仝款。　　．致覺tì-kak：主要是這个詞，咱可能一般人若華語的影響，會感覺講「發覺」，　　抑是「發見」、「發現」，這个「致覺」的詞，咱過去嘛是誠捷用的，　　有致覺著啥物代誌。　　．擋恬tòng-tiām：「家庭暴力」咱欲共「擋予恬」，「擋恬」誠困難。　　原本你嘛會當講用佇較具體的物件，　　可比講「駛車，你欲予擋恬，你愛踏擋仔。」這種嘛是擋恬。咱用延伸的意思，　　就是用佇咧欲予啥物代誌，莫閣繼續，停止的意思，就是「擋恬」。　　．說服suè-ho̍k 　．四箍圍sì-khoo-uî：咱「四箍圍仔」攏愛有安全的概念。　．四箍輾轉sì-khoo-liàn-tńg：佮「四箍圍仔」差不多意思，這兩種攏有人咧用。　三、看戲齣(hì-tshut)講台語　◎睏破三領蓆，掠翁的心袂著。　　Khùn phuà sann niá tshio̍h, lia̍h ang ê sim bē/buē tio̍h. 　　．豐惠老師想著一條歌：《翁某心》　　佮伊睏破三領蓆　　kah i khùn phuà sann-niá tshio̍h 　　掠伊心肝掠袂著　　lia̍h i sim-kuann lia̍h buē tio̍h 　　(可參見面冊「台語歌真正正字歌詞網」 [《翁某心》](https://www.facebook.com/groups/922800454445724/permalink/1886979731361120/)) 　　先有俗語，才有歌詞，寫歌的林文隆老師嘛蓋𠢕寫，《翁某心》寫了袂䆀，　　介紹予逐家。　．意思就是「鬥陣遐久矣，嘛是掠伊的心掠袂著」。　　．仝意思的另外一句：　　磨過三塊刀石，掠伊口味掠袂著。　　Buâ kuè sann tè to-tsio̍h, lia̍h i kháu-bī lia̍h bē tio̍h. 　　煮甲遮濟年矣，伊欲食啥，我猶是毋知。　　◎甘願擔蔥賣菜，毋願佮人公家翁婿。　　Kam-guān tann tshang bē/buē tshài, m̄-guān kap lâng kong-ke ang-sài. 　．這嘛流傳足久的俗諺。「擔蔥賣菜」一般來講，咱會感覺生活較辛苦的人，　　若是「會當揀」，甘願擔蔥賣菜，嘛無愛佮人公家翁婿，「公家翁婿」閣較痛苦。　　◎無冤無家，不成夫妻。　　Bô uan bô ke, put sîng hu-tshe. 　　．這是以早攏咧勸翁仔某加減會按呢，有一寡無歡喜，有一寡冤家的狀況，都愛　　互相吞忍、包容，翁仔某才做會久長，主要是按呢的背景。　　但是，這嘛是愛看程度，若是真正是小可冤家，無要緊，　　若是已經挵甲糜糜卯卯(mi-mi-mauh-mauh)，你閣共講「無冤無家，不成夫妻。」　　按呢這个觀念就毋著去矣。 ## [2018.08.23《台語講世事》：台灣的風颱假](https://youtu.be/bWmzes61I1A) 一、看新聞講台語：專櫃員工爭取風颱假　＊翻譯　 1.華語：颱風來襲，勞工休息　　台語：風颱咧做，勞工愛歇　　　　　Hong-thai leh tsò, lô-kang ài hioh. 　　﹡因為咱攏講「做風颱」，『來襲』就是有「來」，就是「做風颱」。　　　提醒觀眾朋友，「風颱」是用「做」的。　　﹡「愛ài」就是「一定愛」、「著愛」的意思，一定的，必須愛按怎。　　　這个「愛」是咱足台語的用法，愛共抾轉來用。　　 2.華語：聯合守護自己的退避權　　台語：相佮守護家己的閃覕權　　　　　Sann-kap siú-hōo ka-kī ê siám-bih-khuân/kuân. 　　﹡相佮sann-kap，就是做伙的意思。　　﹡「閃siám」佮「覕bih」，是兩个動作，「閃」是閃開，「覕」是覕起來。　　　因為風颱有可能會造成災害的代誌，欲按怎保護家己的權益，就是愛閃這个風颱，　　　「風颱假」毋是真正欲予你放假、歇假，其實是欲預防彼个災害，是為著欲予你　　　閃風覕雨，所以咱著講「閃覕權」。　　 3.華語：跟百貨高層對峙　　台語：佮百貨主管做對頭　　　　　kap pah-huè tsú-kuán tsò-tuì-thâu 　　﹡「高層」到底是啥物人？是頂司的頂司？抑是啥物主管的主管？　　　咱一般攏是用「主管」這个詞，你的頂司就是「主管」，所以咱無去特別閣設計　　　一个叫做「高層ko-tsân」，抑是講「高層ko-tsàn」這款詞，咱目前台語是較無講　　　蓋慣勢用這个詞。　　﹡「高層」佮「主管」嘛有可能你會當共區別，新的定義就是講「主管」是毋是　　　你直屬的頂司？若準講「高層」是毋是毋知幾若層以上，足濟層以上？　　　咱會當考慮新的詞的定義，可能會當來做這款的分別。　　 4.華語：風大雨大　　台語：風透雨落hong thàu hōo lo̍h、　　　　　透風落雨thàu-hong lo̍h-hōo　　　﹡咱一般若講風較大淡薄仔，咱會講「透風」，「今仔日的風真透。」　　　用「風透雨落」這是會當來形容，當然你欲講「透風落雨」，這嘛是一種講法。　　﹡『風很大』咱會當講「風真透」，若是『雨很大』，咱會當講「雨用拚的」，　　　「雨用車桶倒的」這款的講法。意思用「拚」就是「較大phâng、較濟的水　　　倒落來的彼的形」，「較大量、（雨）勢較強」。　　﹡「雨足粗」，所謂粗，一般形容是佮「雨毛仔」對應，若是看了足大點的，　　　咱就會講「足粗」來形容，是咧形容雨的「感覺大細粒的問題」，是用這種的　　　角度來看。　　 5.華語：叫櫃哥櫃姐不得不站出來抗議　　台語：予專櫃員工無徛出來抗議袂使得　　　　　Hōo tsuan-kuī uân-kang bô khiā tshut-lâi khòng-gī bē/buē-sái-tit 　　﹡『不得不』按怎，當然咱可能有無仝的講法，　　　遮有一个句型：「無按怎袂使得。」，會當予逐家參考另外一種講法。　　﹡「袂使得」，「袂用得」攏會使。　　﹡「櫃哥」、「櫃姐」的這个問題，咱這馬有足濟華語詞，攏會去加「啥物哥」、　　　「啥物姐」，這對咱來講，因為咱本來講「啥物兄」、「啥物姊」，嘛是會使，　　　但是彼是尊敬，敬稱的意思。　　　所以你若欲講啥物「櫃員兄」、「櫃員姐」，這嘛是一个敬稱，但是　　　咱講「櫃哥」、「櫃姐」，較無一定是敬稱的意思，所以這可能愛閣思考，　　　若真正欲共分查埔、查某，欲按怎來分，這會當閣另外思考。　　　遮的人攏是專櫃的員工，所以咱無管性別，伊就是專櫃員工，所以就是講　　　「專櫃員工不得不徛出來抗議」用「專櫃員工」較平等，無分男女，無分懸低。　　 6.華語：傍晚 5 點結束營業　　台語：欲暗仔五點收店　　　　　beh-àm-á gōo tiám siu-tiàm 　　﹡『傍晚』就是「欲暗仔」，嘛會當講「暗頭仔」，兩種講法。　　﹡『結束營業』咱就是愛講「收店」，抑是講「歇睏」，兩種講法。　　﹡「頭家，你幾點“關門”？」，「關門」可能較無好聽，這是其他的人閣生出來的　　　禁忌。其實本來講「關門」也無啥物毋著，店「開門」、「關門」，就是　　　「開始營業」佮「結束營業」，有的頭家會感覺講無歡喜，敢若會　　　「拍觸衰phah-tshik-sue」彼的感覺。　　 7.華語：晚上 6 點　　台語：暗頭仔六點　　　　　àm-thâu-á la̍k tiám 　　 8.華語：平安度過每個颱風夜　　台語：每一擺的風颱暝攏通平安過　　　　　muí tsi̍t pái ê hong-thai-mê lóng thang pîng-an kuè 　　﹡咱強調「每一擺」，抑是「逐擺」攏會使，風颱暝「攏通」平安過。　　﹡「共風颱按怎」，「攏通按怎」，「通thang按怎按怎」是咱足台語的講法，　　　愛共抾轉來用。二、講予你知：風颱歇假日　◎風颱假，敢是歇假日？　＊勞基法：　　《勞動基本法》內面有規定，咱的假有分做這兩大類：　．予勞工歇喘（特休、例假、歇睏）的歇睏假。　．滿足生活需求（病、婚、喪等假）：破病、結婚、厝內有人過往，抑是生囡仔等等　　的這款假。　　風颱假到底是第一種？抑是第二種？敢若攏毋是。　　　＊行政院《天然災害停止上班及上課作業辦法》。　　風颱假伊的目的，就是希望咱勞工朋友，毋通佇咧這个天然災害，也就是風颱來的　　時陣，佇咧去上班的路裡，抑是轉去厝裡的路裡，去受著危險，欲避免這个危險，　　所以講會當佇厝內面歇睏。　　會當予政府做這个決定，其實是因為行政院有一个辦法，叫做《天然災害停止上班　　及上課作業辦法》，就是這个辦法，咱一寡各縣市的市長，會當佇風颱來進前，　　根據氣象提供的資料來決定，是欲歇假，抑是欲繼續上班。　　＊本質是公家單位行政規則，毋過民間嘛會參考綴咧歇假　　本來是適用佇咧公家單位的一个行政規則，但是每一个民間（單位）攏會使參考，　　綴咧歇假。　　◎風颱政治學　＊變成政客爭取人心的手段　　逐回拄著風颱，逐家就咧講，到底第二工欲放假，無欲放假？逐家攏足關心的，　　結果變做真濟首長，提來爭取人民人心的一个手段。　　＊Maria風颱：仝生活箍仔，歇假顛倒反，民眾困擾。　　7月11號，台北市佇前一工，下晡四點，就決定欲放假，規个台北市逐家攏塞車。　　第二工，雖然講台北市歇了著，沒放假，但是仝一个生活箍仔的新北市，顛倒　　免去上班，逐家舞甲顛倒反，非常困擾。　　風颱假本來咱著愛攢予齊，到底規則是啥，到這陣，逐家嘛是猶　　「扶扶挺挺phôo-phôo-thánn-thánn」，無一个規則，逐家感覺真困擾。　　＊日本、美國　　咱來看日本、美國，“亻因”不管你是公家機關，抑是私人機關，恁家己去判斷就好。　　這个方式，咱台灣人敢真正會當接受？　　◎風颱假應該創啥：風颱若放假，逐家攏咧創啥？　＊無應該四界拋拋走　　風颱假是欲予你佇厝內面，會當了解這馬風颱的情形是按怎，才袂去受著損害，　　逐家無應該四界拋拋走。　　就是這馬攏看著逐家風颱放假的時陣，走出去看電影、踅百貨公司、唱歌等等，　　這攏是無應該。　＊你的娛樂，“亻因”拚命做工課　　因為你出去𨑨迌，你欲做娛樂(gôo-lo̍k又唸作ngôo-lo̍k、gû-lo̍k)，但是共你服務的人　　就拚命做工課。規个想起來，若是講共你服務的這寡人，“亻因”會當去上班，　　去做工課，為啥物你袂當？　＊若會當𨑨迌(tshit-thô)，歇假就無意思矣。　＊提醒咱保持警戒、防災　　實際上來講，若是有放風颱假，其實就是愛提醒咱保持警戒，按怎來防災，咱愛想　　這寡代誌毋才著。若無，這个風颱假一點仔意義都無矣。　　◎語詞　．歇睏hioh-khùn：咱會講是較長的一段時間，可能幾若點鐘，甚至一工、兩工、　　幾若工，攏會當講是「歇睏」。　．歇喘hioh-tshuán：基本上，有時仔會用佇咧較短的時間，敢若講某一个代誌、　　某一个工課之間的閬縫，小喘一下按呢，有閬縫的感覺就著矣。　　．恢復khue-ho̍k：大部份的人攏講「hue」，基本上是“khue“-ho̍k這个音，所以主要是　　這个發音愛共逐家提醒一下。　．歇工hioh-kang：上班的，若是有歇假，就是叫做「歇工」。　．歇學hioh-o̍h：讀冊的，就是叫做「歇學」，毋免去學校讀冊的意思。　　是「歇學o̍h」，毋是「歇學ha̍k」。　　是咱去讀啥物「學o̍h」仔，就是以早有可能「暗學(o̍h)仔」、「漢學(o̍h)仔」這款，　　這是白話音的講法。　　．訕潲suān-siâu：若是風颱假放無好勢，歇無好勢，逐家就訕潲甲欲死。　　重點是彼的「訕suān」，你若講「共人訕」、「予人訕」，彼的「訕suān」就是用　　較無好聽的話去罵的意思，通常的意思就是閣較受氣，是足濟憤怒，啥物情緒佇遐　　就會用這款的去形容，主要是咧講輿論。就會夆訕潲甲欲死。　．損害sún-hāi：sún是文言音。　．損蕩sńg-tn̄g：sńg是白話音。　　佇遮咱是特別提醒一下，因為有足濟語詞，咱可能沓沓較袂記得白話音的讀法、　　發音，攏知影文言音的講法，這嘛是其中一个例。　　咱可能知影「損(sún)害」、「損(sún)失」，　　其實白話音是「損(sńg)害」、「損(sńg)失」，損蕩(sńg-tn̄g)嘛是白話音的講法。　　．扶挺phôo-thánn：「扶phôo」佮「挺thánn」雖然是兩个動作，定定合起來用。　　咱講「用手共扶(phôo)起來，共挺(thánn)咧。」共伊『支撐』，共伊擋牢咧，　　莫講予伊落落來。通常攏用佇咧共人褒嗦(po-so)，共人甚至是到『拍馬屁』彼種　　意思、彼个程度。　　逐家普通時仔干焦講「扶phôo」，誠愛共人「扶phôo」。　　挺thánn，因為「挺」就是愛停佇一个所在，莫振動，「扶」是彼的動作，大部份　　攏講「扶」較濟。　　．警戒kíng-kài：大部份的人可能攏慣勢講「警(kìng)戒」、「警(kìng)察」，　　按呢的講法，其實伊本來的音是「警kíng」變做「king」，讀做「警戒kíng-kài」。　．𤲍燒kheh/khueh-sio 　　《教典》：『和別人擠一擠，藉以取暖。』　　　　例：你哪會遐愛𤲍燒？　　　　　　Lí ná ē hiah ài kheh-sio? 　三、看戲齣(hì-tshut)講台語　◎伊共店拍予我啦。　　I kā tiàm phah hōo--guá--lah. 　．「店」是用「拍」的，共店拍予我，我拍這間店。「拍」本來是足生活性的字，　　這馬愛共撿轉來。　　◎空喙哺舌，凡勢是諞仙仔。　　Khang-tshuì pōo tsi̍h, huān-sè sī pián-sian-á. 　．空喙哺舌khang-tshuì pōo tsi̍h：　　可能逐家普通時嘛定定聽著，歌詞定定有，戲劇嘛定定出現。　　意思就是，你干焦靠一支喙按呢講，糊瘰瘰(hôo-luì-luì)，無真正做啥按呢。　　．諞仙仔pián-sian-á：　　這馬可能有的人會講「騙子phiàn- tsú」，華語講『騙子』，意思就是共人諞的。　　台語的「騙phiàn」佮「諞pián」，伊的用法無仝款。　　老師講著重點，「你毋通共我諞(pián)。」咱毋是講「你毋通共我騙(phiàn)。」，　　「騙(phiàn)」一般用佇「騙囡仔」，就是『哄騙』的意思。這兩字台語是有分，　　這就是咱台語佮華語足大的差別，華語就是『騙』，咱台語就是「諞(pián)」，　　咱攏知影「騙」就是愈來愈少人知影「諞(pián)」。　　「騙囡仔」，毋是咧共欺騙，是希望伊會當乖乖，咱嘛是用疼惜的心，但是　　毋是咧共欺騙。　　◎人心佇內　　Lâng.-sim tī lāi 　．意思就是講「有時仔對外表看袂出心肝咧想啥」。華語是『人心隔肚皮』。　　◎白白去予人𧿬踏--去　　Pe̍h-pe̍h khì hōo-lâng thún-ta̍h—khì. 　　通常若用「𧿬thún」、「踏ta̍h」，其實是兩个動作。　　「踏ta̍h」，就是踏塗跤的「踏」，走踏的「踏」。　　彼的「𧿬thún」，一般是共伊創甲亂操操，舞甲亂操操。　　兩个字共鬥起來，就是共人糟蹋的意思。　　　𧿬thún：毋通佇眠床頂𧿬(thún)，創甲亂七八糟。 ## [2018.08.30《台語講世事》：環保自然葬](https://youtu.be/Tm6j7xQVIMA) 一、看新聞講台語：擴大納骨塔殯葬特區，新莊民眾激憤抗議　＊翻譯　 1.華語：擠進了將近100位民眾　　台語：就有成百（規百）个民眾𤲍佇內底　　　　　tō ū tsiânn-pah (kui-pah) ê bîn-tsiòng kheh tī lāi-té 　　﹡『將近一百』欲按怎講數量？咱台語會講「成百个」，抑是「規百个」這種講法。　　　「成百个」就是接近100，猶未到100。「規百个」嘛是仝款。　　　「規」閣加一个啥物數量，就是「接近」彼的數量。　　﹡「規(kui)百个」是接近100，「幾(kuí)百个」是「幾若(kuí-nā)百个」，音無仝，　　　逐家愛注意。　　﹡咱台語重點是囥佇後壁，啥物所在有成百个𤲍佇內底，　　　咱是咧講「已經是𤲍𤲍𤲍的狀態」。　　 2.華語：拉板凳坐　　台語：捎椅頭仔來坐　　　　　sa i-thâu-á lâi tsē 　　﹡『板凳』就是「椅頭仔」，嘛有人講「椅古頭仔」，攏無講蓋大隻，攏袂蓋重，　　　所以用「捎sa」這个動作就會使。　　﹡通常就是講無蓋大，抑是講無蓋重的物件，咱用手去提，就叫做「捎sa」，　　　提一下就來矣彼種的，就用「捎」的，敢若講輕可輕可，袂蓋費氣按呢。　　　毋通講「搝(giú)椅仔」來坐，「搝giú」咱無用佇這款動作，「搝」是別款動作。　　﹡「椅條仔」是長條的。　　 3.華語：個個群情激憤　　台語：逐家是憤慨甲(「甲」後壁省略，這个「甲kah」愛讀變調。) 　　　　　ta̍k-ke sī hùn-khài kah 　　﹡「逐家」是每一个人，「個個」就是「逐家」。　　﹡「憤慨甲」後壁猶閣有一句猶袂講出來，定定口語內底，這種「句」會當省略，　　　毋免講甲足完整，人嘛知影咱的意思矣。　　﹡「甲kah」：「忝甲」、「飽甲」，彼攏是省略，應該講較完整，可能就是　　　「忝甲欲死」、「飽甲欲害」這種的，但是咱毋免講遐完整嘛知影意思。　　　「甲」後壁攏總毋免講，但是這个「甲kah」仝款愛變調。　　 4.華語：省吃儉用　　台語：儉腸凹肚　　　　　khiām-tn̂g-neh-tōo 　　﹡這个「凹neh」，可能各地方有無仝款的講法，有的人講「nài--落去」，　　　有的人講「凹neh--落去」，有的人講「塌lap--落去」，有幾若種講法。　　　意思就是講「腹肚扁去，無腹肚」。　　 5.華語：越說越火大　　台語：講甲心狂火著　　　　　kóng kah sim-kông-hué-to̍h 　　﹡「愈講愈火大」嘛是會使，毋過咱提供另外一種講法，意思就是講　　　「這个講的過程，致到按怎」、「講甲啥物狀態」。　　﹡「心狂火著」咱知影這个用法就是形容「足受氣，規腹火」，　　　咱用一種毋是用「愈講愈按怎」，是講「講甲按怎」，就是咧講「狀態」就好，　　　這嘛是一種表達方式。　　﹡咱會當兩句攏講「愈講愈火大」，沓沓仔火愈來愈大，行到上尾仔，　　　「講甲已經心狂火著」，規个著起來。　　 6.華語：請問　　台語：借問tsioh-mn̄g 　　﹡咱一般口語古早攏講「借問」，「借問一下，電視台欲按怎行？」，　　　按呢的講法。就是講咱用「借問」，這就是台語的講法。　　﹡「請」後壁閣加一个啥物動作的時陣，一般是欲講「請對方按怎」，　　　「叫對方做這件代誌」。譬如講：　　　「老師，請啉茶。」，老師就啉茶。　　　「老師請指教」，就是叫老師共我指教。　　　若是講「老師請問」，老師就講「你欲叫我問啥？」所以咱嘛是繼續講「借問」。　　 7.華語：急著表態跟選民站在一起　　台語：急講欲佮選民徛鬥陣　　　　　kip kóng beh kap suán-bîn khiā-tàu-tīn 　　﹡咱一般會當講「急欲按怎」，抑是加一个「講」，「急講欲按怎」，按呢的方式　　　就是表示這个意思。這个「講」，無一定是「喙講出來」，彼是一種表達方式，　　　有可能你是用寫字的，有可能你是共我使目尾的，抑是你用啥物其它方式表達，　　　毋是一定是「講話」。　　 8.華語：誓言抗爭到底　　台語：放聲講欲抗爭到底　　　　　pàng-siann kóng beh khòng-tsing kàu-té 　　﹡若就表面華語來看，是毋是愛咒誓(tsiù-tsuā)？當然有人可能會透過咒誓來表態，　　　但是這種狀況下，咱會當共人講「我就是欲共你唱(tshiàng)」，抑是　　　「共你放聲講按怎」的意思，「我就是大聲表達我的訴求」。　　﹡『誓言怎麼樣』佇咧華語的意思，就是「放聲講」，　　　但是咱台語的「咒誓tsiù-tsuā」，可能有一定的儀式，抑是講按怎。　　　但是這句其實無到「咒誓」的程度，干焦「放聲講」這款的意思。　二、講予你知：環保自然葬　◎台灣的喪葬儀式　＊古早：入土為安　　甚至可能閣較早進前，土葬進前閣有其它的方式嘛無一定。　　＊墓壙揣無地　　但是這馬漸漸發現，墓壙揣無地矣，欲按怎咧？　＊觀念漸漸改變，火化比例那來那懸　　根據內政部的資料：　　　　　　　　　火化數量　　　占死亡人數比例　　　2007年　　　12萬3千外　　　87.8% 　　　2017年　　　16萬6千外　　　96.2% 　　　　　　　　　增加三成　　　加8.4个百分點　◎火葬的現況(hiān-hóng) 　　雖然講這馬逐家的觀念，漸漸仔會當接受「火葬」，但是火葬的現況，嘛是有　　淡薄仔問題。　＊塔位供給袂赴需求，就是講嘛已經無夠用矣。　＊台北市公立靈骨塔，有三座，一座已經滿矣、賰的兩座嘛咧欲滿矣。雖然「火葬」　　逐家會當接受，但是漸漸仔已經欲無位矣。所以這馬政府開始閣咧想後一个辦法。　　◎環保自然葬是啥物　＊仝款火化燒做骨烌(kut-hu)　　　＊無仝款的所在：　　無囥黃金甕仔、無囥靈骨塔、無徛碑　＊「環保自然葬」有足濟種，看你欲採行的是佗一種。　　樹葬、花葬、海葬、掖葬，予骨烌成做土地、自然的一部份　　譬如講，咱若是用樹葬，抑是花葬，就是共骨頭燒做骨烌了後，囥佇塗裡，抑是講　　埋佇樹根的邊仔，所以講佇骨烌的四周圍仔，咱就栽樹仔，抑是栽花，按呢　　沓沓仔一冬、兩冬，骨烌就變做是自然的一部份。　　◎按怎推捒環保自然葬　＊挑戰民眾觀念：欲按怎拜祖先？　　這馬的人攏注重環保，這个觀念，應該逐家攏會當接受才著。其實，嘛有人咧挑戰　　這个觀念，挑戰的民眾會講「若是按呢處理，後擺是按怎拜祖先？」無徛碑，　　無黃金甕仔，嘛無靈骨塔，欲按怎拜？是毋是到時陣，「清明」會消失去？　　逐家攏真煩惱。　　＊禮俗會綴社會變遷來改變　　觀念已經對「土葬」變做是「火葬」，但是「清明」嘛是無消失去呀！　　所以禮俗確實是會綴社會變遷來改變。　　咱愛思考「祭拜祖先」，應該毋是一个形式而已，應該是予囝孫數念祖先的　　一種心情。　　＊墓地成做公園，不管時會當去　　咱若用「環保自然葬」，墓地就變做公園，有樹仔，閣有花，不管時咱攏　　會當去，袂親像講這馬一年才去一遍。　＊思考禮俗的意義、人佮土地的關係　　(環保自然葬)好、䆀，逐家攏咧思考當中，所以咱會當藉由這个機會，　　思考一下，咱所講的禮俗，到底意義是啥物，咱會當來思考咱人佮土地的關係，　　到底是成做啥物款的情形。　　◎語詞　．咱人lán-lâng：有兩个意思，　　1.一般佇民間大部份是咧講「舊曆」。　　2.有人用佇咧講『我們人』，「咱人佇這个世間按怎按怎」。　．相送sio-sàng：咱希望咱親情朋友按怎共咱相送，這算是一寡儀式的『統稱』，　　婉轉的講法。　．尾站bué/bé-tsām：人生的上尾站，上煞尾仔，敢若袂輸坐車到上尾站，咱的　　親情朋友按怎共咱相送，這兩个語詞寫起來足有感情。　　．墓壙bōng-khòng：　　這个詞較少人知影，嘛較少人講，就無墓矣，按怎有墓壙？　　「墓壙」就是彼的貯棺柴的墓穴，抑是講墓仔埔內底彼个空。　　．火化：仝款漢字，但是無仝款的發音，無仝款的意思。　　Ａ.火化hué/hé-huà：這馬已經有90幾phah的人是用火化的方式，行這上尾站，　　　按呢較環保，嘛袂佔空間。　　　咱若是有共「連字符」彼條橫線連起來，「火」佮「化」共連起來，就是　　　咱咧講的「共燒，變成骨烌」按呢，就是「火化hué/hé-huà」。　　Ｂ.火化hué/hé hua：若是「無連字符」，就是「火化hué/hé hua」。　　　「火化去」就是用這兩字。若是欲寫較詳細，講較清楚，是講「火化去」，　　　咱較無單獨講「火化」爾，會加講一个「輕聲的“去”」。　　　﹡所以，後擺咱咧讀文章的時，若是講看著，你愛按照頭前、後壁的字去判斷，　　　看到底是「火化hué/hé-huà」，抑是「火化hué/hé hua（去）」。　　　漢字有時仔會拄著這款狀況，羅馬字就無這號問題。　　．骨烌kut-hu：火化了後變做「骨烌」，「烌hu」就是這字，就是足幼足幼按呢。　．黃金甕仔hông-kim-àng-á：「黃金甕hông-kim-àng」無「仔á」嘛會使，　　就是貯骨烌的甕仔。　　因為會共「黃金」用字囥佇遮，主要就是咱傳統的觀念，共先人抑是講祖先的　　骨頭、骨頭烌，當做是寶貝，所以講用一个較好的、較吉兆的名，雖然看起來是　　「黃金n̂g-kim」，是白話音的讀法，其實有彼个意思，　　毋過咱無讀「黃金n̂g-kim」，咱讀文言音「黃金hông-kim」。　　．徛墓牌khiā bōng-pâi：咱若是照一般傳統土葬的方式，一般著愛徛墓牌，　　彼个直直的按呢，所以攏講「徛khiā」。　．徛碑khiā pi：「碑pi」一般來講是「紀念碑」、「石碑」彼款的。　．埋tâi：是白話音，埋(tâi)落去。　．埋葬bâi-tsòng：埋(bâi)這是文言音的講法。　三、看戲齣(hì-tshut)講台語　◎你莫佮我佯生　　lí mài kap guá tènn-tshenn/tìnn-tshinn 　．佯生tènn-tshenn、tìnn-tshinn，兩種腔口差攏有，攏會當講。　．「佯」這字就是「假影按怎」，「生」就是「生疏」、「生份」，　　「你莫佮我假影你毋知」，「假影你攏無了解。」彼个意思。　　◎觀目、詼諧、跤步、手路　　kuan-bo̍k, khue/khe-hâi, kha-pōo, tshiú-lōo 　　這就是傳統戲劇內底，對演員，包括眼神、表情，抑是講動作、表演型態等等的　　一个綜合的講法。　．跤步、手路：可能咱對後壁兩个詞，較有印象，人講「跤步手路」，嘛無一定　　愛用佇咧戲劇當中，落尾延伸，用佇咧一般生活，咧形容一寡人的可能伊的　　台風啥物，一般是咧講可能做人，抑是講咧處理代誌的部份。　．觀目、詼諧：可能咱一般已經較生疏，較無聽人講矣，主要是咧講眼神、表情、　　行動這方面的物件。　　◎一下失覺察，就準備去做海龍王的囝婿　　tsi̍t-ē sit-kak-tshat, tō tsún-pī khì tsò/tsuè hái-lîng/liông-ông ê kiánn-sài 　．咱主要是欲講「一下失覺察」這个講法，因為咱可能這馬攏講啥物『一不小心』、　　『一不注意』、『恍神』這方面，咱台語的講法就是「失覺察」。「一下tsi̍t-ē」　　就是講『一怎麼樣』的彼个意思。　．愛注意「失覺察」，拄好三字攏入聲的，歹唸，韻尾有舌尖的，有舌根的，　　這種的讀法無蓋好講。　．「海龍王的囝婿」咱應該真知影，就是講沉入海底。 ## [2018.09.06《台語講世事》：學生在校禁用手機?](https://youtu.be/6fT_2rwwrGk) 一、看新聞講台語：學生校園禁用手機，私校行之有年　＊翻譯　 1.華語：一個個排隊　　台語：一个一个排隊　tsi̍t-ê-tsi̍t-ê pâi-tuī 　　﹡咱台語數量佮量詞攏袂使省的，攏愛講，所以就是愛講「一个一个排隊」，　　　華語『一個一個』省做『一個個』，咱台語袂當省，咱嘛是愛「一个一个」，　　　而且這四个字愛連做伙，毋是「一个」就斷，「一个」就斷，愛連四字，　　　所以第一个「个ê」愛變調。　　 2.華語：其餘時間並沒有硬性規定　　台語：賰的時間無強制規定　tshun-ê sî-kan bô kiông-tsè kui-tīng 　　﹡『其餘時間』就是「賰的時間」。　　﹡所謂的『硬性』，若是欲講「硬按怎規定」，按呢嘛是一種講法，嘛是會使。　　﹡這个「強制」，會較硬，閣較硬，比硬閣較硬。因為咱台語的『硬』有兩種，　　　一个是「硬(ngē/ngī)」，另外一个是「𠕇tīng」。通常「𠕇tīng」是佇咧彼種　　　「無法度恢復的程度」的物件，咱會用「𠕇tīng」，若是彼號有可能伸勼(tshun-kiu)的，　　　有時仔是硬的，有時仔是軟的，有時仔是啥物款狀態。　　﹡咱欲講「硬按怎規定」，嘛毋是講完全袂使，毋過「強制」會閣較強，所以，　　　佇遮咱就是用「強制規定」，若是用「硬」，就是看人，在人，會當伸勼　　　就著矣，毋過嘛是有人按呢用。若是佇咱台語，確實欲討論起來，有這款的　　　差別都著矣。　　 3.華語：低頭族　　台語：向頭族　ànn-thâu-tso̍k 　　﹡主要是『低頭』這个動作，咱會講「向頭(ànn-thâu)」，毋是「低(kē)頭」，　　　是「向(ànn)頭族」。　　 4.華語：同儕　　台語：同窗　tông-tshong 　　﹡學生這種的，咱會講「同窗」。　　﹡但是『同儕』無一定是「同窗」，你愛看囥佇tueh用，公司的就是「同事」，　　　若鬥陣做兵的，就是「仝梯的」。　　 5.華語：你都一直在滑手機　　台語：你攏一直咧掰(pué) /扌回(huê) / 趨(tshu) / 跙(tshū)手機仔　　﹡重點是這个『滑』欲按怎講。　　　上頭先有聽人攏直接翻，講「滑(ku̍t)」的，「滑(ku̍t)」手機仔，你若干焦聽　　　這个音，咱會想講是欲「掘」芋仔，「掘」啥物番薯，彼个「掘」。閣來是　　　講動作，手的動作（用手指頭撥動）到底是欲叫做啥？咱會當來討論。　　　1.掰(pué)：這字嘛定定有聽著，佇咱生活中，　　　　　　　「頭鬃亂矣，掰(pué)一下」、「目屎掰(pué)袂離」，　　　　　　　通常是欲共伊用掉、去掉彼的動作，創較邊仔咧，共去掉，離開　　　　　　　某一个範圍，通常會較大力--小可啦，若是以這幾个來講。　　2.扌回(huê)：「扌回(huê)」就足輕的喔！輕輕仔「扌回(huê)」一下，　　　　　　　嘛袂到無感覺，毋過彼是足輕足輕的動作。　　3.趨(tshu)：因為有人講「趨(tshu)冰」、「趨(tshu)雪」彼个動作。　　　　　　　所以有人是講「趨(tshu)」有兩種意思，一个是有「斜斜(tshiâ-tshiâ)」　　　　　　　有斜度的，另外一个就是講「嘛是算『滑』的意思」。　　4.跙(tshū)：有的人是講“地方差”，其實嘛是彼个「滑」的動作。　　　﹡若是這四个，豐惠老師會傾向第二个「扌回(huê)」。　　　因為咱這个動作，這並無足重，輕輕仔都好，而且你嘛毋免講其它的足出力，　　　抑是足按怎的動作，若是這四个來講，會感覺用「扌回(huê)」比較較適合。　　 6.華語：不適合由教育部直接訂定「無手機日」　　台語：教育部若直接訂「無手機日」無啥好勢　　　　　Kàu-io̍k-pōo nā ti̍t-tsiap tīng bô-tshiú-ki-ji̍t bô siánn hó-sè 　　﹡台語重點會囥佇後壁，咱講「啥物代誌無啥好勢」。華語『不適合寫在前面』，　　　咱台語較重要的物件是寫佇後壁，「按怎按怎無啥好勢」。　　 7.華語：學生要不要帶手機上學　　台語：欲予學生紮手機仔去學校--無　　　　　beh hōo ha̍k-sing tsah tshiú-ki-á khì ha̍k-hāu--bô 　　﹡若干焦看這个華文的字面，你會講「是學生欲抑毋？」，　　　咱這馬毋是講學生家己的意願問題，是講教育部，或者講學校，抑是家長，　　　是毋是欲予學生紮手機仔去學校，所以咱講「欲按怎無？」。　　﹡『帶手機』：紮(tsah)手機仔　　　『帶女朋友』：𤆬(tshuā)女朋友，毋通「紮(tsah)」女朋友，這嘛是足基本的，　　　這馬嘛足濟人攏講毋著去，攏濫做伙。二、講予你知：學生在校禁用手機? 　◎現代人佮手機仔的關係　＊無手機仔就無安全感：有人講「無手機仔，就敢若無穿衫仝款」　＊資策會統計八成外中重度的使用者　　中度：一工用兩點鐘至五點鐘，按呢算「中度」，有50%。　　重度：一工用超過五點鐘，就是號做「重度」，差不多有30%。　　加加咧，有八成，你會當想看覓，你是中度抑是重度？　＊工課、娛樂、生活攏會用--著　　因為手機仔實在太好用矣，毋管你欲查資料，看地圖，佮人開講，抑是買物件，　　一支手機仔攏會當解決。工課、娛樂、生活攏會用--著，手機仔真正是非常的重要。　＊重度依賴：用超過五點鐘　　你敢是重度的依賴者？一工用超過五點鐘無？　　◎全球性的手機仔依賴症　＊全球普遍現象　　咱對手機仔的依賴現象，毋是干焦咱臺灣，這是全球性手機仔依賴症的現象，　　全世界的人攏有普遍這款的現象。　＊囡仔自我控制較頇顢　　用手機仔的年歲，層次遮爾仔濟，內面少年人上需要夆關心，因為囡仔人伊對時間　　的控制，較無法度，若針對網路頂濟濟的資訊，伊閣毋知影欲按怎來選擇，囡仔　　自我控制確實較頇顢佇咧，所以發生真濟問題。　＊法國禁止國中小學生校園內用手機仔　　法國怹佇今年9月開始，有一條法律就欲出來矣，怹欲禁止國中小學生佇咧學校　　內面，袂當用手機仔，這是這馬法國總統的政見。　　為啥物法國人欲禁止學生囡仔用手機仔咧？因為怹法國人有九成的學生囡仔　　有手機仔，結果發現足濟問題，譬如講上課的時陣，無咧上課，下課的時陣，　　嘛無咧下課，以前咱下課攏會出去𨑨迌啦，佮朋友開講啦，這馬嘛攏無矣，　　下課了後，逐家嘛是繼續坐佇咧教室內面，咧耍怹的手機仔。　＊教育觀點：影響上課、學生健康　　濟濟的問題來發生，法國就按呢來決定，怹的教育部長提出這个看法，講手機仔　　毋但影響著教育部份，影響著上課，閣嘛影響著學生的健康，毋管是心理上，抑是　　講身體上，攏出現一寡影響就著矣。　　◎台灣的狀況(tsōng-hóng) 　＊因為手機仔佮爸母冤家衝突比例懸　　最近定定看著新聞內面講，因為手機仔，學生囡仔、少年人佮爸母冤家起衝突的　　比例，是愈來愈懸，甚至咱有聽咧講有這號家長閣會𤆬囡仔，因為手機仔的代誌，　　去揣心理醫生來做諮詢，甚至閣有聽過一个新聞講，父母因為共囡仔的手機仔，　　無愛予伊用，結果有跳樓的這款的新聞出現。　　所以講咱這馬臺灣的情形嘛是誠嚴重。　＊管理辦法：愛家長同意申請　　這馬咱學校的管理辦法攏差不多，就是講咱的學生囡仔，若欲提手機仔去學校，　　學校就愛有家長的同意，愛閣申請，寫講為啥物愛紮手機仔去學校。　＊放學進前袂當用　　提去學校了後，嘛是仝款，放學進前攏袂當用，就有老師佇咧早起的時陣講　　「來，逐家共手機仔交出來。」囥佇咧一个所在，號做「養機場」，囥咧遐　　共「養」咧，下課了後才會當提轉去用。　＊家長有無仝看法　　咱佇咧臺灣的學生囡仔，怹咧學校敢會當用手機仔？家長有無仝看法。　　◎家長應該按怎做　＊校園內用手機仔的好䆀猶無共識　　有的家長就會講，手機仔不止仔好用，學生會當揣資料，讀書的時陣嘛需要　　揣資料。　　閣來，我的囡仔有手機仔，我佮伊聯絡較方便，按呢嘛真安全。　　各種的講法攏有，學校內面用手機仔的好䆀，佇咱臺灣猶無共識。　＊家己做好模範、規矩講好勢　　建議咱的家長上好對家己做起，毋管是佇咧厝內，抑是佇咧學校，佮咱的囡仔，　　先做好一个模範，規矩愛講予好勢。　＊佮囡仔溝通，教“亻因“愛有撙節　　咱家己佮囡仔講話的時陣，毋通那講話那用手機仔，你若家己做好示範，相信　　咱的囡仔攏會佮咱做學習，教怹愛有站節。　　◎語詞　．笑詼tshiò-khue/khe：無提手機仔，就敢若無穿衫。　．掰(pué) /扌回(huê) / 黜(thuh)手機仔　　黜(thuh)手機仔：單獨用指指(kí-tsáinn)欲去點啥物貨，按呢用「黜」猶閣會使。　　「黜黜」是單點，敢若講輕輕仔點一下點一下，無一定愛「黜」予破。通常是　　較長，較尖的物件，去tú佗位的彼款動作，叫做「黜」。　　有的人嘛會認為講，我用「黜」的敢若嘛著，確實有當時仔是用「黜」的無毋著。　　應該是講「點」，你若「黜」傷大力嘛無效，愛輕輕仔點。　　「黜」，咱一般有用佇咧其它的所在，長的、尖的物件黜佗位。親像黜枴仔，　　這嘛是一種用法，行路無方便，我愛黜枴仔行路，黜咧黜咧。　　．拑牢牢khînn-tiâu-tiâu：咱定定共手機仔「拑牢牢」。意思就是講，你欲共一項　　啥物物件攏共掠咧，或者是按怎固定攏無欲放，按呢的動作就是「拑khînn」。　　「拑khînn」的動作無一定是「手」的動作，伊其實有較抽象的意思，就是你欲共　　某一項啥物物件，有可能是較抽象的，你欲共伊規个顧咧，無愛離開這个範圍內的　　這款意思。　　．依賴i-nāi：「nāi」是「賴」的文言音。　　但是咱這馬大部份的人攏講「依賴i-lāi」，是受著『賴ㄌ』「l」的影響。　．誣賴bû-luā：「賴luā」是白話音。姓「賴luā」，「賴luā」先生。　　．篩選thai-suán：用「篩thai」的，以早的「米篩(thai)」，去「篩」，去「揀」出來　　按呢，叫「篩選thai-suán」。　．欲望io̍k-bōng 　．欲beh：依教育部用字來講，伊是算一个「替代用字」，有時仔是無一定有所謂的　　「古正字」，抑是「原本的字」通好用的時陣，有可能有，但是你用彼款字，　　這馬的人嘛足生疏，毋知影，所以有時仔用「替代用字」。　．注神tsù-sîn：專心一意去注意啥物代誌，所有的精神攏佇遐，叫做「注神」。　．沒收bu̍t-siu：手機仔提去學校，會去予老師「沒收(bu̍t-siu)」，這是較文的講法。　三、看戲齣(hì-tshut)講台語　◎會呼雞，袂歕火　ē khoo-ke/kue, bē pûn-hué/hé 　　華語的意思就是『上氣不接下氣』，但是咱台語就是按呢講。　　欲按怎「呼khoo」？（慧盈老師講「雞仔你來。」哈~😄）　　＊「呼雞」就是足簡單的動作，學彼號雞仔的叫聲，算咱庄跤生活足四常會做的　　　代誌的動作。所以就是「毋免費力，你就會當做這个代誌。　　＊「歕火」就是你欲起灶，以早無這馬遐爾方便，攏愛燃柴起灶，起灶真正愛　　　出足大力的，較有法度共彼个灶，氣一定愛足在、足足的，才會當共灶燃柴　　　燃起來。　　＊「歕火」哪有啥物困難？食雞蛋糕的時陣，「歕火」歕一下就好。　　　但是問題食雞蛋糕彼種，袂使講「歕火」，　　　因為「歕火」是欲予火「著(to̍h)--起來」，蠟燭、蠟條彼是火化去，　　　是「歕予化(pûn hōo hua)」，「歕火」是欲「歕予著(pûn hōo to̍h)」，　　　意思無仝款。　　◎拄好就好　tú-hó tō hó 　　華語是講『適可而止』。　　「拄好」嘛是台語誠定定咧用的。　　◎手按呢反反　tshiú án-ne píng-píng 　　這足趣味的，這足特別的用法。　　因為這是戲先的咧𤆬演員的時陣，咧共伊講手勢愛按怎比，「你手按呢反反」，　　意思就是「伊無正，無照彼个手勢」，用「反反píng-píng」，這是足台語的講法。 ## [2018.09.13《台語講世事》：深海魚塑膠危機](https://youtu.be/eV2qZBq-onQ) 一、看新聞講台語：師生藏水沬抾糞埽(pùn-sò) 　＊翻譯　 1.華語：潛水客七手八腳在海底撿東西　　台語：逐家藏水沬佇海底無閒tshih-tshah咧抾物件　　ta̍k-ke tshàng-tsuí-bī tī hái-té bô-îng-tshih-tshah leh khioh mi̍h-kiānn 　　﹡『潛水客』，這字『客』，咱台語的「人客」就明顯是人客，佇遮當然咱無適合　　　直接講「人客」，所以咱毋免去講啥物人，「逐家藏水沬」就是表示遮个人　　　就是藏水的人。　　﹡『潛水』就是「藏水沬(tshàng-tsuí-bī)」。　　﹡『七手八腳』就是「無閒tshih-tshah」。　　 2.華語：浮潛　　台語：浮水沬　phû-tsuí-bī；snorkeling 　　﹡咱會當考慮看欲按怎翻譯較好勢，就是講『浮潛』的意思，　　　到底是「伊佇咧足淺的海面下跤，咧泅」的意思，有時仔會浮出來，抑是無，　　　攏一直佇咧淺水咧泅？　　﹡一般「藏水沬」有揹遐的家私，　　　『浮潛』就無，伊就予你一个塑膠的欶管(suh-kóng)，按呢就浮咧水頂面。　　　所以「浮水沬」會使考慮。　　﹡浮咧浮咧，咱嘛會當考慮「浮泅」，伊嘛是泅水的方式其中一種。　　　咱浮佇水面，有一寡簡單的物件，會當向海底看。　　﹡「沬bī」的意思應該是講「沉佇水底」，但是這个水底嘛無講是偌深，　　　「沉--落去」就是佇水面下跤，水內面，愛沉入去。『浮潛』浮咧浮咧，　　　上無面是小可佇咧水下跤，「浮水沬phû-tsuí-bī」。　　 3.華語：眾人賣力將垃圾掃入漁網袋中　　台語：眾人骨力共糞埽掃入去罟仔內　　　　　tsìng-lâng kut-la̍t kā pùn-sò sàu ji̍p-khì koo-á-lāi 　　﹡『眾人賣力』就是「眾人骨力」。　　﹡『漁網』，「漁網仔」當然嘛是會使，另外一个講法，古早傳統講法，　　　講「罟koo」、「罟仔koo-á」，彼就是「漁網仔」的意思。　　　以早有一種「牽罟」的講法，彼是講「眾人較濟人來牽較大的網仔，　　　逐家鬥陣搝咧，欲去做掠魚的動作。」　　 4.華語：引發我們想要幫魚打掃家的環境　　台語：予阮想欲替魚仔的徛家摒掃　　　　　hōo guán siūnn-beh thè hî-á ê khiā-ke piànn-sàu 　　﹡『引發』主要是予咱想欲按怎，所以直接講「予阮想欲按怎」。　　﹡因為較「擬人化(gí-jîn-huà)」，就是共魚仔當做敢若人，有一个徛家，　　　所以就講欲摒掃伊的徛家。　　 5.華語：穿上全副的潛水裝備　　台語：藏水沬的家私規軀穿好好　　　　　tshàng-tsuí-bī ê ke-si kui-su tshīng-hó-hó 　　﹡『裝備』咱會當講是「藏水沬的家私」，「家私」包括衫，工具也好，　　　或者是器具，抑是有一寡設備，彼攏會當講是「家私」。　　「為著藏水沬欲愛用的遐个家私」。因為一般是規軀，規套的，穿好好來形容。　　﹡咱台語欲講的物件攏囥佇後壁，較重要的，動詞，抑是欲強調的物件囥後壁。　　　華語是『穿上』按怎按怎，咱都按怎按怎「穿好好」。　　　﹡「穿好」佮「穿好好」的差別：　　　若是「穿好好好」，咱一般會用其它的表達。　　　「穿好好」佮「穿好」，其實中央有省略一个“予”，「穿“予”伊好好」，　　　「穿“予”伊好」，一个省略的講法，當然你欲講完整嘛會使，若是一般口語　　　無講遐爾長，咱就講「穿好好」。　　﹡若是用形容來講，本來咱兩字的，其實伊的程度是較輕。　　　譬如講這馬足「熱」，「熱」佮「熱熱」，其實「熱」程度比「熱熱」較熱，　　　毋是字較濟，程度較懸，顛倒是倒反。　　﹡「穿好好」是咱台語有一寡疊詞的用法，就是ABB，Ａ可能是一个動作，　　　「好好」是咧形容伊的。親像講「食飽飽」嘛是。　　 6.華語：海膽、　　海參、　　　　　　海星　　台語：hái-tánn、hái-sim/som/sam、hái-tshenn/tshinn 　　 7.華語：結合生態保育與海洋教育　　台語：共生態保育佮海洋教育敆做伙　　　　　kā sing-thài pó-io̍k kap hái-iûnn kàu-io̍k kap tsò-hué /tsuè-hé 　　﹡『結合』直接講「結合」，當然咱這馬的人可能嘛是攏真慣勢。　　　但是咱口語的講法，咱是講「共啥物貨敆做伙」，所以講「共這兩項敆做伙」，　　　「共生態保育佮海洋教育敆做伙」。　　　這嘛是仝款，咱定定看著台語是共欲做的代誌囥咧後壁，抑是較重要的，　　　欲強調的物件是囥咧後壁。二、講予你知：海魚塑膠危機　◎塑膠幼仔禁令　＊有塑膠幼仔的，７月起禁賣　　佇咱臺灣，七月開始，咱就有一个法律，欲來禁賣一寡有塑膠幼仔的物件。　＊包括洗髮精、洗顏料、洗浴膏、雪文、磨砂膏、齒膏　　咱咧使用的時陣，有這款的經驗，內面有一寡塑膠幼仔，會當予咱皮膚幼麵麵，　　喙齒鑢較清氣，等等的這種塑膠幼仔，七月開始禁賣。　＊幼仔流入海--裡，魚會食--著　　因為這款幼仔，會流入去海--裡，魚會去食--著。　　◎塑膠汙染對魚的影響　＊大西洋深海魚七成體內有塑膠幼仔　　這馬真濟塑膠糞埽，流入去海內面，對魚有真大的影響。　　西方有一寡專家咧研究，講大西洋深海魚，有七成，遮爾仔懸，亻因的體內竟然　　攏有塑膠幼仔。　＊塑膠沐著食物味，唌魚仔食　　原來一寡塑膠佇咧海內面了後，會沐著一寡食物的味，魚仔都予伊唌去食，　　就食入去腹肚內。　＊腸仔予窒(that)牢，食袂落去枵--死　　一寡塑膠幼仔，佇魚仔的腹肚內，就共魚仔的腸仔腸肚窒牢牢，窒牢了後，　　魚若欲閣食其它的物件，攏食袂落去，所以就按呢枵--死，造成真大的影響。　＊環境hoo-lú-bóng損蕩魚仔健康　　咱攏知影塑膠本身，有一寡環境hoo-lú-bóng（荷爾蒙）佇咧，魚佇咧海內面　　泅水生活，塑膠泡咧水內面，袂輸魚攏泡佇塑膠湯內面，所以會影響魚的健康，　　譬如講影響魚生湠的能力，魚的內分泌。　　◎塑膠汙染對生態、人的影響　＊對深海生態系統有負面影響　　細隻魚去食著塑膠幼仔，食入去了後，大隻魚食細隻魚，無就是鳥仔食大隻魚。　＊深海魚會食細隻魚（串仔、鯊魚、釘挽、鱈魚等）　　深海魚會食細隻魚，譬如講串仔(鮪魚)、鯊魚、釘挽(應該是旗魚)、鱈魚等，　　大隻魚去食細隻魚，細隻魚腹肚窒牢一寡塑膠幼仔。　＊塑膠幼仔透過食物鍊粒積　　塑膠幼仔就按呢，慢慢仔透過食物鍊的方式，粒積佇咧各種生物的體內。　＊嘛是會影響人類的健康　　咱人去食大隻魚，所以規个一層一層影響落來，最後就是影響著人類的健康。　　◎塑膠幼仔的形成　　＊人類製造：美容用品的軟珠仔　　塑膠幼仔分做兩種，一種是咱人咧製造的時陣，就共伊製造親像軟珠仔的方式，　　一寡美容用品內底的軟珠仔，伊本身就是遮爾仔細粒。　＊大海分解：水壓、鹽分、紫外線、風化　　另外一種是塑膠糞埽，入去海內面了後，去予大海共伊分解，大海伊有水壓、　　有鹽分，有紫外線、風吹風化了後，大塊塑膠變細塊塑膠，細塊塑膠變幼塑膠，　　塑膠幼仔就產生矣。　＊ 5~10mm占43%；比0.1mm較細占16% 　　有專家講，大海內面的塑膠，5~10mm的塑膠占43%；比0.1mm較細的占16%，　　這真正是非常的濟，就是這寡塑膠幼仔，去予魚食落去，影響著規个生態。　＊損蕩環境佮健康，食蒜仔吐蕗蕎　　所以咱知影，這毋但是魚的問題爾，損蕩環境佮健康，全部的人，全部的生物，　　攏會受著影響。　　咱千萬愛注意，千萬毋通貪方便，軟珠仔誠方便，結果就是咱食蒜仔吐蕗蕎，　　按呢就真正真害的代誌矣。　　◎語詞　．洗浴膏sé-i̍k-ko：洗喙用「齒膏」，齒膏彼个形，佮洗浴膏是毋是仝款？　　　　　　　　　因為仝款膏膏黏黏。　　﹡敢會當講「洗浴奶sé-i̍k-ling」？若是用「奶ling」，一般是較水。　　　無遐爾膏。較膏的用「膏」，較水的用「奶ling」。　．食物tsia̍h-mi̍h /si̍t-bu̍t：咱一般口語是「食物tsia̍h-mi̍h」，有的人是文言音的　　講法「食物si̍t-bu̍t」，若是講「食物si̍t-bu̍t」，就會佮「植物si̍t-bu̍t」仝音，　　「植物si̍t-bu̍t」無白話講法，有當時就會小可濫摻。　　．hoo-lú-bóng：這是外來語的音譯，咱照外來語的音，直接用音譯，用羅馬字，　　毋免閣製造新的語詞漢字來寫，這就是羅馬字的一个好處。　．內分泌lāi-hun-pì：生物攏會影響，毋是干焦海洋的魚仔，嘛是會影響著人，　　規个生態攏會影響著。　．串仔tshǹg-á：是一種魚，較有名的可能是「烏甕串Oo-àng-tshǹg」『黑鮪魚』，　　　　　　　　是串仔的一種。串仔是總類的講法，有大隻串仔，有細串仔，　　　　　　　　有生生咧食的，嘛有做罐頭咧食的。　　．釘挽ting-bán：這馬的人較生疏，因為逐家攏看漢字，讀「旗魚」，袂記得古早　　　　　　　　其實有這種講法，這可能愛掠魚的人較知影。　　﹡為啥物叫「釘挽」，這馬無啥物直接的資料通好查，毋過就是有這个詞留佇辭典　　　佮一寡掠魚的人有按呢講。　　　按呢真無彩，因為咱台灣是一个靠海的國家，所以講掠魚的一寡文化，攏有　　　囥佇咧咱的字詞內面，這會綴語言的流失就無去，真無彩。　　．海豬hái-ti：有的會加一字「仔á」，「海豬仔hái-ti-á」，足古錐的，唱歌足厲害的，　　　　　　　　唱「海豬仔」音。　．海翁hái-ang：就是一般講的『鯨魚』。「翁ang」用佇遮，表示伊是海內底　　　　　　　　上大的，「翁是上大的」是以前的一个想法。　．phoo/ pho-lí-lóng：這嘛是外來語的音譯，聽著啥物音，就直接講啥物音，　　　　　　　　寫啥物音。　．食蒜頭吐蕗蕎Tsia̍h suàn-thâu thòo lōo-giō. 　　﹡這有足濟方音差，無仝款所在有無仝款的講法。有人講「蕎kioh」，　　　嘛有人講「蕎jiō」，嘛有短音的講法，有幾若種無仝所在無仝講法。　　﹡啥物是「蕗蕎lōo-giō」？　　　一般攏會豉，敢若講一定愛用豉的，逐家較慣勢按呢做，共豉做一盤一盤來食。　　　是按怎會用「蒜頭」佮「蕗蕎」去比較？因為外形足成的，毋過蒜頭較細粒，　　　較普遍，相對嘛較俗，蕗蕎是較大粒，嘛較貴，較稀罕。就是　　　「食較細粒的，較俗的，結果吐較大粒的，較貴的」。就是「袂合」的意思。　　　(據《教典》薤。一種像大蒜的植物，生長初期葉片像細蔥，莖端像韭菜；　　　後期根莖鱗片結球像珠蔥。大多用來醃漬做成醬菜。) 　三、看戲齣(hì-tshut)講台語　◎耳空搤予清氣　hīnn-khang iah hōo tshing-khì 　　「耳空」用「挖óo」的，用「搤iah」的，嘛有人講用「挖ué」的，攏會使。　　◎笑詼甲跋跋倒矣　tshiò-khue /khe kah pua̍h-pua̍h--tó--ah 　　「跋跋倒」疊詞，佮「跋倒」，意思是無啥物精差，咱會用疊詞來形容，　　敢若有較加強的講法，佇這種狀況是按呢。　　◎擲佇塗跤lap 　　tàn tī thôo-kha lap 　　「lap」就是「共踏較大力咧彼个動作」，用跤去大力咧踏的動作。 ## [2018.09.20《台語講世事》：中秋舊風俗](https://youtu.be/9Mc4y-4Xkzc) 一、看新聞講台語：拚結婚基金！中秋跋餅千人搶50萬　＊翻譯　 1.華語：全神貫注緊盯　　台語：目睭擘金注神看　　　　　ba̍k-tsiu peh kim tsù-sîn khuànn 　　﹡主要是講「真注神」，所謂的「集中精神」。　　﹡『全神貫注』就是「注神tsù-sîn」。　　﹡『緊盯』有幾若種講法，咱遮是講「目睭擘金ba̍k-tsiu peh kim」。　　　目睭「展大蕊thián- tāi- luí」，目睭「褫開thí khui」。　　　目睭對細蕊到大蕊，「褫開」→「展大蕊」→「擘金」。　　 2.華語：來拼拼手氣　　台語：來拚看家己有旺手--無　　　　　lâi piànn khuànn ka-kī ū ōng-tshiú--bô 　　﹡『手氣』基本上就是「好歹字運(jī-ūn/lī-ūn)」的意思。　　﹡咱會當看「家己有旺手無」，『手氣』就是「旺手」這種講法。　　　嘛會當講「手氣有旺無」，「旺手」聽起來敢若閣較厲害，較傳統，較咱台語氣。　　﹡若愛靠技術的，就袂當用「旺手」。　　　「旺手」是咧看「好運、歹運、博看覓」的意思。　　 3.華語：活絡地方民俗　　台語：予地方風俗閣活--起-來　　　　　hōo tē-hng hong-sio̍k koh ua̍h--khí-lâi 　　﹡主要就是講「欲予啥物貨閣活--起-來」，原本可能恬寂寂(tiām-cheh-cheh)，　　　無人知，抑是講已經消失、咧欲消失矣，「閣予活--起-來」，所以咱講　　　「予地方風俗閣活--起-來」按呢講法。　　　慧盈老師講「敢若咱這馬做這个節目，希望予台語閣活--起-來」。　　﹡「兩橫線--」佮「一橫線-」的差別：5：32。　　　一條短橫線“-”：共音節佮音節連接起來，咱講「連字符」。就是共字連接起來　　　的符號。　　　兩條短橫線“--”：叫做「輕聲符號」。　　﹡以這个例「活--起-來」來看，「活」的後壁兩條短橫線“--”，活是重點，無變調，　　　愛讀伊本來的調，「輕聲符號」後壁，相對頭前來講，較無重要的「輕聲字」，　　　可能有兩字、三字、四字不等，就愛共伊用「連字符」閣共接起來，攏愛讀輕聲。　　 4.華語：十八豆　　台語：十八骰仔、　十八仔　　　　　si̍p-pat-tâu-á、si̍p-pat-á 　　﹡「十八骰仔」的「骰仔tâu-á」才是正確的寫法，因為大部份「tâu-á」咱攏會想著　　　「紅豆」、「綠豆」彼个「豆仔tâu-á」，所以有人寫做「豆仔」，　　　應該「骰仔tâu-á」才是正確的。　　 5.華語：我們就有好運來　　台語：阮字運就較衝　　　　　guán/gún jī/lī-ūn tō khah tshìng 　　﹡「字運」是簡束的講法，這个「字」所謂佮人的八字有關係，你的八字較好，　　　抑是按怎，較旺，較有這个好運的意思。　　﹡「語言是咱文化的載體」，這个就是一个例，　　　運氣這个物件，頭前就囥一个「字」。　二、講予你知：中秋舊風俗　◎中秋的印象(ìn-siōng) 　＊中國民間故事　　嫦娥(Siông-ngôo)奔走月娘、玉兔舂(tsing)藥仔、　　吳剛剉(tshò)桂花樹、朱元璋藏紙條　＊臺灣在地--的　　食柚仔、戴柚仔帽、烘肉。　　「烘肉」是這30年以內，漸漸才起來的風俗。　＊一寡風俗漸漸衰微　　傳統的風俗到底佇化位？就是漸漸衰微去矣。　　◎臺灣中秋傳統風俗　＊聽香：　．婦人人拈香問卜，請示出門方向　．路--裡聽著啥物跋桮問神明敢是答案　　佇咧古早，中秋的時陣，婦人人會先攑香問神明，伊想欲知影啥物代誌，先問予明　　了後，徛來到門跤口，閣攑香問神明，是欲行倒爿，抑是欲行正爿，問了，閣跋桮　　請示了後，行出門，就開始沿路聽過路人攏咧講啥物物件，聽聽咧，若是聽著　　過路人講的這句話，敢若親像神明咧共我回答的時陣，馬上就緊來跋桮講　　「敢是這句？」，愛連紲跋三个象桮，才知影原來這句是神明咧共咱回答的答案。　　＊土地公枴仔(kuái-á) 　．中秋相傳是土地公得道之日　　中秋這工，除了是中秋以外，嘛有人講是土地公的生日，土地公得道之日，　　佇這工，因為咱過去作穡人佮土地公的關係非常的深，嘛非常感謝土地公一直共咱照顧，　　予咱有一个好年冬，所以佇咧這工，逐工會攢月餅，閣有麻糍(muâ-tsî)來拜土地公。　．佇園--裡插枴仔，望伊鬥巡田　　另外，閣佇咧家己的園仔內，插一支枴仔，就是為著欲予土地公會通用，會當予　　土地公攑這个枴仔，幫助咱閣去共田鬥巡一寡，共咱鬥趕一寡害蟲、菜蟲等等。　　＊拜月神：原來中秋這工，閣會當拜月神　．月餅掠外，閣攢米粉、芋仔　　拜月神，愛攢啥物物件？月餅掠外，閣愛攢米粉、芋仔。　．「食米粉芋，有好頭路」：掠「芋ōo」佮「路lōo」這兩字倚音。　　這味袂䆀，米粉、芋仔，閣摻一寡蝦米佮肉絲，這味應該足受歡迎。　　＊跋狀元餅　．撚骰仔跋輸贏，餅金用功名號名　　「跋狀元餅」就是撚骰仔跋輸贏，若是贏的人就會當得著一个月餅，號做「餅金」，　　毋是獎金。而且這个餅，大細塊無仝款的餅，閣有無仝款的名，較大塊就是功名　　較懸的名。　．鄭成功部將予紮營士兵做議量　　為啥物「跋狀元餅」？有足濟種的講法，上定定聽著的，就是講是鄭成功伊的　　部將，為著欲予士兵佇中秋的時陣，會當做一寡議量，閣有餅通食，閣會當了解　　亻因彼个時陣的科舉系統，所以設計這个趣味的代誌。　．臺灣讀冊人用來預測考試字運　　來到臺灣了後，變做真濟讀冊人用「跋狀元餅」這个活動，來看講家己考試的　　字運到底是好抑毋好。　◎風俗衰微佮文化保存　＊團體活動共人、土地牽倚做伙　＊看著彼當陣的社會情境　＊加寡了解、用創新方式保存　＊搜揣文化自信心　　◎語詞　．奔走phun-tsáu：「奔phun」是文言音，伊干焦一个音，咱一般口語無咧用。毋過　　有的詞，親像「奔波phun-pho」，有一寡文言音讀法的詞，會使用(sú-iōng)，但是　　一般口語無咧用這字。　．聽香thiann-hiunn：古早的查某人，可能厝內面講話的對象少，去外口嘛無通講話，　　所以講利用這工，閣愛問神明，家己欲問的問題是啥，問卜一下，猶閣佇路的聽人　　講話，聽一句適合伊的想法。　．拈香liam-hiunn：點香拜一下。　．問卜būn-pok：「問būn」是文言音，一般咱攏講「問mn̄g」，「問mn̄g」是白話音，　　愛共神明「問卜būn-pok」。　．跋桮pua̍h-pue：教育部有一寡考據的資料，認為是按呢的寫法，逐家會當參考。　　．象桮siūnn/sīn-pue：愛三个「象桮」，按呢才算是神明有指示，講愛按怎按怎。　．撚骰仔lián-tâu-á：「十八骰仔」咱是用「撚lián」，「撚骰仔」按呢共伊撚一下。　．紮營tsat-iânn：軍兵到一个所在，就會「紮營」，一般人較無用。　　　－慧盈老師講：這馬一般人攏會「紮營」，毋是士兵「紮營」，　　　　　　　　這馬老爸老母𤆬囡仔去露營，攏愛「紮營」。　　－豐惠老師講：袂使按呢用，無仝款，這干焦會當用佇像軍兵部將這種作戰的。　．字運jī/lī-ūn：佮八字有關係，你的運途，毋是干焦抽籤卜卦爾。　．搜揣tshiau-tshuē/tshē：咱會當繼續搜揣咱真濟臺灣的風俗。　　搜揣這款的動作，咱一般的生活中，攏會定定用著，毋過咱可能較袂曉用「搜揣」　　這个用法。可比較濟人可能講「走揣」，但是「走揣」佮「搜揣」無仝款，　　「搜揣」有「搜」的動作，就是共啥物物件攏反反出來，攏共看覓咧，按呢的　　一寡動作，佮「走揣」無仝款。　三、看戲齣(hì-tshut)講台語　◎等到水淹鼻空，我袂閣激恬恬。　　Tán kàu tsuí im phīnn-khang, guá bē/buē koh kik-tiām-tiām. 　　「水淹鼻空」是一種形容，若拄仔好無細膩，跋落水，水已經淹到鼻空，當然　　無法度放恬恬，自在伊淹鼻空，淹過到頭殼去。　　這是一个形容，到緊急的時陣，佇咧劇情來講，伊可能咧講對方一寡代誌，對方　　有啥物貨，咱攏吞忍，抑是講咱攏無處理，問題到緊急，咱嘛是愛處理，　　愛有動作，袂當激恬恬，愛出聲，才用這種講法。　　◎佮遐的排片的交陪盤撋一下。　　Kap hia-ê pâi-phìnn--ê kau-puê puânn-nuá--tsi̍t-ē. 　　華語字幕『交際應酬』，台文的意思就是「交陪」佮「盤撋」，綜合起來，就是　　『交際應酬』。　　愛有「一下--tsi̍t-ē」彼輕聲袂使無講。　　◎查某囝教娘嬭轉臍。　　Tsa-bóo-kiánn kà niû-lé tńg-tsâi. 　　「轉臍tńg-tsâi」就是囡仔出世了後，咱愛共臍帶鉸掉，這號做「轉臍」。　　一般來講，娘嬭應該是比查某囝較會曉，較有經驗。　　意思就是講「你外行的曷咧領導內行的」彼款意思。 ## [2018.09.27《台語講世事》：桌遊衝啥貨?](https://youtu.be/bFZQ8sn96Xw) 一、看新聞講台語：少年人痟桌遊　＊翻譯　 1.華語：驚聲尖叫　　台語：大細聲叫　　　　　tuā-sè/suè-siann kā-kā-kiò 　　﹡主要是欲形容「啥物款的叫聲」，是足尖的？是破脆(tshè)聲的？抑是足驚人彼款的大聲？　　　有足濟款的形容法。　　﹡『驚聲尖叫』就是「大細聲」差佇後壁看欲按怎叫，是啥物款的叫。　　﹡「kā-kā-kiò」，可能較粗耙，嘛是足吵的，用「吱吱叫」嘛是會使，閣有足濟，　　　愛看啥物貨咧叫，可能有人「腹肚疼喈(kainn)喈叫」，有人「嚇(heh)嚇叫」，　　　嘛是足吵的，大部份攏足吵的，是吵的程度佮方式無啥仝。　　 2.華語：學生聚會的新寵兒　　台語：學生聚會上興的𨑨迌物仔　　　　　ha̍k-sing tsū-huē siōng hìng ê tshit-thô-mih-á 　　﹡其實是咧講桌頂遊戲，咱的主詞是「𨑨迌物仔」，所以咱講上尾的重點『新寵兒』　　　就是「𨑨迌物仔」。　　﹡「上興(siōng hìng)啥物」，俗語有「有人興燒酒，有人興土豆。」　　　咱這馬日常生活嘛會使講：　　　．慧盈老師：「阿惠老師，你最近咧興啥唅？」　　　．豐惠老師：「我最近咧興唱歌。」　　　．慧盈老師：「我這馬咧興“足百”山。」　　　　閣有押韻，就會當變做新俗語：「有人興唱歌，有人興“足百”山。」　　 3.華語：新銳設計師　　台語：有新的設計師出頭　　　　　ū sin ê siat-kè-su tshut-thâu 　　﹡主要是講「有新一代的，可能毋是逐家進前聽過的，新的設計師出頭」。　　﹡「出頭」就是「有出脫的意思」，這是一種意思。　　　閣來嘛有捌款的意思，比如講：　　　．「這个囡仔5歲出頭，10歲出頭。」就是表示比彼个歲數閣捅一點仔。　　　．有人咧冤家的時陣，你替我「出頭」。按呢嘛是一種。　　　「出頭」有幾若種意思。　　 4.華語：銷售比較好　　台語：較有銷　　　　　khah ū-siau 　　﹡「較有銷」咱這馬日常生活共提轉來講：　　　啥物貨賣較好，你就講「有銷」、「較有銷」，「足有銷」。　　　「這齣菜不止仔有銷。」表示食甲清氣清氣，足有銷的。　　 5.華語：益智遊戲和桌遊款式越來越推陳出新　　台語：激頭殼的桌頂遊戲舊換新愈來愈濟款　　　　　kik-thâu-khak ê toh-tíng-iû-hì kū uānn sin jú/lú lâi jú/lú tsē/tsuē khuán 　　﹡『益智遊戲』咱臺語的意思就是講「互相咧激頭殼」，所以咱用「激頭殼的桌頂遊戲」來講。　　　『益智遊戲』就是講予你有這个機會，會當思考一下，想一下，頭殼愛振動一下，　　　就是「激頭殼」。　　﹡『款式越來越推陳出新』，意思就是講「一直有新的物件出來」，　　　咱就講「舊換新愈來愈濟款」，表示一直攏有新的，一直攏有新的。　　﹡「激kik」這字有趣味，「激頭殼」一个，「激酒」嘛是另外一款，意思無啥仝，　　　另外閣有「激力」。若準講「欲假影啥物狀況」，就是「激按怎」，「激槌(thuî)槌」、　　　「激悾(khong)悾」、「激外外」、「激毋知」，就是「假影啥物狀況」按呢就著矣。　 ◎慧盈老師：「普通時仔，咱欲翻(譯)的時陣，華語翻做臺語的時陣，一般攏會受著漢字規句咧欲一字仔一字來翻，其實是毋著的。」 ◎豐惠老師：「因為臺語有臺語的語法結構，佮華語定定是無仝的，當然嘛有可能有共通的，但是嘛足濟是無仝款的，這愛對語法來思考。」　所以佮其它的語言仝款，咱若是欲翻(譯)一个語言的時陣，咱著先共了解了後，用咱家己的語言理解來翻(譯)出來，翻出來才會媠氣。　二、講予你知：桌遊衝啥貨　◎桌遊是啥物　　講著「𨑨迌的物件」，逐家想著的攏是細漢的時陣，佇草埔仔耍、佇佗位耍啦。　　但是「桌遊」無仝款，看這兩字，就知影是「佇咧桌頂𨑨迌的物件」，號做「桌遊」。　　這馬的定義有足濟講法，上基本就是講免插電的，只要你共朋友招來，逐家坐落來，　　馬上就會當𨑨迌，那𨑨迌，那開講，感情愈來愈好的這款，攏號做「桌遊」。　＊傳統的桌頂遊戲：khe-tsí-báng、麻雀、行棋、柴疊仔　　柴疊仔tshâ-thia̍p-á『積木』：細漢的時陣，共柴提來，疊咧疊咧。　＊聯絡感情的歡喜記持　　坐落來，聯絡感情的歡喜記持。過去，這寡物件咱攏耍過。　＊1990年代電動、電腦普遍，桌遊沓沓仔衰微　　佇1990年代的時陣，電腦愈來愈衝，電動的𨑨迌物嘛愈來愈普遍，桌遊沓沓仔稀微去。　　◎現代桌遊　　對2000年開始，「桌遊」突然間又閣轉來矣，而且轉來了後，愈來愈衝。　＊類型多元，內容幼路，袂輸電腦、手機仔：　　原來「桌遊」佮以前無仝款矣，這馬2000年開始的「桌遊」，伊的類型愈來愈多元，　　內容嘛愈來愈幼路，毋但有棋仔，尪仔，抑是卡片，足濟種的材料，攏會當耍做伙，　　耍的規則複雜，袂輸電腦佮手機仔。　　所以，對2000年開始，「桌遊」漸漸仔閣轉來市場，受著歡迎。　＊用尪仔、牌仔、十八骰仔等家私非常的濟　＊共無仝領域的智識敆做伙：歷史戰爭、社會政治、奇幻弄險　　上重要的是，共無仝領域的智識敆做伙，譬如講，有的有歷史的，有的佮戰爭有關係，　　抑是講社會政治、奇幻弄險的內容，攏共囥佇桌遊內面，非常非常的趣味。　　◎桌遊店愈來愈濟　＊死忠的開店推廣桌遊　　逐家這馬會當發現，真濟的大街路也好，甚至佇巷仔內，咱攏會當看著真濟這種「桌遊店」，　　愈來愈濟，通常攏是一寡對桌遊非常死忠的人，亻因想欲開店來推廣「桌遊」。　　佇咧「桌遊店」內面，你會當相招朋友，鬥陣來耍仝一个「桌遊」，　　抑是想欲試耍一寡新的「桌遊」，攏會使。　＊大台北地區街頭巷尾超過百間　＊耍桌遊兼團體活動，消費俗閣大碗　　去到「桌遊店」耍「桌遊」，毋但講有團體活動，若講比唱歌、看電影等等，　　消費真正是俗閣大碗，所以真濟少年的，這馬攏足愛去「桌遊店」，真濟規家伙仔　　會𤆬去𨑨迌的嘛有。　＊年收入超過千萬，創業的新選擇　　聽講開一間「桌遊店」，有可能一年會當(收入)超過一千萬，這馬嘛真濟少年人創業的新選擇。　　◎臺灣本土原創桌遊，這馬的情形如何？　＊坉(thūn)錢坉人才，用網路行銷　　對2000年開始，透過真濟網路頂懸的行銷，已經坉一寡錢佮人才，愈來愈濟。　＊咱看統計，2015年到今，用電腦網路募款已經超過四千萬；　　2017年出版的本土桌遊，已經超過一百套。　＊臺灣特色題材：剾洗政治、關懷歷史　　這幾年足紅的一寡桌遊，包括：講著台北佇咧1945年，去予美國大空襲的題材桌遊嘛有，　　嘛有以台灣的政治人物，來做主題的桌遊嘛有，非常受著歡迎，真濟台灣特色的題材，　　譬如講剾洗政治、關懷歷史，攏是這款題材。　＊做伙耍，共本土文創產業扎氣　　咱做伙關心，又閣會當耍，又閣趣味，閣會當關心咱台灣種種文化歷史等等的題目，　　這嘛是一件非常好的代誌。　　◎語詞　．衝tshìng：「衝tshìng」這个動作誠趣味，譬如講「啥物貨衝出來」，　　嘛會當講「本來可能無夆發見，雄雄短時間內，衝足懸，衝甲逐家攏知。」彼種的形容。　．khe-tsí-báng：較傳統的桌遊，因為這是音譯，有幾若種音，咱台羅是khe-tsí-báng，　　當然嘛有人講khe-tsí-bang，就是咱講的耍牌仔。　　以前有一款耍法，就是「khe-tsí-báng su-tong-pu」，毋知恁有耍過無？　．麻雀muâ/bâ/mâ-tshiok：有三種的講法。　．行棋kiânn-kî 　．柴疊仔tshâ-thia̍p-á/柴角仔tshâ-kak-á/柴塊仔tshâ-tè-á：以早的材料是柴，用柴做的彼款。　　會當講「柴疊仔」，因為是疊來疊去。　　因為是一角一角，所以嘛有人講「柴角仔」，一角一角嘛會當講「一塊一塊」，　　所以嘛有人講「柴塊仔」。　　．弄險lāng/lōng-hiám：「弄」這字本成就有兩个音「lāng」、「lōng」。　　譬如講「弄獅lāng-sai」，「lāng」是白話音。　．坉thūn：本來是咧講「坉土」，共啥物貨「坉予攏滇」。　　佇遮的意思是「一直累積、一直累積」的意思。　　「坉資金」、「坉人氣」。　．扎氣tsah-khuì：「共oo-én，抑是支援」的意思。　　咱就是加耍一寡桌遊，予咱台灣在地本土的桌遊，共伊「扎氣」，予伊衝起來。　三、看戲齣(hì-tshut)講台語　◎會好嘛袂完全。　　Ē/Uē hó mā bē/buē uân-tsuân. 　　＊這句定定聽人咧講，各種狀況攏會當講，若欲講「有的人身體無好勢，可能足濟症頭了，　　　落尾雖然有治療，可能會好嘛袂完全。」　　＊嘛有一種是講可能人際關係，感情上彼款的，人佮人之間，進前咧冤家，這馬和好矣，　　　但是我感覺礙虐礙虐，會好嘛是袂完全。　　＊完全，古早傳統來講，意思就是講「攏好離離矣，毋免閣治療矣」彼的意思。其實過去，　　　關心人是毋是進前有破病，是毋是這馬較好，嘛是會講「這馬敢完全矣？」，　　　意思就是講「敢攏好矣？攏毋免閣治療，恢復矣？」。　　　「完全」本身就是代表「攏好矣」的意思。　　◎跤手閣真猛掠。　　Kha-tshiú koh tsin mé-lia̍h. 　　＊這句嘛定定聽著，意思就是講敢若袂輸『手腳很俐落』，　　　華語『手腳』，台語是倒反的「跤手」。　　　華語，台語，倒反的語詞不止仔濟，有一寡倒反的，「風颱」、「童乩」、「豬公」、　　　「豬母」等等。　　＊猛掠mé-lia̍h：「猛」伊有兩个音，「mé」是白話音，「bíng」是文言音。　　◎走甲遮爾生狂。　　Tsáu kah tsiah-nī tshenn/tshinn-kông. 　　＊表示「雄雄狂狂，走甲真急的形」按呢。　　＊「生狂」，除了像這款的形容「走」，抑是啥物款的動作以外，有的是用佇咧一寡咧講　　　有啥物動物，伊可能足急性的，攏無思考，咱嘛會當用「生狂」來講，人佮動物攏會當講。 ## [2018.10.04《台語講世事》：電動競技](https://youtu.be/JM4m2g-J668) 一、看新聞講台語：新北打造電競基地　＊翻譯　 1.華語：忍不住上前搶先試玩　　台語：尻川擽袂忍得搶欲試耍　　　　　kha-tshng-ngiau bē lún tit tshiúnn beh tshì sńg 　　﹡「袂忍得」就是形容講「尻川擽」，大部份的人會講「擋袂牢」，　　　咱若咧講「啥物代誌予咱袂忍得」，這是真白話、傳統的講法，　　　閣加這个形容「尻川擽」就閣較坐袂牢，一直欲去按怎，欲去做啥物代誌。　　　．咱台語的「尻川」足無閒，除了「尻川擽袂忍得」，　　　　猶有「掠一尾蟲擽尻川」，意思就是家己夯枷，傷無聊。　　﹡「擽」佮「癢」意思無仝。　　　（會當參考《講台語當著時》：幼路的詞彙　2017.11.09，影片21：30）　　　．癢tsiūnn：一噗就會癢。癢就去抓（jiàu），會解決的叫做「癢」。　　　．擽ngiau：癢就去抓，袂當解決的叫做「擽」。像講心肝頭擽擽，嚨喉擽擽。　　　．華語無分，攏是『癢』。　　 2.華語：讓選手、民眾交流互動　　台語：予選手、民眾比並相拚　　　　　hōo suán-tshiú, bîn-tsiòng pí-phīng sio-piànn 　　﹡一般講「互動」，當然嘛是聽有。咱閣共到底競技的狀況，　　　按怎講「選手、民眾所謂的互動」閣共講一下，就是「相比並、相拚」。　　　彼就是咧比較啥物人贏等等。　　　「比並」就是比較的意思，相比並，互相競爭，相拚。比看覓，看啥人較厲害，拚輸贏。　　　咱共「互動」講較詳細、較清楚，直接。　　　因為「互動」有足濟款，親像「講話」嘛是「互動」，「相對看」嘛是一種「互動」。　　 3.華語：壯大電競產業　　台語：共電競產業舞予大　　　　　kā tiān-kīng sán-gia̍p bú hōo tuā 　　﹡有兩个部份，可能逐家愛注意：　　　a.「產業」咱台語發音是按怎？　　　　足濟人攏講毋著。是「sán-gia̍p」，毋是「tshán-gia̍p」。　　　b.欲按怎予伊大？就是「共伊舞予大」的意思。　　 4.華語：除了三重捷運站周邊　　台語：除起三重埔捷運站四箍圍仔　　　　　tû-khí Sann-tîng-poo tsia̍t-ūn-tsām sì-khoo-uî-á 　　﹡『周邊』咱台語有幾若種講法，「四箍圍仔」，嘛有人講「四箍輾轉」，　　　嘛有人講，「四箍圍」無「仔」，規个攏共包含，不管啥物款的方向。　　﹡「除起」啥物貨，這是另外一種白話講法，毋是直接講「除了」。　　﹡三重：有人講就照字讀「Sam-tiông」，　　　毋過在地人無人講「Sam-tiông」，是講「三重埔Sann-tîng-poo」。　　﹡捷運站tsia̍t-ūn-tsām，咱講足濟擺矣。　　 5.華語：虛擬實境 VR（virtual reality）　　　台語：幻影實景　　　　　huàn-iánn/íng-si̍t-kíng 　　﹡VR這是新的物件，講VR，其實逐家應該沓沓知影。　　　用外來語英語簡縮的講法，這原若是一種翻譯的方式。　　　親像這馬就無人講啥物「DVD」、「CD」閣欲翻做其它，　　　有一寡這種詞，攏會慣勢共原文簡短的縮寫，直接按呢講。　　　咱嘛會當共伊到底是啥物款的內含、內容，共伊用台語的講法來翻，　　　共意思來翻譯出來嘛是會使。　　﹡VR、AR，這馬這足新的，無解說，逐家毋知影啥物是VR。　　　VR，就是這馬咱定定佇電視嘛有看著，愛掛一个目鏡彼種的，　　　彼種就是號做「幻影實景」，就是咱看著敢若是實景，其實攏是「幻影」。　　 6.華語：擴增實境 AR（augmented reality）　　台語：擴張實景　　　　　khok-tiong-si̍t-kíng 　　﹡「擴張實景」就是講咱看著的實景，確實是實景，但是咱閣共啥物物件，　　　假的物件，幻影的物件摻入來。　　　譬如講前一站仔，逐家咧掠寶，掠寶的時陣，咱用手機仔看著的是實景，　　　中央仔有一隻寶佇咧跳來跳去，這種的就號做AR，就是「擴張實景」。　　﹡「幻影huàn-iánn/íng」、「實景si̍t-kíng」、「擴張khok-tiong」，　　　這攏是佇咧《台日大辭典》內面有收的詞，咱利用這个機會共抾轉來用，　　　用文言音來讀漢字的音。　二、講予你知：拍電動做競技　◎電動競技概況　＊透過電子媒體來耍　　拍電動，就是透過電子媒體來耍。　＊網路連線通競技，發展奢颺　　這馬時代咧進步，拍電動以前是家己一个人耍，這馬會當透過網路的連線，佮別人競技，　　這款的產業這馬發展非常非常的奢颺，這是世界性的一个趨勢。　＊台灣佇亞運著項目銀牌　　前一站仔，佇印尼舉辦的亞洲運動會內面，有一个項目是佮電動競技有關係，　　咱台灣竟然提著銀牌，遮爾仔厲害。　＊形象改變：抾捔→會當賺食、月給五萬箍　　「電動競技」這馬毋是干焦「拍電動」三个字會當來形容，已經變做是一个產業、一个運動，　　這款的形象。　　以前感覺講一个人一直「拍電動」，人生就已經抾捔去矣，有這款的印象，但是　　這愛做一个改變，因為這馬「拍電動」，毋但會當趁食，而且若是會當變做一个專業選手，　　月給攏是５萬箍起跳。　　◎台灣電競發展史　＊2008年，台灣電競聯盟成立。　　這就表示有愈來愈濟人投人這个產業。　＊2012年，台灣組出國比賽著冠軍　　彼年有一个足大的世界性比賽，咱台灣有組隊去參加，結果恬恬食三碗公半，提著冠軍轉來。　＊2017年，立法院共電競算做運動　　2017年開始，立法院修正案了後，已經正式共電競算做是一種的運動。　　意義是，佮其它的運動仝款，「電競」未來嘛會當選拔國家代表隊，人才頂懸的培養等等，　　攏會當提著資源。　＊毋但是運動嘛是產業　　◎台灣電競發展情形：佮所有的產業仝款，嘛有優勢佮欠點。　＊優勢是硬體設備是台灣製造　　因為電競所使用的硬體設備，濟濟攏是咱台灣製造。譬如講，鳥鼠仔、齒盤，抑是主機等等。　＊政府補助、廠商oo-ián：這是優勢。　＊愛開真濟授權金予外國遊戲廠商　　若是講著欠點，因為咱台灣這馬軟體的發展真正是非常的無夠，雖然硬體的廠商會當　　得著好處，但是嘛愛開足濟錢，因為欲耍人的遊戲，付這个授權金。　＊教育體制內底欠缺相關科系　　咱知影發展家己的遊戲是偌爾仔重要，但是咱台灣這馬教育的體制，確實來講，猶閣　　綴袂著陣，咱閣欠缺所有的相關科系。　　◎電動的發展　＊1970~1980年代，電動機台、電動間　　算算差不多有20年的時間，電動機台、電動間，是非常的興。有真濟人的厝內面，　　嘛有電視遊樂機。　＊1989年以後，掌中遊戲機、電腦遊戲　　上衝的號做「掌中遊戲機」，開始咧衝矣，電腦遊戲嘛漸漸仔有愈濟人來𨑨迌矣。　＊2007到今，手機仔遊戲、電腦遊戲：（電腦遊戲場面lè-táu，背景設定幼路）　　2007到今，手機仔的遊戲這馬是上佔贏，因為這馬巧手機仔一人一支，用手機仔來耍遊戲。　　這馬電腦遊戲佮手機仔遊戲，已經分做兩種市場。　＊本土原創遊戲，用台灣歷史文化元素　　規个看起來就知影，毋管是硬體抑是軟體，攏愛非常的齊全，發展產業才有贏面。　　紲落來咱台灣愛做的，就是愛發展咱家己的遊戲，愛運用咱台灣的歷史、文化等等，　　予這个遊戲全世界的人攏看會著，按呢對咱發展這號產業，才會閣較有幫助。　　◎語詞　．奢颺tshia-iānn 　．電動競技tiān-tōng-kīng-ki 　．抾捔khioh-ka̍k 　．新嫣sin-ian：這馬時代無仝，觀念愛改，會使講是一種誠時行，敢若你綴會著潮流的一種產業。　　咱若講人物，或者是講食物，攏會使用，親像啥物花開甲誠「新嫣」，拄出來，真青翠，　　或者是真媠，但是猶無開甲足大足久彼種。　　重點是拄仔出來，搝逐家的目睭。　．鳥鼠仔niáu-tshí/tshú-á：若電腦、電動這方面的一寡詞，有真濟人嘛慣勢直接用原音、原文講。　．齒盤khí-puânn：仝款有人直接講Keyboard，因為彼一齒一齒，所以「齒盤」是真合的翻譯。　．曲盤khik-puânn：是作曲的「曲」，是古早一塊曲盤干焦一塊歌，落尾變做所謂的「唱片」。　．oo-ián：這是日文來的，咱就直接用羅馬字來表示。當然你若欲寫漢字會使寫，　　總是嘛毋知按怎讀，這種的有適合用羅馬字直接共彼的音寫出來。　　因為你若用日文漢字寫（應援），但是讀音是讀「oo-ián」。　．掌中tsióng/tsiáng/tsiúnn-tiong：「掌」有三个音，攏會使。　　古早布袋戲落尾嘛是叫做「掌中戲tsiáng-tiong-hì」，有可能這个掌中戲的「掌中」直接提來，　　佮遊戲機鬥起來，有可能逐家比較會較慣勢的講法。　．lè-táu：布景欲唌人目，欲搝人目睭，就會講究看啥人的閣較lè-táu，閣較搝目睭。　　lè-táu就是「足媠的」。　三、看戲齣(hì-tshut)講台語　◎相罵恨無話。　　Sio-mā hīn/hūn bô uē. 　　相罵本存無夠。意思就是講「佇咧相罵、冤家的過程，無可能有好聽話。」　　啥物歹聽話攏會出來，有話講到無話，一直講一直講，一直罵。　　◎有喙無話通應。　　Ū tshuì bô uē thang ìn. 　　敢若啞口，可能有苦衷，抑是講予人講甲無通好應，彼款的狀況，一般是苦衷較濟，　　可能有真濟苦楚，無法度講出來，足想欲講，就是愛忍耐。　　◎戲棚跤徛久是人的。　　Hì-pênn kha khiā kú sī lâng ê. 　　這會當佮電動競技小可有牽連。　　雖然是真新嫣、真時行的物件，就是你的拍拚，你對技術的研究等等，就是一个你的基礎，　　所謂「戲棚跤徛久」，意思就是佇講古早咧看戲，佇戲棚跤遐看，你若是佇遐徛久、看久，　　你就是看會著，就是你可能等等等，就是會予你看著。　　落尾這句就延伸做「你若肯等，抑是講肯拍拚，肯骨力，予你一段時間的鍛鍊（thuàn-liān），　　嘛是你的，成就就會出來。」 ## [2018.10.11《台語講世事》：巧巧仔食健康瘦](https://youtu.be/0tj9qxchit0) 一、看新聞講台語：Khé-tòng食si̍t減肥敢好？　　上新的減肥方式：「生酮食食」　＊翻譯　 1.華語：生酮飲食　　台語：生酮食食　　　　　khé/khí-tòng-tsia̍h-si̍t 　　﹡『酮』ketone，是英文，khí-tòng是日文。　　　是一个音譯的概念，看你欲按怎唸。　　﹡外來語的部份，基本上是照原字，當然有音譯的，　　　嘛有意譯，看是欲翻意思，抑是欲翻音。　　　這个「khé-tòng」，就是翻音，原音若準講音節足長，　　　咱可能取頭前爾，若是音節較短，咱可能就直接講。　　﹡「生酮食食」就是食比較較濟的油，油脂較濟的　　　食物，普通時仔咱定定食的飯、麵這款物件，　　　這種澱粉類的，基本上是無食，抑是食足少，　　　嘛愛看人，袂當傷過頭、傷長久攏按呢，袂使逐家　　　攏咧做，咱就綴咧做。　　 2.華語：油脂豐富，入口即化　　台語：油水飽滇，食--落就溶--去　　　　　iû-tsuí pá-tīnn, tsia̍h--lo̍h tō iûnn--khì 　　﹡咱咧講這種「油」，當然有人單純講「油」，這嘛是一種會當考慮的方式。　　　但是普通時講「油脂」，抑是講「油水」，這嘛是攏會使講的，　　　所以「飽滇的油水」的「油水」，就是「油脂」。　　 3.華語：大魚大肉　　台語：魚肉肉誠腥臊　　　　　hî-bah-bah tsiânn tshenn/tshinn-tshau 　　﹡咱是咧講「足濟啥物貨」，當然欲強調有較譀古的形容，你欲講「大魚大肉」嘛是聽有。　　　但是咱有另外一種講法，就是「魚肉肉」，誠古錐的講法。　　　例：你今仔日食甲「魚肉肉」呢！才閣加一个形容講「誠腥臊」。　　　其實「魚肉肉」嘛是等於講「足腥臊」的意思矣，伊本身就會當表示，　　　閣加一个「誠腥臊」，閣較「腥臊」的感覺。　　﹡「腥臊tshenn/tshinn-tshau」彼字「腥」，嘛是有一个音叫「tshènn」，某一種草仔，　　　「腥tshènn」味足重，就是表示食物特有的彼款味。這个字就是有tshenn佮 tshènn，　　　《教典》是寫做替代用字，用這款方式寫較好了解。　　 4.華語：冒得滿臉痘痘　　台語：生甲規面全𤶃仔　　　　　senn/sinn kah kui-bīn tsuân thiāu-á 　　﹡「𤶃仔」一般較有膿，袂使擠，擠lueh會有一巡一巡一空一空。「疔仔」較細粒。　　 5.華語：兒童癲癇　　台語：囡仔起羊眩　　　　　gín-á khí iûnn-hîn 　　﹡「起啥物啥物」，起壁接一个病的名，攏會當按呢用。　　　例：囡仔「起凊瘼(tshìn-mooh)」，　　　　　大人「起番顛(huan-tian)」。　　　無一定是病，是一種症頭，某一種狀況按呢。　二、講予你知：巧巧仔食健康瘦　◎減肥話題講袂煞　　有真濟人講「減肥」這件代誌，是全民運動，閣真正是按呢。　＊健康署調查：超重佮大箍的，佔45%，亞洲第一　　根據健康署的調查，確實無毋著，咱臺灣人超重佮大箍的，「大箍」就是　　比「超重」閣較重，有佔45%遮濟，會使講是亞洲第一名。　＊十大死因有七項佮大箍相關　　2016年的十大死因內面，竟然有七項佮「大箍」有關係，包括心臟病、心血管病、糖尿病、　　高血壓等等，攏講佮「大箍」有關係。　　＊國家經濟佮勞動力損失　　所以有人講「大箍」誠嚴重，對國家的經濟佮勞動力，攏是真大的損失。敢有真正遮嚴重？　　佮「大箍」、「無大箍」咱閣會當討論，　　但是，佮身體油脂是毋是足濟，這可能是足大的關係。　＊個人無自信，有心理問題　　因為這馬真濟人，規个社會對「大箍」有淡薄仔歧視，　　所以大箍的人，通常會感覺家己無自信，有心理的問題，這攏是咱逐家會當討論的。　　◎減肥方法百百款　　咱莫講「減肥」，咱來講「減油」，愛按怎共身體的油減落去，減油的方法百百款。　＊網路的撇步有的無根據　　咱定定會聽著網路頂懸有啥物撇步，逐家隨聽著，馬上就提來用。　　但是咱知影網路頂懸的撇步，有的無根據。　＊單方羊豆仔花：通安神，無治病效果　　最近誠衝的，是一種花，號做「羊豆仔花」，網路頂懸講這種花，會當減三懸，　　予你的血壓懸、血油懸、血糖懸，攏會當有效果。　　但是根據調查，其實「羊豆仔花」，伊的卵白質是有較懸無毋著，伊是會當安神而已，　　並無治病的效果。　　＊漢藥焐燒包：佇中國搶市、風謗消體油　　最近佇中國非常搶市，一種漢藥包，焐燒包，聽講按呢焐燒焐燒了後，　　予你的經絡攏會當通，風謗講會當消體油。敢是真的呢？這嘛是無經過調查。　＊Khé-tòng食si̍t「生酮食食」：治囡仔人起羊眩　　這馬嘛足衝的食食方式，是對美國傳過來的，這號做Khé-tòng食si̍t「生酮食食」，就是叫你　　愛食較濟的油，愛食較濟的卵白質，但是碳水化合物愛食較少的，講按呢會當予你減油。　　這種食食的方式，佇古早，是咧治療囡仔人起羊眩。但是講著「減肥」、「減油」，　　逐家啥物攏會當提來試。　　◎健康比減肥重要　　佇遮愛予逐家一个觀念，咱講「減肥」其實是為著健康。　＊Puff族：體油超過標準、筋肉量少　　一个人看起來大箍，佮伊健康無健康，無足直接的關係。　　有真濟人，伊的漢草看起來誠標準，各種的指標嘛攏非常標準，但是有可能　　伊的體油超過標準，伊的筋肉量足少的，按呢就算是無健康。　　這種的就號做「Puff族」，Puff族就是規个攏是油。　＊改善食食(si̍t)佮運動：生筋肉、練氣力　　若是拄著這款的問題，伊愛做的工課就是愛改善伊的食食佮運動，　　沓沓仔改變伊的食食慣勢，沓沓仔運動，按呢會當予閣較濟的筋肉走出來了後，　　才閣共筋肉的擋頭練予較足，咱的身體較無負擔。　　◎減肥的功課　＊請教醫生抑營養師　　愛去請教醫生猶閣有營養師，咱每一个人無仝款的情形，欲按怎減肥？　＊各人各樣，減肥方式無的確合家己　　因為各人各樣，減肥減油的方式攏無仝款，這个人適合的，無一定就適合你。　＊愛做功課，毋通綴人喙尾　　咱愛先做功課，毋通人按怎講，咱就綴人的喙尾咧做。　＊減食--寡，加振動　　講到尾，咱知影按怎是會當減油上好的辦法，「減食加振動」，這絕對是無毋著的。　　◎語詞　．肥朒朒puî-tsut-tsut：用「減油」的觀念來講，無一定愛外型「肥朒朒」才需要減油，　　有足濟看起來瘦瘦，其實伊體內的體油誠懸，嘛有，無一定外表看起來大箍。　．油肭肭iû-leh-leh 　．油漉漉iû-lok-lok 　　．搶市tshiúnn-tshī：若是看著啥物祕方也好，有啥物流傳的藥方，逐家就會搶欲去買，　　抑是講搶欲試用看覓。　　賣了真好，會當講「你這馬出這个產品誠搶市！」　．風謗hong-pòng：咱進前有講過「風聲謗影」，差不多這種意思，閣較親像滾絞一个風潮，　　就是「逐家攏講按怎按怎，可能有彼个效果，有小可較膨風，抑是小可講了較無一定　　遐實在，彼款的攏會當講「風謗」。　　﹡「風聲謗影」會當參考[2018.8.9《台語講世事》：台語火星文 22：32](https://www.youtube.com/watch?v=pj_jEXxgokc&t=565s) 　　《教典》用「嗙」字。　　．卵白質nn̄g-pe̍h-tsit：是「卵nn̄g」白質，毋是「蛋tàn」，因為「蛋」咱口語無咧講。　．藥方io̍h-hng 　．筋肉kin/kun-bah：體油佮筋肉的比例，咱希望筋肉會當較濟咧，體油較少咧，按呢才健康。　　華語講做『肌肉』，英語『muscle』。　．體油thé-iû 　．血油hueh/huih-iû：這嘛是誠要緊，愛注意體油佮血油，佮外型無關係。　．綴喙尾tuè/tè-tshuì-bué/bé：咱愛注意家己的情形，愛問專家的意見，毋通綴喙尾，就是　　人按怎講，你嘛綴咧按呢講，或者是按呢做。　三、看戲齣(hì-tshut)講台語　◎食人一口，還人一斗。　　Tsia̍h lâng tsi̍t-kháu, hîng lâng tsi̍t-táu. 　　食人一口，毋是還人一喙，有當時仔是為著鬥句，唸起來、聽起來較順。　　﹡可能你有得著啥物人，伊幫贊你啥物，抑是講有予你啥物貨，雖然可能干焦一屑屑仔爾，　　　無講蓋濟，毋過回報，愛回報較濟，意思是感謝人的幫贊，報恩、回報。都算人　　　干焦淡薄仔，你嘛應該愛滿滿的感恩，去共答謝，這算是做人的態度。　　◎人情世事若陪透透，時到就無鼎佮無灶。　　Jîn-tsîng sè-sū nā puê thàu-thàu, sî-kàu tō bô tiánn kap bô tsàu. 　　一般講佮人交陪，進前有講過「交陪、盤撋」，這馬這嘛是講「交陪、盤撋」。　　﹡人情世事，免不了愛交陪，毋過你若啥物人、逐項代誌，你攏欲陪透透，　　　「透透」就是啥物攏欲愛幫助著，抑是無一定是幫助，有可能是有人請你一頓，你嘛欲　　　請人一兩頓，　　　抑是人送你啥物貨，你欲加送人啥物貨，彼攏是「交陪」。　　﹡意思是講你若傷過頭的時陣，到時有可能連鼎連灶攏無矣，攏空矣，兩手空空，　　　就是愛逐家量家己的能力，愛節力，看家己的橐袋仔有深無，才來處理。　　◎明知影伊咧tshiūnn你的後跤，閣佮伊講和。　　Bîng tsai-iánn i the tshiūnn lí ê āu-kha, koh kap I kóng-hô. 　　「tshiūnn後跤」就是華語講的『扯後腿』。「搝後跤」是直接對華文去翻的。 ## [2018.10.18《台語講世事》：網紅現象](https://youtu.be/78coBwYPdno) ．划棑仔kò-pâi-á ．盤撋puânn-nuá ．死體sí-thé：咱臺語的講法，毋是「屍體si-thé」。一、看新聞講台語：　＊翻譯　1.華語：網紅　　台語：　　．網路紅人bāng-lōo-âng-lâng：佇咧網路頂懸足紅的人。　　．網紅bāng-âng：其實是中國彼爿來的，佇網路已經講甲不止仔慣勢矣，這个人足紅，　　　　　咱嘛是有咧講。　　．網衝bāng-tshìng：比紅閣較「衝tshìng」，先紅了後，規个衝起來。　　．網星bāng-tshenn/tshinn：就敢若講「歌星」、「影星」這款的意思，　　　　　就是一个網路的明星。　慧盈老師：網紅衝起來，衝起天頂變網星。　　2.華語：長相甜美，穿著華麗　　台語：生了古錐，穿插hóng-hóng 　　　　　senn/sinn liáu kóo-tsui, tshīng-tshah hóng-hóng 　　﹡因為有的形容詞，無仝語言之間，實在足歹講完全意思仝款來處理。　　　通常咱會講查某囡仔，抑是啥物人，生了古錐古錐，就是『甜美』，　　　毋是完全等於仝意思，算做咱會去形容這款人，可能會當用「古錐」這種講法。　　　敢會使講「伊生了甜甜」？若是欲講彼的形「足甜」的形，　　　咱若來共提倡用予慣勢，可能嘛會使。「伊生做甜甜甜」可能嘛是會使。　　﹡『穿著』就是「穿插tshīng-tshah」。　　　『華麗』就是「hóng-hóng」，毋是「放放hòng-hòng」。　　　「hóng」咱一般口語有咧講「看hóng的」，意思是講「看媠的」。　　　所以「hóng」算做「媠」的意思，「足好看的」、「非常好看」。　　　這兩字「hóng-hóng」，親像咱拄才講「伊生了古錐古錐」、「伊生了甜甜」，　　　咱會講兩擺，就是有彼个款。咱台語定定有的，兩字共疊鬥陣，講兩遍的效果。　　　所以咱會講「穿插hóng-hóng」，抑是「身穿hóng-hóng」。　　 3.華語：預計能帶來50億的商機　　台語：生理面拍算有五十億通做　　　　　Sing-lí-bīn phah-sǹg ū gōo-tsa̍p ik thang tsò/tsuè. 　　﹡『預計』就是「拍算按怎按怎」。　　﹡「做生理」就是講「有生理通做」，會當帶來50億的收入，咱用做生理的觀念，　　　所以講「生理面有啥物貨通做」，「有偌濟通做」。就是講生理做50億，無一定趁50億，　　　成本愛扣掉矣。　　 4.華語：固定的客戶群體　　台語：老主顧　　　　　lāu-tsú-kòo 　　﹡『客戶群體』意思是足濟人，一大陣，規陣的客戶。「老主顧」嘛無可能干焦一个啊，　　　你若干焦靠一个老主顧，敢會活的？　　　一般攏會一陣人，咱若講「老主顧」就已經代表「一陣人」矣。　　 5.華語：捏小籠包，大啖美食　　台語：捏包仔囝，食好料　　　　　liap pau-á-kiánn, tsia̍h hó-liāu 　　﹡一般人猶是慣勢講『小籠包』，伊就是對華語來的，華語的講法，咱就直接講。　　　毋過你若講硬欲翻，咱會當試翻看覓，共伊翻做「包仔囝」，意思是細粒的包仔，　　　因為這種物件是相對的，咱一般咧講的包仔，咱固定的印象，就是差不多遐大粒，　　　結果伊按呢爾。　　﹡主要是動詞，是用「捏liap」的，通常就是用指頭仔，可能你欲共啥物款的物件，　　　變做啥物款的物件，伊彼个形體會改變，用指頭仔去處理。　　　「共囡仔捏予大漢」，嘛捌有人按呢講，意思就是講你欲共調整做按怎，抑是成做按怎。　　﹡『大啖美食』，咱一般就講「食好料」、「食腥臊」這款講法按呢就會使矣。　二、講予你知：網紅現象　啥物是「網紅」？對這兩字直接來講，就是佇咧網路頂懸足紅的人，這就是「網紅」的意思，　但是到底是咧紅啥物貨？到底是按怎紅起來？　◎網路紅人知偌濟　　網路佇世界上做為一个媒體，發展的歷史是按怎？　＊TIME年度風雲人物：You 　　佇美國足有名的雜誌《TIME》，就是《時代雜誌》，每一年《TIME》雜誌攏會發表一个　　「年度風雲人物」，看彼年啥物人上衝。　　佇2006年的時陣，怹發表的「年度風雲人物」，「人物」應該是一个「人」，　　但是怹彼年發表的是「一台電腦」！「電腦為啥物是風雲人物」？這台電腦頂懸，　　就寫一个字「You」，就是「你」的意思。對彼年開始，伊就是共逐家講，這馬開始，　　每一个人攏是風雲人物。　＊「家己就是媒體」的時代　　對彼年開始，咱正式入來「家己就是媒體」的時代。　　以前媒體就是愛透過電視、報紙等等，這馬，只要有網路的所在，只要你有戶頭，你都會當　　發布你家己的消息、新聞、你的作品，彼就號做「自媒體」。　＊對Blog到社群網站　　咱臺灣拄開始是Blog，寫做漢字，就是「部落格」，閣來咱就看著這馬上衝的「面冊」，　　抑是Line，抑是這馬干焦看相片等等Instagram，這都號做「社群網站」。　　佇這寡平台頂懸，只要你有戶頭，你都會當講你欲講的代誌，這都號做「自媒體」。　佇網路按怎做一个媒體的發展歷史。 . 　◎網紅到底是咧「紅」按怎？　＊英文Internet Celebrity 　　「網紅」這个詞基本上是對中國傳過來的，英文號做Internet Celebrity，　　＂Celebrity＂就是「佇網路頂懸有名的人」的意思。　＊佇網路頂面引起討論：划(kò)棑仔兄　　是按怎佇網路頂懸開始有名咧？有各種的方式，一種上濟的，只要佇網路頂懸引起討論，　　譬如講伊的外表，抑是伊的才華，抑是講一个事件，嘛有可能予你佇咧網路頂引起討論。　　會記得前一站仔，有一个划棑仔(kò pâi-á)兄，伊就是佇風颱的時陣，　　記者問伊一个問題，問伊講風颱的時陣，欲創啥？　　伊都講：風颱的時陣，當然就是愛按怎按怎，這句話講出來，隨變甲足有名，逐家攏咧討論　　這个人突然間變做是一个網路頂懸的紅人就著矣。　　這是一種。　＊職業經營　　閣有一種，就是直接共伊當做是一个職業咧經營。　　譬如講伊定期發表伊的作品，佮伊的粉絲盤撋(puânn-nuá)，　　甚至伊有足濟會當趁錢的機制，譬如講廣告等等。這嘛是一種的「網紅」。　＊拍片、盤撋，粒積人氣、拚點閱率　　◎台灣上大影音平台YouTube 　　佇YouTube發表作品的人，號做YouTuber。　＊欲出名著開頻道　　佇遮毋但會當看別人的作品，你若願意，嘛會當開一个頻道，來發表你的作品。　＊平均逐人逐禮拜看16.4點鐘　　有一个統計講咱臺灣這馬，平均逐人逐禮拜看YouTube是偌久？　　是16.4小時，牢著的人是非常的濟。　＊黃金創作者：注文人數超過百萬　　頂懸做作品的人「黃金創作者」，就是咱講的YouTuber。　　注文亻因作品的人，竟然人數攏會超過100萬人。　＊對消費者的影響驚死人　　所以講in的影響力非常的大，對一寡消費者的影響力驚死人。　　◎網紅的社會責任　＊有影響力，知名度　　既然遮爾濟的網紅，遮爾仔有名，in又閣有影響力、知名度，亻因的社會責任是啥物咧？　＊激五仁超過道德界線　　這馬有真濟YouTuber，為著欲唌人的目睭，搝人的目睭，會做真濟作品，有當時仔　　會感覺講是毋是激五仁已經超過道德的界線。　　逐家會感覺講按呢敢好？這是一个問題。　＊成做媒體主流，受眾愛有讀捌能力　　因為這馬自媒體，無親像以早的媒體，猶閣會有人來看，有人來做調查以後才來發布，　　但是這馬伊家己做矣，所以咱逐家做一个受眾，咱家己愛有讀捌的能力，毋通人講啥，　　你就相信啥。　＊對民主政治的影響　　上重要的一件，一寡網紅若是欲行入來做政治人物，雖然講亻因有知名度，有發聲的能力，　　但是in對一寡人文素質等等，亻因的X度敢有夠？敢有夠格來做政治人物？　　這嘛是咱逐家愛注意的。　　◎語詞　．注文tsù-bûn：這是日語來的，一般來講，你講共訂，共買，這攏會當講「注文」。　　　　伊猶未做好進前，我先講我欲買，無一定是這个意思，你欲去訂、去買的動作，　　　　這个物件已經做好了後，我欲用買的，嘛會當講「注文」。　．划棑仔kò-pâi-á：（《教典》竹棑：竹筏、竹排。）愛看伊划佗一種，若是一般的船，　　　　船的形體，彼是一種，另外一種就是親像講「竹棑仔」彼種。　　　　若是『泛舟』的『橡皮艇』的物件，可能較接近進前古早原住民咧「划kò」的彼種　　　　「艋舺Bang-kah」獨木舟彼型。　　　　（註）[據說，臺灣原住民平埔族（凱達格蘭族）的獨木舟叫做“vanka”。](https://taiwanlanguage.wordpress.com/2014/09/19/%E8%89%8B%E8%88%BA/) 　　　　當然嘛無仝，毋過較接近彼啦。　　　　毋過有時仔翻譯的物件，伊會用一个總類的概念去講，親像講較老輩的，　　　　日本時代的前輩，先輩，伊可能會講「划ボート」，這嘛是一種觀念。　　　　後擺咱欲共一種物件分類分較詳細，咱逐家來鬥想。　．人氣jîn-khì：這嘛是日本詞，一般來講，會講　　　　這个人人氣真好，抑是人氣真懸，表示足受歡迎，誠有人緣，抑是誠有人望。　　　　袂當講「人氣lâng-khì」。　．點閱率tiám-ua̍t-lu̍t 　．點閱數tiám-ua̍t-sòo：就是你點幾擺。　．激五仁kik-ngóo-jîn/lîn：　　　　這馬真濟網紅攏會「激五仁」，予逐家歡喜，激一寡笑詼。　　　　這个「激五仁」的意思，咱一般咧用可能是這个人，有時仔可能是講伊蓋𠢕講笑詼，　　　　有時仔可能是講伊的行動、作法、處理代誌，予咱感覺嘛是會愛笑，　　　　這種的攏會當講「激五仁」。　　　　「五仁」敢是咱咧食月餅內面的五仁？　　　　塗豆、麻仔、杏仁、瓜仔仁，敢是這个「五仁」？　　　　「本來無啥貨的物件，你欲共創予予人會注意，其實伊有足大的效果。」　　　　以上是咱阿惠老師的解說。　　　　這馬為啥物講「激五仁」，其實逐家攏已經毋知影矣。　．輿論û/î-lūn 　．變猴弄pìnn-kâu-lāng：（舉例略）　　　　應該是普通時袂做的代誌，但是你刁工做一寡啥物貨，欲製作某一種效果。　．死體sí-thé：咱臺語的講法，毋是「屍體si-thé」。　三、看戲齣(hì-tshut)講台語　◎查埔欲食望人請，　　Tsa-poo beh tsia̍h bāng lâng tshiánn, 　　查某欲食望生囝。　　tsa-bóo beh tsia̍h bāng senn-kiánn. 　　古早的觀念，過去的社會，算做逐家無遐爾簡單會當食好料、食魚魚肉肉的物件，　　所以有這款的俗語。　　愛有人請，你才有法度食好料，查某閣較可憐，愛生囝才有法度補，這真正是過去　　對咱查某囡仔、查某人較無公平。　　這馬網路紅人的現象，網衝，這就是一个足無仝款的時代，　　欲食，家己欱(hap)，毋免望人按怎。　　◎補胎較贏做月內。　　Póo-thai khah iânn tsò/tsuè-gue̍h/ge̍h-lāi. 　　補胎就是生進前，有身這段時間，愛好好仔補胎、安胎。　　「xx較贏xx」就是頭前彼个較重要，「較贏啥物」，所以是　　「補胎」較重要。　　「愛著較慘死」就是「愛著」較慘，比死閣較慘。　　◎各人洗米，各人落鼎，　　Kok-lâng sé-bí, kok-lâng lo̍h-tiánn, 　　就袂有長短跤話。　　tō/tiō bē/buē ū tn̂g-té/tér-kha-uē. 　　「長短跤話」是過去的一个故事，咱進前嘛已經講過。　　長短跤話是啥物款的話？　　可能是「尻川後話」，抑是一寡「閒仔話(îng-á-uē)」。　　所以咱若各人洗米，各人落鼎，就無底代，意思是無仝口灶，就袂有長短跤話。　　啊若鬥陣洗米，鬥陣落鼎，就是講你哪會加食我一喙？有可能較有糾紛(kiù-hun)。 ## [2018.10.25《台語講世事》：日常的轉型正義](https://youtu.be/ZlSis6o-XIw) 一、看新聞講台語：＊翻譯 1.華語：朝野高度重視　台語：朝野攏共看真重　　　　tiâu-iá lóng kā khuànn tsin tāng 　﹡「朝野」算是簡縮的講法，「在朝的」、「在野的」。　﹡「共看真重」：共xxxx看真重，中央省略。這个句型愛共抾轉來用。　 2.華語：相互仇恨　台語：相抾恨　　　　sio-khioh-hīn/hūn 　﹡抾khioh：遮一个，遐一个，共累積，共記起來。　　通常毋是干焦一件代誌，一个啥物物件爾，愛抾抾咧，抾鬥陣，猶閣記起來，是複數的。　﹡『互相』就是「相(sio)按怎」。比如講：　　相意愛，就是你愛我，我愛你，互相，相支持、相伨、相怨慼，　　「相sio」就是兩个人互相的意思。　　「相」嘛是有另外一个音叫做「sann」，所以講　　相(sann)抾恨、相(sann)意愛、相(sann)怨慼。　 3.華語：牽動敏感神經　台語：一下起慌狂　　　　tsi̍t-ē khí-hong-kông 　﹡主要是咱愛看伊彼个原文，因為有時仔，咱所謂的翻譯，抑是講，　　欲共轉做另外一个語言欲按怎講的時陣，毋是干焦講這句，咱愛看前後，　　有可能是幾若句，做伙來處理。　　所以事實上，若是欲閣較清楚，應該共前後句show出來，毋過傷長，若是規个按呢講，　　啥物代誌予啥物人、單位，一下起慌狂，就是予伊感覺「足緊張、足按怎」的情緒，　　(當然是較無好的)。　　若欲較完整，幾若句愛相連紲處理。　　應該講『牽動敏感神經』伊的效果是「一下起慌狂」。　﹡慌狂hong-kông：形容彼種緊急、緊張的情緒。　　毋知欲按怎才好，這聲欲按怎才好？就是慌狂的意思。　 4.華語：澄清沒有要製造對立　台語：pué-huē/pé-hē講無欲做對頭　　　　pué-huē/pé-hē kóng bô beh tsò/tsuè-tuì-thâu 　　　　註：《台文華文線頂辭典》掰會pué-huē：解釋誤會、說明。　﹡『澄清』會當講欲共人解說啥的意思，咱有一个詞叫做pué-huē，另外一个腔是pé-hē。　　欲共啥物人pué-huē，就是表示你欲共伊解說啥？而且可能用足濟方式，欲去說明、解說。　　慧盈老師：譬如講「伊一直講我佮伊是愛人的關係。我一直共pué-huē。　　豐惠老師：這會使用。　﹡製造對立：咱一般較口語就是講「做對頭」。　　例句：伊佇公司一直攏是我的「死對頭」。　 5.華語：模糊焦點　台語：共焦點看霧去　　　　kā tsiau-tiám khuànn bū--khì 　﹡『焦點』這種詞算是較現代較新的物件，到底欲按怎翻？有人主張愛對原文、原音，　　好比講是毋是直接講「focus」？「共focus看霧去」這嘛是一種方式。　　這馬這个方式是翻做華語的『焦點』了，咱直接讀伊的臺語文言音，就是　　提華語詞的漢字，來讀做臺語的發音。　　　這字白話音是「焦ta」，因為這个所在佮「焦ta」無關係，　　所以袂去讀做「焦點ta-tiám」(x) 　　這漢字本來就有臺語音，有咧用白話音，但是生活中無用「焦tsiau」這種文言音，　　除非唸人的名姓。　　（這个詞）拄講你可能嘛是聽無，算是外來語，欲按怎翻？是音譯，抑是意譯的問題。　　咱若捷講，逐家就會知影、會記得。　﹡『模糊』意思是無清楚，霧霧，咱會當講「看霧去」。　　句型愛共提來用「聽歪去」、「走無去」。　二、講予你知：日常的轉型正義　「轉型正義」這四字，雖然伊非常的嚴肅，有非常嚴格的定義，　但是咱佇日常生活當中，可能咱嘛會當做一寡拍拚，對咱家己「轉型正義」開始做起。 ◎『光輝十月』？＊雙十國慶、光復、蔣介石誕辰紀念日　10月初十雙十節、10月25臺灣光復節、10月31蔣介石誕辰紀念日，　咱自細漢攏會曉背，因為這三工攏會當放假。　咱共詳細想看覓，這三工佮咱臺灣的關係，到底是啥物？　「雙十國慶」，有人講彼工到底是啥物國的「國慶」？到底是毋是真正中華民國的國慶日？　這真濟討論佇咧。＊徛佇中國看臺灣的史觀　「光復」到底是徛佇啥物人的角度來看「光復」這兩字？　當然咱知影講這就是徛佇中國看臺灣的歷史觀。＊威權時代的政治策略　蔣介石誕辰紀念日，「蔣介石」彼个時陣，亻因咧造神的運動。　這嘛是威權時代的政治策略的做法。＊用特定的民族認同共咱洗腦　規个『光輝十月』就是欲用「特定的民族認同」共咱洗腦，講咱就是這个民族。　這就是『光輝十月』的效果。　 ◎歇假的調整：佳哉，逐家有咧思考，有咧討論。＊2007年，《紀念日》修正草案：廢除蔣介石過身佮誕辰紀念日　蔣介石過身彼工佮出世彼工的紀念日，共伊廢除，造神運動就共停落來。＊2017年，《勞動基準法》修正：　光復節、蔣介石生日、「國父」生日、行憲紀念日嘛已經無歇睏　雖然這是因為《勞動基準法》的修正，可能佮轉型正義無仝款，　但是真顯明這寡節日的代表性是欠共識。　 ◎真正屬臺灣人的節日＊臺灣人的角度出發＊值得紀念的歷史事件　咱臺灣的價值觀，對咱臺灣非常重要的歷史事件，咱才來共做紀念。＊臺灣本地的人物：青年節、教師節、醫生節　3月29青年節是以中華民國亻因彼个時陣革命的一寡青年，　有人講咱318的時陣，日頭花學生運動，是毋是閣較會當代表咱臺灣青年？　是毋是以彼工來做「青年節」？　「教師節」這馬是以孔子的生日來做的，臺灣嘛有真濟教師，是毋是以in的生日來做教師節，　可能會較好勢。　「醫生節」是毋是會當用咱臺灣非常重要的醫生來做代表。＊用歇假做轉型正義的第一步　 ◎轉型正義的日常實踐　除了歇假以外，咱日常講出喙的一寡話，嘛會使做轉型正義。　＊「大陸、內地、中國」意思差大碼(bé) 　　比如講：你有去「大陸」無？　　電視頂懸，你是毋是有去『內地』？　　咱愛講是「中國」，彼意思是差真大碼。　　『內地』是啥物意思？除了伊是一个國家上內面以外，其實伊有權力「上中央」的意思。　　你若共中國講伊是『內地』，表示你承認伊是你的權力的中心。　　『內地』佮「大陸」較無好的講法。　＊「中正路」滿四界　　咱規个臺灣，「中正」滿四界，是毋是這嘛愛改一下？　　有的人講哪著改？咱都已經逐工咧講矣，攏慣勢慣勢矣。　　咱愛注意一件代誌，逐工講的物件，會愈來愈囥佇頭殼內。　＊逐工講就會夆汰(hông-thuā) 　　若是逐工講，咱會夆汰去，逐工共你影響，逐工予你印象，　　才會講這馬逐家攏咧討論是毋是「中正路」愛共改一下？　　註：《教典》汰thuā：受到他人或環境的影響而學習或改變。　＊政府愛𤆬(tshuā)頭，民眾嘛著實踐　　這種種，政府愛𤆬頭，訂一寡規則，當然𤆬頭進前，咱人民嘛會當對家己來做起。　 ◎語詞：　日常生活當中，咱開始做一寡改變，對咱講的詞開始改變。．誕辰tān-sîn：生日，出世的日子。　　　這算文言詞，古早《台日大辭典》有收，一般口語無咧用。　　　有的人感覺講就是偉大的人，所以就是愛用，敢若袂輸講較懸層次的講法。　　　其實這是文言音，就是生活中無咧講。．假日ká-ji̍t/li̍t, 俗音kà-ji̍t/li̍t：　　　正確的講法應該是→假日ká-ji̍t/li̍t，因為是→歇假hioh-ká，　　　變調變做→「假ká」日，毋過逐家一般人攏講俗音。．顯明hián-bîng：顯明知影無共識的節日，咱就共取消掉。　　　這个代誌誠顯明是按怎。．日頭花Ji̍t/Li̍t-thâu-hue：　　　2014年318的學運，號做「日頭花運動」。　　　因為是共看做專有名詞，所以咱羅馬字第一个字母愛大寫。　　　真正咱咧講彼蕊花的時陣，就毋免大寫。．林茂生Lîm Bōo-sing：　　　譬如講「教師節」，咱就會使採用林茂生先生的生日。　　　因為這位林茂生博士是咱臺灣第一个留美的博士，捌做過臺灣大學文學院院長，　　　佇教育這方面，毋但佇學校，佇民間有創辦《民報》，佇咧《臺灣府城教會報》　　　用羅馬字寫足濟臺語的專欄佮文章，攏足盡力去推捒攑臺灣做主體性這款思想，　　　教育界來講，算先輩(sia̋n-pái)，有真濟人講咱是毋是用林茂生博士的生日，應該誠適合。．蔣渭水Tsiúnn Uī-suí：　　　講著「醫生節」，蔣渭水先生定定做一个代表，咱嘛會使考慮提蔣醫師的生日，　　　來做一个紀念。　　　咱若放假的時，會想著亻因，價值觀就會當深入咱的腦海當中。．差大碼tsha-tuā-bé 　　　大陸、『內地』、中國的意思差大碼，尤其是「國」的觀念愛定定強調，所以　　　毋通繼續用「全省」這个講法。　　　「全國」愛講予慣勢，已經無「省」矣。．汰thuā：你若一工到暗講，你的思想會去予汰去。　　　慧盈老師：細漢的時陣，媽媽會講「這領衫全雪文泡，你共汰汰咧。」　　　「汰汰咧」、「汰衫」是這个字的一種意思，伊的原意是按呢無毋著。　　　你若長久佇一種狀態，抑是環境，你就自然會變做這个環境伊欲製作的一个性，　　　浸咧內面浸傷久，算是予伊穢(uè/è)去，汰去。．澈底thiat-té/tué：　　　這个用字，有的人寫三點→澈，有的人寫徛雙人的→徹。　　　教育部用這字，主要就是講水啊、溪啊足清，會當看著底。　　　提來應用，意思就是講「足完全按怎」，「全面按怎」。　三、看戲齣(hì-tshut)講台語 ◎我嘛甘願綴你拋輾斗。　Guá mā kam-guān tuè lí pha-liàn/lìn-tuá. 　因為拋輾斗這種動作，其實是咱生活中一般人袂刁工去做，當然為著運動、啥物其它目的　是有可能，愛誠軟”食丘“才會當拋輾斗。　不管啥物境遇、啥物處境，攏甘願綴伊食苦，綴伊按怎攏無要緊。　願意佮伊做伙食苦彼種感覺。食苦、冒險、普通時袂做的代誌。　．拋輾斗：咱臺灣各地有足濟無仝款的講法，譬如講，有的人講捙畚斗(tshia-pùn-táu)，　　有的是佮這个詞的字面看起來差較濟，反死狗仔(píng-sí-káu-á)←臺南混合腔　 ◎若予伊發現，代誌會袂收煞。　Nā hōo i huat-hiān, tāi-tsì ē bē siu-suah. 　收煞siu-suah：一般攏用佇咧啥物代誌，做到tueh欲有一个坎站。　毋過佇劇情來講，意思是「今慘矣，毋知欲按怎處理矣。」　你閣舞落去，就袂收煞矣，無法度處理，足傷腦筋的意思。　 ◎這个家絕對會起海湧的。　Tsit ê ke tsua̍t-tuì ē khí-hái-íng--ê. 　咱若準講「平波波的海面」，意思就是平靜無代誌。　起海湧，就是足濟風波。　這是足有畫面的一个講法，咱愛共抾轉來用。