八月十五彼一工 船欲離開琉球港
九月十四彼一暗，大一新生，孤身前往台北。

孤單一人，來到生份ê城市。
路途生疏，離鄉走傱有原因。

英語毋thong，做代誌欲看人頭面。
做人老實，反而會予歹人拐去。
流血流滴、閣再頂真，嘛是予人看無起。

看袂著夢想佇佗位，揣袂著家己ê價值。
我親愛ê離鄉囝兒，荏荏仔馬，也有一步踢；
港口ê情景、草性ê野味，請你毋通袂記。
大格雞慢啼，青春才拄欲開始。

今日暗時，燒酒擱斟，閣補一支。
哭出聲，毋免閣吞落去。
滿腹哀怨，嘛毋通閣含佇喙邊。

哭了哀了，目屎趕緊拭，閣再怨嘆無了時。
離鄉囝兒，唯一ê倚靠是家己。
總有一工，眠夢會變美夢，
揣轉彼時，彼時風颱大湧，堅定ê出外人。

### 作者資訊
[蔡秀吉](https://www.facebook.com/thc1006)