---

title: 交通委員會報告
tags: 模擬政府, 學代會, 學生會, 學生代表大會, NTUSA, NTUSC

---

### 講台語兮理由

頂遍袂記得佮逐家講，我講台語兮理由，第一个係因為根據統計，這嘛二十外歲兮少年人，每五个干單（北京話：只有）一个人會曉講台語，而且冊讀愈高煞愈聽無。我希望會當予逐家意識到台語兮困難，毋通做共台語放挕捒（hinn-sak，北京話：拋棄）兮一代。第二个係民族認同兮因素，語言係一个民族尚蓋重要兮一个象徵，逐家應該攏捌聽過別人講：恁講中國話（其實係北京話）閣毋承認恁係中國人？嘛係這種道理。雖然這其中有一寡歷史兮因素，譬如講國民黨兮國語政策，猶毋過我猶係主張：阮食台灣米，啉（lim，北京話：喝）台灣水，就講台灣話，才會使建立一个台灣兮民族意識。

## 交通委員會議案

這擺兮交通委員會有三个案子，其中一个係違規申訴兮案子，佮學生較無關係，所以我今仔日干單會報告兩个佮學生較有關係兮案子，就係電動趨枋車仔（tshu-pang-tshia-a，北京話：滑板車）佮第二版YouBike兩个案子。

### YouBike 2.0
第一个係第二版YouBike兮案子。相信逐家攏已經討論足久矣，所以我佇遮共事務組做兮[簡報兮連結][會議簡報]囥（khng，北京話：放）佇下跤，**攏總有55个[站點][站點地圖]，1014个柱仔（鬧熱兮站位佔大概四成），預計會投放大概500至600台自輪車；影響到這嘛兮車位有697个，大概佔*3%*，其中包括鬧熱兮所在有433个車位（毋過我自己算係369 (60 cm) - 523 (42 cm)个），大概佔*8%-11%*，tann都陸續動工矣**；預計會簽約簽半冬（至暝年六月），毋過試營運係三月日爾，到暝年三月，屆時陣交通股會閣做一个問卷，佇交通委員會評估敢欲予微笑鐵馬公司繼續營運；請逐家家己看簡報就會知影矣。

主要兮重點係程序上兮問題。佇頂禮拜開會進前，本底係無這個議程，因為事務組兮講法係：阮已經佇交通委員會討論過YouBike兮案子，確定係欲予in入來矣。毋過佇開會兮前一工，我有特別要求事務組一定愛有這個案子，煞佇開會兮時變做係報告案。另外，佇臨時動議兮時陣，我主張第一版兮YouBike佮第二版兮YouBike兮營運／運作方式攏係無相仝兮，我煞閣重新提了一擺，事務組嘛掛保證，講以後若係這種形勢，in就會提出一个新兮案子。紲落來（北京話：接下來）就佇現場委員無異議兮形勢下，煞通過這个案子。

### Beam 電動趨枋車仔

第二个案子嘛係第一个討論案，係關於電動趨枋車仔兮案子。因為頂遍開會兮時陣，交通委員對這个廠商([Beam Mobility Holdings Pte. Ltd.](https://www.crunchbase.com/organization/ridebeam)，[公司官網](https://www.ridebeam.com))猶閣有一寡疑問，所以這幾个月請事務組佮廠商聯絡了後，事務組也有一寡審查兮意見。[簡報兮連結][會議簡報]仝款係頂懸彼个，下跤嘛是有廠商提供兮[簡報兮連結][廠商簡報]，逐家會使家己看看覓。佇現場兮委員主要有提出六个問題，下跤我會分別來說明。這其中有一寡問題係我提出兮，攏係佮中國有關係，包括講in公司兮負責人兮中國背景，in兮趨枋車仔講係佮米國買兮，毋過實際上嘛係中國做兮，in兮足多用語攏佮中國相仝，猶閣有尚嚴重兮係：in兮趨枋車仔進前有去[予人報出來](https://www.bnext.com.tw/article/52278/xiaomi-electric-scooter-hack)講有空縫（北京話：漏洞）。

- 佇公司負責人兮部分，in兮負責人叫做蔣松叡（tsiunn-tshing-jue, Alan Jiang），進前係中國分享鐵馬ofo東南亞兮總負責人，啊這个ofo兮五个創辦人攏係共產黨兮黨員；佇會議頂懸，in公司兮代表對這點干單講會閣補件，並無正面回應。另外就係講，因為in公司係私人公司（private limited），所以阮嘛係無法度查到足詳細兮資料。
- 閣來係趨枋車仔兮部分，in公司兮簡報係寫講，in兮車係佮米國兮一間叫做Segway Ninebot兮公司買兮，猶毋過我會議前一工去查，發現講這間公司係中國小米轉投資兮公司；若講到這个問題，in公司係講in創辦兮時陣，彼間公司確實係米國兮公司，後來發生啥物代誌，毋係in公司會使控制兮。而且in公司嘛講，這嘛這个時代，嘛足歹揣到一个毋係中國做兮電子產品。
- 講到用語兮問題，像「營運」這个詞，in攏係寫做「運營」，我看了感覺真倒彈，我這个講法嘛係現場兮委員攏總贊成兮，in公司嘛答應會來改善。
- 閣來係系統空縫兮問題，因為in兮系統是透過藍芽來佮手機仔連接兮，進前有去予一寡科技媒體報導講，有一寡械客（hai-kheh，北京話：駭客）有找到空縫，會使毋免操作使用者兮手機仔，就會使控制趨枋車仔，造成譬如講暴衝兮問題。猶毋過in公司派來兮代表毋係技術背景兮，所以嘛無法度回答這个問題，in干單講in有通過足多檢驗，猶毋過我認為有通過檢驗佮無空縫係兩回事，像米國兮Tesla嘛有通過足多檢驗，猶毋過嘛係有空縫，in煞講會回去請技術人員研究，閣來補件。

除了我提出兮問題以外，現場兮委員嘛有提出問題，in尚蓋在意兮問題係[保險](https://reurl.cc/rlX1bk)兮問題，這个問題佇頂遍兮大會頂懸嘛有講過，猶毋過有一个法律系兮顏佑紘（iam-iu-hong）教授講，有保險係業者兮權利有受到保障，但是保險公司會透過代位求償兮方式，來佮使用者要求賠償。因此，會上嘛決議，除了一寡正面表列兮狀況以外，要求beam公司放挕捒佇試營運這時仔求償兮權利。beam公司煞隨答應矣。

至於講頂遍報告兮時陣，各位學代提出兮問題，我嘛佇會議頂懸問矣，毋過有一个問題並無得到明確兮答案。頂遍報告兮時陣，各位學代提出兮問題包括講愛業者公開說明、出車禍兮時陣按怎來處理、詳細兮停車所在、猶閣有若騎到宿舍內猶係系館內愛按怎辦？

- 公開說明兮部分，beam公司有提供一份會使公開兮[簡報][廠商簡報]矣；出車禍兮部分，也係有保險會使解決；停車兮所在佇簡報內底會使揣有，另外較重要兮係業者講會透過電子圍籬來確保使用者會共趨枋車仔停佇合法兮所在（3m x 1.5m）。
- 毋過若騎到宿舍內猶係系館內兮問題，我有佇會議上提問，但是業者並無回應，干單講使用者會收到app兮警告、通知；我想講這係業者家己兮問題，阮並無需要去替in解決in兮問題，所以就無繼續問下去。

這个案子佇現場有足多討論，包括周副學務長、學生會兮楊子昂（iunn-tshu-gong）副部長佮我佇會議上係偏向反對兮意見，猶毋過業者兮態度真好（雖然阮三个攏感覺in有足多所在並無講明白），佇現場其他兮委員無特別意見兮狀況下，總務長煞裁示這个趨枋車仔兮案子有條件通過矣。

## 校車
另外一个主題係校車兮改善進度。雖然這無佇會議頂懸有討論，無閣究然（kiu-jian，北京話：畢竟）係福利部足打拼來調查、佮事務組兮仁祥（jin-siong）兄開足多時間來佮業者溝通，嘛係佮足多同學兮權利有關係，仁祥兄頂禮拜給我講，講加開兮班次足少人坐，所以嘛希望講各位學代會使打拼來鬥宣傳，尤其是蹛（北京話：住）佇城中兮黃學代佮醫學院兮賴學代。

佇今年歇寒兮時陣，我在交通委員會上有提出講，這嘛兮校車佇下晡五點半以後，干單有一班佇暗時十點兮車。經過福利部兮調查，確認佇下晡六點半加開一班對總區開回城中兮車；我嘛有共賴學代兮意見轉達予交通股，薛股長煞答應講佇下晡三點十五加開一班對城中開倒轉總區兮車，無知按呢賴學代敢有滿意無？

這嘛福利部佇咧做一个問卷，預計佇後个月會pun出來，調查這陣時使用者兮意見，閣來改善校車兮班次。另外，這嘛兮校車係干單開到文學院爾爾，毋過對這禮拜開始，所有對城中開至總區兮校車攏會閣繼續加開到圖書館，交通股會閣觀察使用兮狀況，閣來決定暝年係毋係愛繼續加開。

## 連結

[YouBike 2.0 站點][站點地圖]
[事務組兮會議簡報][會議簡報]
[beam公司兮公開簡報][廠商簡報]

[會議簡報]: https://reurl.cc/ObzvRA
[廠商簡報]: https://reurl.cc/jdaDmL
[站點地圖]: https://www.google.com/maps/@25.0185343,121.5318986,15.63z/data=!4m2!6m1!1s1DAC799iVDvVMRuJeB_3jyFPKerlTu6rp