lâi-goân: 台灣民間文學館 http://cls.lib.ntu.edu.tw/TFL/cht/cht_Article.aspx siaⁿ-im ê tóng-àn: http://cls.lib.ntu.edu.tw/TFL/audio/cca210004-li-tc001_m13_no018023-0002-m.mp3 --- Pe̍h-ōe-jī: Chhân-lê O-á Ê Kò͘-sū Chit ê chhân-lê o-á ê kò͘-sū, chiū sī ài tùi lán chia, tī lán Tāi-kah-tìn, ū 1 ê Tē-it Kong-bō͘. Tē-it Kong-bō͘ ū... ū kúi-á ê só͘-chāi. Tān-sī chit ê chhân-lê-o ê lâi-goân chiū sī chhân-lê-o-á seⁿ-chò sī hiān-chhú-sî --- Tâi-bûn: 《田螺窩仔的故事》 這个田螺窩仔的故事，就是愛對咱遮，佇咱大甲鎮有一个第一公墓，第一公墓中間有，有，有幾仔个所在，但是這个田螺窩的來源就是，田螺窩仔生做是咱現此時，軍用射擊場的東爿東爿，亦就是咱大甲高工的後壁面。 這个故事的由來是，是傳說的啦。這个所在是，uan5仔是塚仔埔就著，是安怎會講，傳說了後會變做田螺窩仔？ 在這个清朝，大約在清初的時陣，有一个地理仙，唐山仙來到台灣。啊台灣伊了後來住佇eh4，聽講是咱大安鄉的中庄，有一个好額人的所在，呼，啊了後伊，伊來居住佇彼，為著卜答謝這个主人，伊講流浪來到遮，來煞予飼，伊煞來看地理，算講卜來幫忙，幫忙伊講會當，會報答伊恩情，予伊富裕，共伊尋一門風水來做的，先，祖先的墳墓就著，看著了後，一个這个田螺窩仔，就是佇這个咱大甲高工後壁呼，第一公墓。 啊了後伊來做一屆風水了後，經過做了後，就是真正發展。啊了後因為伊佇遮居住了後，因為主人對這先生，住一下久，發展了後感覺講，亦無真正專心來，來得招待這个唐山仙的呼。了後有一工講，嗯，原因就是講伊了後，住佇遮食真久一段時間攏，是講那會全全羊肉？啊因為伊為著做這門風水了後煞來失明，煞來失明。因為這門風水做落了後，這个唐山仙咧，算講，若講一下破拍，了後伊煞來變做目睭來失明。 啊來住佇伊這个中庄一个，一个望族的家內，算講是表面是真正對伊真正禮待呼，真正得共奉承，結果是無影。 因為有一工，就是講問奴才，問查某講：「啊是安怎，那會全創羊肉予我食？」啊奴才，問成久奴才才姑不將煞講這个原因。伊講就是因為阮兜一隻羊仔，跋落屎礐，無人敢食，才創這隻羊仔予你食安呢生。啊唐山仙認為講，伊有專心得為伊來做這工課，多伊家境會當發展，伊煞無專心來得對待伊。 伊了後才共這个主人講：「您這門風水啊，已經有，有得變化，有得變化，需要擱去看覓咧。」 呼，原因就是安怎？伊這門風水做落了後，煞真發展是無毋著，但是這門風水安怎發展，因為這內底，佇彼个大甲東，鐵砧山山下，做落了後，頭前來出一个，有出泉。這門風水做佇彼，佇eh4風水下啊，會使講咱這个風水的埕脚，外埕脚來出一港泉水，這港泉水到現此時來講，二、三支pong3 phu3來抽，現此時擱抽乾。平常時無水滿出來，uan5 a2抽落去抽乾。 啊了後這个，這个唐山仙來到，擱了後來共這个主人講：「這門風水已經變卦，愛，愛擱移動，愛徙、愛徙。」啊了後這个主人，講這个唐山仙講，好，姑不將來開這門風水，擱開起來，擱掀起來，擱掘了後，這个田螺窩仔的中間就是有水，就彼水來，來洗彼目睭，因為彼目睭有田螺窩，彼个先生呼，這个唐山仙目睭煞有田螺癖仔糊稠的，伊了後水洿洿的，彼田螺窩仔擘起來，伊青瞑拐咧自安呢行。 啊了後這門風水，自安呢直直墜落，這家屬自安呢直直墜落，擱恢復到以前赫爾散赤的情形來。 呼，因為這就是卜講散會使有，對人使有一个講，無忠實，人來為你犧牲，你無專心來為伊來共伊奉待。呼，這是咱一般世間人所講，有一个貪字，呼，貪字就是無法度講誠懇來幫助別人，致使伊了後無法度擱繼續來，算講來發展安呢。 呼，到現此時這門田螺窩仔，現此時猶擱真，水猶擱真清幽，會使講不管時真清幽，啊但是了後，這門風水了後結果現此時已經是邊仔有人做，但是無發展啊。 咱講的，地理穴，愛應彼个時，應彼个天時地利才有法度，呼，我簡單說明到遮，謝謝！ ●資料出處：參見《台中縣民間文學集18－－大甲鎮閩南語故事集(一)》頁150-157