# 2017.11~12《台語講世事》文字稿
※ 頁面索引，在頁面右側下方，淺灰色格子裡
## 每一集的標頭共點落去，有Youtube的影片連結
## [2017.11.30《台語講世事》：博弈公投](https://youtu.be/Ttcnq4T_XNY)
一、看新聞講臺語：
第一條新聞：智能機器狗Aibo：tì-lîng ki/ke-khì-káu Aibo：
＊閣較巧的動物伴
　這狗仔足古錐，目睭圓輾輾(înn-liàn-liàn)，閣會幌頭搖尾溜，佮真實的狗差不多，
　伊的目睭會當表現伊的情緒(tsîng-sū/sû)，有夠巧的，閣較厲害敢若閣有好奇的心，
　佮真正狗仔仝款。
＊人工智慧加雲端運算
　人工智慧就是這馬足流行的AI，這隻機器狗仔內面囥SIM卡，後壁有一寡程式(tîng/thîng-sik)，
　予人來發明狗仔會佮你仝款個性，逐隻會綴主人無仝款的特色，發展出無仝款的，
　佮主人鬥陣成長，真好生活的伴。
＊打造做智能管家
　毋是干焦生活的伴，閣欲予伊做智能管家，做管家狗。
　愛注意發音“Aibo”，咱臺語佮日語仝款，攏有“boo”這个音。
　華語無濁音，就翻做「愛寶」，咱臺語有濁音，愛講“Ái-booh”。

◎語詞：
．機器ki/ke-khì
．人工智慧jîn-kang tì-huī
．動物伴tōng-bu̍t-phuānn
．雲端運算hûn-tuan ūn-suàn
．管家kuán-ke：咱臺語內底以早無講「智能」，咱是講「智慧」。
　　　毋過，「智能」嘛是會當接受，因為咱臺語愛綴時代進步。

第二條新聞：智能玻璃新科技tì-lîng po-lê sin kho-ki
＊特殊玻璃調節溫度　
＊技術提升擋光降溫
＊未來徛家節省能源
　足厲害的玻璃，會當共「熱」隔佇咧外口，降低溫度。
　一開始欲做，足困難的，足歹做，僫做。講愛佇玻璃中央共注一寡遐的化學物質。
．水凝膠tsuí-gîng-ka：
　　　是一个通稱，是指一種會當予水變做若膠的彼款物質。
．石墨烯tsio̍h-ba̍k-hi：石墨這種材料的一沿薄薄的結晶(kiat-tsinn)。
　　　石墨就是咱咧做鉛筆，鉛筆芯的材料。

　化學的一寡物質(bu̍t-tsit)，咱攏會當開始來共伊轉做臺語的講法。
　這號玻璃，未來若是囥佇厝內面，冷氣的費用可能會低足濟的。
　伊若降幾度，就差真濟矣。因為這馬全球天氣的無正常，
　若會當共這種玻璃真正大量生產了，會當變做咱的建築材料之一，應該有誠好的環保功能。
　咱看新聞內面足濟少年的科學家，亻因發明這款物件，這是佇清華大學的材料系，
　這寡學生來做的，咱真正愛共亻因拍噗仔。
　亻因這馬咧申請足濟國的專利，到時陣，恁兜阮兜熱天的時陣，冷氣免開遐爾仔濟，
　直接玻璃馬上共咱保護，綴溫度來調整玻璃的通光(thang-kng)，或者是溫度佮隔熱的效果。

◎語詞：
　．特殊ti̍k-sû：這玻璃算是材料上的改變，毋過伊對溫度或者光線
　　　　來做變化，嘛是算真巧矣，嘛是智能。
　．徛家khiā-ke：這（智能玻璃）會當用佇咱的徛家，抑是住宅。
　．住宅tsū-the̍h
　．調節tiâu-tsiat：伊會當調節溫度，會當隔光，擋光線。
　．技術ki-su̍t：這是真先進的技術。
　．能源lîng-guân：會當節省能源、省電，這款環保的功能。
　．隔光keh-kng
　．擋光線tòng kng-suànn

二、公共事務做伙舞：博奕公投phok-i̍k kong-tâu
　　kong-kiōng sū-bū tsò-hué bú：
　　公共事務逐項有，
　　kong-kiōng sū-bū ta̍k-hāng ū,
　　包山包海若雺霧，
　　pau-suann-pau-hái ná bông-bū,
　　十二分鐘有根據，
　　tsa̍p jī hun-tsing ū kun-kù,
　　予你聽甲飽tu-tu。
　　hōo lí thiann kah pá tu-tu.

前一站仔，佇咧金門拄才舉辦一擺的「博奕公投」，有兩字咱足生份。
◎「博奕公投」是啥物
＊「博奕」的意思
　古早時，譬如講「行棋子」，嘛是一種博奕。
＊頓票決定欲予人起筊間無
　博奕公投簡單來講，是政府欲問咱的意見，若是有人欲佇恁兜附近，
　開一間親像Casino，遮爾仔大間這款的筊間，你有欲同意無？
　政府欲用公民投票的方式，來問逐家的意見。
＊離島專屬
　博奕公投是根據一个法律，號做《離島建設條例》的規定來舉辦的。
＊澎湖、馬祖佮金門總共四擺
　佇過去差不多十年的時間以內，咱國家有辦過四擺的博奕公投，
　澎湖辦兩擺，馬祖一擺，金門一擺，總共有四遍。這四遍當中，
　澎湖兩擺攏無欲同意，馬祖講欲同意，金門一擺講無欲同意。

◎ 離島建設條例
佇馬英九執政的時陣，澎湖有一个立法委員，伊感覺離島欲建設有較僫，伊希望有一个法案提出來，就是希望透過這个法案，離島的建設會當較緊咧。這个法案號做《離島建設條例》，是一个特別的法律。
＊2009年法案通過
＊特別法
＊十之二
　《離島建設條例》內面有一條「十之二」，有規定講會當予離島辦博奕公投。內面有足濟條，
　一寡規定會當較鬆咧，予建設會當較緊咧，「十之二」嘛是仝款有較鬆的規定。
＊佮鳥籠公投無仝
　《離島建設條例》伊毋是一个鳥籠仔公投。
　這馬中華民國的公投法，就是一个鳥籠仔公投，因為公投法規定，咱若欲辦一个公投，
　毋是干焦比票數爾，猶愛閣比投票率，出來投票的人若無夠濟，這个案著無法度成矣。
＊相對優勢決
　《離島建設條例》十之二規定，毋免用鳥籠仔公投，博奕公投只要比票數著會使矣，
　攏免管是幾个人出來投票，干焦三个人出來投票，嘛無要緊，按呢嘛成。
　這就是號做「相對優勢決」這款的投票。
　這是博奕公投的一个特性。

◎有過無過，敢有要緊？
　博奕公投若過，筊間會當開？抑是袂當開？
　就算同意的人較濟，嘛是起袂起來。
　因為中央根本無母法，甚至咱的政府一寡單位嘛承認，其實博奕公投只是問逐家的意見爾，
　後壁猶有足濟物件攏無攢，筊間絕對袂當開的。
＊中央無母法
＊欲廢掉離島建設條例十之二無？
　所以逐回博奕公投舉辦了後，離島的人就出來喝聲，緊共《離島建設條例十之二》廢掉，
　這馬逐家都咧看政府會共廢掉無。

◎語詞
．包山包海pau-suann# pau-hái#：足口語的，用白話音讀就好矣。
　　　四字分做兩字兩字讀，是強調「山suann」佮「海hái」。
　　　抑是pau-suann-pau-hái四字連讀，當做成語抑是俗諺，
　　　攏會使，愛注意變調。　　
．建設kiàn-siat：「設siat」毋是讀做「色sik」。
．鳥籠仔tsiáu-lang-á，鳥仔籠tsiáu-á-lang攏會使。
．博奕公投phok-i̍k kong-tâu：博奕，咱口語無咧用，是中文一个詞。
　　　咱若解說較口語的，是毋是有欲予人起筊間？
　　　因為這四字寫佇法律內面，咱若欲唸，愛共照漢字唸。
．跋筊pua̍h-kiáu
．筊間kiáu-king：予人跋筊的所在。
．公民投票kong-bîn tâu-phiò：透過「公民投票」的方式。
．頓票tǹg-phiò：愛去「投票」，有人講「頓票」。
．頓印仔tǹg-ìn-á、崁印仔khàm-ìn-á，嘛會使。
　　　因為「崁khàm」佮「蓋khàm」仝音，較少人講崁票。
　　　若毋是聽著「投票」就是聽著「頓票」。
．金門Kim-mn̂g
．馬祖Má-tsóo
．澎湖Phînn-ôo
　　　這幾个仔地名，愛會曉讀。
．離島建設條例Lī-tó# Kiàn-siat Tiâu-lē：
　　　「離島」欲強調，島讀本調。後面四字愛連讀。

三、諺語gān-gí
◎一隻蝨母嗙甲水牛大。
　Tsi̍t tsiah sat-bó pòng kah tsuí-gû tuā.
．歕雞胿pûn-ke/kue-kui 的意思。
．有真濟欲愛博奕公投，欲愛開筊間的人，過度宣傳有筊間的好處，
　經濟利益、就業機會等等。這都是「一隻蝨母嗙甲水牛大。」

## [2017.12.07《台語講世事》：流浪動物零刣殺](https://youtu.be/Iri6ABPiOME)
一、看新聞講台語
第一條新聞：安親班貓仔伴
　佇咧安親班內面，貓仔囝會佮囡仔鬥陣讀書，這效果應該袂䆀。
　莫講安親班，若是有這款學校，連學校有這款的環境，我想會增加學習的興趣佮功能。
＊貓仔伴通敨放壓力
　若是有貓仔伴佇咧邊仔，抑是狗仔伴，莫講囡仔，大人嘛是仝款，
　這馬有動物伴來，逐家的壓力慢慢仔就會消去，會較敨放。
＊野貓變助教
　佇安親班內面，囡仔做功課做甲一半，感覺無聊，會使共in摸摸咧，有療效，
　本來感覺講寫甲手足酸的，抑是感覺足忝的時陣，摸摸咧。
　毋是臺灣按呢，足濟國家攏有這款的風氣。
．『小書僮』就是「伴讀phuānn-tha̍k」，就是陪咱讀冊。
．『超療癒的』就是「足有療效(liâu-hāu)的」
＊性命教育的意義
　「性命教育」是咱這幾冬，漸漸流行佮有咧實施的一種教育的方式。
　人類欲按怎佮動物互動，互相真良善，尊重性命，按呢的觀念。
◎語詞 gí-sû
．貓仔伴 niau-á phuānn
．壓力 ap-li̍k
．鬥陣 tàu-tīn
．伴讀 phuānn-tha̍̍k → 『小書僮』
．足有療效 tsiok ū liâu-hāu → 『超療癒的』
．性命教育 sènn/sìnn-miā kàu-io̍k
．野貓iá-niau/散貓suànn-niau，野狗iá-káu/散狗suànn-káu：
　是講亻因孤隻，散(suànn)佇四界，無固定的厝。

第二條新聞：動物之家
　『領養』，咱的口號是「分的較贏買的pun--ê khah iânn bé/bué--ê」。
　就是講咱毋通用買的，直接去收容所去用「分的pun—ê」。
　若是你去「傳種」的工場買，為著欲予遮的動物生育，注射，有的無的各種
　對動物毋是足好的做法。
　這是足重要的觀念：分的比買的較好。
＊分--ê身體較勇健
＊共人分動物的程序
＊藝人佮社群媒體鼓舞
＊分的較贏買的

◎語詞
．分pun：這字，以早的人，去共「分pun」一个囡仔，抑是講去共人分一个啥，
　「分」有一種較無好的感覺。
　　　「分pun」字有幾若款意思，不是干焦一種意思，可比講去共「分」囡仔，
　　　抑是乞食共人「分」這種的，攏是分的意思。
　　　毋但按呢，所謂『領養』這種代誌，
　　　咱用『領養』動物，佮『領養』囡仔，會使講是仝款意思。
　　　咱用「分一个囡仔來飼」這種觀念，來講「分一隻動物來飼」，
　　　拄仔好是相對的，無啥物無好。現代「分」的意義無仝款矣。
．勇健ióng-kiānn：特別強調健康狀況足好的，比健康閣較健康。
．健康kiān-khong：是一个規个較平均的健康狀況描寫。
．程序tîng-sū 、thîng-sū兩種講法攏會使
．藝人gē-jîn，”g”愛發音出來。
．宣傳suan-thuân
．社群媒體siā-kûn muî-thé：面冊，FB、Line欲直接講這个詞嘛會使。

二、公共事務做伙舞
◎流浪動物零刣殺政策
＊十二夜電影引起討論
　幾年進前，有一部電影號做《十二夜》，透過這部電影，真濟人才發現原來
　佇咱的《動物保護法》內面，有一條是講流浪動物若是去夆掠到收容所，
　若是12工，無人來共領轉去，抑是無人來共𤆬轉去，收容所就有權利，會當共安樂死。
＊動物保護法的空縫
　這个(法)條，逐家聽了足驚惶的，感覺真毋甘，感覺對性命的尊重是非常無妥當。
　雖然法律並無規定，掠著，12工了後，一定愛共處理掉，總是予政府一个方便門。
＊百外萬隻流浪動物夆刣
　根據統計，佇1999年一直到2013年，算起來差不多14、5年的時間，
　有117萬的動物去按呢夆處理掉，這內面當然有一寡是屬於安樂死，
　就是講伊破病、抑是無法度醫，咱為著欲予伊莫遐爾仔痛苦，所以用安樂死的方式。
　但是這117萬隻當中，大部份攏是因為12工一到，收容所無法度處理，所以才共處理掉。
＊這是掠來刣，毋是安樂死
　有人講這是「安樂死」，咱會當講這毋是安樂死，是「掠來刣」。
　這款的法律，逐家感覺非常無好。
＊2017年二月起流浪動物零刣殺政策起行
　佇咧看電影進前，都有真濟動物保護團體，有推捒這个法律，
　佇2017年二月開始，《流浪動物零刣殺政策》就起行矣。

◎零刣殺的配套措施
＊源頭管理會當分兩个方向來看
　源頭的管理，就是盡量予流浪動物莫愈來愈濟，閣會當分做兩个方向：
＊飼主：登記、囥晶片、放捒的成本
　飼主咱就愛配合，愛去登記，愛佇動物身軀囥晶片，袂當凊彩共放捒。
　放捒，法律嘛愛規定，有加閣較懸的成本。
＊業者：管制傳種工場、取締非法
　政府愛來管制，真濟傳種的工場，有一寡非法的，愛共取締。
　　　gia̍p-tsiá 的”g”，愛發音清楚
＊按怎運用節育控制
　政府嘛會規定，飼主佮業者攏愛節育的控制，莫予這寡流浪的動物愈來愈濟，莫予生遐濟。
＊TNVR的意思佮限制，嘛有人講TNR，予貓仔、狗仔莫生湠遐爾仔濟。
　T共怹掠來
　N共怹做手術，莫予怹閣生湠落去
　V共怹注射，注痟狗病的預防射
　R閣共放轉去
　雖然這个效果敢若袂䆀，但是成本足懸的，干焦會當處理一部份，袂當處理全部。
＊尾溜管理：提懸認養率。校犬、警犬的考慮
　就是咱逐家攏會當做的，咱會當來監督政府，抑是收容所，看收容所的設備(siat-pī)是毋是
　有夠好，予這寡貓仔、狗仔生活了真好，真濟人歡喜去共飼養，飼養率是毋是會當提懸。
　學校，抑是警察局是毋是會當考慮，領一寡狗仔出來做服務。
「零刣殺」的配套措施是非常濟，上重要的是咱性命的觀念愛正確。

◎路頭猶遠，咱著隨起行
＊性命教育真要緊，但是性命袂堪得等待。
　性命從來就毋是輕可代，咱性命教育真要緊，咱千萬毋通等。
＊公家機關、民眾做伙推捒
　咱應該做伙來共公家機關監督，逐家鬥陣來推捒。
＊想步度過、行向理想
　這馬中間過渡的時間，咱著鬥陣來想步來共行過，行向理想的所在。
＊尊重性命，毋是輕可代
　咱來看待政策，正確的觀念。

◎語詞
．推捒：「推」有幾若的音，the、thui佮tshui的音。
　一種較推動性的，欲去鼓舞、促進啥物，是講「tshui-sak」。
．受華語影響的語法：
　錯誤：愈來愈濟「嗎」？
　正確：敢有愈來愈濟？
　　　　有愈來愈濟--無？
．放捒 pàng-sak，毋是”放殺pàng-sat”，
　「捒sak」佮「殺sat」無仝音。
．看待 khuànn-thāi的thāi，毋是tāi.
．傳種 thn̂g-tsíng：「傳thn̂g」是白話音，強欲無人講的白話音。
．取締 tshú-tè：「締tè」佮”皇帝”的「帝tè」仝音。
．措施 tshòo-si：「措tshòo」佮”食醋”的「醋tshòo」仝音。
．業者 gia̍p-tsiá：華語無「g」這款濁音，愛特別注意。
．監「督」政府 kàm-tok tsìng-hú：連讀的時，愛會記得變調讀「to̍k」。
．注預防射 → 『接種疫苗』
．分狗仔來飼：狗仔毋是用「領」的。

◎語詞gí-sû
．流浪動物 liû-lōng tōng-bu̍t
．收容所 siu-iông sóo
．相挨相𤲍 sio-e-sio-kheh/khueh
　　　例：普通時仔，我的車共伊「挨e」著。
　　　原本是咧講足鬧熱的，像講啥物年仔、節仔彼種，人插插。
　　　咱用佇遮意思就是講「空間無夠」，動物的數量過頭濟的時陣。
．安樂死 an-lo̍k-sí
．零刣殺 lîng-thâi-sat
．傳種工場 thn̂g-tsíng kang-tiûnn
．空縫 khang-phāng：法律的空縫，致使過去有12工無人來飼就愛刣　。
．囥晶片 khǹg tsing-phìnn：愛管理，就愛囥晶片。
．營業執照 îng-gia̍p tsip-tsiàu

三、俗諺
◎狗來富，貓來起大厝。
　Káu lâi pù, niau lâi khí tuā-tshù.
　富pù，是白話音，以早的好額人，毋是叫做好額人，叫做「富戶pù-hōo」，
　抑是叫做「富戶人pù-hōo-lâng」。
意思就是一个好吉兆(kiat-tiāu)，咱莫去嫌遮來的散狗、散貓，有緣咱就會當共伊飼。
## [2017.12.14《台語講世事》：台灣的空污問題](https://youtu.be/TgBqjsthUgM)
一、看新聞講台語
第一條新聞：珍惜食物再利用：新北惜食網
＊菜蔬生了䆀嘛是寶
　簡單一句話：毋通討債，食袂完的物件，一定愛好好仔處理。
＊鼓吹寶惜食物概念
　欲按怎寶惜猶閣會當運用，雖然外表無啥好看，可能生了無遐直，抑是大細粒差足濟，
　遮的咱感覺NG的，這種菜蔬、果子，其實攏猶閣會當好好仔做食材。
＊食袂了窮窮咧紮轉去
　這寡總舖師講會使提來炕湯(khòng-thng)，抑是礤簽(tshuah-tshiam)，咧食的時陣，
　已經毋是伊原來的形，所以講真正無差，發揮創意，欲按怎料理，利用遮的食材。
　新北市有一个「惜食網」，來教逐家一寡資訊，看欲按怎共這个食物好好仔來寶惜，
　鼓吹這款的觀念，食袂了愛共窮窮的，紮轉去。
◎語詞
．菜蔬tshài-se：
　　　青菜tshenn/tshinn-tshài，伊有另外一个名，叫菜蔬。
　　　文音講「蔬菜soo-tshài」，事實上咱口語無按呢講。
　　　咱攏是用白話音→蔬se，菜蔬(tshài-se)，逐家愛慣勢講。
．炕湯khòng thng：咱有一寡物件，可能會當共伊炕湯來煮，
　　　若是真正足䆀的，嘛是會當做「落肥lo̍h-puî」的用途。
．落肥lo̍h-puî
．金瓜kim-kue：親像蔥頭(tshang-thâu)、金瓜去炕，變做膏膏湯湯，營養價值足懸，攏仝款。
．寶惜食物pó-sioh tsia̍h-mi̍h：
　　　「惜食網」若是照字讀sioh-si̍t-bāng，若是口語講的「寶惜食物」，
　　　按呢較合咱臺語的講法。
．煮食tsú-tsia̍h：欲按怎共咱遮的，生了無講蓋好看的菜蔬、果子、食材，來做料理，
　　　咱講「煮食」，欲按怎囥佇咧咱煮食的路用。
　　　這是環保的做法，其中的一項，發揮逐家的創意(tshòng-ì)。

第二條新聞：愛心捐血送火鍋料
＊捐血送火鍋料真心適
　頭一擺聽著，以早攏是送牛奶抑是餅。
　咱臺灣人應該毋是欲提火鍋料才去捐血，毋過加減有唌人去捐血，加減有這號氣味佇咧，
　用這个共逐家唌一下，真正袂䆀。
＊天氣影響捐血量
　因為傷溼、傷冷，甚至到足”冫彥gàn”的、足凍的，按呢的時陣，無人欲出門，攏勼咧厝、
　覕佇咧室內，袂講出門會想著欲去捐血。
　想著這个辦法猶閣真正袂䆀。
＊台灣人的燒烙
　這馬有一个講法，講「熱血jia̍t/lia̍t-hiat」，共咱的血捐出來，「熱血」參與真濟代誌。
　有一寡民間團體來參與，送一寡禮品，來支持衛生單位相關院所，會當來做捐血的贈送品。
　除了火鍋料，閣有這个茶包、咖啡包、證件吊牌、環保餐具，想各種齣頭，欲唌人捐血。

◎語詞
．火鍋hué/hé-ko = 食爐tsia̍h-lôo、圍爐uî-lôo
　豐惠老師：古早無咧講這个詞，阮細漢的時，敢若無聽過人講按呢。
　　　　　　因為人攏講「食爐」。這馬講「食火鍋」，以早是講「食爐」。
　　　 火鍋hué-ko、hé-ko有腔口差。
．捐血kuan-hueh、kuan-huih嘛有腔口差
．溼溼sip-sip：天氣足溼冷的，溼溼 → 較溼的這種天氣。　　　
．十花五色tsa̍p-hue-gōo-sik
　=五花十色gōo-hue-tsa̍p-sik　嘛有人講，意思是足濟款的。
　　　有足濟種的民間團體捐禮品、禮物來做捐血的贈品。
　　　這四字的音節是一个詞，前三字攏愛變調。
．燒烙sio-lō：民間團體捐贈送品，足熱情，予民眾佇真寒的天氣，
　　　食這个燒燒的爐，食火鍋遮的料，按呢嘛真燒烙。
　　　一般咱會講「溫暖」，會當講「真燒烙」這个詞來用。

二、公共事務做伙舞：空氣汙染
這馬拄好是寒天，咱定定感覺講寒天的空氣品質，敢若無講誠好。
無毋著，佇咱臺灣的寒天，10月到過轉年的5月，寒天的時間，定定是空氣汙染的時間，
甚至有人講臺灣的寒天，已經變做「空汙季」，空氣汙染的季節，敢有遮爾仔嚴重？

◎啥物是PM2.5
空氣汙染內面，足濟愛討論的代誌，今仔咱就對定定聽著的一項物件，號做PM2.5來講起。
＊這个數字是啥？
　咱定定會聽著電視咧講，今仔日的PM2.5偌厚拄偌厚。
　到底啥物是PM2.5？這个PM，是兩个英文字的縮寫，就是足細粒、足細粒，
　會浮佇咧空氣當中的粒子。
　2.5數字是啥物意思？這都是粒子的大細，2.5號做直徑的長度。
　譬如講咱若看著PM10佮PM2.5，咱就知影PM10會比PM2.5較大粒。
＊伊有偌細粒？
　比咱的頭鬃，一枝頭鬃的直徑25分之1閣較幼，按呢你都知影這是偌幼拄偌幼矣，真正非常幼。
＊伊的成份是？
　PM2.5佇咧古早時陣，都有出現佇咧咱的身軀邊仔，只是講以前伊的量無遐爾仔濟，
　無遐爾仔厚，而且伊的成份較自然淡薄仔。
　譬如講一寡坱埃(ing-ia)，抑是火山爆發、抑是海內面的鹽水等等，這攏會是PM2.5的成份。
　若這馬咧？咱人的生活方式無仝款矣，咱需要電，需要發電，
　真濟所在會燒火炭(hué/hé-thuànn)，閣來，有真濟化學的物質，化工的用品等等，
　甚至咱駛車，抑是騎oo-tóo-bái，攏會出現一寡PM2.5的成份。

◎現代的PM2.5對佗位來
　PM2.5講起來是全世界的問題，咱臺灣PM2.5的比例是按怎來看？
＊國內外來源的比例
　根據環保署請學者來做的研究，咱有六成是咱臺灣家己產生的，有四成就是對外口來的。
＊東北季風佮大陸冷氣團落南
　咱知影外口，譬如講隔壁的中國，亻因的嚴重性是非常嚴重，所以每一年的寒天，
　中國所產生的PM2.5，就會綴東北季風，猶閣有大陸冷氣團落南，落來到咱臺灣。
＊佮風向、地形、風速嘛有關係
　PM2.5若是予風吹到盆地(phûn-tē/tuē)，抑是背風的所在，伊就湠袂出去，
　一直囤(tún)佇遐，PM2.5的濃度會愈來愈懸，愈來愈嚴重，若是閣拄著無風，按呢閣較嚴重。
　PM2.5攏會受著這寡物件的影響。

◎PM2.5對咱生活的影響
＊能見度(視程)低
　上簡單的一个影響，咱出門的時陣，發現講天規个茫茫霧，予咱的視程非常低，
　這就是非常嚴重的一个現象。
＊欶著會傷身體
　但是若是干焦看無，猶閣『還好』，猶閣細項代誌，上嚴重的就是因為PM2.5非常非常的幼，
　透過咱欶入去肺管內面，就會予咱破病。
＊閣較濟長遠的影響
　而且因為伊足幼的，這已經喙罨根本無法度處理的。
　對咱真濟兒童的身體，
　嘛有真濟䆀的影響。
＊按怎改善
　咱臺灣有真濟團體，這馬就是來督促政府，看會當跤手較猛咧袂？
　因為這牽涉著規个產業的環境，這就是政府才會當做會到的代誌。
　咱嘛有看著真濟遊行，逐家攏非常拍拚，希望政府緊共問題揣出來，還咱一个清氣的天。

◎語詞
．汙染 u-jiám，u-liám，這有腔口差。
．公共kong-kiōng
．厚kāu v.s. 濟tsē/tsuē：
　　　厚雨、厚話、厚操煩、厚蠓，濟甲你足歹去算，抑是講
　　　沒法度具體算。這種的”濟”，咱就用”厚”來講。
．環保署khuân-pó-sú
．牽涉khan-sia̍p
．視程sī-thîng/tîng　→『能見度』
．盆地phûn-tē = 碗公地形uánn-kong tē-hîng
．坉thūn v.s. 囤tún：是無仝款的用法。
　　坉thūn：共物件一直填(thiām)入去，坉入去。
　　　註：《教典》1.在空洞中塞東西填平。2.投入、投進。
　　囤tún：慢慢仔積、積、積，積聚(tsik-tsū)了後，愈來愈濟。
　　　註：《教典》儲存、積聚。
．空氣汙染khong-khì u-jiám
．塗粉thôo-hún
．坱埃ing-ia
．肺管hì-kńg
．肺泡仔hì-pho̍k-á
．掛喙罨kuà tshuì-am
．著癌tio̍h gâm
．痚呴he-ku
．呿呿嗽：khuh-khuh-sàu
．廠商tshiúnn-siong

三、俗諺sio̍k-gān
◎別人的囡仔死袂了。
　Pa̍t-lâng ê gín-á sí bē/buē liáu.
　咱有一寡製作汙染的源頭、單位，不管公司，抑是國家，可能攏會想這可能袂影響著我本身。
　其實這是「別人的囡仔死袂了」的心理。
　但是咱這馬講的空氣汙染，毋是「別人的囡仔死袂了」，這是真正逐家攏會欶著。
　這是一个非常嚴重的問題。
## [2017.12.21《台語講世事》：認捌罷免](https://youtu.be/YEoWuC6MyDs)
一、看新聞講台語
第一條新聞：縖安全帶新規定
＊愛口頭宣導的新規定
　這馬咧坐遊覽車，抑是坐大型的巴士，司機朋友會共咱提醒講愛「縖安全帶」，會特別講，
　以早可能干焦貼佇彼窗仔門邊，講愛縖，司機無一定愛口頭講。
　但是來提醒一下，逐家都較頂真，就共縖起來。
＊無縖安全帶致使發生事故
　應該是進前攏愛縖矣，逐家攏無要無緊，其實你若無縖安全帶，真正是足危險的。
　若是講振動，抑是車禍，有時仔雄雄擋、抑是ǹg邊仔有啥物物件傱出來，
　運將（“運ちゃん”Ùn-tsiàng）嘛是愛緊踏擋仔，而且有真濟代誌，你幌出去的彼个力頭，
　足強的，真正是非常危險。
＊Ùn-tsiàng、人客攏有責任

◎語詞
．縖hâ：「縖」安全帶，安全帶是用「縖」的，毋是用「縛pa̍k」的。
　　　毋但安全帶用「縖」的，褲帶嘛是用「縖」的，抑是講縖圍軀裙仔(uî-su-kûn-á)彼種的，
　　　彼嘛是用「縖」的，毋是用「縛pa̍k」的，逐家毋通烏白縛。
．安全帶an-tsuân-tuà
．遊覽車iû-lám-tshia：嘛有人講”貸切仔tāi-tshiat-á”，彼是較老輩的，對日語轉來的。
．反車píng tshia：若無縖安全帶，萬不二有啥物意外，反車的時陣，危險，
　　　你若有縖安全帶，比較較安全。
．ùn-tsiàng：是咱的司機朋友，這嘛是對日語來的。
．人客lâng-kheh：ùn-tsiàng當然是載人客，毋是「客人」。

第二條新聞：山藥美食展
＊山藥大收
＊好山藥直、khiū、會牽絲
　好的山藥薯，有幾个仔特色，譬如講伊愛有夠直，袂使彎彎曲曲(uan-uan-khiau-khiau)，
　有的食起來脆脆、冇冇，好食的食起來會小可“食丘”khiū，愛閣會牽絲，莫傷幼，
　愛像咱的手股(tshiú-kóo)，毋是幼幼一條，愛較大箍的。
＊健康料理
　山藥薯日本人會共磨磨咧，𣻸𣻸一糊，就蓋佇咧飯頂懸，抑是啥物頂懸，日本人有夠愛食的，
　日本人共伊號做やまかけ，山藥薯共囥佇頂懸的意思。
　山藥薯是一个健康的料理，養生閣好食。

◎語詞
．山藥薯suann-io̍h-tsî/tsû：會當叫做「柱薯」，嘛是有人講「山藥」。
．柱薯thiāu-tsî/tsû：親像敢若柱仔仝款，直直長長，以早的講法。
．大收tuā-siu = 大出tuā-tshut、豐收hong-siu，攏會當講。
．黏黏𣻸𣻸liâm-liâm-siûnn-siûnn，
　　　除了山藥薯，像講胃豆，有人講羊角豆，華語號做『秋葵』。
　　　咱講「siûnn-siûnn」，臺南人講「siônn-siônn」，
　　　唱歌「tshiùnn-kua」，臺南腔「tshiò-kua」。
．“食丘”khiū：袂使用英文字母”Q”代替，因為聲調無仝。
　註：咱的“食丘”是第7調，英文字母的“Q”是第1調，無仝調。
．手股tshiú-kóo：柱薯愛較大箍淡薄仔的，親像手股。
．牽絲khan-si
．礤簽tshuah-tshiam：你會當用礤簽，抑是切角的方式來去料理，磨做一糊嘛是會使。
．切角tshiat-kak

二、公共事務做伙舞：認捌罷免
最近逐家應該佇新聞頂懸，會看著新北市立法委員黃國昌的罷免代誌，首先，咱愛先知影到底「罷免」佇咱臺灣的法律內面，是啥物款情形。
◎認捌罷免
＊入法晏(uànn)、戶橂(hōo-tīng)傷懸
　咱中華民國的憲法，有予咱有罷免的權利，憲法內面雖然有，到法律內面，講起來是足晏的，
　是佇咧1974年，差不多40幾年前，這40幾年來，敢若毋捌聽過有佗一个罷免，
　有過關抑是啥，因為進前，佇法律內面規定的戶橂，真正是傷懸。
　可能普通鄉鎮市的市民代表，敢若有幾擺仔有過，彼个層級較懸的，咱都毋捌聽過。
＊現此時罷免的戶橂規定
　為啥物新北市黃國昌的案會過？彼是因為這馬戶橂的規定已經降低。
＊「時代力量」修法
　因為佇咧舊年，「時代力量」政黨佇立法院，非常大力捒這个「選舉罷免法」內面罷免的規定
　來修法，感覺以前罷免的戶橂遮爾仔懸，根本就是無愛予人民來使用這个權利。
　亻因就欲來修法，予戶橂降低落來，就是因為降低了後，這馬顛倒是時代力量的黨主席黃國昌
　變做頭一个新的戶橂適用的對象。

◎罷免新法、舊法比較
　第一階段連署：新法：1%； 舊法：2%
　第二階段連署：新法：10%； 舊法：13%
　通　宣　傳 無：新法：會當宣傳；舊法：袂當宣傳
　過　手　戶 橂：新法：25%； 舊法：50%

◎黃國昌罷免案
＊時間、過程、結果、啥人發起
＊「安定力量」的立場
＊理由是委員傷囂俳？
　這是一个團體「安定力量」來發起的，怹是一个較保守的勢力(sè-li̍k)較右派基督教組成的，
　亻因感覺黃國昌彼時是支持婚姻平權，佮in的理念相扴(sio-ke̍h)，而且有一工，安定力量的人
　沒約予好勢，就走去黃國昌的辦公室，講欲佮伊討論，結果，黃國昌彼的時陣佇咧立法院，
　無法度出來佮怹見面，就講黃國昌傷囂俳，以這个理由欲來罷免黃國昌。

◎若罷免予人濫使用欲按怎？
＊戶橂降低的影響
　這馬戶橂變遮爾仔低，敢會予親像這款的勢力來濫使(lām-sú)？當然有可能有這个情形。　
＊發揮監督佮平衡的力量
　多元的聲音，本來就是咱民主的社會，非常重要的一个概念。
　有人出來濫使，咱著愛發揮監督的力量，若是感覺這个罷免案，無理由，你感覺無同意，
　你著愛出來頓票。
＊毋通恬喌喌(tiām-tsiuh-tsiuh)、凊tè-tè (tshìn-tè-tè)
　毋通恬喌喌、凊tè-tè，毋通佇厝內面，你愛出來頓票，發揮國民的力量，
　按呢咱都毋驚罷免的工具，會去予人濫使。
　這是上新的公民概念，包括你，包括我，咱攏愛來學習。

◎語詞
．予人hōo-lâng → 夆hőng vs. 共人kā-lâng
　是予人罷免？抑是共人罷免？
　是欲罷免黃國昌，黃國昌夆罷免的案。
　有人提出欲共黃國昌罷免的案。
．相㧎sio-khê vs. 相扴sio-ke̍h：
　相㧎：車佮車淡薄仔相㧎。
　　　　㧎牢(khê-tiâu)--leh，袂順，有啥物物件擋咧，㧎咧。
　相扴：互相有衝突，對對方有懷疑，這種的攏會當講相扴。
．罷免pā-bián
．過手kuè-tshiú：愛按怎罷免才會當過手。過關的意思，愛有一寡條件。
．陳情tîn-tsîng：欲表達意見、訴求，講予官員，抑是民意代表聽。　
　　　陳tîn，是文言音；姓”陳tân”，是白話音。
．濫使lām-sú = 濫糝lām-sám：烏白凊彩用的意思。
．贊聲tsàn-siann：你若有贊聲啥物人的主張，可能共支持，抑是
　　　透過啥物款的頓票方式，去共伊表達，號做贊聲。
．恬喌喌tiām-tsiuh-tsiuh，抑是tiām-tsih-tsih攏會使。
　　　攏無聲，足安靜的，足恬的，就是「恬喌喌」這種形容。
　　　這種攏是擬聲(gí-siann)、狀聲詞(tsōng-siann-sû)，
　　　各地有各地無仝款的講法，攏是按呢疊詞。
．凊tè-tè(tshìn-tè-tè)：足冷，足無欲注意，無欲關心，無欲參與的彼款冷淡的形容。
　　　凊飯(tshìn-pn̄g)，隔頓、隔暝的飯冷去矣。

三、俗諺
◎出頭著損角Tshut-thâu tio̍h sńg-kak.
　表現較顯目(hiánn-ba̍k)，較引人注意，顯人的目，敢若特別懸，可能成做人攻擊的目標。
## [2017.12.28《台語講世事》：陪審團制度](https://youtu.be/vE7TVDAtai4)
一、看新聞講台語
第一條新聞：台菜食到飽
＊台灣料理手路幼
　咱的臺菜「臺灣小食」，攏是一寡手路菜，這就是臺灣傳統料理，就是臺灣料理臺灣菜。
　這馬有人講「臺灣料理攏是小食」，這攏是毋著的觀念，咱直接講出講「這就是臺灣料理」，
　有足厚工的，嘛有小食，毋但食粗飽的，嘛有彼種食巧的，有大項，嘛有細項，攏是料理。
＊在地食食上飯店
　臺灣點心的手路濟又閣幼，在地的食食上飯店敢若足稀奇的。
　日常生活攏是食遮的，有時仔較幼質、較厚工，當然咱一般家庭無一定有法度，
　有時間、有精神去變遐的，這就是用咱在地的食材，用咱傳統的一寡方法，去料理，去煮食，
　這就是咱在地的食食。
　咱遮是臺灣，臺灣料理無上飯店，是欲上啥物人的飯店？
＊食飽飽閣了解文化

◎語詞
．毛蟹môo-hē：毛蟹有分足濟種：蟳tsîm、蠘仔tshi̍h-á。
　　　一般若準講飯店，一般是蠘仔、蟳仔較濟，有的分閣較幼，嬰母仔啦、沙公啦，足濟種。
　咱臺灣較無了解咱海島國家遮的海產，抑是水產類的，咱應該愛較了解。每一種攏有伊的名，
　咱應該共抾轉來講。
　　註：補充：
　　﹡嬰母仔ìnn-bó-á：母蟳因授精前、後的差別，分為「處女蟳」，
　　　叫做”幼母仔iù-bó-á”佮「紅蟳âng-tsîm」兩種。
　　﹡沙公sua-kang：公蟳就是俗稱的”菜蟳”。
．總舖tsóng-phòo、總舖師tsóng-phòo-sai：咧料理遮的食食。
．潤餅𩛩：jūn-piánn-kauh、潤餅佮jūn-piánn-kap：這兩種攏會使。
　「𩛩kauh」共𩛩一𩛩按呢，「佮kap」就是共佮做伙。
．刺瓜仔tshì-kue-á：『大黃瓜』。炕湯khòng thng、煮排骨tsú pâi-kut。
．芫荽iân-sui：濫芫荽。
．食食tsia̍h-si̍t = 啉食lim-tsia̍h
　　　食食文化tsia̍h-si̍t bûn-huà = 啉食文化lim-tsia̍h bûn-huà

第二條新聞：里長踅法院
＊里長到法院演習
＊民眾對司法了解有限
＊法律諮詢通透過里長
　「招里長，去法院踅踅咧。」，法院逐家攏足無愛去的，儘量攏莫去沐著，上好是莫去，
　心理是按呢，講著「法院」，有一句定定聽著的話，講「法院毋知啥物人開的？」（略），
　但是這馬這个觀念，咱著愛共改過來。法院都是咱逐家的法院，來維持一个正義的所在。
　法院規个的程序是按怎？這个所謂「里長踅法院」的活動，抑是予閣較濟人來了解法院，
　伊的程序是足重要的。招里長來到法院演習，予閣較濟人對司法了解閣較濟，非常重要。
　會當透過這个活動，民眾若有疑問，會當透過里長來諮詢，算做共司法相關的觀念種子，
　掖到各鄰里去，予里長做一下共遮的觀念傳播予民眾，按呢的一个程序。
　為啥物咱攏無了解，其實學校可能嘛無教，學校無講蓋予咱了解遮的司法相關的...，
　也就是講咱欠「司法」佮「人權」相關的教育，佇咱國民義務教育，抑是高等教育，
　會使講足欠的，除非講你欲去讀法律系，可能較有機會去了解。
　這馬觀念愛改，「法院」是佮咱的權益有關係，所以咱逐家攏愛來了解。

◎語詞gí-sû
．程序thîng/tîng-sū
．嚴肅giâm-siok
．規矩kui-kí/kú/kír：有腔口差。
．搬戲puann-hì：這个搬戲的「搬」，就是「搬物件」的「搬」。
．演習ián-si̍p：演練學習的意思。這對日語詞來的。
．認捌jīn-bat：就是欲予民眾，抑是里長會當較認捌司法的一寡程序。
．資訊tsu-sìn
．法治huat-tī
．諮詢tsu-sûn

二、公共事務做伙舞：陪審團制度
咱臺灣的司法制度確實有足濟問題，需要來做改革。所以民進黨政府這馬上台，講有魄力，想欲來改革司法，逐家都非常期待。
咱來了解一下，以咱臺灣這馬司法制度來看，法官是完全有這个權力，
一个人的生死、按怎，就是看法官是按怎來判。法官的權力傷過大，壓力嘛會足大的，定定判斷可能會毋著，抑是按怎。
逐家就關心是毋是咱人民會當來參與這个審判？
這馬有兩種制度當咧捙拚，一个是陪審制，一个是參審制
◎司法改革
＊人民期待百百項
＊是按怎需要人民參與審判
＊陪審制、參審制

◎陪審制
＊隨機抽人做陪審員
　隨機佮咱仝款的人民內面，抽固定人數的人，來做陪審員。
　佇咧開庭的時陣，陪審員就坐佇咧邊仔。
＊法官、陪審員的工課佮關係
　陪審員的作用，就是干焦會當聽，袂當問。
　聽啥物？聽兩造，包括律師佮檢查官，亻因提出來的證據，聽兩爿的人來講，來判斷
　到底這个被告是有罪，抑是無罪。
　法官的工課是啥？佇陪審制的制度內面，法官就敢若主持人，維持規个程序會當行了較順，
　若是有啥物人抗議，就愛按怎處理，這个法官袂使對這个案件有任何的指示。
＊評議佮裁決
　陪審員聽完矣，逐家愛去開會，來討論講這款的證據之下，這个被告是有罪？抑是無罪？
　逐家來做一个評審，這號做「評議」，紲落來著出來共逐家講，感覺是有罪，抑是無罪。
　若有罪，這个時陣，法官紲落來做伊的工課，就是量刑。
　若是無罪，法官嘛無法度講啥物。

◎參審制
＊合議庭
　參審制，其實來講是一个合議庭，佮這馬的合議庭差不多仝款，只是除了法官以外，
　閣有一寡「國民法官」參審員，坐佇邊仔。　
＊法官、參審員的工課佮關係
　參審員佮法官仝款，嘛會使問案，嘛會使判刑，啥物攏會使。

◎對陪審制的誤解
＊人民需要法律專業無？(參審vs.陪審)
　參審制的參審員，需要的法律常識愛較濟，陪審員其實免遐濟，
　䆀處佇佗？參審制既然需要的法律常識愛較濟，咱普通人無啊，這个時陣，有可能你就受著
　坐佇你邊仔的法官的影響，到最後變做嘛是這个法官咧判斷。
　人講參審制的參審員，敢若一个花矸仝款。
　陪審制毋是閣較危險？因為人民的素養無遐爾仔懸，規个交予in按呢毋是閣較危險？
　這就是逐家對陪審制的一个誤解。
　因為陪審制內面的陪審員，攏免法律的專業，完全攏免，因為in是聽兩爿的人提出來的證據，
　用普通人的『邏輯』，來判斷就會使，陪審員無需要法律的專業。
＊紲落來按怎決定？
　逐家都咧關心矣，紲落來到底欲決定佗一个制度？
　進前的國是會議，無任何的決定權，紲落來嘛是愛轉來立法院，紲落來司法院會捒一个案，
　有黨團嘛會捒案，有立法委員嘛會捒案，司法院這馬是欲捒「參審制」，
　立法委員欲捒「陪審制」，到時，就是看兩爿政黨的輸贏來決定，
　到底臺灣欲用參審制抑是陪審制？

◎掠包
．權力khuân/kuân-li̍k vs. 權利khuân/kuân-lī
　有兩个詞，意思無仝款，愛分予清楚。
　法官若講「權力」傷大，有可能是毋是人民的「權利」會受損害？
　權力是power，權利是right，這兩个愛分清楚。
　欲按怎保障人民的權利（right）。
．判斷phuànn-tuàn：後壁無字就是「斷tuàn」，若是猶有字愛變調。
．陪審制puê-sím-tsè：注意「審」有合喙音”m”。
．參審制tsham-sím-tsè：注意「參」佮「審」有合喙音”m”。
．決心kuat-sim：注意「心」有合喙音”m”。
．審判sím-phuànn：注意「審」有合喙音”m”。
．評審phîng-sím：「評」是送氣音，「審」是合脣音。
．維持 î/uî-tshî：「維」的發音有兩種。
．任何jīm/līm-hô：注意「任」有合喙音”m”。
．國民法官kok-bîn-huat-kuann：是一个詞，「民」愛變調。

◎語詞
．陪審制puê-sím-tsè：「審sím」喙愛合起來，制度的名。
．弊端pè-tuan：這个詞咱一般口語較無用，照漢字讀。
．插一跤tshap--tsi̍t-kha：”插”是重點，較強調。
．插一跤tshap-tsi̍t-kha：”一跤”是重點。
．內容luē-iông
．公堂kong-tn̂g
．兩造lióng-tsō：兩爿、兩方的人，這嘛算講法律詞，法律用語。
．原告guân-kò
．被告pī-kò
．憑準pîn-tsún：用啥物來做判斷。

三、俗諺
陪審團對英美法抑是歐美國家，欲借的學習制度，毋是靠孤人的才情。
咱共借用一下，咱這个陪審制就是希望透過人民「國民法官」，抑是人民參與陪審的制度，會當閣較有智慧，閣較正確的判斷。
◎眾人代一，毋是「法官」才情。
　Tsìng-lâng tāi-it, m̄-sī huat-kuann tsâi-tsîng.
　原句：眾人代一，毋是我夫才情
　　　　毋是靠孤人的才情，是靠眾人的智慧，去判斷，有憑準。
．眾人：文音tsiòng-jîn
　　　　白音tsìng-lâng