# 《講台語當著時》第二季文字稿
# 2017.08.31 ~ 2017.11.23
### 每一集標頭共點落去，有Youtube影片連結。
## [2017.08.31《講台語當著時》：重疊的四字詞 組合規則佮聲音變化](https://youtu.be/ct6bfuqXGKA)
一、重疊的四字詞
．疊詞：共兩个字疊做伙，變做一个新的詞。
．台語重疊的四字詞，分做無仝款的結構：
.
◎ABAC → BC
．應喙應舌ìn-tshuì-ìn-tsi̍h：咱共囡仔講話，大人講一句，囡仔應一句，
大人講兩句，囡仔應一捾。
這款咱就會講這个囡仔有夠𠢕“應喙應舌”的。
﹡共”喙舌”這个詞拆開，共”應”這个字重疊兩改，
共”喙舌”兩个字囥佇咧兩个”應”的後面。
．經跤經手kenn-kha-kenn-tshiú：
做代誌的時陣無順，有真濟規定，規定一大堆，害我做代誌”經跤經手”。
．想空想縫siūnn-khang-siūnn-phāng：
這个人正經代誌毋做，規工踮遐咧”想空想縫”，就是想講有啥物偷食步的方法。
較負面的詞。
﹡”空縫”共拆開，囥佇”想”的後面。
．拖身拖命thua-sin-thua-miā：
一个人可能伊的身體無講蓋偌好，猶毋過，伊嘛是愛真辛苦，真拍拚過生活。
比論講：舊年伊就著癌，毋過為著囡仔，伊嘛是按呢”拖身拖命”，就愛出來趁食。
．頓椅頓桌tǹg-í-tǹg-toh：講一个人足受氣的。
伊無代無誌，毋知咧氣啥，氣甲頓椅頓桌，足受氣的。
．一點一tuh || tsi̍t-tiám-tsi̍t-tuh：一項仔一項。
老師共咱教的時陣，一點一tuh講甲清清楚楚，就是每一項攏講甲足清楚的。
．直腸直肚ti̍t-tn̂g-ti̍t-tōo：
我這个人直腸直肚，我袂佮你轉彎踅角，有話就照講。
．大主大意tuā-tsú-tuā-ì：啥物代誌都家己決定，無欲去共別人問一下。
比論講：伊這个人逐改做代誌，無小共人請教，大主大意，連頭家都毋知影。
﹡”大”重疊，共”主意”一个詞拆開。
.
◎ABAC → BC毋是一个詞，袂當重組
．流血流滴lâu-hueh-lâu-tih
伊無細膩跋倒，跋甲大空細裂(tuā khang sè li̍h)，流血流滴，就是流足濟血的。
﹡這个”血”是一个詞，”滴”是另外一个詞。“流”是仝款重疊。
．佯悾佯戇tènn-khong-tènn-gōng：
”佯”是”假影”的意思，伊不是真正咧”戇”，是”假影”咧”戇”。
你莫看伊按呢，敢若啥物代誌攏毋知，其實伊是咧”佯悾佯戇”啦，
伊心肝內足清楚的。
．照呼照行tsiàu-hoo-tsiàu-kiânn：
咱做代誌進前，欲進行一件代誌之前，咱先”品phín”，“品”予明，
品予明了後，咱就愛照呼照行，袂當反悔。
就是愛照咱進前講好的，來進行才會使。
﹡”呼”佮”行”兩字毋是一个詞。
．知食知做tsai-tsia̍h-tsai-tsò：我知影通食，嘛知影通做。
我有趁，我嘛有盡我的本份，我就”知食知做”啊，共我的本份攏做甲
足好啊，我嘛無欠頭家啥。
＊這幾个詞真特殊，重點干焦佇頭前的兩字，毋過因為伊欲加強伊的程度，
就共頭一字重疊，後面加一个無意思的”觸”。
．費氣費觸huì-khì-huì-tak：
-乎~~你叫我做這件代誌”費氣費觸”，我無愛做，有夠麻煩的啦！
﹡”費氣費觸”聽起來就比”費氣”，閣較”費氣”一屑仔，加強伊的程度。
．假仙假觸ké-sian-ké-tak：
-你莫佇遐假仙假觸矣啦！你佮意你就提去。
﹡重點嘛是”假仙”，共”假”重疊一改，後面加一个無意思的”觸”。
．落氣落觸làu-khuì-làu-tak：
-今仔日我去上節目，講了無好，實在是”落氣落觸”。
．拗蠻拗觸áu-bân-áu-tak：
“拗蠻”就是講一个人無講道理。
-伊這个人足無講道理的，”拗蠻拗觸”，我佮伊講袂伸捙，
我無愛佮伊講矣。
.
◎A頭A面：A干焦只是一个代號爾爾。
．戇頭戇面gōng-thâu-gōng-bīn：
-你看伊戇戇仔，戇頭戇面，人咧受氣矣，你閣毋知影，
真正是”戇頭戇面”。
．儑頭儑面gām-thâu-gām-bīn：毋知影危險，袂曉看人目色，
咱攏會講這个人”儑頭儑面”。
．歁頭歁面khám-thâu-khám-bīn：毋知影邊仔的人無歡喜矣，
抑是講”白目”，咱就會講伊”歁頭歁面”。
．崁頭崁面khàm-thâu-khàm-bīn：
-頭毛共面崁著咧，咱就會講伊”崁頭崁面”。
-有當時仔，伊嘛會佮頭前彼三个詞意思仝款。
．笑頭笑面tshiò-thâu-tshiò-bīn
-一个人”笑頭笑面”，我看著伊，就心情足好的。
.
◎無A無B → 無AB
﹡這幾个詞有一个特色，就是伊會當變做”無按怎”，變做三个字。
所以咱佇咧使用的時陣，會當四字、三字互相來利用。
.
．無代無誌bô-tāi-bô-tsì → 無代誌：
-你無代無誌叫我欲創啥？
．無意無思bô-ì-bô-sù → 無意思：
-你講這種話無意無思。
．無依無倚bô-i-bô-uá → 無依倚：
-兩个爸仔囝無依無倚，誠可憐。
．無影無跡bô-iánn-bô-tsiah → 無影跡：
-你毋好烏白講這種無影無跡的話喔！
．無要無緊bô-iàu-bô-kín → 無要緊：
-這明明就是你的工課，你家己敢若無要無緊。
．無鹹無纖bô-kiâm-bô-siam → 無鹹纖：是講口味較汫。
-伊煮食攏煮甲足汫的，我食起來攏感覺無鹹無纖。
.
．無站無節bô-tsām-bô-tsat → 無站節：
-你耍電動的時間愛控制一下喔，毋好按呢無站無節。
．無因無端bô-in-bô-tuan → 無因端：無理由。
-你按呢無因無端，是咧受氣啥？
.
◎無A無B → 袂當重新組合做”無AB”：
．無暝無日bô-mê-bô-ji̍t：一个人做工課，攏毋知影通歇睏。
-你按呢逐工做頭路，做工課，做甲”無暝無日”，實在是足辛苦。
﹡這个詞就袂當講做”無暝日”，一定愛講”無暝無日”。
．無大無細bô-tuā-bô-sè：
-囡仔人對序大人無尊重，講話應喙應舌，咱就會講：
你毋好按呢”無大無細”喔！
﹡這个詞仝款袂當變做”無大細”，意思就走精去矣，無仝款矣，
一定愛講”無大無細”。
．無某無猴bô-bóo-bô-kâu：
後面其實閣有一句話，叫做”穿衫破肩胛頭”。
-這是講羅漢跤仔，無娶某，伊的衫若是破去的時陣，就無人共伊補。
-”猴”無啥物意思，為著欲鬥句，慣勢按呢講。
﹡這个詞仝款袂當變做”無某猴”，無這種講法，一定愛講”無某無猴”。
．無講無呾bô-kóng-bô-tànn：你攏無出聲，雄雄就出現，
抑是講你雄雄走入來。
-比論講：伊按呢”無講無呾”，走入來了後，物件抨咧就做伊走，
我嘛毋知發生啥物代誌。
-“呾”嘛是”講”的意思，”無講無呾”就是無出聲。
﹡這个詞仝款袂當講”無講呾”。
.
．無攬無拈bô-lám-bô-ne：講一个人無精神、無元氣。
-像講最近咱天氣有夠熱，逐家攏感覺”無攬無拈”，無啥想欲做代誌。
﹡”攬”佮”拈”仝款，伊毋是一个詞，袂當共伊敆做伙，
一定愛講”無攬無拈”。
.
◎ABCB：第二字佮第四字仝款字，數量較少。
．跤來手來kha-lâi-tshiú-lâi：
-有的人講話的時陣，毋好好仔講，遮欲共你磕一下，遮欲共你摸一下，
這就是”跤來手來”。
-有當時仔是欲起冤家矣，用講的猶閣無夠，拳頭拇欲攑起來矣，
這嘛會當叫做”跤來手來”。
-你講話就講話，毋好按呢”跤來手來”，無禮貌。
﹡”來”是第二字佮第四字，”跤手”是一个詞。
．跤健手健kha kiānn tshiú kiānn：一个人身體猶閣誠好。
-你莫看伊真濟歲矣，伊猶閣”跤健手健”。
.
．青磅白磅tshenn-pōng-pe̍h-pōng：雄雄、突然間。
-伊按呢”青磅白磅”就講伊欲辭頭路，後禮拜就不愛來矣，
逐家攏毋知影發生啥物代誌。
﹡青”磅”白”磅”第二字佮第四字是重疊的。
.
．喙笑目笑tshuì-tshiò-ba̍k-tshiò：佮”笑頭笑面”意思仝款。
-我看你按呢逐改看著伊就喙笑目笑……。
.
◎咱今仔日講真濟重疊的四字詞，希望逐家會當利用一下，
予咱講話的時陣，閣較媠氣，聲韻閣較好聽。
.
二、逐家講台語：來唱台語歌
◎古早的流行歌
．流行liû-hîng
．時行sî-kiânn
．桃花泣血記Thô-hua khip-hiat-kì：第一條台語的流行歌，
伊是一塊電影的宣傳曲。
．曲盤khik-puânn：這馬有真濟人講”唱片”。
．留聲機lâu-siann-ki：放曲盤的彼台機器有一个真大的喇叭，
頂頭有針，囥咧曲盤頂頭，彼台機器叫做”留聲機”。
.
＊台語四條足經典的台語歌
．四季紅Sù-kuì-hông
．月夜愁Gua̍t-iā-tshiû
．望春風Bāng-tshun-hong
．雨夜花Ú-iā-hue
﹡這四條台語歌分別代表真經典的四種台語歌的特色，
後來，有人共怹合做”四月望雨”，就是取這四條歌的頭一字，
共伊敆做”四月望雨”。
﹡這四條歌是仝一个作曲者，佮兩个作詞者來寫的。
．作曲者是鄧雨賢Tīng Ú-hiân：伊是一个客家人，毋過伊做足濟
足好聽的台語歌。
．作詞者第一个是周添旺Tsiu Thiam-ōng
．作詞者第二个是李臨秋Lí Lîm-tshiu
﹡若是對古早的台語歌有興趣的朋友，這幾个人名，你一定愛會曉唸。
.
◎流行歌佇咧唱啥物？
＊咱是按怎欲唱歌咧？為著欲消敨滿腹的心酸。
．消敨siau-tháu：『排遣』。
共你心肝內底的一寡感覺，抑是鬱卒，共伊消敨出來。
“敨tháu”：比論講：咱共物件”敨開”。
胸坎實實，咱愛”敨”中氣。
．鹹甜苦澀kiâm-tinn-khóo-siap：生活中有真濟”鹹甜苦澀”，
咱共遮的”鹹甜苦澀”攏消敨出來。
．心酸sim-sng：有的歌予人感覺唱著、聽著心會酸。
★”心”唸本調，”酸”嘛是唸本調。
.
◎現代的新台語歌
．搖滾樂iô-kún-ga̍k：較現代的這種音樂風格。
．閃靈Siám-lîng
．重金屬tāng-kim-sio̍k
．死腔sí-khiunn
．衝tshìng：『很紅』。
．農村武裝青年Lông-tshun/tshuan Bú-tsong Tshing-liân
﹡望水Bāng-tsuí：怹的一條歌，咧講伊對土地、對溪仔的感情，
真予人感動。
．社會議題siā-huē gī-tê
．滅火器Bia̍t-hué-khì
．暗安台灣Àm-an Tâi-uân
．島嶼天光Tó-sū Thinn-kng
.
◎相招來去KTV唱歌
．相招sio-tsio：『揪團』的『揪』是借音，
其實是對台語的”招sio”來的。
．包廂pau-siunn
．點唱機tiám-tshiùnn-ki：古早唱卡拉OK有點唱機。
．歌單kua-tuann
．算人頭sǹg-lâgn-thâu
．低消kē-siau
.
三、今仔日的作業：
◎唱幾條仔台語歌，共有用著四字疊詞的歌詞揣出來，
家己閣用遮的四字詞另外造句。
## [2017.09.07《講台語當著時》：變調、輕聲蓋趣味](https://youtu.be/ZOgsqEHGAqc)
一、變調、輕聲蓋趣味
◎變調有啥物作用？
．因為有聲調的語言，佇全世界來講，已經是無蓋濟，
有聲調閣有變調的語言閣較少。
◎是按怎會有變調？
．無變敢袂使？
有的語言學家感覺這个問題實在是真值得研究，可能是
變調以後，唸起來會較順，毋過這是講袂得過。
因為有變調的語言變出來以後，高低音嘛無仝款，你欲講
佗一種較順咧？
．變調是咱的語言內底，是真正有存在的一个現象，語言學家
共伊記錄落來了後，發現伊有規則，不是”人”規定出來的，
是咱真正就是按呢講話。
.
◎講話敢真正照變調？
有喔！而且是你愈捷講台語的人，你的變調的情形，
就愈符合咱的規則。
.
◎若無照規則變調會按怎？
．咱大約仔攏聽有，只是這个人(講話)變調若是無正確，
你聽著會感覺講話怪怪。
．如果有的時陣，你的變調若是變毋著去，意思確實會無仝。
.
＊我毋願佮伊拚。
a) Guá m̄-guān kah i piànn. (“願”有變調。)
這个”願”有變調，變做”毋願”按怎，表示後面猶未講了。
毋願按怎的代誌，囥佇後面。表示我無想欲佮伊拚。
.
b) Guá m̄-guān, kah i piànn. (“願”無變調。)
如果”願”唸本調，變做”我毋願，佮伊拚！”
我感覺”我毋願”，”足毋甘願”，所以我欲去佮伊拚。
”我毋願”到遮結束矣，後面是另外一回事。
﹡這个”願”，一个有變調，一个無變調，意思都無仝矣。
一个是欲去佮伊拚，一个無愛佮伊拚。
--------------------
＊歹勢無共你招。
a)Pháinn-sè bô kā lí tsio. (“勢”有變調。)
有共你招，我其實本來無想欲共你招，但是感覺足歹勢。
歹勢無共你招，只好來共你招一下。
b)Pháinn-sè, bô kā lí tsio. (“勢”無變調。)
歹勢，結束矣，後面是另外一件代誌。
歹勢啥咧？歹勢啦，無共你招。
﹡這个”勢”，一个有變調，一个無變調，意思完全無仝款。
--------------------
＊我毋敢予你去。
a)Guá m̄-kánn hōo lí khì. (“敢”有變調。)
“敢”有變調，表示後面猶未講了。
“我毋敢”按怎？”我毋敢”的代誌是啥？
“我毋敢”予你去，所以你莫去，我去抑是別人去。
b)Guá m̄-kánn, hōo lí khì. (“敢”無變調。)
“我毋敢”，你去，你去，所以是你去，我無去。
我毋敢，予你去。
﹡這个”敢”，有變調，無變調，意思無仝。
.
◎變？無變？就是問題！
．欺騙你的朋友Khi-phiàn lí ê pîng-iú.
a)有變調：你共你的朋友欺騙，你共騙。
b)無變調：Khi-phiàn--lí-ê pîng-iú.
你有一个朋友，這个朋友共你騙。
伊就是欺騙你的彼个朋友。
．愛你的愛人Ài lí ê ài-jîn.
a)有變調：伊是你的愛人仔，所以你愛共伊愛。
b)無變調：Ài--lí-ê ài-jîn. 你的愛人足愛你的，
你可能有幾若个愛人，其中一个愛你，
另外一个無愛你，愛--你的彼的愛人。
﹡你若是用華語來唸，仝一个聲音，伊有可能有兩種意思。
若是台語，兩種意思唸起來，聲音是無仝款的。
.
．佮意你的同事Kah-ì lí ê tông-sū.
a)有變調：彼的同事你真佮意伊。
b)無變調：Kah-ì--lí-ê tông-sū. 你有真濟同事，
其中有一个佮意--你的彼的同事。
．拍我的囡仔Phah guá ê gín-á.
a)有變調：共你的囡仔拍。
b)無變調：Phah--guá-ê gín-á. 遐有真濟囡仔，
其中彼的是拍--我的囡仔。
.
．咬我的狗Kā guá ê káu.
a)有變調：伊共我的狗咬，我有一隻狗，彼隻狗咬我的狗。
b)無變調：Kā--guá-ê káu. 遐有真濟隻狗，
其中一隻是咬--我的彼隻。
.
．遮的衫攏總200箍Tsia-ê sann lóng-tsóng 200 khoo.
a)有變調：遮可能有幾若種衫，遮有一疊，遐有一疊，
遮的攏總200箍，這个嘛200，彼的嘛200。
b)無變調：lóng-tsóng，是你買遮的衫，加起來全部200箍。
.
◎變調按怎學
．自然學：上蓋好的就是咱自然學。語言其實就是你自然聽、
自然講，佇咧講的過程當中，你就會學著正確的
講法，這當然是上蓋好的。
毋過因為咱這馬的環境，可能你無法度隨時攏會當
自然來學語言，這个時陣，你若是拄著新詞
的時陣，像咱拄才講的彼的例，你著愛特別練。
．變調的規則：學新詞的時陣特別練
1、5 → 7 → 3 → 2 → 1 p、t、k：4 → 8
8h↗ 4h↑ p、t、k：4 ← 8
共遮的規則記起來，複習一下，拄著一个新的詞，抑是
新的話句，咱就特別共伊記，記講這个音應該愛按怎唸。
．利用標記：
有的所在愛唸本調，有的所在愛唸變調，若聽過就袂記得矣，
欲按怎？
就是利用標記”#”，表示符號頭前彼字愛唸本調，
賰的愛唸變調，輕聲是另外。
.
就”變調”佮”本調”來講，有符號的彼字愛唸伊的本調。
-遮的衫#攏總#200箍#
-遮的衫#攏總200箍#
.
◎台語華語哪會仝音？
．遮的詞台語按怎唸？
霸凌、印尼、變遷、菜包、漢醫、變通、
太空、泰安、進攻、泰山跳愛河
﹡遮的華語的唸法竟然佮台語的唸法仝音，基本上是差不多
完全仝款的。
﹡台語的聲調，其中有幾个聲調，是華語佮台語仝款攏有的。
.
．台語聲調： 1、 2 ← 3、 4 、 5、 6、 7、 8
例 字：衫、短、褲、闊、人、矮、鼻、直
．華語聲調： 1、 4 、 3 、 2
例 字：媽、罵、 馬、 麻
﹡像講第1調，”衫”佮”媽”仝聲調，”人”佮”麻”嘛是仝聲調。
a)只要這兩个聲調囥佇咧上尾字，按呢就有機會。
b)只要伊頭前彼字是第三調，變調以後，變做第二調，
按呢伊就會佮華語的第四調仝音。
只要有這種條件，台語唸起來，會佮華語仝音。
這就是變調趣味的所在。
.
◎輕聲的鋩角(mê-kak)
＊動詞 + (出、入、起、落、過)來、去
有徙位的動詞，像講行、飛、搬、走，遮个動詞，
後面你攏會當加遮的詞，遮的字，加lueh(落下)了後，
你就愛唸輕聲。
．行--出來、行--出去；
入--來、入--去；
起--來、起--去；
落--來、落--去；
過--來、過--去。
.
★行--起去：行”起去khí-khì”歹唸，就簡化變做”起去khí-lì”。
﹡若是佇咧後面，有閣加物件的時陣，
行--出去 → 行出去遐。”行、出、去”攏有變調。
＊動詞 + 一下
．看--一下，”一下”是輕聲，看是本調。
看一下仔伊咧創啥，頭前這幾字都變調去矣。
＊動詞 + 著：有三種無仝款的情形，逐家愛分予清楚。
a)聽--著：”聽”本調，”著”輕聲。
-你有聽著無？
-有，我有聽--著。
b)聽著聲：”聽”變調，”著”變調，”聲”本調。
-你聽著啥物？
-我聽著聲。
c)聽著真艱苦『聽了覺得很難過』
-這條歌我聽著真艱苦。”聽”變調，”著”本調。
.
二、逐家講台語：相招來去𨑨迌
．相招sio-tsio：『揪團』的『揪』是借音，
其實是對台語的”招sio”來的。
．𨑨迌tshit-thô：出國去，愛講”𨑨迌”。『出國”玩”』
．耍sńg：我佮你耍，『我跟你”玩”。』。
咱來耍掩咯雞(am-ko̍k-ke)，『我們來”玩”捉迷藏。』
．奕ī：奕棋子『“玩”棋』、奕牌仔『“玩”紙牌』
﹡三種佇華語內底攏是”玩”，咱台語無啥仝款，愛分予清楚。
.
．拋拋走pha-pha-tsáu：
-遮嘛去，遐嘛去，四界攏欲去，彼就講伊”四界拋拋走”。
．溜溜去liu-liu-khì：
-有當時仔，一下放假，伊就溜溜去，毋知影走到佗去，
無看見人影。咱嘛會當講伊”溜溜去”。
．lau-lau咧 || lau-lau--leh：
有時陣，咱就毋是特別欲去佗位𨑨迌，只是講我四界
行行咧，看看咧，較輕鬆彼款的。
.
◎歇睏一工四界行
．步道pōo-tō：都市的近郊，攏有一寡步道，行起來較輕可，
袂遐辛苦。
．“足百”山peh-suann：peh山、peh樓梯，用“足百peh”。
佇塗跤是用”爬pê”，若親像蛇、蟲，踮塗跤咧”趖sô”。
﹡華語『爬山』、『爬樓梯』、『地上爬』，攏是『爬』。
咱台語佮華語無仝款。
．郊山kau-suann：佇咧都市附近遮的較矮的山。
．海墘仔hái-kînn-á
．海沙埔hái-sua-poo：『海灘』
．博物館phok-bu̍t-kuán
．踅街se̍h-ke
.
◎兩工一暝按怎𨑨迌？
．連紲liân-suà
．連續liân-sio̍k
．幾若工kuí-nā kang：『好幾天』
．過暝kuè-mê：『過夜』，腔口差有人講kè-mî。
．旅社lí-siā：有腔口差，咱嘛會當講lú-siā。
．飯店 pn̄g-tiàm
．民宿bîn-siok / bîn-sok ←”宿sok”舍的”sok”
．舊厝kū-tshù：古早厝，『老房子』。
.
◎連紲幾若工的耍法
．俗價航空sio̍k-kè hâng-khong：『廉價航空』
．那…那… || ná…ná…：『一邊怎樣，一邊怎樣。』
-我那看電視，那寫筆記。
-我那食飯，那聽歌。
-那行那按算。
﹡袂當講”一爿...一爿...”，彼是華語的講法。
．按算àn-sǹg：『打算』，是較有台語氣的講法。
．便團piān-thuân：便便的，旅行社已經設計好勢的彼款團。
-便菜飯：就是已經煮好勢矣，毋是另外準備的便菜飯。
-便媒人：怹兩个本來就已經欲結婚矣，只是因為儀式的關係，
欲另外揣一个媒人，這个媒人就是 ”便媒人”。
.
．綴團tuè-thuân：『跟團』
家己無想欲準備，無想欲規畫遐濟，我就會當綴團，
按呢就較輕鬆，出去𨑨迌就好矣。
◎那行那規畫，功課做真濟
．規畫行程kui-uē hîng-tîng：
若是無想欲綴團的人，就愛家己規畫行程，誠忝。
你愛查足濟資料，交通啦、蹛啦、食的啦等等，
毋過嘛誠趣味。這款旅行的方式，叫做”自助旅行”。
.
．自助旅行tsū-tsōo lí/lú-hîng：
我無綴團，我家己準備，家己規畫，我欲去佗位，
攏會當家己決定。
．景點kíng-tiám：
佇咧規畫行程的時陣，咱就愛揣彼的所在有啥物景點。
．看光景khuànn kong-kíng『看風景』
-我四界去看光景。
．匯率huē-lu̍t：出國𨑨迌上重要的是『匯率』，
因為咱咧換錢的時陣，希望會當換了價數較好。
.
三、今仔日的作業：
◎共你去𨑨迌的一改經驗講予人聽，講了以後想看覓，
變調佮輕聲的使用敢有正確。
## [2017.09.14《講台語當著時》：台灣話文論戰](https://youtu.be/l6YUe0mByLQ)
今仔日欲來講一个歷史事件，這个歷史事件佮語言有關係。
一、台灣話文論戰
◎對語言的觀點來看，咱愛先了解
＊古早台灣人，講啥物話，寫啥物字？
．語言：南島語、台語、客語
日本人、漢人猶未來的時陣，台灣就是南島民族，用南島語，
彼當時傳教士嘛猶未來，所以就無文字。
後來傳教士、漢人來矣了後，台灣的語言就有南島語、台語、客語。
．書寫文字：漢文、白話字
講台語、客語的人共漢文(文言文的書寫)紮入來台灣，傳教士
共白話字紮入來台灣，所以彼當時仔的台灣佇咧書寫的文字，
就有漢文(文言文)，佮真要緊的白話字。
.
＊日本時代
．語言：南島語、台語、客語 + 日語
後來到日本時代以後，語言當然本來的南島語、台語、客語
攏猶佇咧，彼當時仔上強勢的就是日語，成做一个”國語”，
嘛已經來到台灣矣。
.
．書寫文字：漢文、白話字 + 日文、中國白話文
原本的漢文就是文言文，佮白話字以外，日語來矣，所以日文嘛來矣。
一个較特殊的是，中國的白話文其實這个時陣嘛已經來到台灣。
因為台灣的智識分子佮中國的智識分子，怹有互相來去，所以
彼當時仔的智識分子，怹會曉寫中國的白話文。這是彼當時仔的背景。
這馬台灣就愛拄著一个真要緊的代誌，就是台灣的現代化。
.
◎台灣現代化
日本共真濟文明的物件，介紹予台灣人，紮入來台灣了後，
台灣的生活就有真大的改變。
．面對新文明新時代，咱就需要新的書寫方式。
需要新的講遮的新觀念的話語。
.
．1919中國五四運動「我手寫我口」的主張
佇咧1919年的時陣，中國發生一个”五四運動”，彼陣仔的文人，
怹有一个口號叫做”我手寫我口”，意思就是講怹欲寫的文字，
怹希望是和怹的語言較接近，怹無想欲閣寫過去彼款文言文，
因為文言文其實是一个干焦活佇咧紙面，冊本頂頭的一種語言，
伊毋是咱實際上生活中佇咧講的語言。
這个主張對台灣的智識份子，有真大真大的影響。
.
．1924起，「新舊文學論戰」
佇咧1924年的時陣，台灣就發生一个”新舊文學”的論戰，
﹡就是新時代的新文人，怹咧批評古漢文，會阻礙社會的進步，
因為文言文書寫足困難的，而且伊無法度講一寡新的觀念，
一般人嘛看無，你愛學足久足久，才有才調看有彼款漢文。
.
﹡另外一爿，舊文人怹就認為漢文，遮的文言文，甚至台語的四句聯仔，
伊的形式抑是伊的美感，攏是足珍貴的內容，所以咱袂當共舊文學
共伊放棄。
﹡這兩爿就佇咧報紙頂頭按呢戰來戰去，戰到尾仔，結果，因為新文學
是一个趨勢，所以新文學就較佔贏，書寫的時陣阮欲來寫咱講的話，
按呢就會拄著一个真大的問題，就是你愛按怎寫？
.
◎1930年代開始，發生「台灣話文論戰」
＊背景
．新文學算是趨勢，言文一致成做目標
對彼當時仔的智識份子來講，新文學已經是趨勢，「言文一致」是逐家的目標。
“言”是咱講的話，”文”是咱寫的字，咱講的話和咱寫的字愛仝款。
這佮”五四運動”彼當時仔的精神是仝款的，相siāng(sio-siāng)的。
.
．面對殖民政府的日語，台灣人猶咧對抗
彼當時仔，愈來愈濟有讀冊的人，伊就已經會曉講日語矣，是按怎無愛用日語
來講，日語來寫就好啊咧？因為對彼當時仔的台灣人來講，日本政府猶原是一个
殖民的政府，所以對日語，台灣人是猶閣咧反抗的，怹無希望講咱完全接受
殖民者予咱的物件。所以怹就想欲用台灣話來講台灣的代誌。
．按怎會當做到「言文一致」？
.
＊起鼓：
．1930年，黃石輝佇《伍人報》發表一篇文章，叫做〈怎樣無提倡鄉土文學〉。
這篇文章有兩項大重點，伊認為咱寫文章的時陣：
a)內容：愛寫台灣的代誌
b)文字：用台語的文字 ← 後來主要的戰點
.
﹡後來，逐家咧戰的是：”用台語的文字”這點。有的人贊成，有的人反對，
”贊成”佮”反對”兩爿的人就戰起來矣。怹兩爿的觀點是啥物咧？
＊兩爿的論點
．反對用台灣話書寫：
a)台灣話無夠資格寫新文學、講新事物彼當時的人真正按呢認為，
感覺台灣話就是粗俗， 無彼的資格會當寫新的文學，講新的事物，
何況是欲共伊寫落來，這是絕對做袂到的。
b)台灣閣有客話、南島語，你若是用台語來寫的時陣，這兩語欲按怎？
所以怹反對用台語來書寫。
c)用中國白話文才較濟人看有、會流通遮的人怹攏感覺講你寫文章就愛用
中國的白話文來寫，按呢才較濟人看有，中國遐的人嘛看有，較濟人看有，
較會流通。
﹡其實第2點佮第3點有小可撞突(tōng-tu̍t)，逐家有發現無？
.
．支持用台灣話書寫：
a)言文一致
b)拍破智識的階級，予一般人嘛會當吸收智識
古早寫的遐傷困難的物件，咱毋好繼續寫，咱愛予一般人嘛會當吸收智識，
所以咱愛寫白話文。
c)台灣主體性(佮中國白話文平徛起)
若是寫台灣的白話文，你會當建立台灣的主體性，會當佮中國的白話文平徛起。
彼當時仔的人就已經有這款意識矣。
.
支持者內底嘛有分做幾若種立場佇咧討論：
◎建立台灣話文書寫系統
．1931年的時陣，郭秋生佇咧《台灣新聞》這个報紙頂頭，發表一篇
〈建設台灣白話文一提案〉的文章。
伊是針對咱欲用台灣話來寫文章的時陣，咱欲按怎寫的這个問題，
提出伊的看法，內底的重點：
a)應該用漢字為主
b)佇咧日本文學、中國白話文學以外，咱應該共台灣話文字化，
來寫台語的文學。
c)這款台語文學，伊會當當做社會大眾的啟蒙、會當予台灣人的台灣民族意識
產生出來。
d)一定會拄著彼款毋知按怎寫的字，無字通寫的字，咱會當造新字。
e)甚至咱會當改造台灣話文，來做統一讀音的工課。
﹡這个理想，看起來敢若足偉大的，無成功。是按怎咧？
.
◎後續的困境
．文字一致是大工程，無共識就無法度流通
這馬，現時，咱是政府教育部咧做，而且已經做成十冬矣，而且閣是佇咧
現代社會，資訊較好流通的時代，過遮爾久矣，逐家猶是有人無同意
咱這馬的台語書寫系統，何況是彼當時仔遮爾早以前？閣毋是官方出來做，
資訊流通的速度，閣無像這馬遐爾仔緊。
彼當時仔，譬論講，你講這愛按呢寫，我講這字應該愛按呢寫，你寫一套，
我寫一套，逐家無共識，就無法度流通，無法度流通，逐家就無想欲寫矣。
.
．提倡者家己嘛無啥咧寫
拄才講起鼓的黃石輝，伊有咧寫台文無？有啦，伊干焦寫一篇爾。
提倡者家己都無咧寫矣，其他的人是欲按怎寫咧？
.
．日語的國語運動、二次大戰
日本開始真強力來捒日語，所以彼當時仔有日語的“國語運動”，報紙就禁漢文，
逐家就無機會繼續來去寫。
紲落來是二次大戰，戰爭矣，戰爭時代啥物代誌，這款文化的工程，根本
都無通仔做，所以真濟代誌就停落來。
.
．國民黨統治打壓台灣話，毋但無進展，閣倒退
戰爭結束了後，紲落來是國民黨來統治台灣，打壓台灣話，打壓甲足嚴重，
根本就無可能有任何的進展，甚至會倒退。
這馬咱毋但講書寫的氣氛無炒起來，甚至咱這馬真濟人根本連講都袂曉講矣，
何況是寫咧？
----------------
﹡這个是真有名的歷史事件，咱學語言的人，抑是講學歷史的人，
咱看這个歷史的事件，咱就愛想講這个歷史事件對咱這馬的台語運動，
有啥物款的啟示？
.
◎就語言運動的角度來看
．毋是語言本身有欠缺，是猶無演變的機會
彼當時仔的人感覺台灣話粗俗，無法度講新事物，這个想法毋是語言本身
有欠缺，語言是一个會變的物件，台語是猶無”變”的機會，毋是伊本身無夠好，
是伊無機會去”變”。
.
．無一致的書寫系統，降低書寫意願，對流通不利
你若是無一致的書寫系統，逐家就無啥想欲寫，對流通是不利。所以一致的
書寫系統，是推捒書寫一个真要緊的代誌。
.
．戰爭加上國民黨的打壓，予台語的發展浪費幾若十年
若是幾若十年攏來做這件代誌的時陣，這馬的台語都無仝款矣。
這是歷史的悲劇，無法度。
．各種本土語言攏是愛發展書寫，無應該是阻擋台語書寫的理由。
最後一點足要緊的，真濟人講台灣猶閣有別種語言，無毋著，每一種語言攏應該
愛發展伊家己的書寫系統，而且這馬嘛攏有這種條件，客語也好，南島語也好，
攏有條件來發展伊的書寫，無應該共伊當做來阻擋台語書寫的一个理由。
是逐家攏愛寫，毋是講你寫的佮我無仝，按呢逐家攏莫寫。這个想法是毋著的。
----------
希望今仔日這个事件，會予逐家會當了解，台語原來猶有這个過程佇咧。
二、逐家講台語：飼動物做伴
．貓niau
．貓仔niau-á『小貓』、狗仔káu-á『小狗』、囡仔gín-á
這字”仔”佇咱台語內底，會當表示較細、較親的意思。
．貓母niau-bú/bó 『母貓』，佇咱台語內底，愛共”母”囥佇後面，
因為腔口差的關係，有人講niau-bó。
毋是干焦貓，『公狗』咱愛講”狗公”，『公豬』愛講“豬公ti-kang”。
”豬公ti-kong”，是拜拜彼款的，才會當叫做”ti-kong”。
﹡台語會共”公”的佮”母”的物件，囥佇咧後面。
．分pun：『領養』，
古早人有的人袂生，伊就去共人”pun”一个囡仔來飼。
咱這馬嘛是講共人”pun”一个動物來飼。
．做伴tsò-phuānn，tsuè-phuānn 這是腔口差。
．動物伴tōng-bu̍t-phuānn『寵物』
飼的是貓，就是”貓仔伴”；飼的是狗，就是”狗仔伴”
◎飼貓仔的人，足注重咱的貓仔，伊過了有四序無？
若親像一種共伊奉待的心情，來共伊對待。
所以伊佇咧放屎尿的時陣，就愛共伊揀合伊用的砂。
．礦砂khòng-sua
．紙砂tsuá-sua
．豆腐砂tāu-hū-sua
．柴屑砂tshâ-sut-sua『木屑砂』
．濫lām：『混合』因為各種砂伊的功能，抑是伊的效果攏無啥仝款，
有當時仔會”濫”咧用。
.
◎飼料愛真講究：過去飼料佗一種攏好，毋過咱這馬愈來愈注重咱動物伴的健康。
．飼料tshī-liāu
．粉漿hún-tsiunn：『澱粉』有的貓仔會對粉漿過敏。
對粉漿過敏的貓仔，你就愛共伊揣彼款無加粉漿的飼料，會當防止伊過敏。
．罐頭kuàn-thâu
．主食罐tsú-si̍t-kuàn
．生肉tshenn-bah
．討欲摸thó-beh-bong『討摸』，有的貓仔會司奶sai-nai。
．倚來uá--lâi『靠過來』，倚愛唸本調，來愛唸輕聲。
．奉待hōng-thāi：講咱是貓仔奴才『貓奴』。
．在伊食tsāi i tsia̍h：『任食制』飼料囥佇咧遐，
伊想欲食就予伊去食，伊不管時欲食攏有。
．定時飼tīng-sî tshī：照一頓一頓來共伊飼。
.
◎狗仔
．𤆬狗散步tshuā káu sàn-pōo
．塑膠橐仔sok-ka-lok-á
．gá-suh橐仔∥gá-suh-lok-á，嘛有人講ga-lá-suh橐仔，
gá-suh伊就是對 glass玻璃來的，因為伊透光，親像玻璃仝款。
．牽索khan-soh：『牽繩』
．頷頸箍仔ām-kún-khoo-á：『項圈』
．流浪貓狗liû-lōng niau káu
．人家厝貓jîn-ke-tshù-niau『家貓』。
人家厝就是人蹛的，不是工廠，不是做生理的。
．鉸指甲ka tsíng-kah
．修剪siu-tsián
．純種sûn-tsíng
．動物病院tōng-bu̍t-pēnn-īnn
.
◎分的較贏買的pun--ê khah iânn bé--ê：『以領養代替購買』
．缺一缺khih tsi̍t-khih
.
三、今仔日的作業：
◎共現代對動物保護的觀念用台語解說予人聽，
想一句口號表達你的想法，共寫落來予人看。
## [2017.09.21《講台語當著時》：台語的腔口差](https://youtu.be/Nvo3Z4_b7mE)
一、台語的腔口差
◎保留漳泉痕跡的腔口差
＊韻母部份
．ue / e / er ：火、粿、尾、歲、皮、炊、揣、襪
．e / ue / ere：雞、濟、齊、街、細、鞋、矮、底
．e / er ：災、雪、絕、螺、踅、短、塊、袋
． i / u / ir ：語、煮、去、豬、箸、薯、鼠、據
．in / un / irn ：斤、巾、筋、近、芹、勤、恨、根
．enn / inn ：生、青、平、姓、病、羹、爭、諍
.
＊聲母部份
．j- / l- ：熱、乳、如、愈、挐、韌、潤、裕
﹡仝款j- / l- 的對應，佇後面加上 i 的時陣，閣有第三種的
聲母出現。
．j- / l- / g- ：字、日、二、入、膩、抓、認、任
.
＊變調部份
一般咱第5調變做第7調，
第二種腔口，就是較偏泉州腔的這款人，
伊的第5調會變做第3調，就是會低落來。
．變調 5 → 7/ 3：樓梯、無人、文章、寒天、緣份
.
＊用詞來看
．皮鞋 phuê-ê / phê-uê / phêr-erê
．暝日mê-ji̍t / mê-gi̍t / mî-li̍t
．根據kin-kì / kun-kù / kirn-kir
基本上，無仝腔口的人，咱互相攏聽有。
.
◎限定腔口才捌的笑詼
．姑不而將 → jî / lî / lī →姑不二三將
．原來如此 → tshú → 鼠tshí / tshú →原來如貓
．客兄？契兄！khè / khuè / kherè 佮kheh
.
◎漳泉到台灣
佇台灣無仝所在，留下真濟無仝款腔口的特色，
有真濟有台灣特色的腔口差：
．宜蘭(漳) -ng → -uinn：酸酸軟軟食飯配滷卵
．臺南(漳) -iunn → -ionn：嚨喉癢搶食薑歌來唱
．關廟(漳) tsh- → s- ：去菜市仔買紅菜
．永靖(漳) -ing → -en：永靖的枝仔冰冷冷𠕇𠕇
．鹿港(泉) -ir, -er, 2 → 5：去街尾買馬尾
．湖西(泉) oo → io：天烏烏欲落雨
.
◎台灣腔口差
＊ o & oo → 好蚵仔 &虎芋仔
．以高雄為中心 ə & o
．以台北為中心 o & ɔ
．保護、寶島、補助
＊ -p、-t、-k 第8調：
氣力khuì-la̍t → 中短、高短、中升
＊ -h 第8調：好食tsia̍h → 中平調、降調、升調
.
◎優勢腔
．競爭產生優勢腔
．有時有例外：(泉)tsú-pn̄g / (漳)tsí-puīnn、圖書館
．加上台灣的漳泉濫
．以上背景，產生台灣本地腔、台語的系統
.
.二、逐家講台語：三頓食外口
◎無閒家己煮的現代人
．煮食tsú-tsia̍h
．食外口tsia̍h-guā-kháu『外食』
這个結構較特殊，毋是共「外口」這个物件食去，
是佇咧外口食。
像講咱講「食家己」；這个人「食命」；囡仔人「食褒」，
攏毋是真正共彼个物件食掉。
﹡食家己：靠家己趁食。
.
．三頓sann-tǹg：『三餐』
．食早起tsia̍h tsái-khí：『吃早餐』
．食中晝tsia̍h tiong-tàu：『吃午餐』
．食暗tsia̍h-àm：『吃晚餐』
．了時間liáu-sî-kan：『花時間』。
．了錢liáu-tsînn：『花錢』。
．了精神liáu-tsing-sîn：『花精神』。
.
『很快的「快」』台語有兩種講法：
一種是「緊」，一種是「快」，毋過意思無啥仝款。
．緊kín：一个人動作真「緊」，速度真「緊」。
．快khuài：這「快快」仔，隨好啦！抑是，
學語言無遐爾「快」。
.
◎外口凊彩食
．凊彩食tshìn-tshái tsia̍h
．自助餐tsū-tsōo-tshan
．麵擔仔mī-tànn-á
．路邊擔仔lōo-pinn-tànn-á
．店面tiàm-bīn
．水餃tsuí-kiáu
．滷味lóo-bī
．sú-sih箍仔∥sú-sih-khoo-á：『握壽司』，就是Nigiri。
「sú-sih」就是『壽司』，「箍仔」就是一箍一箍的飯。
．醋飯箍tshòo-pn̄g-khoo：因為彼的飯是用醋調味過的
．潤餅𩛩jūn-piánn-kauh：共潤餅這个物件𩛩起來。
𩛩kauh：若像共硩--一下，共捲起來，這个動作叫做
「𩛩」。
共潤餅這个物件𩛩起來以後，產生的新的物件叫做
「潤餅𩛩」。
就像咱共豆乾提去糋了後，糋出來的彼的物件叫做
「豆乾糋」。
共彼的動詞，囥佇後面。
.
◎塑膠餐具的問題
．塑膠碗sok-ka-uánn
．環保箸khuân-pó-tī
．攕仔tshiám-á
．樹奶tshiū-ling
.
◎餐廳用餐真享受
．東南亞Tang-lâm-a
．酸薟sng-hiam
．日本料理Ji̍t-pún-liāu-lí
．I-thá-lih式∥I-thá-lih-sik：『義式料理』。
咱共Italy這个名，直接共伊轉做台語的倚音。
．和肉佮hām-bah-kah：這是咱欲推廣的詞。
「漢堡」的台語按怎講？咱會當共hamburger這个聲音
翻做有台語意思的「和肉佮」，因為hamburger這个物件，
伊就是有麭，有肉，佮做伙食。所以咱會當叫伊「和肉佮」
這是一个新的講法，是猶未流行起來的，未來火的確
咱逐家會共「漢堡」叫做「和肉佮」。
.
◎促銷的步數
．食餐廳tsia̍h tshan-thiann：
毋是共餐廳食去，是去餐廳食物件。
．促銷tshiok-siau
．同齊tâng-tsê
．同行tông-hîng
．禮券lé-kuàn
.
三、今仔日的作業：
◎佮人討論恁會佇外口食啥？
那講那分析，恁的腔口仝款抑是無仝？
## [2017.09.28《講台語當著時》：趣味的四字詞](https://youtu.be/M4bEjfqsCkM)
一、趣味的四字詞
◎媠氣的四字詞：四字聽起來較有節奏
．消瘦落肉siau-sán-lo̍h-bah：愈來愈瘦的意思。
伊自從失戀了後，袂食袂睏，tsua̋n(就按呢)消瘦落肉。
．烏青凝血oo-tshenn gîng-hueh：烏青的意思。
比論講伊去挵著，挵甲足嚴重的，抑是車禍足嚴重的，
你哪按呢挵甲烏青凝血？
．當頭白日tng-thâu-pe̍h-ji̍t：有略仔接近『光天化日之下』，
咱這馬是日時，逐家有聽咧喔，話毋通烏白講喔！
咱這馬當頭白日，來共話講予清楚，以後啥物人都袂當反悔。
．長短跤話tn̂g-té-kha-uē
頭前原本閣有一句「三人共五目」，日後無長短跤話。
這是一个民間故事，有一个長短跤的，佮一个是減一目的，兩个人欲相親，
媒人喙，糊瘰瘰(hôo-luì-luì)，就共in兩个人的欠點攏掩崁(am-khàm)起來，
伊尾仔tsua̋n講一句講：三人共五目，咱這馬三个人五粒目睭喔，
日後無長短跤話。你毋通講人長短跤喔！
﹡本來是咧講媒人喙的意思，後來咱就共「長短跤話」
這四字取出來，意思就是「莫閣講遐的閒仔話」。
．白汫無味pe̍h-tsiánn-bô-bī：
就像「無味無素(bô-bī-bô-sòo)」、「無鹹無纖(bô-kiâm-bô-siam)」的意思仝款。
「汫」就是「鹹汫」的「汫」，味較「汫」的「汫」。
今仔日的菜白汫無味，我食幾喙矣，就無胃口矣。
．阿沙不魯a-sa-puh-luh：
就是「無正經、亂七八糟的代誌、物件」，攏會使講「阿沙不魯」。
你哪會規工看遐的影片，攏看一寡阿沙不魯的影片，有夠無營養的。
．規年迵天kui-nî-thàng-thinn：
就是「規年」、「規冬」，真長的時間。
你按呢規年迵天，攏無閒𩑾𩑾(bô-îng-tshih-tshih)，無通仔歇睏，實在是真辛苦。
．拆食落腹thiah-tsia̍h-lo̍h-pak：講一个人足歹的，袂輸欲共人食去，
咱會當講「電影內底彼的妖怪，做甲足成的，袂輸敢若隨欲共人拆食落腹仝款。
咱嘛會當共這句話提來形容人，彼的人足歹的，你就愛較細膩的，
你若一下無細膩，伊就共你拆食落腹。
．挲圓仔湯so-înn-á-thng：這是選舉的時陣用的。
比論講，你若欲選，伊嘛欲選，就有人會出來撟。
撟的這个動作，就是叫做「挲圓仔湯」。
A：這个人今年閣欲來選舉，哪會無選，換別人？
B：伊去予人挲圓仔湯挲去矣啦。
．艱苦罪過kan-khóo-tsē-kuà：足艱苦、受罪的意思，比艱苦閣較艱苦。
你食這个頭路，做這號工課，做甲艱苦罪過，你規氣莫做矣。
．割稻仔尾kuah-tiū-á-bué：『收割』。
人已經拍拚足久矣，辛辛苦苦做甲一大堆，尾仔，你共人稻仔尾割去。
你按呢恬恬做甲遮爾久，就已經欲佇欲有成果出來矣，邊仔的人煞來共你
割稻仔尾，變做攏是伊的功勞。
．冤家量債uan-ke-niû-tsè：其實就是冤家。
恁翁仔某兩个人冤家量債，到底是有啥物好冤的啦！
冤家量債，聽起來就是比「冤家」冤甲閣較嚴重。
．雙面刀鬼siang-bīn-to-kuí：就是雙面人。
佇你的面頭前是按呢講，佇咧伊的面頭前閣是講另外一套。這个人是雙面刀鬼，
你愛較細膩，毋好相信伊講的話。
．風聲嗙影hong-siann-pòng-iánn：『捕風捉影』
略仔一寡消息爾爾，就予人講甲足譀的。
人講一个影，你共人生一个囝。
．烏龍踅桌oo-liông-se̍h-toh：『顧左右而言它』
我共你講這，你無想欲面對這个問題，你就共踅對邊仔去。
你賠償的代誌講予清楚，你莫佇遐烏龍踅桌，我袂予你牽去。
．紅膏赤蠘âng-ko-tshiah-tshi̍h
講一个人的面色真好看。
像阮阿公仔就已經90幾歲矣，伊猶閣紅膏赤蠘，跤健手健，身體足好的。
.
◎AB#CD#：頭前兩字是一个組合，後面兩字是一个詞
．近廟欺神kīn-biō-khi-sîn：「廟」愛唸本調。
因為你和伊傷近，所以你就感覺伊無啥物了不起。
像講恁厝邊有一个足有名的學者，逐家攏對伊足尊敬的，
結果你就感覺無啥，對伊足無禮貌，就會當講
你哪會「近廟欺神」，伊偌有名的，你知無？你嘛小共尊敬一下。
．掠龜走鱉lia̍h-ku-tsáu-pih：我顧這，煞無顧彼。
顧頭前，煞無顧後壁，叫做「掠龜走鱉」。
定定有人講：掠龜走鱉捶心肝(tuî-sim-kuann)。
．軟塗深掘nńg-thôo-tshim-ku̍t
塗愈軟的所在，你就會當掘予深。『得寸進尺』
伊共咱鬥相共，是伊好心，你毋好按呢軟塗深掘，做是人應該替你做的。
．刣雞教猴thâi-ke-kà-kâu：處罰一个人予所有的人看。
你莫叫是講頭家這改共伊處罰，和你無底代，人頭家是咧刣雞教猴，
你家己目睭就愛擘(peh)較金的。
．緊事寬辦kín-sū-khuann-pān：
要緊的代誌，你顛倒愛沓沓仔處理，才袂講有一个失覺察(sit-kak-tshat)，
顛倒䆀，所以愛緊事寬辦。
．弄狗相咬lōng-káu-sio-kā：共兩爿的人使弄，予怹兩个人去鬥來鬥去。
伊是咧共恁弄狗相咬，你毋好予伊騙去，真正和伊冤起來，按呢時到，
伊會共規碗捧去。
．東勢拆箬tang-sì-thiah-ha̍h：「東勢」就是「東爿」。
「箬ha̍h」是竹仔咧生出來的時陣，竹䈄的所在，若像日頭佇欲出來的時陣，
天頂彼款白白的色。
東勢拆箬，就是日頭佇欲出來矣，天佇欲光矣。
日頭佇欲出來矣，東勢拆箬，這个時陣來去”足百peh”山上蓋好。
．心狂火著sim-kông-hué-to̍h：一个人氣怫怫，足受氣的。
你這馬心狂火著，毋好急欲做決定，無...我驚你會後悔。
心狂火著，咱一般四字攏唸本調，無唸變調。
.
◎ABCD → AC：這款四字詞，是第一字佮第三字是一个詞。
．年久月深nî-kú-gue̍h-tshim：就是時間過真久。
咱做遮的社會教育，雖然短時間看袂著效果，毋過，年久月深來，
咱嘛是會看著成果的。
「年月」是一个詞。
．三除四扣sann-tû-sì-khàu
我的薪水，啥物健保費、啥物費，扣扣咧，三除四扣，就賰無偌濟矣。
．死坐活食sí-tsē-ua̍t-tsia̍h：欲食毋討趁。
伊靠勢怹兜有祖產，死坐活食攏毋去趁錢。
．吵家抐宅tshá-ke-lā-the̍h：佮「冤家量債」差不多，
就是講厝內底的人吵來吵去。
你按呢規家伙仔，吵家抐宅，序大人聽著是毋是心肝會足艱苦的？
．有耳無喙 ū-hīnn-bô-tshuì：咱講囡仔人「有耳無喙」。
你聽就好矣，意見莫遐濟。這是一个現代無好的觀念。
這馬希望囡仔會當發表伊家己的意見。
．有空無榫 ū-khang-bô-sún
「空」佮「榫」是古早的建築物，怹兩个鬥做伙，彼的物件叫做「空」佮「榫」。
若是有「空」無「榫」的時陣，就就無路用矣。
「有空無榫」就是無實際的代誌。
．跤尖手幼 kha-tsiam-tshiú-iù：是講一个人無法度做粗重的。
千金小姐跤尖手幼，這種粗重的伊做袂來。
．氣身惱命khì-sin-lóo-miā
老母為著囡仔，三个某埔囡仔佇咧厝--的，彼真正老母會氣身惱命，氣甲欲死。
.
◎ABCD → BD：第二字佮第四字是一个詞的
．收跤洗手siu-kha-sé-tshiú：『金盆洗手』
伊已經收跤洗手，江湖的代誌伊無咧插矣。
「跤手」是一个詞。
．纏跤絆手tînn-kha-puànn-tshiú
你莫踮遐纏跤絆手，我咧無閒，你去邊仔，莫踮遐干擾我做工課就著矣。
．趒跤頓蹄tiô-kha-tǹg-tê：佮「頓椅頓桌」有一寡相siāng，就是足受氣的。
看彼的屁窒仔，氣甲趒跤頓蹄，看著有夠好笑。
．空喙哺舌khang-tshuì-pōo-tsi̍h
這流行歌內底定定有，我毋是彼款「空喙哺舌」的人，我袂反背你。
．儉腸凹肚khiām-tn̂g-neh-tōo：就是足儉的。
伊儉腸凹肚就是為著欲買厝。
．輕聲細說khin-siann-sè-sueh：『輕聲細語』
伊咧講話輕聲細說，足溫柔的。
．央三託四iang-sann-thok-sì：就是四界共人拜託。
這个基金會是伊央三託四，去拜託來的。
．偷來暗去thau-lâi-àm-khì：兩个人私底下佇咧交往。
怹兩个偷來暗去幾若年，阮攏毋知影。
.
◎聲音變化：遮的是聲音較特別，注重伊的聲音。
．哩哩囉囉li-li-lo-lo
你莫哩哩囉囉講啥，我聽攏聽袂清楚。
．糜糜卯卯mi-mi-mauh-mauh
阮這隊去予人摃甲糜糜卯卯，輸甲有夠慘的。
．嗤舞嗤呲tshi-bú-tshi̍h-tshū
怹兩个人踮遐嗤舞嗤呲，毋知咧講啥。
．馬西馬西má-se-má-se：就是有一寡仔茫矣。
啉甲馬西馬西。
．歪膏揤斜uai-ko-tshi̍h-tshua̍h
比論講你寫字，寫甲歪膏揤斜。
有當時仔，咱會加一个無意義的聲音，變做uai-ko-tshi̍h-la̍k-tshua̍h。
．lok-koh-so̍k-koh、物仔霸仔mi̍h--á-pà--á
講一寡毋是足值錢的，亂七八糟的物件，咱會當講lok-koh-so̍k-koh、物仔霸仔。
這个詞會當學一下。
遮的攏是一寡lok-koh-so̍k-koh、物仔霸仔的物件，無值錢，提去擲擲咧嘛bua̋緊。
．垃圾lî-lô∥lah-sap-lî-lô、lah-sap-lî-lô-kô
因為遮的lok-koh-so̍k-koh的物件足濟，所以你的房間就會垃圾lî-lô。
垃圾lî-lô咱嘛會加一个音，叫做lah-sap-lî-lô-kô。
二、逐家講台語：稅厝揣厝真勞苦
．稅厝suè-tshù：『租房子』，稅金的彼的「稅」
．租厝tsoo-tshù：咱嘛會當講租厝。
．揣厝tshuē-tshù：『找』叫做「揣tshuē」
華語：『找東西』、『找錢』，攏是『找』。
台語：錢是「找tsāu」的，物件是「揣tshuē」的。
若是揣錢，是錢拍毋見，你欲去揣，意思無仝款。
．套房thò-pâng：伊有伊家己的浴間仔、客廳，你毋免和人公家用遮的空間。
．雅房ngá-pâng：可能是一層樓，逐家做伙稅，可能我干焦一間房間，客廳、
浴間仔和人公家用。
．浴間仔i̍k-king-á：咱洗身軀的所在。
．無殼的露螺bô khak ê lōo-lê：『無殼蝸牛』
．厝尾頂tshù-bué-tíng：嘛有人講「厝頂」，就真正是厝的彼沿的厝頂。
譬如講：厝頂破空會漏水。
．樓尾頂lâu-bué-tíng：像講這个大樓上懸的彼沿，頂頭閣起去遐，
會當曝棉被的彼的所在，遐叫做「樓尾頂」。
﹡樓尾頂閣有另外一種意思，咱古早的厝，彼款正身護龍起的，伊的厝頂是尖尖的，
厝頂佮天篷中央遮閣有一个空間，彼的空間，有當時仔會當囥物件，甚至會當
踮遐咧睏，彼的所在嘛是叫做「樓尾頂」。
．鐵厝thih-tshù：樓尾頂若閣起，華語講『頂樓加蓋』，定定是起鐵厝，
就是『鐵皮屋』，因為彼較俗。
．“足百”樓梯peh lâu-thui
華語：『爬樓梯』、『在地上爬』、『蟲在爬』三種都是『爬』。
台語：樓梯是“足百peh”的；踮塗跤是「爬pê」的；蟲是用「趖sô」的。
.
．貼紅紙tah âng-tsuá：古早咱若是欲揣厝、揣頭路，攏佇咧公布欄頂頭「貼紅紙」去揣厝。
．清幽tshing-iu：咱講這間厝遮附近的環境真清幽，蹛著誠四序。
．中人tiong-lâng：你若是欲稅厝，抑是欲買厝，有當時仔攏愛揣「中人」，
「中人」就是『仲介』。
．押金ah-kim：你這馬厝已經看好矣，準備欲來簽約矣，這个時陣，你愛予伊一筆押金。
．簽約tshiam-iok：押金予伊矣，恁兩个人就會當簽約矣。
．厝主tshù-tsú：欲佮啥人簽約咧？欲佮「厝主」簽約。『房東』就是厝主。
．厝跤tshù-kha：『房客』
.
．納水電錢la̍p tsuí-tiān-tsînn：咱無講「繳」，咱講「納」錢。
．獨立電錶to̍k-li̍p tiān-pió
．厝價tshù-kè：『房價』，這馬厝價足貴的。
．闊khuah：看厝的時陣，有的所在真「闊」，『坪數很大』。
．狹e̍h：有的所在，伊就較狹。
．陽台iông-tâi
．露台lōo-tâi
．隔間keh-king
．鬥冷氣tàu líng-khì：『安裝冷氣』，「鬥」就是『安裝』。
．友善iú-siān
．做伙蹛tsò-hué tuà
．互相照顧hōo-siong tsiàu-kòo
．稅規層suè kui tsàn
．透天thàu-thinn
.
三、今仔日的作業：
◎佮人討論稅厝的經驗抑是新聞，共今仔日學著的四字詞，用佇討論內底。
## [2017.10.05《講台語當著時》：台語的研究 內涵、方法、材料](https://youtu.be/G4tpywL8-Ns)
台語除了會曉講，會曉聽以外，咱閣愛會曉讀，會曉寫。毋過，咱若是對語言有閣較深的了解，咱就愛去研究這个語言。
一、台語的研究
◎語言研究
＊是研究語言本身，毋是使用語言的能力
毋是你足𠢕講英語，就表示你對英文足有研究。
是咱愛去了解這个語言伊的系統，伊的結構，伊內面的一寡道理等等，這才是「研究」。
＊研究語言的目的
．希望對咱的語言閣較了解，因為人類對真濟代誌攏真好玄，咱想欲知影伊內底有啥物款的道理。
．幫助教學
了解以後，敢有實用性？有哦！
譬如講咱佇教學、佇咧教台語的時陣，遮研究的成果，會當幫助咱的教學，會當予咱知影，
咱按怎教才較有效。
．保存語言
這馬台灣語言已經真弱勢，咧欲無去矣，所以咱就需要共遮的語言保存落來。
咱若是對語言的研究愈濟，愈詳細，咱佇咧保存語言的時陣，就愈有幫贊。
＊研究無一定有實用性，嘛定定有實用性
像講咱人咧研究光線按怎走，空氣按怎走的時陣，頭仔開始可能攏無啥物意義，干焦好玄爾爾。
毋過，這个成果出來，沓沓仔就會有應用。
＊語言學是一門專業學科，台語是一種語言。
◎台語研究
＊語音
．描寫語音：
上基礎就是描寫語音，咱這个語言有啥物主音？有啥物元音？伊聲母的結構是啥？
韻母的結構是啥？伊的聲調有啥物款的變化？像咱進前講的變調、輕聲，遮的攏是去觀察、
去研究、去紀錄落來了後，做一个仔整理，咱就會當描寫講台語這个語言是生做啥物款。
．變調：按怎佇頭殼內運作
真濟語言學家就對變調真好玄，變調遮爾仔複雜，伊到底佇咱的頭殼內底，是按怎運作的？
咱是按怎來使用這个變調的規則？
怹設計真濟實驗，予人去唸伊設計好的語詞，來去研究變調到底按怎佇咱的頭殼內底運作。
．語調：音節的長短、懸低 → 電腦語音
以咱台語來講，咱一字就是一个音節，咱一句話內底是毋是有幾偌个字？這幾偌个字，
毋是每一字的長短攏仝款，有的長，有的短。
仝款仝一字，你囥咧頭前、囥佇咧中央，佮囥佇咧後壁的時陣，伊的長短嘛無仝款。
而且，伊的聲音的懸低嘛無仝款，有的人專門咧研究這，而且用這个機器共伊量出來，
共伊紀錄落來，閣去計算，像這个研究，對電腦語音的合成真有幫助。
.
＊構詞：一个詞伊是按怎組合起來的
．詞頭：台語內底有真濟，
a.阿～：阿明、阿英、阿狗、阿貓
b.加～：虼蚤ka-tsáu（跳蚤）、虼蚻ka-tsua̍h（蟑螂）、
加薦仔ka-tsì-á（包包）、
尻脊骿kha-tsiah-phiann（背部）
這个「加ka」佮「尻kha」無啥物意思，伊就是一个詞頭，
這是台語特殊的。
．詞綴：綴佇咧後面的詞綴
ａ.～仔：椅仔、雞仔、囡仔
經過研究，咱知影「仔」，伊會當表示「較細」，嘛會當表示「較親」，
嘛會當表示「共你輕視」。
這就是分析出來了後，咱才了解的。
b.～頭：除了講真正的頭以外，
菜頭、穡頭、力頭，這佮「頭」已經無關係矣。
．結構分析→ 四字詞的無仝類型，有無仝的結構，
這攏是對這个詞的分析，知影會當分成這種結構。
.
＊句法：
．語序：就是咱講一句話的順序，
S表示主詞，V表示動詞，O：表示受詞
像華語、英語，和咱台語大部份攏是第一个：SVO
SVO：我拍你：我是主詞，拍是動詞，你是受詞。
有的語言會變做SOV，主詞、受詞、動詞
VSO、VOS、OVS、OSV，無仝款的組合，這六種組合佇全世界的語言內底攏有。
其中台語誠特殊，台語除了會當講：我拍你，第一種以外，嘛會當講：我共你拍。
變做第二種SOV主詞、受詞，動詞囥佇咧後壁。
．文法：是按怎有的話句咱無法度接受？
台語有文法，就是因為有文法，所以咱就會感覺講是按怎有的話句咱無法度接受？
親講「狗仔走去公園。」，
咱若講「魚仔飛去學校」，伊有合語法，毋過伊的意思毋著。
咱若講「狗公園走去」，你毋知影伊咧講啥，因為伊無符合咱台語的語法。
．華語佮台語到底差偌濟？有證據
遮的分析就是會當共咱講，經過比較了後，華語佮台語到底有佗位無仝款。
＊語料：就是咱所講的話，所寫的字，全部攏是「語料」。
．詞頻、語料庫的應用
語料你若共伊建立「語料庫」，就會當算伊的詞頻，啥物是「常用詞」，
啥物詞是較罕用的，佇咧教學上，抑是研究上攏會當有真大的幫助。
◎社會語言學
語言本身以外，因為語言佮社會會互相接觸，會互相影響，所以就會有《社會語言學》。
＊社會身份佮語言之間的關係：性別、職業、地區
你的性別、你的職業，佮你蹛的所在，敢會去影響語言的表現？會喔，有人專門做這（研究）。
＊腔口差：伊的系統性佮分類，嘛是社會語言學的一部份。
＊語言接觸：無仝腔口，抑是華語佮台語接觸，台語佮客語接觸以後，
怹互相會產生啥物款的競爭佮影響。
這攏是「語言接觸」這個領域咧研究的。
＊語言態度：
．語言有階級：咱社會上，可能感覺某一種語言較高尚，某一種語言較粗俗，這就是表示語言的
無仝款的階級。
．語言的認同佮實踐：有人做這个研究講去調查，你感覺台語重要無？你認為囡仔愛學台語無？
有喔！台語足重要的，逐家應該攏愛學。
你有咧講台語無？無！
這就是表示：你的認同佮你的實踐是無仝款的。
有人專門做這種語言態度的研究。
＊地理語言學：
．共咱頭前講的腔口差，和遮的人、遮的腔口伊所蹛的所在，共怹結合，共這个腔口的分布，
畫做地圖，這就是產生的研究成果，就叫做「語言地圖」。
．你若是用圖來看，你一下看你就隨會當知影，原來咱台灣遮是啥物腔，遐是啥物語言。
．語言地圖生做啥物款？（範例）
a.倒手爿這个《台灣言語分布圖》是日本語言學家小川尚義，佇咧1907年的時陣，
所畫出來的一个語言地圖，頂頭有台語、有客語、有南島語。
伊用無仝款的色水，無仝款的巡（sûn），共每一種語言分開，予你看出原來台灣的
語言分布，是生做按呢。
b.正手爿這个，是現代的台語的語言學家洪惟仁教授，伊做這个《台灣語言方言的分布圖》
是佇2008年的一个成果。
伊佇進前的研究基礎之上，閣加閣較濟的分析佮調查。這馬其實伊有閣較新的成果。
．這就是予逐家看覓仔「地理語言學」，所畫出來的語言地圖，就是生做這款形。
這就是地理語言學的研究。
★台語的研究予咱真濟收穫（siu-hi̍k）佮真濟啟示，咱會當看著經過遮的研究了後，
咱對咱的語言就閣較了解。
==========
語言包涵聲音以外，閣有文字，所以嘛有文字的研究。
◎文字研究
＊漢字：咱會去研究講本字是啥，伊的用字應該愛按怎用。
．俗文字的研究：啥物是俗文字咧？像歌仔冊，歌仔戲的劇本，遮的民間的用字按怎用？
．聲韻與文獻：咱閣會當去研究遮的聲韻，去利用遮的文獻，像講《十五音(si̍p-ngóo-im)》，
抑是《廣韻》、遮的字書等等。
＊羅馬字
．歷史演變
．符號：伊的符號是按怎變化的，毋是講上頭仔開始，符號就完全仝款，伊是有變化的，按怎寫，
按怎標記，會當予逐家較好看、較好讀、較好寫。
．書寫規範：佗位愛連字符，佗位愛大寫等等。
．教學輔助
.
.二、逐家講台語：台灣特色的節日
◎國定假日的意義
．節日tseh-ji̍t：節（白）tseh
節（文）tsiat：上一節課、電視節目
．假日ká-ji̍t/kà-ji̍t：「假」這字本來就有兩个勾破，一个唸ká，一个唸kà，ká-ji̍t/kà-ji̍t
兩種攏有人講。
．放假pàng-ká
．歇睏日hioh-khùn-ji̍t
.
◎一例一休？七天假？
．一例一休tsi̍t-lē-tsi̍t-hiu：照伊的漢字唸。
．一例一歇tsi̍t-lē-tsi̍t-hioh
．誕辰tàn- sîn：某乜人（móo-mí-lâng）的誕辰。咱較無按呢講。
．聖誕sìng-tàn：像講五府千歲聖誕千秋，咱有足濟神明的聖誕。這是較文的講法。
．神明生sîn-bîng-senn：這是較口語的講法。像講觀音媽生、土地公生，這个「生」表示伊的生日。
◎台灣傳統的節日：自年頭到年尾共伊巡一下
．過年kuè-nî：是一段較長的時間。過年的頭一工，就是正月初一（tsiann--gue̍h tshe-it）
．元宵Guân-siau：正月十五（tsiann--gue̍h tsa̍p-gōo）
看花燈、臆謎猜(ioh- bī-tshai)
．清明Tshing-bîng：是新曆，毋是舊曆。新曆的4月初四、初五，抑是初六攏有可能，
愛看彼年的日頭按怎行。佇咧這三工其中的一工，是咱的清明。
．五日節Gōo-ji̍t-tseh：舊曆的五月初五。
．五月節Gōo-gue̍h-tseh
．中元Tiong-guân：就是咱口語講的「七月半」。
．七月半tshit-gue̍h-puànn：就愛普渡（phóo-tōo）。
．中秋Tiong-tshiu
．冬節Tang-tseh：這是12月21、22、23無一定是佗一工。
看著「節」，表示伊是一个節氣（tseh-khuì）。
節氣就是看新曆。
冬節，咱愛食冬節圓。
．二九暝Jī-káu-mê：『除夕』，彼工就是愛提紅包的日子。
.
◎未來應該增加的假日：
傳統的節日，抑是現有的國定假日以外，屬於台灣的節日
無夠額，所以咱愛制定一寡較屬台灣的假日。
．夠額kàu-gia̍h
．制定tsè-tīng
．揀選kíng-suán：『挑選』
．轉型正義tsuán-hîng tsìng-gī
．313湯德章紀念日：313 Thng Tik-tsiong kì-liām-ji̍t
湯德章是一位台南的律師，這工就是會當紀念伊的日子。
．407言論自由日：407 Giân-lūn-tsū-iû-ji̍t
這是爭取言論自由的鄭南榕先生，伊自焚過身的彼工。
所以咱就共伊當做言論自由紀念的日子。
．531大空襲紀念日：531 Tuā-khong-si̍p kì-liām-ji̍t
彼當時仔二戰的時代，這工台北去予人轟炸甲有夠慘的。
．602馬偕紀念日：602 Má-kai kì-liām-ji̍t
602是馬偕過身的日子，用這工來共伊紀念。
．815終戰紀念日：815 Tsiong-tsiàn kì-liām-ji̍t
這工就是二戰結束的時陣，這工對台灣來講，
是誠要緊的一工。
＊數字文白音
1 、 2 、 3 、 4 、 5 、 6 、 7 、 8 、 9 、 10
tsi̍t nn̄g sann sì gōo la̍k tshit peh káu tsa̍p
it jī sam sù ngóo lio̍k tshit pat kiú si̍p
．「一tsi̍t」佮「乙it」，其實毋是文白音，照講是兩个字。
．「兩nn̄g」佮 「二jī」，嘛毋是文白音。
．三到十才是文白音，頂頭的攏是文音，下面的攏是白話音。
．其中，「七」文白攏仝款。
．空khòng / 零lîng
．本來是日期，日期攏愛講白話音，毋過伊變做紀念日了後，
就變做號碼，號碼咱就愛講文言音。
三、今仔日的作業：
◎就你熟似的領域，學術研究抑是各種產業攏會使，
揣出你認為值得紀念的日子，才閣解說理由。
## [2017.10.12《講台語當著時》：鄉民台語](https://youtu.be/LfKJ_MhYBso)
一、鄉民台語
◎台語課的社團時間
＊語言社群：共同理解某一寡詞彙、講法
咱一个群體，共同理解某一寡詞彙佮講法，干焦這群的人內底的人知影就著矣。
干焦鄉民聽有的話，就是鄉民的語言。
＊鄉民→就是有「紅目有仔鬥鬧熱」彼款心態的人就是鄉民。
Âng-ba̍k-ū--á tàu-lāu-jia̍t.
．對周星馳電影「九品麻仔官」來的。
伊內底有一句台詞：講伊是一个過路的鄉民，只是徛較出來爾爾。
．佇PTT開始流行：後來，佇PTT內底，就共「鄉民」這个詞，
來表示像講「紅目有仔鬥鬧熱」的這款行為。
．產生大量的「鄉民話」
後來就產生足大量的鄉民話。
◎基本詞
．鋪文 / po文：phoo-bûn，post 就是寫文章。
咱台語有講「鋪排」：這个代誌你按怎去共伊鋪排？照這个意思來講「鋪文」。
．原鋪/原po ∥guân-phoo：
原底po這篇文章的彼篇文，叫做原po。
彼个人，抑是彼个文。咱會講「原鋪」內底伊有講按怎按怎，
咱的回應是按怎按怎。
．回文huê-bûn：
咱講著「原鋪」的時陣，定定是咱佇咧回文的時陣。
伊遮有一篇文章，咱共伊回應，這叫做「回文」。
．捒文sak-bûn：
捒sak：『推』，我共你『推』，就是共你「捒sak」。
『推文』就是「捒文sak-bûn」，毋是洗手的「sap-bûn」。
．黜文thuh-bûn：
若是反對的咧？佇咧PTT內底有一種講法，叫做『噓文』。
敢若咱台語講的「黜臭」，所以我共你『噓』，就是我共你「黜」。
我共你『噓』的內容，就是我的黜文（thuh-bûn）。
．浸水桶tsìm tsuí-tháng：
有的人傷過亂，講一寡無適合的話，這的時陣，版主就會共伊「浸水桶」，
予你袂當講話，袂出聲。
．樓頂lâu-tíng：
有當時仔，講回文以外，我欲講我頭前彼个伊所留的捒文，這个時陣，
咱就會講「樓頂」，抑是講幾樓，五樓、四樓，我的樓頂、樓跤按怎按怎。
就是留話的頂一个，佮留話的後一个，就是「樓頂」佮「樓跤」。
．五樓gōo-lâu：
佇PTT內底，不時予人CUE的一个樓層，就是「五樓」。
啥物代誌就是欲問五樓的看法，啥物衰（sue）的，好空（hó-khang）的攏是五樓。
．敲碗khà-uánn：
你毋是講你欲講一件驚天動地的代誌？你當時欲講啊？
抑是兩个人佇咧冤，冤甲當精彩，閣冤啊，閣冤啊，我欲聽，我欲看，
敲碗、敲碗。
．朝聖tiâu-sìng：
像講有一个話題足熱的，原本的彼篇文章，就會有真濟人去揣，
揣著原本的彼篇文章的時陣，伊就會佇下面留話講「這是朝聖」，「朝聖捒」。
「朝聖」因為伊是天主教抑是說回教，這種宗教的行為。
．割香kuah-hiunn：
若是咱台灣，類似的這種意思，咱就會當講「割香」。
咱來去大廟「割香」，敢若去彼篇文章共伊朝聖仝款。
．綴拜tuè-pài：
我就是無家己的主意，人講彼篇足鬧熱，足好看的，我綴人去看覓仔一下。
所以咱有當時仔，嘛會當共「朝聖」講做「割香」，抑是「綴拜」。
「朝聖捒」咱就會當講「割香捒」。
◎文章類型
．釣魚文tiò-hî-bûn：
本來有的佇網路頂頭，無啥物發表意見的人，伊針對特定的主題，伊看著了後，
伊就忍袂牢，想欲講話，若是這種文章，會共這款人釣出來，這就是釣魚文。
．月經文gue̍h-king-bûn：
有的問題，這個月有人問，後個月有人問，紲落來逐個月攏有人問，
一个老問題就著矣，你家己毋去揣答案，不時就有人來問，像這款的，
咱就共伊叫做「月經文」。
．廢文huì-bûn
看字就知影，哼哼呻（hainn-hainn-tshan）的啦，無營養的啦，無意義的，
有寫若無寫的，像這款的，咱就講這叫做「廢文」。
．展寶文tián-pó-bûn
「展」，我有啥物物件足好的，我想欲共伊「展一下」。
我有啥物寶，我有啥物物件，抑是講我和啥物明星合翕相，遮的攏是會當展寶的
代誌。「展寶文」就是『炫耀文』。有的人就是特別欲來鋪這篇文章，共逐家展，
予人感覺講足欣羨的。
．祭品文tsè-phín-bûn：
有的人伊會講「若是明仔載，啥物人伊為這件代誌道歉、落台，我就佇咧台北車頭
發雞排50份，免費予逐家來領。」進前嘛有一个律師，伊講「同婚的釋憲若是通過，
伊就欲捐出10場的演講無收費。」
像這款物件就是叫做「祭品文」。
．牲醴文sing-lé-bûn：
因為「祭品」這个物件，咱台語講「牲醴」。咱拜拜是毋是愛攢牲禮？
所以「祭品文」嘛會當叫做「牲禮文」
．貧惰包pîn-tuānn-pau：
（貧惰又唸作pûn-tuānn、pân-tuānn、pān-tuānn）
有當時仔，一件代誌可能已經炒幾若工矣，抑是炒一段時間矣，你中央半途才來
關心，你就毋知影頭，毋知影尾矣，這个時陣，有人就會足熱心的，想講共這个
代誌的頭頭尾尾，發生啥物代誌，共你整理一下，這个就是變做「貧惰包」。
◎常用詞
．自剾tsū-khau：
家己共家己剾，叫做「自剾」，就是『自婊』。
．搧面siàn-bīn：
「搧siàn」是「搧喙䫌」。搧面的文章就是『打臉』。
．拍銃phah-tshìng：你講白賊，去予人拍銃矣。『打槍文』。
．閃光siám-kng：男女朋友做伙，感情糖甘蜜甜，予人感覺足欣羨的，這就是「閃光」。
．放瘦氣pàng-sán-khuì：有「閃光」就有『放閃』，咱台語會當講「放瘦氣」，
因為「做瘦氣」就是『調情』的意思。
．齒盤柯南khí-puânn kho-lâm：
柯南就是漫畫（bàng-gah）內底的一个人物，伊足會曉推理。有的人伊其實嘛
毋是警察，嘛毋是啥，伊就是一直佇咧電腦頭前，一直揣，一直揣，一直揣，
一直做真濟推論。
這款人咱就叫伊「齒盤柯南」。
．魯趖lóo-sô：一个真流行的詞，叫做『魯蛇』，伊是對英語的loser來的，
咱台語嘛會當照翻。
你實在有夠魯的呢！表示這个足漚古(àu-kóo)的。
這个物件有夠「魯」的，抑是講這个人有夠「魯」的，所以咱嘛會當
叫做「魯趖」。
照伊的意思，咱嘛會當共伊叫做「魯跤」。
．穩贏ún-iânn：winner就是「穩贏」，比華語的『溫拿』閣較適合。
．玻璃心po-lê-sim：就是磕一下就碎去矣。
．查水表tshâ-tsuí-pió：你若是知影啥物代誌，人來揤電鈴講「我欲來
查水錶矣喔！」，意思就是欲來調查矣。
．肉搜bah-tshiau：咱若是欲共一个人揣出來，現實中，伊到底是啥物款的人，
咱講「人肉搜揣」，簡稱叫做「肉搜」。
◎鄉民的流行話句
．白仁反甲後擴去。『白眼翻到後腦勺』Pe̍h-jîn píng kah āu-khok--khì.
「白仁」就是『白眼』的所在，「後擴」就是『後腦勺』。
我看了實在是擋袂牢，看甲我「白仁反甲後擴去」。
．五樓你按怎看？ Gōo-lâu lí án-tsuánn khuànn?
「這件代誌，五樓你按怎看？」這是鄉民足愛講的一句話。
五樓佮伊有啥物底代咧？哎呀！不管啦！五樓你按怎看？
「你按怎看？」是政論節目定定出現的一句話。
．87分袂當閣較懸矣。87 hun, bē-tàng koh khah kuân--ah.
「87」就是「白痴」啦！就是我上加予你87分，袂當閣較懸矣。
意思就是講「你這件代誌實在有夠白痴的。」
．倒咧嘛著銃。『躺著也中槍』Tó--leh mā tio̍h-tshìng.
這件代誌佮我也無底代矣，是按怎會牽對我遮來？
所以我講「我倒咧嘛著銃。」
．一切攏是假影的，嚇我袂倒。 It-tshè lóng sī ké-iánn--ê, hennh guá bē tó.
『一切都是幻覺，嚇不倒我的。』這嘛是電影的台詞。
意思就是講「毋管你講的遮的有偌恐怖，一切攏是假影的，嚇我袂倒。」
．先承認你就是恁朋友。Sing sîng-jīn lí tō sī lín pîng-iú.
有的人佇咧寫文章的時陣，會講「我有一个朋友按怎按怎按怎…」，
有的人就感覺講「莫假矣，先承認你就是恁朋友。」
．落去領五百。Lo̍h-khì niá gōo-pah.
這通常是用佇咧政黨互相攻擊的時陣，你政黨的黨工落去領五百啦！
因為行路工就是五百箍。
．袂當干焦我看著。Bē-tàng kan-na guá khuànn--tio̍h.
足譀古、足白痴、足好笑的言論，抑是影片，抑是圖，咱佇咧轉文的時陣，
就會加一句講「這袂當干焦我看著。」
．毋通問，真恐怖。M̄-thang mn̄g, tsin khióng-pòo.
「你是按怎知影這件代誌唅？」抑是講「這个工程是開偌濟錢唅？」
「毋通問，真恐怖！」這嘛是鄉民定定用的話語。
．你有夠害，暫時莫佮我講話。 Lí ū-kàu hāi, tsiām-sî mài kah guá kóng-uē.
通常有的人伊若是看著啥物物件，伊會想對較歪的遐去，想對較彼號的方向去，
這个時陣，咱就會當回伊講：「你有夠害，暫時莫佮我講話。」
．這我一定吉。Tse guá it-tīng kiat.
其實咱共這字「吉」遮加一撇，就是「告」，相告的意思。
就是講「這我一定共伊告。」咱刁持共伊講「這我一定共伊吉」。
而且，咱台語的「吉」，佮「搩落去」的「搩」仝音。
．恁阿母敢知影你佇遮發廢文？ Lín a-bú kám tsai-iánn lí tī tsia huat huì-bûn？
彼種無意義、無營養的文章，你閣踮遐寫甲規大篇，實在廢甲對不起你的爸母。
所以會講「恁阿母敢知影你佇遮發廢文？」
二、逐家講台語：網路時代的對話
◎以早互相對話的方式
．對唱tuì-tshiàng『嗆聲』的『嗆』愛寫這字「唱tshiàng」，
華語的『嗆』是借台語音，所寫出來的台語火星文。
．走唱tsáu-tshiàng
．相戰sio-tsiàn
．投稿tâu-kó
．隔轉工keh-tńg-kang：『隔天』
．社論siā-lūn
◎網路時代你來我去真直接
．隨suî、隨時suî-sî：網路對話會當隨回應。隨，就是連鞭，『馬上』，
嘛會當講「隨時按怎」。其實咱講一字就會使矣。
網路對話，上大的特色就是伊會當隨回應，拄著啥物議題，
抑是講看著別人的啥物款的發言、回應的時陣，咱會當隨去表達咱的意見。
這就是網路時代上大的特色。
．藏名tshàng-miâ：『匿名』，共你的名字藏起來。
佇咧回應的時陣，有的人就會考慮講我無想欲予人知影，我本人是啥物人，
無想欲予人知影真正的身分。
這个時陣，咱就會『匿名』，像講面冊也好，抑是PTT也好，
其實你毋知影彼个人是啥人。
．崁名khàm-miâ：『匿名』，就是共你的名字崁起來。
﹡補充：物件是用「藏」的，人走去「覕bih」。
共物件「藏」起來。主動的方向無仝款。
．留話lâu-uē：咱嘛會當講「留言lâu- giân」。
．回應huê-ìng：像講面冊頂頭，一樓一樓，彼攏是回應。
◎網路時代的優點：資訊公開
．證據tsìng-kì/kù：共畫面的圖取落來，這就是「證據」。
．相告sio-kò：「相sio」嘛有另一種音「sann」，「sann- kò」。
相辭、相推，「相」就是互相的意思。
．戶橂hōo-tīng：『門檻』。
過去古早厝，逐間攏嘛有『門檻』，就是門下面懸起來的彼塊仔，叫做『門檻』。
後來咱的厝就已經無彼種物件矣，所以佇咧華語內底，『門檻』這个詞就變做
一个抽象的用法，咱講『進入這個領域的門檻』。
所以咱台語嘛是仝款，咱這馬的厝雖然無「戶橂」矣，毋過，
咱嘛會當共「戶橂」這个詞用來用做抽象的講法。
．唌siânn：引誘、吸引，叫做「唌」
．吸引khip-ín：網路這種活潑的方式，會當唌真濟人來關心社會議題。
．真濟tsin tsē：『很多』，「濟tsē」愛寫這字。
．查證tshâ-tsìng：「查」若是囥佇頭前的時陣，唸做「tshâ」。
像「查證」、「查案」、「查數」等等。
．調查tiâu-tsa：「查」若是囥佇後面，伊唸一个俗音「tsa」。
像講「調查」、「審查」、「追查」。
．刑、刑求hîng, hîng-kiû：
過去彼款資訊較無通光的時代，有予人刑求的這款代誌。
「刑求」佇咱台語內底，咱定定講一字「刑」，
「彼个人去夆刑，刑甲足悽慘的。」
◎罵人的話
．罵mē：是上普通的。
．撟kiāu：垃圾話出來矣，罵甲較歹聽的。
．𧮙 tshoh：彼種無啥物內容，攏垃圾話，彼款就是「𧮙」。
．詈lé：一般就是講「罵甲足嚴重」，若像華語的『辱罵』，
罵甲足歹聽，足嚴重的，無一定講有垃圾話。
．酸sng
．剾洗khau-sé
．供體king-thé
．公然侮辱kong-jiân bú-jio̍k
．誹謗huí-pòng
◎
．實名制si̍t-miâ/bîng-tsè
．節tsat：咱講話的時陣，愛小節（tsat）一下，『限制一下』。
．限度hān-tōo：言論自由要有一个限度。
．防火牆hông-hué-tshiûnn
．盤牆puânn-tshiûnn：中國人怹咧上網的時陣，有的人愛『翻牆』，就是「盤牆」。
三、今仔日的作業：
◎佇網路頂揣鄉民詞、鄉民話，共翻譯做台語，
查辭典看按怎寫才正確，才共寫佇你的面冊，
抑是佇PTT用台語寫出來。
## [2017.10.19《講台語當著時》：台語的文白音](https://youtu.be/_YHYNlkDaCo)
進前的節目有略仔講過矣，逐家會當參考[2017.06. 29《一字多音--台語的文白音佮方言差》](https://youtu.be/AcMuxdCKiwo)彼當時仔略仔介紹，今仔日欲講較詳細。
一、台語的文白音
◎啥物是文白音？
＊字面上的意思：
．文言音、文讀音、讀冊音：用佇書面語、抑是用佇一寡文言詞。
．白話音：用佇口語，抑是日常詞。
＊有系統性：
．有一類的遮的字，無論伊的聲母是啥，抑是伊的聲調是啥，
伊的文讀音的韻母攏是ong，伊的白話音的韻母攏是ang，
in(亻因)攏有系統性的對應。
東 公 空
文-ong tong屏東、 kong公家、 khong空氣、
白-ang tang台東、 kang公的、 khang空空無物件、
(↑母的)
紅 通 凍
文-ong hông讀詩的色水、 thong通知、 tòng冷凍
白-ang âng 口語講âng、 thang毋通、 tang寒甲會凍
．第二逝遮的字，無論伊的聲母是啥，抑是伊的聲調是啥，
伊的文音的攏有“u”的韻母，伊的白話音攏有“oo”的韻母。
雨 斧 扶
文 -u ú 雨水、 hú 、 hû 扶持、
白 -oo hōo落雨、 póo斧頭、 phôo足gâu共人扶、
.
夫 麩 傅
文 -u hu 丈夫、 hu 麥麩、 hū師傅
白 -oo poo(埔) 、 phoo頭麩『頭皮屑』、 pòo姓傅
↑查埔的埔，現在咱無寫「夫」。
.
文白音的系統毋是干焦台語有，真濟漢語下面的語言，伊攏有
文音和白音的對應，毋過因為台語的歷史真長，所以保存甲
誠完整，是台語一个真要緊的特色。
◎文白音的功能：
＊伊會當區分使用的時機，這个時機咱用文音，彼的情形咱用白音。
．無可能完全全部使用每一字的文言音：干焦讀古典詩文以外，
除非你佇讀詩，抑是咧讀古文，這个時陣，你才會有可能全部攏用每一字的文言音。
若是日常佇咧講話的時陣，抑是你咧唸文章，基本上無可能全部用文音。
．無可能攏白音：書面語詞進入口語
咱若是咧開講的時陣，敢有可能全部用白話音？
其實嘛無可能。
就算是你開講，你嘛無可能全部用白話音，其實已經有足濟
書面語 (su-bīn-gí)進入咱的口語。像拄才講的「書面」語。
＊另外一个功能：區分語義
A.仝一字的文音的意思，佮白音的意思無仝款，分甲足明的，
文音佮白音的意思完全無仝款。
．數(文) sòo ：數目
(白) siàu ：算數，唸白話音，一定攏是指”數目siàu-ba̍k”。
．管(文) kuán：我共管你；管理
(白) kńg ：血管hueh/huih-kńg；
肺管hì-kńg
．插(文) tshap：我無愛插你。較抽象
(白) tshah：共物件插入去。這个動作，較具體。
．分(文) hun：較抽象，分開hun-khui、分別hun-pia̍t
(白) pun：物件分予--你；囡仔共人分的。
.
．數(文) sòo ：攏是數字sòo-jī/-lī
數目sòo-bo̍k
數學sòo-ha̍k
分數hun-sòo
禮數lé-sòo (數字觀念的延伸)
氣數kì-sòo
人數lâng-sòo
步數pōo-sòo：這个詞誠口語，毋過伊是用文音。
．數(白) siàu： 數目siàu-ba̍k
數單siàu-tuann
算數sǹg-siàu
討數thó-siàu
拄數tú-siàu
數想siàu-siūnn：用“數siàu”的概念，變做一直想，
逐家愛注意，伊有較無好的意思。
數念siàu-liām：一直念，就是思念，較正面的。
．插(文) tshap：插代誌tshap-tāi-tsì
毋插你m̄-tshap--lí
相交插sio-kau-tshap
插一跤tshap--tsi̍t-kha
插手tshap-tshiú：這件代誌你莫「插手」。
．插(白) tshah：扶插hû-tshah
安插an-tshah
插花tshah-hue
插起來tshah--khì-iâi
插頭tshah-thâu
穿插tshīng-tshah
B.有當時仔，無分甲遐爾清楚，有可能文音和白音，伊的意思有仝款的所在，
只是咱慣勢按呢用爾爾。
“力(文) li̍k”佮“(白) la̍t”，文白音攏有力量、氣力的意思。
．力(文) li̍k ：力量li̍k-liōng
權力khuân-li̍k
盡力tsīn-li̍k
電力tiān-li̍k
實力si̍t-li̍k
法力huat-li̍k
壓力ap-li̍k
．力(白) la̍t ：力頭la̍t-thâu
氣力khuì-la̍t
出力tshut-la̍t
有力ū-la̍t
體力thé-la̍t
食力tsia̍h-la̍t
骨力kut-la̍t
．光(文) kong：光明kong-bîng
光榮kong-îng
觀光kuan-kong
眼光gán-kong
電光tiān-kong
精光tsing-kong：足口語的，毋過伊是文言音。
兩光lióng-kong：足口語的，毋過伊是文言音。
．光(白) kng：天光thinn-kng
光線kng-suànn
月光gue̍h/ge̍h-kng
發光huat-kng
通光thang-kng
光頭kng-thâu
光滑kng-ku̍t
「光明」的“光kong”和「天光」、「光線」的“光kng”意思略仔仝款，
一个較抽象，一个較具體，伊的功能有區分，毋過其實無分甲遐爾清楚。
以上是慣勢按呢用的文、白音。
C.有當時仔，文音和白音的選擇，無遐爾一定，會無啥仝款。
．放(文) hòng：放棄hòng-khì
開放khai-hòng
釋放sik-hòng
排放pâi-hòng
放心hòng-sim
放送hòng-sàng (送：白話音)：la-jí-ooh咧放送。
放放hòng-hòng：較口語。
表示一个人無啥要意這个代誌，激放放。
．放(白) pàng：放手pàng-tshiú
放捒pàng-sak
放刁pàng-tiau：共人刁難。
放冗pàng-līng
放火pàng-hué
放假pàng-ká/-kà：較抽象。
放毒pàng-to̍k：較抽象。
毒(文) to̍k：名詞、形容詞
毒(白) thāu：動詞
．開(文) khai：公開kong-khai
開放khai-hòng
開發khai-huat
開基khai-ki
開始khai-sí
開講khai-káng：已經是較口語的，仝款用文音。
開錢khai-tsînn：已經是較口語的，仝款用文音。
．開(白) khui：開門khui-mn̂g
必開pit--khui
開花khui-hue
開刀khui-to
開市khui-tshī
開戶khui-hōo
開開khui-khui
「開始」佮「開市」，意思略仔仝款，
毋過「開始」的「開khai」咱用文音，
佇咧「開市」的「開khui」咱就用白話音。
.
◎台語毋是古代的語言
＊是歷史真長，語言內底有底層的詞（就是講毋是漢語的詞），
毋過，伊有保留足濟古音的特色。
像講咱有當時仔讀詩，攏愛用台語來讀，才會鬥句，才會押韻。
．獨自莫憑欄（lân），
無限江山（san），
別時容易見時難（lân）。
流水落花春去也，
天上人間（kan）。 註：《浪淘沙》李煜 〈簾外雨潺潺〉
你若是用華語來唸，最後一字『間ㄐㄧㄢ』就和頭前的「欄、山、難」無鬥句。
若是用台語，「欄、山、難、間」，伊就有鬥句，聽起來就是較好聽。
敢所有的詩你用台語唸攏鬥句？不一定喔！
．少小離家老大回（huê），
鄉音無改鬢毛摧（tshui）。
兒童相見不相識（sik），
笑問客從何處來（lâi）。 註：《回鄉偶書》唐．賀知章
第二句佮第四句一定要鬥句。
若是用華語唸『摧』佮『來』，無鬥句，
用台語唸，“摧（tshui）”佮“來（lâi）”，仝款無鬥句啊！
所以語音是會變化的，當時彼的時陣有鬥句，無表示講伊未來嘛一定攏會鬥句。
所以台語毋是古代的語言，伊只是變化真長，毋過因為伊有真濟古音的特色，
所以伊會當唸古詩的時陣，有鬥句的機會較懸。
二、逐家講台語：非核家園佮綠電
．核能hi̍k-lîng：核有兩个音，文音hi̍k，白話音hu̍t。
這个詞較書面語，所以用“核hi̍k”，文言音。
．核電hi̍k-tiān
．核廢料hi̍k-huì-liāu
．發電廠huat-tiān-tshiúnn
．石門Tsio̍h-mn̂g：第一座核能發電廠
．萬里Bān-lí：第二座核能發電廠
．墾丁Khún-ting：第三座核能發電廠
★貢寮Không-á-liâu：第四座本來欲運作矣，後來就停起來，封存。
．蘭嶼Lân-sū：低階的核廢料囥佇咧遮。
．綠電li̍k-tiān：綠色的能源。
．清氣tshing-khì：綠電是伊使用開發的過程當中，伊較清氣。
．汙染u-jiám
．僫oh：有慢，有無簡單的意思。
這件代誌欲等伊做甲好，真僫。
這件代誌僫講。『這件事情很難說。』
．歹pháinn：像講物件歹去，害去，抑是講這个人是一个歹人。
伊共伊歹。
．能源lîng-guân
．火力hué-li̍k
．燃火炭hiânn hué-thuànn：就是咱火力的發電所使用的方式。
“燃hiânn”就是『燒』，“火炭hué-thuànn”就是『煤炭』。
像講「燃滾水」、「燃柴」，嘛是用“燃hiânn”。
．水力tsuí-li̍k：“水tsuí“咱用白話音，“力li̍k”煞用文言音，咱攏慣勢按呢講。
．懸低差kuân-kē tsha：水力的原理是啥？懸低差。
水對懸的所在到低的所在產生的動能。
．洋流iûnn-lâu (白話音) / iông-liû(文音)：未來等咱去開發的物件。
兩種攏會使，未來可能其中有一種會變做逐家較慣勢講的。
目前這兩種音攏有人咧講。
．太陽能thài-iông-lîng
．日頭猛ji̍t-thâu mé：『太陽很大』。
猛mé：一个人跤手真“猛mé”。
．地熱tē-jia̍t：因為台灣是一个海島，而且有真濟火山，
地熱是一个咱會當開發的能源。
．燒氣sio-khì：地熱(tē-jia̍t)所產生的物件，叫「燒氣sio-khì」。
．風力hong-li̍k：佇咧發電的時陣，是利用一个大風扇，伊就一直轉踅
一直轉踅一直轉踅，就會產生足大的噪音。
．轉踅tńg-se̍h
．噪音tshò-im：十分的噪人耳，予人感覺有夠吵的，有夠艱苦。
所以有當時仔，愛佇咧較偏遠的所在才較會使。
．電力開發tiān-li̍k khai-huat
．改革kái-kik
．集中tsi̍p-tiong：這馬的電廠攏是大電廠，所以伊會較集中。
．分散hun-suànn：未來咱希望咱的電力會當較分散。
分散的時陣，若是跳電，抑是一个電廠、兩个電廠害去，就較無要緊。
．壟斷lóng-tuān：才袂遮的電力，攏予大企業壟斷。
．飼電tshī-tiān：分散的電力欲按怎處理，欲按怎開發，就是每一个細的所在攏會當飼電。
『養電』。
．失電sit-tiān：『停電』。
三、今仔日的作業：
◎揣一項綠電，佇網路查資料了解伊的發電原理，解說予人聽。
拄著有兩種音的字，先去辭典查看覓敢是文白音，
若是，想看覓用佗一音較好。
## [2017.10.26《講台語當著時》：俗語佮諺語](https://youtu.be/QtRoJWzQUmA)
一、俗語佮諺語 sio̍k-gí/gú kah gān-gí/gú
是語言內底足媠又閣足有道理的話句，就是因為伊有道理，而且閣好聽、好講，
所以伊會流傳足久，到現代咱嘛是定定用會著。
◎上班生活用會著Siōng-pan sing-ua̍h iōng ē tio̍h
＊一暗無眠，三暗補袂盡。
Tsi̍t àm bô-bîn, sann àm póo buē-tsīn.
「無眠」就是睏了無夠，抑是睏了無好，睏眠無夠的意思。
你若是一暗睏了無好，抑是睏眠無夠的時陣，你就算補三眠，補三暗，
你嘛補袂起來。
．A：你若會按呢最近看起來，遮無精神？你是昨昏傷晏睏諾？
B：啥物昨昏？是昨日傷晏睏，人講：「一暗無眠，三暗補袂盡。」
所以我到今仔日猶閣咧踅神。
逐家咧上班的時陣，一定是定定會用著。
＊三做四毋著。
Sann tsò sì m̄-tio̍h.
你做三改，有四項做毋著，就是你一直做毋著。
有當時仔，人若是拄才出社會的時陣，難免無經驗，所以咱就會當講：
你對伊就愛較有耐心咧，伊雖然按呢「三做四毋著」，啊毋過伊就拄仔出社會嘛，
較有耐心共伊牽教，未來會較好啦！
＊一人主張，毋值兩人思量。
Tsi̍t lâng tsú-tiunn, m̄-ta̍t nn̄g lâng su-niû.
「思量」就是「考慮」，同齊想的意思。
有當時仔，你家己一个人踮遐咧硞硞想，硞硞想，你實在想袂出來，
你想一个企畫案，已經想規早起矣，一字就孵袂出來，按呢欲按怎咧？
你看著你的同事踮遐咧足煩惱的，你就會當共伊講：
莫按呢啦！你按呢家己一个人想，人講：「一人主張，毋值兩人思量。」
我下晡拄仔好有閒，咱來會議室討論一下，無的確咱就會想出一个真好的企畫
嘛無一定。
＊無趁湯，無趁粒。
Bô than thng, bô than lia̍p.
「趁」就是「趁錢」。一碗湯內底，「湯」以外，內底的物件就是「粒」。
『料』就是「粒lia̍p」。若是「無趁湯，無趁粒」，就是啥物都無趁，
攏總無趁的意思。
啥物款情形之下，會「無趁湯，無趁粒。」？
就是彼種義務性的，像講真濟人共NGO鬥做工課。
．彼个人伊為著社會議題，付出有夠濟，做足濟工課，而且伊攏無趁湯，
無趁粒呢，予人實在感覺足欽佩的。
＊一暝全頭路，天光無半步。
Tsi̍t mê/mî tsuân thâu-lōo, thinn-kng bô-puànn-pōo.
這可能嘛是真濟人的心聲。「一暝」就是「規暗」，「全頭路」就是講我明仔載
欲創啥創啥，我未來欲做啥物計畫啦，抑是講我明年的時陣，我一定愛按怎按怎，
規暗講甲按呢袂輸伊明仔載開始，就欲做啥物大事業仝款，結果，天光無半步，
第二工起來了後，啥物代誌攏無想欲做。
◎批評別人用會著Phue-phîng pa̍t-lâng iōng ē tio̍h
＊一句話三角六尖。
Tsi̍t kù uē sann-kak-la̍k-tsiam.
一句話三尖六角。
Tsi̍t kù uē sann-tsiam-la̍k-kak.
攏有人講。
有的人講話，毋好好仔講，遮欲共人剾一下，遐欲共人供體一下，講話掛刺，
聽著予人足袂爽快的。咱就會當講：
伊彼个人就是逐改講話，見擺講話，就是「一句話三角六尖」，所以人就較無愛
和伊討論代誌，就是按呢。
＊家己想，家己著。
Ka-kī siūnn, ka-kī tio̍h.
伊家己想的，伊家己認為伊家己想的攏著。
兩種情形：
A.華語講的『自以為是』。
伊攏「家己想，家己著」的，伊攏毋免問別人的意見。
B.講人做代誌較頇顢，你猶毋去共人問，毋去查資料，你就踮遐「家己想，
家己著」，若是毋著欲按怎？
＊食飯攑碗公，做工課閃西風。
Tsia̍h-pn̄g gia̍h uánn-kong, tsò khang-khuè siám se-hong.
講著食飯的時陣，碗公就攑來矣，趕欲食，食較濟咧，所以愛捀碗公。
啊若做工課，西風會冷，「閃西風」就是因為伊會冷、會寒，所以伊愛閃西風。
若是講著工課，伊就身體足虛、足荏的，會驚寒，會無爽快，會無拄好。
A：彼个阿明仔，伊拄才毋是猶閣好好，啊哪這馬看起來人若像無啥爽快唅？
B：伊彼个人「食飯攑碗公，做工課閃西風。」啦！拄才逐家咧食飯開講的時陣，
伊免講嘛人好好，這馬開始欲做工課矣，就一个人形攏變去矣。
這就是罵人的。
＊你看我浮浮，我看你霧霧。
Lí khuànn guá phû-phû, guá khuánn lí bū-bū.
「浮浮」佮「霧霧」攏是看無啥清楚。其實就是看人無，看人袂起的意思。
你看我浮浮，你看我袂起，按呢我嘛看你霧霧，我嘛看你袂起。
有的人若是講對你較無客氣，敢若像對你的態度無講蓋偌好，咱頭仔開始
就忍一下嘛，忍到尾仔忍袂牢，你想欲共唱轉去的時陣，你就會當講：
你看我浮浮，我嘛看你霧霧。你莫叫是講我攏無佮你計較，你就會當用這種態度
佮我講話喔！
＊上踏枋上眠床，無洗跤睏中央。
Tsiūnn ta̍h-pang, tsiūnn bîn-tshn̂g, bô sé kha, khùn tiong-ng.
踏枋，古早的彼號柴的紅眠床，伊下面有一个會當予你踏起去，再上眠床的踏枋，
予你架跤用的。
踏枋踏起去了後，就“足百”起去眠床頂，“足百”起去眠床頂無打緊，伊閣無洗跤，
無洗跤無打緊喔，伊閣睏佇咧中央。
就是講一个人華語講的『得寸進尺』，軟土深掘的意思。
像講有當時仔，咱好心借同事一寡物件，同事共你講：你彼枝筆會當借我一下無？
你講：好啊，無問題，你家己提。一改、兩改了後，伊毋但是共你提你的筆，
提你的theh-puh（膠帶），提你桌頂的物件，甚至共你屜仔（thuah-á）
挩（thuah）開，內底的四秀仔攏家己提來食，傷超過矣啦！你就會當講：
今你這馬是按怎？上踏枋上眠床，無洗跤睏中央，你按呢傷過份矣！
就是講這个人做代誌，傷過超過，傷過食人夠夠的意思就著矣。
◎互相鼓勵用會著 Hōo-siong kóo-lē iōng ē tio̍h
＊大格雞慢啼。Tuā keh ke bān thî.
格，就是體格。「大格」就是有的雞仔，伊生了體格較好，較大隻的彼種大格雞，
伊叫的時間會較慢。華語講『大器晚成』，咱就會當講「大格雞慢啼」。
有當時仔，有一寡社會上拄出社會的人，可能頭仔開始，無啥物表現，毋過
有的人有眼光，伊就看會出來，這个人未來有前途。你就會當講：
你莫看伊這馬無啥表現，我感覺伊是「大格雞慢啼」，五年以後，你才共看，
伊一定表現甲足好的。
＊荏荏馬嘛有一步踢。
Lám-lám-bé mā ū tsi̍t pōo that.
荏，就是虛弱的意思。「荏荏馬」就是無啥物氣力的馬，走袂緊這種的。
「嘛有一步踢」就是講伊較按怎虛弱，較按怎䆀，原仔會曉一項代誌，就是
伊會曉踢。意思就是講
一个人就算講你足濟欠點，人嫌你這也無好，彼也無好，至少無論按怎，
你一定攏有你𠢕的所在，有你會當發揮的所在。這是會當共人鼓勵的。
雖然你是今仔來這个單位，可能袂慣勢，所以表現了無好，毋過
人講「荏荏馬嘛有一步踢」你毋免對家己遮爾仔無信心。
＊法蘭西水，食一點氣。Huat-lân-se-tsuí, tsia̍h tsi̍t-tiám khuì.
「法蘭西水」就是「汽水」。因為古早台灣人感覺講「汽水」是對法國傳來的，
所以「汽水」閣叫做「法蘭西水」。「汽水」就是有氣嘛，
「食一點氣」意思就是講我這是一个有志氣的人，這件代誌我袂認輸，
「法蘭西水，食一點氣」，我才無愛佮伊向頭咧！我也無做毋著矣，
是按怎欲叫我去和伊會失禮？
＊問甲有一枝柄通夯。Mn̄g kah ū tsi̍t ki pènn/pìnn thang giâ.
柄，像講斧頭，抑是柴刀，彼支柴的彼枝，叫做「柄」。
咱講一个人伊足愛問問題，啥物代誌伊攏欲問甲足清楚，問甲有夠幼，
華語講『追根究柢』，這種情形，咱就會當講：
「伊問甲有一枝柄通夯。」本來無物件的，問甲予伊有一枝柄通夯，
就是問甲有夠詳細的意思。
．伊這个人對啥物代誌攏足好玄的，逐改攏問甲有一枝柄通夯。
＊媠，媠無十全；䆀，䆀無加圇。Suí, suí bô tsa̍p-tsn̂g, bái, bái bô ka-ｎn̂g.
十全tsa̍p-tsn̂g，就是完全、周至的意思。加圇：仝款是完整的意思。
媠，毋管人媠，抑是能力好，媠的人，伊無可能啥物攏好，䆀的人，
伊嘛無可能啥物攏䆀。
其實這和「荏荏馬嘛有一步踢」意思差不多，有略仔仝款。
◎講一寡仔人生道理 Kóng tsi̍t-kuá-á jîn-sing tō-lí.
＊暗頓減食一口，活甲九十九。
Àm-tǹg kiám tsia̍h tsi̍t kháu, ua̍h kah káu tsa̍p káu.
暗頓毋好食傷濟，這和這馬減肥的觀念有相倚。
＊咱無踏伊的尾，伊無咬咱的跤。Lán bô ta̍h i ê bué, i bô kā lán ê kha.
這是咧講”蛇”。蛇，咱若是無踏伊的尾，其實蛇袂主動攻擊人。
咱莫看著蛇，就感覺伊足歹的，其實咱先共伊踏著，伊才會想欲共你咬。
講蛇以外，咱嘛會當引伸做講，你莫去共別人惹，人嘛袂來共你按怎。
＊寄錢會減，寄話會加。Kià tsînn ē kiám, kià-uē ē ke.
寄，委託的意思。你若是寄錢予人，彼錢會愈來愈少。
你若是叫人共你講話、傳話的時陣，彼話會那來那濟。意思就是會走精去，
無好的話就會出來。
＊嚴官府出厚賊，嚴爸母出阿里不達。
Giâm kuann-hú tshut kāu tsha̍t; giâm pē-bú tshut a-lí-put-ta̍t.
這句可能逐家較捷聽著，其實有當時仔，你管甲愈嚴愈無好。
＊偷拈偷捻，一世人欠。Thau ni thau liàm, tsi̍t-sì-lâng khiàm.
偷拈偷捻就是『貪小便宜』，『貪小便宜』的人，一世人就會欠缺。
◎生活中不時有俗諺語 Sing-ua̍h tiong put-sî ū sio̍k gān-gí
＊兩个仔噴噴。N n̄g ê á phùn-phùn.就是講人足少的。
像這个活動辦甲遐爾仔大，結果來的人兩个仔噴噴爾爾。
咱嘛會當講「兩个仔“扌甩”“扌甩“ 」（Nn̄g ê á hiù-hiù.）
＊破船過海較贏泅。Phuà tsûn kuè-hái khah iânn siû.
一隻破船予你，予你去過海，雖然有夠無好用，毋過，至少比你家己泅較好。
＊狗無嫌主人散。Káu bô hiâm tsú-lâng sàn.
因為狗仔對咱有情有義，伊才袂嫌講你主人散食抑是好額。
＊烏貓白肚，趁錢藏無路。Oo-niau pe̍h-tōo, thàn-tsînn tshàng bô lōo.
烏貓這款貓仔，若是肚閣白白，你若是飼著這種貓，伊就會予你趁錢，
趁甲藏無路，所以飼這種貓足好的。
＊趕人生，趕人死，趕人食飯無情理。
Kuánn lâng senn/sinn, kuánn lâng sí, kuánn lâng tsia̍h pn̄g bô tsîng-lí.
你欲趕人生嘛會使，你欲趕人死嘛會使，毋過你趕人食飯就無情理矣。
意思就是講「食飯皇帝大」。Tsia̍h-pn̄g hông-tè tuā.
二、逐家講台語：家己煮食ka-kī tsú-tsia̍h
．煮食tsú-tsia̍h：『烹飪』
．碗箸uánn-tī：『碗筷』
．斟酌tsim-tsiok：做代誌愛較斟酌咧。
『小心』叫做斟酌。佮華語的『斟酌』意思無啥仝款。
．擲㧒捔tàn-hiat-ka̍k：『把東西丟掉』，嘛有人講「擲㧒捔tàn-hiak-ka̍k」音無仝款。
嘛有人講「擲挕捒」，你嘛會當講「擲掉」
．挕捒hìnn-sak，嘛會當講「挕掉」
這五个字有幾若種無仝款的組合，意思攏是共物件擲掉、擲挕捒、挕捒的意思。
．重鹹tāng-kiâm：就是較鹹，這个用「重tāng」。
．濟油tsē iû：油較濟，這个用「濟tsē」。
．果子的湯誠濟，咱講「厚湯kāu thng」。
這是咱台語的慣勢（按呢講）。
．鹹汫kiâm-tsiánn：『鹹淡』。汫tsiánn，『口味很淡』
．薟薑仔hiam-kiunn-á：『辣椒』，嘛有人講「番huan」薑仔。
．電鍋tiān-ue / tiān-ko：「ue」佮「ko」是「鍋」的文白音。
．炊卵tshue-nn̄g：電鍋會當炊卵，炊卵足好食的，囡仔嘛足愛食的。
．飯坩pn̄g-khann：電鍋內底煮飯的彼的鼎，彼的物件，咱台語叫做「飯坩」。
所以咱會當講煮好的飯，叫做一坩飯。「一坩飯坩」。
．雜菜炊tsa̍p-tshài-tshue：『什錦麵』、『什錦炊』、『什錦湯』的『什錦』，
台語就是「雜菜」。
外口有人咧賣「雜菜糜」、「雜菜麵」攏是這个「雜菜」。
．電烘箱tiān-hang-siunn：『烤箱』。
．囥khǹg：共物件囥起去，『放著』。『放』就是「囥」。
．下hē：像講咱佇湯內底，『放一點鹽』，台語袂當講「囥」一寡鹽，
台語愛講「下hē」一寡鹽，抑是講「下hē」一寡糖，這个時陣愛用「下hē」。
．摻tsham：若是欲囥香菇，抑是芫荽，這款配料的時陣，咱就會講「摻tsham」。
這个菜內底，炒這項菜，咱共摻一寡香菇，抑是講摻一寡薟薑仔，這个時陣，
咱就是用「摻」。
．糝sám：糝胡椒粉，胡椒粉就是用「糝sám」的。
．抐lā：比如講一鼎湯，你去共抐抐咧，本身咧「抐lā」，嘛免足出力。
．攪kiáu：內底一定愛有兩項物件，像講「飯佮豆油」，抑是講「飯佮肉醬」，
這愛出力，愛攪予齊勻，這是「攪」。
．濫lām：『混合』，譬如講「鹹的佮甜的，你共濫做伙。」，
抑是講「這項菜佮彼項菜，你共濫做伙。」
．透thàu：除了「濫」做伙以外，伊有彼種混合的意思。
像講「燒的佮冷的，最後變做溫的」，這就是「透thàu」，像燒水透冷水。抑是講
「這兩鼎仝款的物件，一鼎較鹹，一鼎較汫，你共兩鼎透做伙，混合起來，
就變做鹹汫仝款矣。」這就是叫做「透thàu」。
★這八个動詞，是台語真特殊的動詞，逐家會當共學起來。
．家私ke-si：『工具』
．麥片be̍h-phìnn：早頓會當食「麥片」。
．撇步phiat-pōo：煮食有真濟「撇步」。
．分貯hun-té：『分裝』。
．敨放壓力tháu-pàng ap-li̍k：『釋放壓力』。「敨tháu」就是共物件敨開的「敨」。
三、今仔日的作業：
1.共今仔日學著的諺語使用佇生活中，嘛會當寫佇面冊佮人分享。
2.共你家己煮食的食譜講予人聽，袂曉煮食的人假影你會曉，用想的來編。
## [2017.11.02《講台語當著時》：歌仔冊佮歌仔戲劇本](https://youtu.be/KAZcOeefAFU)
這集上蓋重要的觀念是台語文學佮台灣文學是兩个無仝款的觀念。
這个主題，咱進前佇咧介紹《台語文書寫》的時陣，已經有略仔介紹過矣，
佇咧[2017.07.20《講台語當著時》：台語文書寫](https://youtu.be/oN35geyeaRI) 的節目，逐家會當去揣看覓矣
今仔日咱欲實際上取一段歌仔冊，佮取一段歌仔戲的劇本，𤆬逐家來讀一下。
一、歌仔冊佮歌仔戲劇本
◎歌仔冊：十月花胎病囝歌
「花胎」就是「有身」，「病囝」就是『害喜』。
歌仔冊原本的用字，和逐家這馬看著的，無啥仝款，已經照教育部的漢字共伊改寫過矣。
．逐家來聽這條代，我今欲來唸花胎，
．養育兩字艱苦代，予恁逐家攏總知。（開頭較簡單）
．我今欲來唸出聲，勸恁列位朋友兄，
．我唸花胎是有影，恁今著來詳細聽。
（為著欲鬥句，講一寡廢話，這是一个開場。）
＊正月花胎龍眼大，爸母有身大受磨，
正月的時陣，囡仔親像龍眼遐爾仔大爾。
其實是老母有身，老爸曷無按怎矣。「大受磨」是講伊足艱苦的。開始有身了後，
查某人做阿母的，身體就開始有一寡變化，就會真無爽快。
．袂食欲吐真罪過，真真艱苦無快活。
「罪過」就是咱講的「艱苦罪過（kan-khóo-tsē-kuà）」，
「無快活」就是足無爽快。
＊二月花胎肚圓圓，一粒宛然若荔枝，
拄才是龍眼，這馬是荔枝，較大粒矣。
．田螺吐囝為囝死，生囝性命佇水墘。
「田螺吐囝為囝死」這是一句俗語，就是講老母為著囡仔，真正是付出性命。
「水墘」就是『水邊』，「墘」就是邊仔。
「性命佇水墘」就是講性命隨時有危險，尤其是古早，生產是真無簡單的代誌。
＊三月花胎人真𤺪，爸母懷胎艱苦憐，
「𤺪」就是『疲倦』。仝款喔，佮老爸無底代，攏是老母咧艱苦。
．跤痠手軟規身變，倒落眠床硞硞遷。
「跤痠手軟」咱較捷講，規身軀攏無仝款去矣。
倒佇咧眠床，反過來，反過去，因為艱苦你一定會反來反去硞硞遷。
＊四月花胎分跤手，肚尾親像生肉瘤，
四月的時陣，囡仔伊的跤佮手，已經分會出來。足奇怪，古早人哪會知影乎？
「肚尾親像生肉瘤」，因為愈來愈大粒矣。
．為著生囝難得求，三分腹肚不時憂。
原來這个阿母進前，為著欲生囝，可能足久才有身，所以伊就足煩惱足煩惱按呢。
＊五月花胎分鼻喙，好物任食都袂肥，
五月的時陣，囡仔的鼻佮喙，已經分會出來。
這个阿母，好食的物件按怎食都袂肥，因為囡仔替伊鬥食矣。
．跤盤宛然若膭水，腰骨親像咧必開。
跤盤，就是『腳踝』、『腳背』彼的所在。
膭水，就是『水腫』，因為有身的人伊會膭水（kuī-tsuí）。
腰骨會痠，因為腹肚大粒矣，所以腰的負擔就會較大。
＊六月花胎分男女，恐驚胎神會參差（tsham-tshu），
六月的時陣，這个囡仔是查埔的，抑是查某的，就看會出來。
胎神是古早的人感覺講這个囡仔，有一个囡仔神，胎嘛有一个胎神，就是講
伊若是無拄好的時陣，你可能母體母身就會無安穩。
．三分若是有世事，淨符緊食結身軀。
三分，就是萬不二。萬一有啥物代誌的時陣，你就愛去求符仔，符仔愛食，
愛共伊結佇咧身軀。
＊七月花胎會徙位，一日一日大肚胿，
到七月的時陣，這个囡仔會振動矣，所以伊就會徙位。
「大肚胿」就是大腹肚。
．行著有時大心氣，一个腹肚圓錐錐。
大心氣，就是『心悸』，行路行行咧，有當時仔就會『心悸』。
一个腹肚足圓的，圓錐錐（înn-tsui-tsui）。
＊八月花胎肚膨膨，早暗代誌著知防，
肚就開始膨起來矣，你都愛知影愛預防矣。
．這號艱苦毋敢講，穡頭著叫人鬥摸。
穡頭，就是『工作』。你平常時仔咧做的遮的工課，你就毋好閣做矣，
你愛叫人鬥摸。這个「摸bong」就是做工課的意思。
(後面猶閣有，猶閣足長的，這段就先看到遮。)
◎歌仔戲劇本：《金銀天狗》
kua-á-hì kio̍k-pún：《Kim-gîn thian-káu》
是早期內台歌仔戲時代，拱樂社歌仔戲的劇本。這个故事有夠長，會當演十工。
其中幾个主角是素秋、玉嬋佮玉郎，三个人有一个三角戀情。
這段就是按怎咧？素秋佮玉嬋攏佮意玉郎，所以素秋佮玉嬋兩个人就佇咧輸贏。
兩个查某欲按怎輸贏？毋是冤家，對答，對答的內容是啥？
就是這段歌仔戲劇本的內容。
＊素秋、玉嬋、玉郎的三角戀情
素秋：我問你若是知影，月娘叫做啥物名，
月宮牌匾掛正正，有寫啥字講我聽。
玉嬋：你問無講也袂用(iōng)，兩虎相爭有一傷，
名叫嫦娥免相嚷，牌匾有寫廣寒宮。
﹡用「iōng」，毋是唸「īng」，是為著和「傷siong」、「嚷jióng」、
「宮kiong」鬥句。
素秋：果然小姐有拍算，文章飽腹﹡真十全，tsa̍p-tsn̂g
我欲閣再共你問，啥仙咧顧南天門。
﹡飽腹pá-pak：足有學問。
玉嬋：報予你知較利便，去把(pé)南門猴齊天，
東門李靖顧袂𤺪，我無共你亂主言﹡。
﹡亂主言：烏白講的意思。這个「主」佇歌仔戲內底，是一个慣勢的用法。
素秋：一句最後問詳細，對著閣輸你一个，
西北毋知啥人把(pé)，請你講出毋通推。
玉嬋：你問我就共你講，題目出去足成通，
關公顧北上妥當，去把(pé)西門上帝公。
素秋：柴梳啥設若知影，才來讓你結親情，
啥人代先設頷領，請你講出予我聽。
﹡柴梳tshâ-se：捋仔lua̍h-á。設siat：發明的意思。
是啥人共捋仔發明出來？頷領是啥人發明的咧？
玉嬋：這號毋是咧滾笑，來設柴梳女仔腰， lú-á-io
設了頷領毋免臆，女媧娘娘無毋著。 lú-o niû-niû
素秋：毋知啥人來設粉，閣再設鼎予人𤉙(kûn)，
敢來你著臆(ioh)會準，才免予人趕出門。
﹡粉hún：胭脂水粉。粉佮鼎(tiánn)是啥人發明的咧？
玉嬋：雖然我是田庄囝，敢來定著我毋驚，
七寶仙君來設鼎，五娘設粉上出名。
(這段咱就先講到遮，因為歌仔戲的劇本足長的。)
歌仔戲是一个綴時代咧行的戲劇，所以，彼當時仔的社會，一寡現象佮氣氛，
歌仔戲攏看會著。
◎綴流行的歌仔戲
仝款一齣戲內底的口白，這毋是用唱的，是用唸的。
．法律可比若電氣，每日身邊有電愛見知，
若無斟酌電著是會死，這是無法通改移。
．弱者你的名字是女人，查某世間夆看輕，
這是社會有公認，你嘛帶念佮我有成親。
﹡會出現「弱者你的名字是女人」遮爾仔現代的一个詞，因為彼是彼的時代，
文壇一篇真有名的文章。
所以講歌仔戲伊是會綴時代咧行的，就是因為按呢，歌仔戲一直到這馬，
攏是一个真受歡迎的傳統戲劇。
二、逐家講台語：台語文學
＊台語文學Tâi-gí bûn-ha̍k：用台語這个語言，佮語言的文字，漢字也好，羅馬字也好，
所寫的文學作品，才會當叫做《台語文學》。
＊台灣文學Tâi-uân bûn-ha̍k：範圍真闊，內底有真濟種語言，有華語、客語、台語、
原住民族語，所書寫的，佮台灣有關係的代誌，抑是講台灣人寫的文學作品，
攏會當叫做《台灣文學》。
﹡台語文學佮台灣文學是兩个無仝款的觀念。
﹡台語文學是台灣文學的一種，毋過，台灣文學內底，毋是全部攏是台語文學。
．口傳文學kháu-thuân bûn-ha̍k：像「歌仔冊」。
．主體性tsú-thé-sìng：咱愛建立台灣文學的主體性。
．定義tīng-gī：定義有兩種，一種是較廣義，一種是狹義。
．廣義kóng-gī：像「台灣文學」的範圍真闊。
．狹義e̍h-gī：因為真狹。
．口語kháu-gí：這真簡單，真接唸伊的漢字就會使矣。
．書面語su-bīn-gí：這真簡單，真接唸伊的漢字就會使矣。
．詩si
．散文suànn-bûn / sàn-bûn
．小說sió-suat / siáu-suat：仝款文白音，兩種攏有人講。
．評論phîng-lūn
．劇本kio̍k-pún
﹡遮的，這馬已經有台語的文學作品，有遮濟的內容。
．舌尖tsi̍h-tsiam
．筆尖pit-tsiam
◎有咧寫台語文學作品的評論，抑是寫台語文學史的人：
．廖瑞銘Liāu Suī-bîng：
．施俊州Si Tsùn-tsiu
．林央敏Lîm Iong-bín
﹡這幾位先輩，攏有寫台語文學相關的評論。
◎台語文學作品：陳明仁《流浪記事》節錄：一首台語詩
．離開台灣
．離開我的gín-á時代
．故鄉早就tī心內pha荒
．Kan-na菅芒花
．開tī門前
．風吹白白
．Tân bē出有厝bē得tńg
．烏名單ê心事
﹡原來這首詩是佇咧講「烏名單」。
﹡pha荒(hng)：已經荒廢去矣，廢廢去矣，已經袂記得矣，過去的代誌矣。
﹡kan-na：『只有』。
﹡菅芒花kuann-bâng-hue：『蘆葦』。
﹡tân：就是『響』。像「tân雷公」、「喇叭咧tân」、「la-ji-ooh咧tân」
攏會當用這个「tân」。
﹡有厝bē得tńg：啥物人會「有厝bē得tńg」咧？就是烏名單的人士。
．M̄知啥人咧pûn phín-á
．Gín-á時代ê菅芒
．搖搖弄弄teh招--我
．艱苦iah是tshiau-hua
．總--是故鄉
．無，去巡看māi
．曾文溪ê溪kînn
．風吹菅芒花白白
﹡pûn phín-á：pûn，就是『吹』，phín-á，就是『笛子』。
﹡tshiau-hua：咱嘛會當講tshia-hua。毋管是好的，抑是䆀的，總--是咱的故鄉，
烏名單遮的人士，in就是足想欲轉去。
﹡寫這首詩的陳明仁老師，伊是遮的過去烏名單人士，偷走轉來台灣的時陣，
一改真難得的聚會，逐家做伙，伊佇咧現場，感受彼的心情，現場的人，
包括咱民視的董事長郭董。
﹡這首詩有真大的意義。
三、今仔日的作業：
◎揣一篇台語文學來讀看覓
佇網路頂拍關鍵詞：
＊歌仔冊：台灣民間文學歌仔冊資料庫 → 欣賞 → 目錄
＊現代文章：台文通訊 → 專欄 → 做伙來唸詩、台灣人寫真
## [2017.11.09《講台語當著時》：幼路的詞彙](https://youtu.be/iJJ5u1YeGOo)
一、幼路的詞彙
◎用手「拍phah」以外，用空手拍。
搭tah：輕輕仔無出力，共伊搭一下。
＊用拳頭拇，有出力。
．頓tǹg：頓椅頓桌。
．捶tuî：捶心肝。
．舂tsing
．甍bòng：用拳頭拇，嘛是有人用物件。
．敲khau：用拳頭拇共人拍的動作。從邊仔敲--lueh(落去)。
＊用空手共人拍：
．"包攴"pa：搧喙䫌
．揌sai：搧喙䫌
．搧siàn, sàm：搧喙䫌
．抉kuat：抉喙䫌
．揈hong：對頭殼佮喙䫌，共伊揈--lueh。
﹡無具體上拍佗位，親像予人”修理”、予人”拍”的意思，較抽象。
．推thui：去予人”推”甲有夠淒慘。
．揲tia̍p：去予人”揲”甲有夠淒慘。
◎用物件「摃kòng」以外，手--裡有提物件來拍人。
．摃kòng：我攑棍仔共你摃lueh.
．扷ió：提棍仔對邊仔扷--lueh(落去)。
．撼hám：提棍仔對頂頭到下面撼--lueh。
．𢪱bu̍t：無一定佗一个方向，提物件𢪱--lueh。
＊用石頭，抑是球來拍人：
．搩kiat：搩--lueh。
．掔khian：掔--lueh。
．戮lak：用尖尖的物件共人戮--lueh。嘛會當用抽象的講法。
＊用像秀梳仔siù-se/sue-á，抑是鞭仔pinn-á，軟軟的物件對邊仔拍人。
．siāu：siāu--lueh。《教典》無收漢字。
．捽sut
＊有用、無用工具，攏會當用，意思嘛較抽象。
無一定拍佗位，無一定有提物件，嘛無一定啥物方向。
．㧌mau
．拂hut
㧌mau--lueh、拂hut--lueh，攏是共人摃甲足淒慘的意思。
◎毋是攻擊的詞
＊用指頭仔的動作：
．捻liàm：捻一塊麻糍muâ-tsî起來。
．捏tēnn：捏魚仔試看有鮮無？用指頭仔捏看覓。
．捏lia̍p：捏麵尪仔，捏一个形出來。
．撚lián：蹺跤撚喙鬚。Khiau-kha lián tshuì-tshiu.
．拈ni：偷拈物件。
．拈liam：拈田嬰 liam-tshân-enn。
．揤tshi̍h：揤電視、冷氣機的遙控器。
．揬tu̍h：共紙、塑膠袋仔揬一空。
．擽ngiau：共人擽呧ngiau-ti。
＊用指甲的：
．抓jiàu：抓癢
．控khàng：共空喙堅的疕控掉。
．㨂tàng：予蠓仔、虼蚤ka-tsáu叮著，一噗足癢的，用指甲共伊㨂一下。
．觸tak：共虼蚤ka-tsáu觸予死。
．擠tsik：擠𤶃仔tsik thiāu-á。
＊用手掌的：
．摸bong：
．挲so：
．撫hu：
．掠lia̍h：
．耎juán：烏青愛耎耎的。
．挼juê：目睭是用挼的。挼目睭juê ba̍k-tsiu。
．“扌回”huê ：”扌回”著塗粉。Tshiú huê-tio̍h thôo-hún.
．捋lua̍h：心肝捋捋咧。
．抔put：幼幼的物件，用雙手共伊用倚來。
◎手的動作
＊提the̍h：提物件。
．捎sa：提物件，提甲足雄的，叫做「捎」。
．搣me：親像塗豆、瓜子這種幼幼的物件，咱是用搣的。
．捀phâng：捀茶、捀物件。
．捧phóng：無用工具，直接用手去捧。捧水。
．挔hiannh：衫是用挔的。
．捾kuānn：物件是用捾的。
．扲gīm：銀角仔提佇咧手內，就是扲。
．撏jîm：佇咧橐袋仔lak-tē-á內底，共物件撏出來。
．抾khioh：物件落佇塗跤，共伊抾起來。
＊擲tàn：擲出去。
．㧒hiat
．挕hìnn
．抨phiann
．掔khian
．抌tìm
．拋pha網
．投tâu球
．考銃khó-tshìng：(1)射擊；打靶。《台語辭典-台日大辭典》
(2)銃殺：予人掠去考銃。
．考箭khó-tsìnn：射箭的考試。
◎喙的動作
＊食
．食tsia̍h
．扒pe：食飯用扒的。
．吞thun
．mauh：無喙齒的人食飯，就是用mauh 的。
(《教典》無收漢字。)
．欱hap/hop、囫hut、搩kiat：攏是講人食足緊的，隨都食了了矣。
﹡食了後，咱愛
．咬kā：咬予斷。
．哺pōo：佇喙內底，是用哺的。
．齧khè、嚙gè：骨頭抑是甘蔗，是用齧的、嚙的。
．吮tshńg：魚骨仔是用吮的。
．啖tam：物件用喙試鹹汫，叫做「啖」。
．舐tsī/tsn̄g：共碗舐予清氣。
﹡啉
．啉lim
．哈ha：哈一杯茶。
．“口帀”tsi̍p/si̍p：”口帀”一下，就是啉酒的意思。
．su̍t：若是湯，抑是水，咱會su̍t一下。(《教典》無收漢字。)
．欶suh：用欶管欶。
﹡講
．講kóng
．說sueh
．喃nauh：毋知咧喃啥？(華語：喃喃自語)
．呾tànn：誠gâu呾，嘛是講的意思。
﹡人共你叫kiò、共你喝huah、共你喊hiàm，你就愛共人應ìn。
﹡欲佮人起冤家矣：嚷jóng、咻hiu、譁huā。
﹡喋thi̍h：這个人有夠愛喋，講話黐黐突突，並愛講的。
﹡呼khoo：呼狗仔、呼倚來。
﹡唱tshiàng：共人唱聲。
◎跤的動作
﹡行
．行kiānn
．步輦pōo-lián
．伐hua̍h：一步叫做一伐，嘛會當做動詞，你伐出去。
．迒hānn：(路上)有懸的物件，抑是有溝仔，咱就愛迒過去。
．跕liam：跕腳尾。(<<<查《台文中文辭典》，華語：『躡腳尖』。)
．蹽liâu：有溪仔，有水的，就是用「蹽」的，蹽過溪。
．走tsáu
．跑pháu：真正咧走。
．傱tsông、直直犁lê去、直直挵lòng去：走甲足緊的。
﹡跋
．跋pua̍h--倒
．跙thsū：滑倒 ku̍t--tó。
．栽tsai：對頂頭跋去下跤，會當講「栽落去」。
．摔siak
．倒摔向tò-siàng-hiànn = 摔siàng：對後面摔siak。
．吭跤翹khōng-kha-khiàu：(向後壁)摔一个閣較嚴重。(華語：『四腳朝天』)
．蹁phîn：行路歪歪仔。 (《教典》：因暈眩、貧血、醉酒等因素而走路不穩。)
．顛tian：酒醉亂亂顛。
◎心理的感受
﹡正面：歡喜、爽快、快活、心肝真清、閣較歡喜=樂暢、貼心、佮意、
興=足佮意足佮意、煞氣(華語：『很過癮』)
．感覺物件誠趣味，誠心適，誠笑詼，誠有局(有局=足有意思的)
﹡負面：傷心、艱苦、鬱卒、心酸、煩、𤺪siān、厭ià、擘腹peh-pak、
悶、慒、齷齪、
．受氣、激心、凝、惱=氣惱，氣甲欲死、慼tsheh、凊心tshìn-sim、厭氣
．可憐、無捨施
．心肝感覺礙虐、
．無意無意(華語：有一點尷尬)：
例句：我起去唱歌，結果無人欲聽，我無意無意就落來矣。
二、逐家講台語：生活中的動物
＊虼蚻ka-tsua̍h：『蟑螂』、『小強』。
﹡是按怎欲寫做這兩字？
這个「虼」佇台語內底，是一个字頭，像講「虼蚤」、「加薦仔」、「尻脊骿」，
這个「虼」無啥物意思，甚至「虼蚻」這个詞有真大的可能，根本毋是漢語，
所以咱用這个字來寫，只是方便書寫，揣漢字來鬥爾爾。
．蠓仔水báng-á-tsuí：『殺蟲劑』。
這馬的蠓仔水，毋是干焦刣蠓仔爾，毋過咱口語上，一般攏講蠓仔水。
．淺拖仔tshián-thua-á：『拖鞋』。
『人字拖』：su-lit-pah，共日語借過來。
．翼si̍t：『翅膀』。
．鬚tshiu：虼蚻有兩支鬚。
＊鳥鼠niáu-tshí：方言差，有人講niáu-tshú。
．殕色phú-sik：鳥鼠是啥物色？『灰色』
﹡色水有基本的色：像講紅的、烏的、白的、青的，這幾个色水的名，伊本身
就是表示這个色水的意思，這是基本色。
有的色水，伊其實是借一寡名詞，借一寡物件來表示伊這个色。像講這个殕色，
咱講「上殕」，「殕」就是彼个生菇的物件，彼的看著的色水就是殕色。
像咱有講茄仔色、柑仔色，攏是這个道理。
＊狗蟻káu-hiā
．一撮tsi̍t tshok：『一堆』
一撮，有當時表示一屑屑仔，像講「一撮鹽」，毋過若像狗蟻一大堆，規撮佇咧遐
的時陣，咱嘛會當叫做「一撮」。
．驚人kiann--lâng：一撮狗蟻佇咧遐，咱就感覺足驚人。
「驚」本調，「人」輕聲，佮「驚人kiann-lâng」意思無仝款。
＊蜘蛛ti-tu
．牽絲khan-si：蜘蛛上大的特徵是伊會牽絲。
咱咧食披薩的時陣，彼的起司會牽絲。
有一種物件叫做『拔絲地瓜』，咱就會當共伊叫做「牽絲番薯」
．經網kenn-bāng：蜘蛛『結網』。像講交纏的物件，咱就會當叫做「經」。
＊蟧蜈lâ-giâ：一種袂牽絲，嘛袂經網的蜘蛛，咱厝內看著的是蟧蜈。
＊胡蠅hôo-sîn
．颺颺飛iānn-iānn-pue：胡蠅、蠓仔會「颺颺飛」，飛來飛去。
＊蠓仔báng-á：其實袂恐怖，毋過伊誠煩。
．叮tìng：蠓仔會共人叮。
．噗phok：叮lueh(落去)就會一噗。
．癢tsiūnn：一噗就會癢。癢就去抓，會解決的叫做「癢」。
．擽ngiau：癢就去抓，袂當解決的叫做「擽」。像講心肝頭擽擽，嚨喉擽擽。
﹡華語無分，攏是『癢』。
◎臺灣特色的動物
＊烏熊oo-hîm
．胸坎hing-khám：伊上大的特徵，是伊的胸坎有一个「Ｖ」的字型。
．好吉兆hó-kiat-tiāu：有「Ｖ」的字型是好吉兆。
＊長尾山娘tn̂g-bué-suann-niû：『臺灣藍鵲』。
．特徵ti̍k-ting：遮的動物攏誠媠，所以咱會注意伊的「特徵」。
「徵」愛唸做「ting」。
．色水sik-tsuí：遮的動物，有無仝的色水，就是『顏色』。
．花草hue-tsháu：『花樣』，有兩个意思。
(1) 花佮草，種花草的「花草」。
(2) 布，抑是動物身上遮的紋，遮的花樣。
＊烏面抐桮oo-bīn-lā-pue：『黑面琵鷺』。抐lā，就是抐來抐去的抐。桮，就是「喙桮」。
．喙桮tshuì-pue：死鴨仔硬喙桮，喙桮就是伊的喙，毋是喙䫌，是鳥仔喙𠕇𠕇的彼塊。
．叨lo：喙桮踮遐抐來抐去，這个動作叫做「叨」。
三、今仔日的作業：
◎選一个你佮意抑是討厭的動物，形容伊的特徵，講你對伊的感覺，盡量使用無仝的詞彙
來描述接近的概念。
## [2017.11.16《講台語當著時》：語言復振運動](https://youtu.be/PzsU_NXEiqU)
一、語言復振(ho̍k- tsín)運動
復振：一个語言佇欲死去的時陣，咱希望伊會當閣復興，閣振作起來。
◎語言會死亡？語言不是動物，嘛是會死亡。
1.自然競爭下的自我毀滅。
譬如講：一个所在發生饑荒，抑是講伊佮別的族群佇咧競爭的時陣，家己的族群
衰弱去，伊就會選擇去講較強勢的語言。
久來，家己的語言怹遮个人就毋願意講矣，所以遮的語言就沓沓仔會消失。
毋過，這種情形較少。
2.政治統治的外力介入。
這是大部份語言會死去，主要的原因。
像講過去殖民的時代，真濟歐洲的國家會去全世界各國殖民，親像咱台灣
嘛是有這種情形。
統治者希望你這个所在的人民好管理，無希望你講統治者聽無的語言，想欲去
改變你這个族群，你這个國家的語言，這个時陣，伊就會用真濟強烈的手段，
予這个國家抑是這个地區的人民，袂曉講家己的語言，抑是伊毋願意講家己的
語言，久來，一代兩代以後，這个語言就有可能會沓沓仔死去。
3.殖民主義→民族獨立→面對已經釘根的強勢語言，就有語言復振運動。
過去佇咧殖民主義的時代，二戰以後，遮的民族就開始想講逐家欲獨立，
獨立過程中，怹著愛面對己經釘根的強勢語言，就有語言復振的運動。
意思就是，我這馬獨立矣，毋過我這馬講的話，尤其是智識份子，怹講的話，
煞會攏是殖民者的語言？所以怹就感覺講袂當，咱應該共咱的語言抾轉來，
揣轉來。
4.語言危機的客觀標準：聯合國所做的分級。
◎語言活力評估
聯合國教科文組織(UNESCO)的語言活力評估，其中就「世代傳承」因素，
共危險程度分級：
危險等級 級數 描述
安全 5 所有人、所有輩分攏有咧使用這个語言，無斷層的危機。
像咱這馬台灣的華語就是所有的人、所有的輩分攏會曉用。
安全毋過 5- 這个語言佇多數的環境下有咧使用，毋過多語的事實可能
受威脅 會對伊造成威脅。
這个所在可能真濟語言，有語言比伊較強勢一屑屑仔。
無安全 4 多數，毋過毋是全部特定族群的囡仔咧使用這个語言，而且
可能干焦佇某一寡環境使用。
像講本來你應該愛講台語的遮的人，多數的囡仔有咧講，
毋過毋是全部，而且伊有可能干焦佇厝內講，這是無安全。
確定瀕危 3 囡仔佇咧厝內已經無共這个語言當做母語來學習，是爸母輩
才會使用的語言，爸母可能佇厝內會對囡仔使用，毋過囡仔
通常袂用這个語言回應。
這是毋是佮台語佇咧台灣的情形差不多仝款仝款？
嚴重瀕危 2 干焦阿公阿媽輩使用這个語言，爸母可能會曉，毋過袂佮
囡仔講。
咱的客語佮原住民語若親像接近這種情形。
瀕臨死亡 1 干焦賰阿祖輩會曉講這个語言，嘛罕得使用。老一輩可能
會曉，毋過通常無對話的對象。
就是講干焦足老足老的人會曉，所以伊就無人通仔和伊講話。
滅絕 0 已經無人會記得，抑是已經無人會曉講這个語言。
其實佇咱臺灣有幾若个南島語，就是原住民族語，伊過去捌佇咧臺灣生存過，後來就
真正死去矣，無去矣。
遮的所講的情形，全世界有真濟國家是有這款的情形，所以怹就想欲來救怹的語言，
咱來看覓仔世界各國，按怎來救怹家己的語言。
◎世界的語言復振運動
會當參看第一季．第2集：[2017.06.08《講台語當著時》：多語言佮共同語](https://youtu.be/A6ywR0htnME?t=33s)
＊紐西蘭：毛利語（Maori）的浸水式教學
“亻因“的當地本土語言，叫做毛利語。毛利語上夆感覺講“亻因“做了上蓋好的，
就是“亻因“的浸水式教學。
．浸水式教學：共一个囡仔全部浸佇彼的語言的環境內底，像講伊佇厝的，
厝的就是爸母和伊講毛利語（Maori），“亻因”有宗教，有部落，佇咧宗教的
場所，長老嘛是佮”亻因“講毛利語（Maori），社區全部的人、社區的活動中心、
圖書館，攏用這个語言，甚至去到學校，學校的老師嘛用這个語言來教。
這就是「浸水式教學」。
佇咧紐西蘭，有真濟這款浸水式的毛利語（Maori）語言學校，抑是社區，
”亻因“嘛鼓勵”亻因“的爸母一定愛佇咧厝內佮”亻因“的囡仔講這个語言。
所以毛利語（Maori）這个語言佇咧紐西蘭的復振，算做了不止仔成功。
＊愛爾蘭(Ireland)：Irish（Gaelic）語言認證是大學入學戶橂
“亻因“的語言Irish，嘛有人講是Gaelic。“亻因“共Irish（Gaelic）語言的語言認證
當做大學入學的戶橂，就是講你愛考過這个語言認證，你才會當讀大學。若是
佇咧台灣，意思就是講你愛考過台語認證，你才會當讀大學的意思。
＊威爾斯(Wales)：威爾斯語（Cymraeg）電視台
英國的威爾斯，亻因威爾斯的語言，亻因有一个電視台，這个電視台過去是雙語
放送，後來，英語無矣，干焦亻因威爾斯的語言咧放送，而且亻因的經費是BBC
來的，亻因家己本身無咧做節目，就是有經費，委託遮的專業的單位，專業的公司
來做威爾斯語言的節目。
＊印度：愛學英語、Hindi加上一个印度本地語言
印度規定講你除了你彼个所在家己的母語以外，你愛學英語、Hindi其中一个，
閣加上一个印度本地語言，你至少愛學三種語言都著矣。
＊瑞士：德、法、義、羅曼語的地理語言分區
”亻因“有四種語言，這四種語言佇咧無仝所在，無仝的地理環境，伊照這个語言
佇咧這區上要緊，按呢這區的官方語言就是這个語言。德語、法語、義大利語佮
羅曼語攏是仝款。
＊南非：訂11種官方語言，成立委員會統整語言事務
南非因為伊有兩个殖民的人來過來，所以亻因有荷蘭語佮英語，這兩種攏強勢，
毋過”亻因“的本地猶有九種的本地語言，予人訂做官方語言，所以南非攏總有11種
的官方語言，這11種的官方語言，伊成立一个語言的委員會，來統整所有的語言
事務，”亻因“用這款方式來做。
◎台灣的語言復振運動
＊政府
．教育部：國小必修、語言認證、各種語言資源、比賽活動
咱希望國中、高中嘛會當必修。
這馬干焦國小40分鐘一禮拜。
教育部有辦語言認證。
．文化部：國家語言發展法、台灣文學館
﹡「國家語言發展法」咱進前有介紹過。
會當參看第一季．第13集：[2017.08.24《講台語當著時》：下課以後家己學](https://youtu.be/StuIRRNhb2Y?t=11m45s) 介紹「國家語言發展法」
﹡台灣文學館：有辦真濟台語的活動，抑是展覽。
佮頭前彼幾个國家比起來，咱台灣咧做的工課，較無強制性，鼓勵啦，提供啦，
較無力的感覺，所以，民間的力量誠重要。
＊民間
．民間組織：台灣南社、關懷、李江却、台羅會、鄭福田、 基進黨、民報、
台灣母語聯盟
有一寡有心的人，像講台灣南社，彰化的關懷基金會，李江却台語文教基金會，
等等，這幾个攏是這幾冬，有咧做足濟推捒台語的工課，辦足濟活動，甚至做真濟
政治方面的工課。
．面冊：iTaigi、失控的台語課、世界台、個人……
面冊嘛有誠濟人咧捒：
﹡iTaigi，伊逐工攏有一个台語的對話，予逐家來學。
（會當參看第一季．第13集：[2017.08.24《講台語當著時》：下課以後家己學](https://youtu.be/StuIRRNhb2Y?t=6m30s)有介紹。
﹡失控的台語課，伊共真濟詞，幼路的用法，共伊解釋甲誠清楚。
﹡世界台，咱進前有介紹過，就是用台語來講世界的新聞。
會當參看第一季．第13集：[2017.08.24《講台語當著時》：下課以後家己學](https://youtu.be/StuIRRNhb2Y?t=9m56s)。有介紹。
﹡足濟足濟個人寫部落格也好，寫面冊也好，真濟個人亻因攏用台語來書寫，
介紹真濟台語的學問，教逐家台語。
遮的能量攏真大。
遮濟人，遮濟國家，遮爾長的時間咧做，是按怎語言的復振運動會遮爾仔困難咧？
語言復振的運動到底有啥物挑戰咧？
◎語言復振運動的挑戰：整理起來，有兩个真為難的所在：
＊全球化
．國家欲強，愛追趕世界強國，先學英語較要緊？
．弱勢後面有閣較弱勢的，欲等抑是欲先救？
＊多元化
．所有的弱勢語言攏愛照顧？公共資源？
．先顧較有救的？閣較弱勢的欲按怎？
二、逐家講台語：安寧照護 an-lîng-tsiàu-hōo
．維生醫療 uî-sing-i-liâu：維持(î-tshî)性命上基本所需要的醫療，咱無欲做這種
較積極的治療，干焦欲維持伊的性命按呢爾爾，就是講有的人病甲誠嚴重矣，
伊可能就袂好矣，這个時陣，咱就減輕伊的痛苦都好矣。
﹡「維持(î-tshî)性命」佮「維生(uî-sing) 醫療」，因為若是唸「維生(î-sing) 」
會佮「醫生(i-sing)」聲音仝款，可能會亂去，所以咱這个所在，建議會當
取伊的另外一个音，共伊唸做「維生(uî-sing) 醫療」，就是維持性命。
．延續性命 iân-sio̍k sènn-miā：予你會當繼續喘氣，繼續活落去。
．身心 sin-sim ：練台語發音真好的詞。
聲母仝款，元音仝款，韻尾無仝，”身”不合脣，”心”愛合脣。
．患者 huān-tsiá
．家屬 ka-sio̍k
．癌症 gâm-tsìng
得著癌症叫做「著癌(tio̍h-gâm)」。
「著病(tio̍h-pēnn)」愛用「著(tio̍h)」。
．末期 bua̍t-kî
．尾期 bué-kî
．衰竭 sue-kia̍t：足衰、衰弱(sue-jio̍k)
．急救 kip-kiù
．毋知人 m̄-tsai-lâng ：華語：『不醒人事』。
．插管 tshah-kóng
．侵入性 tshim-ji̍p-sìng
．預立意願書 ī li̍p ì-guān-su
．見證人 kiàn-tsìng-jîn
．健保卡 kiān-pó-khah
．註記 tsù-kì
．器官捐贈 khì-kuan kuan-tsīng
．死體 sí-thé：佮屍體的唸法愛分予清，注意變調。
．屍體 si-thé：華語的『屍體』。
．過身 kuè-sin
．過往 kuè-óng
．老去 lāu--khì
．曲去 khiau--khì
．禁忌 kìm-khī
．遺囑 uî-tsiok
．後事 hiō-sū
．身後 sin-āu：過身以後。
像講伊身後遮的囡仔，毋知欲按怎，伊身後遮的財產，毋知愛按怎處理。
．塗葬thôo-tsòng：上古早塗葬上濟。
．火葬 hué-tsòng：這馬大多數攏是用火葬。
．樹葬 tshiū-tsòng：有一種閣較環保的「樹葬」，共埋佇咧樹仔邊仔，敢若佮自然做伙。
三、今仔日的作業：
1.若是欲寫遺囑，你會想欲寫啥？用台語試寫看覓。
2.面對台語的危機，你感覺按怎做會當救台語？
## [2017.11.23《講台語當著時》：你袂當毋知的台語十項代](https://youtu.be/y31PNOY6r9M)
一、你袂當毋知的臺語十項代
1.臺語敢有字？這是萬年的問題，足濟人攏佇咧講這。
．臺語有字，而且閣有兩種字，一種是漢字，一種是羅馬字。
漢字不是干焦華語的物件，漢語系內底下面有真濟語言，攏共同共用漢字書寫的符號。
每一个漢字，攏會當用臺語唸出來，而且臺語猶閣有羅馬字，
羅馬字佇臺灣已經有真久真久的歷史矣。
＊請參考[2017.07.06第一季第6集〈羅馬字是啥物？〉](https://hackmd.io/@PrmNuqHdQAO7vxCOm2Ztsw/S1E1YHunf?type=view#20170706%E3%80%8A%E8%AC%9B%E5%8F%B0%E8%AA%9E%E7%95%B6%E8%91%97%E6%99%82%E3%80%8B%EF%BC%9A%E7%BE%85%E9%A6%AC%E5%AD%97%E6%98%AF%E5%95%A5%E7%89%A9%EF%BC%9F)，咱有詳細介紹予逐家了解，
羅馬字原來是按呢。
2.臺語字足濟派，真亂？其實這是一个誤會。
．臺語字已經有規範，用字一致對推廣有幫贊。
臺語毋管是漢字，抑是羅馬字，已經有規範，這个規範已經捒十外冬矣，
漢字佮羅馬字攏仝款。
是按怎講「用字一致，對推廣有幫贊？」因為一致，拄仔欲學的人伊才袂亂去，
伊才袂想講到底愛學這个，抑是愛學彼个。而且伊家己欲學的時陣，一致才會當利用辭典，
利用遮的學習的工具。
所以逐家佇咧學台語、寫臺語的時陣，就盡量照已經有規範的漢字來寫。
＊請參考[2017.06.15第一季第3集〈台語的漢字〉](https://hackmd.io/@PrmNuqHdQAO7vxCOm2Ztsw/S1E1YHunf?type=view#20170615%E3%80%8A%E8%AC%9B%E5%8F%B0%E8%AA%9E%E7%95%B6%E8%91%97%E6%99%82%E3%80%8B%EF%BC%9A%E5%8F%B0%E8%AA%9E%E7%9A%84%E6%BC%A2%E5%AD%97)，有詳細介紹臺語漢字原理佮整理的情形。
3.臺語會曉講佮聽就好？
．完整的臺語能力，會曉聽，會曉講以外，嘛愛會曉讀，會曉寫。
每一个語言完整的能力攏是按呢，臺語本來就有文字，而且有足濟人咧寫文字、寫文學、
寫文章，所以會曉講、會曉聽以外，當然嘛愛會曉讀、會曉寫。
＊請參考[2017.06.22第一季第4集〈台語的語言能力〉](https://hackmd.io/@PrmNuqHdQAO7vxCOm2Ztsw/S1E1YHunf?type=view#20170622%E3%80%8A%E8%AC%9B%E5%8F%B0%E8%AA%9E%E7%95%B6%E8%91%97%E6%99%82%E3%80%8B%EF%BC%9A%E5%8F%B0%E8%AA%9E%E7%9A%84%E8%AA%9E%E8%A8%80%E8%83%BD%E5%8A%9B)，有詳細介紹啥物叫做「語言能力」？
按怎叫做你的臺語真好，是按怎臺語能力愛包括聽、講以外，嘛愛讀佮寫。
4.會曉講臺語哪會看無臺語字？
．所有的文字攏需要學習才看有。
毋管是啥物語言，所有的文字攏需要學習，才看有。
世界啥物語言攏仝款，會曉講，佮看有伊的文字是兩回事。
像講囡仔自出世，佮爸母咧學語言的時陣，真緊就會曉講彼的話，
毋過愛經過真長的時間學習，才會曉這个語言的文字，如果無學過，當然看無，這是正常的。
＊請參考[2017.07.20第一季第8集〈台語文的書寫〉](https://hackmd.io/@PrmNuqHdQAO7vxCOm2Ztsw/S1E1YHunf?type=view#20170720%E3%80%8A%E8%AC%9B%E5%8F%B0%E8%AA%9E%E7%95%B6%E8%91%97%E6%99%82%E3%80%8B%EF%BC%9A%E5%8F%B0%E8%AA%9E%E6%96%87%E6%9B%B8%E5%AF%AB)，有詳細介紹臺語的文字是啥物款的情形？
這馬社會上有啥物人咧寫？寫的情形是按怎？咱佇佗位會當看著遮的文字等等。
5.是按怎欲用英文教臺語？
．彼毋是英文，是臺語羅馬字，嘛會當做音標。
臺語的羅馬字，毋但是一个文字的系統，會當書寫文字以外，另外一个好處，
是會當(tàng)當(tòng)做音標來使用。
臺語的羅馬字本身會當記音，嘛是一種書寫的符號，有完整的書寫規範，
而且有真豐富的文獻，一百外年前，就已經有人寫足濟臺語羅馬字的文獻矣。
＊請參考[2017.07.13第一季第7集，〈看有羅馬字〉](https://hackmd.io/@PrmNuqHdQAO7vxCOm2Ztsw/S1E1YHunf?type=view#20170713%E3%80%8A%E8%AC%9B%E5%8F%B0%E8%AA%9E%E7%95%B6%E8%91%97%E6%99%82%E3%80%8B%EF%BC%9A%E7%9C%8B%E6%9C%89%E7%BE%85%E9%A6%AC%E5%AD%97)初步介紹逐家按怎去讀羅馬字？
＊請參考[2017.08.10第一季第11集，〈會曉使用羅馬字〉](https://hackmd.io/@PrmNuqHdQAO7vxCOm2Ztsw/S1E1YHunf?type=view#20170810%E3%80%8A%E8%AC%9B%E5%8F%B0%E8%AA%9E%E7%95%B6%E8%91%97%E6%99%82%E3%80%8B%EF%BC%9A%E6%9C%83%E6%9B%89%E4%BD%BF%E7%94%A8%E7%BE%85%E9%A6%AC%E5%AD%97)內底，詳細共逐家說明羅馬字愛按怎來寫？
6.臺語佇厝內教就有夠？
．厝內愛講，學校閣較愛教，外口嘛愛講。
逐家想看覓，佇華語猶袂來臺灣進前，彼當時仔的臺灣大多數的人是毋是講臺語？
怹敢是佇咧厝的，才講臺語？
日本時代當然有真濟讀冊人，怹讀冊了後，是講日語，毋過佇日本人來進前咧？
是毋是大部份的人攏講臺語？所以無任何一个語言是干焦佇厝內講就好矣，無彼號代誌，
當然學校嘛愛教。
既然若是厝內會曉講就好，學校免教，按呢逐家攏會曉講華語，是按怎學校閣愛教華語咧？
而且閣教上濟，所以佇外口嘛愛加講寡。
＊請參考[2017.06.08第一季第2集〈多語言的台灣〉](https://hackmd.io/DpJZ-4IbRFOi_4lanH5izQ?view#20170608%E3%80%8A%E8%AC%9B%E5%8F%B0%E8%AA%9E%E7%95%B6%E8%91%97%E6%99%82%E3%80%8B%EF%BC%9A%E5%A4%9A%E8%AA%9E%E8%A8%80%E4%BD%AE%E5%85%B1%E5%90%8C%E8%AA%9E)，有共逐家介紹講過去的臺灣
是啥物款的情形，各種語言佇咧台灣按怎存在？
7.台語較講嘛是古早的代誌？
．台語會當表達專業領域佮現代事物。
＊請參考＊請參考[2017.06.08第一季第2集〈多語言的台灣〉](https://hackmd.io/DpJZ-4IbRFOi_4lanH5izQ?view#20170608%E3%80%8A%E8%AC%9B%E5%8F%B0%E8%AA%9E%E7%95%B6%E8%91%97%E6%99%82%E3%80%8B%EF%BC%9A%E5%A4%9A%E8%AA%9E%E8%A8%80%E4%BD%AE%E5%85%B1%E5%90%8C%E8%AA%9E)，這集內底，咱有講台語會當講醫學、
會當講數學、會當講科學。
＊甚至[2017.10.12第二季第7集〈台語鄉民〉](https://hackmd.io/@Et47FKHKRS2m83n-aEjwAA/Sya2PXo6z?type=view#20171012%E3%80%8A%E8%AC%9B%E5%8F%B0%E8%AA%9E%E7%95%B6%E8%91%97%E6%99%82%E3%80%8B%EF%BC%9A%E9%84%89%E6%B0%91%E5%8F%B0%E8%AA%9E)，有上流行、上時行，少年人咧講的遮的語言，
仝款嘛會當用臺語來講，所以臺語毋是干焦會當講古早的代誌爾爾。
8.臺語足濟腔無標準袂當教？
．臺語的腔口有規則，教學上袂亂。
臺語足濟腔無毋著，這句是有影，臺語的腔口有規則，你是啥物腔的人，
啥物字你就會唸做啥物音，教學上其實是袂亂去，所以只要咱咧教的老師了解彼的規則，
你佇咧教的時陣，自然就知影按怎教。
＊請參考[2017.06.29第一季第5集〈文白音與方音差〉](https://hackmd.io/DpJZ-4IbRFOi_4lanH5izQ?view#20170629%E3%80%8A%E8%AC%9B%E5%8F%B0%E8%AA%9E%E7%95%B6%E8%91%97%E6%99%82%E3%80%8B%EF%BC%9A%E4%B8%80%E5%AD%97%E5%A4%9A%E9%9F%B3%E2%80%93%E5%8F%B0%E8%AA%9E%E7%9A%84%E6%96%87%E7%99%BD%E9%9F%B3%E4%BD%AE%E6%96%B9%E8%A8%80%E5%B7%AE)，初步介紹方言差。
＊若欲詳細了解，請參考[2017.09.21第二季第4集〈台語的腔口差〉](https://hackmd.io/@Et47FKHKRS2m83n-aEjwAA/Sya2PXo6z?type=view#20170921%E3%80%8A%E8%AC%9B%E5%8F%B0%E8%AA%9E%E7%95%B6%E8%91%97%E6%99%82%E3%80%8B%EF%BC%9A%E5%8F%B0%E8%AA%9E%E7%9A%84%E8%85%94%E5%8F%A3%E5%B7%AE)，
講了真詳細，咱會當知影這个「腔口差」有對應的關係，袂亂去，欲標準，當然嘛有標準。
9.教囡仔講臺語伊會臺灣國語？真濟爸母會煩惱。
．教囡仔臺語，對伊學華語佮英語有好無䆀。
教囡仔講臺語，毋但袂有這種『臺灣國語』的問題，甚至對伊學華語佮英語，有好無䆀，
因為每一个語言攏有家己特殊的發音。
＊請參考[2017.08.03第一季第10集〈台語華語無仝款： 聲母 韻母 聲調〉](https://hackmd.io/@PrmNuqHdQAO7vxCOm2Ztsw/S1E1YHunf?type=view#20170803%E3%80%8A%E8%AC%9B%E5%8F%B0%E8%AA%9E%E7%95%B6%E8%91%97%E6%99%82%E3%80%8B%EF%BC%9A%E5%8F%B0%E8%AA%9E%E8%8F%AF%E8%AA%9E%E7%84%A1%E4%BB%9D%E6%AC%BE)
這集的節目內底有特別講著，有真濟音是”臺語有，華語無”的音，有的音，英語嘛有的，
所以你若是自細漢會曉講臺語，真濟英語的音，你發了就會較準。
只要你加會曉一个語言，自然對學別的語言是有幫助的。所以自細漢教囡仔講臺語，
其實是予伊去學別種語言的時陣，閣較簡單，發音發了閣較標準，
絕對袂有『臺灣國語』的問題。
10.學臺語欲創啥？這是一个足濟人咧問的問題。
．加一个語言能力，你就會當有無限的發揮。
你學一个語言了後，無可能下個月隨共你起薪水，袂隨看著效果，毋過真濟
文創、食品、設計，每一種行業內底，你會因為你加會曉一種語言，而且是
咱臺灣本地的語言，你本身的文化底蒂，就會較飽，就會較深，你佇各種的
場合，各種的領域，你就會當有真濟無仝款的發揮，無人知影你會發揮到佗位，
因為彼就是你的能力。
＊請參考[2017.08.31第二季第1集〈重疊的四字詞〉](https://hackmd.io/@Et47FKHKRS2m83n-aEjwAA/Sya2PXo6z?type=view#20170831%E3%80%8A%E8%AC%9B%E5%8F%B0%E8%AA%9E%E7%95%B6%E8%91%97%E6%99%82%E3%80%8B%EF%BC%9A%E9%87%8D%E7%96%8A%E7%9A%84%E5%9B%9B%E5%AD%97%E8%A9%9E)
[2017.09.28第二季第5集〈媠氣的四字詞〉](https://hackmd.io/@Et47FKHKRS2m83n-aEjwAA/Sya2PXo6z?type=view#20170928%E3%80%8A%E8%AC%9B%E5%8F%B0%E8%AA%9E%E7%95%B6%E8%91%97%E6%99%82%E3%80%8B%EF%BC%9A%E8%B6%A3%E5%91%B3%E7%9A%84%E5%9B%9B%E5%AD%97%E8%A9%9E)
[2017.10.26第二季第9集〈俗語佮諺語〉](https://hackmd.io/@Et47FKHKRS2m83n-aEjwAA/Sya2PXo6z?type=view#20171026%E3%80%8A%E8%AC%9B%E5%8F%B0%E8%AA%9E%E7%95%B6%E8%91%97%E6%99%82%E3%80%8B%EF%BC%9A%E4%BF%97%E8%AA%9E%E4%BD%AE%E8%AB%BA%E8%AA%9E)
[2017.11.09第二季第11集〈幼路的詞彙〉](https://hackmd.io/@Et47FKHKRS2m83n-aEjwAA/Sya2PXo6z?type=view#20171109%E3%80%8A%E8%AC%9B%E5%8F%B0%E8%AA%9E%E7%95%B6%E8%91%97%E6%99%82%E3%80%8B%EF%BC%9A%E5%B9%BC%E8%B7%AF%E7%9A%84%E8%A9%9E%E5%BD%99)
逐家去看覓仔，其實臺語內底有真濟足豐富、足豐富的物件，啥物時陣伊會幫助你的工課，你的人生有啥物款的發揮，是無一定的。總講一句，學台語絕對是有好無䆀。
二、逐家講臺語：臺語的共學佮自學
．自學tsū-ha̍k：有的囡仔，抑是家長可能對學校教育的方式無滿意，抑是講伊袂當適應，
伊希望莫去學校，囡仔家己佇咧厝內，爸母來共伊教，抑是爸母請人來教伊，
這就叫做「自學」，家己佇咧厝內學(o̍h)，家己學(o̍h)。
★學ha̍k是文音，o̍h是白音。家己學(o̍h)，是口語，用白音，
自學(ha̍k)這个詞較書面語，所以咱就唸伊的文音。
．共學kiōng-ha̍k：有幾若个想欲自學的囡仔佮家長，亻因可能家己教會落勾，
所以逐家鬥陣，逐家互相來鬥相共，就形成「共學」，共同學習的團體，
這叫做「共學」。
．體制thé-tsè：有遮的觀念的家長，大部份是對體制無滿意。
．自主教育tsū-tsú kàu-io̍k：比論講，對學校教育的方式，對囡仔的發展來講，
無法度予囡仔有好好的發揮，對體制無滿意，伊就會想欲有這種「自主教育」。
．規畫課程kui-uē khò-tîng：「自主教育」內底，上重要的一件代誌，就是
愛「規畫課程」，愛共課程規畫好，毋是講囡仔欲學這，無學彼，希望囡仔
每一款物件，伊攏學會著。
．實驗教育si̍t-giām kàu-io̍k：這款「實驗教育」，其實這馬臺灣真濟人咧進行，
這馬無去學校讀冊的囡仔，其實講起來不止仔濟。
．失落sit-lo̍h：臺語的共學團，亻因遮的家長是煩惱咱的臺語已經咧欲失落矣，
已經咧欲無去矣。
．危機意識guî-ki ì-sik：亻因有這種語言的「危機意識」。
﹡危，有人唸guî，有人唸huî，已經有幾若个音變。
．學前教育ha̍k-tsiân kàu-io̍k：就是幼兒園。
．幼兒園iù-jî-hn̂g：較早叫做『幼稚園』，這馬叫做「幼兒園」，咱臺語直接唸，就會使矣。
．野餐iá-tshan：臺語的共學團體，“亻因“會𤆬囡仔去創啥，毋是請一位老師來
共你教按呢爾，亻因有真濟真活潑的方式，比論講𤆬囡仔去野餐，去做手工。
．做手工tsò tshiú-kang：那做那學習，會當學技藝，嘛會當學語言。
．文史景點bûn-sú kíng-tiám：閣會𤆬亻因去一寡文史景點來參觀。
．古蹟kóo-tsik：去文化佮歷史的一寡景點來參觀，就會看著真濟古蹟，看古蹟的
時陣，閣會當介紹美術，介紹建築，會當予囡仔學著誠濟的物件。
．囡仔伴gín-á-phuānn：當然囡仔做伙，一定愛有『玩伴』，才會歡喜，『玩伴』
就是囡仔伴。
．串聯tshuàn-liân：遮的團體，其實”亻因“需要真濟資源，“亻因”就會互相「串聯」。
．支援tsi-uān：串聯了後，逐家就會當互相支援。
★援，是讀做第 7 調的uān。
．佮kah：我佮你去，我佮你仝款，我和你。
．共kā：我共你講，我共你教，我對你做啥物代誌。
★這兩个字，漢字無仝款，聲音嘛無仝款，變調無仝款，意思嘛無仝款。
．晟養tshiânn-ióng：咱對囡仔，愛共晟養大漢，另外一个講法是「育飼」。
．育飼io-tshī
★「晟養」佮「育飼」的第一字會當單獨使用。
晟：晟囝，共囝晟大漢，晟養大漢攏會使。
育：育囝，育囡仔，孤一字「育」嘛會使。
◎咱對囡仔有真濟情緒
．疼痛thiànn-thàng：咱對囡仔會「疼痛」。
臺語佮華語攏是用「疼」來表示「足疼的」，佮「疼囡仔」的兩種概念。
．惜sioh：咱對囡仔會當「惜」，袂當「倖sīng」。
．倖sīng
．操煩tshau-huân：咱對囡仔會「操煩」，有當時仔愛共伊「教示」。
．教示kà-sī
．騙囡仔phiàn-gín-á：毋是真正共囡仔騙，『哄小孩』，騙予恬，毋是真正共伊
欺騙的意思。
．親子團體tshin-tsú thuân-thé：
．烏嘛嘛oo-mà-mà
．輾轉liàn-tńg / lìn-tńg：講話真輾轉。有腔口差。
．囡仔窟gín-á-khut
．心肝窟仔sim-kuann-khut-á
三、今仔日的作業：
◎請用臺語佮人分享《講台語當著時》這个節目，愛介紹節目內容，佇佗位看會著，
嘛愛簡單講你對節目內底學著啥物。
Sign in with Wallet
Connect another wallet