# 《台語講世事》2019.07~12 文字稿
## 2019.08.08《台語講世事》：中元普渡
一、看新聞講台語
1.華語：農曆7月初一，家家戶戶門口擺上供桌，招待鬼門開後放風的好兄弟。
台語：舊曆7月初一，
Kū-li̍k 7 gue̍h tshe-it,
逐个人兜攏佇門口排拜桌，
ta̍k-ê lâng-tau lóng tī mn̂g-kháu pâi pài-toh,
招待鬼門開了
tsiau-thāi kuí-mn̂g khui liáu
出來𨑨迌的好兄弟仔。
tshut-lâi tshit-thô ê hó-hiann-tī-á.
﹡『家家戶戶』，咱講「家家戶戶ke-ke-hōo-hōo」嘛是會使。
這馬是欲強調「逐个人兜ta̍k-ê lâng-tau」。咱咧招觀眾朋友共「逐ta̍k」轉來。
﹡拜桌pài-toh：拜拜咧用的彼塊桌，號做「拜桌」。
也有人講「尪架桌ang-kè-toh」，「神桌sîn-toh」，
「佛桌hu̍t-toh」，「神明桌sîn-bîng-toh」攏會使。
『放風』意思袂輸亻因去夆關起來，這馬共放出來。
咱講「鬼門開」，所謂的舊曆７月初一就開，予亻因出來𨑨迌的好兄弟仔。
﹡為啥物欲講「好兄弟」？
咱一般對「鬼」，抑是講咱較無了解的物件，
過去的人足濟禁忌（kìm-khī/kī），無啥愛講。
若是講「孤魂野鬼」，「無主的啥物」怪怪，敢若莫遐生疏窵遠(tiàu-uán)，
亻因嘛佮咱仝款，敢若家己的好兄弟仔。
哪會無「好姊妹仔」，可能是外口攏羅漢跤仔咧流浪，較濟無主的，查埔的較濟的款。
2.華語：享受一頓飽餐，有的人家門口，還有這盞『普渡公燈』，
要為好兄弟們指引道(路)。
台語：好好仔食一頓，
Hó-hó-á tsia̍h tsi̍t-tǹg,
有的人兜門跤口，
ū ê lâng-tau mn̂g-kha-kháu,
閣有這葩「普渡公燈」，
koh-ū tsit pha 「phóo-tōo kong-ting」,
欲共好兄弟仔𤆬路。
beh kā hó-hiann-tī-á tshuā-lōo.
﹡『享受一頓飽餐』
a.「好好仔食一頓hó-hó-á tsia̍h--tsi̍t-tǹg」，抑是
b.「好好仔食一頓hó-hó-á tsia̍h tsi̍t-tǹg」，。
☆彼字「食tsia̍h」，有變調、無變調，重點無仝。
a.若是無變調「食一頓tsia̍h--tsi̍t-tǹg」，「一頓」就是輕聲。
表示強調「食」，彼一頓、兩頓毋是重點，你盡量食，做你食，無咧講你食偌濟。
b.若是有變調「食一頓tsia̍h tsi̍t-tǹg」，就是干焦食這頓，無別頓矣。
﹡「燈ting」是用「一葩一葩」的。
「普渡公燈」一般是彼種較大戶的人家，抑是廟，較注重這種的，比較較會有。
﹡「𤆬路tshuā-lōo」的「𤆬tshuā」，逐家應該攏會曉看矣。
3.華語：豎立燈具用的是竹竿，燈火過去用的是蠟燭、燃油現在改用燈泡。
台語：欲予燈徛直直，
Beh hōo ting khiā ti̍t-ti̍t,
用的是竹篙，
īng--ê sī tik-ko,
燈火以早是用蠟燭/蠟條、燃油，
ting-hué í-tsá sī īng la̍h-tsik/la̍h-tiâu, jiân-iû,
這馬改做電火珠仔。
tsit-má kái-tsò tiān-hué-tsu-á.
﹡『豎立』→「予徛直直hōo khiā ti̍t-ti̍t」，
「＂立在＂tshāi」，像這个動作，可能「徛」一个時間，予伊「徛」直一段時間，
袂講足久足久。
若講欲囥足久足久，可能會當用「＂立在＂tshāi」。
比如講「＂立在＂銅像tshāi tâng-siōng」。
﹡蠟燭、蠟條，較口語的講「蠟條」，可能有地方差，是仝款的物件。
4.華語：燈罩還有更古典的，用斗笠，取能讓好兄弟避風遮雨的含意。
台語：燈蓋猶有閣較古典的，
Ting-kuà iáu-ū koh-khah kóo-tián--ê,
用瓜笠仔，
īng kue-le̍h-á,
予好兄弟仔有通好遮風覕雨的意思。
hōo hó hiann-tī-á ū-thang-hó jia/lia-hong bih-hōo ê ì-sù.
﹡「瓜笠仔kue-le̍h-á」、「笠仔le̍h-á」、「草笠仔tsháu le̍h-á」。有幾若種講法。
「瓜」應該是講彼个形，有成啥物瓜，當然瓜有無仝款的形，但是一般有較圓的，
瓜笠仔頂面有的是圓形，有的是尖形，所以有的人講「笠仔」爾，無一定講彼字「瓜」。
﹡『避風遮雨』，咱號做「遮風覕雨jia/lia-hong bih-hōo」。
毋是「閘tsa̍h(X)風覕雨」。
5.華語：整個農曆7月，每到晚上，就要點亮普渡公燈，方便夜巡的好兄弟。
台語：規个咱人7月，
Kui-ê lán-lâng 7—gue̍h,
若到暗頭仔。
nā kàu àm-thâu-á,
就愛共普渡公燈點予著，
tō ài kā phóo-tōo kong-ting tiám-hōo to̍h,
方便好兄弟仔暗時巡視。
hong-piān hó-hiann-tī-á àm-sî sûn-sī.
﹡「咱人」其中一个意思，就是『我們人』，嘛是「舊曆」的意思。
因為過去農村用舊曆、農曆，有新曆出來進前就是講「咱人」，
袂輸講欲佮「新曆」隔開，有區別，就是講彼是彼種新的，咱人是按呢，
是表示咱過去用這種的，以前攏是用舊曆。
例：今仔日咱人當時啊？意思就是咧問講「今仔日是農曆的佗一工？」
二、講予你知：中元普渡
◎舊曆七月十五：民俗方面
＊地府好兄弟走出來𨑨迌
一般的認捌內面會講，舊曆七月是「鬼月」，因為彼个時陣，地府的好兄弟攏會走出來𨑨迌。
＊出門活動愛特別注意安全
所以佇七月的時陣，出門活動，愛特別注意安全。
＊普渡拜拜攢腥臊
因為按呢，逐年舊曆的七月十五，咱著愛來普渡拜拜，攢足濟腥臊的物件，
來款待(khuán-thāi)好兄弟。
這是毋是逐家的認捌？
＊熱人佮秋天的隔界，愛拜「田神」
佇上早的時陣，佇咧七月十五，攢腥臊，其實毋是為著好兄弟，是因為彼个時陣，
熱人佮秋天的中央仔，逐家愛拜「田神」。
＊農作物收成，七月十五跤兜拜祖先佮培墓
而且是農作物收成，拄好佇舊曆的七月十五彼个跤兜，咱愛拜祖先佮培墓，
會攢足濟腥臊，慢慢仔後來演變，演變，變做七月十五攢腥臊，是咧拜好兄弟。
◎宗教意義：中元節確實有特別的意義
☉佛教：
＊「盂蘭盆節」供養眾僧
佛教Hu̍t-kàu/Pu̍t-kàu：「中元節」有一个名，號做「盂蘭盆節」，
這是音譯的印度話，翻做這个名。
佇「盂蘭盆節û-lân-phûn-tseh」這工，佛教徒亻因會舉行法會，
來供養眾僧(kiòng-ióng tsiòng sing)。
＊功德迴向爸母
功德迴向爸母，是一个真歡喜的日子，印度文號做「Ullambana」，
所以就翻做「盂蘭盆節û-lân-phûn-tseh」，這是佛教的意義。
☉道教：
＊地官大帝赦免祖先佮亡魂的罪
＊孤單的「枵鬼」攏會走出來揣食
所以佇這工，愛攢足濟物件，好好仔來款待這寡出來揣食的枵鬼，予亻因食較飽咧，
這是道教的意義。
◎普渡攢的物件
＊傳統的有7項抑是11項熟的料理
以前無親像咱這馬遮爾仔方便，攏愛家己攢、家己煮，看是白飯、炒米粉，
抑是炊粿等等，攏是會使。
＊現代有米、糖仔餅、泡麵、四秀仔，內容無啥限制
這馬普渡進前，一寡賣場，人插插插，逐家攏去買物件，買便的。看是攢米、糖仔餅、
泡麵、四秀仔，內容無啥限制。
＊仝款有禁忌(kìm-khī/kī)：
「蕉李梨」=「招你來」，會共好兄弟攏招來
普渡的時陣，拜果子，毋通拜弓蕉、李仔、梨仔，因為這三字合起來唸是「招你來」，
佇普渡的這工，會共好兄弟招來。
＊保庇平安佮添福報，誠心誠意較重要
過去咱講鬼月，規个舊曆七月，逐家攏足緊張的，做這嘛無適合，做彼嘛無適合。
但是這馬逐家慢慢有這个觀念，舊曆七月，其實是一个歡喜月，感恩月，只要保庇平安佮添福報，誠心誠意較重要。
◎語詞
．咱人lán-lâng：這馬較少年的較無咧用，逐家攏照字「舊曆」、「農曆」按呢爾，
毋知影過去有這種講法。
．舊曆kū-li̍k：就是「咱人」，因應「新」的，所以講「舊」的。
．普渡phóo-tōo
．「腥臊tshenn/tshinn-tshau」的「臊tshau」，
佮「臭臊tshàu-tsho」的「臊tsho」仝字，無仝音。
．四秀仔sì-siù-á：進前豐惠老師捌看過一間店，亻因的包裝寫講：
因為過去攏用四格的盤仔，貯一寡糖仔餅，四秀仔，食𨑨迌彼種的，
就有人講敢若是四格有四項，真幼秀的物件。因為盒仔是四格的。
．作田人tsoh-tshân-lâng：
愛較注意的是這个「工作kang-tsok」的「作tsok」文言音，
另一个白話音「作tsoh」，「作田人tsoh-tshân-lâng」。
★做tsò/tsuè：一般攏是較用佇彼種足具體，可能較直接咧做啥貨彼款代誌。
譬如講：做麭、做衫，做總統，就是這个「做」，做直接的職務。
作tsoh：整體來講較複雜，伊毋是一項啥物技藝，抑是一項啥物款的技術爾，
是綜合足濟代誌，才會當完成「作田」這號代誌。
你欲種稻仔，作田這號代誌，其實是對頭到尾有足濟足濟項的，需要處理，有足濟關、
較複雜、較整體的。
．跤兜kha-tau：啥物物件的附近(hù-kīn/kūn、hū-kīn/kūn)。
無一定是所在，時間嘛會使用。時間、空間攏會使。
例：這個月跤兜。
．培墓puē-bōng/bōo：敢若嘛有「掃墓sàu-bōng/bōo」。
猶有其它的講法：挂紙kuì-tsuá、硩墓紙teh-bōng-tsuá、褪殼thǹg-khak，
來表示「掃墓」的意思。
三、看戲齣(hì-tshut)講台語
◎家己刣，趁腹內。
Ka-kī thâi, thàn pak-lāi.
這是欲刣豬公的款，抑是欲刣魚、刣雞。
．腹內pak-lāi：肝kuann、胃uī、腸仔tn̂g-á，內臟lāi-tsōng，
佇遮是這个意思。
「腹內」用佇其它所在，閣有其它的意思。
譬如講：人的「腹內」，按呢是表示「才情」、「學問」這方面。
腹內無膏(bô-ko)：就是伊無啥物才情。
這个膏(ko)是「蟳仔tsîm-á」的「膏」，親像蟳仔無膏較無好食，
較無物件，用來遮，腹內無膏，表示無啥物學問、才情。
這句話的意思是「若有好空的，就招熟似的人鬥陣做。」
例：這个生理敢若袂䆀，我著招你，家己刣，趁腹內。
◎老的老步定，少年的較懂嚇。
Lāu--ê lāu pōo tiānn, siàu-liân--ê khah táng-hiánn.
．懂嚇táng-hiánn：意思是講較少年，較無經驗，所以可能𧿳𧿳跳(phu̍t-phu̍t-thiàu)，
較袂去斟酌足濟代誌，較無注意著一寡啥物貨，較衝碰(tshóng-pōng)，
抑是神經線大條，這款意思，號做「懂嚇」。佮年歲可能無直接的關係，
有的老的嘛是足懂嚇，一般攏咧講少年的。
．老步定：跤步真定著，較有經驗，較了解世事，咧做代誌，攏較穩定，較知影欲按怎處理，
較袂像少年的按呢。
## 2019.09.12《台語講世事》：平埔族夜祭
一、看新聞講台語：
＊翻譯
1.華語：一隻隻的大豬，是吉貝耍的西拉雅人，為了感謝祖靈阿立母一年來的庇祐，
也為了還願，特別準備的，除了豬之外，不能缺少的檳榔、米酒等，
也都按照傳統儀式，擺上檯面。
台語：一隻一隻的大隻豬仔，
Tsi̍t-tsiah tsi̍t-tsiah ê tuā-tsiah ti-á,
是吉貝耍的西拉雅族人，
sī Kabuasua ê Siraya tso̍k-jîn,
為著感謝in的神明阿立母這一冬的保庇，
uī tio̍h kám-siā in ê sîn-bîng A-li̍p-bó tsit tsi̍t tang ê pó-pì,
嘛為著欲還願，專工攢的，
mā uī-tio̍h hîng-guān, tsuan-kang tshuân--ê,
除了豬，閣一定愛有的檳榔佮米酒，
tû-liáu ti koh it-tīng ài ū ê pin-nn̂g kap bí-tsiú,
嘛攏照傳統儀式，排好佇桌頂。
mā lóng tsiàu thuân-thóng gî-sik, pâi hó tī toh-tíng.
﹡『一隻隻的大豬』咱是講「一隻一隻的大隻豬仔」。袂使講「一隻隻」。
﹡吉貝耍Kabuasua：袂使照漢字讀，
咱愛照伊的唸法Kabuasua來讀，用羅馬字來寫上準。
Kabuasua的“b“是濁音，華語無法度寫。
﹡西拉雅Siraya：仝款的問題，伊族名的音，應該是Siraya，
你若用漢字寫，用華語讀，小可有成，調無一定完全仝款。
咱若欲看漢字，讀臺語音，彼音就走閣較濟去矣。
咱這个時陣，就是用羅馬字的Siraya。
而且這馬咱原住民朋友，亻因嘛是攏用羅馬字來表示
﹡阿立母A-li̍p-bó：亻因的神明號做A-li̍p，彼的音是A-li̍p，
因為平埔是母系社會，所以講A-li̍p-bó阿立母，當然嘛有人用A-li̍p--tsóo阿立祖。
這兩種攏有人講。
除了這以外，亻因有一寡其它的物件，咱可能漢人的傳統會感覺較無仝款的，
亻因會排可比講有圓仔花、甘蔗葉，抑是雞髻(ke-kuè/kue-kè)花，
亻因排的物件包含遮的物件。
2.華語：台南東山的東河里，古地名是吉貝耍，西拉雅的族人，早年被遷居到這裡，是熟蕃，
族人向心力強，也將傳統文化完整保留下來。
台語：臺南東山的東河里，古地名是吉貝耍，
Tâi-lâm Tong-san ê Tang-hô-lí, kóo tē-miâ sī Kabuasua,
西拉雅的族人，早年去夆遷徙到遮來，
Siraya ê tso̍k-jîn, tsá-nî khì hông tshian-suá kàu tsia lâi,
是熟蕃，族人攏足團結，
sī si̍k-huan, tso̍k-jîn lóng tsiok thuân-kiat, mā
嘛共傳統文化規个保留落來。
mā kā thuân-thóng bûn-huà kui-ê pó-liû--lo̍h-lâi.
﹡東山Tong-san：若講宜蘭，彼是冬山(Tang-suann)，是冬瓜山。
欲按怎判斷「山san」佮「山suann」？
譬如講「草山」，彼真正是「山suann」，無毋著。
本來遐就真正有一粒山，咱就叫伊「啥物山(suann)」。
伊可能對原住民的音來的，抑是講
可比講「岡山Kong-san」是日本人號的名，彼種的
用文言音讀，就毋是咧講實際上有啥物山。
東山可能毋是一粒山頭，原本是Kabuasua的社名，落尾才改做東山。
﹡熟蕃si̍k-huan：佇遮的意思，是過去古早的講法，清國時代彼當陣叫「熟蕃」。
日本人落尾共亻因講做「平埔族」。
3.華語：200年來我們的祭典，都沒有中斷過，我們問我們老一輩的，包括日治時期
皇民化運動時，都沒有被禁止。
台語：200年來阮的祭拜儀式，攏毋捌斷過，
200 nî lâi gún ê tsè-pài gî-sik lóng m̄-bat tn̄g--kuè,
阮問阮老一輩的，
gún mn̄g gún lāu-tsi̍t-puè--ê,
連日治時期皇民化運動的時，
liân Ji̍t-tī sî-kî Hông-bîn-huà ūn-tōng ê sî,
嘛無去夆阻礙。
mā bô khì hông tsóo-gāi.
﹡儀式gî-sik的儀gî，阻礙tsóo-gāi的礙gāi，愛有濁音”g”。
﹡日本時代，嘛有人講「日治時期」，日本人統治時期，攏會使。
4.華語：有了保留完整的傳統文化當後盾，這裡的西拉雅族人，20年來一直努力爭取原住民身分。
台語：有保存完整的傳統文化做靠山，
Ū pó-tsûn uân-tsíng ê thuân-thóng bûn-huà tsò khò-suann,
遮的西拉雅族人20年來，
tsia ê Siraya tso̍k-jîn 20 nî lâi,
直直拍拚爭取原住民身份。
ti̍t-ti̍t phah-piànn tsing-tshú Guân-tsù-bîn sin-hūn.
﹡直直ti̍t-ti̍t，愛共抾轉來用。
5.華語：找回自己的身分和歷史，是後代子孫給祖靈最好的禮物。
台語：共家己的身份佮歷史揣轉來，
Kā ka-tiám khuànn bū—khì
是後代囝孫予亻因的神明佮祖先
sī āu-tāi kiánn-sun hōo in ê sîn-bîng kap tsóo-sian
上好的禮物。
siōng hó ê lé-bu̍t.
﹡是句型「共……揣轉來」。
﹡咱平埔族亻因欲揣亻因家己的認同，身份的確定，誠困難，
這是真難苦的代誌，語言文化流失真濟，咱佇遮繼續共咱的平埔族朋友加油。
二、講予你知：平埔族夜祭
平埔族亻因的人數比山地的原住民濟真濟，但是因為真濟因素，這馬認定有一寡困難，
佳哉佇幾十年前，這个認捌開始出來了後，真濟平埔族開始走揣in家己的認同，
所以希望會當恢復「夜祭」。
◎平埔族的身份認定困境
＊除了邵族佮噶瑪蘭族以外，無得著官方的身份認定
因為真濟原因，語言也好，文化也好，咧走揣攏真濟困難。
為啥物會按呢？
＊平埔族人濟佮地理、政治因素，漢化影響深
雖然平埔族人真濟，因為亻因是蹛佇咧西部的平原頂懸，所以佮漢人社會，抑是佮殖民政府、
外來政府，較濟接觸，閣加上殖民政府可能會透過權力控制，對遮的文化、語言等等，
有一寡管制，所以因為地理的關係、政治因素等等，平埔族漢化的影響非常深，漢化的程度非常深。
＊向望恢復舉辦夜祭，共平埔族失去的族群認同揣轉來
雖然身份的認定有真濟困難，但是嘛是有濟濟平埔族的族人，非常拍拚，希望會當共失去的
族群認同走揣轉來。
內面上蓋重要的是向望會當恢復舉辦「夜祭」，這是平埔族非常重要的一个祭典，一種文化。
◎平埔族夜祭遷徙佮由來。
＊地點的遷徙：嘉南平原 → 高雄、屏東佮東部的花蓮
一開始，夜祭是佇嘉南平原，但是漸漸仔綴平埔族亻因遷徙了後，
這馬夜祭嘛走來到高雄、屏東，佮東部的花蓮，這寡所在攏有夜祭。
＊臺南頭社：拄著罩雺，佇海面揣無路，向先人太祖祈禱，天頂出現「白旗仔」指示。
為啥物會有平埔族的夜祭？咱就愛來講著「臺南頭社」。
聽講臺南頭社遮的平埔族，因為當初時亻因的祖先來臺灣，拄著罩雺，佇海面揣無路，
平埔族會向亻因的先人太祖來祈禱，天頂出現白旗仔指示。
這就是為著欲感念太祖「夜祭」的由來。
◎儀式「漢化」真嚴重
平埔族漢化的程度非常嚴重，咱看亻因的儀式嘛是仝款。
＊除了用竹仔做的刀刣豬佮唱古調、跳舞以外
＊in會攑香、燒金、攢牲禮，有漢人的文化、道教的元素佇內面
＊芋仔代表排灣族，番薯是馬卡道的主食，秫米代表客家族群
儀式內面嘛是閣有保存一寡「夜祭」的部份。
◎臺南吉貝耍(Kabuasua)部落的「夜祭」：分兩種。
＊一種是感謝守護神「阿立母」保庇秋天豐收
＊閣另外一種是：「吼海祭」，有兩个意義：
1.「吼(háu)海祭」拜對海路來的先人，因為彼个時陣，真濟平埔族的祖先來臺灣，揣無路，
非常辛苦。
去海邊求水來拜祖先佮神明←引導亻因來臺灣的神明
2.「吼(háu)海祭」欲拜的是「海祖」，以早亻因平埔族族人的先人來到臺灣的時陣，
受著一位漁民「阿海」的幫助佮照顧。
但是有一工，這位阿海竟然佇伊飼魚的池仔內面，去予雷公敲著，死亡去。
亻因就起廟來共伊紀念，佇伊過身的彼工向大海祭拜，來做「吼海祭」。
平埔族欲找揣in家己的身分非常困難，咱佇遮祝福佮鬥相仝，希望平埔族早日揣著亻因家己的文化。
咱若講有機會敢會當參加平埔族夜祭？亻因敢有歡迎別人去參加？
這馬因為算做是欲共傳統文化恢復(khue-ho̍k)，予較濟人知，所以都無像以早較禁止人參加，
這馬有較開放逐家會使去，愛去南部，像講古早的小林村，嘛是有夜祭，像咱臺南吉貝耍(Kabuasua)這爿，大內(Tuā-lāi)，抑是六重溪，有幾若擔，攏是為著欲對199X年到200X年，這个期間為著欲恢復，地方政府有動員，民間社團嘛有極力欲來爭取舉行過去傳統儀式，予閣較濟人知影，其實會當參加。
所以若是有這个福氣，會當去參加，咱嘛是愛遵照亻因的程序，看亻因的儀式，愛尊重，彼是足嚴肅的，毋通佇邊仔，颺颺吵。
◎語詞：
．專工tsuan-kang：
這馬的人攏講「特別」，毋是袂使講，只是「專工愛共抾轉來用。
例：這个物件我「專工」買來予你食的。
刁工thiau/tiau-kang：「故意」的意思，嘛是足臺語的臺語詞。
．夜祭iā-tsè：因為攏是佇暗時舉行的，尤其是攏差不多翻點彼陣，
所以叫做「夜祭」就是這个意思。這个唸法，逐家愛會曉唸。
按怎是舊曆9月初五？因為是阿立母(A-li̍p-bó)的生日，所以用這工做大型的「夜祭」。
．致使tì-sú：「致到按怎」嘛會使。逐家愛抾轉來用。
．活跳ua̍h-thiàu：這馬的運動攏足「活跳」的，佮「真活動」差不多意思。
咱有欲表現彼个「活力」的意思，用「活跳」來講。
．走揣tsáu-tshuē/tshē：這逐家這馬攏會曉講矣。
．遷徙tshian-suá：主要是這兩字愛按怎讀，嘛會當單獨用，可比講
我對臺南「遷」到高雄。
這物件「徙徙」咧，毋通擋(tòng)佇咧遮。
．罩雺tà-bông：起霧、罩霧，這有方言差、地方差，有的所在有講罩霧(tà-bū)，
嘛有講罩雺，有的所在干焦講罩雺，無一定。
起霧是較形容講「這馬開始有霧矣。」
罩霧、罩雺是講規个攏總崁著咧。
雺，一般比較上，比霧閣較厚，閣較重。
霧，就敢若咱食麵(衝煙)的時陣，目鏡彼種，就是「霧」。
．攑香gia̍h-hiunn：「攑」的動作就是「提the̍h」。可比講
攑筆、攑筷、攑雨傘、攑枴仔、攑手，你共提起來按呢。
．燒金sio-kim：咱若有咧拜拜，逐家攏知影「燒金紙」。
金紙有講究，有土地公金、割金(kuah-kim)、壽金，分足濟種。
．數念siàu-liām：就是思念的意思，毋過咱古早攏講「數念」。
有的人講「是毋是一定愛過身的才會當數念」，其實無一定。
像講「數念故鄉」，就是「思念」的意思，另一種講法。
三、看戲齣(hì-tshut)講台語
◎囡仔喙，大人口。
Gín-á tshuì, tuā-lâng kháu.
意思是講囡仔人，無一定是囡仔，可能較少年嘛會當講是囡仔人，
這个人講話氣口敢若真大人款，這「大人款」有可能是較成熟，
嘛有可能較有氣勢，無想到你會講出這款的話，彼款的攏會當按呢講。
這應該是較好意的，就是伊講出來的話，予你感覺講無簡單，
抑是有啥物真特別，真按怎，你感覺你可能想袂到的。
抑是講伊欲做的代誌，伊講出來，予你感覺講有遠見等等。
◎你毋通食這碗，看彼碗。
Lí m̄-thang tsia̍h tsit uánn, khuànn hit uánn.
意思就是講這馬的代誌先做予好，毋通這馬的代誌猶袂做了，
又閣去想彼傷遠的代誌。這碗都猶袂食完，就閣去看別碗。
愛跤踏實地。
佮「食碗內，看（洗）碗外。」忘恩背義的意思無仝款。
## 2019.10.03《台語講世事》：文旦
一、看新聞講臺語：
＊翻譯
第 1句：
華語：前陣子，大雨狂炸，臺南有些文旦園變成水池，果樹泡在水裡，讓人不禁擔憂，
今年的品質會不會有泡水柚魚目混珠？
臺語：前一站仔摔大雨，
Tsîng tsi̍t-tsām-á siàng-tuā-hōo,
臺南有寡文旦園變水池，
Tâi-lâm ū kuá bûn-tàn-hn̂g piàn tsuí-tî,
柚仔樹浸佇水底，
iū-á-tshiū tsìm tī tsuí-té,
予人真煩惱，
hōo lâng tsin huân-ló,
今年敢會買著浸過水的柚仔？
kin-nî kám ē bué-tio̍h tsìm kuè tsuí ê iū-á?
＊『大雨狂炸』→「摔siàng」大雨
若是干焦看漢字→摔，你可能想講是「摔倒」的「摔siak」。
因為咱有的字，無一定有適當的漢字通寫，這算是替代用字。
意思就是講程度足嚴重，抑是講動作較大彼種形容。
＊摔大眠siàng-tuā-bîn：足好睏，倒咧就一直鼾(kônn)，一直睏矣。
＊『果樹泡在水裡』→柚仔樹「浸」佇水底，毋通講「泡」佇水底。
咱進前有講過，袂使用「泡」，愛用「浸」。
例：浸磺水。磺水是傳統的講法，這馬講浸溫泉嘛是OK。
第2句：
華語：這些是被雨打壞的，切開就會看到有水傷，裡面會先受傷再爛出去。
臺語：這寡去予雨傷著的，
Tsit kuá khì hōo hōo siong--tio̍h--ê,
切開就看會出有著傷，
tshiat--khui tō khuànn ē tshut ū tio̍h-siong,
對內底開始爛對外口去。
uì lāi-té khai-sí nuā uì guā-kháu khì.
＊『這些』咱會當講「這寡」，咱嘛會當講「遮的」。
遮的，就是講「遮的啥物物件」，但是這个物件無講，省略。
＊『被雨打壞的』→去予雨傷著的，
＊『切開就會看到有水傷』→切開就看會出有著傷，
「看會出」啥物，其實足口語，一般應該會定定用著。
例：伊一直笑，看會出伊誠歡喜。
例：伊按呢誠膨皮(phòng-phuê)，看會出伊最近日子過了袂䆀喔。
＊『裡面會先受傷再爛出去』→對內底開始爛對外口去。
咱的句型：對...啥物動作，才對佗位去。
第3句：
華語：泡水以後熟度無法消水，我們說「辭水」，它就不會軟，整個皮是硬的，
果肉會偏熟透了，而且會帶點發酵的味道。
臺語：浸水了的熟度無法度消水，
Tsìm-tsuí liáu ê si̍k-tōo bô-huat-tōo siau-tsuí,
咱講「蝕水」，
lán kóng ”si̍h-tsuí”,
伊就規粒攏袂軟、皮𠕇硞硞，
i tō kui-lia̍p lóng bē/buē nńg, phuê/phê tīng-khok-khok,
內底的肉過分，
lāi-té/tué ê bah kuè/ké-hun,
閣有淡薄仔發酵的味。
koh ū tām-po̍h-á huat-kànn ê bī.
＊過分kuè/ké-hun：是咱講果子傷超過，就是已經過透矣。
無到分，猶閣生生，強欲爛去，就是過分。
第4句：
華語：除非水災前提早採收，否則碰上下雨天，不能馬上採，要等到水滴乾了，才不會水傷。
臺語：除非拄著做/淹大水提早挽，若無，
Tû/Tî-hui tú-tio̍h tsò/tsuè/im-tuā-tsuí thê-tsá bán, nā-bô,
拄著落雨天袂使隨挽，
tú-tio̍h lo̍h-hōo-thinn bē/buē sái suî bán,
愛等水滴予焦，才袂著傷。
ài tán tsuí tih hōo ta, tsiah bē tio̍h-siong.
＊『水災』→做大水、淹大水。
水災tsuí-tsai：算共吸收較落尾、新的，口語是講做大水。
＊『不能馬上採』→袂使隨挽。咱用「隨suî」，『馬上』。
＊『否則』→ 若無。
＊『水滴乾』→滴予焦。
句型：動詞 + 予 +啥物狀態
第5句：
華語：外皮要油亮細緻，形狀是短三角形，托起來要有沉重感。
臺語：外口皮愛金閣幼，
Guā-kháu phuê ài kim koh iù,
外形愛成三角形，
guā-hîng ài sîng sann-kak-hîng,
用手秤起來，愛有重量。
iōng tshiú tshìn--khí-lâi, ài ū tāng-liōng.
＊『油亮』→咱講「金」就好，不管是毋是真正有油，看起來金金，閣足幼的感覺。
『油亮細緻』→金閣幼。
＊『托起來要有沉重感』→用手按呢秤，敢若秤伊的重量，感覺小可重重，莫講傷輕，
肉較無夠水，抑是較無飽滇按呢。
＊「秤」佮「磅」：以物件來講，秤仔佮磅仔是無仝款秤重量的。
重量欲按怎來算，「秤」佮「磅」攏有人用，器具無仝，家私無仝。
二、講予你知：文旦
◎「柚仔」抑是「文旦」
＊「柚」是一種「柑橘類kam-kiat-luī」果子樹
＊「文旦」嘛是柚仔的一種
柚仔無一定是文旦，但是文旦一定是一種柚仔。
＊無仝產地，閣有紅肉佮白肉的分別
＊中秋節這陣採收買賣的柚仔，攏叫「文旦柚（仔）」
◎中秋節「文旦柚（仔）」當著時
＊愛佇中秋節進前保領柚仔有好收成
＊「白露」前10工採收，定定會無夠時間通熟予透
「白露」佇咧新曆差不多9月７號到9號左右，中秋無一定是9月佗一工，
若是白露佮中秋時間傷接近，定定柚仔無時間通熟甲予透，有當時仔就有這款的壓力。
＊逐冬干焦中秋節咧食的果子
＊真濟人當做節日禮品來送禮，銷量上好
＊中秋一下過，就無啥人欲愛
◎文旦的名字
＊上捷聽著的，是「麻豆文旦」
＊以早對中國福建漳州入來的時，佇宜蘭佮嘉義咧種
＊地點遷徙了後，麻豆的文旦加足有水份閣好食
＊「麻豆文旦」才變做正式的學名
＊「斗六文旦」、「鶴岡文旦」，照品種，學名攏是「麻豆文旦」。
◎人佮動物伴攏愛注意
＊任何食物食傷濟攏毋好
＊會予一寡藥仔的代謝變較慢
＊若有咧食降血壓、降血油藥仔，就愛注意
＊柚仔皮會予動物伴皮膚過敏
＊較嚴重的，甚至會對腹內造成長期傷害
◎語詞：
．浸tsìm：咱講「浸水」，一般可能受華語影響會講「泡水」是毋著的，
佇臺語來講，「浸」佮「泡」是無仝款的。
浸，是規个佇啥物環境內底，無一定是水，嘛會當講一个環境，一个氣氛等等，攏會使用。
泡，基本上彼个物件會產生變化，譬如講
泡茶、泡牛奶粉、泡咖啡，伊會變做毋是伊原本彼个形，伊會變做另外一種型態。
．消水siau-tsuí：柚仔愛囥予伊消水，較專業的講法是蝕水(si̍h-tsuí)，
愛囥予伊慢慢仔水分會小可蝕去，皮嘛痡(pôo)去矣，皮liap-liap，較焦，
感覺敢若較細粒，但是這陣就是上甜的時陣。
．發酵huat-kànn：發音咱愛注意羅馬拼音「nn」，就是有鼻音。
．著時tio̍h-sî／當著時tng-tio̍h-sî：食柚仔愛等伊消水，都著時。
．果子kué/ké-tsí：較早較濟人講，算口語的講法，
這馬嘛有人講水果(tsuí-kó)，算較文言詞。
「水果」是對日語來的，《臺日大辭典》都有矣。
．保領pó-niá：有幾種意思，咱普通時較捷用的是「保證」的意思。
保證，抑是擔保按怎，保障按怎，日常生活當中嘛會講著。共伊當做「保證」來用，
例：這文旦食落，保領你自按呢無愛閣食其它的果子矣。
例：保領入洞房，無保領一世人。
Pó-niá ji̍p-tōng-pâng, bô pó-niá tsi̍t-sì-lâng.
．狀況tsōng-hóng：
咱有一个提醒，「況」字的正爿是「兄hiann」，
況，就是佮阿兄的「兄」主音聲母仝“h”，所以是狀hóng。
．腹內pak-lāi：有足濟意思的，譬如講有學問的，有膏抑是無膏，
腹內火氣大，彼是體內的意思，猶閣有動物內臟的意思。
痛苦吞腹內：這就較抽象的形容。
三、看戲齣(hì-tshut)講台語
◎強挽的果子袂甜，
Kiông/kiâng-bán ê kué-tsí bē tinn,
強求的婚姻袂圓。
kiông-kiû ê hun-in bē înn.
＊這句俗語已經流傳足久，就是用「果子」這个詞，所以代表講咱口語就是慣勢講「果子」。
＊大部份攏干焦講頭前句，無一定會講後壁句。
你會當講頭前句就是咧形容，強挽的果子袂甜，果子就是愛囥咧伊到分的時陣才挽，
後壁無講，敢若逐項代誌攏會當用。
一定愛等時機，莫勉強，足濟代誌毋通勉強，愛放予自然。
時機愛成熟，咱才來做。
＊看羅馬就知，兩句有兩个”nn”，按呢韻著完全鬥句，鬥句較媠氣
◎人若無一遍戇，路邊哪有有應公？
Lâng(Siàu-liân) nā bô tsi̍t piàn gōng, lōo-pinn ná ū Iú-ìng-kong?
大部份攏是較有歲、較資深、較有經驗的，咧苦勸彼號較無經驗、較少年的。
意思是講你莫傷衝碰(tshóng-pōng)，你愛閣想較斟酌，無恐驚仔你會變按怎按怎。
＊其實會有這句俗語，臺灣算移民社會，不管對佗位移民來，移民總是愛有冒險，愛有足敢衝、
足敢拚彼種精神，這嘛是咧反應臺灣歷史的一部份。
＊有應公Iú-ìng-kong：
反映咱臺灣真正足有情的，有真濟人無人共拜的過往的人，咱就共鬥陣來拜。
有應公名足濟，各地攏有無仝款的講法。
有人講...萬善爺、大眾爺、金斗公、大墓公、百姓公、萬善公、老大公。
## 2019.10.10《台語講世事》：台灣人民自救運動宣言
一、看新聞講台語：爭取民主坐監兩擺，謝聰敏85歲過身
＊翻譯
第1句：
華語：前國策顧問謝聰敏，戴著帽子、圍巾，坐在台下，當時的他已經高齡83歲。
台語：前國策顧問謝聰敏，
Tsîng Kok-tshik Kòo-būn Tsiā Tshong-bín,
帽子戴咧、圍巾幔咧，坐佇台仔跤，
bô-á tì--leh, ām-kin/kun mua--leh, tsē tī tâi-á-kha,
彼陣伊已經食到83歲。
hit-tsūn I í-king tsia̍h kàu 83 huè.
﹡『戴著帽子、圍巾』 → 帽子戴咧、圍巾幔咧。
﹡『坐在台下』 → 坐佇台仔跤。
咱臺語足愛跤佮頭的，譬如講台仔跤、戲棚跤、亭仔跤；
頭嘛有：樓梯頭、廳頭。
﹡『已經高齡83歲』 → 食到83歲。咱台語攏講「食」，「食百二」。
第2句：
華語：肩膀脫臼，沒有辦法醫，長期靠吃止痛藥，止痛藥吃久了就傷腎。
台語：肩胛骨脫輪煞無通治病，
King-kah-kut thu̍t-lûn suah bô thang tī-pēnn/pīnn,
長期食藥仔止疼，
tn̂g-kî tsia̍h io̍h-á tsí-thiànn,
止疼藥仔食久了後腰子就害，
tsí-thiànn-io̍h-á tsia̍h kú liáu-āu io-tsí tō hāi.
﹡『肩膀脫臼』 → 肩胛骨脫輪king-kah-kut thu̍t-lûn
骨輪kut-lûn：就是關節的意思。輪，就是骨輪。
脫thu̍t：就是真大的外力，抑是啥物動作，予一寡部份可能徙位去。
攏愛形容真強力的外力造成的
﹡『沒有辦法醫』 → 無通治病bô thang tī-pēnn/pīnn。
「無通按怎」、「有通按怎」是足台語的講法。
例：我傷晏起床，煞無通仔赴上班時間。
例：我手機仔昨昏袂記咧充電，今仔無通用矣。
﹡『傷腎』 → 腰子就害io-tsí tō hāi。
「害」就是「害去」，可能這馬逐家攏講「歹去」。
「歹去」佮「害去」毋是完全無仝意思，
啥物物件有「損害sńg -hāi」，變做伊的功能無好，咱就講「害」。
例：規組「害」了了。
第3句：
華語：回顧先生遭受暴力對待，導致晚年洗腎，不敵病魔離世，謝聰敏的太太忍不住哽咽。
台語：翻頭想起翁婿受著暴力對待，
Huan-thâu siūnn-khí ang-sài siū-tio̍h pō-li̍k tuì-thāi,
致使年老洗腰子，
tì-sú nî-lāu sé io-tsí,
身體袂堪來過身，
sin-thé bē kham tsua̋nn lâi kuè-sin,
謝聰敏夫人袂忍得嚨喉滇。
Tsiā Tshong-bín hu-jîn bē lún tit nâ-âu tīnn.
﹡『回顧』 → 翻頭huan-thâu，有兩款，
一種就是敢若「越頭ua̍t-thâu」的意思，
一種就是講過去矣，閣轉來的意思。
譬如講「駛車」，嘛會當講「駛到頭前，咱才閣翻頭過來。」
﹡暴力pō-li̍k：是愛注意發音「暴pō」，毋是pōk，無”k”。
﹡tsua̋nn：是「自按呢tsū-án-ne/ni」連音，合音變成「tsua̋nn」。
﹡袂忍得bē lún tit：就是袂忍的。
﹡『哽咽』→嚨喉滇nâ-âu tīnn，敢若目屎抑是啥物滇甲，是一个形容。
第4句：
華語：一生為爭取民主，兩度身陷黑牢，為平反戒嚴時期政治受難者，全力奔走。
台語：一世人為著爭取民主，坐監兩擺，
Tsi̍t-sì-lâng uī-tio̍h tsing-tshú bîn-tsú, tsē-kann nn̄g-pái,
為著欲替戒嚴時期政治受難者洗清罪名，
uī-tio̍h beh thè kài-giâm sî-kî tsìng-tī siū-lān-tsiá sé-tshing tsuē-miâ,
四界走傱。
sì-kè/kuè tsáu-tsông.
﹡『身陷黑牢』：咱較口語講「坐監tsē-kann」，落尾嘛有人講坐牢。
﹡傱 tsông：足台語的字，愛共抾轉來用。
一般來講攏是足無閒，走來走去彼種形，有可能為著錢，
為著啥物代誌，為著啥物目的，四界去，四界足無閒。
第5句：
華語：儘管謝聰敏已經與世長辭，但相信民主的火苗會繼續延燒下去。
台語：雖罔謝聰敏已經去做仙矣，
Sui-bóng Tsiā Tshong-bín í-king khì tsò-sian--ah,
毋過相信民主這條路，
m̄-koh siong-sìn bîn-tsú tsit tiâu lōo,
咱會繼續行落去。
lán ē kè-sio̍k kiânn lo̍h--khì.
﹡『火苗』：若共看做親像「火母」的意思，就是會當予火著起來的物件。
『火苗』凡勢是另外一種意思，是毋是「細葩火」？嘛有可能。
二、講予你知：臺灣人民自救運動宣言
咱知影咱臺灣的民主，行到今，是濟濟的先輩，亻因犧牲亻因的性命，甚至亻因的青春，咱才有今仔日的成就，其中有一位就是謝聰敏先生，伊嘛是今仔日欲講的這个宣言，共同起草人之一，伊佇九月初已經過身去。
咱今仔日佇咧遮向伊致敬。
◎臺獨運動的歷史
欲講宣言進前，當然愛先了解咱臺灣臺獨運動的歷史，這非常重要，每一个人應該攏愛知影。
＊1945年，日本時代結束，中華民國「接管」
有人講「接管」，有人講「佔領」。
＊專制政權、政治漚臭，市草䆀
佇彼的時陣，咱臺灣人，濟濟的人，臺灣意識猶無遐爾仔清楚，
逐家攏足期待，較按怎講，中華民國佮咱可能是仝文仝種，有這款觀念。
想袂到，中華民國政府來到臺灣了後，佮日本政府仝款，是專制政權，
而且政治漚臭(àu-tshàu)，有足濟敲油(khà-iû)、貪汙(tham-u)等等這款代誌，
造成市草誠䆀，逐家非常受氣。
＊1947年，凊心積怨引發二二八事件
才過兩年，逐家攏凊心積怨，引發二二八事件，全臺灣攏滾絞起來。
＊1949年，中華民國敗戰來臺，臺灣戒嚴開始
全世界上長的戒嚴時期。
◎《臺灣人民自救運動宣言》
＊1964年
1949年戒嚴時期開始了後，咱臺灣人民就是按呢進入一个無自由、
無民主，非常痛苦的時間。
經過差不多15年，就是1964年，有這个宣言出現，就是今仔日的主題。
＊發起人：臺大政治系教授彭明敏先生
學生魏廷朝佮謝聰敏
＊主張：
1.一中一臺真拄真，反攻大陸無可能，共蔣政權偃倒，起造新國家。
2.重制憲保障人權
3.以新國家的身份加入聯合國，愛佮濟濟愛和平的國家來建交。
這三个主張，這馬看起來，會感覺講這佮這馬逐家會曉講的代誌，
濟濟臺灣人的向望，但是佇咧這个時陣，欲共這款代誌講出來，是非常危險。
＊印刷了未曾分送就夆㨑著
這个宣言印刷了後，都猶未分出去，就去予國民黨政府共㨑著矣。
◎宣言的影響佮紲後
＊挑戰蔣政權，三人夆判軍法
＊名聲透的彭明敏，魏謝傍福氣減刑
好佳哉咱的彭明敏教授，國際聲望非常懸，名聲誠透的彭明敏得著特赦，
魏先生佮謝先生嘛傍這个福氣，來減刑。
都算講按呢，彭明敏先生尾仔嘛透過瑞典，得著政治庇護，去到外國，
20幾年攏無法度通轉來。
＊謝聰敏先生出獄了後，佇1979年流亡美國，轉來繼續做運動
＊謝立委任內提出平反白色恐怖受難者佮賠償條例
1998年立法通過
◎對臺獨運動的省思
咱臺灣的民主行到今，幾十年的時間，講起來猶閣誠少年，咱閣有足濟代誌、足濟問題，攏無處理，所以咱對臺獨運動，猶閣有真濟代誌愛處理。
＊先輩(Sia̋n-pái)一个一个走
＊臺灣佮ROC的關係掰予清
這是一件足重要的代誌
＊繩目(tsîn-ba̍k)看歷史，毋通放袂記
今仔日共逐家介紹這段歷史，希望逐家會當繩目看歷史，千萬毋通放袂記，
紲落來的代誌，咱嘛愛繼續有勇氣，繼續做落去。
◎語詞
．凊心tshìn-sim：「凊tshìn」就是冷的意思。
例：凊飯配肉酥(bah-soo)誠好食。凊是冷去的意思，毋是賰的意思。
秋凊tshiu-tshìn：這馬這个氣候就是足秋凊。
．㨑tsang：有等一站，抑是守一站，候時機欲掠人，毋是無細膩掠著，愛等咧。
去予你㨑著。
．傍pn̄g：上捷用的是「傍你的福氣」。毋過其實猶有其它的意思。
例：我共你「傍pn̄g」一間房間，好無？
意思就是分我一間，分租也好，借我一間也好，這種分(pun)。
．庇護pì-hōo：保庇(pó-pì)的「庇pì」，後面有字，第3聲變第2聲。
．繩目tsîn-ba̍k：就是我欲對準啥，直直看，注神看的意思。
繩tsîn，本來的意思是木匠，抑是做土水的，亻因會用一條家私，可能愛對準，
抑是欲量啥物物件，彼條叫做「墨繩ba̍k-tsîn」。
「墨繩」這个物件，咱提來延伸使用。
↓攏是講「坐監tsē-kann」：
．食免錢飯tsia̍h-bián-tsînn-pn̄g：比較較講笑的，一種無奈講笑的方式。
．櫳仔內lông-á-lāi：人佇櫳仔內。
．監獄kann-ga̍k：愛唸白話音。
監，這字的文言音是「kàm」，監督(kàm-tok)、監視(kàm-sī)。
．先輩sia̋n-pái：是日文，咱抾來用。
↑〞是第9聲的調號，兩个斜線。
欲注真濟外來語，攏有需要用著這个符號。
主要是咧描寫中升音升到懸音，這種主要攏咧寫外來語較濟。
．掰pué/pé：掰袂清。
三、看戲齣(hì-tshut)講台語
◎我這个老的都蹽落去矣，
Guá tsit ê lāu--ê to liâu--lo̍h-khì--ah,
你無伨敢講會得過？
lí bô thīn kám kóng ē-tit-kuè/uē-tit-kè ?
．都(to)按怎：用佇足濟所在，有全部的意思。
咧講啥物物件，進行到全部是按怎的狀況。
例：囡仔都會曉矣，免講大人。
華語足歹對應，無法度對應，因為有太濟種狀況。
這个字的語感，愛緊共掠轉來。
．蹽落去liâu—lo̍h-khì：有兩種意思，本來的意思是講，親像蹽溪、蹽水。
佇遮的意思，是較深入參與啥物代誌，規个蹽落去。
．伨thīn：就是共支持，是這字漢字「伨」，提醒逐家。
◎火燒罟寮－－全無網（望）。
Hué sio koo-liâu－－tsuân-bô-bāng.
．這是一句孽譎仔話(gia̍t-khiat-á-uē)。
通常攏干焦講頭前「火燒罟寮」，逐家就應該知影後壁矣。
．這馬真濟人嘛毋知影「罟寮」是啥。
罟koo，就是魚網仔。
罟寮koo-liâu，就是囥魚網仔的寮仔。
．火燒起來了後，規个魚網仔燒了了，全無（魚）網矣，就是全無望矣。
逐家日常生活嘛會使抾轉來用。
## 2019.10.17《台語講世事》：香蕉王國的過去與未來
一、看新聞講台語：「烏龍弓蕉」拍入日本市場，足受歡迎銷路好
＊翻譯
第1句：
華語：工作人員忙著分類，嚴格挑選，確保品質，一串一串外表呈現綠色的香蕉，
雖然只有七分半熟，外銷到日本，熟度剛剛好。
台語：工作人員無閒咧分類，
Kang-tsok jîn-uân bô-îng teh hun-luī,
齊嚴格揀過，保領品質，
tsiâu giâm-keh kíng--kuè/kè, pó-niá phín-tsit,
一枇一枇外表青色的弓蕉，。
tsi̍t pî tsi̍t pî guā-piáu tshenn/tshinn-sik ê kin-tsio,
雖罔干焦七分半熟，
sui-bóng kan-na tshit-hun puànn sik,
毋過外銷到日本的時，熟度拄拄仔好。
m̄-koh guā-siau kàu Ji̍t-pún ê sî, sik-tōo tú-tú-á-hó.
﹡『嚴格挑選』 → 嚴格揀過，愛揀感覺較好的、看起來較好的形。
「齊tsiâu」 嚴格揀過：全部完全攏嚴格揀，逐莢逐莢攏揀/看過。
例：咱欲出門矣，物件攢有「齊tsiâu」無？
「齊tsiâu」是白話音，「整齊」的「齊tsê/tsuê」是文言音。
﹡『確保品質』 → 保領品質。「保領」就是保證的意思。
﹡『一串一串(香蕉)』 → 一枇一枇tsi̍t pî tsi̍t pî，一枇就是幾若莢。
「枇杷pî-pê」的「枇pî」。
一枇一枇tsi̍t pî tsi̍t pî：前三个音愛變調。
﹡『雖然只有七分半熟』 → 雖罔干焦七分半熟。
這个「熟」，果子的「熟sik」佮牛肉幾分「熟si̍k」無仝聲調，
意思攏是咧講「熟的程度」。果子是「熟sik」，肉是「熟si̍k」。
一个是第4聲，一个是第8聲。
例：這个囡仔看起來足熟(sik)的。是果子「熟sik」。
﹡『熟度剛剛好』 → 熟度拄拄仔好。「熟度」是果子的「熟sik」。
第2句：
華語：要過生活，做生意不容易，我也想跟著爸爸來種香蕉。
台語：欲趁食，這陣生理僫做，
Beh thàn-tsia̍h, tsit-tsūn sing-lí oh-tsò,
我嘛想欲綴阿爸來種弓蕉。
guá mā siūnn-beh tué a-pa lâi tsìng kin-tsio.
﹡『要過生活』 → 欲趁食。
「趁食」是咧形容講辛苦趁錢來維持生活。
例：咱著是趁食人。
「趁食人」對應是「頭家人」。
﹡『做生意不容易』 → 生理僫做。
這足「僫oh」的，「僫oh」嘛沓沓予逐家放袂記矣。
這馬足濟人講「足歹揀的」、「足無容易揀的」，這字愛共抾轉來用。
﹡『跟著爸爸來種香蕉』 → 綴阿爸來種弓蕉。
「綴tué/té」就是這字漢字。
第3句：
華語：我們的飽度不會超過八分，在七分、八分中間的飽度，是日本人喜歡的。
台語：阮弓蕉的熟度袂超過八分，
Guán/gún kin-tsio ê sik-tōo bē tshiau-kuè/kè peh/pueh hun,
維持佇七、八分這跤兜，
î-tshî tī tshit, peh/pueh hun tsit kha-tau,
日本人上佮意按呢。
Ji̍t-pún-lâng siōng kah-ì án-ne.
﹡『飽度』 → 伊這个形容，應該猶是咧講咱拄才咧講的「熟sik」。
這个「熟sik」到幾分的時陣，可能較適合，因為外銷閣愛運送，閣愛一段時間，
莫講囥到過分。若講傷過熟的時陣，去到遐，凡勢都爛去矣。
﹡『七分、八分中間的飽度』 → 七、八分這跤兜。
這跤兜tsit kha-tau：
例：這項物件偌濟錢唅？差不多100箍彼跤兜。
註：《教典》跤兜kha-tau：附近、左右。
這跤兜、彼跤兜，攏會當按呢用。
﹡『是日本人喜歡的』 → 是日本人上佮意按呢。
第4句：
華語：他在巡視香蕉園，打開套袋，每一弓香蕉，結實纍纍，賣相極好。
台語：規个弓蕉園巡過，
Kui-ê kin-tsio-hn̂g sûn—kuè/kè,
敨開保護果子的套仔，
tháu-khui pó-hōo kué-tsí ê thò-á,
每一弓弓蕉，
muí tsi̍t king kin-tsio,
攏生甲閣濟閣媠，
lóng senn/sinn kah koh tsē/tsuē koh suí,
一定通賣好價。
it-tīng thang bē/buē hó-kè.
﹡『打開』 → 「敨開tháu--khui」的「敨tháu」是這个漢字。
﹡『套袋』 → 套仔thò-á，愛注意是這个聲調的規則，算較特殊。
本來咱若講「套thò」，後壁是其它的字，毋是「仔」的時陣，
可比講「共套牢咧」、「套頭」，這就是算做一般變調。
但是加「仔á」的時陣，是特殊的「仔前變調」。
「套thò」本調是第3聲，伊本來變調是愛變第2聲，
但是伊後壁接的是「仔á」的時陣，伊都愛變第1聲。
例：喙tshuì→喙齒tshuì-khí。若是加「仔á」→喙仔，喙變第1聲。
﹡『賣相極好』 → 生甲閣濟閣媠。
﹡『每一弓香蕉』 → 意思就是講所有的弓蕉，上大的單位就是「弓」。
﹡一定「通thang」賣好價。
這字「通thang」嘛是足台語的一个講法，「通按怎按怎」。
二、講予你知：臺灣的弓蕉
講著弓蕉，會使講是咱臺灣足有特色的果子之一。減肥嘛會當食，食飯了後，『甜點』嘛會使提來食，真正是非常讚的果子。
今仔日簡單來介紹一下，弓蕉咱這馬對外的貿易到底啥物款？
◎貿易對日本開始
＊明治維新時期就咧食臺灣出產的弓蕉
＊1909年的時，臺灣總督進貢弓蕉予天皇
＊輸入日本市場閣較早，是1903年
＊基隆的生理人，佮日本郵船合作，用竹籠仔運去神戶賣
＊無法度有穩定的價數佮行情
◎貿易協定
＊二次大戰了後，佮日本政府簽訂辦法貿易
＊弓蕉、王梨、赤糖、松梧(siông-ngôo檜木)，交換日本的紡織用品、農具、五金、杉仔
＊弓蕉貿易1960年代發展了上好
＊臺灣弓蕉占日本市場的90%變1%
◎無法度維持銷路的原因
為啥物臺灣的弓蕉，無法度維持佇日本遮好的銷路原因，當然有濟濟種。
＊1963年，日本弓蕉貿易自由化
1963年的時陣，日本的弓蕉開始貿易自由化，in決定欲對其它的國家，進口一寡弓蕉。
＊高雄旗山「青果合作社」理事主席吳振瑞
1960年代的時陣，咱臺灣的弓蕉賣到日本，賣到發展遮爾仔好，有一个足重要的原因，
就是彼的時陣，高雄旗山有一个「青果合作社」，這个合作社佮日本彼爿，合作非常非常好，
因為理事主席吳振瑞先生，伊知影日本的文化，閣為彼的時陣種弓蕉的農民，爭取著「五五制」。
＊替農民爭取著「五五制」予臺灣弓蕉佇日本有市場
彼的時陣種弓蕉，農民攏會當趁著錢，發展甲真好，予咱臺灣的弓蕉，佇日本有市場。
遮好的光景，繼續落去，毋知偌好？
＊煞予當時的國民黨政府定罪坐監
但是彼的時陣，發生一件足有名的代誌，有真濟人共講做是「青果合作社」事件，
嘛有人講是「金碗案」等等。
這个案是按怎講？
就是講發展甲遮爾好的市場，彼的時陣，吳主席煞予當時的國民黨政府欲共定罪，定啥物罪？
吳主席彼的時陣，有一个活動，做真濟金碗佮金盤仔，講伊是欲貪汙、圖利、背信等等，
所以用這款的罪名，共伊定罪，這位吳先生就去坐監矣。
＊臺日貿易關係斷去，出口量大落，弓蕉王國崩去
按呢落去了後，遮爾仔重要的人，入去坐監了後，咱臺日貿易關係斷去，出口量大落，
弓蕉王國崩去。這實在是非常無彩的代誌。
這个「青果合作社」事件，到今，逐家攏已經認為這絕對是一个冤案，這馬有真濟作品、一寡資料，攏會當看著這件代誌背後的一寡原因。希望這款予人遺憾的代誌，毋通閣來發生。
咱臺灣的弓蕉真正又閣甜，又閣芳，嘛希望咱臺灣的弓蕉閣一擺拍開市場，予全世界的人攏知影，臺灣的弓蕉有偌爾仔好食。
◎語詞
．松梧siông-ngôo：ひのきHinoki檜木，佮天頂的「嫦娥siông-ngôo」仝音。
．弓蕉king/kin/kim-tsio：
規「弓」來講，是「弓蕉king-tsio」。
這馬聽著講清楚的「king蕉」敢若較少矣，逐家攏講「kin蕉」較濟。
「kim蕉」，是黃金的「kim蕉」。
這三種攏有人講，這馬講第二種的人上濟。
＊弓蕉的單位量詞：逐家愛做伙開喙來練習。
．一子jí/lí：《教典》計算香蕉的單位，等同於「根」。
例：一子弓蕉 tsi̍t jí king-tsio。
．一莢ngeh/ngueh/kueh/gueh：有這四種的腔口差。
．一枇tsi̍t pî：幾若莢，就是咱去菜市仔買的時陣，彼一枇，這一枇。
．一弓tsi̍t king：規个猶未切割，佇咧樹仔頂的，就是一弓。
佇樹仔頂的 → 一弓。
佇菜市仔的 → 一枇。
佇咧恁兜，佇咧你手頭的 → 一莢/一子。
．勼kiu：弓蕉有當時仔拄著病蟲害，可能會勼去。
較文言音的講法講「萎縮úi-sok」，較白話就是「勼kiu」。
．繁殖huân-si̍t：弓蕉著病了後，佳哉閣有一欉留落來，閣繼續「繁殖」。
這是較文言書面語，招逐家來讀這个音「 繁殖huân-si̍t」。
較口語的，就是「生湠senn/sinn-thuànn」。
．拚俗piànn-sio̍k：弓蕉若佇市場內，若拚俗，可能市場就會崩去。
「俗sio̍k」←→「貴kuì」，這是相對的。
拚piànn，就是逐家攏咧搶，拚俗價，按呢價數一直刣落去，真無好。
『撿便宜』 →咱欲 「貪俗」，咱就去揣彼種欲拚俗價的。
貪俗，講起來敢若較貪心的感覺，咱嘛會使講是「趁俗thàn-sio̍k」。
．紡織pháng-tsit：予逐家了解發音。
三、看戲齣(hì-tshut)講台語
◎這溪無魚別溪釣。
Tsit khe/khue bô hî pa̍t khe tiò.
意思是遮無通好趁食，我來別位趁食，抑是佇這搭拄著啥物問題，
無法度解決，我來想講有其它的路通行無？
毋通一直守佇咧遐，無欲振動。
這就是咱臺灣人的精神。去到佗，咱拄著困難，無要緊，咱閣揣別位，
閣來處理，閣揣其它的出路。
◎明知影人咧做月內，
Bîng tsai-iánn lâng teh tsò-gue̍h-lāi/tsuè-ge̍h-lāi,
你煞來共人拍房門。
lí suah lâi kā lâng phah pâng-mn̂g.
．兩句有句的重點：第一句「明知影」，第二句「煞」來按怎。
拄仔好這重點的意思會當共這个句，予咱閣較了解。
就是講都毋是毋知啊，你都明知影。
明明就是這款的情形，咱應該愛按呢做，結果你煞是用另外一種做法。
可能顛倒去侵犯著別人，干擾著別人，影響著別人等等。
．做月內的人，是需要較靜的，愛靜養，愛顧身體。意思是講愛安靜，
袂使去干擾。
拍房門，伊是咧形容講雄雄按呢phóng！phóng！phóng！去共人吵，
敢若較歹，抑是講較兇狂(hiong-kông)彼種感覺。
## 2019.10.24《台語講世事》：臺灣文化日
一、看新聞講台語：臺灣文化日暗會，白色恐怖演予你知
＊翻譯
第1句：
華語：好幾十位原住民的朋友，穿著傳統的服飾，手拉著手，唱起傳統歌謠，
用熱鬧的原住民歌，為晚會揭開序幕。
台語：幾若十位原住民朋友，
Kuí-nā-tsa̍p uī Guân-tsū-bîn pîng-iú,
穿亻因的傳統服裝，
tshīng in ê thuân-thóng ho̍k-tsong,
手牽手，唱亻因的傳統歌謠，
tshiú khan tshiú, tshiùnn in ê thuân-thóng kua-iâu,
用鬧熱的原住民歌聲，
iōng lāu-jia̍t ê Guân-tsū-bîn kua-siann,
為暗會開場。
uī àm-huē khui-tiûnn.
﹡有幾个語法的問題愛注意：
華語有『穿著、拉著、唱起』，若你講照字讀，袂使。
咱只要講「穿啥物」都好，「唱啥物」，「手牽手」，毋免講「牽“著”手」，
「手牽手」就已經有牽著矣，無可能牽無著。
這句就是共逐家講，講咱毋通受華語的影響，逐字攏欲共翻譯，按呢是毋著的。
﹡『為晚會揭開序幕』 → 為暗會開場。
暗會àm-huē，算是新的臺語詞。可能對「暗安」來的。
有人講恁臺語敢有「早安、午安、暗安」？
豐惠老師講：「無。」
這馬就是講欲按怎請安？
本來咱講「𠢕早」，欲睏就講「好來睏」，
你若欲講較雅氣，你欲講「希望你睏眠誠好勢。」，抑是講「你有一个好眠夢。」
加加是按呢。一般無，一般咱厝內是袂按呢講。
第2句：
華語：把過去的白色恐怖歷史，用行動劇展示，劇中描述許多人，無辜被抓，因為關太久，
出獄後連母親都不認得。
台語：共過去的白色恐怖歷史，
kā kuè-khì ê Pe̍h-sik Khióng-pòo li̍k-sú,
用劇齣演予你知，
iōng hì-tshut ián hōo lí tsai,
真濟人無張無持夆掠去，
tsin-tsē lâng bô-tiunn-bô-tî hông lia̍n--khì,
因為關傷久，
in-uī kuainn siunn kú,
出獄了連阿母嘛袂認得家己。
tshut-ga̍k liáu liân a-bú mā
﹡『無辜』 → 真冤枉，抑是講「真枉屈(óng-khut)」。
嘛會當直接講彼个字，文言音的講法「無辜bû-koo」。
『無辜被抓』 → 無張無持夆掠去。這嘛是一種差不多意思。
當然一定是也無做啥物代誌，哪會想著會去夆掠去，嘛是形容。
「無張無持」就是表示你無想著，雄雄按呢，這嘛是一種寫法。
﹡『出獄後連母親都不認得』 → 出獄了後，連阿母嘛袂認得家己。
有的政治犯確實是按呢，關傷久，阿母思念伊，攏見袂著人。
落尾阿母失智，見著家己的後生，真正袂認得。
第3句：
華語：為臺灣長遠未來而努力，希望以嚴肅的態度，致力縮短族群間的差異，整合國民意識，
創造國家共同的價值核心。
台語：為臺灣長久的未來拍拚，
Uī Tâi-uân tn̂g-kú ê bī-lâi phah-piànn,
用嚴肅的態度，
iōng giâm-siok ê thài-tōo,
欲來縮小族群之間的差別，
beh lâi sok-sió tso̍k-kûn tsi-kan ê tsha-pia̍t,
揣著共識，
tshuē-tio̍h kiōng-sik,
予國家的人民有共同的核心價值。
hōo kok-ka ê jîn-bîn ū kiong-tông ê hi̍k-sim kè-ta̍t.
﹡主要有一寡字詞，可能愛注意伊的發音，愛共逐家提醒一下。
．嚴肅giâm-siok：「嚴giâm」的”g”，「肅siok」有入聲”k”。
這算做是華語無的物件。
．族群tso̍k-kûn：「族tso̍k」嘛是有入聲”k”
．差別tsha-pia̍t：「別pia̍t」嘛是有入聲”t”
．共識kiōng-sik：「識sik」嘛是有入聲”k”
．核心hi̍k-sim：「核hi̍k」嘛是有入聲”k”
．價值kè-ta̍t：「值ta̍t」嘛是有入聲”t”
入聲是咱臺語的發音內面，足重要足重要的物件，一定愛會記得。
入聲咧寫的時陣，有的後壁是”k”尾，是舌根的，”p”尾，是合脣的。
”t”尾，是舌尖的，”h”尾，是喉窒音(âu-that-im)。
第4句：
華語：臺灣要形塑一個正常獨立的國家，透過文化的深根，把文化當做我們的桶箍，
改造文化的轉型正義。
台語：臺灣欲成做一个正常獨立的國家，
Tâi-uân beh tsiânn tsò/tsuè tsi̍t ê tsìng-siông to̍k-li̍p ê kok-ka,
愛閣較深入來發展咱的文化，
ài koh-khah tshim-ji̍p lâi huat-tián lán-ê bûn-huà,
共伊當做桶箍，
kā i tòng-tsò tháng-khoo,
進行文化的轉型正義。
tsìn-hîng bûn-huà ê tsuán-hîng tsìng-gī.
﹡『成為』 → 「成做tsiânn tsò/tsuè」是正式的講法，
當然嘛有可能有的人無一定用這个詞。因為足濟臺語的詞，各種講法，
有時仔有的人幾若款攏有咧用，有的人干焦用某一款，有的人可能用其中幾款，
這是無一定。
「成做tsiânn tsò/tsuè」敢是對教會來的字？
目前看起來，文獻上是按呢無毋著，「成做啥」是教會內足濟、足四常的一个詞，
但是一般來講，嘛無一定干焦教會咧用，只是講多數。
﹡這个「愛」嘛是咱足臺語的詞，就是必須「愛」按怎，一定按怎。
第5句：
華語：對臺灣國家基本發展法，文化政策跟古蹟保留的推動，都要銘記臺灣對文化的重視。
台語：對臺灣國家基本發展法，
Tuì Tâi-uân kok-ka ki-pún huat-tián-huat,
到文化政策的制定、古蹟保留的推捒，
kàu bûn-huà tsìng-tshik ê tsè-tīng, kóo-tsik pó-liû ê tshui-sak,
攏愛會記得重視文化。
lóng ài ē-kì-tit tiōng-sī bûn-huà.
﹡這句嘛是有一寡字的發音，共逐家提醒一下。
．政策tsìng-tshik：「策tshik」入聲，舌根的。
．制定tsè-tīng：「制tsè」，可能有人毋知影這字是”tsè”，烏白唸。
例：制服tsè-ho̍k、制定tsè-tīng。
．古蹟kóo-tsik：「蹟tsik」入聲，舌根的。
．推捒tshui-sak：嘛有人講「 推捒thui-sak」。
有人認為講「推tshui」較有push的感覺。攏有人講。
「捒sak」嘛是入聲，有”k”。
二、講予你知：臺灣文化日
臺灣文化日是佇10月17號。敢有這个日子？這个日子是按怎來的？
◎台灣文化日
＊2001年，陳水扁總統宣佈制定的
但是制定了後，尾仔有政黨輪替，所以「臺灣文化日」有恬靜一段時間。
＊這幾冬文化部𤆬頭，組織「臺灣文化日推動小組」
＊舉辦影展、音樂會，古蹟文化場所免費開放參觀
＊透過政府資源的支持，民間文化袂斷根
◎推捒「臺灣文化日」的「臺灣文化協會」
＊1921年10月17創立
＊蔣渭水結合醫學生、留學生，佮本土智識份子共同成立
佇日本時代，蔣渭水結合醫學生、留學生，佮本土智識份子共同成立。
因為彼的時陣，臺灣社會確實講，智識猶無夠，希望透過這个協會，
希望臺灣社會有閣較濟的現代公民，應該愛有的智識。
＊辦報紙、放送電影，辦文化學仔、講演團
＊主張「臺灣是臺灣人的臺灣」
這是頭一个欲予臺灣人民現代意識的一个運動。上蓋重要的，是透過這款運動，這款協會，
建立觀念，就是主張「臺灣是臺灣人的臺灣」。
這相對應的是日本人，因為彼的時陣，是日本時代。
◎組織受著打擊
遮爾重要的臺灣文化協會，一開始都針對一寡歷史、法律、衛生、經濟等等的主題，予較濟的公民意識，慢慢仔「民族覺醒」又閣開始。
＊「覺醒」色彩的運動，予日本殖民政府非常鑿目
in主張「臺灣是臺灣人的臺灣」這款覺醒的色彩，予日本殖民政府非常鑿目，一定愛來阻擋。
＊1923年1月，用「治安警察法」鎮壓民眾運動
因為彼个時陣，臺灣上衝的運動，是希望「臺灣議會當設置」請願運動，
有濟濟的臺灣文化協會的頭人來參與。
日本政府就用這个法律，欲來共真濟內面的頭人攏共掠起來。
本來想講這个法做落去了後，是毋是協會的「臺灣議會」運動，會消滅去，結果無，
愈來愈濟人有這个覺醒。
＊1927年初，文化協會分裂
因為路線的問題，有的人講咱莫行政治，有的人講咱應該愛行政治，文化協會分裂。
＊蔡培火、蔣渭水組成臺灣民眾黨
分裂了後，咱就看著蔡培火、蔣渭水就組成「臺灣民眾黨」。
＊1931年臺灣民眾黨夆禁、散陣
因為濟濟的問題，包括臺灣民眾黨亻因的路線嘛出現問題，到1931年彼个時陣，
規个日本的軍國主義愈來愈起來，規个打壓嘛愈來愈強，
佇咧1931年，臺灣民眾黨夆禁、散陣落去矣。
臺灣文化協會佇咧咱日本時代，所做的真濟代誌，以這馬的角度來看，當然這是一段真重要的歷史，到底彼个時陣in做了著？抑是毋著？啥物款的代誌，咱愛來改進，啥物款的代誌，咱愛繼續做落去，這攏是咱每一个臺灣人應該用心來考慮的。
今仔日介紹的「臺灣文化日」，就是因為10月17號，是「臺灣文化協會」成立的日子。
◎語詞
．共識kiōng-sik：有一寡漢字，咱提來照讀的，有袂少是對日語詞借來的。
強調有一寡入聲的發音愛注重。
像「Ｘ識」、「意識」、「啥物識」，這種足濟攏是日語詞直接，
咱讀漢字的臺語發音，亻因讀家己的日文音。
．恬靜tiām-tsīng：「恬tiām」佮「靜tsīng」，其實是仝款意思。
有時仔，咱臺語有一款類似這種詞，就是兩个仝意思的字，鬥做伙，
變做另外一个詞。恬就是靜，靜就是恬，鬥做伙變做「恬靜」。
．𤆬頭tshuā-thâu。
．向望ǹg-bāng：「向ǹg」佮「望bāng」攏是白話音。
「我望你按怎」佮「我向你按怎」，嘛是仝意思。
．古蹟kóo-tsik：「蹟tsik」正爿是責任的「責tsik」。
有幾字漢字的正爿，是責任的「責tsik」，攏是「tsik」的音，
成績的「績tsik」。
．斷根tn̄g-kin/kun：「斷tn̄g」是白話音，伊嘛是有幾若个音。
「斷tuān」，像講「判斷tuàn」，第3聲的。
根kin，根kun，是腔口差。
．放送hòng-sàng：節目愛「放送」。這嘛是日語借來用的。
以早講Hōsōkyoku，就是廣播電台的意思，NHK就是放送局。
．學仔o̍h-á：毋是食的「芋仔ōo-á」，嘛毋是食的「蚵仔ô-á」。
這个「學仔o̍h-á」就是算做較小型的學校，抑是講咧開班的意思。
．啟蒙khé-bông：主要是彼个字愛按呢唸。
．鑿目tsha̍k-ba̍k：「足tsha̍k的」，其實是這个漢字「鑿」，毋是「刺」。
「刺tshì」，抑是「刺tshiah」，無tsha̍k的音。
．漚步àu-pōo：一般本來是咧講菜蔬果子欲爛去，彼叫做「漚àu」。
落尾咱攏會去講「無好的物件」，嘛是按呢講。
．可比khó-pí：咱普通時定定咧講「舉一个例來講」，「譬如講按怎」。
嘛會當講「可比講按怎」。
這馬逐家攏講「譬如講」，彼是較文言，嘛是會使。
較白話的講法「可比講按怎按怎」。「親像，若像」的意思。
三、看戲齣(hì-tshut)講台語
◎人生在世，袂輸草木一生。
Jîn-sing tsāi sè, bē-su tshó-bo̍k it-sing.
主要是欲予逐家看著咱戲劇內底，真濟人講話內底，文言音成語的讀法就會出來，
表示講文音到白音這个物件，其實是愈來愈濫鬥陣。
當然有時陣，過去有一寡漢學仔的教育環境有關係，所以講定定唸一寡這種成語，
濫佇白話內底。
「人生在世，草木一生」攏是文言音，「袂輸bē-su」是白話音，口語的。
．草木，可比講若親像是足無啥物貨、無啥價值、無啥氣力的一个物件，
意思就是講「人」佮「草木」仝款，是一種感慨。
◎目今錢做人，
Ba̍k-kim tsînn tsò-lâng,
無共烏西，伊會刊甲遮大篇？
bô kā oo-se, i ē khan kah tsiah tuā phinn?
．目今ba̍k-kim：就是「當今」，抑是講「這馬這个時陣」彼个意思。
．烏西oo-se：這嘛是日語詞來的。
你提錢，抑是提啥物好空的，予有權力的人，請伊做啥物代誌。
．歪哥uai-ko：提人的錢。
《教典》貪汙或以不正當的手法取得利益或財物。
．刊khan：用新聞，抑是報紙，啥物廣告，攏用「刊的」。
我用這「面冊」，咱會當講「刊面冊」。
## 2019.10.31《台語講世事》：貼圖的發展
一、看新聞講台語：貼圖好市草，創作者分享生活
＊翻譯
第1句：
華語：誇張大濃妝，復古半屏山，配上「倯閣有力」的對白。
台語：粉抹甲厚厚厚，
Hún buah kah ka̋u-kāu-kāu,
頭毛電予膨膨膨，
thâu-mn̂g tiān hōo phòng-phòng-phòng,
閣添一句倯閣有力的話。
kho thinn tsi̍t kù sông koh ū-la̍t ê uē.
﹡『誇張大濃妝』 → 粉抹甲厚厚厚。
有的人若閣較譀的，可能會用「糊」的 → 粉共糊甲厚厚厚。
「抹甲按怎」、「電予按怎」是咱足臺語的句型。
﹡三字三連音，「厚厚厚」佮「膨膨膨」拄仔好是兩類，聲調無仝款。
膨膨膨phòng-phòng-phòng：一般變調，攏是照按呢變的。
一字是「膨phòng」，本調是第3調。
兩字是「膨膨phòng-phòng」，頭前彼字愛變調，變做第2調。
三字膨，頭前兩字攏變仝款的，攏變做第2調。
厚厚厚ka̋u-kāu-kāu：
「厚kāu」這字的本調是第7調，本來愛變調，是變第３調。
兩字是「厚厚kāu-kāu」，頭前彼字變做第３調。
三字「厚」毋是變做「kàu-kàu-kāu」（←讀音），
變做ka̋u-kāu-kāu，第一字會變第9聲，中升調，懸起去。
三字三字的變調有這款的方式，兩類。
﹡「添thinn」這字這馬嘛足濟人袂曉用，攏用「加ke」、「加ka」。
「添」嘛是一種，加添(ke-thinn)的意思。添thinn是白話音。
例：這電鍋內面，水閣共添一寡，予伊繼續閣炊一下。
﹡倯閣有力sông koh ū-la̍t：「倯sông」是這字漢字。
第2句：
華語：從拍片轉戰貼圖創作，畫的是個人心聲，卻意外引發廣大女性共鳴。
台語：對拍片改途做貼圖創作，
Tuì phah-phìnn kái-tôo tsò tah-tôo tshòng-tsok,
共家己的心內話畫出來，
kā ka-kī ê sim-lāi-uē uē-tshut-lâi,
煞予濟濟查某人感覺有仝心。
suah hōo tsē-tsē tsa-bóo-lâng kám-kak ū kâng-sim.
﹡『轉戰』 → 改途kái-tôo，就是換頭路。改佗一途。
例：你是食佗一途？你做這途。你做佗一途？
﹡『心聲』 → 心內話sim-lāi-uē。
﹡『廣大女性』 → 濟濟查某人。
咱普通時仔講「這物件足濟的。」就是這个漢字「濟tsē/tsuē」。
有真濟人可能記袂起來，若是受華語影響，定定會講著一个成語
「人才濟濟jîn-tsâi tsē-tsē/tsuē-tsuē」，就是這字「濟」。
﹡『有共鳴』 → 有仝心ū kâng-sim。
第3句：
華語：那個時候就剛離職，所以真的還滿廢的。
台語：彼陣都拄仔辭頭路，
Hit-tsūn to tú-á sî-thâu-lōo,
有影不止仔荏懶。
ū-iánn put-tsí-á lám-nuā.
﹡『廢』 → 就是「荏懶lám-nuā」的一種狀態。
啥攏無愛做，都躽(nuà)佇咧遐，這就是「荏懶」。
﹡『耍廢』 → 咱會當講「激荏懶kik lám-nuā」。佇咧厝裡激荏懶。
﹡『就剛離職』 → 都拄仔辭頭路。
拄仔的「仔á」有變調、無變調，意思無仝款。
拄仔辭頭路tú-á sî-thâu-lōo：
a.有變調：最近無偌久的時間，可能一禮拜前，抑是兩工前，無講蓋精確，
一定是無蓋久，幾工仔。
a.無變調：可能三分鐘進前。
第4句：
華語：不管是走無厘頭搞笑路線，還是療癒系的可愛動物畫風。
台語：毋管是捎攏無的笑詼款，
M̄-kuán sī sa-lóng-bô ê tshiò-khue-khuán,
抑是撫心肝的古錐動物風格。
iah-sī hu-sim-kuann ê kóo-tsui tōng-bu̍t hong-keh.
﹡『無厘頭』 → 捎攏無，毋知咧舞啥，毋知咧創啥。
﹡『搞笑路線』 → 笑詼款。
「啥物款」的「款khuán」嘛是足臺語的，啥物型的意思。
例：你煮這物件，好食款。
你這「款」物件，閣有咧賣無？
﹡『療癒系』 → 撫心肝hu-sim-kuann，共你的心肝撫撫咧。
撫撫咧hu-hu--leh，就是這个「撫hu」漢字，毋是呼吸的「呼hoo」。
第5句：
華語：養活52萬貼圖創作者，如果加入周邊商品的業績，收益超乎想像。
台語：予52萬貼圖創作者有飯通食，
Hōo 52 bān tah-tôo tshòng-tsok-tsiá ū pn̄g thang tsia̍h,
若共授權商品的業績算入來，
nā kā siū-khuân siong-phín ê gia̍p-tsik sǹg--ji̍p-lâi,
亻因趁偌濟咱想袂到！
in thàn guā-tsē/tsuē lán siūnn-buē-kàu!
二、講予你知：貼圖從到今 Tah-tôo tsîng-kàu-tann
這馬逐家用真濟，足占贏的通訊軟體，攏會用著「貼圖」。
貼圖伊嘛有伊的發展(歷史)。貼圖敢有歷史？
◎ 貼圖的歷史
＊1980年，美國大學的BBS
咱若共時間搝轉去1980年代，應該算講是這馬的網路進前的代誌。
彼的時陣，美國有一間大學號做「Carnegie Mellon卡內基．梅隆」，
這間大學內面的老師佮學生，創一个線頂的公佈欄(kong-pòo-nuâ)，號做BBS。
＊討論代誌，有人講笑，害人誤會
本來是逐家佇咧頂懸，討論一寡代誌，有的人當然就會講耍笑，但是彼攏是文字，
咱普通時仔講耍笑的時陣，可能面會笑抑是按怎，若是干焦文字，
逐家都毋知影你到底是講正實的，抑是咧講耍笑，所以有人會誤會，這个時陣欲按怎？
＊笑話愛做記號，共分予清
就有人建議，講你若咧講耍笑，你愛做一下仔記號，逐家才知影你是咧講耍笑。
所以講講笑話，著愛做記號，共分予清楚。
＊電腦科學家Scott Fahlman建議用:-)
彼的時陣，亻因這間學校有一位教授，伊嘛是一个電腦科學家Scott Fahlman，
伊建議用啥物符號來代表你咧講耍笑？就是這个:-)，看起來敢若一个笑面，
這个符號佇彼的時陣，電腦的科技會當拍會出來，三个符號合起來敢若一个笑面。
這个符號逐家就用做講我若講這段話，後壁有加一个這號符號，就表示我這馬咧講耍笑。
◎對表情符號到貼圖
＊簡單符號 → 細張圖 → 大張圖
慢慢仔，簡單的符號綴著電腦科技愈來愈厲害，變做細張的圖，
慢慢仔又閣變做大張的圖，愈畫愈媠。
＊通訊軟體使用者佮意用貼圖
這馬占贏(tsiàm-iânn)的通訊軟體的使用者，攏足愛用的。
＊有貼圖店仔會使買佮賣
而且這个軟體的經營者誠厲害，伊有一个貼圖的店仔，會當予咱去揀，
看你欲佗一个貼圖，你會使買，買以外，你嘛會當賣。
＊畫圖的超過七萬，交關金額18億
這馬有足濟足濟人規氣畫貼圖來賣，畫圖的人已經超過7萬人矣。
交關的金額來到18億遮爾仔濟矣。
◎貼圖的功能
＊表達比文字較豐富幼路的意思
貼圖這馬變做是一个經濟的現象，因為咱咧使用貼圖的時陣，發現一件代誌，
這馬真濟人，有的可能無愛講，但是你用貼圖表達，比文字閣較豐富，又閣幼路的意思，
因為一張圖，尪仔的表情，邊仔閣配一寡文字，完全都會當表達你彼陣的心情。
所以講貼圖非常受歡迎，真濟閉思(pì-sù)的人，無啥會曉講話，
規氣就貼一張圖，都會當完全表達伊的意思。
＊品牌、政治人物用來盤撋
這馬貼圖有真濟品牌，嘛有出家己的貼圖，甚至真濟政治人物，抑是講明星等等，
會出家己的貼圖，來佮民眾盤撋。
＊母語團體做貼圖捒台語文
咱嘛看著真濟母語團體利用貼圖，來推捒咱的臺語文。
因為畫一張圖，邊仔閣會當寫幾个仔字，母語團體所做的臺語貼圖，用的攏是正體的臺語文。
＊用母語罔畫/話
因為咱會當用母語，罔畫圖，閣會當罔講話。
這就是這馬貼圖的發展，講予逐家了解，後回希望逐家咧用貼圖的時，
嘛愛多多利用咱臺語的貼圖。
◎語詞
．講耍笑kóng-sńg-tshiò、講笑kóng-tshiò、滾耍笑kún-sńg-tshiò、滾笑kún-tshiò、
耍笑sńg-tshiò，攏有人講，有真濟種講法。
「講kóng」到「滾kún」，可能有一寡音變的狀況。
．笑詼tshiò-khe：講一寡「笑詼」的代誌。
☉「笑話tshiò-uē」佮「笑詼tshiò-khe」有啥物差別？
有的人是「笑話」、「笑詼」濫咧用，無分甲足清楚。
有的人是分甲較清楚，「笑話」是比較較有負面的意思。
就是講會予人恥笑(thí-tshiò)，抑是講會予人訕笑(suan-tshiò)彼款。
「笑詼」主要攏是講心適、幽默這種的。
有的人講這兩種用法袂使濫做伙，但是大部份的人濫咧用較濟。
例：你莫按呢，別人會共你當做「笑話」，予人看「笑話」。
．笑談tshiàu-tâm：這是文音的講法。「笑tshiàu」是其中一个文言音。
一般攏是變做可能有一个故事性，抑是有一段啥物經歷，會予人感覺講咧開講的時，
提出來講，有可能是過去發生的代誌。
．含笑花hâm-siàu-hue：「笑siàu」嘛是其中一个文言音。
「笑」有三个音，tshiàu、siàu是文言音，tshiò是白話音。
．交關kau-kuan：咱來去貼圖店仔，佮伊交關，買貼圖就是交關。
所以就是買物件的意思。這是對日語詞來的。
「交關」有淡薄仔較有情的感覺，「來去共伊交關一下」，
若是會用這字，咱就知影彼个頭家可能較熟的，有熟似，
就是照顧伊的生理，當然嘛是去共看一下，順紲買物件。
．盤撋puânn-nuá：真濟人用貼圖佮咱來盤撋。
敢若人際交流、交陪的工具，嘛是講一種表現。
例：你來佮逐家盤撋一下。
你做生理進前，愛盤撋一下，就是這兩个漢字「盤撋」。
音愛注意一下，「盤撋puânn-nuá」。
「撋nuá」就是逐家撋鬥陣，感情閣較好。
．話uē、講káng、破豆phò-tāu：算講是仝意思。若準講有小可無仝，
Ａ這个「破豆phò-tāu」較用佇咧可能無啥主題的彼種開講，烏白講，
無一定有焦點，凊彩開講。「啉茶罔破豆」。
有地方差，有的所在確實無咧用「破豆」，中南部比較較濟。
Ｂ講káng：是開講的「講káng」，白話音，「講kóng」是文言音。
咱一般會分開用，比如講「講(kóng)話」，「開講(káng)」。
三、看戲齣(hì-tshut)講台語
◎我喙若有遐聖，就聽好借人生囝矣。
Guá tshuì nā ū hiah siànn, tiō thìng-hó tsioh lâng senn-kiánn—ah.
．這較講笑的，主要是配「喙tshuì」佮「聖siànn」，意思就是講
你講話，預言敢若講甲足準的。
「聖siànn」是白話音，就是「有靈有聖」。
伊的喙足「聖siànn」的，就是伊講的話攏足準的。
例：你的「喙足聖的」，講啥物人會著，啥物人就會著。
．「聽好thìng-hó」按怎，「通好thang-hó」按怎，意思是差不多。
就是講會當啥物貨，閣加一寡無仝的用法。
◎從今以後，
Tsiông-kim í-āu,
咱田無交，水無流，一人行一路。
lán tshân bô kau, tsuí bô lâu, tsi̍t lâng kiânn tsi̍t lōo.
．這比較較有敢若欲佮人畫清界線的時會講的。
．「從今以後tsiông-kim í-āu」這就是文言音的講法。
你嘛會當講「對今起tuì-tann-khí」、「對這時起tuì-tsit-sî-khí」
白話的講法當然嘛會使，這嘛定定咧講「從今以後」按怎按怎。
變做是白話中有文言的物件，按呢透濫。
．「田無交(kau)」的「交kau」，毋是水溝仔的「溝kau」。
田內底無水溝仔，是講兩爿的田無相交接的時陣，水就袂互相透流。
## 2019.11.07《台語講世事》：資源回收問題
一、看新聞講台語：
＊翻譯
華語：環保義工是佛心來的。
台語：環保義工好心好行。
Khuân/Huân-pó gī-kang hó-sim-hó-hīng.
﹡『佛心來的』 → 好心好行hó-sim-hó-hīng。
好心，好行，行(hīng)是品行、品德的意思。
看你按怎套，嘛有用佇䆀的，親像有一句，可能是對較無遐躼(lò)的人，小可較無公平，
有人講「矮人厚行é/ué-lâng kāu-hīng」，對矮的人，真正足無禮貌。
慧盈老師：矮的人真正環境也毋是為阮設計的，這也提袂著，彼也提袂著，
當然咱愛「厚行」。
伊的意思是講一寡想法較濟，想法有時仔會變做想較濟，較複雜，就變做可能有負面。
像華語講的『心眼多』。
註：《教典》歹人厚行。Pháinn-lâng kāu-hīng.
華語：要來幫忙資源回收。
台語：鬥做資源回收。
tàu-tsò/tsuè tsu-guân huê/hê/hêr-siu.
﹡可能受華語的影響，攏會直接講「幫忙」按怎。
其實咱是攏講「鬥按怎」，抑是「佮按怎」。
「鬥tàu」是足臺語的，鬥相共、鬥跤手，逐家攏足𠢕鬥的。
咱這馬嘛「鬥陣」繼續共「鬥」起來。
﹡「鬥tàu」猶有另外一个意思，像「鬥相共、鬥跤手」，是欲組合，
親像共啥物貨「鬥」起來，足濟物件會當「鬥」起來。
﹡囡仔咧耍的「柴角仔」，有各種的柴角仔，有的會當用「鬥tàu」的，
有的用「疊tha̍h」的。
華語：義工有可能搞了老半天，都在做白工。
台語：義工有可能舞規半晡，
Gī-kang ū khó-lîng bú kui-puànn-poo,
拍算是無彩工。
phah-sǹg/suìnn sī bô-tshái-kang.
﹡『搞了老半天』 → 舞規半晡，用「舞bú」的，這字嘛足臺語的。
舞規晡、舞規半晡，攏會使，看你欲舞較久的，抑是舞較短的，
舞規工嘛有可能，舞兩晡、三晡，攏會使，攏用「舞」的。
規kui：一个是「全部」的意思，嘛有可能「接近」的意思。
﹡『可能』，有一个講法是「拍算」。
這个「拍算」，佮咱普通時仔用的「拍算」，敢若無啥仝款。
所以有兩个意思，一个是「拍算」的意思，一个是「可能」的意思。
例：第一个意思：（拍算）
我拍算50歲以後，欲來交一个男朋友。
例：第二个意思：（可能）
我拍算這是無可能發生的代誌。
華語：有這種紙質薄膜的，他們不收。
台語：
﹡『他們不收』 → 「人無愛收lâng bô ài siu」。
愛注意這个「人lâng」愛變調，逐家攏人，無需要強調「人」。
華語：整理作業程序比較繁複，經費上划不來，增加困擾。
台語：欲款較了工，
beh/boh khuán khah liáu-kang,
生理算無盤，
sing-lí sǹg/suìnn-bô-puânn,
加麻煩的。
ke mâ-huân--ê.
﹡『整理』 → 咱會當講「款khuán」。「款」這字嘛是足臺語的。
﹡按怎算攏無盤，是對算盤來的，意思是算袂出來，袂和(bē/buē-hô)。
﹡『增加困擾』 → 加麻煩的，加費氣(huì-khì)的，攏會使。
「加(ke)啥」
例：這「加趁」的。
你「加講」的。
這个「加生」的。
華語：沒什麼價格
台語：賣無幾箍銀bē/buē bô kuí khoo gîn/gûn
嘛有人講：
賣無幾仙。bē/buē bô kuí sián.
﹡主要是「動詞 + 無」，後壁有一寡啥物：
例：看無人，食無物。
華語：裝過食物的紙容器，會被當成一般的垃圾。
台語：貯食物的紙篋仔，
té/tué tsia̍h-mi̍h ê tsuá-kheh-á,
就準做糞埽。
tō tsún tsò/tsuè pùn-sò.
﹡「篋仔kheh-á」佮「盒仔a̍p/a̍h-á」有啥物無仝？
咱一般會講「有蓋的就是盒仔」，「無蓋的是篋仔」。
﹡準做(tsún tsò/tsuè)啥，就是「當做啥」的意思。
華語：塑膠燃燒
台語：燒塑膠的火薰，
sio sok-ka ê hué/hé-hun,
﹡火薰佮薰，有啥物差別？
伊遮欲強調「有火燃(hiânn)過、燒過了產生的煙」的意思。
二、講予你知：糞埽回收
講著咱臺灣糞埽回收，真正是世界第一。
今仔日欲共逐家介紹，可能你毋知影糞埽回收的一寡問題。
◎臺灣糞埽回收世界𠢕(gâu)
＊糞埽回收是真四常的代誌
＊美國報紙2016年呵咾臺灣是「處理糞埽的世界天才」
臺灣糞埽回收是世界有認證的。
＊糞埽回收率較贏歐美國家
＊回收率20冬，5.8% → 53.26%
對1998年環保署一直咧捒，推捒20冬的結果，來到這馬2019年53.26%，
成長偌爾仔濟，愛感謝所有人民的合作。
回收率遮懸，但是糞埽猶是佇遐。
◎糞埽問題猶是袂得收煞
欲做糞埽回收，上大的重點就是啥？毋是共收起來就好，咱當然希望共回收了後，會當做一寡利用，到底咱臺灣回收率遮爾仔懸，敢有去做利用？這真正會當來討論，為啥物回收率遮懸，糞埽的問題猶是袂得收煞？
＊數據好看爾
咱這馬53.26%的糞埽回收率，這个數據真正是真好看，但是
真濟環保人士嘛共咱提醒，這是好看爾，糞埽猶閣佇遐。
＊糞埽有所在通收去就準算
「糞埽回收率」到底是按怎算？本來就真僫算。
「回收」的定義是啥？
定義是「糞埽若有所在通收去」，按呢就算講「有回收」，有準算。
咱政府就是按呢咧統計(thóng-kè)。
＊有變做再生原料抑無？
收去了後，敢有好好仔變做再生的原料抑是無？這就毋知有人咧探討無？
＊回收率真僫算
◎臺灣紙類回收的問題
糞埽其實有一个產業，號做「糞埽處理產業」，各國(kok-kok)攏有。
＊2017年初，中國禁止歐美國家送糞埽去亻因遐
中國是世界上真大的「糞埽處理」國家。
佇2017年彼年，亻因無閣欲收歐美國家送去的糞埽，世界上的糞埽
物件到底欲去佗？糞埽的價數就落較低矣。
＊外國糞埽入來臺灣，影響回收市場的價數
咱臺灣一寡「糞埽處理」業者，伊會當用較低的價數，就會當
去買著外國的糞埽來處理，按呢就影響咱臺灣的回收產業，收糞埽的人
回收市場的價數就去影響著，因為直接去買外國較俗的糞埽都好矣。
咱以紙類的回收做例：
＊回收廠商摻一寡毋是紙的物件
真濟回收廠商，伊共糞埽收來了後，會做一寡回收紙等等。但是，
有一寡較無好的廠商，伊內面摻一寡毋是紙的物件，按呢會影響品質。
對這个產業有真䆀的影響。
＊杯仔、便當紙篋仔、發票烏白擲
愛提醒咱所有的觀眾朋友來注意，這嘛佮紙有關係。
普通時仔，咱去外口買物件轉來食，有一寡紙杯、紙盒仔，便當紙盒仔，
咱愛有一个觀念，這寡便當紙、紙杯仔，為著莫予這个物件沐(bak)著油、
沐著水，就規个澹(tâm)去，所以伊外口閣有糊一層(tsàn)敢若塑膠的物件，
這个物件回收廠商提轉去了後，伊愛閣另外閣處理，這是足了工的。
這寡物件你若擲咧回收紙內面，伊嘛是愛閣處理。
普通時仔，咱提著的發票，歹勢，這嘛毋是紙，若是擲佇回收紙內面，
可能會影響著回收廠商亻因的一寡工。
上重點是咱莫製作遐爾濟的糞埽，按呢都好矣，上好是對源頭減用。
◎語詞
．糞埽pùn-sò：主要是這个寫法，可能佮逐家想像(sióng-siōng)的無仝。
逐家想像的兩字是「垃圾lah-sap」，華語的『垃圾』。
．四常sù-siông：有「定定」的意思，嘛有講「誠平常」的意思。
例：這是足四常的代誌。通常會按呢講。
．僫oh：這个回收率真「 僫oh」算。就是「足困難」的意思。
．袂得收煞bē/buē-tit siu-suah：「袂得」較強調「可能」，有能力無？
咱有想欲按怎，但是無法度。
袂收煞bē/buē siu-suah：確定伊就是「袂收煞」，無法度收煞。
有「得tit」佮無得，意思無啥仝。
．收煞siu-suah：除了這種欲共伊結束，另外一種意思是用佇咧彼種
司公(sai-kong)的彼種儀式，講咧「收煞」，彼途的專業用語。
毋過咱一般是攏講「結束」。
．準拄煞tsún-tú-suah：一般咱咧用，可能攏是敢若講
例：啊~莫共計較，準拄煞，莫閣講矣。
例：無幾箍仔，準拄煞，煞煞去。
．無愛挃bô ài ti̍h：就是「無愛」的意思。
例：你欲挃這無？我無愛挃。
這馬攏無咧講矣，這字就無去矣。
「挃ti̍h」就是「欲愛」。
．有幾種講法：比論(pí-lūn)講按怎，
譬喻(phì-jū/lū)講按怎，
比喻(pí-jū/lū)做按怎。「喻jū/lū」漢字是按呢寫。
仝款的意思，無仝款的講法。
．紙篋仔tsuá-kheh-á：佮「盒仔a̍p/a̍h-á」無啥仝。
一般來講，盒仔一定有蓋，篋仔無一定有蓋。
．照步來tsiàu-pōo-lâi：這三字逐家愛注意。
三、看戲齣(hì-tshut)講台語
◎一人道虛，千人傳實。
It jîn tō hi, tshian jîn thuân si̍t.
．這是文言音的讀法。
．「道tō」就是「講kóng」的意思，「虛hi」就是「假ké」的代誌。
意思就是一件假的代誌，一个人講，可能是猶閣予人感覺是假的。
毋過若一千个人攏咧講仝款這个代誌的時陣，講久煞變真的。
咱人類的弱點，濟人講就會感覺敢若是正的。
這馬這个世界流傳的消息遮爾仔濟，應該毋是看濟人講，抑是少人講，
咱都是愛看你有事實佇遐無？敢有啥物證據？逐家愛會曉判斷。
這是做一个現代人一定愛會的。
◎這个劇本，
Tsit ê kio̍k-pún,
戲枝的湠法雖然有較汫，
hì-ki ê thuànn-huat sui-jiân ū khah tsiánn,
猶毋過真有戲肉。
iáu-m̄-koh tsin ū hì-bah.
．戲枝(hì-ki)、戲肉(hì-bah)，咱一般是無咧講，這攏戲劇的才有咧講。
．戲枝(hì-ki)是用「湠thuànn」的，誠活跳。
共伊想做敢若樹枝，就是講戲劇的結構，形看起來有較汫，就是所謂
敢若較無味，可能傷簡單。
真有戲肉(hì-bah)，可能可比真有感情，足飽滇的啥物款的內容存在。
## 2019.11.14《台語講世事》：英國脫歐
一、看新聞講臺語：脫歐漚戲拖棚，英國人捎無摠
＊翻譯
華語：英國脫歐亂糟糟，英國下議院表決通過修正案，要從首相梅伊手中『搶走主導權』。
台語：欲共主導權摠過手。
beh kā tsú-tō-khuân/kuân tsáng kuè/kè-tshiú
﹡特別用「摠tsáng」，逐家較無講遐爾知的動詞。主要就是欲講這字。
有動詞用法佮名詞用法。
動詞：意思就是「本來可能是散散，規把共集倚來，提來」。
名詞：捎無摠sa-bô-tsáng：像講稻草，本來散颺颺，共伊箍倚來，
摠起來的時陣，就會縛縛咧，彼个叫做摠頭。
「捎無摠」就是「捎無摠頭」。
﹡過手kuè/kè-tshiú：伊有幾種意思。
1.親像這个意思是講「到手」、「提著」。
2.例：這錢伊咧過手的。意思是伊咧處理的。
3.例：這个代誌看會過手無？
意思是講看會當達到咱的目標，會完成無？會過關無？
華語：這個選項包括是否要二次公投。
台語：敢欲閣公投一擺。
kám beh koh kong-tâu tsi̍t pái
﹡「敢按怎」，這个疑問句，咱毋通閣講「嗎？」。
﹡是欲公投一擺(kong-tâu--tsi̍t pái) ← 有輕聲
「公投」重點，可能毋但一擺，可能愛足濟擺，無強調幾擺。
是欲公投一擺(kong-tâu tsi̍t pái) ← 照字的變調唸
例：你欲啉一杯(lim--tsi̍t pue)無？你可能會當啉第二杯，無共你限。
你欲啉一杯(lim tsi̍t pue)無？歹勢，你干焦會當啉這杯。
華語：是否要『撤銷脫歐』
台語：共脫歐扯煞
kā thuat-Au tshé-suah
﹡共「脫歐」這个代誌「扯煞」，莫閣講「脫歐」的代誌矣。
﹡扯煞tshé-suah：欲予伊結束。
例：伊佮啥物人「扯tshé」矣。就是這个「扯tshé」。
華語：脫歐主導權
台語：脫歐扞盤的
thuat-Au huānn-puânn--ê
註：《教典》操盤、掌管。
﹡扞huānn：扞家(huānn-ke)、扞公司( huānn kong-si)
華語：從首相的手上變到了國會
台語：對首相變做國會
tuì Siú-siòng piàn tsò/tsuè Kok-huē
﹡「對」啥「變做」啥
華語：英國民眾『看得霧煞煞』，一整個昏頭。
台語：看甲霧嗄嗄，
khuànn kah bū-sà-sà,
規个攏愣去。
kui-ê lóng gāng--khì.
﹡伊這个『霧煞煞』，是對臺語提去用的。
sà-sà這會使講是一種狀聲(tsōng-siann)，抑是咧模擬(bôo-gí)啥物狀態，
這款疊詞其實足濟，漢字嘛是攏硬鬥的。
有人寫→嗄嗄，你看著彼字嘛無一定會曉讀，不如寫羅馬字較清楚，
霧sà-sà一看就知。
﹡愣gāng：雄雄無反應去矣，失神失神。
例：看著我這個月信用卡數單，煞愣去。
華語：認為議員們開了危險而不可預測的先例。
台語：
﹡『開先例』→設新例siat sin-lē，咱是用「設siat」的，毋是用「開」的。
﹡『危險而不可預測的』→危險閣袂拍算得的
huî/guî-hiám koh bē/buē phah-sǹg--tit--ê
你若講「袂得拍算的」嘛是會使。「得」提來頭前嘛是仝意思。
有這个可能性，無法度保證。
華語：只希望事情能儘快地落幕
台語：干焦向望會當緊煞戲
kan-na ǹg-bāng ē-tàng kín suah-hì
﹡『落幕』 → 煞戲suah-hì
華語：不知道再辦公投『正不正確』？
台語：敢著？
kám tio̍h
﹡按呢嘛是疑問句。
華語：因為我更在乎民主。
台語：閣較要緊民主。
koh-khah iàu-kín bîn-tsú
﹡「要緊iàu-kín」這个字，這个詞，感覺足重要的，有兩種意思。
1.真重要的意思。
例：這代誌真要緊。你無要緊。這無要緊。
2.真重視的意思，遮應該是→重視。上要緊，抑是閣較要緊啥。
二、講予你知：英國脫歐
脫歐的代誌，英國人家己都舞甲霧嗄嗄，人英國人都已經按呢矣，咱臺灣人欲按怎來了解脫歐的代誌？
脫歐到底按怎來的？英國人到底咧想啥物？
◎英國佮歐盟的關係
＊1958年歐盟tshím設立，英國無參加
歐洲20幾國加入的歐盟，其實足早以前，in這个觀念就開始形成，
上早以前，是佇1958年歐盟tshím設立，彼的時陣，毋是叫做歐盟，
一開始，國家嘛足少的，主要是針對一寡特別的，譬如講鐵、鋼鐵等等，
這寡問題來做處理。
彼的時陣，英國做一个歐洲遮爾仔重要的國家，無參加。
英國對規个歐洲欲做一个的想法，伊佮逐家是無啥仝款。
＊到1973年才加入
英國到1973年才加入，咱知影英國一開始，亻因對這个想法有足濟佮人無仝款的所在，
亻因徛的角度，佮其它的歐洲國家攏無啥仝款。
＊主要為著國際市場的經濟利益
亻因感覺講欲參加歐盟，主要是為著欲佇國際市場，逐家區域合作，
會當予英國閣較濟的經濟利益。
＊政治、經濟分開看
意思就是in是徛佇經濟角度，政治上亻因感覺愛分開來看。
濟濟的問題，英國人就是按呢想的。
◎英國對歐盟的想法
＊問題
政治上：
．主權、立法權無愛讓：英國無愛共主權佮立法權讓予歐盟。
歐盟有人咧講欲創一个《歐洲憲法》，英國人無贊成。
．移民問題：最近歐洲足重要的一个問題，東歐真濟移民問題，
予英國人感覺歐盟對移民的福利傷濟，in英國無愛按呢。
這嘛是亻因佇咧政治上，有一个無仝款看法的議題。
．無認同政治一體化
英國嘛無認同政治愛一體化。
結果：上具體的行為，歐盟真濟國家簽一个《Schengen(申根)公約》，
英國無簽，咱若去歐洲tshit迌，愛另外辦英國簽證。
經濟上：
．歐盟法律經跤經手
．收十幾億英鎊會員費，無啥效果
移民問題予英國人感覺英國內面的工作機會那來那少。
這寡物件予英國人對歐盟，一直有欲脫離的想法。
結果：上具體的做法，英國無佮其他的歐洲歐盟仝款，用歐元。
亻因的貨幣(huè/hè-pè)是無仝款。
◎脫歐的進度佮方法
為啥物英國變做愛來脫歐？有一个進度。
＊2016年公投，支持脫歐的有51.8%
佇2016年的時陣，英國有辦一个公投，欲來脫歐無？彼是前前首相，
彼的時陣，想講規个英國社會，逐家對這个議題的看法遮爾仔無仝款，
咱來辦一个公投，這个首相伊號做Cameron卡麥隆，
伊本身無支持脫歐，但是伊都辦這个公投。
這个公投的結果就是支持脫歐的英國人，竟然有51.8%，超過一半。
這个公投過了後，英國政府就愛處理。
＊2017~2019年，May提出的草案攏予否決
後一位首相叫做May，伊佇2017~2019年這段時間，伊佮歐盟做一寡
談判了後，就一直提出一寡草案，予逐家來決，結果攏夆否決去。
＊時間直直限(ān)：3/29 → 10/31 → 2020/1/31。
到底欲按怎脫歐，按怎做嘛無人知影，時間嘛一直延，一直延，
對3月29這个草案夆否決，一直拖到10月31，嘛是無法度出來。
這馬這个新的首相起來了後，嘛是仝款，(時間)一直延，一直延，
延到2020年1月31號，(毋知)草案會出來，袂出來。
＊欲硬欲軟？主權佮利益的兩難
英國脫歐有兩个重點，到底欲硬脫？抑是欲軟脫？
硬脫的意思，攏總「脫」，除了歐盟以外，歐洲單一市場嘛欲共脫，
好處是你會當提著家己的自由，所有的權利攏會當提著手，但是
一寡好處你都提袂著。
軟脫的意思，是脫歐，但是繼續留佇咧共同單一市場內面。
這就是兩難，到底是欲提足濟的自由，權利(利益)較少，抑是會當
放棄一寡主權、自由，提著較好的好處。
這齣戲咱閣會當看落去，咱才繼續來關心。
◎語詞
．脫歐thuat-Au：歐洲的「歐」算地名，專有名詞，所以羅馬字大寫。
「脫thuat」啥，對佗走出去。
．歐盟Au-bîng：主要是這个音「盟bîng」，佮清明的「明bîng」仝音。
咱看著這个羅馬字有”b”，有濁音。
．tshím：有兩種意思，一个是「拄才」的意思，一个是「開始的時陣」。
例：歐盟 tshím設立 → 歐盟拄才設立的時陣。
例：我tshím來，較毋捌啥物代誌，望你牽教。
↑拄仔來
．經跤經手kenn-kha-kenn-tshiú，kinn-kha-kinn-tshiú：
佮「縛跤縛手pa̍k-kha-pa̍k-tshiú」，差不多意思。
咱欲織布，織啥物物件，抑是講像蜘蛛吐絲出來，欲創一个網，
講「經網」，彼个動詞號做「經kenn/kinn」。
意思是較絲仔類，抑是足幼的彼種絲線，會纏彼个形。
「經布」、「經網」。
．歐元au-guân：歐洲歐盟亻因咧用的這錢，號做「歐元」。
「元guân」有看著”g”，就是有濁音。
．英鎊ing-pōng：這嘛是讀音的問題，”p”是無送氣的。
．展限tián-ān：這是白話音。就是共期限閣拖長。
．使硬法sái-ngē/ngī-huat：就是硬欲共處理落去。
使sái，就是使用的意思。咱普通時仔嘛定定用。
例：你毋通閣使性地矣。
使犁、使牛，古早農村(lông-tshuan)做穡的時陣。
毋是「駛車sái-tshia」的「駛sái」。
．華語的『硬』，臺語分做兩種「硬ngē/ngī」、「𠕇tīng」，差別佇佗？
﹡𠕇(tīng)的部份物質，已經對啥物變做啥物，結構、材質，抑是啥，
固定就是按怎，無可能閣有啥物伸勼。
﹡硬(ngē/ngī)可能是對啥物變做啥物，形容這種狀態有可能有伸勼。
例：人心肝誠硬。並毋是講伊完全無法度去改變的。
三、看戲齣(hì-tshut)講台語
◎頷頸仔生瘤－－拄著。
Ām-kún-á senn/sinn-liû－－tú--tio̍h.
拄著啥物狀況，就去面對，就是無處理袂用的。
有可能你本來無想欲拄著按呢，但是都拄著矣，就愛面對。
攏是咧講這種狀況，真正拄著，無奈。
大部份這種孽譎仔話(gia̍t-khiat-á-uē)，咱攏干焦講頭前，無一定講後壁。
聽頭前，你著愛知影後壁，這是算臺語孽譎仔話趣味的所在。
◎好囝好𨑨迌，歹囝不如無。
Hó kiánn hó tshit/thit-thô, pháinn kiánn put-jû/lû bô.
以前的家長攏這个想法，現代嘛仝款。
囡仔細漢都乖乖仔，大漢煞變歹囝，是毋是會感慨，就講這種話。
．好𨑨迌hó tshit/thit-thô：無一定真正咧講「𨑨迌」，較趣味，講耍笑，
真古錐，真好𨑨迌，敢若袂輸囡仔會當提來耍。
較無講耍笑的，嘛有可能囡仔若乖乖，好好，是毋是會𤆬出門，
會共人展，會感覺足光榮、足驕傲，會當𤆬出去按怎，無一定𨑨迌。
這囝就是咱的囝，好䆀攏愛共愛。
## 2019.11.21《台語講世事》：首里城大火
一、看新聞講臺語：Oo-khí-ná-uah名勝，首里城著火燒
＊翻譯
華語：大火竄燒，通紅一片。
台語：火舌蓬蓬著，規片紅帕帕。
hué/hé-tsih phōng-phōng-to̍h, kui phiàn âng-phà-phà
﹡咱臺語有疊詞：
．蓬蓬著phōng-phōng-to̍h，就是「煙蓬蓬」的「蓬蓬phōng-phōng」。
．紅帕帕âng-phà-phà：色水後壁會當加兩字的疊字，
例：紅記記âng-kì-kì，
烏趖趖oo-sô-sô，烏嘛嘛oo-mà-mà
青迸迸tshenn/tshinn-piàng-piàng，
黃錦錦n̂g-gìm-gìm，黃kiù-kiù
白泡泡pe̍h-phau-phau，幼麵麵iù-mī-mī
華語：漆黑的夜裡格外顯著。
台語：干烏暝裡特別顯目。
kan-oo-mê/mî--lí ti̍k-piat hiánn-ba̍k.
﹡干烏kan-oo：對進前古早的辭典，(註：《台文華文線頂辭典》)
抾一个詞，叫「干烏」，來形容足暗、足暗、足暗彼款的，無啥物光，
也無啥物色彩，伊毋但「烏」，伊「干焦烏」，形容足深、足暗，
烏甲又閣深又閣暗。
這馬真濟少年的一寡物件，號做『暗黑』，咱會當「干烏」。
「干烏時代」，就是按呢用。
華語：民眾目擊正殿燒毀的當下
台語：民眾現看著正殿予燒燒去
bîn-tsiòng hiān khuànn-tio̍h tsiànn-tiān hōo sio-sio--khì.
﹡現hiān，這字嘛足臺語的，咱這馬干焦會曉講「這現做的」，
親像這款的講法，真濟人攏袂記得矣。
親像「現聽著」嘛會使。這字愛共抾轉來用。
﹡燒燒去sio-sio—khì：一个動詞，動作狀態，疊詞了後＋去。
愛共強調，強調足澈底的，毋但燒去，是「燒燒去」。
例：獎金攏予你「贏贏去」。
贏來的獎金，攏予你「了了去」。
華語：木造骨架接連燒倒，最後整座坍塌。
台語：厝身枝骨接紲坦倒，
tshù-sin ki-kut tsiap-suà thán-tó,
落尾規个崩去。
lo̍h-bué/bé kui-ê pang--khì.
﹡厝身tshù-sin：咱欲強調「彼个形體」的時陣會講。
例：你的厝「厝身」誠勇，風颱攏吹袂倒。
﹡枝骨ki-kut：較咧強調「結構內底的細節」遐的物件。
歌詞內面會聽著，形容查某人，《桂花巷》有一句歌詞：
只賰「枝骨」身已爛tsí tshun 「ki-kut」 sin í nuā
嘛會當講形容花，敢若查某人共當做花按呢咧形容。
﹡坦倒thán-tó：一直倒去，一直倒去按呢，規个倒去。
若這種動作，親像人咧睏的動作，講「坦覆thán-phak」，
面向下跤按呢。
敧敧khi-khi：『側睡』 → 睏坦攲khùn thán-khi
睏坦斜khùn thán-tshiâ：就是你無倒甲正正，睏『對角線』
華語：火災當時，正在進行相關的準備工作
台語：著火燒的時，當咧攢欲辦祭典
tio̍h-hué/hé-sio ê sî, tng-leh tshuân beh/bueh pān tsè-tián.
﹡「當咧按怎」就是這馬這个時陣咧創啥。
例：這馬當咧落雨，你毋通出去。
﹡「攢欲辦啥物貨」、「攢欲按怎」愛共抾轉來用。
例：你緊攢攢咧。攢欲創啥？
例：你莫吵，我攢欲食飯矣。
華語：正殿跟北殿幾乎全燒毀了。
台語：正殿佮北殿強欲燒了了。
tsiànn-tiān kap pak-tiān kiōng beh/bueh sio-liáu-liáu.
﹡強調「強欲按怎」就是到一个程度矣，咧欲到盡磅的一个坎站。
例：強欲氣死。但是實際上，猶未氣死。
華語：火勢持續延燒到南殿
台語：火勢紲咧湠到南殿
hué/hé-sì suà leh thuànn kàu lâm-tiān
﹡『持續』→紲咧按怎，足臺語氣的。
例：我欲去臺南出張，都紲咧轉去高雄。
華語：眾人努力之下才完成重建
台語：眾人拍拚才翻厝翻好勢
tsìng-lâng phah-piànn tsiah huan-tshù huan hó-sè
﹡重起，就講「用翻(huan)的」，「整修」是翻，「重起」嘛是翻，
所以講「翻厝」。
有當時仔，橋嘛是會當用「翻」的，可能斷去，閣共翻。
二、講予你知：首里城大火
最近咱看著新聞，感覺足毋甘的，就是日本Oo-khí-ná-uah（沖繩）這个所在，有一个古蹟，號做首里城，竟然著火燒，看著這个畫面，感覺心足疼的，因為這真正是真無彩的代誌。
因為日本離咱遮近，誠方便，Oo-khí-ná-uah（沖繩）又閣是離咱上近的所在，所以一年有足濟咱臺灣人去Oo-khí-ná-uah觀光。
Oo-khí-ná-uah上出名的就是伊的風景誠媠，海真清氣，去遐耍水，耍一寡水上活動，攏非常四序。當然Oo-khí-ná-uah的古蹟是足重要的。
◎臺灣佮Oo-khí-ná-uah的關係
＊出國𨑨迌it-tòo讚的所在
Oo-khí-ná-uah算是咱臺灣人出國𨑨迌it-tòo讚的所在，閣近又閣方便。
而且文化、自然、歷史，攏非常豐富。
＊舊年290萬遊客，臺灣人占三成
舊年亻因有290萬外國人觀光客，去Oo-khí-ná-uah，臺灣人占三成。
＊精神代表首里城10月火厄
佇咧Oo-khí-ná-uah，亻因這馬已經有予聯合國，做是「世界遺產」。
其中有一个足代表的，就是首里城。
結果首里城佇10月底，咱有看著這个新聞，竟然火厄，著火燒。
逐家看著這个畫面，攏非常驚惶，日本真濟人攏流目屎。
＊參觀人次500，臺灣人占三成
這个首里城，做這个Oo-khí-ná-uah非常重要的一个點，
舊年去參觀的人，有500萬人，仝款咱臺灣人嘛是占三成。
◎首里城的歷史
首里城到底起偌久矣？這馬猶閣無一个定論。
＊古早琉球國的王城，建設幫闊(png-khuah)
咱知影Oo-khí-ná-uah古早時，是號做「琉球國」。
佇琉球國統一進前，in閣有分做三个王國，有北爿、南爿佮中部。
其中首里城就是「中部」這个王國的王城，尾仔統一，變做一个琉球國了後，
伊繼續嘛是琉球國的王城，而且建設愈來愈闊。
＊1879年日本食琉球，1933年指定做國寶
一直到1879年琉球國去予日本人占去、食去了後，日本人嘛是共這个首里城保留起來，
一直到1933年，日本共指定做國寶。
＊二戰挖涵空設指揮所，1945年美軍空襲
一直到二次大戰的時陣，因為日本共首里城挖涵空(âm-khang)，做一个指揮所，
所以變做是美國人攻擊的對象。
1945年去予美軍空襲了後，就歹去矣。
＊1992年正殿復原，2000年列做世界遺產
（註：範圍無包括重起的宮殿，這擺火厄無影響遺產資格）
到1992年正殿閣共起轉來，到2000年，列做「世界遺產」。
當然這个範圍，毋但講這个首里城，猶閣有Oo-khí-ná-uah邊仔有一寡墓等等，
規个攏是「世界遺產」。
這回燒去的王城，因為是尾仔起的，世界遺產內面，無包含這个重起的宮，
所以無影響著亻因做「世界遺產」的資格。
◎有關首里城重起
往陣：
＊已經有幾若擺翻厝，重起
頂回起的時陣，離這馬嘛已經20幾年前矣，這馬日本政府共重起的工作，
欲交予現代的神社，現代的寺廟的人去起。
＊神社師傅對琉球建築無熟
但是Oo-khí-ná-uah厝的形式，佮日本是完全無仝款的，所以頭一个問題就是，
神社的師傅對琉球的建築，亻因無熟。這是足重點的。
＊梁柱大箍，柴愛對臺灣進口
因為起宮殿，愛足大支的柴，足長的柴，足闊的柴，柴愛足大箍。
這馬：
＊臺灣禁止松梧出口
這个柴，進前，in欲重起的時，是對臺灣進口的，但是這馬，咱臺灣已經禁止松梧出口，
這个柴對佗來，這馬嘛是真大的問題。
＊厝頂赤瓦技術失傳
厝頂紅色的瓦，這个技術嘛已經失傳矣。
＊募款募著3.25億日票
這馬種種的問題，目前為著欲起這个厝，募款已經募著3.25億日票。
因為亻因對建築無熟，Oo-khí-ná-uah有一个活動，歡迎全世界所有的人，你若去過Oo-khí-ná-uah的首里城，你有翕相，毋管你是佗一个角度翕的相，攏會當提供予亻因，予亻因收集全世界來的相，對每一个角度，欲共首里城的外型，收集起來。
希望手頭內有相片的觀眾朋友，會使共亻因鬥相共。
佇遮咱嘛祝福這个Oo-khí-ná-uah的首里城，早一日會當閣共起起來。
◎語詞
咱遮一寡較古老的古蹟，抑是較古早的一寡建築，攏捷面對火厄的慘境，因為臺灣嘛定發生，Oo-khí-ná-uah的代誌，予咱感覺誠毋甘。
看著新聞內面，Oo-khí-ná-uah遐的人咧流目屎。
咱臺灣人對文化資產的觀念，無遐爾重，若像講彼敢若無要緊，燒去都燒去，有的家己燒去，無就是下性命欲共拆起來，這就是觀念需要改進的所在。
．Oo-khí-ná-uah
．琉球liû-kiû/khiû：這是亻因以前的國名。
．it-tòo讚∥it-tòo-tsán：看起來是日語的「一度(いちど)」，是一擺。
這馬會當講是臺語去創作出來，但是是對日語這个詞來的，毋過，咱閣共改造彼个意思，
共創新，這是臺語詞，是對日語的想法來的。
是足讚、足讚、上讚彼的意思，讚到啥物程度，你只要試一遍，就感覺讚，免試第二遍，
就是非常讚的意思。
．火厄hué/hé-eh：「厄eh」這字這馬咧欲予人袂記的矣。
咱這馬可能攏叫是是「災tsai」、「禍hō」彼兩字。
咱過去是講「厄eh」，「災」嘛是有咧用。
像「火厄」、「車厄」，咱會講「厄」這个字。
．幫闊png-khuah：擴大(khok-tāi)、擴建(khok-kiàn)的意思。
例：我共朋友「幫png」一間房間蹛。『分租』的意思。
「幫png」這字普通時嘛會使用。
《教典》擴張、擴大。例：厝「幫png」較闊(房子擴大)。
．涵空âm-khang：『涵洞』，算若像「地下道」，有紅毛塗的管，足大的管，
先有彼个物件，頂面才鋪橋造路。
涵âm是白話音，人的名內面可能有這字，唸文言音hâm，
原本的意思是「浸澹tsìm-tâm」，抑是水真濟，潑入去船內。
水傷濟，水足濟，涵的意思。
．遺產uî-sán：(北部腔)佮胃藥仔仝音。例：毋通食傷濟「胃散」。
這字「遺uî」愛注意，毋是「î」。
．結構kiat-kòo：逐家定定會唸毋著去。
．宮殿kiong-tiān/king-tiān：宮殿kiong-tiān，這是文音的讀法。
宮殿king-tiān是白話音的讀法。
一般來講，這个詞大部份攏讀文言音「宮kiong」。
天后宮Thian-hiō-kiong，媽祖宮Má-tsóo-king，仝一字。
澎湖馬公(Má-king)就是「媽祖宮」的簡稱。
．厝瓦tshù-hiā：厝頂崁(khàm)的彼瓦。
三、看戲齣(hì-tshut)講臺語
◎見一事，成一智。
Kiàn it sū, sîng it tì.
這是文言音的讀法，六字攏是讀文音。
因為咱的俗語，有的用文音讀，有的用白音讀，大部份是白音，
毋過有時仔嘛會出現這種文音的俗語。
意思是你愛經過這个代誌，可能就會提升一擺的智慧。
文音佮白音是咱臺語足特別的一个現象，相對較複雜，是咱的特色。
◎翁仔某本是相欠債，無緣無法度做夫妻。
Ang-á-bóo pún sī sio-khiàm-tsè, bô-iân bô-huat-tōo tsò hu-tshe.
閣有鬥句，「妻tshe」佮「債tsè」。
相欠債，一般是序大攏會按呢苦勸咧冤家的翁仔某，因為做翁仔某，
本來就是兩个人愛互相配合，所以講有一點仔相欠債的感覺。
所以緣份若到，就會離緣，這嘛是足自然的代誌。
## 2019.11.28《台語講世事》：臺灣的柿仔
一、看新聞講臺語：柿仔
柿仔，這馬足濟人攏足愛食的，尤其是秋天的時陣，柿仔特別甜。拄才看著的是嘉義的新聞。
＊翻譯
華語：攤位擺滿了各式各樣不同品種的柿子。
台語：百百款無仝種的柿仔，
pah-pah-khuán bô-kâng/kāng tsíng ê khī-á,
擔仔位排滿滿。
tànn-á-uī pâi muá-muá.
﹡百百款pah-pah-khuán，濟濟項tsē/tsuē-tsē/tsuē-hāng：
無「百款」，一定愛兩字「百百款」。
咱愛特別強調這个「款」字，逐家定定攏袂記得用，
攏會講「這種的，我欲挃這種的」，有的干焦會曉講「這个、這个」，
攏退化去，量詞攏總毋知影。
咱會當講「我欲用這款的」，「款」愛共抾轉來。
閣有足濟用法，
例：你誠好款喔！ ←「誠好款」嘛有可能誠歹款。
例：這項物件好食款。
﹡擔仔位tànn-á-uī：咱愛加一个「仔á」，袂使「 擔位」。
因為擔仔基本上攏是袂講蓋大，蓋闊，所以就加一个「仔」，
相對較細的一个擔仔，嘛較古錐。
因為這馬足濟人攏辦一寡『市集』，咱就會使講
我佇遐有一个「擔仔位」，而且是用這个漢字。
﹡滿滿muá-muá：咱通常白話音「滿muá」攏是講實際的意思，
是講真正都滿矣，所以佇遮用「滿滿」。
可能嘛是有人用「滿buán」，若就意思來講，用白話音OK
華語：授果時不是很好，產量減差不多將近2/3。
台語：開花的時牢無濟，
khui-hue ê sî tiâu bô tsē,
產量減欲三份二。
sán-liōng kiám beh/bueh sann hūn jī/lī.
﹡開花的時，花粉牢無濟，『授粉』就是共粉予伊牢咧，才會生。
﹡一定愛先知影是「產sán」量，有的人叫是是「tshán」量。
﹡減欲kiám beh/bueh，就是「減將近偌濟」。
因為這馬受華語影響，攏會講「減差不多～」，較無臺語氣。
咱愛講「減欲按怎」，這个「欲」佇這个時陣，
佮「強欲」仝意思，咧欲到彼个程度。
﹡三份二sann hūn jī/lī，就是三份之二的意思，咱會當講較簡短。
數學的物件，咱嘛愛予臺語來參與。
例：『1+1=2』→一加一等於二（it ka it tíng-î jī/lī）
『2-1=1』→二減一等於一（jī/lī kiám it tíng-î it）
『2x3=6』→二乘三等於六（jī/lī sîng sann tíng-î la̍k）
『6/2=3』→六除二等於三（la̍k tû jī/lī tíng-î sann）
咱有一个前輩，臺大數學系的楊維哲教授，伊古早就是攏用
臺語教數學，教微積分。
微積分都會當用臺語來教，咱這簡單的，其實是學校無教，
咱應該予伊全面轉來。
華語：相對品質也提升很多
台語：毋過品質嘛加真好
m̄-koh phín-tsit mā ke tsin hó
﹡因為頭前是咧講產量減，「毋過m̄-koh」意思就是講雖然產量減，
另外一面是按怎，所以用一个「毋過」。
﹡「加ke」是白話音，「加足濟」、「加真好」。
華語：柿子果實碩大，清甜爽口。
台語：柿仔大粒，清甜紲喙。
khī-á tuā-lia̍p, tshing-tinn suà-tshuì.
﹡咱講果子大粒，較偏圓形的攏是「粒lia̍p」。
﹡紲喙suà-tshuì、紲攤suà-thuann、
例：這个物件你紲手共做予完。 → 紲手suà-tshiú
例：咱這馬定定去咖啡廳講『我要續杯』→ 我欲紲杯。
華語：（慧盈老師無唸）
台語：柿仔會當做這「柿粿」、薄餅、ái-sirh khu-lìn-muh、敆藥仔
khī-kué/ké, po̍h-piánn, ái-sirh khu-lìn-muh, kap-io̍h-á.
﹡柿粿khī-kué/ké：一般來講，咱講愛有米的物件，才號做「粿」。
可能伊 𩚨𩚨(khiū-khiū)，食起來敢若有米咧。
﹡『脆片』 → 薄餅po̍h-piánn。
﹡『冰淇淋』 → ái-sirh khu-lìn-muh：咱對英語日語化講法。
咱這馬是看羅馬字，有一个「ir」，是泉州腔的海口彼方面
像講「煮飯tsír-pn̄g」嘛是這个母音「ir」。
﹡敆藥仔kap-io̍h-á：敆入去漢藥仔內底，咱若有去敆過，就知影
伊就是「一敆tsi̍t-kap」按呢共包起來，「一敆一敆」。
華語：脫澀就可以。
台語：就通去澀。
tō thang khì-siap
﹡去澀khì-siap：共彼个澀味去掉。
除了去澀，咱閣會當講「去油khì-iû」、「去臊khì-tsho」。
二、講予你知：柿仔
這馬這个季節，有真濟好食的物件攏走出來矣，譬如講這个季節，就食蟳(tsîm)、食栗子(la̍t-tsí)啦，其中一項就是咱今仔日的主角：柿仔。
若是簡單欲來共分，柿仔分做兩大類，一種會當愛人工去澀的澀柿仔，一種是甜柿仔。
◎來源歷史
＊甜柿仔1980年代對日本來
就是講對樹仔頂，差不多八分的時陣挽落來，就直接會當食，
免閣共去澀，這種的號做「甜柿仔」，是尾仔才來到咱臺灣，
是佇咧差不多1980年代，才對日本傳入來，這種削皮就會當食。
＊臺灣柿仔是清國移民，對閩、粵紮來的
咱傳統的柿仔，就是澀柿仔，臺灣柿仔是佇咧大清國的時陣，
對福建、廣東彼爿的移民，共伊紮入來咱臺灣。
＊《諸羅縣志》：傳入來欲300年
咱對一寡資料，就會當看會出來，傳入來咱臺灣已經欲300年，
遮爾仔久矣，對《諸羅縣志》會當看著。
◎產地佮品種
這柿仔咱一直食一直食，對伊敢有了解？
＊主要產地是新竹、苗栗、臺中、嘉義
佇咧咱臺灣，柿仔主要的產地，是佇咧新竹、苗栗、臺中、嘉義。
＊新竹上出名，佔產量大約9成
這其中，咱知影新竹的柿仔是特別有名，因為伊占產量大約仔九成。
＊無法度去澀的，愛做成柿粿
這馬咱食的柿仔，有分做
對樹仔頂挽落來，差不多八分熟的時陣，就會當削皮直接食的，
這號做甜柿仔。
有一部份號做澀柿仔，另工咱共去澀了後，有的會當直接食，
有的你若共去澀，嘛無法度去澀的，咱著愛做成柿粿來食。
共曝(pha̍k)予乾，足濟程序(thîng-sū)來做柿粿來食。
＊來簡單介紹兩種咱臺灣人定定食的柿仔的品種：
1.石柿仔(tsio̍h-khī-á)無子，較細粒，加足甜
2.牛心柿仔(gû-sim-khī-á)較大粒，閣有兩个名，號做「浸柿」佮「水柿」
因為真濟種柿仔的人，共牛心柿仔挽落來了後，愛共伊去澀。
共浸佇石灰(tsio̍h-hue)水內面，所以號做浸柿仔，抑是水柿仔。
◎「曝柿仔」新竹的鬧熱光景
＊光映映的柿仔排甲齊齊齊
應該真濟人看過這款的好光景，一寡柿仔愛共做做柿粿，才通食。
但是做做柿粿，有足濟程序，逐回佇咧這馬這个時間，去到新竹，
攏會當看著真濟光映映的柿仔，排甲齊齊齊，排足濟，日頭照來，
非常的好看。
＊歇睏日專工走去遐翕相
真濟愛攝影(liap-iánn)的人，歇睏日攏會專工去到遐共亻因翕相。
＊曝日、吹九降風、烘過、捏過、勼水了變做柿粿
柿粿愛先曝日，曝日以外，愛閣吹新竹上蓋有名的號做「九降風」。
曝日、吹風，閣愛共烘過，閣愛共捏過，等伊勼水了後，才變做
咱咧食的柿粿。這是規个程序。
◎柿仔的好佮愛注意的
講著食柿仔，真濟人攏知影，咱佇咧逐年的簿仔頂懸，攏會當看著這柿仔袂當按怎按怎，袂使佮啥物啥物鬥陣食，你敢知影是啥物道理？
＊足營養、維生素C是別項果子的2倍
柿仔的好處當然非常的濟，聽講規粒柿仔，攏會當利用，
包括伊的皮，葉仔等等，伊是足營養的，而且伊的維生素C，
是別項果子的2倍。
＊促進新陳代謝佮消化
遮爾好的果子，又閣會當促進新陳代謝佮消化。
＊袂使佮蟳仔做伙食、空腹食
柿仔袂使佮海鮮類鬥陣食，譬如講蟳，毋通佮蟳鬥陣食，
袂當空腹食，袂當胃酸過度的時陣食。
＊Tannins(『丹寧』)成份加海產佮胃酸分泌
＊會予人反腹、腹肚疼，消化不良
因為柿仔內面有一種物件號做「單寧」，這个成份若佮酸類的物件，
抑是講真濟海產類內面有的一種物質，結合起來了後，伊都會產生
一寡膏膏的物件，這个物件會予你反腹啦，腹肚疼啦，消化不良，
確實就是這个原因。
這个原因，咱若知，咱就會當避免(pī-bián)這款的情形。
◎語詞
．蟳仔tsîm-á：秋天一寡產物。華語攏寫『螃蟹』的『蟹』，
咱臺語是講「蟳tsîm」， 蟳仔是一个通稱。毛蟹還毛蟹。
咱咧食的，一般是蟳仔類的。
通稱是按呢，但是每一種品種，攏有家己的名。
譬如講「沙公」、「沙母」，嘛有「蠘仔tshi̍h-á」，
咱攏共敆佇蟳仔類內底，是一个總稱。
．栗子la̍t-tsí：敢若過去無啥印象有食，佇一般生活敢若無。
這栗子敢是咱臺灣的物件？
．sàn-bah/秋刀tshiu-to：若是照漢字唸，是「秋刀tshiu-to」，
但是咱一般講sàn-bah，這種魚敢是外來魚？
細漢時敢若無食這款魚，算是較中小型的魚，沿海敢若有咧掠。
以前較細漢，較捷食四破魚。
．挽bán：這个動作，「挽」柿仔。果子大部份攏講「挽bán」，
對頂懸提落來，這號做「挽bán」。
．曝pha̍k：日頭曝。人嘛愛「曝日pha̍k-ji̍t/li̍t」。
曝菜脯pha̍k tshài-póo，烏魚子、鹹菜攏會使，攏用曝的。
．浸tsìm：一般攏講「浸咧水」，但是「浸tsìm」有兩个意思：
一个是「浸水」的彼種「浸tsìm」，
另外一个可能較延伸的意思，就是講你長久佇啥物款的環境，
彼嘛是叫做「浸tsìm」。
譬如講咱「浸」磺水，就是規个身軀浸佇咧磺水內面。
但是你會使講：我「浸」佇咧音樂內面，就是第二種意思。
．捏lia̍p：共「捏捏咧liap-liap—leh」，「捏捏咧lia̍p-lia̍p--leh」。
註：《教典》捏，有兩个音lia̍p、liap。
例：共囡仔「捏lia̍p」予大漢，就是這个「捏lia̍p」。
看伊欲啥物形，按呢用手共...。
囡仔以外，咱會講「捏塗尪仔lia̍p thôo-ang-á」。
．光映映kng-iànn-iànn：形容光的光度，足光，足顯目(hiánn-ba̍k)。
．專工tsuan-kang：真濟人會專工走去共伊翕相，專工走去佗(tueh)。
．勼水kiu-tsuí：變做較細去矣。衫嘛會勼水。
柿仔愛等伊勼水，才會當食。
．斟酌tsim-tsiok：
例：咱愛「斟酌」聽阿惠老師講。斟酌就是按呢寫。
三、看戲齣(hì-tshut)講臺語
◎我嘛向望○○會當長志。
Guá mā ǹg-bāng ○○ ē-tàng tsiáng/tsióng-tsì.
．長志tsiáng/tsióng-tsì：誠有志氣，誠上進的意思。
愛有志氣，愛愈來愈大漢按呢。
長志tsiáng-tsì，長志tsióng-tsì，腔口無仝。
這个詞這馬嘛足罕得聽的，今仔特別共講出來。
一寡臺語戲攏聽會著，這馬漸漸仔閣聽無矣。
所以講咱序大可能會當記起來，講「向望你會當長志」。
◎一支喙敢若機關銃按呢ta̍k-ta̍k叫，
Tsi̍t ki tshuì kánn-ná ki-kuan-tshìng án-ne/ni ta̍k-ta̍k-kiò,
我聽甲鬢邊sia̍k-sia̍k叫。
guá thiann kah pìn-pinn sia̍k-sia̍k-kiò.
這句攏有聲的感覺，形容甲足讚的。
．機關銃真正是ta̍k-ta̍k叫，形容彼个聲音。
．鬢邊sia̍k-sia̍k叫，若有這个症頭的人，就會感覺講：確實就是按呢。
這句咱嘛是對彼个廣告學來的。
．咱臺語定定有「OＯ叫」、「ＸＸ叫」，是咧形容啥物叫聲。
例：外口哪會雄雄飛來足濟粟鳥仔，ki-ka叫。
例：這个查某囡仔驚甲吱吱叫。
例：這个電風轟轟叫。
例：形容人講話敢若足吵、足大聲，一直敢若機關銃按呢，
咱嘛會當講伊「kia̍k-kia̍k叫」。
各種叫法攏有，這就是咱臺語足特別的所在，咱愛共抾轉來用。
## ## 2019.12.05《台語講世事》：囤房稅
一、看新聞講臺語：無殼蝸牛運動30週年，居住正義聯盟發起夜宿街頭
＊翻譯
華語：適逢無殼蝸牛運動30週年。
台語：拄搪無殼露螺運動30年，
tú-tn̄g bô-khak-lōo-lê ūn-tōng sann-tsa̍p nî,
﹡『適逢』→拄搪tú-tn̄g，「拄著tú-tio̍h」佮「搪著tn̄g-tio̍h」。
原本「拄」佮「搪」是「拄著」佮「搪著」的用法。毋過，
「搪」有彼種敢若「無想到會去按呢」的意思。
這馬是講「拄好按怎」，用佇遮小可淡薄仔怪，伊毋是為著
拄好按怎來做這件代誌，是因為彼个日子所以欲做這个代誌。
所以這个「拄搪」毋是「拄好搪著」，是搪著這个日子。
華語：要政府正視房市的議題
台語：向政府對房屋市草的議題，
ǹg tsìng-hú tuì pâng-ok tshī-tsháu ê gī-tê/tuê,
著愛看過目。
tio̍h-ài khuànn-kuè/kè-ba̍k.
﹡向政府ǹg tsìng-hú，其實這毋是向望政府，是對政府的意思。
若講同時有「向望」，雙關嘛會使。
「向ǹg」的白話音，這馬較少人用，攏叫是講是「向hiòng」。
這个「向ǹg」，毋是干焦「向望ǹg-bāng」，有低對懸的意思，
有另外對佗位到佗位的意思，共政府講的意思。
﹡市草tshī-tsháu：就是市場的狀況的意思。
﹡看過目khuànn-kuè/kè-ba̍k：看著，了解著，閣愛去注意的意思。
毋但影過去，閣愛注意。
華語：持有四戶以上的擁房大戶
台語：蓄有四間厝較加的大富戶
hak ū sì king tshù khah-ke ê tuā-hù/pù-hōo
﹡因為咱臺語有一个講法，叫做「蓄hak」。
﹡四間厝「較加」，就是比四間厝閣較濟。
﹡『以上』→較加khah-ke，『以下』→較減khah-kiám。
一般攏「較加」才會講，「較減」較袂講，「較無」嘛會使。
較無偌濟？較無四間厝。咱會講「較無啥物貨。」
﹡富戶hù/pù-hōo：「富hù」是文言音。
這馬咱攏講「好額人」，「有錢人」。
過去，佇日本時代就有這个講法。
台語：抾囤房稅。khioh tún-pâng-suè/sè
﹡欲抾稅，政府共人民抾稅，是用「抾khioh」這个動作。
﹡囤房tún-pâng：意思是講房間毋但一間，才會用囤，買起來囤。
﹡抾khioh：臺語內面足濟「抾」的，足濟意思的。
稅金用「抾」的。
衫「抾抾咧」。
裙有足濟襇(kíng)，叫做「抾襇裙khioh-kíng-kûn」。
這个菜食無完，你共「抾抾咧」。
產婆欲接生，叫做「抾囡仔khioh-gín-á」。這是較抽象。
台語：外來語的寫法thiàn-tooh。
這馬足濟老爸老母會𤆬囡仔去露營，著愛紮thiàn-tooh，
愛共弓起來，搭起來，搭thiàn-tooh。
這種外來語，咱咧寫的時陣，是毋是有一寡愛注意的所在？
這是一種寫法，因為伊是對英語來的，這是日語先翻，
咱抾來用，日語共英語翻，就是每一个音節攏有母音，
所以彼个tent，”t”無母音，伊就加一个母音，結果日語的講法
佮咱這馬臺語的講法，無一定完全仝款，因為咱臺語有聲調，
日語是無聲調的，所以有可能伊彼个調，佮咱講的無完全仝，
毋過，咱聽著臺灣人按呢講的時陣，咱照聽著音，推論臺羅
彼个原則，去共寫按呢的聲調。
這是完完全全咱臺語就著矣，因為咱有聲調。
thiàn-tooh後壁是入聲，日本人無入聲，但是咱講出來
感覺是有入聲。
華語：小小的布篷、簡單的睡袋，就直接席地而睡。
台語：布篷細細的仔，袋仔囊咧就睏塗跤。
pòo-phâng sè/suè-sè/suè-ê-á, tē-á long--leh tō khùn thôo-kha.
﹡細細的仔sè/suè-sè/suè-ê-á，咱嘛會定定講「這大大的」。
「細」著愛有「仔á」。
﹡囊long：這个動詞，咱嘛定定會用。
例：你這衫愛共囊咧，穿這有手䘼(tshiú-ńg)的，手囊入去。
例：批囊phue-lông：共批「囊入去long--ji̍p/li̍p-khì」批囊。
二、講予你知：囤房稅
這馬有一个運動，就是對蹛徛正義的問題，逐家攏咧討論。
厝，就是咱每一个人遮風閘雨(jia/lia-hong-tsa̍h-hōo)的所在，真濟人拍拚一世人，就是為著欲買一間厝起來。但是這个問題，這馬變做真濟人無法度達成的夢想。
咱今仔日好好來討論「囤房稅」，敢會當幫助咱買厝較方便，較利便，閣較容易？
◎1989年的無殼露螺運動
1989年有一个運動，造成真大的影響，號做「無殼露螺運動」。
＊佇地價上貴的忠孝東路過暝
彼的時陣，有上萬人，幾若萬人，去蹛佇咧地價上蓋貴的臺北市
忠孝東路，佇咧遐過暝。
＊抗議財團激市場起厝價
為著欲抗議彼的時陣真濟財團，為著家己欲做生理，共房市市場，
厝價起甲有夠懸。
＊三冬一坪11萬 → 44.5萬
到底是有偌懸？這馬有一个數字，予逐家看一下。
以注文厝(tsù-bûn-tshù)，就是講厝猶未起好，先予逐家注文，
這个注文厝，彼个時陣，對一坪11萬，三冬就起到44.5萬。
所以你講起了有夠懸無？這真正是非常恐怖的代誌。
＊政府藥方
彼的時陣，政府針對這个運動，有提出兩个藥方：
1.起國民住宅：無效應
2.貸款放冗：愈補愈大空，予厝價愈起愈懸。
◎現此時居住正義聯盟的訴求
30年前的問題，到這陣敢有解決？
蹛徛正義聯盟in最近有一个運動，嘛是仝款去到忠孝東路，
行上街頭。
這个聯盟當初時咧成立的時陣，亻因有提出三个訴求：
＊第一个訴求：
登錄資訊無明、注文厝袂當即時入去 → 實價登錄2.0
這馬咱買厝，攏知影有這个號做「實價登錄」， 這个實價登錄，
in感覺講這个登錄資訊無夠明，而且有一个足大的問題，就是講
這个實價登錄干焦針對這寡二手的厝，一寡新厝、注文厝根本查無，
注文厝攏袂當即時入去。
這个問題愛解決，所以in要求愛實價登錄2.0。
＊第二个訴求：
社會住宅起了慢、價數貴 → 分配資源予弱勢者
社會住宅，雖然逐家攏咧講，但是起了有夠慢，而且價數真貴。
閣來是一个足大的問題，因為這个住宅起了後，逐家想講是毋是
有需要的人攏會當去買？結果發現根本都毋是按呢，變做
有真濟好額人嘛會當買著社會住宅。
所以這个聯盟，主張講愛來好好仔檢討，一定愛共社會住宅分配予
弱勢者。
＊第三个訴求：
要求愛來抾囤房稅。
◎囤房稅
有一寡人共厝買lueh(落來)，買起來囤，有的人講是為著欲趁差價，所以愛抾囤房稅。
＊北市建議
臺北市政府有提出一个建議：
1.一間，家己蹛：1.2% → 0.6%。
你若是一間厝，家己蹛，本來1.2%的稅金，愛降到0.6%，
鼓勵逐家買一間，家己蹛就好。
2.六間以上，無蹛：3.6% → 4.8%
你若是買六間以上，而且你無咧蹛，本來稅金是3.6%，
這馬欲起到4.8 %，這種的就是講你是毋是欲買來做手(tsò-tshiú)。
所以這是無鼓勵。
＊承祖業、買厝養老、做民宿旅館
這个建議提出了後，真濟人講這敢若無公平。
有的人毋是講六間以上，真正買來做手，有的人是承祖業；
有的人有六間，買來欲租人，因為欲收租來養老；
有的人有六間以上，是欲來做民宿旅館。
這攏是有可能。
＊抾「空房稅」較正當
囤房稅欲按怎處理才好？抾囤房稅不如抾「空房稅」，較正當。
＊厝價懸拄天是愛解決的社會問題
這規个問題，逐家猶閣咧討論當中。
只是毋管按怎講，厝價傷懸拄天，確實是咱逐家看現現的問題。
政府當然愛來解決這个社會問題，因為真濟人講這馬逐家無欲生，
就是因為厝傷貴，囡仔飼袂起，所以這个問題，確實愛來解決。
◎語詞
．囤tún：本調是第２聲，變調了後變第１聲。
一定是足濟物件，才會用著囤，孤一項就毋免囤，無所謂囤。
依實體的物件， 咱會講「疊thia̍p」、疊、疊，疊甲規个，
咱會講「囤一堆啥物貨」。
例：你閣囤一堆啥咧遐啦？
一般攏足濟，若山咧。
例：這馬啥物物件足俗，買一寡轉來囤。
以早有一站，買衛生紙來囤。
．遮風 閘雨jia/lia-hong-tsa̍h-hōo：
例：這馬有雨，我有雨傘，我共你遮一下。
閘tsa̍h：共啥物物件擋牢的。
遮jia/lia，閘tsa̍h，一般咱嘛有兩个鬥做伙用，遮閘，遮閘，
其實小可無仝。
遮，一般當然就是遮日、遮雨這種的，其實你嘛是提物件，
共啥物物件閘咧，所以概念(kài/khài-liām)上差不多。
毋過，會用佇無相仝的所在。
例：水閘tsuí-tsa̍h：有水，欲共水閘起來。就袂使講「水遮」。
．蓄hak：買較懸價數的，較貴的物件，咱會用「蓄hak」這个字。
譬如：厝、車、田、地，這種的，有人講嫁妝嘛會當用蓄的。
這个觀念，這馬可能無一定矣。
．露螺lōo-lê：咱都知影講爬了足慢的彼號做「露螺」。
嘛有歌叫做「露螺」。
有的人手頂懸，嘛有一隻「露螺(ROLEX)」。
．牚懸thènn-kuân：『撐高』，牚thènn：共牚予懸，本來低低的。
牚懸，就是按呢寫。
．注文tsù-bûn：這對日語來的，就是有約、有訂，事先訂的意思。
一般用佇無現貨的物件，才會用著「注文」，愛事先訂。
．登錄ting-lo̍k/lio̍k：其實原本這个字「錄」，照講是「lio̍k」的音，
毋知按怎才變做「lo̍k」的音。所以是「登錄ting-lio̍k」。
這是文言音，就是登記的意思，這嘛是對日語來的。
「錄li̍k」是白話音，就是抄寫，嘛算記錄彼个意思。
例：這筆數，你共錄(li̍k)一下。是這个「錄li̍k」。
．承祖業sîng-tsóo-gia̍p：繼承祖公的財產，彼个意思。
咱臺灣繼承祖公的財產，足趣味的講法。
祖公產tsóo-kong-sán，祖公仔產tsóo-kong-á-sán，是名詞。
有的人用「屎sái」來講，就講伊「放落來的物件」，
所以有人講「祖公仔屎」。
當然有的人可能用佇較譬相(phì-siùnn)的用法，
例：伊攏干焦靠祖公仔屎爾，有啥物了不起？
可能咧剾洗的意思。
．做手tsò/tsuè-tshiú：敢若講你欲造假(tsō-ké)，抑是欲動啥物跤手，
攏會使用。
例：這个數，你毋通做手喔！
三、看戲齣(hì-tshut)講臺語
◎氣死驗無傷。
Khì-sí giām bô siong.
就是叫你莫受氣。
．氣死有兩个音，一个是「氣死khì-sí」，一个是「氣死khì--sí」。
足濟動詞，後壁有一个「死」的，其實攏咧形容彼个程度。
是氣到足嚴重的程度，是「氣死khì--sí」。
「氣死khì-sí」就是真正氣到死去矣，氣甲死去驗無傷。
頭前這个動詞，若有變調，就表示彼个狀態真正到死去矣。
若是頭前這个動詞無變調，後壁是輕聲，譬如講：
氣死khì—sí、笑死tshiò--sí，其實無死，是用「死」來形容
彼个嚴重的程度。
這是咱足臺語的用法。
◎老頭家對我的恩情較大天。
Lāu thâu-ke tuì gáu ê un-tsîng khah tuā thinn.
．啥物較大啥物，Ａ較大B，有這種講法。
．較大天khah tuā thinn：就是比天較大。
例：較慘死，就是比死較慘。
## 2019.12.12《台語講世事》：母語厝內學
一、看新聞講臺語：
《臺文博覽會》佇咧高雄舉辦的，拄辦煞，是足大的活動，上重要的是予逐家一个完全講臺語的環境。
◎翻譯
華語：一看到有教講臺語的地方，家長都好開心，
臺語：一下看著有所在咧教臺語
tsi̍t-ē khuànn-tio̍h ū sóo-tsāi leh kà Tâi-gí/gú
﹡一下看著tsi̍t-ē khuànn-tio̍h：有的人會講「一看著」，嘛毋是袂使，這按呢較有臺語氣。
本來是「一下tsi̍t-ē」，因為後壁閣有字，彼的ē愛變低，一下看著啥，一下按怎，
足臺語氣的物件，提出來佮逐家講。
例：我一下看著你，我心情就好。
華語：要問個仔細
臺語：欲問予透機
beh mn̄g hōo thàu-ki
﹡透機thàu-ki：一般攏會寫樹枝的「枝」，事實上是這个。
透機就是詳細的意思，應該是「天機」的「機」。
例：話若欲講透機，目屎就掰(pué)袂離。嘛是這个「機」。
華語：每一攤攤商臺語都講得很溜，一聽商品名稱，很能傳出特色。
臺語：商品號名，真有臺語氣。
siong-phín hō-miâ tsin ū Tâi-gí/gú-khuì
﹡因為咱講「號名hō-miâ」，嘛是足臺語的講法。
例：你號做啥物名？是愛按呢講。
這馬攏講 → 你「叫」啥物名？我就「叫」塗豆，「叫」燒酒。
「叫」佇咱臺語的意思就無仝，咱應該繼續講→你號做啥物名？
「號hō」這字足重要的。
﹡臺語氣Tâi-gí/gú-khuì：可能這馬逐家慣勢講「臺語味(bī)」。
毋過這个「氣khuì」嘛蓋特殊(ti̍k-sû)，有另外一个音「氣khì」，佇遮愛講「氣khuì」。
華語：你咖啡要喝比較厚？還是比較薄？
臺語：（咖啡）啉較厚？較薄？
ka-pi lim khah kāu? khah po̍h?
﹡若用臺語講「薄po̍h」佮「厚kāu」是著，
可能有的人叫是「濃lông」佮「淡tām」，彼是照華語漢字唸。
﹡這馬真濟咱咧點菜的時陣，真濟咱臺語的講法，逐家攏袂記得。
例：咖啡內面欲摻物件無？
我欲烏咖啡。
烏咖啡oo-ka-pi，有人感覺著，有人感覺毋著，因為彼个色敢若嘛無算烏色，
咖啡色的咖啡（笑）。
咱若無欲講烏咖啡，有的人講是「清咖啡tshing-ka-pi」，
親像講「清糜tshing-muê/bê」、「清冰tshing-ping」，
就是干焦咖啡。
華語：講慣了國語
臺語：華語講慣勢
Huâ-gí/gú kóng kuàn-sì
﹡這个詞「國語」會使莫用，用「華語」都好矣。
﹡「慣勢kuàn-sì」佮「習慣si̍p-kuàn」
習慣是名詞，可比講：伊有啉酒的「習慣」，伊「慣勢」啉酒。
華語講慣勢 → 伊有講華語的習慣。
華語：還真不知道臺語怎麼唸。
臺語：臺語按怎讀閣正經毋知
Tâi-gí/gú án-tsuánn tha̍k koh tsìng-king m̄-tsai.
﹡正經tsìng-king：有幾種意思，佇遮是講「真正」的意思。
例：我無穿過這款膨紗衫，閣正經袂慣勢。
另一个意思，例：哇～你哪會遮「正經」？
華語：歡迎更多人來尋根
臺語：逐家相招
ta̍k-ke sio-tsio
﹡有的人會講「相招相𤆬(sio-tshuā)」，攏會使。
相sio：「相X」、「相啥」咱臺語定定用，
相罵、相拍、相刣、相意愛、相對看。
華語：呈現在地文化與張力
臺語：有咱的文化佮力頭
ū lán ê bûn-huà kap la̍t-thâu
﹡力頭la̍t-thâu：你若欲講是「內涵、力量」這方面嘛是會使，
毋過，咱欲用一寡可能逐家較毋知影臺語有這種講法的，想講用予逐家看一下。
當然這無一定是干焦這个翻法。
二、講予你知：母語厝內學
前一站仔，總統候選人的陣營，某一个陣營提出「母語佇咧厝內學」就會使矣。今仔日來想看覓，這句話到底是著？抑是毋著？
◎母語是爸母的話、土地的話
啥物是母語？母語，你毋通看字面講就是媽媽講的話。
其實是爸母的話，爸爸講的話嘛愛囥在內。
母語是爸母的話，閣較重要的，這是土地的話。
＊序大傳承予後一代的語言
全世界毋管佗一種的語言，攏是透過序大用喙講，傳予後一代，任何一个國家，
攏是按呢遮爾仔自然。
＊國語政策致使社會對母語無友善
但是咱臺灣，咱就發現這馬咱所有的母語，竟然強強欲失傳去矣。
到底是按怎會按呢？
這是因為幾十年前，國民黨政府推行的號做「國語政策」，致使咱規个社會對母語無友善，
是各種方面，包括制度等等，予你規个社會變做是「華語獨尊」。
＊母語做生活語言的爸母愈來愈少
所以這馬看著講真濟做爸母的人，共母語提來做伊生活的語言，這款的爸母，是愈來愈少矣。
因為伊出去到外口，規个環境，
伊做工課，伊去到佗位，看著的、聽著的，攏是華語，臺語的環境，母語的環境，
已經變甲攏總無去矣。
＊母語能力欲靠「家庭教育」粒積真僫
若是這款會曉講母語做生活語言的爸母，遮爾仔少，按呢
咱母語能力欲靠家庭教育來粒積，敢有可能？
＊臺灣各族母語是「國家語言」愛佇學校學
母語確實愛佇咧厝內面講，無毋著，但是袂當干焦佇厝內面講，
這有幾點來講：
頭一點：咱這馬有一个法律，號做《國家語言發展法》，是佇舊年已經成立。
佇《國家語言發展法》內面有講著，咱濟濟的本土語言，在地語言，
攏是「國家語言」，所以咱臺灣各族的母語，已經是國家語言，有規定，
佇學校嘛是愛教。
◎對生活做起
＊讀佮寫的能力需要學校教育來補
母語毋但愛佇厝內面講，嘛愛佇學校教。
目前來看，咱學校上需要的是啥物？是「讀」佮「寫」的能力。
若無寫落來，袂曉讀，這个語言絕對會死去，無發展的空間。
咱愛有一个觀念，母語一定愛會曉讀，會曉寫，這个部份這馬愛學校教育來補，
這是一定愛的，因為濟濟人這部份攏袂曉。
＊平常時聽的、講的，上好攏是這个語言
一个語言愛對生活開始做起，希望佇咧平常時，聽著的，講著的，攏是這个語言，
咱的母語毋才學會好勢。
＊自然吸收的學習效果較好
＊會當共學著的佇生活中來實踐
學校教了後，厝內面愛講，咱規个社會的環境嘛愛好勢，才會當予咱逐家學著的時陣，
佇生活當中來實踐(si̍t-tsiān)。
◎做伙共母語抾轉來
這馬講起來，確實猶閣是佇華語霸權之下，去到外口，看著的攏是華語的環境，咱母語的環境真正是真䆀，但是佇這款的環境之下，嘛是有濟濟的爸母，少年的爸母，想欲來拍拚。
＊身份認同佮文化認捌
因為咱知影，母語是一種身份的認同，佮咱文化的認捌。這非常非常重要。
＊母語共學團，爸母囡仔做伙學
這馬有真濟少年的爸母，組成「母語共學團」，逐家相招，囡仔相招，爸母佮囡仔做伙來學，
辦足濟活動。
＊用母語講故事、辦活動
譬如講用囡語講故事、辦活動，招足濟人共同來參與，希望佇遮爾仔䆀的母語環境之下，
會當儘量共母語救轉來，逐家做伙來。
＊聯合國教科文組織(UNESCO)：臺語「嚴重危急」
亻因有一个表，予咱逐家看著咱臺語，這馬是偌爾仔嚴重的危險。
語言危急程度分級表
危急的程度 指標：迒世代的傳承
安 全 → 所有年齡攏使用，迒(hānn)世代的傳承無問題。
脆 弱 → 大部份的囡仔會曉講，
毋過可能限制佇某一寡場合，比如佇厝內。
確定危急 → 囡仔無法度佇厝內像學母語仝款去學這个語言。
嚴重危急 → 干焦阿公阿媽會曉講，
這陣有囡仔的爸母無一定會曉講，嘛袂佮囡仔講。
極度危急 → 使用這个語言的上少年輩是阿公阿媽，
亻因可能無捷講，抑是干焦會曉講一屑仔。
死 亡 → 無人咧使用。
正爿就是若是有達到這寡指標，就是倒爿的危險程度。
佇聯合國定義(tīng-gī)，「嚴重危險」就是咱臺語這馬的情形。
有真濟爸母，有共學團，希望逐家會當共亻因鼓勵，逐家來加入，除了有濟濟的資料，咱會當參考，嘛向望觀眾朋友每一个人，共你身軀邊臺語的母語環境建立起來，予母語，咱的臺語，會當長長久久。
這馬真濟少年爸母的共學團「母語親子共學團」，真拍拚，為著欲予家己的囡仔有母語的環境，算是「自力救濟」，家己的語言家己救。咱是希望有政府的資源入來，但是目前真濟人自力救濟開始做起。
◎語詞
．母語bú-gí/bú-gú：這个觀念是對Mother Tongue來的，毋過，毋但
是Mother Tongue，閣是代表Mother Land，是土地，毋是你
個人的母親仰是老爸，毋是干焦媽媽，爸爸嘛包含在內，
所以叫做「爸母話pē-bú-uē」，可能較包含、較全面。是土地的語言。
．粒積lia̍p-tsik：累積的(luí-tsik)意思。
．序大sī-tuā-lâng vs. 序大人sī-tuā-lâng：
爸母是「序大人」，一般的長輩，通稱叫「序大」。
可能有人已經濫咧用矣。
．誠實tsiânn-si̍t：仝款漢字，有兩種讀法，一般是講「誠實按怎」。
誠實sîng-si̍t：攏袂講白賊，就是誠實，較書面語，口語較無用。
．危急guî-kip：愛有”g”的主音，這馬”g”攏落去矣。
．工課khang-khuè：有地方差，有的所在khang-khuè/khè/khì攏有。
嘛有人講「頭路thâu-lōo」。
「工課」愛提醒，是因為足濟人叫是「工課」會當做動詞用，
工課本身是一个名詞，有工課，做工課。
「頭路」嘛是仝款，食頭路，做啥物頭路。
．復振ho̍k-tsín：這算較新詞，是欲共「復興ho̍k-hing」起來，
所以有人講「復興」，嘛有人用「復振」。
例：咱愛共臺語復振起來。
三、看戲齣(hì-tshut)講臺語
這是牽涉著講佮「死亡」有關係，無直接講「死亡」的一寡講法。
逐家攏足驚講「死亡」佮「死」這字，攏有其它的講法。
◎掣起來
Tshuah--khí-lâi
◎閣食無偌久矣。
Koh tsia̍h bô guā/luā-kú--ah.
相關語，是猶袂死，毋過敢若咧欲死矣，敢若無命矣。
死、無去、無命、扛去種、斷氣、往生等等，足濟無講著「死」，
但是意思是這種意思。
咱臺灣人真正足驚仔講「死」這字，所以足濟講法。
◎這胎是抽豬母稅。
Tsi̍t the sī thiu ti-bó/bú-suè/sè.
「豬母稅」就是拍種的時陣，出豬公這爿，會當分著一部份的豬，
咱這馬咧用是講查某囝生的囡仔，可能其中一、兩个，綴老母姓。
## 2019.12.19《台語講世事》：不分區立委
一、看新聞講臺語：
欲選舉矣，選舉有一張票足重要的，號做「政黨票」，咱觀眾朋友一定愛好好仔來決定，因為這張票代表你支持政黨的價值，佮你有相合無？有相仝無？
以前有這个政見發表會，攏是候選人，這馬既然有政黨票，政黨的立場毋著愛出來辯論？更需要辦政見會，抑是辯論會，愛予逐家知影恁這个政黨未來，若是入去國會，欲按怎來做恁的政見，方向到底是啥，這足重要的。
◎翻譯
華語：選戰打得如火如荼，「一言一行」透過媒體與實際互動...
臺語：講話行儀
kóng-uē kiânn-gî
﹡行儀kiânn-gî：是「行為」的意思。
『言行』就是講話佮伊的行為。行kiânn，是白話音讀法。
行儀hīng-gî ：行hīng，是「品行」的意思。是文言音讀法。
仝款這个字，一个文言，一个白話，意思無仝款。
華語：能夠輕易掌握參選人的動向。
臺語：聽好了解亻因的意向
thìng-hó liáu-kái in ê ì-hiòng
﹡『動向』 → 意向ì-hiòng
﹡聽好thìng-hó：毋是「聽好thiann-hó」。
意思就是講「會使、會當」彼个意思，通好按怎。
毋過，嘛有另外一種用法，是咧表示「攏好、攏好」的意思。
例：聽好買喔。 → 「攏會當買」的意思。
「聽thiann」是白話音，「聽thìng」是文言音。
例：聽候你來。聽候 thìng-hāu：就是「等待」的意思。
華語：許多人才，要經由政黨提名方式，進入國會。
臺語：著愛靠政黨提名，
tio̍h-ài khò tsìng-tóng thê-miâ,
才通出頭入國會。
tsiah thang tshut-thâu ji̍p kok-hue.
﹡「著愛」按怎，「才通」按怎：這是一个句型，會當按呢用。
例：著愛考試，你有過關，你才通入這个學校。
強調「著愛tio̍h-ài」按怎，一定愛按怎，
才通tsiah thang：才會當按怎的意思。
華語：不分區的名單，陸續公布。
臺語：名單長長短短公佈
miâ-tuann tn̂g-tn̂g-té-té kong-pòo
﹡長長短短tn̂g-tn̂g-té-té：有的長，有的短
這馬有的人講「陸陸續續」，嘛是會使，對華語吸收。
咱臺語就是「長長短短」。
華語：引發各界高度關注
臺語：三等十二號的人
sann-tíng tsa̍p-jī-hō ê lâng
﹡各界kok-kài：若欲直接按呢，嘛是有人講。
咱古早有一个詞叫做→三等十二號，有幾種無仝款的講法。
﹡三等十二號的三(sann)是白話音，嘛有人用文言音sam的講法。
十二號，嘛有人講是「二號」→ 三等二號。
這个意思像佮「三教九流」意思仝款，但是小可有差別。
咱這馬咧講「三等(十)二號」攏是咧講各種無仝款的人，無特別強調是啥物，
「三」抑是「(十)二」是一个概念上敢若足濟的意思。無講足明確一定是啥物內容。
華語：公開辯論保障小黨參政權，能更讓選民了解各政黨對於將推動的目標與願景。
臺語：「共」小黨參政的「權利顧予著」
kā ……. kuân-lī kòo hōo tio̍h
﹡著tio̍h：著的用法足濟種，足臺語氣。
顧予著kòo hōo tio̍h，就是有顧著。
拍有著phah ū tio̍h，就是有拍著。
食無著tsia̍h bô tio̍h，就是無食著。
綴有著陣tuè/tè ū tio̍h tīn，就是有綴著。
二、講予你知：不分區立委
2008年以前，咱咧選立法委員，就是咱彼个選區，足濟人出來選，而且選出來了後，彼个選區可能有幾若个。但是彼的時陣，逐家感覺按呢立法委員人傷濟，所以佇2008年的時陣有做一个改變。
◎2008年立委新選制
＊單一選區兩票制
每一个選區，咱咧選立法委員的時陣，是愛投「兩票」。到底是佗兩票？
＊區域立委票佮政黨票
一票是投予區域立委的票，就是選人的；
閣一張是愛投予政黨，這張是選黨的。
＊政黨票選不分區立委
政黨票就是欲提來揀不分區的立法委員。
咱咧選咱彼區的區域立法委員，啥物人上懸票，咱彼區就干焦一个區域立委。
其它的就是不分區立委。
這是這馬的制度。
＊立委113席 = 區域73席 + 不分區34席 + 6席原住民
不分區的立委，到底占咱的立法委員有幾％？
這馬咱的立法委員，總共有113个，佇過去2008年以前225个，減半了後變113个，
這113个內面，有73个是區域立委，是各地逐家選出來的，一區干焦一个，
總共有73區，所以有73个。
閣來是不分區，有34个，閣有原住民有6个。
所以不分區的立法委員總共有34个，等欲予人坐。
到底這34个不分區，欲按怎分咧？這就是重點。
◎34席不分區立委按怎分
彼黨講伊欲挃，這黨嘛講伊欲挃，按呢欲按怎？
這个時陣著愛看咱頓的第二張票，就是政黨票，就是選黨的彼張票。
＊照政黨票比例順序當選
按照政黨票的比例，順序當選。
譬如講某一个黨，可能政黨票內面，提超過50%，按呢就是34席的50%，就是17席。
按呢來算，看幾%，你就提著34席內面的幾席。
＊5％的戶橂
但是逐家愛注意，足濟黨的，這內面有一个戶橂，就是你這个黨一定愛超過5％，
才有法度來分，毋是1％、2％看偌濟，若是無超過5%，按呢都烏有去，
4%嘛是烏有去，1席都分袂著。
＊不分區名單代表黨的價值佮理念
所以每一个黨，亻因提出亻因的不分區名單著非常重要，有媠氣無
因為選民就是欲看你這个黨，提出來的不分區的名單，有符合選民心目中的價值無？
所以這是代表黨的價值佮理念。
＊若撤銷黨籍，資格隨無去
有一項代誌，逐家愛注意，雖然不分區的名單列出來了後，逐家可能足佮意佗一个人，
但是這不分區的代表，亻因是黨共提名，才會當做立法委員，伊若是去夆撤銷黨籍，
伊不分區資格會無去。
◎需要改進的欠點
這馬改按呢，有好有䆀。
好的所在，是以前選立法委員，干焦會當選人，有當時仔，你會講我是欲選人抑是選黨？我是欲選黨抑是選人？
這馬有這款的制度了後，咱會當你佇區域立委頂懸，你會使選人，
佇咧政黨票，你著會當選黨。這是一个好處。
可是伊有足濟欠點，這馬逐家嘛當咧討論。
＊「不分區席次」佔國會比例傷低
各界來看攏是按呢，會變做一个黨的意志，當選的立法委員傷少，
有可能區域立委傷濟，提出來的政見，可能就干焦顧伊彼个區域。
有這款的問題。
＊逐年的政黨補助款（過3%就有一票五十箍）
這馬逐年政黨的補助款，有人咧討論。
因為這馬的政黨票，愛超過3%，才會當提著政黨補助款。
這對小黨來講非常不利，因為對小黨，超過3%是足懸的戶橂。
大黨真簡單就提著，一票50箍，大黨本來就已經有足濟資源，資源閣共囥落去，
大黨佮小黨之間的距離，就會愈來愈遠。
＊過5%才有後一擺的總統提名權
＊對小黨真不利
一个制度有好有䆀，這攏是咱逐家愛來討論的。
佇咧遮嘛愛提醒逐家，投票愛會記得，投區域立委以外，咱愛共政黨票頓予你所認同的彼个政黨。
希望逐家會當透過一擺一擺的選舉，予咱會閣較了解這个選制，到底佗位好，佗位無好，是毋是需要改善，這就是咱民主深化的過程。
◎語詞
．頓票tǹg-phiò：立委的部份「頓tǹg」兩張票，區域佮政黨票。
頓印仔的意思。
．終其尾tsiong-kî-bué/bé：到最後按怎的意思。足臺語氣的講法。
到底，終其尾，每一个政黨會當提著幾个不分區的立委？
．不分區put-hun-khu：這攏是簡單的漢字，所以直接照按呢翻。
若欲講笑，抑是講較足口語的，欲講不分區，就講蹛海口的，
蹛海口的，就是人咧講耍笑，講管足闊的，不分區立法委員，
顧的是全國性的議題，會當貫徹黨的意志。
．牢tiâu：選有牢，選無牢，就是這个「牢」。
掠牢牢lia̍h-tiâu-tiâu
不分區，你若選有「牢」，嘛無一定會足「牢」，愛看佮政黨會合袂合，
因為伊是透過政黨的推薦，毋是選牢就是穩觸觸。
．穩觸觸ún-tak-tak
．拍出籠外phah-tshut-láng/lâng-guā：
不分區立委若是佮政黨無對同(tuì-tâng)，結果就會予拍出籠外，
你就會失去立委的位，這个資格。
籠láng，抑是籠lâng，這字足濟音，就是這个意思，
共伊淘汰(tô-thài)，若像咧揀果子，規籠的果子，共一寡無講蓋好看的，
抑是講爛去的，你會共「拍出籠外」。
．媠氣suí-khuì：
每一个政黨，這馬提出來不分區的名單，一定愛媠氣，若無，人袂共政黨票投予你。
．對同tuì-tâng：有對同，抑是無對同，就是講有合，無合這種意思。
．差大碼tsha tuā-bé：差足濟的意思。
三、看戲齣(hì-tshut)講臺語
◎精差無刣豬倒羊爾
Tsing-tsha bô thâi-ti tó-iûnn niâ.
．精差tsing-tsha：就是講「兩項差偌濟」的意思。
例：你佮伊的講法，無啥精差。就是講無啥物無仝的意思，精差無濟。
精差是動詞，嘛有人當做名詞咧用。
．精差無刣豬倒羊爾：意思就是足豐沛、足腥臊，著閣刣豬，刣羊，
但是無用兩个刣，小可變一下，予羊仔倒落去，就是欲共刣矣。
足豐沛的，干焦差無刣豬倒羊按呢爾。
例：你今仔欲請人客，攢甲是偌豐沛？共咱講一下。
精差無刣豬倒羊爾啦！
◎莫踮遐袂曉泅水牽拖水掣。
Mài tiàm/tàm hia bē/buē-hiáu siû-tsuí khan-thua tsuí tshuah.
明明是家己袂曉泅水，閣牽拖人水傷掣流(tshuah-lâu)。
．掣tshuah：掣流，足急的水咧流，規个掣落來。
．泅水siû-tsuí：游泳的意思，咱以早無咧講「游泳」，攏講泅水。
．牽拖khan-thua：就是攏別人的責任，攏毋是家己的問題，
攏別人的毋著。
例：這个人伊真正足𠢕牽拖的。
## 2019.12.26《台語講世事》：世界愛滋日
咱人類一定愛面對的問題，號做「愛滋」，因為12月的頭一工，就是「世界愛滋日」。
一、看新聞講臺語：愛滋嬰仔繪本，有關心無歧視
◎翻譯
華語：他心裡其實很潔淨
臺語：伊的心肝真清氣相 tshing-khì-siùnn，真清氣。
﹡咱有一个詞叫做「樣相iūnn-siùnn」，就是「啥物形」按呢，一个形態、形體。
相siùnn：彼个款，彼个樣相。
癩疒哥相thái-ko-siùnn、歹看相、好看相，
咱是較罕咧用其它的詞，其實是會使，照這个規則。
﹡生相 senn/sinn-siùnn：『生肖』，鼠牛虎兔這...。
例：請問你是相(siùnn)啥？你是相牛？抑是相鼠？
就是愛用「相siùnn」這字。
有人會講「你姓(sènn/sìnn)啥？」我講我姓許，我姓陳。
毋是，是欲問十二項啥物，結果才知是欲問「十二生相」。
華語：會敵對他，愛滋病很多人會排斥他。
臺語：佮伊做對頭
kah i tsò/tsuè tuì-thâu
﹡做對頭tsò/tsuè tuì-thâu：就是徛佇咧伊的對面。會使按呢講。
﹡對頭tuì-thâu：有各種的用法。
對頭誤tuì-thâu-gōo：意思就是講雙爿攏耽誤著。誤：耽誤。
對頭風tuì-thâu-hong：對對面吹來的風，就是搢風(tsìnn-hong)。
對頭親tuì-thâu-tshin：兩个誠親彼種的。
華語：這個病毒受到媽媽的感染
臺語：帶阿母過予伊的病毒
tài a-bú kuè hōo i ê pēnn/pīnn-to̍k
﹡帶tài：帶啥物病毒、帶病(tài-pēnn/pīnn)、帶身命(tài-sin-miā)，
這攏較強調慢性、慢性病，抑是講較歹治，歹根本好離彼種。
例：帶財tài-tsâi、帶衰tài-sue。
﹡紮tsah：你有紮錢無？Lí ū tsah tsînn—bô?
華語是『帶』，咱臺語是「紮」。
﹡過kè/kuè：意思是穢(uè/è)予伊，傳染的意思。
華語：吸毒過量
臺語：食毒過頭曲去
tsia̍h-to̍k kuè-thâu khiau--khì
﹡毒是用「食」的，毋是用「欶suh」的，食毒有足濟種方式，
毋是干焦用喙食的，可能用鼻仔欶的，抑是用注的攏有。
咱臺語內面有足濟物件用「食」的：
食薰tsia̍h-hun、酒tsiú、咖啡ka-pi、茶tê。
華語：讓寶寶成為孤兒
臺語：無爸無母做孤子
bô pē bô bú tsò/tsuè koo-tsú
﹡孤子koo-tsú：文言的講法，咱可能較捷聽著「孤兒koo-jî/lî」，
以早嘛有「孤子」的講法，是「無爸無母」的意思。
毋是讀做「孤囝koo-kiánn」，厝內面干焦生一个後生。
抑是「孤查某囝koo-tsa-bóo-kiánn」生一个查某囝爾。
華語：有一對美國來的夫妻
臺語：一對美國翁仔姐
tsi̍t tuì Bí-kok ang-á-tsiá
﹡翁仔姐ang-á-tsiá：這是其中一種講法。
「姐tsiá」是咧講女性。咱一般是講「翁仔某ang-á-bóo」。
例：臺南有一个「十二婆姐」。
「抾囝姐khioh-kiánn-tsiá」、「抾囝姆khioh-kiánn-ḿ」
就是咧講「產婆sán-pô」。
二、講予你知：世界愛滋日
對1988年開始，每一年12月頭一工，已經夆定做「世界愛滋日」，就是希望透過這工，予各界全世界的人，會當閣較了解這種病，當然嘛欲對這寡得著這个病來過身的人，來共哀悼。
◎愛滋對世界的影響
＊12/1世界愛滋日：認捌、哀悼
每一年12月頭一工，就是「世界愛滋日」。
佇咧這工，咱欲來認捌這種病，有閣較正確的認捌，而且欲對這寡因為愛滋來過身的人，
來做哀悼(ai-tō)。
＊WTO推測2020年上傷重：心血管、鬱卒病、愛滋病
這愛滋病到底有偌嚴重？
根據WTO咧講，講2020年咱人類的社會，上蓋傷重的三種病：心血管的病、鬱卒病、愛滋病。
＊1980年到今，超過3500萬人死亡
對1980年到今2019年，已經超過3500萬人因為這个愛滋死亡。
＊無治好離的辦法佮疫苗(i̍k-biâu)
雖然講這20、30年以來，已經有真濟改善，無以前遐爾仔嚴重，
但是到今，猶是無會當治好離的辦法，佮疫苗。
◎啥物是愛滋
這值得咱逐家來注意的這種病，到底是啥物？
＊後天免疫(bián-i̍k)不全症候群（AIDS）
AIDS漢字寫做「愛滋」，逐家愛共讀做「É--ts」，A、I、D、S，
是四个英文字頭一个字母共拼起來，就是後天（毋是伊生成的）、
免疫、不全、症候群，這四个英文字合起來，就是號做AIDS。
＊人類免疫不全病毒（H I V）
是按怎會得著AIDS？這是因為有一種病毒，若去予伊染著，
伊就會害你的免疫系統一直低落來，這種病毒號做H I V。
H I V仝款是幾个仔英文字頭一个字母，人類、免疫不全、病毒。這是一種病毒。
＊H I V破壞免疫系統，變做會穢人
得著這个病毒，無一定都表示會染著AIDS這種病。
若是有HI V的病毒，若是得著了後，按照醫生的指示好好控制，嘛無一定會得著AIDS。
＊穢著了夯起來成做愛滋
因為這个病毒，若是穢著了後，有九成才會夯起來做AIDS。
＊HI V-1九成會夯、HI V-2無啥病症
這種病毒有兩種，一種是HI V-1，一種是HI V-2。
HI V-2這馬佇非洲較濟，無啥物症頭，主要咱咧講的是HI V-1，
若是去穢著HI V-1，九成會夯起來變做AIDS，但是無一定會。
所以咱會當共AIDS看做是一个慢性病。
◎按怎治療佮防治
病毒會穢人，所以逐家都真煩惱，毋知到底是啥物情形，會去穢著。因為逐家對到底按怎去穢著，無真了解，對AIDS這種病有種種的誤解。若得著HI V的人欲按怎來治療？
＊用雞尾酒療法共押咧，看做慢性病
這馬有一種足有名的治療的方法，號做「雞尾酒療法」。
為啥物號這个名？伊有一个正式的名，但是足長，而且咱若看，可能嘛看無，
因為治療的方式，佮做「cocktail」雞尾酒的時陣，有淡薄仔成，
所以逐家攏共伊叫做是「雞尾酒療法」。
這種療法會共HI V押咧，會當共看做是一種慢性病，無一定會變做AIDS。
＊帶病毒的體液(thé-i̍k)，接觸黏膜、皮膚成空
HI V這个病毒，毋是日常的接觸，就會去予穢著，譬如汗、目屎等等，
目前並無非常明確的統計，是啥物款的物件才會去穢著？
愛有帶HI V病毒的體液，才會去穢著。
＊安全性行為、血，會穢的器具，莫公家用
體液包括：血、查埔人的潲、查某人的白帶，抑是母奶等等，這寡攏是體液，
所以愛透過帶病毒的體液，才會去穢著。
抑無，就是接觸著有病毒的黏膜(liâm-mo̍oh)，皮膚有成空的所在，
這攏會去穢著，普通時仔是絕對袂。
欲按怎來防治？
咧做性行為的時陣，愛有安全的措施，莫佮人公家用一寡會沐著血的器具。
＊莫予愛滋歹名聲、提高治療比例
上重要的，咱莫予愛滋(AIDS)歹名聲，莫有無正確的概念，會予染著AIDS的病人，
心理壓力傷大，重點應該是提高治療比例，這才是咱人類應該愛做的代誌。
◎語詞
．哀悼ai-tō：是足古早以前就有咧用的詞，咱本來就有這个詞。
毋是受華語影響。《臺日大辭典》就有收這个。
．好離hó-lī：完全好的意思。
例：這个病無好離的藥仔。
無法度來治這个病的藥仔，猶未發明，猶未產生出來。
離 lī：完全的意思。例：你這飯食予「離lī」。
咱一般可能會有足濟人用三字連音詞去講，離離離，
這是較特殊的三連音變調，其中的一款。
例：我的胃病完全好離矣。
病症方面攏會當用。
若欲講無好的關係，修復到好，嘛是會使講。
例：亻因兩个關係已經好離矣。
已經好離，就是比已經好矣，加足離的。較強調完全。
．免疫bián-i̍k：讀音的問題，這是文言音。
免疫系統bián-i̍k hē-thóng
．夯giâ：得著這个病毒，若「夯giâ」起來，伊都變AIDS。
咱一般可能會講「發作huat-tsok」，咱臺語口語講法→夯。
病夯起來，就是有一寡症頭出來。病是用夯的，夯起來。
例：伊規个脾氣夯起來。這嘛是會使用。
．押ah：意思是控制(khòng-tsè)，共押牢咧。
例：用這種藥仔來共這个病押咧。
壓(ah)落去。
．體液thé-i̍k：這是讀音的問題。
．潲siâu：可能逐家較無熟似漢字，這漢字是逐家整合用這字來寫。
就是這个音「潲siâu」，咱毋免去禁忌，是無正面負面的詞。
伊就是一項物件。
因為咱臺灣人定定有幾个仔字，會感覺歹勢歹勢，
潲都是一種咱身軀內面出來的物件，是足普通體液的一種。
．白帶pe̍h/pi̍k-tài：佮潲仝款，攏是咱日常生活應該攏會使講出喙。
可能因為「潲」有予人提來做罵人的用途，予人感覺有禁忌。
例：無臭無潲bô-tshàu-bô-siâu：嘛毋是咧罵人。
例：毋成潲m̄-tsiânn-siâu：有人咧罵人。
啥潲siánn-siâu/sánn-siâu：火星文→三小。
．黏膜liâm-mo̍oh：這是讀音的問題。
．成空tsiânn-khang：毋是「成空sîng-khong」。
成空，就是「有空」。
例：這个代誌已經「成tsiânn」矣。這个計畫已經「成」矣。
按呢就表示講已經成功，抑是已經有做矣，彼个意思。
成tsiânn後壁加「空khang」，就是有彼个空，出現彼个空。
三、看戲齣(hì-tshut)講臺語
◎法律探理無探親
Huat-lu̍t thàm lí bô thàm tshin.
．探thàm：探究thàm-kiù、探索thàm-soh、探討thàm-thó彼種意思。
這个意思有另一種講法，咱定定咧講，就是講...
＊法律講理無講情。
Huat-lu̍t kóng lí bô kóng tsîng.
◎佇我人生行到無尾巷的時陣
Tī guá jîn-sing kiânn kàu bô-bué/bé-hāng ê sî-tsūn
．無尾巷bô-bué/bé-hāng：因為誠濟人可能毋知影『死巷』欲按怎講
咱臺語是講「無尾巷」。
影片內底的字幕是「走投無路」，「行到無尾巷」較口語。
Sign in with Wallet
Connect another wallet