# 《台語講世事》文字稿 2018.01~04
※ 頁面索引,在頁面左側下方,淺灰色格子裡
## [2018.01.04《台語講世事》:古蹟保存](https://youtu.be/WwBx9iyEW2w)
一、看新聞講臺語:
第一條新聞:高鐵JR交流:
*勤務人員處理緊急狀況
*商務列車的服務
*互相交流管理方式
註:JR,英語Japan Railways,是日本國有鐵道
咱真正愛共高鐵拍噗仔,想袂到日本的JR會來咱臺灣取經。
JR是日本國鐵,知影高鐵是去共新幹學習的。亻因的觀光列車,無彼个捒物件的服務,無咧賣燒的飲料,無賣遐濟項物件。
JR內面有各種語言的標示,咱高鐵應該愛學亻因這點,咱高鐵欲服務的對象,是啥物款的人,講啥物款的語言,應該愛親像在地遐爾濟種語言,上無,嘛愛共較多數這幾種,共文字顯示佇一寡明顯的所在,來服務遮的對象。JR講的可能是是日文、英文、中文、韓文等等。
咱高鐵應該愛有臺文、客文等等。
◎語詞
.高鐵ko-thih:高速鐵路,簡稱「高鐵」。
.鐵枝路thih-ki-lōo
.架khuè/khè v.s. “立在”tshāi:
逃生,愛共梯”立在”予好(tshāi hōo hó)。
咱臺語內底,共物件架(khuè/khè)咧、靠(khò)咧,是囥的動作。
若是”立在”(tshāi),一般攏是講”立在”直直,徛咧彼種感覺。
例:啉酒愛”立在”(tshāi)罐的。(算罐的)
.狀況tsōng-hóng:有啥物款緊急的「狀況」,愛去應變。
.勤務khîn/khûn-bū:這个詞愛學。
.逃生tô-sing/senn/sinn:有幾若種無仝的講法。
揣「生路senn/sinn-lōo」攏有人講。
第二條新聞:搶救磯永吉小屋
*低厝仔無修補著賊偷
*磯永吉培育蓬萊米
*傳承台灣農業史
註:有「蓬萊米之父」美稱的日籍農業家磯永吉(Eikichi Iso,1886~1972),
是奠基台灣稻米育種研究的學者,為台灣的稻米改良奉獻一生的日人。
這間低厝仔,是佇咧臺灣大學內面。
咱若毋知影日文發音的人,可能直接讀漢字的臺語音,親像這三字,讀做「磯永吉Ki íng Kiat」,若是尊重對方的原音,原名,伊是按怎讀的,咱應該是愛講日語的音較著,咱就來讀做Iso Eikichi先生。
應該是講人名、地名、國名,盡量是愛照原本的原音。
這條新聞講著的Iso Eikichi先生,彼時來臺灣的時陣,有一間低厝仔,無去修補,結果著賊偷,主要是年代已經誠長,無去共好好仔維修、維護,真無彩。
因為內面有真濟會當看著Iso Eikichi先生,來到咱臺灣,傳承一寡農業的代誌,足重要的。
Iso Eikichi先生伊做出來的米,號做「蓬萊米」。
簡單講,蓬萊米hông-lâi-bí較黏,較長株圓的形,
在來米tsāi-lâi-bí比較較粒(lia̍p),較尖形。
外形無仝款,食起來嘛無仝款。
◎語詞
.壁堵piah-tóo:就是「壁piah」,嘛有講「壁堵」的用語。
.低厝仔kē-tshù-á:毋是樓仔厝lâu-á-tshù,毋是幾若層(tsàn),一層爾,無樓梯的。
.修補siu-póo:歹去,無去維護,所以需要「修補」。
.著賊偷tio̍h-tsha̍t-thau:賊仔入去偷提物件。
例:著火燒、著病、著癌(tio̍h gâm)
著tio̍h,毋是干焦䆀的,好的嘛會當「著」,好、䆀攏有。
例:著等、著獎
.譀鏡hàm-kiànn:這是對日語來的,顯微鏡hián-bî-kiànn。嘛有人共「放大鏡」叫做譀鏡。
譀鏡就是共物件放大,本來足細,放足大,攏會使講是譀鏡。
.蓬萊米hông-lâi-bí:較黏、較圓,較長株圓的形。
.在來米tsāi-lâi-bí:較liap、較尖形。
二、公共事務做伙舞:古蹟保存
最近「古蹟」的議題真正足熱的,四界咱攏會聽著這間厝,抑是這个街路非常值得咱共保存落來。
◎文化資產是啥物
*祖先放—落-來的物件
簡單來講,就是過去的人,佇歷史、文化、藝術、建築上,所放落來的一寡物件,
閣有分有形的,佮無形的。
*有形的佮無形的
有形的:親像街仔路、厝tshù、磚仔頭,摸會著的、看會著的。
無形的:戲劇hì-kio̍k等等。
攏會使講「文化資產」。
◎古蹟的分類:分三級
「古蹟」講起來是「文化資產」內面的「有形的」。
古蹟會當分做三級:
*照指定單位
看是國定的,抑是直轄(hat)市定的,抑是縣市定的。
對單位咱就看會出來,國定的就較重要,直轄市定的,都中央仔,縣定的,可能較無遐重要。
*照歷史影響力
看古蹟的歷史影響力是偌懸,毋是愈古早,伊歷史影響力就愈懸。
*毋是愈舊愈好
◎古蹟保存這馬的情形
現此時咱保存的情形是按怎?
*無代無誌火燒厝猶是有
定定佇新聞聽著,有佗一間厝,伊有保存的意義,但是無代無誌佇半暝的時陣,突然著火燒。
逐家感覺足奇怪,這款代誌定定有,咱這馬對古蹟保存的意識,遮爾仔懸,
而且咱毋是有這个《文化資產保護法》?
*袂赴受著法律保護
原來任何一个有價值的古蹟,伊若欲真正成做一个古蹟進前,有真濟程序欲來行。
首先,你就愛有厝主、所有權人的同意,閣來是政府,愛有專家來審議過,
這个程序攏過了後,這个古蹟才會當成立,才會當受著《文化資產保護法》來保護,
所以定定真濟古蹟無代無誌火燒厝,無就是半暝予怪手挖一下空空空,攏是袂赴受法律保護,
猶未予政府審議進前,都先夆處理掉,就自燃去,自然燒去矣。
◎是按怎會按呢
*厝主想欲開發土地、管理維護真忝頭(thiám-thâu)
真濟家己燒起來的這寡古蹟,攏是佇咧重劃區內面,就是佇咧都市更新區內面,一看就知影,
原來是厝主想欲開發土地,希望家己的厝,毋通去予指定做古蹟,按呢伊才會當拆起來,
起樓仔厝,趁大錢。有這款的情形。
就算講有的厝主,感覺講無毋著,阮的祖先留落來的物件,我嘛愛繼續共伊保存,
但是嘛有厝主感覺,若是去夆指定古蹟,伊的管理佮維護攏真忝頭,有當時仔管理無好勢,
閣會去予《文化資產保護法》共伊處罰。
*愛搜揣(tshiau-tshuē/tshē)周至的方案
到底愛按怎來處理,予厝主、政府、規个社會,攏會當好好來保存咱的古蹟,
這愛好好仔想看覓,咱愛愛搜揣閣較周至的方案。
*莫(mài)看輕古蹟
一个民族的古蹟是非常的重要,因為文化是一點一滴累積起來的,所以咱的古蹟愛好好保護,
這嘛是咱真重要的觀念。
◎掠包
.古蹟kóo-tsik:南北腔口有小可無仝,南部的“k”舌根音較清楚,北部較無遐明顯。
譬如講「品質phín-tsit」這个「質tsit」是舌尖音“t”,
古蹟的「蹟tsik」佮阿叔的→叔tsik,責任的→責tsik,攏是仝款的舌根音,入聲,短音。
.欲「共kā」逐家講啥
欲「佮kap/kah」逐家做伙
.直轄市ti̍t-hat-tshī:「管轄kuán-hat」的「轄hat」,
應該是逐家無慣勢唸,共唸十遍就會曉矣。
.程序thîng/tîng-sū
.無代無誌bô-tāi-bô-tsì:四字連讀,愛會記得「代tāi」愛變調。
.網友bāng-iú:網路bāng-lōo仝款「網bāng」。
.維護î/uî-hōo:「維î/uî」兩个音攏有,莫講人講毋著。
.句尾袂當用”嗎”佮”吧”。
◎語詞
.古蹟kóo-tsik:舌根音羅馬字用“k”做字尾,「蹟tsik」。
.文化資產bûn-huà tsu/tsir-sán:
.街路ke/kue-lōo
.庄社tsng-siā:庄仔頭tsng-á-thâu,社區siā-khu
.火燒厝hué/hé/hér-sio-tshù
.建築kiàn-tio̍k
.都市更新too-tshī king-sin:四字連做伙,「市tshī」愛變調。
.一點一滴tsi̍t-tiám-tsi̍t-tih = 一點一tuh
三、俗諺
◎錢銀纏半腰,
Tsînn-gîn/gûn tînn puànn-io,
管待祖公仔產(屎)放火燒。
kuán-thāi tsóo-kong-á-sán(sái) pàng hué/hé/hér sio.
.錢銀纏半腰,意思是足有錢的。
敢講足有錢,就一定毋好?其實看你按怎看。
咱有這款講法,可能若干焦看著錢的重要性,其它無去考慮,無去顧,
文化資產、歷史意義、文化意義,無去想的時陣,
就有這个意思「祖公仔產」無要緊。
這算是一種價值觀,咱這馬攏知影古蹟是非常的重要,
咱真濟臺灣人定定去日本𨑨迌(tshit-thô),看著日本的古蹟,保存了遮爾仔好勢,
保持甲遮好,足欣羨的。
但是倒轉來咱家己的土地,親像無仝的標準咧看。
咱嘛愛愈來愈進步,毋通干焦欣羨,咱愛慢慢仔共咱的古蹟好好仔保存落來,
因為彼是咱歷史文化的物件。
## [2018.01.11《台語講世事》:婚姻平權](https://youtu.be/4ZaUe3Hiwis)
一、看新聞講臺語:澳洲議員共同志男友求婚
* 同性婚姻是優先法案
*議員𤆬頭共同志男友求婚
*成做第二十六个同婚國家
這條新聞是講著「仝性別婚姻」的代誌,咱臺灣這馬嘛咧發生當中。
澳洲有一个議員,竟然佇國會頂懸,共伊的伴侶求婚,足感動的。
有「證婚人」一个特別的修正案,可能去拖著,已經予『駁回』,
所以無去影響著,嘛共澳洲的人恭喜。
◎語詞
.𤆬頭tshuā-thâu:議員𤆬頭做一个以早無人做的代誌,這个作用。
.聯盟liân-bîng:有啥物款的團體,做伙欲創啥,一个聯盟的做法。
無仝團體之間,結合做伙捒議題,攏會當號做「聯盟」。
.伴侶phuānn-lū/lī:這算講是華語的詞,咱共臺語發音。
一般來講,咱講「伴」、「生活伴」、「咱的愛人仔」,「伴」的範圍較闊。
「鬥陣的」較侷限佇咧啥物款的關係,才叫做鬥陣的。
.成做tsiânn-tsò/tsuè:澳洲成做世界第26个有同性婚姻合法的國家。
這是口語,欲成做啥物款的國家,欲成做啥物款的人民。
「變做piàn-tsò/tsuè」佮「成做」是無仝款的語詞,愛分。
.拍噗仔phah-pho̍k-á:『鼓掌』。
.延延iân-tshiân:這个詞誠趣味,“iân“佮”tshiân”仝一个漢字。
“iân“是文言音,”tshiân”是白話音,兩字攏是延遲的「延」。
二、看戲齣(hì-tshut)講臺語:
◎有空無榫ū-khang-bô-sún
例:你毋好閣講一寡有空無榫的。這定定聽著。
無仝的兩項物件欲鬥做伙,通常你有榫眼,有榫頭,
「榫眼」就是凹落去(naih-lo̍h-khì)的,
「榫頭」就是會當拄仔好鬥起來會峇(bā),較尖較長的彼頭。
正常來講,愛「有空有榫」,按呢才鬥會峇。
有空無榫,攏咧形容一寡較無合理的,抑是做無啥物效果、無啥結果的彼款代誌,
咱攏會講「有空無榫」。
◎一句話三斤六重
Tsi̍t kù uē sann kin/kun la̍k tāng.
干焦一句話,都三斤六重,按呢算無輕,蓋有份量(hūn-liōng)。
就是講出來的話,應該是愛有伊的份量,愛有伊的承諾(sîng-lo̍k),
袂當我凊彩講講的,當做有講敢若無講,按呢袂當的。
咱傳統上講數字,講著「三」,講著「六」,這攏是代表足濟的,
較大量,較濟的彼款的形容,攏會用「三」,抑是「六」來講。
所以,一句話三斤六重,話毋通烏白講。
二、公共事務做伙舞:婚姻平權
講著婚姻平權,佇咧2016年年底開始,一直到2017年的頂半年,規半年,咱臺灣社會討論這个議題,討論甲非常熱烈。
大部份的人欲結婚,敢若無啥物困難,但是仝款生理性別的人,欲結婚是足困難的代誌。
◎婚姻平權
*釋字748號
佇2017年,差不多4月的時陣,咱大法官會議,in做一个解釋,號做「釋字748號」,
中華民國法律民法,仝款生理性別的人,欲結婚的權利,無,這佮咱的憲法予咱的平等權來講
是袂合的。
大法官會議就講立法院應該愛修法,予仝款生理性別的人,仝款有結婚的權利。
*愛保障同性結婚權
這个解釋一下出來,全世界攏咧關心咱臺灣,因為咱臺灣就按呢成做亞洲頭一个佇法律頂懸,
保障仝性別的人婚姻的一个國家。
*法律欲按怎修改?
到底法愛按怎修?問題又閣來矣,這馬逐家意見攏足濟,到這陣猶無一个結果。
◎支持改法的
*有合(ha̍h)憲法平等原則
咱先莫講有一寡人聽著仝性別的人欲結婚,亻因就足反對的就算咱支持仝性別的人欲結婚,
欲按怎修法,嘛有兩派的講法。
頭一派,當然這都愛對民法來修起,支持改民法。因為咱規个國民佮婚姻有關係的規定,
攏是佇民法內面,若是欲合憲法平等原則,當然愛來修民法。
*強調同性婚姻無各樣
這毋但會當予仝性別的人結婚,會當隨來結婚,閣有一个意義,就是仝性別人的婚姻,
佮異性別人的婚姻,無各樣,無無仝款。
*立專法是大細目
按呢可能愛足久的,是毋是愛來立專法?但是支持改民法的人,感覺刁工立專法,
是有一種歧視的感覺,就是有大細目的感覺。
◎支持立專法的
*民法愛改的條文足濟
因為民法內面,針對翁仔某條文,欲改的有夠濟,有300百外條,若是一條一條來改,
毋知愛改到當時。
按呢時間拖傷久,仝性別的人欲來結婚,可能愛足久以後。
*同性配偶囝兒的婚生推定
欲來改民法,無遐爾仔簡單。
因為民法內面,譬如講有一个號做「婚生推定」,仝性別的人結婚了後,對方生的囝,
算是我的直系血親,抑是姻親。
譬如講這款的問題,愛按怎來解決。
支持立專法的人講修民法是非常困難,
◎兩款做法的長佮短
立專法,猶閣有修民法,兩種做法,到底佗一種較好?
*立專法:較省工,敢若大細目
立專法會較省工,會當隨予仝性婚姻的人得著這款的權利。
*改民法:權益攏相仝,厚工
改民法,是權益攏相仝,但是就是較厚工。
*愛予逐家有平等的婚姻權
兩爿講起來攏敢若有道理,這都看逐家是欲按怎來看。
到這陣,猶毋知影咱政府欲按怎處理,希望政府跤手會當較猛咧,
較緊予仝性別的人會當親像大部份的人仝款,會當佮相意愛的人講:「咱來去結婚。」,
毋通閣予逐家硞硞(kho̍k-kho̍k)等。
◎掠包
.「釋sik」字:“k”舌根音愛清楚。釋迦sik-khia的「釋sik」。
.保障pó-tsiòng:障礙tsiòng-gāi的「障tsiòng」。
註:《教典》障tsiong/tsiòng兩音攏有。
.權益khuân/kuân-ik的「益ik」,愛唸予清楚。
◎語詞
.婚姻平權hun-in pînn-khuân/kuân:權有兩个音,攏會使。
嘛有人用諧音(hâi-im)講做「平懸pênn/pînn-kuân」。
.同性戀tông-sìng-luân/luān:有人講同性戀,嘛有人講仝性戀。
一般大部份的人是講同性戀較濟。「同tông」這个音咱有熟。
戀luân/luān:這字有第5聲,嘛有第7聲,兩个音攏有。
.歡頭喜面huann-thâu-hí-bīn:「頭thâu」愛變調,這四字是一个詞。足歡喜的款。
.各樣koh-iūnn:表示無啥仝款,無啥正常,佮普通時的形無啥仝,按呢攏會當講是「各樣」。
仝性別,抑是無仝性別的婚姻,應該是愛仝款,無各樣。
這个詞可能誠濟人無一定捌聽過,會當共抾起來用。
.大細目tuā-sè/suè-ba̍k:仝性別佮無仝性別,不管啥物性別的婚姻無仝款的對待,
按呢是毋是就是「大細目」。
.好心好行hó-sim-hó-hīng:
希望逐家會當好心好行,來成全逐家想欲結婚的這種權利。
請逐家較好心的意思。
.有影有跡:影跡iánn-tsiah/jiah/liah
政治的承諾,選前是按怎,選後應該仝款,按呢確實有影有跡。
.跤手較猛kha-tshiú khah mé:因為有真濟仝性別的愛人仔,等數十冬矣,
攏無法度通好有結婚的權利。
所以希望政府跤手較猛咧,毋通予亻因硞硞(kho̍k-kho̍k)等。
.硞硞等kho̍k-kho̍k-tán:一直等,一直等,等無按呢。
三、俗諺
◎有緣做朋友,無緣做牽手。
Ū-iân tsò pîng-iú, bô-iân tsò khan-tshiú.
若準攏無予亻因有結婚權利保障的時陣,就是干焦會當做朋友,
無法度做牽手,足遺憾的。
人本來有緣的,攏予你變做無緣的。
若是這个法律無過,本來有緣,攏變做無緣。
希望這句,會當莫用佇咧咱仝性婚姻的朋友身上。
## [2018.01.18《台語講世事》:公投法補正](https://youtu.be/1MWBuZsDr4c)
咱這个《台語講世事》,欲招逐家用臺語來講厝內面以外的代誌,這馬節目愈來愈豐富矣,毋但有看新聞,閣會當看戲齣。
.設置siat-tì
.創辦人tshòng-pān-jîn/lîn:辦pān,變調愛讀做第3聲。
.否決hónn/hóo-kuat
.避免pī-bián:俗音phiah-bián,俗音就是一般人讀毋著。
.俗諺 sio̍k-gān:諺gān,是第7聲。
一、看新聞講臺語:呂前副總統推捒2018辦中立公投
咱「公民投票法」修正了後,呂秀蓮前副總統欲來捒和平中立公投,希望臺灣成做「和平中立國」的公投。
公投的內容到底是啥?咱這馬猶閣毋知,因為亻因猶閣咧撨(tshiâu)。
*公投法戶橂降低
*佮選舉做伙辦,提升投票率
*領土、國旗、國號的變更,袂當公投
假使對直接民權的觀點來講,會當予少數人連署,就會當第一關順利提案,了後,閣有一段時間宣傳期,來招閣較濟人來關注這个議題,連署了後,是毋是就會當來辦這个重要議題的公民投票,會當直接予人民出來表達,這是誠好。
可能咱過去無這个制度,所以逐家可能想講這佮一般咧選民意代表,抑是選縣市長有啥物無仝?
人民若無了解,就袂去注重,就袂想欲去投這个公投的投票。
其實真濟人,猶閣無了解,這个公投法到底是咧舞啥貨?
◎語詞
.量約liōng-iok:就是大約、大概的意思。
例:假使會當量約仔偌濟人來連署(liân-sú),就會當成案。
.推展tshui-tián:「推展」啥物觀念、啥物議題。
若是欲「推捒」,欲「推動tshui-tōng」,用「推tshui」。
這个字古早是另外一个意思,是「推推咧」彼个「推thui」,
落尾,這馬愈來愈濟人較毋知影→推tshui,較知影→推thui,
可能去受著華語的影響,加減有。
.選舉suán-kí/kú:這咱較會曉,是腔口差。
.同齊tâng-tsê:咱是毋是欲「同齊」來捒啥物款的議題。
意思佮「做伙」差不多,是另外一个用法。
.呼籲hoo-io̍k:「呼籲」逐家來關注咱重大的議題。
.制憲tsè-hiàn:到底是欲「修憲」的層次,抑是「制憲」的層次。
這就是會當閣來討論。
若是「公投」這个工具,逐家攏猶袂曉用,咱先來試一寡普通的生活議題,試看覓,逐家知影公投的重要性了後,咱才閣來舞重大的議題。
咱會使對身軀邊、社區、地方的議題,先來予人民普遍知影「公投」是啥物貨,是啥物款好用的工具,這个觀念來傳播,來推捒。
先提一寡生活的議案,咱來練習一下,這可能嘛是一種做法。
二、看戲齣(hì-tshut)講臺語:
◎一人主張,毋值兩人思量。
Tsi̍t lâng tsú-tiunn, m̄-ta̍t nn̄g lâng su-niû.
﹡你欲主張啥物,你欲講啥物,這是主張。
﹡思量,一般就是咧講「考慮、研究」這方面的意思。
﹡兩人,是一个譬喻phì-jū/lū,毋是一定兩个人,。
﹡意思是:一个人的主意,往往可能無想甲遐多方面、多元的角度,
若會當有無仝人,三、四个人攏會使,較濟人來考慮,
來研究,可能會有閣較濟無仝款的角度,會想甲較周至,
按呢咧主張,咧決定代誌,可能會較好勢。
◎徛懸山,看馬相踢。
Khiā kuân-suann, khuànn bé soi that.
﹡意思是:看兩爿咧相戰也好,咧搶資源也好,無我的代誌,
顛倒有可能亻因兩爿攏著傷,攏無才調了後,我才閣來
看有啥物通好抾的。大部份是攏講按呢。
毋過咱這馬俗諺有無仝款的應用,你看欲用佇tueh.
若用佇咱現代社會,欲公投也好,欲制憲也好,啥物議題也好,
咱攏無欲去關心,無欲去共注意,敢若袂輸攏無咱的代誌,
按呢毋好。
因為咱這馬欲做公民投票的時陣,決定的代誌,牽涉著每一个人,
咱袂當「徛懸山,看馬相踢。」,愛出來頓票。
三、公共事務做伙舞:公投法補正
前一站仔,逐家討論甲足烈的,就是咱《公民投票法》,佇立法院已經修正過矣。有修正,就表示進前嘛有。
咱這馬來看,到底過去的《公投法》是啥物款的形?
◎公民投票法
上早以前,差不多25年前,是由前立法委員蔡同榮先生,嘛是咱民視的創辦人之一,伊所提出來一个草案,又經過10年,佇2003年的時陣,《公民投票法》才過關。
以前的《公民投票法》,本來是欲予全民會當實踐公民投票的權利,
但是以前的《公民投票法》,予逐家感覺足奇怪,有「雙二一制」。
*二一制:過手戶橂足懸
啥物是「雙二一制」?就是有兩个「二一制」。
後壁的「二一制」較簡單,就是出來投票的人,贊成的人愛超過
二分之一,就是愛過半數,按呢才會當過手。這个二一有合理。
但是,上蓋重要的,頭前猶閣有另外一个「二一」,若是欲過手,
戶橂就是→出來投票的人,愛有「所有投票人數」的二分之一。
*鳥籠仔公投
這个戶橂傷懸,所以古早,咱講《公民投票法》是鳥籠仔公投。
*強化國防公投案的情形
咱來舉一个例,佇2004年,咱有辦過一个「強化國防公投案」,
有745萬人出來頓票,有651萬人贊成,這是足懸的,毋但1/2,
已經超過九成的人贊成,但是這个案猶是沒過手,為啥物?因為
頭一个「二一」戶橂迒袂過,真正是足譀古的代誌。
舉這个例,逐家都知影,以前的《公民投票法》真正是鳥籠仔公投。
◎公投法戶橂降低
這馬這个《公投法》已經修法通過,戶橂已經降低矣。
*到選舉人數萬分之一就會當提案
因為《公投法》欲過,有足濟程序,包括愛先提案,閣愛成案,
才來是二分之一、二分之一的戶橂。
這馬降低矣,以前你若欲提案,愛選舉人數千分之五,
這馬降做萬分之一,所以這馬提案就較簡單,戶橂較低矣。
*同意票超過無同意票
*到選舉人數四分之一就過手
這上重要的,「雙二一」的制度,佇新的《公投法》內面,
戶橂予降低矣,以前愛有二分之一的人出來投票,這馬毋免矣。
只要管著「同意的人,愛選舉人數四分之一」,按呢就會當過手。
◎其它修正事項
*無適用公投的項目?
逐家討論甲誠烈的,有一寡項目是無法度用公投來處理。
譬如講逐家上要意的就是國名、國土,咱的國旗等等,
攏無法度佇這擺的公投內面使用。
因為這寡代誌,佇憲法修改的時陣來修改就會使。按呢講起來,
這馬新的《公投法》是一个細的鳥籠仔,換做一个大的鳥籠仔爾。
*愛設置電子系統
新的修正有一个較好的所在,就是以前欲公投,愛揣足濟人來連署,
攏揣無人,這馬規定主辦單位愛設置電子系統,會當予𤆬頭的人
招有人來連署。
*行政機關通辦公投
以前,行政機關袂使辦公投,這馬行政機關會當辦公投。
◎各黨團的立場
*欠席者投票
國民黨:是毋是會當辦欠席者投票?就是無轉去故鄉,敢會使投票?
結果,這條是「會使」,但是愛辦佇全國性的公投,才會當用。
*兩岸的政治參詳
中國佮咱臺灣的政治參詳,是毋是嘛愛公投了後,才會當來參詳?
這條就無過,講是囥佇《兩岸協議條例》內面來處理就會使。
*猶是無完全直接民權
這回《公投法》的修正了後,仝款無法度予咱來決定臺灣的前途,
猶是無法度直接民權。
咱臺灣的民主嘛是閣進一步矣,紲落來,咱共同來慣勢公投的工具,了後,慢慢仔來為咱臺灣繼續拍拚。
◎掠包
.包山包海pau-suann-pau-hái:山suann,毋是「san」,愛變調。
因為山佮海,攏是咱環境真熟的物件,無需要用文言音。
文言音大部份攏咧講較抽象,較毋是生活上,書面語的物件。
.創辦人tshòng-pān-jîn/lîn:辦pān,變調愛讀做第3聲。
.戶橂hōo-tīng:橂tīng,毋是tiānn。
.程序thîng-sū:序sū,毋是sû。
.項目hāng-bo̍k:目bo̍k,毋是bōo。愛較切短咧,是短音入聲的字。
.欠席者khiàm-si̍k-tsiá:席si̍k,是席次si̍k-tshù,愛變調。
因為這種詞咱無定講,一般算是咱愛新學的。
.工具kong/kang-kū:有的人講文言音,有的人講白話音,攏有人講。
咱本來無咧用這个詞,咱一般講「家私ke-si」,較口語講法。
◎語詞
.實踐si̍t-tsiān:這个字一般可能口語較不一定有咧講「si̍t-tsiān」,
欲實踐啥物款的理想,實踐啥物代誌,「踐tsiān」是第7聲,
後壁有「理想」、「想法」,愛變調。
.譀古hàm-kóo:有啥物款足無道理,抑是足離經的,咱會講足譀古。
.估算kóo-sǹg:你欲「估計kóo-kè」、抑是欲「計算kè-sǹg」啥物,
咱會當講「估算」。
例:這回公投,咱愛「估算」一下,偌濟票才會當過手。
.創制tshòng-tsè
.複決ho̍k-kuat:複雜的「複ho̍k」,決定的「決kuat」,
這个詞咱普通時較無用台語講的慣勢,愛共唸100遍。
是針對法律的部份。
.否決hónn/hóo-kuat:有人讀有鼻音的「hónn」決,
有人讀無鼻音的「hóo」決。
.避免pī-bián:俗音phiah-bián,俗音就是一般人讀毋著。
.呼人連署khoo lâng liân-sú:「呼khoo」是這个漢字,愛學起來。
.欠席者投票khiàm-si̍k-tsiá tâu-phiò
.兩岸lióng/nn̄g-huānn:兩種講法攏有。
海岸hái-huānn、駁岸poh-huānn的→岸huānn,
咱了解白話音足慣勢,講huānn的是較濟,講白話音的較濟。
兩字攏是白話音,就是「兩岸nn̄g-huānn」,
兩岸lióng-huānn,兩lióng是文言音的唸法,配白話音的岸。
咱臺灣佮菲律賓嘛算「兩岸」,佮日本嘛算「兩岸」。
.放冗pàng-līng:「冗līng」是這字。
四、俗諺 sio̍k-gān
◎家己栽一欉,較贏看別人。
Ka-kī tsai tsi̍t tsnâg, khah iânn khuànn pa̍t-lâng.
栽一欉啥攏會使,栽一欉樹仔,栽一欉果子。
家己栽,較贏看別人。
就是直接實行咱人民的權利,「公投」就是一个真好的機會,
咱對啥物議題,有啥物的主張想法,家己去實踐,來參與公民投票,
逐家攏喝聲、出聲,表達家己的看法。
若感覺講啥物款的制度,咱想欲愛,就呼一寡人,來公民投票,
較贏等別人來設這个法。
## [2018.01.25《台語講世事》:體育改革](https://youtu.be/CKRPoUDVyCY)
.走健tsáu-kiānn:毋是「健康kiān-khong」的「健kiān」,
是「勇健ióng-kiānn」的「健kiānn」。
.黃連n̂g-nî
.大粒lu∥tuā-lia̍p-lu
.「迎接gîng-tsiap」新的一冬,嘛會當「迎接ngiâ-tsih」新的一冬。
.窒倒街that-tó-ke/kue:為啥物是「倒tó」?
.會計kuè-kè、會計kuè-kè、會計kuè-kè,讀3擺。 (O)
俗唸做會計huē-kè。 (X)
一、看新聞講臺語:元旦走健兩萬人上街:
﹡民眾興tshih-tshih
﹡頭一擺開放現場報名
﹡愛運動才會健康食百二
彼工,真正足趣味,「熊讚」嘛有來,臺灣烏熊彼隻,逐家那開講,那行路,對健康真正袂䆀。
毋過,彼工的空氣汙染指數是按怎?講笑講笑,這馬講,敢未傷晏?
◎語詞
.元旦guân-tàn:頭一工,若欲講是節日,你就按呢講,較無口語。
.烏陰oo-im:無啥日頭,無啥曝,凡勢是罩雺罩霧。
.走健tsáu-kiānn:毋是「健康kiān-khong」的「健kiān」,
是「勇健ióng-kiānn」的「健kiānn」。
會使講是新創的詞,這是佇臺文作家陳明仁老師的小說集《路樹下的tōo-peh-á》內底,
有用這个詞,這是新創作的。
因為過去都無這款的『健走』、『健行』,『慢跑』。
.興tshih-tshih:足興的,足濟人的。
.插插插tshah-tshah-tshah:足濟人,無縫矣。
.份額hūn-gia̍h:現場報名的「份額」無蓋濟,誠緊名額攏滿矣。
.食百二tsia̍h pah-jī:逐家愛定定運動,才會當健康食百二。
二、看戲齣(hì-tshut)講臺語:
◎啞口硩死囝。
É-káu teh-sí kíann.
.啞口é-káu:袂當講話、無法度講話的人。
萬不幸,真正「啞口的硩死囝」,有苦衷講袂出來,抑是無地講。
彼个情景足歹想像,若是真正硩著囝,主要是啞口無法度講話,
來講拄著啥物代誌,有苦楚,有痛苦,攏無法度共人講。
形容「有苦難言」。
硩死囝已經是足艱苦的代誌,本來會當共人講一下,毋過,家己的責任,家己硩死的,
欲怪啥人,攏袂當講。
『啞巴吃黃蓮』仝款意思,食著黃蓮,袂赴呸,已經規喙足苦的。
◎有功無賞,拍破愛賠。
Iú-kong bô siúnn, phah-phuà ài puê.
﹡若做啥物有功勞,應該愛予人呵咾的代誌,但是無人共你呵咾,無人共你賞,無賞無關係,
結果,小可有啥物失覺察的時陣,閣愛你賠。
一般生活上,真濟人會用這句話,意思就是『吃力不討好』,就是我有付出,
結果無啥物相對的回報,可能淡薄仔出問題,可能愛負擔,愛賠償足濟。
毋免具體有賞無賞,應該愛公平來處理對待。
三、公共事務做伙舞:體育改革
逐回咧關心國際的體育比賽的時陣,咱除了愛關心選手的成績以外,閣愛煩惱隊外毋是咱愛的名,閣愛煩惱選手是毋是有好好仔照顧,有受著委屈無,是毋是會當來好好仔比賽。到底問題出佇啥物所在,所以逐家講愛來做「體育改革」。
◎孤項體育協會的問題
為啥物選手無夆好好仔照顧,無法度好好仔比賽,追究起來,發現原來佮國際比賽的事務接接的,而且應該是佮選手關係是非常非常密切的這寡孤項的體育協會,追究到遮來。
*政治人物擔任理事長
有人就共所有的孤項體育協會的理事長,亻因的資料調出來看,結果發現真濟理事長,
攏是政治人物。簡單講,是佮某一个政黨有關係的政治人物。
*選手對外聯絡唯一門路
因為體育的代誌,資源本來就需要政府支持,政治人物來做協會的理事長𤆬(tshuā)頭,
無啥物要緊,按呢講是無毋著,但是這寡協會佮一般的協會有真大的無仝款。
若是體育協會伊的項目,拄好是有佇亞運、奧運內面的項目,
這个協會就是選手對外聯絡唯一的門路,權力是足大的。
這寡協會,閣會當決定予啥物人會當出去比賽,有這款的權力。
這寡協會的公共性非常懸,這佮一般協會無仝款。
*人民團體法管無嚴
公共性遮爾懸的協會,咱人民團體法,管閣無啥蓋嚴,管無嚴。
這寡協會慢慢仔就走精去。
◎是按怎會按呢
咱來檢討一下,你若有團體的經驗,就知影一个協會就是所有的會員,選一陣人來做理事會,理事會內面才閣選一个人來做理事長𤆬頭。
*祕書長無任期限制
結果,發現孤項的體育協會,顛倒是祕書長比理事長閣較重要,因為祕書長無任期的限制,
變做是祕書長一直做,一直做,理事長顛倒是祕書長去揣來的。
因為祕書長上了解規个會務,規个人事,伊攏非常了解,伊才去揣政治人物,
抑是會當出錢的人,來做理事長。
*政治人物做理事長,無插事
結果,理事長規氣攏無咧插代誌,祕書長變做大粒lu(tuā-lia̍p-lu),
真濟做十年以上的祕書長,真正足濟足濟。
真濟協會攏是按呢,但是因為這个體育協會,公共性非常強,若變做按呢,逐家就愛來檢討。
*會員制度、數簿無通光
當然佮會員制度有真濟關係,過去這寡協會的會員有真濟限制,
譬如講你一定愛有一个專業,抑是一定愛理事會通過,你才會當來做會員。
公共性遮爾仔強的協會,因為過去的制度,予人無法度監督,數簿攏無通光。
進前就有人欲看「野球協會」的數簿,竟然干焦兩張A4的紙,逐家攏足受氣的。
逐家才講這應該愛來改革。
◎國民體育法的新規定
佳哉,咱《國民體育法》出來矣。
*全民通加入協會
進前欲加入協會,有真濟規定,但是這馬全民攏會當加入協會監督。
*保障選手出國比賽的權利
這个協會一定愛保障選手,出國比賽的權利。
*選手愛占理事席次兩成以上
這佮進前有真大的無仝款,經過種種的規定了後,佇今年3月進前,各各協會攏愛共新的規定改予好勢,咱會當共同期待,咱臺灣選手會當佇國外比賽的時陣,有閣較好的表現。
◎掠包
.包山包海pau-suann-pau-hái:山suann,毋是「san」,愛變調。
因為山佮海,攏是咱環境真熟的物件,無需要用文言音。
文言音大部份攏咧講較抽象,較毋是生活上,書面語的物件。
.項目hāng-bo̍k:目bo̍k,毋是bōo。愛較切短咧,是短音入聲的字。
註:以上佇[2018.01.18《台語講世事》:公投法補正](https://youtu.be/1MWBuZsDr4c?t=1054)有解說,補佇遮。
.包山包海pau-suann-pau-hái:山suann,毋是「san」。
.項目hāng-bo̍k:「目bo̍k」免遐長bōo,愛小可切一下,切較短咧。
.通光thang-kng:「通thang」是白話音,第1聲變第7聲。
.保障pó-tsiong:障(tsiong)是「障礙tsiòng-gāi」的障,毋是tsiong。
註:《教典》兩个音攏有收。毋知敢有人讀「障礙tsiong-gāi」?
.
◎語詞
.接接tsih-tsiap:佮「延延iân-tshiân」,漢字來講是仝款,
一个是白話音tsih,一个文言音tsiap。
過去老輩攏足捷講白話音tsih,可比講
例:你佇遮等,我連鞭來「接tsih」你。
就是來「接tsiap」你的意思,咱這馬攏講「接tsiap」。
例:迎接gîng-tsiap,這是文言音的講法,
迎接ngiâ-tsih,這是白話音的講法。
迎媽祖的「迎ngiâ」白話音,「接tsih」嘛是白話音。
例:「迎接gîng-tsiap」新的一冬,嘛會當講
「迎接ngiâ-tsih」新的一冬。
.憢疑giâu-gî:比「懷疑huâi-gî」閣較口語、白話,臺語的講法。
「憢疑」咱毋通共放捒,過去咱足四常咧講的。
.門路mn̂g-lōo:體育協會變做是選手對外聯絡的一个門路。
.照起工tsiàu-khí-kang:誠傳統、誠臺語的一个口語的詞,愛共抾轉來用。
.大粒lu(tuā-lia̍p-lu):這馬若較少年的,應該是較毋知,就是「大人物」的意思。
“lu”有幾若款意思,其中一个意思就是「頭捅(thóng)出來」。
.窒倒街that-tó-ke/kue:人真濟,足濟人,足濟人,規个窒死去。
為啥物是「倒tó」?佮「驚倒(tó)人」應該是仝一个意思。
「倒tó」這字的用法,可比講
「驚--死」,佮死(sí)無關係,用死來形容彼个嚴重的程度,
「驚倒人」佮「驚死人」是仝意思。
逐家無愛用彼字,換做「倒tó」這字。形容足濟物件,無一定人。
.孤占koo-tsiàm:體育協會是孤占,若像已經變做某一寡人的事業。這愛改革。
.監督kàm-tok:「監kàm」是這字的文言音。
.數簿siàu-phōo:數簿無通光,數目是毋是清楚,抑是做了無四序,愛予咱監督都著。
.會計kuè-kè:毋是huē-kè。你共想華語嘛是『會計』勾破音。應該愛共這个音抾轉來用。
四、俗諺 sio̍k-gān
◎做官騙厝內,做生理騙熟似。
Tsò-kuann phiàn tshù-lāi, tsò-sing-lí phiàn si̍k-sāi.
你佮無熟似的人,你欲哪有彼个管道,抑是交情,好去佮伊講啥。
有一點仔人情的這種部份佇咧。
譬如講搝(khiú/giú)保險,當然對親人朋友開始搝起。
這个俗諺,就是這馬體育改革,會當予這款的情形,莫定定發生,
希望會當降低遮的問題。
## [2018.02.01《台語講世事》:防治啉酒駛車](https://youtu.be/P3gj_e01xRU)
.激酒kik-tsiú
.揜貼iap-thiap
.垃圾lah-sap
.糞埽pùn-sò
.搭客tah-kheh
.拍落公phah-lo̍h-kong
.扯煞tshé-suah:
.笞刑thi/thai/tshi-hîng
一、看新聞講台語:私激米酒
.揜貼(iap-thiap)的工寮非法激酒
.激酒的家私真垃圾(lah-sap)
.凡勢已經佇市場咧賣
這條新聞咧講「激酒」的問題,偷激酒,可能用無合衛生的規格,無夠好勢的環境去激酒。
因為這馬咱用酒的量可能誠大,因為欲食薑母鴨、燒酒雞、麻油雞,攏會用著酒,
所以逐家愛細膩。
新聞內面彼間工寮,真正足狹(e̍h/ue̍h),激酒的家私無講蓋清氣,足垃圾(lah-sap)的。
這酒凡勢已經佇市場咧賣矣。你愛知影你買著的物件的來源,至少愛有標示,標示有清楚。
拄才有兩个總舖師(tsóng-phòo-sai)有講,伊內行人鼻一下著知,
閣有彼傷俗的,咱嘛愛細膩。
◎語詞
.激酒kik-tsiú:酒是用「激kik」的。猶閣有啥是用「激」的?
例:激腦kik-ló,是「激樟腦 kik tsiunn-ló」。『樟腦』
.寒人kuânn--lâng:「寒天」的意思,咱口語講「寒人」。
相對的就是「熱人jua̍h--lâng」。
「寒kuânn」佮「熱jua̍h」是重點,愛讀原調。
(兩字)後壁有兩條短線,「--」這叫做輕聲符號,
若看著這兩个符號,咱都愛較輕聲咧,後壁輕聲。
.揜貼iap-thiap:彼个所在誠揜貼,可能無啥欲予人知影,
抑是足歹揣的,足少人行跤到的所在。偏僻的意思。
.揜iap:偷偷仔。
掩掩揜揜(ng-ng-iap-iap)←『遮遮掩掩、偷偷摸摸。』
例:揜私奇iap-sai-khia
揜尾狗iap-bué/bé-káu
.家私ke-si:激酒愛用啥物「家私」?
.垃圾lah-sap:是寫做這兩个漢字。「垃圾lah-sap」還垃圾,
「糞埽pùn-sò」是這兩字,「糞埽pùn-sò」還糞埽。
.一四界tsi̍t-sì-kè/kuè:就是滿滿是。
例:你毋通醬(tsiùnn)甲一四界。
.稽查khe-tsa:去調查,去查的意思。
稽考khe-khó:就是考據(khó-kì/kù)。《台日大辭典》研究,考究。
例:警察欲來稽查。
無一定是警察,相關單位,衛生單位來做稽查。
二、看戲齣(hì-tshut)講臺語:
◎三斤貓數想食四斤鳥鼠。
Sann kin niau siàu-siūnn tsia̍h sì kin niáu-tshí.
*像拄才看的戲劇情境,就是你愛知影你的能力到tueh(佗位),莫做超過你的能力範圍的代誌,
若是超過就莫做。
用佇一般,咱可能想欲做啥,猶毋過咱可能猶無夠彼个氣力,
你莫去數想做你無法度做甲到的代誌。
啉酒駛車的問題來看,真濟人無了解情形,
可能三斤貓啉酒了後,想講家己變做六斤,數想食四斤鳥鼠。
.數想siàu-siūnn:漢字按呢寫。
◎頭毛試火。
Thâu-mn̂g/moo tshì hué.
*你明明知影足危險的代誌,你閣刁工閣去做。
咱頭毛,就算你閣較按怎長,若準講火著起來,一時仔就燒了。
想講伊頭毛傷長,其實連鞭就燒著你的頭殼頂矣。
若講著「啉酒駛車」的議題,真濟人想講足𠢕駛車,
啉酒了後欲駛車,就是「頭毛試火」,毋是干焦燒著家己頭毛,閣燒著別人的頭毛。
這真正袂使。
三、公共事務做伙舞:防治啉酒駛車
這馬這个時間,咧欲過年矣,最近有真濟朋友,攏咧食尾牙,逐家啉酒了後,是按怎轉去的?這个問題非常重要。
◎防治啉酒駛車
.逐冬啉酒駛車死亡的有成百个
根據統計,逐冬啉酒駛車死亡的,都有成百个,成百个就是差不多咧欲一百个,
這是非常非常嚴重。
.成做社會問題
.有民眾感覺處罰傷輕
明明就有一寡法律咧規定,是按怎猶是逐冬攏會當聽著,有人啉酒駛車去挵(lòng)人,
抑是去夆挵死這款的問題。
是毋是處罰傷過輕?
.
◎目前的處罰條例
這馬有一寡法律,就是咧做這款規定,處罰佇舊年有經過修正,有閣較重,
咱來看修正有加啥物物件。
.推辭酒測,一擺罰十八萬
若佇駛車的時陣,拄著警察欲共你做酒測,你無欲予伊測,一擺愛罰18萬,佇過去是罰9萬。
這擺修正了後,是罰兩倍,若閣再犯,每一擺閣加罰十八萬。
.牽連條例:搭客嘛愛罰錢
新的條例內面,閣加一條「牽連條例」,毋但駛車的人愛夆罰,若坐伊的車,嘛仝款愛罰錢。
所以希望這款條例,逐家共同來注意。
.若害人死亡,車拍落公,駕照扯煞
若是啉酒駛車,害人死亡,車拍落公,車就毋是你的矣,駕照扯煞,永遠袂當閣考執照。
這馬的條例加這寡,除了這以外,以前嘛是仝款,若害人死亡等等,嘛是有一寡刑法的處罰,愛掠去關等等,這馬法律有規定,逐家應該袂使啉酒駛車。
◎按呢敢有夠額
.猶是有藝人無尊重酒測
明明就有法律,前一站仔,嘛是有看著藝人去夆掠著,酒測了後,
伊閣講伊干焦啉一兩杯仔bih-luh(ビール)爾爾,但是測出來,明明足懸的。
咱就感覺真奇怪,是毋是逐家攏無尊重法律?
.有人提議「笞刑」
.親像古早衙門的刑杖
「笞刑」親像古早衙門提棍仔,抑是箠仔來共你捽。
.無人道,是共人嚇驚
這款刑真正無人道,而且咱明明是文明人,也毋是野蠻人,毋通按呢來對待。
所以有人提出這款提議,真濟人反對。
◎靠逐家的力量
這馬有一个協會,號做「臺灣酒駕防制關懷協會」,in咧推捒除了法律以外,咱臺灣人一寡文化嘛是愛綴咧改。
.台灣的應酬文化鼓舞啉酒
咧啉酒的時陣,一直鼓舞人愛啉酒,愛“立在”(tshāi)罐,啉酒毋通囉嗦等等,
這寡文化咱攏愛思考一下。
.店頭家愛幫助人客平安轉去厝
.叫計程車,替手駛車,朋友鬥載
譬如講共亻因叫計程車,揣人來共伊駛車,抑是朋友鬥載轉去。
這款習慣佮這款文化,這是咱這馬愛重視的。
.應酬顧性命,啉酒莫駛車
若是有想著,這擺去食飯的時陣,會啉著酒,就莫駛車出去,你都袂遐爾仔煩惱。
除了法律以外,觀念嘛愛改,只要按呢,啉酒駛車的問題,才袂遐嚴重。
◎掠包
*有一寡是變調的問題,變調變毋著,愛加練習,愛學羅馬字。
.尤其iû-kî:「其kî」,後壁有字愛注意變調。
.防治hông-tī:「治tī」第7聲,後壁有字,愛變讀第3聲。
政「治tī」,醫「治tī」,防「治tī」→ 治(變調7→3調)療。
.警察kíng-tshat:變調應該讀做「king」-tshat,這馬普遍逐家攏講kìng-tshat。
「警kíng」佮「敬kìng」聲調無仝。
.(罰金)加倍加倍,應該是「加起去ka--khí-khì」,毋是「加入去」。
.注意tsù-ì:變調毋是「主意tsú-ì」,是愛讀做「變調3→2調,變調3→2調」啥物代誌。
.扯煞tshé-suah:佮伊扯(tshé),扯(tshé)後壁有字,變調2→1調。
例:你啉酒,駛車去夆掠著,駕照會扯煞。
.前一站仔tsîng-tsi̍t-tsām-á:「站tsām」後壁有字,變調7→3調。
◎語詞
.推辭the-sî:若準拄著咧測酒精度的時陣,袂使推辭,愛乖乖仔測。
.搭客tah-kheh:仝車的搭客,就是坐車的人客。
.拍落公phah-lo̍h-kong:若是啉酒駛車,害人死亡,
這个車就毋是你的矣,是公家的。這是足純的臺語講法。
.扯煞tshé-suah:我欲佮你「扯tshé」,就是寫這个字。
駕照扯煞,就無愛閣予你繼續駛車,永遠無愛予你閣考。
.放放放pàng-hòng-hòng:法律佇遐,毋通共伊「放放放」。
仝一个漢字,放pàng,動詞,白話音。
放放hòng-hòng:文言音。
咱臺語有寡例,就是白話音佮文言音做伙,變做另外一个詞,
接接tsih-tsiap、食食tsia̍h-si̍t。
.笞刑thi/thai/tshi-hîng:因為「笞」,有幾若个音,攏會使講。
古早的一種刑罰,用皮鞭共你捽,用一支長長的棍仔,
抑是皮鞭共你捽的刑罰,就是「笞刑」。
.捽sut
.嚇驚heh-kiann:這種笞刑是咧共人嚇驚,予你以後毋敢閣做這項代誌。
咱是文明人,愛用法律、態度、觀念來改正,做調整。
四、俗諺 sio̍k-gān
◎酒醉心頭定,酒痟無性命。
Tsiú-tsuì sim-thâu tiānn, tsiú-siáu bô sènn/sìnn-miā.
啉淡薄仔,敢若微微仔,較好睏。
咱欲講的是後壁這句:酒痟無性命。
你毋通想講啉一點仔酒,可能無啥物關係,其實,
酒痟起來,可能會影響著你的性命。
若有啉酒,千萬毋通駛車。
## 2018.02.08《台語講世事》過年,停播
## 2018.02.15《台語講世事》過年,停播
## [2018.02.22《台語講世事》臺灣的bàng-gà(動漫畫)](https://youtu.be/P4PrAd5TXog)
.蜂岫癰phang-siū-ing:癰ing,這字足歹寫,愛會曉寫。
.推捒tshui-sak:欲共push、促使、促進啥物代誌,攏是講「推捒tshui-sak」。
.欣賞him-sióng:是合喙的「欣him」。
.一「齣tshut」戲、一「齣tshut」電影,咱是用「齣」。
.描寫biô-siá:文言音biâu-siá,描白話音biô-siá,毋是”miâu”。
.「Bàng-gà」節,毋是「艋舺Báng-kah」節。
.加薦仔ka-tsì-á:咱講彼个袋仔足有臺灣味,特色的袋仔。
.企畫khì-uē(O),會佮「氣話khì-uē」仝音。
企畫khè-uē(X),會佮客家朋友講的話「客話Kheh-uē」倚音。
註:《台文華文線頂辭典》、《台英辭典》有收「企劃khì-hi̍k」、「計劃kè-i̍k/hi̍k」。
《教典》無收。
一、看新聞講臺語:生湠臺語讀劇
.用聲、表情來搬戲
.用臺灣話講臺灣事
.向望母語繼續生湠
「讀劇」就是用聲佮表情來搬戲,干焦聲佮表情,嘛足感動人的。
就是用「臺灣話」來講「臺灣」的歷史佮代誌,本身就會感動人。
譬如講,講著二二八彼段,予人真正哭出來。
毋但講著二二八,閣有講著其它的事件,就是規个無仝款的事件,來串連做咱遮的人,
是按怎會投入母語的運動,遮的故事。
毋但二二八,嘛有足濟人的故事,內面嘛有阿惠老師的故事,對少年一直行來,
為咱臺語拍拚的情形。
這回為逐家介紹這號做《生湠臺語讀劇》,「生湠」的劇名,就會知影意思,
希望母語會當繼續生湠。
◎語詞
.蜂岫癰phang-siū-ing:這是一種病症。
蜂岫(phang-siū)就是蜂的岫,鳥仔岫(siū),攏是這字。
癰ing,意思是會生膿,會發炎的一種症頭。這字足歹寫。
.激聲kik siann:因為是讀劇,演員愛用各種無仝的聲嗽,共激出來,來表達一寡劇情。
激聲愛出一个力,抑是一个過程。
.激酒kik-tsiú:酒嘛是用「激kik」的。
.朗讀lóng-tho̍k:咱臺語口語本來無咧講,意思就是大聲讀出來,洪聲讀(âng-siann tha̍k)。
.戒嚴kài-giâm:講著戒嚴時期的歷史,所以這个詞愛讀予著。
.推捒tshui-sak:咱欲推捒母語的傳承,這个動作,愛共記起來。
只要你欲共push啥物代誌,促使、促進啥物代誌,攏是講「推捒tshui-sak」。
.生湠senn/sinn-thuànn:欲共這个語言,好好仔予伊會當活落來,閣會當湠出去。
.稀微hi-bî:有一个類似的「衰微sue-bî」,無一定干焦講心情。
例:街仔路無啥人,嘛是誠「稀微」。
.衰微sue-bî
.欣賞him-sióng:是合喙的「欣him」。
合喙、無合喙,是咱臺語非常重要的一个重點,愛記予著。
二、看戲齣(hì-tshut)講臺語
◎掩來扯去,哪有通賰?
Am-lâi-tshé-khì, ná ū thang tshun?
.掩am:就是共崁(khàm)起來。其中一種意思。欲按怎有法度掩?
可能是你彼个欲掩的物件,較大、較濟,才有法度掩,無會掩袂峇,無夠通掩。
.扯tshé:一般是講共切予短,其中一个意思。
*佮「掠長補短lia̍h-tn̂g-póo-té」有一點仔類似。
準講有較濟,可能連鞭無啥有夠,就提來塌(thap)。
規句的意思是差不多差不多,勉強會當過。
掠這爿、扯這爿的,來掩這爿的,掩來扯去,舞規晡,無通賰,有夠用就袂䆀矣。
.佮「生食都無夠,哪有通曝乾。」仝款的意思。
Tshenn tsia̍h to bô-kàu, ná ū thang pha̍k-kuann.
◎看貓無點。
Khuànn niau bô tiám.
*有人可能會加一个「的--ê」,「看貓的無點」。
「貓的」有一个講「貓面的」,規面都是攏貓貓,真濟點,
應該「貓的」有足濟點,你顛倒「看貓的無點」,就是「看人無」。
嘛有人解說講「貓佮虎、豹」攏是貓科,虎佮豹有斑、有點,就是較勇、較歹,較赤,
貓無點,敢若較好欺負。
點,佇虎、豹來講,花花仔,媠媠仔,咱一般貓的點,普普仔,無像虎豹遐媠。有人按呢解說。
意思就是看人無,你叫是人無啥才調,抑是啥物攏袂曉、頇顢,你毋知影人其實有𠢕(gâu),
有撇步的所在。
◎觀目、詼諧、跤步、手路
kuan-bo̍k, khue/khe-hâi, kha-pōo, tshiú-lōo
會當參考[2018.8.30《台語講世事》:環保自然葬](https://youtu.be/Tm6j7xQVIMA?t=1322) 22:02解說
三、公共事務做伙舞:臺灣的bàng-gà
◎bàng-gà是啥物
bàng-gà這个詞是對日本來的。
*尪仔冊、動畫
佇日本,就是尪仔冊的意思。
若是對咱臺灣人來講,bàng-gà較接近動畫。
咱細漢的時陣,佇電視頂懸看著的,就是號做bàng-gà。
*逐家做議量的方式
看bàng-gà的時,逐家攏足歡喜,是做議量(tsò/tsuè-gī-niū)的方式。
*日本、美國的較占贏
這馬看著的bàng-gà,是對日本、美國來的較濟,亻因這方面的產業發展了真好,足占贏的。
◎臺灣的bàng-gà電影
*呈現臺灣在地景緻
最近有兩部咱臺灣bàng-gà電影,一部號做《幸福路上》,閣一部號做《貓仔巴克里》。
這兩部電影,逐家看了攏足感動的,除了故事內容,予咱感動,主要是電影內面,
呈現逐家攏足熟似的臺灣在地的景緻。
*1998年的《魔法阿媽》:Disney的手路,講臺灣的民俗
若講著咱臺灣bàng-gà電影,絕對毋通袂記得,差不多20年前,
1998年有一部電影號做《魔法阿媽》,彼當時開差不多五千萬,用的是Disney的手路,
但是講的是臺灣的民俗。
*著獎予人呵咾
逐家看了足呵咾,毋但咱臺灣人呵咾,嘛有著著國際上的獎。
這部《魔法阿媽》會使講是咱臺灣bàng-gà的上懸點。
◎臺灣bàng-gà技術
經過20年來,咱臺灣敢閣有其它的bàng-gà出現,敢若無遐衝,逐家就咧講哪會按呢?
是毋是有足濟問題?
*無輸外國,捌代工Disney的
佇過去,咱臺灣bàng-gà的技術,絕對袂輸外國,真濟外國bàng-gà,攏是來臺灣代工的。
*猶是無成做夠分的產業
所以講技術無問題,但是猶是無成做有夠分的產業。
*穡頭流失、人才外移、產業衰微
問題是佇佗?是毋是政府無重視?無規劃?bàng-gà穡頭流失去,
人才閣徙(suá)去外口,產業規个衰微去。
◎按怎發展bàng-gà產業
*參加法國世界等的bàng-gà節
雖然按呢,咱臺灣猶是有真濟bàng-gà家、出版社,攏非常拍拚。
譬如講法國有一个世界等的bàng-gà節,最近拄好舉行完,
這个bàng-gà節,咱臺灣已經連紲參加差不多有6年的時間,每一年攏去參加。
*介紹臺灣島嶼的多元文化
參加這个節,透過bàng-gà的方式,介紹咱臺灣島嶼多元的文化。
譬如講今年的主題,用的是庄頭(tsng-thâu),抑是市仔(tshī-á),
透過這款的方式,來共逐家講咱臺灣的多元文化。
亻因這回閣有送外國朋友,臺灣上有特色的加薦仔(ka-tsì-á),非常特別。
*愛發展的包括劇本、企畫、行銷、出版
透過參加bàng-gà節,欲發展一个bàng-gà的產業,無遐爾簡單,包括劇本嘛愛發展,
企畫嘛愛發展,行銷、出版等等,上重要的
咱愛講有物件。
*文化是創作的根基
這一切一切,咱攏愛繼續來拍拚,嘛需要政府好好仔來規劃,因為這馬bàng-gà產業,
會使講世界流行,咱一定愛好好把握。
◎掠包
.bàng-gà:毋是讀做「艋舺Báng-kah」。
本來照日語音來翻,應該是濁音「が」gà,毋是「か」kà。
因為咱臺語有gà,嘛有kà,照日語原音是濁音的「gà」。
.呈現thîng-hiān:欲呈現(hiān)臺灣在地景緻,變調是7變3調。
.一「齣tshut」戲、一「齣tshut」電影,咱是用「齣」。
「一支」嘛是有人講,拍「一支」片,看「一支」片。較無講「一部」。
.描寫biô-siá:文言音biâu-siá,描白話音biô-siá,毋是”miâu”。
.發「展tián」bàng-gà:「展tián」後壁有字愛變調,是2變1調。
.「Bàng-gà」節,毋是「艋舺Báng-kah」節。
.加薦仔ka-tsì-á:咱講彼个袋仔足有臺灣味,特色的袋仔。
.企畫khì-uē:照字來講是「企khì」,若無就講「策(tshik)畫」、「計(kè)畫」一下。
「企khè」畫(X),咱慣勢聽著這,欲改嘛無好改矣。
註:《台文華文線頂辭典》、《台英辭典》有收「企劃khì-hi̍k」、「計劃kè-i̍k/hi̍k」。
《教典》無收。
◎語詞
.bàng-gà:”b”佮”g”攏是濁音。
.尪仔冊ang-á-tsheh、尪仔書ang-á-tsu:攏會使。
.戲園hì-hn̂g:欲看戲,去戲園看。古早較傳統的講法。
.手路tshiú-lōo:用啥物款的手路去畫,用迪士尼(Disney)的手路。
這款方法,抑是這種方式。
佮「手路菜」,是『招牌菜』代表性的意思無仝。
.做議量tsò/tsuè-gī-niū:看bàng-gà,做議量。
例:我做這个工課,是咧做議量的。
有人按呢用,做趣味的都著矣,按呢袂䆀,共工課做議量。
.過鹹水kuè/kè kiâm-tsuí:咱臺灣的bàng-gà,誠濟是有「過鹹水」。
提獎,得著真濟外國的肯定,去到外國就是「過鹹水」,毋是「鹽水iâm-tsuí」。
「鹹水kiâm-tsuí」就是咧講海洋,海水鹹鹹,過海都著矣。
.夠分kàu-hun:咱臺灣的bàng-gà猶未成做「有夠分」,就是猶未夠成熟。
「夠分kàu-hun」就是熟矣。
例:彼果子攏會傷夠分,就愛緊食。
.穡頭sit-thâu:咱bàng-gà做的人,到底是欠「穡頭」抑是無欠,
就是「工課khang-khuè」的意思。
.衰微sue-bî:若準講無夠分的環境,可能這个產業會「衰微」。
.加薦仔ka-tsì-á:真有臺灣特色。音的問題。
.「企khì」畫,毋是「企khè」畫,會佮「氣話khì-uē」仝音。
企畫khè-uē(X),會佮客家朋友講的話「客話Kheh-uē」倚音。
.
四、俗諺 sio̍k-gān
◎呵咾甲會觸舌。
O-ló kah ē tak-tsi̍h.
意思是足呵咾的,呵咾甲舌會觸一下,觸一下,呵咾做甲足好。
咧講咱臺灣bàng-gà的工作者,抑是產業從事這个工課的人,
成績應該是袂䆀,全世界國際攏是足呵咾,「呵咾甲會觸舌」。
## [2018.03.01《台語講世事》:公共跤踏車](https://youtu.be/WAMIRPgK_aA)
.oo-tóo-bái
.插車tshah tshia,pha車
.納錢la̍p tsînn:才是正統的臺灣話,毋是「交錢」、「繳錢」。
.偽造guī-tsō:愛注意“g”的發音。
.焐號ù-hō
.設置siat-tì
.租tsoo vs. 稅suè
.杙khi̍t:可能逐家較生疏。
*「跤踏車」的講法:
.鐵馬thih-bé
.孔明車khóng-bîng-tshia:慧盈老師講khòng-līng車,可能是音變。
.自輪車tsū-lián-tshia
.自轉車tsū-tsuán-tshia
.動輪車tōng-lián-tshia
一、看新聞講臺語:跤踏車拖吊
.跤踏車烏白插加風取締
.領車愛加收徙車、保管費用
.予別人領去的問題
這馬毋但愛煩惱oo-tóo-bái去夆拖去,跤踏車嘛會去夆拖去。
跤踏車你若烏白插,會予政府共拖去,加強取締。
你的車去夆拖去了後,毋但愛有罰金,閣愛收徙車佮保管的費用,伊替你徙車愛人工,
囥嘛愛有空間,攏愛費用成本,所以車真正毋通烏白插。
驚你的車去予別人領去,這馬無這个問題,若是有這个問題,會共進前領車彼个人的資料,
送去予法律來處理,因為伊攏愛人交身分證,才會當領車,所以就會有身分證的資料,
所以千萬毋通烏白去領。
.
◎語詞
.拖吊thua-tiàu:夆拖去,吊去。
.插車tshah tshia:車欲囥佗位?逐家可能慣勢講「停車」,毋是咧,
臺語是講「插車」,或者是pha車,啥物車攏仝款,你愛揣一个空間插入去,較大位、
較細位的差別爾。
pha車,是英語轉過來的。
毋是干焦「車」會當用pha的,用插的,「船仔」嘛仝款,「插船」「pha船」。
橫直交通工具欲揣一个所在、一个格仔來囥入去,是插車。
若干焦講「停」,stop爾,暫時停落來,鎖匙莫開動就好,
咱臺語「停thîng」佮「插tshah」無仝款意思。
.取締tshú-tè:「締tè」正爿彼个漢字,就是皇帝的「帝tè」,就是「帝tè」彼个音。
.納錢la̍p tsînn:你欲去納錢,才會當共你的車領出來。
這馬真濟人受著華語的影響攏講「交錢」、「繳錢」,
這个「納錢la̍p tsînn」才是正統的臺灣話。
.徙suá:共伊換位。徙車、徙位、鳥仔咧搬厝是徙岫、人是搬厝,袂當講「徙厝」。
徙厝,是規間厝規个提起來,囥去別位。
以這个例,就會使看著「徙suá」佮「搬puann」兩字無仝。
.搜揣tshiau-tshuē:咱一般講「揣」無毋著,「搜」加一个意思,
「搜」是揣較斟酌,可能有真濟項選擇,真濟項可能性,
閣愛共伊內底揣出較適合的,愛揀。
.偽造guī-tsō:若偷牽,可能有犯著偽照文書的罪。是法律名詞。
這个詞佇《台日大辭典》有收,「偽guī」是「假的」。
愛注意“g”的發音。
.侵占tshim-tsiàm:愛注意臺語有,華語無的合喙音“m”,合脣音。
.焐號ù-hō:共伊「焐」會當有一个「號」出來,號可能是圖,抑是啥物印,就是做記號。
跤踏車頂懸,共焐號一下,予伊知影這台是啥人的。
例:遮有火,你毋通去焐著。
例:囡仔發燒,咱用冰的面巾,抑是冰的枕頭,共焐予冷。
這字「焐ù」是咱的正臺語。
.
二、看戲齣(hì-tshut)講臺語
◎洗面礙著鼻
Sé-bīn gāi-tio̍h phīnn.
*你的鼻仔啄啄,本來面是平面的,真好洗,這馬欲閃這支鼻。
這是一个譬喻(phì-jū/lū)。
原本可能你欲做的代誌,是好意的,無䆀的,可是,
有可能連帶(liân-tài)影響著別人啥物代誌,不一定是歹代誌。
例:公共跤踏車,抑是啥物款公共設施,是好意的政策或制度,
比如講足濟所在攏有設公共跤踏車,相對個人跤踏車,就較無空間通好插,通好pha車,
這就是「洗面礙著鼻」。
.
◎夫妻(翁仔某)感情袂必叉,
Hu-tshe (Ang-á-bóo) kám-tsîng buē/bē pit-tshe,
著愛食雞。
tio̍h-ài tsia̍h kue/ke.
咱定定聽著:食雞起家Tsia̍h kue/ke khí-ke.。
因為講著「食雞tsia̍h kue/ke」就順紲講咱舊曆年到,
逐家會講一寡好吉兆的話,通常會聽著這句,一定愛食雞。
.
三、公共事務做伙舞:公共跤踏車
◎公共跤踏車是啥物
*YouBike通人知
若講著「公共跤踏車」的品牌,上蓋通人知的,就是YouBike。
*高雄代先有,雙北、各縣市綴咧有
YouBike這馬除了臺北市用這个系統以外,慢慢仔閣湠出去,新北市嘛有,
新竹、桃園嘛有,甚至到臺中、彰化,攏是YouBike系統。
其實佇臺灣,上早的公共跤踏車系統,是佇高雄,號做CityBike,是高雄代先有的,
雙北、各縣市才綴咧有。
*政府出錢設置,會使A所在借,B所在還
跤踏車有公共的,對「公共」兩字咱就知,是逐家攏會當騎的。
簡單講,政府出錢設置,會當予市民朋友,佇A所在,稅跤踏車,騎騎騎,騎到B的所在來還。
這號做「公共跤踏車」。
.
◎綠色交通
為啥物欲來捒公共跤踏車?一个足重要的觀念,就是綠色交通。
*交通工具有環保無?
「綠色交通」上重要的,愛看這个交通工具有環保,抑是無?
*跤踏車袂排烏煙
因為跤踏車無食油,無食電,袂排烏煙。
*一台車濟人使用,袂鎮地
除了袂排烏煙,一台車濟人會當使用,又閣袂鎮地。
跤踏車算是綠色交通,非常好的工具。
*環保是相對性的
比較性的,相對性的,跤踏車比oo-tóo-bái,抑是轎車、巴士等等較環保。
.
◎YouBike世界出名
*真濟國家推行無成功
咱臺灣的YouBike,這馬是世界有名的。
這種公共跤踏車,除了臺灣,世界各國,真濟國家攏有咧推行,但是上成功的,
會使講就是咱的YouBike。
*使用率世界上懸,較贏巴黎
因為咱的YouBike,使用率世界上懸的,這馬一工一台車,就有超過10个人以上,
有咧使用,使用率較贏巴黎。
法國算是全世界內面,推行公共跤踏車上早的國家,使用率猶是輸咱。
*市民守規矩,跤踏車品質好
咱臺灣哪會遮爾仔厲害?
咱市民朋友非常守規矩,YouBike著賊偷的比例干焦1%,若法國,亻因是20%,
比較起來,你就知影咱真正是守規矩。
跤踏車的品質非常好,世界上有名的品牌,是咱臺灣在地廠商。
.
◎愛閣改進的所在
既然做甲遮爾仔讚矣,是毋是猶有需要改進的所在?當然有。
*跤踏車路的設置
跤踏車騎佇路裡,路裡有巴士,有轎車,有oo-tóo-bái,一台比一台閣較緊,
按呢騎跤踏車,敢會安全?
跤踏車路的設置,有夠無夠?咱愛來思考看覓。
*民眾觀念、交通規定愛調整
有一寡觀念咱嘛愛改。譬如講
騎跤踏車的時,騎騎騎,頭前有人,是毋是愛揤喨仔(liang-á)?
你若行佇路裡,聽著後壁有人共你揤喨仔,按呢你是欲閃正爿?抑是倒爿?
這寡細項代誌,攏是騎跤踏車的文化,咱愛慢慢仔來思考,真濟交通規定,嘛愛來做一寡調整。
這所有的代誌若調整予好勢,咱臺灣做跤踏車又閣遮厲害,相信一定會當予世界看著,
咱公共跤踏車的政策,是偌爾仔好。
.
◎掠包
.設置siat-tì:「置tì」後壁有跤踏車,所以愛變調,第3變第2調。
.「各kok」縣市:「各kok」是短音,文言音,毋是長音kòo。佮國家的「國kok」仝音。
.相「對tuì」性,後壁有字,所以愛變調,第3變第2調。
.喨仔liang-á、鈃仔giang-á:兩種音攏有,有“l”的,嘛有“g”的。
.
◎語詞
*「跤踏車」的講法:
.鐵馬thih-bé:
.孔明車khóng-bîng-tshia:慧盈老師講khòng-līng車,可能是音變。
.自輪車tsū-lián-tshia:對日語詞來的。
.自轉車tsū-tsuán-tshia:對日語詞來的。
.動輪車tōng-lián-tshia:對日語詞來的。
.通人知thong lâng tsai:差不多逐家攏知的意思。
.租tsoo:一般咱臺語內底,過去是用做名詞,譬如講水租、田租。
.稅suè:有做動詞,嘛有做名詞,比如講「稅厝」佮「厝稅」,
稅厝:就是咱去稅厝,納厝稅。動詞、名詞攏有咧用。
動詞:稅厝、稅車,較正統。
.鎮地tìn-tè:傷占位、占空間。
例:你毋好徛咧遐鎮地。
.oo-tóo-bái:對英語轉日語,咱才閣共吸收,寫羅馬字。
.車路tshia-lōo:啥物款車的車路,車咧行的路。
.捷運tsia̍t-ūn:「捷tsia̍t」變調愛變予著,差不多8變3調。
.杙khi̍t:可能逐家較生疏。
欲共YouBike停入去的時,有一支彼个物件,號做「杙」。
古早,敢若有牽牛去食草的時陣,就共牛縛佇「杙」頂懸。就是一个柴「杙仔khi̍t-á」。
欲共啥物物件固定佇彼个所在,就是索仔縛佇「杙仔」。
.
四、俗諺 sio̍k-gān
◎好天著存雨來糧。
Hó-thinn tio̍h tsûn hōo lâi niû.
親像公共跤踏車這款的設置,是一个對環保誠有利的,這就是環保的政策,
予咱會當啥物代誌,做一个較有遠見,較預防性的做法。
譬如講「環保」,降低空氣汙染,鼓勵逐家騎公共跤踏車,按呢,就是「好天著存雨來糧。」
## [2018.03.08《台語講世事》:千里步道](https://youtu.be/6wWgasTTxDc)
.sih-sih顫sih-sih-tsùn
.起交懍恂khí ka-lún-sún
.拍莓phah-m̂
★以前的人,真正咧講話內面,諺語有夠濟。
.大自然tāi-tsū-jiân,毋是大(tuā)自然,
.破壞phò-huāi:「壞huāi」變調應該讀做第3調。
.「鞏khōng」紅毛塗
.非常「的ê」好:這是華語語法,咱台語毋免用「的ê」。
.懸lòng-sòng
.長蛇陣tn̂g-tsuâ-tīn
一、看新聞講臺語:梅嶺梅花開
.無受風颱影響,梅花大開
.梅花媠閣有性命力
.適合民眾行踏、賞花
花足媠的,那行路那賞花,真正足快活。
對這款花較生疏,咱一般的環境較罕得看著。但是咱自細漢,攏有人共咱講梅花是愈寒愈開花。
梅嶺這个所在,看著梅花大出,大開,愈寒愈開花。
咱過去敢有討論過「臺灣的國花」是啥物?有幾項逐家有講過,嘛會當思考,
可比講「臺灣原生種的百合花(pik-ha̍p-hue)」,
有人講「鼓吹花kóo-tshue-hue」,因為伊生做敢若「鼓吹」。
嘛有人講「鈃仔花giang-á-hue」,敢若司公鈃仔彼種形。
嘛有足濟其它的臺灣特有種,逐家攏會當考慮。
◎語詞
.sih-sih顫sih-sih-tsùn:這是一直顫,有一段時間一直顫,顫較久。
例:寒甲sih-sih顫。Kuânn kah sih-sih-tsùn。
佮「起交懍恂khí ka-lún-sún」無仝款。「交懍恂」是雄雄一陣。
.一目𥍉仔 tsi̍t-ba̍k-nih-á:「足短的時間」的意思。
例:花本來攏無開,一目𥍉仔齊(tsiâu)開矣。
.海拔hái-pua̍t:咱會當共讀一下「海拔hái-pua̍t」。
例:佇臺灣,可能愛海拔較懸的所在,才看會著彼款梅花。
.拍莓phah-m̂:「莓m̂」白話音,意思是「花莓hue-m̂」,
猶未完全開,一粒按呢號做「莓m̂」。『花苞、花蕾』。
花莓出來矣,猶未齊開,號做「拍莓phah-m̂」。
例:這欉樹仔當咧拍莓矣,連鞭就會開花矣。
.烏寒oo-kuânn:不管有落雨、無落雨,烏陰烏陰,天色無蓋光、無日頭,烏烏猶閣會冷,
烏寒天。
一般形容足寒的氣候,毋但寒,閣溼,有落雨,天烏烏。
.行踏kiânn-ta̍h:行行看看咧。
例:咱會當有時間,去一寡山崙仔、抑是山頂行踏。
.賞花siúnn-hue:看著花誠媠,咱去共欣賞的意思。賞siúnn,白話音。
二、看戲齣(hì-tshut)講臺語
◎上山看山勢,入門看人意。
Tsiūnn-suann khuànn suann-sì, ji̍p-mn̂g khuànn lâng ì.
.上山看山勢:若欲行山路,愛看山的地勢按怎,懸懸低低,咱愛順彼个勢去行,抑無會跋倒。
重點佇第二句。
.入門看人意:你入來到一个環境,去人的所在,應該愛看彼个環境的狀況,去處理代誌的意思。
日本人會講「你愛會曉讀空氣。」,你去到一个所在,愛會曉讀空氣,
「空氣」欲按怎讀?就是中央是這款氣氛,抑是彼款氣氛,逐家愛會曉讀。
佮這个句差不多意思。
★以前的人,真正咧講話內面,諺語有夠濟。
◎得失土地公,飼無雞。
Tik-sit Thóo-tī-kong, tshī bô ke.
.田頭田尾土地公,伊是守護土地的神,你若得失守護土地的神,你就袂活矣。
意思就是在地的,咱愛共尊重。
比尊重閣較尊重,是「尊存tsun-tshûn」,咱愛順伊的意思。
嘛會當講愛尊重在地的物件,入來到一个所在,在地啥是物款,袂當講佮我無關係,
我毋是遮的人,無關係,無去共了解,按呢嘛毋著。
三、公共事務做伙舞:千里步道
這馬真濟所在,起真濟予你欣賞風景,又閣會當沓沓仔散步,抑是運動的步道,
毋是佇山內面的這種步道,上濟的,是各縣市攏咧起一種號做「空中步道」。
◎天頂步道是啥物?
對這个名就知影,伊是起佇天頂。
*用通(thang)光的材料起
因為攏用一寡會通光的材料來起。
*起佇山崁、山溝
有當時仔,起佇山崁邊,有當時,起佇山溝內面,吊橋的形式。
*懸lòng-sòng,行雲頂的感覺
予逐家感覺懸lòng-sòng,行起去敢若行佇雲頂的感覺。這款號做「天頂步道」。
◎天頂步道的䆀處
雖然行起去天頂步道,會當予逐家看著真濟無仝款的景緻,但是這馬逐家發現:
*各縣市相爭欲起
各縣市相爭欲起,變做咱臺灣,山裡,抑是大自然內面,竟然雄雄出現真濟人工的建築物。
*破壞自然環境
逐家感覺按呢毋但是破壞規个自然環境,對生態等等,有真濟的影響。所以逐家就咧檢討。
*參觀熱度是一時仔爾
這款的天頂步道,當初時是欲招逐家來遮行行看看咧,結果發現,參觀的熱度干焦一絲仔爾。
一開始,逐家排隊排甲長lòng-sòng,但是時間一下過,逐家感覺無啥,
毋但吸引袂著逐家來𨑨迌,又閣破壞規个環境。所以逐家就咧檢討。
*較早咧做工程就是按呢
猶未起天頂步道的時,咱起這寡步道工程,就淡薄仔需要檢討。
較早咧做這工程,以咱人的角度出發,欲起步道,開thoo-lah-kuh(トラック卡車),
抑是怪手入去,規个山共挖起來。抑無,就是為著欲起步道,就囥一寡紅毛塗,
鞏(khōng) ku-lí,完全破壞規个生態佮環境的做法。這款步道,逐家嘛咧檢討。
◎千里步道運動
這馬有一陣人咧想,敢有啥物方法,會當欣賞環境的媠,又閣會當健康的步道。
有一个組織,號做「千里步道協會」,亻因就咧做這个工課。
*關心環境的作家、教授發起
「千里步道協會」差不多有10冬矣,是一陣關心環境的作家,抑是教授,來發起這个團體。
*用行路、騎鐵馬來認捌台灣
希望逐家會當用行路,抑是騎孔明車方式,慢慢共速度放予慢,來認捌臺灣。
*無仝團體相伨,起造環島路網
因為這款理念,足濟團體來共相伨,結果起一个「環島路網」,3000公里左右。
這个工課做完了後,「千里步道協會」亻因這馬咧做的工課,咧捒「手作步道」。
◎手作步道是啥物?
*敢若手工仝款
咱這个步道,就是敢若用手工咧做仝款。
*用人工替換機械
以前,咱欲起一个步道,用thoo-lah-kuh(トラック卡車)、抑是怪手入去挖,
這馬咱欲用人工來替換機械的工課。
*降低攪擾,增加永續性
按呢會當降低攪擾環境的效果,嘛會當增加永續性。
*考慮氣候、地質,步道結合環境
咱咧做步道的時,嘛愛考慮彼个所在的氣候、地質,結合環境,用彼个所在的石頭,
抑是柴箍,佇遐就提起來用。
對規个環境來講,是非常好,這就是「手作步道」的概念。
逐家會當想看覓,一个是起佇天頂,對環境無友善,只是為著逐家欲看無仝款的景緻,來起的天頂步道;一个是咱沓沓仔用手來做的手作步道,佗一種對咱環境會較好?
◎掠包
.天頂步道有的是用玻璃的材質,予你會當徛佇步道,看著下跤,下跤攏看會著風景,
叫做「通光thang-kng」,毋是”thàng”。
.伊可能是佇「山崁suann-khàm」邊仔,去起步道,可能兩个山崙,山佮山中央去起,
「山崁suann-khàm」邊,毋是”khám”。本來是崁(khàm),有加一字「邊」愛變調。
.『大自然』兩種攏有人講,照咱講這个詞的用法來講,應該是「大自然tāi-tsū-jiân」,
毋是大(tuā)自然,雖然伊嘛是足大(tuā)的,佇遮毋是咧講「大細」的大(tuā),
是用文言音去讀。
.破壞phò-huāi:「壞huāi」變調應該讀做第3調。
.「鞏khōng」紅毛塗,用紅毛塗「鞏khōng」的。變調愛讀予著,
毋是讀做“khóng”,會變做「炕窯khòng-iô」的炕(khòng)。
.『手作步道』的『手作』是華語,問題是你欲按怎講。
若是針對漢字,『工作的作』攏是入聲,有兩个音,
白話音“tsoh”,「手作tshiú-tsoh」步道;抑是用
「工作」的“tsok”,文言音來講,「手作tshiú-tsok」步道。
以這个詞,華語詞欲共吸收來做臺語外來詞,可是「手」的文言音是“siú”。
「手做tshiú-tsò/tsuè」步道,用「手 tshiú」做的步道,較聽有。
可能愛有人規定一下,看按怎講較適合。
若是講「手做tshiú-tsò/tsuè」,較聽有,用手做的,講「手工步道」嘛會使,
因為咱本來就有咧講「手工」,較白話。
.氣候khì-hāu
.非常「的ê」好:這是華語語法,咱台語毋免用「的」。
非常好hui-siông hó、足好tsiok-hó。
◎語詞:
.山崁suann-khàm
.山溝suann-kau
.懸lòng-sòng:kuân-lòng-sòng、
長lòng-sòng:tn̂g-lòng-sòng,
lòng-sòng:有一个「距離」的感覺。
.行雲頂kiânn-hûn-tíng:天頂的步道敢若行雲頂的感覺。直接講「伊就是行佇雲頂」的形。
一般生活上,若用「行雲頂」,攏會加一个「的--ê」,
例:伊乎,行雲頂的。意思就是『不食人間煙火』。
.景緻kíng-tì:行步道來欣賞一寡「景緻」。
.長蛇陣tn̂g-tsuâ-tīn:排甲足長的。
.紅毛塗âng-mn̂g-thôo:或者是“khōng-ku-lí”這種的講法。
.評估phîng-kóo:若做步道,上好是愛做環境影響的評估。
評估(kóo)後面若有字,估(kóo)愛變調2變1調。
.相伨sio-thīn:定定咧講,「伨thīn」愛按呢寫這个漢字。
互相支持,講「相伨」。
四、俗諺 sio̍k-gān
◎人無照天理,天無照甲子。
Lâng bô tsiàu thinn-lí, thinn bô tsiàu kah-tsí.
咱若環境烏白共破壞,天就無照甲子。
60年號做「一甲子」。
.甲子kah-tsí:是天干、地支配起來,「甲」是天干的其中第一个,
「子tsí」是地支其中一个,是欲配「甲子」用的。
若是欲講「地支」按怎唸的時,愛唸另外一个唸法,
「子tsú」、「丑thiú」、「寅în」、「卯báu」彼種的。
.天若無照甲子,就是伊無欲照伊的規矩咧運行。
## [2018.03.15《台語講世事》:女力時代](https://youtu.be/dVr48BqpFQM)
★查某人tsa-bóo-lâng / tsa̋u-lâng / tsőo-lâng
女性,咱一般攏講「查某人」,「查某」合音變做“tsa̋u-lâng”,抑是“tsőo-lâng”。
慧盈老師:tsa̋u-lâng/tsőo-lâng聽起來敢若淡薄仔無尊重的感覺,聽起來起毛無講蓋好。
註:本人嘛是有這款感覺。
豐惠老師:其實無這个意思,干焦合音。
.無較縒bô-khah-tsua̍h:無效、無路用的意思。
就是咱臺語文教育無普遍,大部份的人毋知按怎寫。
◎腳數kioh-siàu:就是這兩字。是相對較正面的。
.跤數kha-siàu:是另外一个詞,較負面的,
◎句型kù-hîng:對應華語『…...嗎?』,有兩種講法:
「敢(Kám) …... ?」,抑是「 …... 是無(sī--bô)?」
例:我敢有足媠? (O)
例:我足媠的是無?(O)
例:我足媠的嗎? (X)
莫受華語的影響,毋通共咱臺語的句型(kù-hîng)放袂記去。
.女性主義lú/lí-sìng-tsú-gī:「義gī」的“g”音,愛較濟咧。
.議題gī-tê:主義的「義gī」仝款,「議gī」的“g”愛較濟咧。
一、看新聞講臺語:女性食頭路壓力大
*婦人人食頭路無保障
講著月月安,有袂少的女性工作人員,就是做食頭路人,比男性來講,一個月來一擺這个代誌,
確實會造成心理上,一寡較無爽快、較無方便,可能會希望是毋是會當加歇一兩工。
「生理假」嘛是落尾才有的。
女性佇食頭路的過程,確實是濟濟項,比男性來講閣較辛苦。
佇制度頂懸,婦人人食頭路,無啥物保障,譬如講以前咱食頭路的時,仝款是大學畢業生,
起薪減人兩、三千箍,一開始就是按呢,這是足奇怪的觀念佮制度。
*結婚生囝成做工課路阻
女性愛結婚、生囝,為啥物男性結婚就無這个問題?著咩!
愛共頭家問一下,為啥物無仝款的對待?
*三十歲以後勞動參與率降低
真濟女性朋友30歲以後,欲結婚、生囝,主要是結婚,牽涉著欲生囝,就想講較晏生,
較晏生閣驚仔生袂出來,差不多30歲開始,面臨生活上佮工作上欲按怎兼顧?
這馬鼓勵逐家愛加生囝,這寡負擔的代誌,無替咱女性朋友想,按呢哪會使?
◎語詞
.查某人tsa-bóo-lâng / tsa̋u-lâng / tsőo-lâng:女性,咱一般攏講「查某人」,
「查某」合音變做“tsa̋u-lâng”,抑是“tsőo-lâng”。
「tsa̋u-lâng / tsőo-lâng」聽起來敢若淡薄仔無尊重的感覺,聽起來起毛無講蓋好。
其實無這个意思,干焦合音。
.婦人人hū-jîn/lîn-lâng:嘛是咧講「查某人」。一般來講可能2、30歲,
抑是甚至以上,較袂講足少年的,十幾歲較袂講是「婦人人」,本來就是「婦女」的意思。
可能一般人較少聽著這款的講法,佇教會系統是足四常,這應該是古早有的詞,
只是落尾攏教會內咧用。
人jîn/lîn,文音;人lâng,白話音,事實上就是「婦人」。
討論:講著「查某人」,有一个觀念,真濟人會感覺「查某人」,這三字聽起來怪怪,無尊重,
有的是針對「查某」這兩字,感覺若像講「查某」,是咧指特殊行業的女性,
當然過去有一寡因素,「趁食查某」、「菜店查某」這種詞,
所以予人的感覺是毋是莫講「查某」這个詞,事實上,伊原本就是「女性」。
這个觀念著愛改。
.食頭路tsia̍h-thâu-lōo:可能去某一个所在上班,領人的薪水。
.工課khang-khuè:食頭路就是做啥物「工課」,就是寫這兩字。
.阻礙tsóo-gāi:拄著啥物「阻礙」。愛較注意「礙gāi」的“g”音。
.無較縒bô-khah-tsua̍h:無效、無路用的意思。
就是咱臺語文教育無普遍,大部份的人毋知按怎寫。
.壓力ap-li̍k:女性工作的壓力不止仔大。
這个音有較歹唸,欲講這个詞愛較注意“ap-li̍k”。
二、看戲齣(hì-tshut)講臺語
◎腳數好kioh-siàu hó:就是這三字,就是「好的腳數(kioh-siàu)」
腳數(kioh-siàu)就是足有氣魄,有膽識、有能力的彼種角色,
彼款人物。這个詞咱一般人較無了解。
這字「數siàu」敢是算數的「數siàu」?仝字,無仝意思。
腳數(kioh-siàu):真按怎的一个角色。
.跤數kha-siàu:是另外一个詞,較負面的,
腳數kioh-siàu:是相對較正面的。
◎鼓井水雞kóo-tsénn/tsínn tsuí-ke/kue:這是一句俗諺語。
你若像無看過外口的世界,形容人是「鼓井水雞」。
.水雞,南北有淡薄仔差異(tsha-ī)性,讀音背後,有看法的問題。
南部有寡人是共「水雞tsuí-ke/kue」當做毋是這个動物,是咧講女性的性器官,
若是欲講正港的動物,愛講“suí-ke”。
嘛有人講倒反的講法,「水雞suí-ke」才是講女性性器官。
攏在人講,無仝所在,有無仝的慣勢。
◎句型:
對應華語『…...嗎?』,有兩種講法:
「敢(Kám) …... ?」,抑是「 …... 是無(sī--bô)?」
例:我敢有足媠? (O)
例:我足媠的是無?(O)
例:我足媠嗎? (X)
莫受華語的影響,毋通共咱臺語的句型(kù-hîng)放袂記去。
三、公共事務做伙舞:女力時代
◎女力是啥物?
*女性的力量、查某人的氣力
氣力佮力量,毋是干焦具體上搬物件等等,是各種方面。
*查某人𤆬(tshuā)頭、做主官
人類社會行到這陣,真濟所在查某人𤆬(tshuā)頭、做主官的情形,是愈來愈普遍,
毋管是佇政治,抑是佇經濟上,攏仝款。
*袂當共女性看無目地(ba̍k-tē/tuē)
這个時陣,查某人的看法佮做法,咱袂使看無目地,佯無看的。
◎男女無平等的歷史
*查某囡仔韭菜命、菜子命
講著女性,佇人類的歷史上,佇古早,查某人的運命較無好,受著足濟歧視。
佇咱臺灣,就有一句話按呢講:查某囡仔韭菜命,抑是菜子命,
雖然韭菜真好食,菜子會使糋(tsìnn)油出來,嘛是足重要,
以前會按呢講,因為韭菜佮菜子的經濟價值,無遐爾懸,較臭賤(tshàu-tsiān)的菜類,
用這來形容查某人。
*女性主義意識起行,爭取仝款的權利(khuân-lī)、權力(khuân-li̍k)。
但是這馬來看,已經毋是按呢矣。
這百外年來,女性主義的意識起行了後,咱查某人嘛開始爭取,仝款的權利(khuân-lī)、
權力(khuân-li̍k)。
權利khuân-lī,就是英文right,權力khuân-li̍k,就是英文power。
◎女性參與政治、經濟方面
佇政治方面、經濟方面,女性的參與,攏是愈來愈濟。
*女性參與政治無到兩百年
咱女性參與政治,無夠200年,而且是對西方國家來算起的,
以前,莫講參選,就算「頓票」的權利,嘛是200年前,開始沓沓仔來爭取的。
*德、英、日、台,攏有女性政治家
行到這陣,咱看著德國的梅克爾,英國的梅伊,日本東京都知事小池百合子,
閣有咱臺灣的蔡英文總統,攏看著真濟女性的政治家,已經佇全世界攏看會著。
*台灣有四成查某頭家,人數咧欲到五十萬
經濟上,咱臺灣這馬已經有咧欲四成的查某頭家,毋是頭家娘,
這个葩數已經漸漸仔“足百”(peh)懸。
◎女性的社會影響力
*已經改善真濟
佮以前比起來,這馬女性享受一寡權利,抑是權力,改善真濟。
但是咱若共詳細分析,其實猶是有分,猶有足濟空間愛來拍拚。
*好額底的,有文化資本
愛好額底的女人,才有文化資本,來爭取權利,毋管是政治、經濟,
攏是亻因的出身較好的家庭,抑是本來就有較濟的資源,通好爭取。
.艱苦底的,閣需要關心
猶閣有真濟艱苦底的女性,閣有真濟空間,需要逐家來關心。
譬如講厝內較歹過的,甚至第三國家的女性,有足濟足濟困難,這咱攏愛閣較濟的關心佮了解。
◎掠包
.『x x x 嗎?』 閣走出來矣,愛會記得「敢 x x x ?」、「x x x 是無?」。
.女性主義lú/lí-sìng-tsú-gī:「義gī」的“g”音,愛較濟咧。
四字連做一伙,「性sìng」愛會記得讀變調,第3變2調。
.好額底hó-gia̍h té/tué;艱苦底kan-khóo-té/tué,té/tué音相濫矣。
◎語詞:
.力量li̍k-liōng:力li̍k,是文言音。
咱用文言音,一般是咧講較抽象的物件。
所以咱講「力量」,可能是“power”,抑是啥物「影響力」。
.氣力khuì-la̍t:力la̍t,是白話音,看會著的,就是較有形。
例:彼个物件“扌冒(mooh)”會起來,足有氣力的。
.𤆬頭tshuā-thâu:引𤆬(tshuā)。
.做主官tsò/tsuè-tsú-kuann:女性佇愈來愈進步的社會,會做頭,或者做主官。
意思就是𤆬(tshuā)頭,負責的負擔會較重,抑是伊會做負責人的角色,無一定做官。
.議題gī-tê:主義的「義gī」仝款,「議gī」的“g”愛較濟咧。
.佯tènn / tìnn:有腔口差。假影按怎。就是寫這字。
例:佯無看的。
.看無目地khuànn bô ba̍k-tē/tuē:看袂起的意思,看貓的無點。
.臭賤tshàu-tsiān:有的詞無一定佇咱家己生活環境會出現,因為若無去講著彼款形容時,
袂去出現。
咱莫干焦看表面的「臭」,就想講佮彼个「臭」有關係。
臭賤的意思是無啥物價值,抑是予人看做無啥物價值,佮「臭」無關係。
.起行khí-kiânn:可能咱大部份的人會講「出發」。
咱用「起行」這个詞,是臺語原本就有咧用的講法。
.平pāng:pênn/pînn-pāng:有幾若个意思,
一个是講:是毋是有平衡?有公平?有平均?這款的意思。
.事業sū-gia̍p:女性愛發展家己的事業。
業gia̍p,有“g”,閣有“p”合喙音,可能較歹講,愛小注意。
四、俗諺 sio̍k-gān
◎查埔也著疼,查某也著晟。
Tsa-poo iā-tio̍h thiànn, tsa-bóo iā-tio̍h tshiânn.
*慧盈老師:對這句有意見,查埔、查某其實無平等。
「疼」比「晟」較懸,較加,基本已經有矣,才閣較加,就是「疼」。
查埔到「疼」的程度,查某是「晟」的程度。愛先「晟」,才閣「疼」。
伊的層次「疼」是較懸,加出來的。
註:按呢分析,嘛敢若有淡薄仔道理。
.也著iā-tio̍h:「著tio̍h」就是「一定愛」。意思是講「嘛著愛」,「一定愛按怎」。
◎也著人,也著神 Iā-tio̍h jîn/lîn, iā-tio̍h sîn:
咱若咧做一个代誌,面對一个問題,咱人愛做工課,嘛愛求神共咱保庇。
仝款是這个「句型kù-hîng」。
## [2018.03.22《台語講世事》:長期照顧](https://youtu.be/uV1O2PysXhg)
★討論:咱這馬「長照」的議題,有一个方面,逐家攏愛注意,就是語言方面。
豐惠老師:咱長期照顧真大部份的對象,是老大人,年歲較濟,佇有辛苦病痛的時陣,
其實真希望照顧伊的人,是毋是會當講伊聽有,抑是講伊慣勢的語言?
慧盈老師:人都咧艱苦矣,『還要跟你說國語』,按呢敢著?
豐惠老師:長照的規劃,抑是資源的分配,愛考慮這个部份,對照顧人員的語言訓練,
欲成做照顧人員其中一項要求,抑是規格,就算無法度講甲足順,至少愛聽有。
佇遮提醒咱的政府,這點愛注意。
.櫼tsinn
.揍bok
.躘liòng
.重敧爿tāng-khi-pîng
.結構kiat-kòo (O);俗音「結構kiat-kàu」 (X)
.建置kiàn-tì、建置kiàn-tì、建置kiàn-tì,唸3擺。定定唸才會熟。
.老大人lāu-tuā-lâng、老人lāu-lâng:老lāu,白話音。
.老化nóo-huà:老nóo,文言音。
.養老ióng-ló、長老tiúnn-ló:老ló,文言音。
.老練láu-liān、老到láu-tàu:老láu,文言音。
.
一、看新聞講臺語:郵局推捒長照
這馬足濟人攏咧關心的,號做「長期照顧」→「長照」。
*郵局對醫療方向拚轉型
是郵局的地,來做郵政病院,原來咱臺灣郵局欲對醫療方面,來拚轉型。按呢講嘛著
咱每一个人厝的附近,攏絕對有郵局,這馬寄批的人真正足少,有較少矣。
*閒地做養老村、養老中心
用郵局的用地,毋但欲做醫療方面,嘛欲做養老村佮養老中心。
*敆入去長期照顧系統
規个攏敆落去做長期照顧的系統。
毋但郵局,進前嘛有聽講有寡縣市,因為少囝化的狀況,有一寡學校廢校,抑是偏鄉的關係,
合併等等,就是遮的狀況,有的學校嘛咧思考,像郵局這種做法。
政府規个好好仔規劃用地欲按怎使用,因為以後老人的比例,會較懸,
所以愛針對咱國民的需要,來做規劃。
◎語詞
.醫生館i-sing-kuán:病院pēnn/pīnn-īnn,是大間的,有足濟科。
毋過原本傳統,可能一个醫生就一間醫生館矣。
古早,佇病院的頭前,是先有「醫生館」,落尾才有產生「診所」這个詞。
.郵費iû-huì:咱欲寄批,郵資iû-tsu。
.起價khí-kè:就是「較貴」,佮「落價lo̍h-kè」。
.宿舍sok/siok-sià:兩个音攏有,攏會使講,sok-sià較濟人講。
.閒地îng-tē:有一寡所在放咧閒,飼蠓,叫做「閒地」。
.養老ióng-ló:閒地是毋是會當來做養老村、養老中心這款設施。
★討論:咱這馬「長照」的議題,有一个方面,逐家攏愛注意,就是語言方面。
豐惠老師:咱長期照顧真大部份的對象,是老大人,年歲較濟,佇有辛苦病痛的時陣,
其實真希望照顧伊的人,是毋是會當講伊聽有,抑是講伊慣勢的語言?
慧盈老師:人都咧艱苦矣,『還要跟你說國語』,按呢敢著?
豐惠老師:長照的規劃,抑是資源的分配,愛考慮這个部份,對照顧人員的語言訓練,
欲成做照顧人員其中一項要求,抑是規格,就算無法度講甲足順,至少愛聽有。
佇遮提醒咱的政府,這點愛注意。
二、看戲劇講臺語
1.變猴弄pìnn-kâu-lāng:看著「猴kâu」,佮「猴」有關係。
「變猴弄」原本的意思,是咧講像馬戲團,抑是民間,有人𤆬(tshuā)一隻猴,
耍一寡把戲,予人感覺趣味。
落尾,提來應用,是共人罵較濟,講人無正經,烏白舞,變一寡有的無的。
例:你就毋通佇遐變猴弄。
2.食果子拜樹頭。
Tsia̍h kué-tsí, pài tshiū-thâu.
.果子ké-tsí,kué-tsí:腔口差。
*這句逐家就有較熟,咱通常會講:啉水愛思源,有人加一字頭,因為佮這句愛鬥句,
會當兩句鬥一句,規句唸起來較好聽。
變做:啉水愛思源頭,
食果子拜樹頭。
意思是愛「飲水思源」,因為果子就是樹仔予你的。
3.目空赤ba̍k-khang-tshiah:
例:毋通看人按怎,目空赤。
意思就是「怨妒(uàn-tòo)」,抑是有「心內不平」。
毋是真正形容具體的「目空」有「赤」,抑是「紅âng」。
是咧形容。順紲學一下,「目空」是目睭仁下跤規个。
.目箍ba̍k-khoo:目睭邊仔。目箍紅ba̍k-khoo âng。
.目屎含目墘ba̍k-sái kâm ba̍k-kînn
4.起跤動手khí-kha-tāng-tshiú:四字連做伙,前三字攏愛變調。
一般華語會講『動手』爾,咱毋是干焦「手」,連跤都來,
毋是「動手」,是「起跤動手」,程度比動手閣較懸一點仔,動作包含較闊,
佮人相拍,無可能干焦動著手。
但是咧講「起跤動手」的時陣,敢是真正有這个動作?
可能人就欲櫼(tsinn)倚來,欲共你揍(bok)矣,彼種就是講「哪會使起跤動手?」,
實際上愛「手」佮「跤」攏有來。
三、公共事務做伙舞:長期照顧
這个議題,這馬真濟人攏來關心,因為關係著你佮我。
長期照顧是啥物?為啥物伊遮重要?
◎社會高齡化
*老大人的比例超過14%
咱臺灣這馬老大人的比例,已經超過14%,若是這个比例,閣繼續躘(liòng)懸去,
有可能佇2026年左右,會到20%,到時,會佮日本仝款,已經變做是超高齡社會。
*少年人的擔頭愈來愈重
這款社會對少年人來講,擔頭是愈來愈重,少年人愛佇社會,做工課,負擔愈來愈重,
愛共咱照顧。為啥物會按呢?
*人口老化,結構重敧爿(tāng-khi-pîng)
因為這幾年來,咱臺灣少囝化,逐家攏無欲生,所以人口老化了後,
(人口)結構敧一爿,重敧爿。
◎長期照顧是啥物
這馬真濟人共「長期照顧」,共伊簡稱做「長照」,
「長期照顧(tsiàu-kòo)」、「長期照護(tsiàu-hōo)」攏會使。
*破病無法度照顧家己生活
這敢是咧照顧老大人的?無一定是老大人,
範圍對「破病無法度照顧家己生活」的人,嘛算在內。
*提供醫療iah相關服務
欲針對這寡無法度照顧家己生活的人,包括破病,抑是年歲到矣,這寡人,愛提供予亻因醫療,
抑是相關服務。
◎長照1.0 vs. 長照2.0:咱會當來做一个比較。
咱臺灣「長期照顧」服務,已經佇十年前就開始矣。
舊年開始的應該算是「長照2.0」,過去的就號做「長照1.0」。
◇長照1.0:為啥物過去足濟人攏毋知影,這是有原因的。
因為過去預算較少,限制足濟,真濟人甚至毋知影通來申請。
以前的做法,你若有這款需要的人,你著愛主動敲電話申請。
1.建置徛家服務等八項服務
2.愛主動敲電話申請
電話敲完,會有人去恁兜做評估,評估了後,再共你講,你的長期照護,需要啥物款服務。
佇過去,來共你看,申請嘛無一定會通過。
3.預算少、限制濟,來申請的人無濟
4.使用率干焦35%
因為過去預算較少、限制真濟,使用率干焦35%爾。
這寡缺點,就是2.0會當來改善的部份。
.
◇長照2.0:舊年開始(註:2017年),改善「長照1.0」的缺點
1.增加服務內容到十七項
2.簡化作業程序、提供服務的所在,掛顯目kha̋ng-páng
作業的程序,愈來愈簡單,會當提供服務的所在,攏愛掛顯目的kha̋ng-páng。
3.針對的對象擴大、年歲降低
針對的對象比以前閣較濟,年歲嘛有較降低。
4.向望使用率提懸到55%
希望這款的改善了後,使用率會當提懸到55%,除了服務變較濟,
這馬2.0,「失智」的部份嘛有包含在內,甚至毋但「被照顧的人」以外,
「照顧者」嘛有服務著。
◎長照2.0
*服務地點分級
2.0有一个足大的重點,過去這寡服務所在,分散佇各個所在,這馬欲共規个整合起來,
所有的服務單位,分做A、B、C三級。
按呢看較簡單。
A社區整合型服務中心(百貨公司):就較大,譬如講一个鄉鎮。
你若需要閣較專業的服務,咱就去到A
B複合型日間服務中心(專門店):就閣較懸一點仔,
差不多一个國中的學區。
C巷仔長照站(𥴊仔店):敢若你兜巷仔口的𥴊仔店仝款,
佇咧恁兜的附近,差不多三个里,抑是三个村,就有一个「長照站」。
若普通時仔,就來C,逐家來互相照顧。
*建置社區長照系統
規个攏是欲用一个社區,來做一个單位,因為咱政府就是欲建置一个社區長照的系統。
*予咱社會較安全、較友善
毋但咱需要長期照護的時陣,再來服務,佇進前,咱就愛預防,予咱社會閣較安全,閣較友善。
這就是咱這馬「長照2.0」已經開始矣,閣較詳細的內容,咱嘛會當多多來關心。
◎掠包
幾个音的問題:
.「超」高齡社會:「超級tshiau-kip」的「超tshiau」。
.結構kiat-kòo:足濟人一般會讀俗音“kiat-kàu”,定定聽著。
.照顧tsiàu-kòo
.照護tsiàu-hōo:「護hōo」是第7聲。
.一逝一逝tsi̍t tsuā tsi̍t tsuā:毋是「一行一行」。
.顯目hiánn-ba̍k:「顯hiánn」。
有“h”開頭的彼款字,有寡人會共“h”無講出來。
.程序thîng-sū:「序sū」是第7聲。
.使用率sú-iōng-lu̍t
.建置kiàn-tì:置(tì)若是後壁無物件,就是“tì”,若有字3變2調。愛定定講才會熟。
◎語詞:
.老大人lāu-tuā-lâng:較尊敬的感覺,是講較有歲的人。
老人lāu-lâng,無講較無好的意思,是無仝的用法、用詞。
.老化nóo-huà:老nóo,文言音。老lāu,是白話音。
.養老ióng-ló:老ló,閣一个文言音。教會內底「長老tiúnn-ló」。
.老練láu-liān:老láu,閣一个文言音。足「老到láu-tàu」
.高齡ko-lîng:真濟歲叫「高齡ko-lîng」。
「齡lîng」有腔的問題,“îng”較明,有的小可接近“lîn”。
.擔頭tànn-thâu:超高齡的社會,咱青年人,抑是較少歲的,可能欲負擔老大人的所費,
「擔頭」會傷過頭重。
.負擔hū-tam:擔tam,合喙音愛會記得。
.重敧爿tāng-khi-pîng:輕重無平均,敧一爿。
.坎站khám-tsām:袂輸講「階段」,到啥物款的「坎站」。
.評估phîng-kóo:評phîng,是“ph”。
評估(phîng-kóo)後壁若有字,「估kóo」愛變調,2變1調。
.擴大khok-tāi,khok-tuā:「大」文言音、白話音攏會當講。
.顯目hiánn-ba̍k:「顯hiánn」的“h”,愛發出來。
.愛掛kha̋ng-páng:因為kha̋ng-páng是外來語,所以咱用羅馬字。
有的人講哪無愛寫『看板』,咱無khuànn-pán(pang)彼个音。
“kha̋ng”頂懸有兩撇,就是咱臺羅內底有第9聲,主要攏是咧講這款音,
無一定是外來音,咱一般有一寡詞,有連音嘛有可能出現這款音,像“kha̋ng”這款音。
.預算:因為兩字攏有文言音、白話音,所以定定聽著無仝講法,就是看你按怎鬥。
預算ī-suàn,ū-suàn/ī-sǹg,ū-sǹg,文言、白話,家己組。
.齊全:tsê-tsuân,兩字攏文言音;tsiâu-tsn̂g,兩字攏白話音。
四、俗諺 sio̍k-gān
◎久長病,無孝子。
Kú-tn̂g pēnn/pīnn, bô hàu-tsú.
*照顧人,照顧了,就算講一開始非常友孝,時間拖久,真正是足忝的,擔頭傷重,傷過忝。
所以才需要政府,有較完善的、較妥當的「長期照顧系統」。
這馬2.0敢若對這个部份已經有改善,希望閣繼續。
## [2018.03.29《台語講世事》:廢除死刑](https://youtu.be/mkPnoAmDCVg)
.檢采kiám-tshái
.幼膩iù-jī
.判斷phuànn-tuàn
.斟酌tsim-tsiok
.牽涉khan-sia̍p
★影片7:30開始,笑甲反過。
.若欲講「拍招呼」,咱會當講「招呼」就好,免「拍phah」。
.坐清tsē-tshing
.禁忌kìm-khī
*這4个語詞敢有分?
.囂俳hiau-pai,hia-pai
.風神hong-sîn
.臭煬tshàu-iāng
.聳鬚tshàng-tshiu
.蟲豸thâng-thuā
.補償póo-siông (O);「補償póo-siông」愛讀3遍。
補償póo-sióng (X)俗唸。
.十全tsa̍p-tsn̂g vs. 十全si̍p-tsuân
一、看新聞講臺語:徐自強重生
*佇司改會做志工
*對司法無怨慼
*簡單過日就好
這个新聞咱看了攏真正足毋甘的,嘛感覺足艱苦的。
21年,關佇監獄內面,而且毋是伊做的,閣判伊8擺死刑,這毋知欲按怎講?
有一个電影,《徐自強的練習題》記錄片,內面咱會當看著徐自強的規个代誌,自頭到尾的講法。
因為豐惠老師有咧關心司改會,一寡人權團體,救援一寡個案,較早期,會用寫批,
抑是寄物件共鼓勵,等等的方式,希望伊會當有勇氣,莫失志,外口一直共救援,
希望司法會當還伊公道。21年,真正是有夠久的久,一半的人生,
咱無法度想像這是啥物款的感覺。
佳哉這馬有還伊一个清白。
記錄片內底,講伊去予判死刑,是足奇怪的代誌,因為無證據,靠一寡人講的話、口供,
干焦問一寡其中有牽涉人的講法,就判刑矣。
以前來講,可能「口供」以外的其它,咱的科技無到遐,可能科學鑑識的專業技術,
或者是理解的這種智識上,某一个時代來講,確實是較不足,就是欠缺客觀的證據,
會當予案情較清楚,這是一部份。
另一部份,檢采(kiám-tshái)有的是警察,抑是檢調人員,看現場的一寡資料、證據的時,
是毋是第一線採集甲足完整、足幼膩(iù-jī),所以有一寡物件,會當採,無採;抑是有採,
袂曉判斷(phuànn-tuàn),有專業技術問題,嘛有人員對遮个物件,
過程是毋是有夠斟酌(tsim-tsiok)的問題,攏有牽涉(khan-sia̍p)。
以前的人真正足辛苦的,你若欲去夆害,嘛是足簡單的代誌。
你欲共一个人害,你口供講講的,就會當共人害,何況過去猶閣有戒嚴時代,
一寡針對政治犯,連口供都免,欲判幾年、有期、無期,抑是死刑,凊彩捽捽咧,彼是閣較譀,
真正笑袂出來。
這就是咱臺灣司法等等,愛改進的所在。
◎語詞
.重生tîng-senn/tiông-sing:一个冤案,落尾還伊公道,叫「重生」。
因為這兩字攏有文言音、白話音。
若白話音「重生tîng-senn/sinn」,按呢佮另外一个講法...
慧盈老師:敢若生出來了後,閣共窒(that)入去,閣共生出來。^^
一般咱這種詞,攏會讀文言音「重生tiông-sing」,敢若有一个重新的人生。
.相借問sio-tsioh-mn̄g:佮人相借問,毋是「拍招呼」。
這馬逐家攏會講「拍招呼phah-tsio-hoo」,是對華語轉的。
「拍招呼」佮「相借問」,意思猶是無仝款,
「拍招呼」敢若Say hello,「相借問」有「關心」的意思。
若欲講「拍招呼」,咱會當講「招呼」就好,免「拍」。
例:佮伊有相借問無?我佮伊有。
就是我看著伊,會佮伊講話,無一定是Say hello,
若「拍招呼」,可能干焦一个簡單一句Say hello。
「相借問」兩項攏有,有的人「我共你請安(tshíng-an)」,一句就好,嘛是「相借問」。
「相借問」的範圍較大,就是有關心,有講話,有看著面。
.坐監tsē-kann:入去監牢,一般攏講「坐監」。
坐監(kann)、坐監(ka),有鼻音,無鼻音,攏有人講。
.坐清tsē-tshing:『沉澱』,予一寡li-li-khok-khok,較雜的,可能足細的物件,
(予伊)沉落來,按呢水質才會清。
.監獄kann-ga̍k,ka-ga̍k,kàm-ga̍k:攏有人講。
監kann,ka:白話音;監kàm:文言音。
一般聽著白話音較濟,文言音的講法嘛是有人講。
一般臺灣人對這个詞,無一定會按呢講,對「坐監」當做「無好吉兆、歹代誌」,
連講都無想欲講,會用另外的講法講。
例:俗語:痟貪軁雞籠。Siáu-tham nǹg ke-lam.
.雞籠ke/kue-lam:就是形容這个。抑是櫳仔內(lông-á-lāi)。
一方面「監獄」較書面語,到尾仔較有捷講,
一方面是民間對一寡語詞有禁忌(kìm-khī),感覺莫直接講。
.面會biān-huē:「面biān」遮愛讀文言音。
就是去「探監」的意思。愛去監獄,佮對方見面。
一定愛去監獄,才會當講「面會」。(註:咦?怪怪。)
二、看戲齣(hì-tshut)講臺語
1.才調tsâi-tiāu:有才調,無才調。
例:這个物件傷重,我無才調通提、通搬。
例:你誠有才調,閣通好來民視,主持《台語講世事》。
2.牽牢牢khan-tiâu-tiâu:可能是一个「手」的動作,咱較捷講。
扲牢牢gīm/gîm-tiâu-tiâu:你手囥咧橐袋仔,欲扲錢出來咬牢牢。
咬牢牢gīm/gîm-tiâu-tiâu
*這4个語詞敢有分?差不多仝意思,無仝的場合會當用。
.囂俳hiau-pai,hia-pai:
.風神hong-sîn:可能較無遐負面,其實嘛是足展的,足煬的,有可能伊真正有才調。
.臭煬tshàu-iāng
.聳鬚tshàng-tshiu:感覺是查埔人咧用的,有喙鬚。毋是。
是動物,抑是蟲豸(thâng-thuā)的鬚,蝦仔鬚,虼蚻鬚。
三、公共事務做伙舞:廢除死刑
這个議題,真正非常嚴肅,而且嘛有足濟足濟的爭議。
「死刑」敢毋是欲共歹人,抑是惡人,共掠起來,刣予死?按呢毋才有「社會正義」。
若是按呢,死刑為啥物咱欲來共廢除?
◎欲廢除的理由
*有冤案
欲廢除的理由,頭一項就是因為會有冤案。
咱人毋是聖賢,逐家攏會做毋著代誌,嘛會想毋著代誌,
雖然司法,是欲來維持咱社會正義,但是嘛定定會判重耽去。
*司法僫十全(tsa̍p-tsn̂g)
司法真僫十全,定定攏有一寡錯誤出現。
*無法度踅翻頭
但是死刑,是無法度翻頭的。
*予冤案斷根
若是死刑共判落去,閣執行了後,銃子彈出去,一下去就無了了。
到時陣才發現,這个案原來是冤案,按呢攏袂赴矣。
為著莫予冤案閣再發生,予冤案斷根,有「廢除死刑」的想法。
◎廢除死刑運動的發展
咱臺灣為啥物有「廢除死刑」這款的運動?發展是按怎開始的?
這馬民間,有一个團體號做「廢死聯盟」,「聯盟」的意思,就是有足濟團體,鬥陣來組成的。
*犯罪背後是社會問題
「廢死聯盟」一開始,是咧關心一个案,彼的時陣非常轟動,號做「湯英伸案」,
對這个案,逐家來關心,結果發現,原來真濟所講的犯罪背後,其實是社會問題。
咱袂當講這是社會問題,死刑共執行落去,問題就會當解決。
*對個案救援行到今
對「湯英伸案」開始,「廢死聯盟」嘛開始對真濟個案,(進行)救援行動,
行到今,這馬才有這款的發展。
*湯英伸、江國慶、蘇建和、徐自強
除了湯英伸以外,後來,咱嘛知影一寡冤案江國慶、蘇建和、徐自強,
這寡案嘛得著「廢死聯盟」的幫贊。
若是無亻因的幫忙,蘇建和佮徐自強,可能會誠危險。
◎死刑佮犯罪率的問題
*若廢死就天下大亂?
若欲共死刑廢除,按呢敢毋是天下大亂?
這應該是咱愛改過來的觀念。
*對犯罪者嚇驚無法
真濟研究顯示,死刑對犯罪者根本無嚇驚的作用。
*較好勢的警政、審判系統
若講真正欲共犯罪者嚇驚,愛靠的是較好勢的警政、審判系統。
*推廣法治教育
閣來,咱愛推廣法治教育,才會當真正對犯罪者有嚇驚的作用。
◎按怎照顧家屬
若共死刑廢除了後,欲按怎對家屬做一个交代?
*死刑敢是伸張正義?
咱這个社會,包括家屬,攏會感覺「死刑,就是伸張正義。」的一種做法。
*社會補償機制無夠
若共詳細想看覓,其實家屬是需要啥物款的物件?亻因需要足濟幫贊,包括佇心理上,
經濟上,攏愛有一寡機制,一寡補償的機制,來共幫助。
*袂當用死刑來卸責任
但是這馬,咱的社會,咱的政府,佇這方面做了無夠,
若有「死刑」,可能真濟人想講「死刑執行落去,正義就提著」,
有可能會予政府當做是一个推卸責任的做法。
死刑,真正毋是一種「伸張正義」的做法。
*猶無共識,需要繼續討論
這馬佇臺灣,死刑到底廢除,抑是無愛廢除,
猶閣有真濟討論的空間,因為咱猶無共識。
佇美國,有一个「受害者家屬」組成的團體,這个團體的主張,就是應該愛廢除死刑,
因為亻因家己知影,in需要是啥物物件,應該是閣較濟「政府的機制」,予亻因佇經濟上,
抑是閣較濟對話的機會,予亻因心肝內袂遐爾仔艱苦心,所以亻因建議愛「廢除死刑」。
有真濟這款想法的,才會造成咱這馬討論「廢除死刑」的議題。
◎掠包
.字卡jī/lī-khah:卡khah,毋是“khá”。
註:《教典》有收“khá”音。
.執行tsip-hîng:執tsip,喙愛合起來,有“p”。
.補償póo-siông(O):逐家攏唸做補償póo-sióng俗音(X)。
.推卸the-sià:是用「推the」的,毋是用「推thui」的。
◎語詞:
.嚴肅giâm-siok:這較歹發音,“g”iâm,sio“k”,咱特別講一下。
.惡人ok-lâng:歹人,會當講「惡人(lâng)」,毋是惡人(jîn/lîn)。
例:惡人無膽ok-lâng bô-tánn
.銃子tshìng-tsí:『子彈』。
.把守pé-siú
.重耽tîng-tânn:有啥物失誤、錯誤,無對同,攏是講「重耽」。
例:拂重耽去hut tîng-tânn--khì
.踅翻頭se̍h-huan-thâu:死刑是無法度踅翻頭的。
.斷根tn̄g-kin,tn̄g-kun:用白話音講,是“tn̄g”,毋是「斷tuān」。
.十全tsa̍p-tsn̂g:用白話音講,一般用白話音就會使。
十全大補湯的「十全si̍p-tsuân」是文言音。
例:司法真僫十全(tsa̍p-tsn̂g)。
.救援kiù-uān:援uān,第7聲,後壁有字愛變調,7→3調。
.謹慎kín-sīn:愛注意發音。
.艱苦心kan-khóo-sim
.四序sù-sī
.卸責任sià-tsik-jīm/līm:用「推卸the-sià」的「推the」。
.擲㧒捔tàn-hiat-ka̍k = 擲挕捒tàn-hìnn-sak:共擲掉。意思仝款。
四、俗諺 sio̍k-gān
◎仙人拍鼓有時錯,
Sian-jîn phah kóo iú sî tshò,
跤步踏差啥人無?
kha-pōo ta̍h-tsha siánn-lâng bô?
*有時仔,布袋戲、歌仔戲嘛定定聽著。
處理代誌,雖然難免會犯錯。一般是按呢運用。
但是囥佇這个主題來講,所以愛閣較謹慎,較注意、斟酌。
佇制度頂懸,嘛愛注意,仙人拍鼓有時錯,法官抑是咱人,攏是一般人。
## [2018.04.05《台語講世事》:保護樹木](https://youtu.be/mJhxKsV53y0)
一、看新聞講臺語:城市路樹欠照顧 大學首創足百(peh)樹課程
◎足百(peh)樹課程
*行代先的足百(peh)樹課程
*足百(peh)樹師傅真欠缺
*卒業岀路閣較闊
足百(peh)樹仔,足欣羨的,袂曉足百(peh)樹仔,是都市倯(sông)。
看起來足趣味的,有這款課,會當體驗大自然一寡物件,袂䆀,真濟人想講足百(peh)樹仔會當做一个專業,可能想袂到,以早傳統的觀念來講,無法度想像,可能會想講足百(peh)樹仔都足愛耍的囡仔,無欲讀冊的囡仔,才會足百(peh)樹,其實無一定。
這馬講是「足百(peh)樹師」,全臺灣干焦5个,這算是較新的行業,猶閣咧起行的過程,是一个行代先的足百(peh)樹仔課程。足百(peh)樹仔師傅足欠缺,因為若準講徛佇保護生態的觀點,保護樹仔這个議題是足重要的,咱若無相關的智識,閣無相關的師傅、專業人才的時陣,足僫去真正落實保護樹仔的工課。
.
◎語詞
.足百peh vs 爬pê:
這兩款動作無仝款。華語漢字攏是寫『爬』,
足百(peh)咱教育部用字是造字,滿足的「足」,正爿是「百」,
因為造字,有時仔軟體真歹呈現,愛特別有彼个字型,
所以拄著這款造字,咱一般用臺羅來代替。
以臺語來講,是兩个無仝動作,音、漢字無仝,動作無仝。
.足百peh:一般來講愛有懸有低,對低的足百(peh)起去到懸的,
或者是對懸的足百(peh)落來到低的,有頂下,有懸有低的一个動作。
不管你是用行的來講,可比講咱足百(peh)樹仔,抑是足百(peh)山,足百(peh)樓梯,
足百(peh)上車,對較低的起去,這攏是「足百(peh)」。
.爬pê:跤手佇塗跤彼款動作,平平對遮徙(suá)來到遐,用爬。
.探險thàm-hiám:無一定講危險,凡勢啥物款咱毋知影的所在,有某一寡風險,
彼款所在咱欲去,就講探險。這足簡單了解。
.行代先kiânn tāi-sing:
可能以早無人做,這馬欲做,攏是一个行代先的做法。
行代先,敢有「食代先」,抑是「唱代先」按呢?
比論講咱去唱歌,我講我唱代先,我先唱。
你若欲用這个動作來講,我代先唱。
咱這个動詞佮「代先」,看用啥物句型,啥物代誌。
有的是代先行、代先唱,抑是你欲做頭前。
佇這个所在,有欲強調「代先」這个部份,所以囥後壁。
.輕可khin-khó:足輕鬆的。輕鬆簡單的代誌。
例:食好做輕可。Tsia̍h-hó tsò khin-khó.
『吃得好,工作又輕鬆。比喻生活極為優閒、舒適。』
.硬篤ngē-táu/ngī-táu:你感覺足僫達成,過程中有足濟困難,
彼款代誌攏會當講「硬篤」。
.森林sim-lîm:文音的講法,書面語。
例:森林系sim-lîm-hē,文音。
白話音「森林som-nâ」。
因為咱一般會講「樹林tshiū-nâ」,森林sim-lîm是書面語。
較袂講「森林som-nâ」,會講「樹林tshiū-nâ」,
毋過漸漸嘛有咧講「森林som-nâ」,是仝款物件,無仝詞。
.卒業tsut-gia̍p:可能咱一般有人講「畢業pit-gia̍p」,
這个詞是較代先,日本時代留落來的そつぎょうSotsugyō,(影片7:52)
出業tshut-gia̍p嘛是對卒業來的。
《燒肉粽》歌詞:出業頭路無半項。
.
二、看戲齣(hì-tshut)講臺語
1.頓手模tǹg tshiú-bôo:『蓋手印』,嘛有人講「拍手印」。
手印佮手模攏有人講,頓佮拍攏會使講。
這馬逐家愛共抾轉來講。
2.範勢pān-sè:足大範tuā-pān彼个「範pān」。
例:看這个範勢,伊今年就袂牢。
例:你就是愛有一个範。
這毋但講人,嘛會使講規个情勢就著矣。
3.憂頭結面iu-thâu-kat-bīn:這是四字的詞,頭前三字愛變調。
面憂面結 bīn-iu-bīn-kat,你若當做這是四字詞,規个連過,
前三字愛變調。
.
三、公共事務做伙舞:保護樹仔
咱若是蹛佇都市,做議量的時陣,定定攏會去公園,抑是去郊山步道去行踏,
逐回去攏感覺講足輕鬆,心情足好的,這號做「跤鬆手弄kha-sang-tshiú-lāng」,
為啥物會按呢?當然是因為咱攏會當看著規欉、健欉(kiānn-tsâng)的樹仔,
樹仔有一寡芬多精,咱會當欶著芬多精,對身體有幫贊。
.
◎樹仔偌爾仔重要。
*樹仔健欉有芬多精,對咱的身體有幫贊。
*蟲豸(thâng-thuā)、動物蹛的所在,蹛佇樹仔頂。
*吸收二氧化碳(jī-ióng-huà-thuànn):
樹仔有足重要的作用,會吸收人類(、動物)活動的時陣,
所吐出來的二氧化碳,對氣候的調和(tiâu-hô),有真大的作用。
*那都市化,樹仔那少
咱來看都市內面的樹仔,這馬運命都無講遐爾仔好矣。
因為這馬足濟都市,愈來愈都市化,都市化愈來愈嚴重,樹仔就那來那少。
.
◎愛種樹嘛愛顧樹
*3月「種樹仔月」
咱臺灣佇3月,除了痟媽祖以外,3月嘛是咱的「種樹仔月」。
佇這個月,有真濟佮種樹仔有關係的活動,逐家攏會當去參加。
*樹仔大漢愛二、三十年
雖然這馬政府有咧共咱鼓勵,逐家愛加種一寡樹仔,但是樹仔敢是真正共種落去就好?
一欉樹仔佮人仝款,欲大漢,上無嘛愛開二、三十年,一欉樹仔咧大誠不容易,
所以千萬毋通(共樹仔)種落去,就無欲共顧。
*修剪過頭、都市更新的威脅
但是咱來看,恁兜附近的樹仔,這馬定定攏會聽著新聞講,規排的樹仔,街仔路的樹仔,
夆修剪甲過頭去,而且閣有足濟樹仔,受著都市更新的威脅,規欉夆挖起來。
所以樹仔毋但咱愛種,這爿種,這爿嘛愛顧,若無那種那剉樹,按呢就加種的矣,
閣較講樹仔嘛是愛來共顧。
*老樹需要共保護
有真濟社區內面的老樹,咱更加需要來共保護。
因為老樹年歲足大的,而且閣有咱共同的記持,攏是愛共保護。
.
◎樹仔嘛會破病
樹仔是毋是莫共刜(phut),莫共剉(tshò)就會使?其實嘛毋是。
*病菌(pēnn/pīnn-khún)致使「樹癌」
樹仔佮咱人仝款,嘛是會破病,主要就是有一種病號做「樹癌」,就是樹根去穢(uè/è )著病菌,
會予樹根沓沓仔無法度吸收水份,無法度吸收養份。
*毋是枵死(iau--sí),就是漚去(àu--khì)
無法度吸收養份,就是枵死;無法度吸收水份,就浸佇水裡漚去。
*街路樹破病造成公安問題
一欉樹仔若破病,規欉樹仔冇冇(phànn-phànn),連鞭就無在,
按呢就會造成公共安全的問題。
.
◎正確的觀念佮行動
咱這馬欲照顧樹仔,欲保護樹仔,上重要的就是愛有正確的觀念。
*改換觀念,政府𤆬頭護樹
觀念愛共改過來,毋是政府𤆬頭種樹仔就會使。
咱愛種樹仔以外,嘛愛照顧樹仔。
*建立老樹照顧系統
上好愛有一个制度,愛有老樹照顧的系統,
愛知影佗位的老樹,伊這馬的健康有問題無?咱愛共照顧。
*推廣相關智識
相關的智識,咱嘛愛慢慢仔來共推廣。
*成做生態教育佮文化記持
因為樹仔問題,毋但是生態教育以外,嘛是咱文化記持的代誌。
所以照顧樹仔的這个議題,值得逐家好好仔來思考。
.
◎掠包
.健欉kiānn-tsâng:若無看字幕,會毋知影咧講啥。
可能是共「健康的健kiān」佮「建立的建kiàn」濫做伙。
.蟲豸thâng-thuā:『昆蟲』,
咱臺語有一種講法是「蟲豸thâng-thuā」,
佮囥物件的「屜仔的屜thuah」無仝。
.「吐thóo」出來二氧化碳:毋是用「吐thòo」的。
咱普通時仔講「吐氣thóo-khuì」,莫閣吐(thóo)大氣矣。
「吐出來thóo--tshut-lâi」,佮「吐出來thòo--tshut-lâi」動作無仝。
.若講幾月份,干焦講「月」,無講到後壁幾號幾日的時,
月的頭前,毋免變調。3月sann--gue̍h/ge̍h,強調3。
.華語的語法:好矣『嗎?』,這誠僫改。
.不容易(put iông-ī),這是書面語,欲按呢講嘛毋是袂使。
一般來講,較口語就是講「較僫按怎、較無簡單」這類。
.病菌pēnn/pīnn-khún:菌khún。
.漚去àu--khì:一般爛,就是漚去。
因為這字逐家一方面漢字較生疏,一方面是這个漢字本身有幾若个讀音,是一个較生份的字。
.樟仔tsiunn-á:毋是讀文言音「樟tsiong」,佇樹仔名來講,
是讀白話音tsiunn。
.
◎語詞:
.四序sù-sī:去到有樹仔的所在,逐家感覺足四序的。
.吸收khip-siu:吸收芬多精。
.健欉kiānn-tsâng:這樹仔勇健,樹欉勇健(ióng-kiānn)。
.跤鬆手弄kha-sang-tshiú-lāng:
四字詞可能就是變調攏愛連起來,可是像這種「跤X手O」,
就是伊第一字、第三字可能是一个名詞,一个部位來講,
佇這款所在是會當強調「跤」佮「手」,當然三字攏變(調)嘛無要緊,有兩種講法,
有人是特別欲強調主詞的跤佮手,彼个形容的是尾字,是原調。
用這个原則來講,是跤#鬆#手#lāng,就是四字攏無變調。
若是有變調,就是跤鬆手lāng。
.蟲豸thâng-thuā:這就是算做已經欲無去的詞,緊共抾轉來講。
.二氧化碳jī-iông-huà-thuànn:會當直接照這四字讀。
嘛有人會直接講CO2,外來的,其實一般已經足熟矣。
除非一寡咧寫化學元素、較深的,可能猶是愛用較專業的講法,或者是外來語本來的講法。
.剉柴tshò-tshâ:共樹仔刜(phut)起來,剉(tshò)起來。
.穢uè/è:一般就是咧講會去穢病菌,抑是穢無好的物件予人。
例:伊咧感冒,我去予伊穢著。
.病菌pēnn/pīnn-khún:「菌khún」這个音可能逐家愛注意一下。
.樟仔tsiunn-á:樟(tsiunn)若是佇臺南腔,可能會樟仔(tsionn-á)。
.榕仔tshîng/tsîng-á
.龍眼lîng/gîng-gíng vs. li̋n-jín:音有一點仔成,唸起來不止仔成。
li̋n-jín是日本話『胡蘿蔔』,有人這馬攏講是紅菜頭。
.冇冇phànn-phànn:敢若空心,敢若已經無實心(si̍t-sim)的彼个狀況,空空按呢,叫做冇冇。
例:樹仔若破病就會冇冇。
.鑑定kàm-tīng:這个詞逐家會當看伊的發音。
## [2018.04.12《台語講世事》:台灣的教育改革](https://youtu.be/aZH1TFNpf-k?si=GVF0WL26I5Ggzmmk)