# 《台語講世事》文字稿2020.05~08
※ 頁面索引，在頁面左側下方，淺灰色格子裡
## 每一集的標頭共點落去，有Youtube的影片連結
## [2020.05.07《台語講世事》：無薪假](https://youtu.be/8BF7VvtSoUs)
．直直ti̍t-ti̍t：第二字的「直」有變調，無變調，意思無啥仝款。
．文市bûn-tshī vs. 武市bú-tshī
　註：有做生理的前輩提供資訊，講毋是「文」、「武」，應當是：
．門市 bûn-tshī 對 母市bú-tshī
　　　門bûn：如同「門徒」、「門生」的「bûn」。
　　　母 bú ：如同「母校」、「母公司」的「bú」。
．市面tshī-bīn vs. 市草tshī-tsháu
．疫情i̍k-tsîng：足濟人無啥會曉講，因為「疫i̍k」普通時無咧講。
　　　疫病i̍k-pēnn/pīnn，疫症i̍k-tsìng，防疫hông-i̍k。
．斬截tsám-tsue̍h
＊「食人頭路的人」的詞，欲按怎講？例：伙計hué-kì
＊俗諺：請(tshiánn)鬼提藥單。 （X）
　　　　倩(tshiànn)鬼提藥單。 （O）
＊米甕弄鐃bí-àng lāng-lâu
．「𣁳khat」米

一、看新聞講臺語：頭家吩咐歇無薪 政府補助救辛勞
◎翻譯
華語：武漢肺炎疫情爆發之後，
臺語：武漢肺炎疫情煏開了後，
　　　Bú-hàn Hì-iām i̍k-tsîng piak--khui liáu-āu,
＊這个病名，四字連做伙講是「武漢肺炎Bú-hàn Hì-iām」，有的人感覺講是欲強調這个所在，
　嘛有可能是毋知影愛變調。
　咱若講一个病的名來講，抑是一个外詞，伊就會四字連做伙，所以就是前三字攏愛變調：
　武bú →讀做bu，第2調變做第1調；
　漢hàn →讀做hán，肺hì →讀做hí，攏是第3調變做第2調。
．煏piak：佇這个時陣，敢若像講「爆炸、湠開」彼種感覺。
　　　一般生活上，用佇咧煮食，油共啥物貨煏煏咧，較芳。
　　　例：蒜頭提去煏煏咧，較芳。
　　　用油煏，予伊逼出芳味。漢字是按呢寫「煏piak」。

華語：老字號的餐廳都暫時歇業了。
臺語：老字號餐廳予逼甲暫歇工。
　　　Láu-jī-hō tshan-thiann hōo pik kah tsiām hioh-kang.
．老láu：咱普通時攏講「老lāu」，當然無毋著。
　　　但是佇遮是用「老láu」字號，佇這个狀況來用，
　　　是強調真有經驗，抑是真久、真老練這款意思。
　　　這款意思，咱就愛讀「老láu」，本調第2調變做第1調。
．老練láu-liān：足有經驗的意思。
．花老去矣Hue láu--khì--ah. 算做是欲強調伊「蔫lian」去矣。
　　　時間過去了後，花就會老去(láu--khì)。
．老大láu-tuā：一般來講是較尊稱的意思，無一定足「老lāu」。
．果子老了了kué/ké-tsí láu liáu-liáu. 佮「花老去」小可仔仝意思，
　　　佇遮是果子爛去，攏是時間過較久，果子老去(láu--khì)矣。
．歇工hioh-kang：咱一般咧講「歇睏(hioh-khùn)」，意思可能較闊，
　　　嘛會當講「我咧睏」是歇睏，抑是我無做代誌，嘛是歇睏，「歇睏」感覺上範圍較闊。
　　　歇工，是真正無做彼个工，無去上這个班，較精確。

華語：最長可以領三個月，再視情況決定是否延長。
臺語：上久三月日，
　　　Siōng kú sann gue̍h-ji̍t,
　　　看款才決有欲閣展限無。
　　　khuànn-khuán tsiah kuat ū beh koh tián-ān bô.
．月日gue̍h-ji̍t：欲講幾個月，另外一種講法就是「幾月日」。
　　　以前敢若較定定聽著按呢講，這馬較夆袂記得去矣。
　　　會當講閣有強調「月」，閣有強調「日」，是無仝的詞，較臺語氣。
．看款khuànn-khuán：就是「看情形，看狀況」的意思。
　　　例：好食款。
　　　例：你莫遮歹款。
　　　例：你實在毋是款。
．展限tián-ān：「限ān」是白話音。
　　　限時hān-sî、限定 hān-tiānn，「限hān」是文言音。
　　　例：我這馬手頭較絚(ân)，你閣予我「限ān」一個月好無？
　　　例：老師，你這个展閣予我「限ān」一下，好無？
　　　　　意思是講時間閣拖較長、延較長。

華語：養家應該不夠，但至少總比沒有補助好。
臺語：欲飼某囝應該無夠額，
　　　Beh tshī bóo-kiánn ing-kai bô kàu-gia̍h,
　　　總是較贏無補助。
　　　tsóng--sī khah iânn bô póo-tsōo.
＊過去因為攏是查埔人咧趁錢，攏會用「飼某囝」來表示，這馬可能無一定是按呢，
　你欲講「飼規家伙仔」嘛會使。
．無夠額bô kàu-gia̍h：其實就是「無夠」，毋過咱強調這个「額」，
　　　有額、無額，因為「額」足臺語氣。
　　　例：伊足好額。
　　　例：這是我的額，你毋通食。
．總是tsóng--sī：「總tsóng」咱這馬遮是本調，「是sī」輕聲，
　　　有的人可能無讀有輕聲的狀況，兩種讀法攏有。
　　　總是tsóng--sī，敢若較強調。
．有額ū-gia̍h、好額hó-gia̍h

華語：疫情持續延燒，
臺語：疫情直直湠，
　　　I̍k-tsîng ti̍t-ti̍t thuànn,
﹡佇遮的「直直」，是佮「一直」仝款，一直湠的意思。
．直直ti̍t-ti̍t：第二字的「直」有變調，無變調，意思無啥仝款。
　　　例：你直直(ti̍t-ti̍t)共講，伊當然會受氣。
　　　　　兩字「直」有變調，變做低入聲。
　　　　　就是你一直講，一直講，伊當然會受氣。
　　　　　咱可能較捷聽著第一句。
　　　例：你直直(ti̍t-ti̍t)共講，免問--我。
　　　　　第二字的「直」維持本調，免變。意思是直接去共講。
　　　　　第二句的用法，咱這馬較罕得聽著。
　　　例：坐計程車的時，會使共司機朋友講「直直」行。
　　　兩種講法，一種是「一直」按怎，一種是攏直的，莫斡(uat)。

華語：勞動部已經準備就緒，陪伴勞工度過這波寒冬。
臺語：勞動部已經攢辦好勢，
　　　Lô-tōng-pōo í-king tshuân-pān hó-sè,
　　　陪伴勞工度小月。
　　　puê-phuānn lô-kang tōo-sió-gue̍h.
．攢辦好勢tshuân-pān hó-sè：攢好勢、辦好勢，嘛是算仝款。
　　　遮閣較強調伊有攢，才來辦，敢若有準備才來辦。
．度小月tōo-sió-gue̍h/ge̍h：《教典》度過較無景氣的時機。

二、講予你知：無薪假
武漢肺炎全世界湠開，對經濟影響非常大，咱臺灣嘛無例外，真濟公司這馬當咧實行「無薪假」。
◎無薪假（減班歇睏）的起因
　為啥物咱臺灣有「無薪假」？「無薪假」有另外一个名號做「減班歇睏」。
　「減班歇睏無薪假」是對佗來的？
＊2008年，Lehman銀行倒擔，致使金融風暴
　2008年的時，美國有一間銀行號做"Lehman"雷曼兄弟銀行倒擔，規个倒擔了後，
　致使全世界金融風暴(hong-pō)。
　這个金融風暴嘛影響著臺灣，尤其是足重要的科技業。
＊科技業臺積電，𤆬(tshuā)頭歇無薪假
　彼的時陣，科技業的𤆬(tshuā)頭臺積電，亻因就創一个政策，逐家來歇睏，無欲領薪水，
　對領導階層，到生產部門，逐家攏受著影響。
　這个政策都變做是歇假，無薪水，就歇無薪假。
＊逐月日4～10工
　臺積電按呢𤆬頭了後，規个科技業其它的公司，嘛綴咧做，有的歇4工，有的歇10工，不等，
　規个情形變按呢。
＊政府無斬截(tsám-tsue̍h)，各行業趁樣，勞工怨慼(uàn-tsheh/tshueh)
　彼的時陣，政府針對這个大湧過來，無暫無截，無啥物作為，各行業就趁樣學款，
　引起真濟勞工怨慼。

◎勞團抗議後，勞委會因應
＊勞雇雙方，景氣因素，暫時、停止勞務協議
　因為這个制度，確實影響真濟勞工，勞工團體就去抗議，政府勞委會就做出因應、說明，
　共「無薪假」做定義，就是愛勞雇雙方，因為景氣的因素，來暫時停止勞務的一種協議。
＊規範：針對說明，做出一寡規範。這是簡單寫。
　咱若欲做「無薪假」：
　◇愛勞工同意，袂當比基本工資較低
　　一定愛勞工同意，而且放假了後，規个薪水計算起來，袂當比基本工資閣較低。
　◇袂使強迫上班，通報地方主管機關
　　若放假，袂使放到一半，叫逐家愛來上班，通報地方主管機關。
　◇無超過三個月，會使隨時停止勞動契約
　　袂當超過三個月，佇放假期間，勞工會當隨時講無欲做矣，會使停止勞動契約。
＊其他充電補助計畫
　除了逐家愛遵守規範以外，政府閣有提出一寡充電補助計畫，就是補助這寡公司，
　愛攢充電的課程，當然嘛會補助勞工的生活。

◎造成的影響佮問題
「無薪假」對咱臺灣的影響佮問題，到底是啥？規个來看。
＊予無薪假無立法煞「行會通」
　目前來看，無薪假猶是無立法，但是因為勞委會按呢處理，變做予無薪假閣行會通。
＊變做公司消敨營運困難的步數
　按呢了後，彼个時陣，雖然金融危機結束，但是真濟公司，變做共無薪假提來，
　消敨亻因佇營運困難的時陣，一个步數。
＊按怎確定虧空是景氣因素？
　雖然有規範佇遐，欲按怎確定這个公司，到底是伊家己虧空，抑是景氣的因素，無法度判斷。
＊勞工敢有影有同意權？
　雖然咱講「愛勞工朋友同意」，但是勞工敢有影有同意權？
　這就是逐家咧討論的。

◎按怎看待「無薪假」
＊勞工確實是受害者
＊避免裁員佮倒擔的抽退步
　若是無「無薪假」這个制度，這馬按呢咧行，譬如講這馬武漢肺炎的時陣，
　若是真濟公司因為按呢倒擔，抑是裁員，咱真濟勞工朋友，敢毋是顛倒失去亻因的頭路。
　所以有人講，這其實是一種避免裁員佮倒擔的抽退步。
＊無立法/通報佮配套措施
　雖然這馬無立法，但是確實有一寡規範，譬如講愛通報、一寡配套措施，
　可能加減嘛會繼續來進行。
＊充電訓練（一點鐘158箍，上濟120點鐘）
　這馬的配套措施，包括充電訓練，毋但補助公司，嘛會補助勞工。
　譬如講你有去充電上課，一點鐘可能共你補助偌濟錢，
　上濟會當補助到120點鐘。
＊安心就業（歇30工以上，按月補助1.1萬，上久半冬）
　除了上課共你補助以外，嘛有一个制度，簡單講，你若歇30工以上，愛來共你補助，
　上濟會當一月日補助1.1萬，上久會當半冬。
「無薪假」對逐家來講，影響非常大，佇遮當然嘛愛呼籲咱的頭家，這馬為著這个代誌，勞工的辛苦，希望咱經濟閣轉來的時陣，咱的頭家朋友會當補償這寡勞工朋友，鬥陣來拍拚。

◎語詞：
．文市bûn-tshī vs. 武市bú-tshī：佮小賣、大賣仝意思。
　　　是另外一種講法，敢若較古典的講法。
　　　武市：批發的，較中盤、大盤。
　　　文市：一般小賣彼種店家，抑是擔仔。
．市面tshī-bīn vs. 市草tshī-tsháu：這兩个應該算差不多意思。
　　　Ｘ草：就是「啥物狀況」。親像「路草」就是「路的狀況」。
　　　「市草」就是「市場的狀況」。猶閣有「漢草」。
　　　註：《教典》漢草hàn-tsháu：身材、大欉、體格。
．倒擔tó-tànn、倒店tó-tiàm、倒號tó-hō：攏有人講。
．金融風暴kim-iông hong-pō：這是讀音的問題。
　　　假使你共四字當做一个詞，頭前三字攏愛變調。
．疫情i̍k-tsîng：足濟人無啥會曉講，因為「疫i̍k」普通時無咧講。
　　　疫病i̍k-pēnn/pīnn，疫症i̍k-tsìng，防疫hông-i̍k。
　　　這馬這个時間，應該這字定定聽著，是聽著「毋著的」足濟。
．斬截tsám-tse̍h/tsue̍h：斬(tsám)，截(tse̍h/tsue̍h)，攏是切的動作。
　　　用佇一般延伸的意思，你有足明快去決定代誌無。
　　　若無，佇遐拖拖沙沙(thua-sua)，無作為，就是「無斬截」。
．趁樣thàn-iūnn：樣(iūnn)，款(khuán)，差不多意思。
　　　趁彼个樣，「去循(sūn)」，抑是「去學」的意思。
．虧空khui-khong：就是「了錢」的意思。空khong，毋是khang。
．抽退thiu-thè/thuè：就是有一个會當退路，有退路通行。
　　　退場機制thè/thuè-tiûnn ki-tsè，就是抽退步，有通仔抽退無。
＊「食人頭路的人」的詞，欲按怎講？
．辛勞sin-lô：例：做人的辛勞。
．予人「倩的tshiànn--ê」
　　　倩(tshiànn)佮「請tshiánn」，無仝字，無仝調，無仝意思。
　　　例：你是我倩的。
　　　　　你是我請的。
　　　　　兩句無仝，差足濟。
＊俗諺：請鬼提藥單。 （X）
　　　　倩鬼提藥單。 （O）是付錢倩鬼。
．食頭路人tsia̍h-thâu-lōo-lâng
．食頭路的tsia̍h-thâu-lōo--ê
．伙計hué-kì：古典的是叫「伙計」。
只要是領人薪水、食人頭路，遮的攏是。

◎俗諺
＊加減趁，較袂散。
　Ke-kiám thàn, khah bē sàn.
．趁thàn：趁錢。
．散sàn：散赤sàn-tshiah、散食sàn-tsia̍h。

咱無希望「無薪假」到落尾變按呢，這幾句攏是咧講「足悽慘的」。
＊柴空米糧盡。
　Tshâ khang bí-niû tsīn.
　也無柴，也無米，欲食啥，干焦會當啉水。

＊米甕弄鐃bí-àng lāng-lâu
　米甕空矣，你欲𣁳(khat)米，抐咧抐咧都khiang-khiang-khiang，
　因為攏無米，若毋是硞著甕仔底，就是硞著邊仔khiang-khiang，袂輸咧弄鐃。
## [2020.05.14《台語講世事》：樂透彩券](https://youtu.be/JxfNL8yqTHY)
．上卌袂攝tsiūnn-siap-bē/buē-liap
．瀳tshînn
．鱟額hāu-hia̍h、鱟桸hāu-hia、鱟勺hāu-sia̍h
＊講咱的面，一寡生張(senn/sinn-tiunn)、一寡形欲按怎講？
．「奕 ī」佮「耍sńg」無仝款。
．跋筊pua̍h-kiáu
．簽tshiam：動詞。例：共籬仔(lî-á)簽較密(ba̍t)咧。
　　　　　　　　　 例：你欲去共伊簽藥仔。
　　　註：《台日大辭典》有收這兩个解說。
．開食跋𨑨khai tsia̍h pua̍h thit/tshit
．菲律賓Hui-li̍t-pin：照原本的國名音譯讀，是Hui-li̍t-pin，毋是→律lu̍t
．賣捌人bē/buē-pat-jîn

一、看新聞講臺語：七億獎金阿樂仔 鱟額闊喙好彩頭
◎翻譯
華語：彩迷興奮上門搏個運氣。
臺語：眾彩迷起癮瀳倚欲拚卜。
　　　Tsìng tshái-bê khí-giàn tshînn-uá beh piànn-poh.
．『興奮』是一个你想欲去創啥，足愛創啥，會當講是一種「癮」，
　所以講「起癮khí-giàn」。
．瀳tshînn：這字敢若較罕咧看。表示足濟人同時去創啥。
　　　一大陣，足緊集中去啥物所在，彼款動作，彼種形，號做瀳。
　　　彩迷真正是「瀳tshînn」起去。
　　　例：足濟人排隊，咧買啥物物件，搶欲買，瀳倚去買衛生紙。
．拚卜piànn-poh：欲看伊的運氣按怎。
　註：《台日大辭典》賭險，冒險，投機。

華語：生肖屬虎的彩迷，手氣特別旺。
臺語：生相相虎的彩迷，加足旺手。
　　　Senn/Sinn-siùnn siùnn hóo ê tshái-bê, ke tsiok ōng-tshiú.
．『生肖』足濟人攏袂曉講，普通時攏無咧講，這馬攏講「星座」。
　　　愛講「生相senn/sinn-siùnn」，「相siùnn」啥。
．旺手ōng-tshiú：就是手足旺的，手氣旺，運氣旺，一直贏。
　　　「旺手ōng-tshiú」的「反面」(?)，就是「衰手sue-tshiú」。

華語：（慧盈老師無唸。）
臺語：著著上億的，有25%相虎。
　　　Tio̍h-tio̍h tsiūnn-ik--ê ū jī-tsa̍p-gōo pha siùnn hóo.
＊著著上億tio̍h-tio̍h tsiūnn-ik：「上億」就是超過1億。
．著著tio̍h-tio̍h：
　頭一字「著」是動詞，比論講「著獎tio̍h-tsióng/tsiáng」、
　　　　「著等tio̍h-tíng」、「著懸分tio̍h-kuân-hun」。
　　　　嘛有䆀的，「著災tio̍h-tse」、「著病tio̍h-pēnn/pīnn」、
　　　　「著賊偷tio̍h-tsha̍t-thau」。
　　　　「著tio̍h」 就是「得著」，好䆀攏有可能。
　第二字「著tio̍h」，就是普通「著」，
　　　　你有聽「著」無？你有看「著」啥物無？
．上卌袂攝tsiūnn-siap-bē/buē-liap：超過四十，一寡功能就較無好矣。
　　　「卌siap」，有4畫，就是四十的意思。
　　　「攝liap」，攝理，就是「管理、處理」的意思。

華語：橢圓臉，一字眉、大眼睛、厚脣、高額頭、大嘴巴。
臺語：
．『橢圓臉』，咱一般會當講「雞卵面ke/kue-nn̄g-bīn」，
　　　彼个形敢若瘦抽瘦抽(sán-thiu，又唸作sán-thio)，長長按呢。
．一字眉it-jī-bâi：「一tsi̍t」，咱用文言音「一it」。
．『大眼睛』 → 大目tuā-ba̍k。
．『厚脣』： → 厚喙脣kāu-tshuì-tûn。
．『高額頭』 → 鱟額hāu-hia̍h。「鱟hāu」是一種佇水內面的。
　　　彼這馬聽講臺灣遮較看袂著，金門遐敢若猶閣有。
　　　以前的人「鱟」這種物件定定用，共伊的殼提來𣁳(khat)湯，
　　　例：鱟桸hāu-hia、鱟勺hāu-sia̍h。
　鱟額hāu-hia̍h：應該是像「鱟」的殼，彼个形，無啥牛毛，
　　　表示彼个額頭闊闊，可能無啥物頭毛。
＊講咱的面，一寡生張(senn/sinn-tiunn)、一寡形欲按怎講？
．擴頭khok-thâu：佮「鱟額」無仝款。
　　　不管頭前有擴出來，抑是後壁有擴出來，較凸(phok)出來。
　俗諺：前擴金，後擴銀。Tsîng-khok kim, āu-khok gîn/gûn.
．戽斗hòo-táu：逐家較知，就是下頦（突出）。
．暴牙pok-gê：喙齒暴暴(pok-pok)出來。
．重巡tîng-sûn：目睭重巡。（註：《教典》：雙眼皮。）
．mooh鼻mooh-phīnn：鼻仔mooh-mooh。
．酒窟仔tsiú-khut-á
．胡蠅屎hôo-sîn-sái

華語：近期購買尾數7的人暴增，連帶提升四成以上的業績。
臺語：這陣買尾號7的人數夯起來，
　　　Thit-tsūn bé/bué bué/bé-hō tshit ê jîn/lîn-sòo giâ--khí-lâi,
　　　業績綴咧起四成。
　　　gia̍p-tsik tuè/tè leh khí sì siânn.
．這陣tsit-tsūn：有兩種意思，一个是最近這段時間，
　　　但是嘛有人是咧講「這馬」。
．這馬tsit-má、今tann、tsín、現此時hiān-tshú-sî，攏咧講這馬。
．夯起來giâ--khí-lâi：對較低的所在到較懸的所在，按呢叫「夯giâ」。
　　　對本來無偌濟，變做足濟，按呢嘛會當講「夯giâ」。
　　　這字介紹予逐家知影按呢寫。
　　　例：大力共夯起來。
．綴咧tuè/tè leh：綴人走、綴人行的「綴tuè/tè」。
　　　例：綴咧食、綴咧唱、綴咧烏白講。

二、講予你知：樂透彩券
◎『樂透』彩券按頭講起
一開始，就愛對伊的名來講起，有人會講「我欲來去買一个樂透。」，這種講法毋是真正確，咱應該愛講「欲去買一張彩券。」才著。
＊買有印號碼、圖、文字的票單
　「彩券」是啥物？對這字「券kuàn」，就知影伊是一張票單，
　這張票單頂懸，有印號碼、一寡圖，抑是一寡文字。
　這張票單買落去了後，看你是欲揀號碼，抑是等等。
＊透過抽籤、搖彩等特定的規則
＊看好歹運來決定有著獎無
　這就是規个「樂透」的耍法。這規个耍奕的物件，號做「樂透」，
　咱買的彼張單才是號做「彩券tshái-kuàn」。
＊lotto的音譯
　「樂透lo̍k-tháu」聽起來怪怪，逐家可能慣勢聽『樂透』，
　其實這字是外國來的，“lotto”的音譯。
　若去查字典這字“lotto”，會看著幾个重點，一種是這種耍法，閣來
　會寫這種“lotto”，大部份是政府機關，抑是一寡慈善機關發行的。
＊有百外个國家咧發行
　這馬規个來看，全世界已經有百偌个國家，攏有發行這種「樂透」。

◎古早的『樂透』
＊上早文獻記載佇聖經
　這个「樂透」到底是對啥物時陣開始的，這專家無啥確定。
　上早的文獻記載，佇聖經內面都有出現矣。
＊臺灣佇清國時代就有
　咱對清國時代開始講起。
　臺灣佇清國時代，臺灣人就有買「樂透」的習慣，但是彼个時陣，
　買的樂透，並毋是清國政府發行的，買的是一種號做「呂宋票」。
＊呂宋票：西班牙傳到小呂宋的『樂透』
　看著「呂宋」這兩字，咱就知影這是菲律賓彼个時陣咧賣的。
　菲律賓彼个時陣，算是西班牙的殖民地，所以這種「樂透」的耍法，
　是對西班牙傳到小呂宋的所在。
＊小呂宋國王主持，收益歸國有
　「呂宋票」就是小呂宋的「樂透」，是亻因遐的國王主持，收益歸呂宋國國有。
　清國有禁止，但是無效。

◎日本時代的『樂透』
＊民間時行的「天財票」
　這毋是政府發行的，日本時代，日本政府的法律，是禁止這種跋筊。
　因為「天財票」，逐家足興的，真濟人開大錢去買，彼个時陣，
　臺灣總督府就開始討論，若按呢，規氣總督府家己來發行好矣。
　毋但共資金唌轉來臺灣本土，而且會當監督臺灣人買彩券的行為。
　若是有趁，政府閣會使提來做一寡社會政策等等。
＊1906年，成立彩票局發行臺灣彩票
　佇1906年，臺灣真正成立一个「彩票局」，發行臺灣彩票。
＊日本本土嘛有人咧痟「間接持有」
　果然，彩票一下發行，逐家就搶欲買，甚至日本人本來是袂當買的，
　但是日本本土，嘛有人咧痟，叫伊蹛佇臺灣的朋友替伊買，
　變做是一種「間接持有」，因為按呢，會當避免法律的責任。
＊日本本土差一點仔解禁
＊發生社會事件，臺灣彩票停止發行
　亻因的法律差一點仔欲改，但是佇大阪，因為臺灣彩票的代誌，
　有發生真濟社會事件，顛倒使臺灣彩票停止發行。

◎中華民國時期
＊1950年，為安搭中國各省軍民，發行愛國獎券
　國民政府拍輸走贏，來到臺灣了後，1950年的時陣，
　為著欲安搭亻因對中國𤆬(tshuā)來各省的軍民，就發行愛國獎券。
　愛國獎券第一期的獎金足懸，懸甲彼个時陣會當佇臺北市買一棟
　三層樓的厝。
　尾仔，獎金一直懸，一直懸起去，甚至出現一月日愛開獎三擺。
＊1985年，全臺痟『大家樂』；1987年，停止發行引起反彈
　佇1985年，全臺灣出現一个現象，號做『大家樂』，
　用愛國獎券尾仔兩个號碼來簽牌，引起真濟社會問題。
　所以佇1987年，就共愛國獎券停止發行，引起真濟反彈，
　因為彼个時陣，真濟弱勢的人，就是靠賣愛國獎券咧討生活，
　對亻因來講，是真大的影響。
＊計共1171期，收益總額超過689億
　總共共統計起來，愛國獎券有發行1171期，收益總額超過689億。
＊1999年，發行公益彩券到今　
＊2008年，為打揲地下跋筊問題，發行運動彩
「樂透」毋通迷落去，無咧，毋但袂當樂透，閣會絕望。　

◎語詞：
．彩券tshái-kuàn，tshái-kǹg：攏有人講。kuàn文言音，kǹg白話音。
．獎券tsióng-kuàn，tsióng-kǹg：因為以早有愛國獎券，所以有人會講。
　　　這馬的人講「彩券」較濟，以前的人講「獎券」。
．彩票tshái-phiò：這个「票phiò」對咱來講，可能閣較熟似。
　　　一張一張的，紙票、銀票，所以「彩票」嘛是一个講法。
．奕ī：欲奕彩券，抑是欲奕啥物貨，當然毋但彩券會當用「奕ī」的，
　　　閣有其它的物件會當用「奕ī」的，親像「行棋」。
　　　奕ī，有淡薄仔拚輸贏這款性質的遊戲，佮「耍sńg」無仝款。
　　　「你欲奕樂透無？」就是講「你有欲去參與無？你有去買無？」
　　　「奕ī」本身較有分出懸低、輸贏，「耍sńg」無一定愛分懸低。
．跋筊pua̍h-kiáu：漢字是按呢寫。彩券嘛是有這種跋筊性質。
　　　若跋筊會講著：硩注(teh-tù)，抑是落注(lo̍h-tù)。
　　　例：注共硩落去，你欲硩偌濟？你欲落偌濟？
．簽tshiam：彩券、彩票，古早聽較濟歲的人講，是攏講用「簽」的。
　　　例：你這期簽幾號？這馬嘛有人按呢講。
　　　「簽」的動作，確實就是你愛去選佗幾个號碼，就是用簽的。
　除了你欲揀號碼，用筆按呢簽名的「簽」，有另外一種意思，有一種「插入去」的感覺。
　　　註：《台日大辭典》有收這个解說「插入去」。
　　　例：共籬仔(lî-á)簽較密(ba̍t)咧，插較密咧。有這種講法。
　　　嘛有名詞的講法，「簽」毋但做動詞，嘛會當做名詞，
　　　親像咱食的「番薯簽han-tsî/tsû-tshiam」糜(muê/bê)的「簽」、
　　　「礤簽tshuah-tshiam」的「簽」。
　　　古早「簽」的動詞，閣有一種「你欲去共伊簽藥仔。」
　　　注射的意思，這足古早，這真正這馬足久無聽著矣。
　　　註：《台日大辭典》有收這个解說「注射」。
．筊豬kiáu-ti：是咧罵豬，抑是咧呵咾豬？
　　　是講人足愛跋的，閣興跋的，但是見跋見輸。
．跋筊仙pua̍h-kiáu-sian：嘛無偌好，但是用「仙sian」敢若較好聽。
　　　看起來敢若伊有跋，攏會贏，其實嘛無一定，是咧講興跋的。
．開食跋𨑨khai tsia̍h pua̍h thit/tshit：這是4種代誌。
　　　開錢的「開」；食食的「食」；跋筊的「跋」；𨑨迌的「𨑨」。
　　　例：伊這个人干焦會曉開食跋𨑨。
　　　　　按呢是咧呵咾，抑是按怎？伊的生活足多元的，幾若項。
．呂宋Lī/Lū-sòng：就是呂宋島，有腔口差。這馬的菲律賓。
．菲律賓Hui-li̍t-pin：國名，較趣味的就是無照漢字的「律(lu̍t)」來唸，
　　　咱是照伊原本的國名音譯來讀，是Hui-li̍t-pin，毋是Hui-lu̍t-pin。
．膨價phòng-kè：「膨phòng」是漲(tiòng)懸。
　　　漲懸價(tiùnn-kuân-kè)，刁工共起價。
．唬人hóo--lâng：唬(hóo)本調無變，人(lâng)是輕聲，毋免強調。
　　　　是強調「唬」，共人騙，騙人。
．賣捌人bē/buē-pat-jîn：這古早詞，對日語詞來的，「推銷員」的意思。
．銀單gîn/gûn-tuann：這嘛是日本時代，一種算是支票之類的物件。
．假包ké-pâu：意思是「假的物件」。無「真包tsin-pâu」。
．簽牌支tshiam-pâi-ki：買彩券這種物件。
．逼籤詩pik/piat-tshiam-si：「逼」有幾種意思，其中一个意思
　　　敢若欲真出力，去共答案求出來。
## [2020.05.21《台語講世事》：遠兜教學](https://youtu.be/7ADHXmf9kwo)
．遠兜hn̄g-tau：這袂使讀做「uán-tau」。
　註：《台文華文線頂辭典》、《台日大辭典》：有收，遠方。
．習慣si̍p-kuàn vs. 慣勢kuàn-sì
．誠實tsiânn-si̍t vs. 誠實sîng-si̍t
　　　誠實(tsiânn-si̍t)按怎，漢字是按呢寫。
．摸飛moo-hui？
．避免pī-bián、避免pī-bián、避免pī-bián，愛讀3遍。　（Ｏ）
　　　俗唸作phiah-bián　（Ｘ）
．估kóo，正手爿就是「古早」的「古」，佮伊仝調。
＊這是讀音的問題
．研習gián-si̍p：研gián，愛有“g”。
．突破tu̍t-phuà：突tu̍t，咱是“ t ”，毋是讀做華語的「ㄊ」。
．傳統thuân-thóng：傳thuân。
．熟手si̍k-tshiú：熟si̍k。
．硬體ngē-thé，ngī-thé：硬ngē/ngī。
．設備siat-pī：設siat。
．業餘gia̍p-î，gia̍p-û：餘î/û，腔口差。

一、看新聞講臺語：大學防疫愛顧好 遠兜上課厝內學
◎翻譯
華語：在鏡頭前，跟遠在家中或是國外的學生，一一問好。
臺語：佮遠兜佇厝內，抑是國外的學生，
　　　kah hn̄g-tau tī tshù-lāi, ia̍h-sī kok-guā ê ha̍k-sing,
　　　一个一个相借問。
　　　tsi̍t ê tsi̍t ê sio-tsioh-mn̄g.
．遠兜hn̄g-tau：這袂使讀做「uán-tau」。就是「足遠的所在」。
　註：《台文華文線頂辭典》、《台日大辭典》：遠方。
　　　一寡生活中的詞，嘛捌用著「啥物兜tau」，
　　　除了「恁(lín)兜」、「阮(guán/gún)兜」以外，
　　　親像：跤兜kha-tau、厝邊兜tshù-pinn-tau、年兜nî-tau。
　　　兜，有一个意思就是「所在」，抑是「附近」。
　　　「遠兜教學」攏毋捌聽人按呢講，因為大部份的人攏是用華語，
　　　照漢字讀，「遠距hn̄g-kū/uán-kū教學」，咱明明就有「遠兜」，
　　　會使提出來講。
　　　例：伊對遠兜來，看起來足忝的。
　　　例：這間店有夠有名的，連遠兜的人攏知。
．相借問sio-tsioh-mn̄g：這馬逐家較袂曉講「相借問」，攏講拍招呼。
　　　「招呼」其實會使用，毋免「拍」。
　　　「相借問」足臺語氣的。

華語：確保每位學生，都習慣這樣的上課模式。
臺語：確定按呢上課，逐个學生攏會慣勢。
　　　Khak-tīng án-ne siōng-khò, ta̍k-ê ha̍k-sing lóng ē kuàn-sì.
＊咱句型佮華語的句型小可無仝。
．習慣si̍p-kuàn vs. 慣勢kuàn-sì：
　　　例：你會慣勢無？
　　　例：這是一个好的習慣。
　　　華語『習慣』，動詞、名詞攏會使，咱臺語一般是用名詞咧講，
　　　「逐个學生攏會慣勢」，若照華語的句型毋是袂使，
　　　但是咱這真口語，是欲強調「會慣勢、袂慣勢」，囥佇上後壁，
　　　按呢逐家聽甲較清楚，重點是欲看「學生會慣勢無？」。
　　　例：你會慣勢無？
　　　例：你有這个習慣無？

華語：如果真的發生全校停課的狀況，也能夠讓教學不中斷。
臺語：若誠實愛全校停課，
　　　Nā tsiânn-si̍t ài tsuân-hāu thîng-khò,
　　　嘛通予教學袂有斷站。
　　　Mā thang hōo kàu-ha̍k bē ū tn̄g-tsām.　
．誠實tsiânn-si̍t：「真正按怎」嘛是會使。誠實按怎，是另外一種講法。
　　　以前的人較捷講「誠實tsiânn-si̍t」按怎。
　　　例：你誠實欲按呢做？
　　　這馬逐个攏講「真正」，愛共「誠實tsiânn-si̍t」抾轉來。
　　　「誠實tsiânn-si̍t」字是按呢寫。
　　　有人講「誠tsiânn」佮「實si̍t」，「誠」是毋是無一定是第5聲，
　　　可能是「？tsiann」佮「實si̍t」的組合，這佮腔口差有關係。
　　　若照第5調的讀法，第3調佮第7調應該攏有人講才著。
　　　若無人讀做第3調，按呢「？tsiann」會較合，
　　　所以有人羅馬字會寫第1調。這字猶有討論的空間。
．誠實sîng-si̍t：無講白賊。
．斷站tn̄g-tsām：站tsām →坎站khám-tsām，伊一段一段，予伊斷去，中央斷去，
　　　所以就是「斷tn̄g」的意思。
　　　站tsām，咱臺語嘛定定提出來用，這字有「階段」的意思。
　　　譬如講：坎站、這站仔tsit-tsām-á。

華語：為了避免學生假點名，真懶惰。
臺語：為著避免學生假影點名事實摸飛。
　　　Uī-tio̍h pī-bián ha̍k-sing ké-iánn tiám-miâ sū-si̍t moo-hui.
．假影ké-iánn：假影按怎。
　　　這馬逐家攏會講「假點名」，「影iánn」攏無去矣。
　　　以早，「假影ké-iánn」這嘛是定定咧講，這馬較無矣。
＊知影tsai-iánn、有影ū-iánn、無影bô-iánn：
　　　這三个「影iánn」，佮真正的日頭照出來的「影iánn」無啥仝，毋是彼个意思。
　　　毋過，欲共看做是有形、具體，無一定講毋著。
　　　知啥物貨、有啥物貨、無啥物貨，
　　　知影tsai-iánn、有影ū-iánn、無影bô-iánn，欲講正影，嘛是會使。
　　　這三个足臺語氣的，招逐家閣提來講。
．摸飛moo-hui：這个詞有人較傾向用羅馬字寫。
　　　有捌聽過其他老師講過，凡勢真正是對「嗎啡môo-hui」來的，
　　　藥品彼个「嗎啡môo-hui」，有人講有可能，愛閣較濟證據。
　　　咱講的moo-hui，假影點名，事實是可能咧𨑨迌，毋知咧創啥，毋是咧上課，
　　　意思可能有人共延伸，「注嗎啡」可能予伊較爽快，心情較好，
　　　所以講做一寡予你較爽快、心情較好的代誌，若像是咧食嗎啡。
　　　例：你毋好閣「moo-hui」矣。
　　　這字可能是日本時代開始才有的？毋知影，閣愛查。

華語：暫緩國外的交流研習，守住校園防線。
臺語：國外的交流研習先按下，
　　　Kok-guā ê kau-liû gián-si̍p sing àn-hā,
　　　共校園防線把予牢。
　　　kā hāu-hn̂g hông-suànn pé hōo tiâu.
．按下àn-hā：看起來是文言文內容來的，攏讀文言音，一个正式的詞。
．把予牢pé hōo tiâu：把pé，白話音；文言音pá。
　　　把pé，就是共守予牢，共掌握佮守。
　　　例：疫情愛共把予牢。
　　　普通時，較濟用佇量詞的感覺，一把(pé)菜、一把(pé)花等等，
　　　敢若生活上較捷用，其實會使共提來做動詞用。
　　　例：你緊共門跤口把予牢，莫予人入來。

二、講予你知：遠兜教學
「遠兜教學」是新的詞。
因為武漢肺炎猶未收煞，真濟所在為著欲避免(pī-bián)學校變做「群聚感染」的所在，真濟地區各級的學校，宣布停課，但是停課了後，影響著真濟學生的受教權，所以這馬「遠兜教學」變做足衝(tshìng)的話題。
◎啥物是「遠兜教學」
＊有49个國家實施，各級學校停課
　這馬統計起來，已經有49个國家攏實施各級學校停課。
＊倚4億學生受教權受影響
　停課了後，真濟學生無法度去學校上課，倚4億學生受教權受影響，按呢就愛佇厝裡上課，
　這就是「遠兜教學」。
＊遠兜教學上早佇1840年代的英國出現
＊形式綴通訊技術佮媒體的進化轉變
　彼个時陣，佇厝裡，無欲去學校學物件，當然愛綴咱人的通訊技術、形式無仝，
　佮媒體應用的變化、進化、轉變無仝款，形式就無仝矣。　
＊通信→廣播→電視→網路
　1840年代的英國出現，一開始亻因寫批、寄教材的方式。
　咱人類社會開始出現廣播，「廣播」嘛會使提來做遠兜教學。
　閣來有電視，電視咱就足熟似矣，咱臺灣有足濟空中大學等等，
　就是用電視的方式，來做遠兜教學。
　閣來是咱這馬所知影的，用網路的方式。

◎按怎進行是大挑戰
＊提供業餘進修，拍破空間時間限制
　網路的方式「遠兜教學」一開始，上初先是為著欲拍破空間時間限制，
　欲提供一寡無法度去學校上課的人，業餘的人來進修。
＊防疫停課了後繼續學習
　想袂到這回因為疫情的關係，竟然會當佇防疫停課了後，予逐家繼續學習。
＊仝步直播教學 vs.無仝步教學
　「遠兜教學」分做兩大類：
　一類號做「仝步直播教學」，就是先生、老師，佇咧電腦頭前的時陣，
　學生嘛愛佇電腦頭前，直播的方式。
　閣有一種是無仝步的，就是共一寡教材，囥起去網路頂懸，予逐家有時間的時陣，就來學習，
　這號做「無仝步教學」。
＊教育部提供中小學資料、平台、工具
　這款方式，對真濟中學、小學來講，是一種真新的方式。
　真濟中學生、小學生，抑是老師，咧準備的時陣，攏有真大的困難。
　教育部有提供真濟資料，欲按怎教，欲學啥，上網的資料，閣有平台、工具，予逐家使用，
　對學生、老師來講，是真大的挑戰。

◎大學遠兜教學的難題
比較起來，大學有較濟的基礎。差不多佇15、16年前，教育部就已經有欲按怎推動的法律出來，但是大學這陣欲來做這「遠兜教學」，嘛有伊困難的所在。
＊無夠時間調整教學方式
　教授準備教學的內容，一開始毋是欲做遠兜教學的，但是這馬，共伊變做遠兜教學，
　愛做一寡調整，敢有時間來做調整？
　若遮急的時間來做調整，品質敢會好？這攏是逐家咧討論的。
＊教授短時間內，無法度對操作真熟手
　遮短的時間以內，教授敢有法度對操作，變甲真熟手？任何人攏仝款，這嘛愛評估。
＊僫評估學生實際吸收偌濟
　遠兜教學是欲按怎知影，學生實際上有吸收抑無？這真僫評估。
＊教育部對遠兜教學有規定
　◇大規模演練愛先申請允准
　　要求學校，若是欲大規模做遠兜教學，愛先申請，允准才會當做。
　◇要求全程記錄（出席、討論、評量）
　　要求學校這爿，全程攏愛記錄，啥物人有來，啥物人有出席，有討論無，
　　欲按怎評量，攏愛全程記錄。
　◇學生逐工愛寫防疫日誌
　這幾點看起來，大學欲完全做遠兜教學，嘛是真困難。

◎大學設法克服問題
逐家這馬嘛真拍拚，攏想辦法欲來克服這寡困難。
＊學習各種工具、軟硬體設備
　譬如講真濟教授，已經開始咧學各種的工具，包括軟體、硬體，設備等等，攏有咧學習。
＊各校組聯盟串聯
　真濟學校開始串聯起來，組聯盟，互相分享資源。
＊遠兜數位課程資訊互利平台
　毋管課程也好，欲按怎來處理等等，有課程資訊互利的平台。
＊遠兜上課、上班，心態調整
　所以遠兜教學這種代誌，這馬逐家攏咧討論。佮遠兜上班仝款意思。
這回疫情的關係，咱人類欲來適應遠兜教學、遠兜上課，除了技術以外，社會上、咱的心理上，嘛有真濟代誌愛來適應。　

◎語詞：
．遠兜教學hn̄g-tau kàu-ha̍k：若是詞，4字連做伙，頭前3字愛變調。
　　　遠hn̄g變調7→3調，兜tau變調1→7調，教kàu變調3→2調。
　　　若欲強調「遠兜」就無連做伙，變做「遠兜hn̄g-tau」的教學。
．收煞siu-suah：啥物代誌欲結束，都攏會當講，無一定是歹代誌。
　　　例：疫情猶袂收煞。
　　　例：咱等咧錄錄咧，就收煞欲來食飯矣。
　　　好歹代攏會當收煞。
．避免pī-bián：這是欲講發音的問題。足濟人攏會讀俗音，俗音的意思就是錯誤的音，
　　　俗音咱莫講，咱愛講正確音pī-bián。
．評估phîng-kóo：這嘛是發音的問題。評phîng，批評的「評」。
　　　估kóo，正手爿就是「古早」的「古」，佮伊仝調。
．老師lāu-su/nóo-su：這馬上四常聽著是老師lāu-su，對『老師』來的。
　　　但是有人講「老lāu」白話音，「師su」文言音，認為愛讀「老師nóo-su」，
　　　兩字攏文言音，較合過去一寡原則。
　　　「老」文言音幾若个，毋是干焦這个「老nóo」，但是無必然。
　老師lāu-sai：就是「老師傅」，抑是「較熟手的師傅」。
．先生sian-sinn/sian-senn/sin-senn：三種攏會使。
　　　無，就是講「先的sian--ê」。
＊這是讀音的問題
．研習gián-si̍p：研gián，愛有“g”。
．突破tu̍t-phuà：突tu̍t，咱是“ t ”，毋是讀做華語的「ㄊ」。
．傳統thuân-thóng：傳thuân。
．熟手si̍k-tshiú：熟si̍k。
．硬體ngē-thé，ngī-thé：硬ngē/ngī。
．設備siat-pī：設siat。
．業餘gia̍p-î，gia̍p-û：餘î/û，腔口差。
## [2020.05.28《台語講世事》：宅經濟](https://youtu.be/TsQdnj0rBOA)
．宅經濟：「宅the̍h」新的詞，逐家愛適應一下。
　　　註：竟然佮「提the̍h」仝音。^^　　　
．疊裌裘tha̍h kiap-hiû
．熁燒隨食hannh sio suî tsia̍h
．倩tshiànn vs. 請tshiánn
★踮佇厝裡，臺語有一寡詞，一寡講法，較口語的，較文言的嘛有。
．菜宅tshài-the̍h、果子宅kué/ké-tsí-the̍h
．郊戶kau-hōo：以早有糖郊、Ｘ郊，算是這馬的詞「商業公會」。
．趁「流擺lâu-pái」
．千家貨tshian-ka/ke-huè/hè
．膩瓤jī-nn̂g

一、看新聞講臺語：家己煮食當時行　電商生理起三成
◎翻譯
華語：工作人員穿著厚外套，忙著點貨，比對訂單，快速理貨。
臺語：疊裌裘，無閒點貨，
　　　Tha̍h kiap-hiû, bô-îng tiám huè/hè,
　　　對單，款貨，跤手猛。
　　　tuì tuann, khuán huè/hè, kha-tshiú mé.
．疊tha̍h：本來已經穿一領矣，閣共疊起去。
　　　不管你原本穿幾領，橫直閣共加落去，本來就有穿矣。
　　　例：你出門，愛加疊衫，這馬天氣多變化。
　　　華語講『穿』，咱用「疊tha̍h」，
　　　華語講『外套』，一定內底閣有其它的衫。
　　　咱的「疊tha̍h」，意思就是「加ke」，比「穿」閣加。
．裌裘kiap-hiû：「裌kiap」佮「裘hiû」是兩款衫。
　　　共伊鬥做伙，毋但是薄薄一層爾，可能有幾若層，
　　　抑是講伊幾層內底，有閣櫼(tsinn)啥物物件的彼種。
　　　咱普通時口語較少講「裌kiap」，咱攏講「裘仔hiû-á」。
　　　例：棉裘mî-hiû
　　　裌裘kiap-hiû，意思就是毋但一層的衫，較厚的。
．『理貨』：「款貨」的「款khuán」，就是整理的意思。
　　　例：物件款款咧。這是足臺語氣的字。
．猛mé：足「猛掠mé-lia̍h」的「猛mé」，白話音。
　　　看著這字，逐家干焦知影「文言音bíng」。
　　　除了講「跤手猛掠」的意思，
　　　例：今仔日日頭足猛(mé)。
　　　例：瓦斯爐的火誠猛(mé)。

華語：往年在農曆年後，是傳統的淡季。
臺語：往年年節過後是小月。
　　　Íng/Óng-nî nî-tseh/tsueh kuè/kè-āu, sī sió-gue̍h/ge̍h.
．往年íng-nî，文言音óng-nî：「以早、以前」的意思。
．年節nî-tseh/tsueh：「節tsiat」是文言音，
　　　咱這馬刁工用白話音→節tseh/tsueh，因為過去是用白話音。
　　　例：年仔節仔nî-á tseh/tsueh-á
　　　例：五月節Gōo-gue̍h-tseh/tsueh
　　　　　冬節tang-tseh/tsueh
．小月sió-gue̍h/ge̍h：生理足䆀的彼个期間，較無生理的一段期間，
　　　無一定是真正講一個月。

華語：每個人『忙到手都沒停過』。
臺語：無閒甲跤手無時停。
　　　Bô-îng kah kha-tshiú bô-sî thîng.　
．跤手kha-tshiú：佇遮就是「跤佮手」，無時停。
　　　人手(lâng-tshiú)嘛會使，意思是人力(jîn/lîn-li̍k)。
　　　例：你來共我鬥跤手。就是這个人力來共你鬥相共。
　　　例：咱做這个代誌，跤手無夠。
　　　「跤手」有足濟意思。
　　　例：伊予人看破跤手。
．無時bô-sî：無啥物時間，「無時停」嘛會使講「無時閒(îng)」。
　　　意思就是攏無「閒的時陣」。
　　　例：彼个囡仔嚓嚓跳，攏無時閒。

華語：複熱即時調理包。
臺語：熁燒隨食的料理包。
　　　Hannh sio suî tsia̍h ê liāu-lí-pau.
．熁hannh：咱無一定講「熁」，可能講「共炊(tshue/tshe)一下」。
　　　「共熥(thn̄g)一下」，抑是「共按怎一下」。
　　　熁hannh，普通時較無講，咱會當提轉來用。
　　　用熁的，因為伊是一包的，用外口的燒氣，時間免傷久。
　　　熁hannh，無一定是愛有水氣，焦的嘛會使用熁的。
　　　熱氣、水氣攏會使。
．隨suî：沓沓予人放袂記去，因為看著漢字『馬上』，就唸馬上，
　　　莫閣「馬上」，咱愛「隨suî」，隨食。一定愛共抾轉來。
．料理包liāu-lí-pau：『調理包』，欲食的「料理包」。
　　　因為咱普通時講（煮食的）物件是一種「料理」，
　　　所以咱講「料理包」就會使，較合咱臺語的用法。
　　　「調理」對咱來講無一定用佇遮，「調理身體」嘛是調理。

華語：考慮再多增聘人手。
臺語：考慮閣欲加倩跤手。
　　　Khò-lū beh/bueh koh ke tshiànn kha-tshiú.
．跤手kha-tshiú：人力(jîn/lîn-li̍k)的意思。
★倩tshiànn vs. 請tshiánn
　　　這馬真正夆影響著，倩tshiànn，請tshiánn，攏分袂清楚。
　　　因為這字「倩」，可能普通時，敢若人名會出現爾，
　　　看會著的是『請』這字漢字，啥物攏是「請tshiánn」，
　　　變做這字「倩tshiànn」若像無去，較誤會攏是「請」，其實無仝。
．倩來的tshiànn--lâi--ê：「倩tshiànn」是重點，第3調無變調，
　　　後壁有輕聲符號(--)，兩个橫線了，「來的」無讀本調，無讀變調，是讀輕聲。
　　　例：倩伊來tshiànn i lâi。
　　　毋是接輕聲字的狀況，就愛變調，「倩」變第2調，拄仔好佮「請tshiánn」本調仝款。
．請來的tshiánn--lâi--ê：「請tshiánn」是重點，第2調無變調。
　　　例：請伊來tshiánn i lâi。
　　　毋是接輕聲字的狀況，就愛變調，「請」變第1調。
　倩來的tshiànn--lâi--ê，伊是我的辛勞。
　請來的tshiánn--lâi--ê，伊是我的人客、貴賓。
　意思差足濟。

二、講予你知：宅經濟
武漢肺炎毋但予咱人身體破病以外，對咱人類社會的經濟，影響嘛是足大，真濟店頭因為無人客來，逐家攏關佇厝內面，業績愈來愈䆀，敢逐項產業攏是按呢？這就無一定矣。
今仔日來講「宅經濟」。
◎「宅the̍h」是啥物
　宅(the̍h)對漢字來看，這是「厝內」的意思，這字為啥物會提出來按呢用，著愛對日本講起。
＊1970年代的日本話：御宅族(おたく otaku) → 華語『宅』 → 臺語「踮空/居家」
　日本佇1970年代的時陣，日本話「御宅族(おたく otaku)」，嘛是「厝內」的意思，
　佇彼的時代，開始慢慢仔變做有一寡人，會夆號做是「御宅族(おたく otaku)」。
＊對bàng-gà、特攝、科幻、電動等有趣味
　「御宅族」這寡人，專門對彼的時陣時行的文化，譬如講對bàng-gà、
　特攝（恐龍等等的特技攝影）、科幻、電動等等，特別有興趣的人，
　就予逐家號做「御宅族(おたく otaku)」。
＊共人剾洗 → 中性稱呼
　這馬「御宅族(おたく otaku)」這个名，變做有較中性，佇歐美國家嘛有人按呢講，
　就是針對這寡物件特別有興趣的人，你就會使號做「御宅族(おたく otaku)」。
＊某乜宅：足迷、蹽落去做
　尾仔，閣慢慢仔演進，來到咱臺灣，咱會使講你是「某乜宅」，是講你足迷的，
　抑是你對啥物代誌，攏會蹽落去做，就會使講「某乜taku」，譬如講「彈鋼琴的宅」。
＊臺灣：勼踮厝/踮空龜
　宅(the̍h)這字，佇咱臺灣話，有勼踮厝裡，抑是踮空龜的意思。

◎宅經濟
　「宅經濟」是對佗來的？
＊是臺灣用語
　雖然「宅」是日本來的，但是「宅經濟」確實是咱臺灣的字。
＊全球金融風暴的經濟因素
　彼的時陣2008年，全世界金融風暴，臺灣嘛受著影響。
＊省所費，無愛出門開錢
　真濟人減薪的、失業的、歇無薪假的，真濟人因為經濟因素，為著欲省所費，無愛出門開錢。
＊網路買物/線頂遊戲/看bàng-gà
　你無欲出門，食飯嘛是愛食飯，但是餐廳又閣袂當去，
　彼个時陣，逐家開始佇網路頂懸買物件轉來食，佇網路頂懸買物件，就無欲閣出去買矣。
　勼踮佇厝內面，就耍一寡線頂遊戲，抑無就是看bàng-gà。
＊經濟䆀煞顛倒頭成長
　彼个時陣，經濟䆀，這寡物件、行業、產業，顛倒頭來成長。
這就是「宅經濟」，一開始出現，是咱臺灣發明的詞。

◎宅經濟範圍閣較闊
＊經濟轉好，這款現象原在
＊網路軟硬體技術佮行動裝置齊全
　因為網路軟體、硬體佮技術等等，猶閣有這馬一人一个巧手機仔，攏足齊全，
　這款的環境已經起來矣。
＊買物件、學習、做工課
　毋但買物件、看bàng-gà、耍遊戲以外，愈來愈闊，譬如講你會當學習，
　甚至真濟人開始佇厝內面做工課。
＊逐間大郊戶攏咧做網路平台
　佇這个的環境之下，逐間大郊戶逐家攏有咧做網路平台，
　這就是咱這馬所看著的「宅經濟」現象。

◎宅經濟新潮流
＊全球疫情造成
　全世界疫情，造成宅經濟愈來愈旺，因為真濟國家的人，根本無法度出門，
　結果形成幾个物件出來，你敢知？
＊食譜https://hackmd.io/app下載重倍(tîng-pē)、烘麭機仔加銷五倍
　這馬手機仔的app，做食的食譜下載重倍，烘麭機仔加銷五倍。
　因為逐家攏袂當出門，連麭佇厝內面家己做。
＊運動app佮運動家私
　袂當出去運動，運動app佮運動家私，嘛賣甲真好。
＊網路老師
　真濟學生袂當去學校上課，網路頂懸的老師需求，嘛愈來愈急。
＊線頂買物佮送到厝服務
　食的物件、用的物件，攏會當用。
這就是這馬宅經濟咱看著的現象，未來會按怎發展，真正無人知，愈來愈利便，宅經濟可能會愈來愈旺，嘛是無一定的代誌。

◎語詞：
．宅the̍h：讀較懸短音the̍h。「厝」的意思。
　　　例：國民住宅kok-bîn tsū-the̍h
　　　這个字這馬變有新的用法，咱臺語嘛愛綴咧行。
．宅經濟the̍h king-tsè
★踮佇厝裡，臺語有一寡詞，一寡講法，較口語的，就是踮一个所在，無出去。
．踮空tiàm-khang：例：我這禮拜攏踮空。
．踮跤tiàm-kha
．牢厝tiâu-tshù：著佇厝裡，袂振袂動，攏無出門。
　　　例：伊彼个人足牢厝的，攏無欲出來。
　啥物款的人，加一个名詞佇後壁。
．踮空龜tiàm-khang-ku
．涵空龜âm-khang-ku
　「龜」這个字加入去袂䆀，「龜」就是攏無欲振動，確實有成。
．涵空âm-khang：『涵洞』。
　較文言的講法嘛有：
．居家ku-ka/ki-ke：這是腔口差。嘛是無出來，牢厝。
◎居家戒爭訟，訟則終兇。
　Ku-ka kài tsing siōng, siōng tsik tsiong hiong.
　註：語出《朱子家訓》亦稱《朱柏廬治家格言》明末．朱用純，號柏廬。
　佇厝裡，莫冤家。若冤家就規个去了了，差不多是這个意思。
．厝宅tshù-the̍h：咱一般徛家，厝的部份。
．菜宅tshài-the̍h：菜蔬果子的厝。這馬攏講「菜園仔」；
　　　果子宅kué/ké-tsí-the̍h，果子園仔。
　　　古早有這个講法，按呢講足有人情味的，菜亻因兜，果子亻因兜。
　　　例：伊這个菜宅誠闊。
　　　　　伊這个果子宅種偌濟果子。
．某乜bóo-mí：例：某乜人，某乜店。
　　　有時仔，咱袂記得彼个所在，會講「某乜所在」。
　　　毋知欲按怎講，就「某也啥物」。
．蹽落去liâu--lo̍h-khì：若是御宅族(おたく otaku)，攏會較專注，抑是迷啥物代誌，
　　　彼个狀況(tsōng-hóng)，伊規个人蹽落去。
　　　例：我規个人攏蹽落去。
　　　啥物時間、精神，攏共開落去。
．郊戶kau-hōo：以早有糖郊、Ｘ郊，算是這馬的詞「商業公會」。
．趁「流擺lâu-pái」：時機，抑是機會的意思。
　　　例：趁這个流擺，咱就愛按怎按怎。
　　　例：真濟公司餐廳，趁這馬疫情的流擺，創新、整理一下，想一寡撇步。
．千家貨tshian-ka/ke-huè/hè：嘛會使講是「百貨」的意思。
　　　註：《台日大辭典》：日用ê必須品，日用品。
．膩瓤jī-nn̂g：就是咱上無愛的「油iû」，『脂肪』。
　　　這回疫情，逐家攏䖙(the)佇咧厝裡，毋通予身軀的膩瓤，愈來愈厚。
　　　攏無出門，可能相對較無運動，較無行振動，可能變做膩瓤較濟。
## [2020.06.04《台語講世事》：嘉年華](https://youtu.be/xQzJGXrIjBk)
。Carnival是廣東話「嘉年華」翻譯做漢字。
．翼股si̍t-kóo
．妝娗tsng-thānn
．Sàng-bà
．改舊換新kái/kué/ké-kū-uānn-sin，改kái/kué/ké
．『儘管』：咱較口語「就算講tō-sǹg-kóng」按怎
．『火辣』：遐薟遐落hiah hiam hiah làu
　　　「薟hiam」是按呢寫。
．落落去làu--lo̍h-khì，落落làu-làu
．小鬼仔殼siáu-kuí-á-khak

一、看新聞講臺語：王船出巡掛Sàng-bà　鬧熱袂輸嘉年華
◎翻譯
華語：誇張的羽毛裝飾
臺語：翼股毛妝娗聳颺颺
　　　Si̍t-kóo-mn̂g tsng-thānn tshàng-iānn-iānn.
．『羽毛』：講著「羽毛ú-môo」，若像攏是咧講『羽毛球』，「羽毛球ú-môo-kiû」，
　　　「羽毛ú-môo」算做嘛定定聽著。
　　　one more two more (uán-môo thú-môo)的「羽毛ú-môo」，
　　　咱遮用另外一个講法來講，逐家會當想看覓，看有通無通。
　　　咱講叫做「翼股毛si̍t-kóo-mn̂g/môo」，佇遮用「翼股毛」，
　　　特點就是「嘉年華」跳舞的隊伍，確實是敢若翼股擛咧擛咧，
　　　佇遮用「翼股毛」應該有通。
．翼股si̍t-kóo：咱食雞肉，譬如講「雞腿」逐家會曉講，雞跤，逐家嘛會曉講，
　　　「雞翼(si̍t)」這馬真濟少年人袂曉講，共逐家講一下，號做「翼股si̍t-kóo」。
．妝娗tsng-thānn：像嘉年華，逐家攏會妝甲足媠、足濟奇巧的打扮。
　　　「妝娗」有幾種意思，會當講有特別去妝，抑是用啥物物件，
　　　共一个原本看起來可能足普通的物件，共妝甲足媠的，抑是用「畫妝」的，
　　　攏會當講「妝娗」，無一定是「妝娗」人，「妝娗」物件嘛會使。
　　　例：咱欲來去佮查埔朋友見面，愛妝娗一下。
　　　例：厝內足久無摒掃，無整理，無來妝娗一下。
＊咱用形容，會用著一寡ABB、AAB等等的疊詞。
．聳颺颺tshàng-iānn-iānn：這是一个形容，舞者可能展開(thián)，
　　　毛颺颺，翼股毛佇遐飛飛飛，這款的形容。

華語：扭腰擺臀的森巴舞者帶頭
臺語：Sàng-bà舞者搖尻川花來𤆬頭
　　　Sàng-bà bú-tsiá iô kha-tshng-hue lâi tshuā-thâu,
．搖尻川花iô kha-tshng-hue：尻川咧搖，咱會講「搖尻川花」，
　　　「搖尻川仔花」，無一定愛有「仔á」，攏會使，加一个「仔á」，敢若較古錐。
．Sàng-bà：音譯，華語『森巴』嘛是音譯。
　　　咱照彼个音來揣一个倚音的寫法，就是羅馬字。
　　　咱寫外來語的時，頭一字嘛是愛照變調的規則，算是推論，
　　　Sàng-bà，bà第3調無問題，Sàng聽起來敢若第2調，推論本調應該第3調的寫法。
．𤆬頭tshuā-thâu：𤆬領逐家來做啥物動作，抑是做啥物代誌。
　　　毋是「帶頭tuà-thâu：欲共頭提來予你看。」，咱愛講𤆬頭。

華語：打破以往各科傳統
臺語：共祭典風俗改舊換新
　　　Kā tsè-tián hong-sio̍k kái/kué/ké-kū-uānn-sin
＊共舊的，用較新的方式來呈現，所以講改舊換新。
　祭典風俗就是傳統留落來的，才會講『打破以往各科傳統』。
．改舊換新kái/kué/ké-kū-uānn-sin：這是這句的重點。
　　　「改kái/kué/ké」這字有足濟讀法，「改kái」是文言音。
　　　這馬逐家攏較了解「改kái」的音，定定講，例：改變。
　　　煞顛倒較無咧講白話音，白話音閣有腔口差「改kué/ké」。
　　　例：你毋通佇遐改來改去(kué/ké-lâi-kué/ké-khì)。
　　　以前攏會按呢講，這馬真正攏變「改kái」，
　　　予文言音占贏(tsiàm-iânn)，真奇怪，應該白話音較捷用才著。
　　　表示咱的環境，傳統有咧講臺語的風俗，煞變做沓沓失去，
　　　就變做講用敢若袂輸文言音，因為佮漢語、華語的音較成，所以會感覺敢若較捷看著。
　　　咱愛有救白話音的運動。

華語：儘管舞者的服裝，沒有嘉年華火辣，
臺語：就算講舞者的穿插，
　　　Tō-sǹg-kóng bú-tsiá ê tshīng-tshah,
　　　無嘉年華遐薟遐落。
　　　bô Ka-nî-huâ hiah hiam hiah làu.　
．『儘管』有的人可能看字唸，『即使』嘛是仝款，毋通按呢。
　　　咱較口語「就算講tō-sǹg-kóng」按怎，咱都有物件通講。
　例：就算講咱兩个人穿甲敢若嘉年華，但是咱無嘉年華的身材。
．穿插tshīng-tshah：逐家較知影矣。
．遐薟遐落hiah hiam hiah làu：
　　﹡薟hiam：對臺語來講，是食的物件的「薟hiam」，氣味，食，抑是鼻，
　　　攏有可能予你感覺「薟hiam」。
　　　算是華語轉來的『辣』，華語對英語轉的，發展出來的。
　　　若照意思，有通，對咱臺語來講，本來無用佇形容穿插。
　　　「薟hiam」就是按呢寫。
　　﹡落làu：就是「衫落坐落坐(làu-tshē)，強欲落(lak)落來矣」，
　　　抑是啥物物件強欲落出來矣。
　　　例：你穿甲傷落矣。
　　　例：褲欲落落去(làu--lo̍h-khì)矣。
　　　例：穿甲按呢落落(làu-làu)。
　　　例：毋通穿傷落。

華語：東西合璧的目的，是要吸引年輕族群，一起參與。
臺語：東西文化透濫的目的，
　　　Tang-sai bûn-huà thàu-lām ê bo̍k-tik/ti̍k,
　　　是欲唌少年人。
　　　sī beh siânn siàu-liân-lâng.
．『合璧』：透濫thàu-lām，東方的佮西方的透濫做伙。
．目的bo̍k-tik，bo̍k-ti̍k，攏有人講。
．唌siânn：這字足重要的，足臺語氣的。
　　　例：好食的雞卵糕佇遐，欲唌我食的款。
　　　例：你捀好看閣好食的雞卵糕，來共我唌。

二、講予你知：嘉年華
「嘉年華」這个詞，相信逐家袂生份，新聞內面定定攏會聽著。這馬咱臺灣四界攏會辦嘉年華，有的是展覽，有的是活動，甚至連欲揣頭路，攏會辦一个「揣頭路嘉年華」。
嘉年華到底是啥物物件，到底是活動，抑是展覽，抑是啥？
◎「嘉年華」這个詞對佗來
＊英語的Carnival
　「嘉年華」就是Carnival伊的音，翻譯做漢字寫出來的。
　若是唸華語『嘉年華』，佮Carnival就是差誠濟。
＊「嘉年華」是廣東話翻譯做漢字
　原來彼當時，廣東彼个所在的人，廣東話翻譯做漢字的。
　所以咱用臺語來唸，臺語佮廣東話有淡薄仔成，
　「嘉年華Ka-nî-huâ」佮Carnival淡薄仔成。
＊嘛號做：狂歡節、謝肉祭
　對漢字來看「嘉年華」這三字，看袂出來到底是啥物意思，
　Carnival，就是狂歡的意思，所以嘛有人翻譯做「狂歡節」，抑是謝肉祭。
＊字源是拉丁文「向肉告別」
　因為Carnival的字源，是拉丁文「共肉告別」的意思。

◎源頭是宗教的意義
＊新約聖經內底耶穌的故事
　彼个時陣，耶穌去予魔鬼掠去，魔鬼共伊囥佇郊外，有40工攏無欲予食，
　但是耶穌猶是無去予魔鬼影響著。
＊閣活節是春分以後月圓的頭一个禮拜
　一寡信徒為著欲感受耶穌這款感覺，基督教有一个「閣活節」，
　是每一年的春分以後，月圓的頭一个禮拜。
＊閣活節的四十工前，開始齋戒佮懺悔
　閣活節的四十工前，天主教、抑是基督教，亻因就開始為著欲感受耶穌的感覺，
　欲佮耶穌仝款，無欲食，齋戒佮懺悔40工。
＊齋戒進前，先辦各種宴會來消敨
　40工落落長，所以佇40工進前，逐家來辦幾个仔宴會，先來消敨一下。
＊歐洲國家逐年佇2~3月，透過活動展現文化特色
　慢慢仔變做一个傳統，這馬歐洲的國家，逐年佇2~3月，也就是「閣活節」進前，
　40幾工的時陣，會透過活動，來辦Carnival「嘉年華Ka-nî-huâ」，展現in文化的特色。

◎德國『科隆』、比利時『班什』嘉年華
　全世界有名、歐洲四大嘉年華，頭一个是德國『科隆』。
＊女人狂歡節的一禮拜是大齣頭
　「科隆kho-liông」這个所在的嘉年華，有一个特色，有一个號做「女人狂歡節」，
　規禮拜攏是大齣頭，佇規禮拜，查埔人行佇路裡，攏愛注意，因為查某人會提鉸刀，
　共你的ne-kut-tái鉸斷，等等的這寡活動。
＊遊行、掖糖仔、燒(稻)草人
　上尾仔，嘛會有一寡遊行，遊行當中會掖一寡糖仔，上尾一工，會燒稻草人，
　意思是這幾工，逐家遮爾歡喜，罪過，罪過，所以用稻草人來代替，共燒燒咧。
＊比利時班什嘉年華上尾工上唌目
　比利時班什(Pan-si̍p)的嘉年華，這嘛足有名的，亻因的特色嘛是辦遊行。
＊入選的成千个查埔人妝做Gille（戇人）穿仝服裝
　，遊行內面有遴選亻因遮所在，成千个查埔人，妝做一个型，
　一个特別的服裝Gille，這个人就是戇人的意思。
＊頭戴羽毛帽仔、跤掛鈴仔咧送柑仔
　亻因會戴羽毛的帽仔，跤嘛會掛一寡鈴仔，規路咧送柑仔。
　因為彼个所在，柑仔足少、足罕得，就是送珍貴的物件予朋友。

◎世界三大嘉年華
＊意大利威尼斯慶祝戰贏，結合宗教定節日
　意大利威尼斯的嘉年華，非常有名，亻因攏會掛小鬼仔殼。
　因為亻因戰爭贏了後，辦這个活動。
＊掛小鬼仔殼的意義，是無分階級做伙慶祝
　但是彼个時陣，有階級的分別，有的人階級無適合出來𨑨迌，
　所以逐家掛小鬼仔殼，就是予你無分階級，逐家會當做伙慶祝。
＊法國尼斯嘉年華的特色是大身尪
　法國尼斯嘉年華，真大的特色，規个遊行有一个大身尪仔佇咧。
＊花車之戰遊行嘛真受歡迎
　花車之戰遊行，規路分花、擲(tàn)花，花擲來擲去，送予別人。
＊世界三大的巴西里約嘉年華，融合歐洲、美洲、非洲
　閣來是逐家所知影的，會跳Sàng-bà舞的巴西里約嘉年華，
　咱定定嘛會看著，逐家跳舞跳甲真歡喜。
　亻因上大的特色，是結合歐洲、美洲、非洲各種的文化特色，融合鬥陣的嘉年華。

◎語詞：
．齋戒tsai-kài：食齋，食早齋，意思就是愛食菜，莫食臊(tsho)。
　　　戒kài：主要是一寡戒律、戒命，守一寡規矩。
　　　咱一般看著「齋戒」，攏是囥佇佛教，抑是道教，今仔講的這，應該是較屬於西方的教，
　　　譬如講基督教，抑是天主教，其實攏有，只是無一定逐个所在講法仝款。
　　　可比講你的食物，愛有啥物款的規矩，你的活動，你的生活，愛有啥物款的規律，
　　　就號做「齋戒」。
．懺悔tshàm-hué：讀音的問題，「懺tshàm」合喙，愛注意一下。
．消敨siau-tháu：有足濟物件會當消敨。
　　　例：壓力會當消敨。
　　　　　怨恨會當消敨。
　　　若欲解除啥物物件，有的人用佇去便所，嘛會講去消敨一下。
　　　「消敨」就是按呢寫。
．大齣頭tuā-tshut-thâu：就是「重點」的意思。
　　　例：佇德國，規禮拜的「女人嘉年華」是亻因的大齣頭。
．唌siânn：欲吸引你注意。
．弄lāng：其中一个意思「戲弄hì-lāng」。
　　　例：你欲共囡仔弄一下無？
　　　有時仔用佇一寡動詞，閣佮咱這馬欲講的意思，無啥仝。
　　　若準講較針對欲吸引，你可能做一寡動作，愛對方來感受，這嘛會當講用啥物貨弄，
　　　佇這个咱講的嘉年華，意思較成。
　　　例：囡仔愛弄才會巧。
．ne-kut-tái：外來語，對日語吸收來的，所以照日語來翻彼个音。
　　　仝款用咱讀出來的音，去推論若欲用臺羅寫，按怎人較讀會出來這个音，就照按呢寫。
　　　算是咱的臺語詞，已經吸收足久矣。
．大身尪tuā-sian/sin-ang ：法國的嘉年華內面，有足大身的尪仔。
　　　「大身尪」佇咱臺灣的祭典內面，嘛有像七爺、八爺彼種。
　　　例：這「身sian/sin」尪仔足大「身sian/sin」的。
　　　毋是神仙的「仙sian」，是身軀的「身sian/sin」。
．稻草人tiū-tsháu-lâng vs. 草人tsháu-lâng：
　　　「稻草人」佮「草人」其實仝款，
　　　可能有欲強調是用稻草做的，有可能用其它草仔做的。通稱就是「草人」。
　　　稻草人是草人，草人無一定是稻草人。
　　　毋但佇田內面，會“立在(tshāi)”一个稻草人，為著欲趕鳥仔，
　　　有當時仔，看電視，用細身的草人，作法時，敢若共人咒讖(tsiù-tshàm)用的。
　　　稻草人是“立在(tshāi)”佇田內面，一般咱是攏講這種。
　　　古早敢若無人講稻草人，攏講草人。
．小鬼仔殼siáu-kuí-á-khak：這馬敢若真少人講，一般叫是照漢字讀「面具」，
　　　咱過去口語是「小鬼仔殼」，「掛一个小鬼仔殼」，較古錐，愛共抾轉來用。
．小丑仔siáu-thiú-á：用文言音讀「小siáu」，無讀「小sió」。
## [2020.06.11《台語講世事》：臺灣“足百”(peh)山活動](https://youtu.be/wMl3mpg4dVo)
．使喉聲sái âu-siann
★一般生活上，「使sái」用足濟位。
．大母X tuā-bú-??
．都 to vs. 攏lóng
．都 to vs. 就tō
◎“足百”(peh)山的定義
◎山的講法：
．弄險lāng-hiám：一般華語『探險』，臺語有一个講法叫做「弄險lāng-hiám」。
．𣮈頭山khu̍t-thâu-suann
．內山斗底lāi-suann-táu-té/tué

一、看新聞講臺語：“足百”(peh)聖稜線心不安　山友相楗度艱難
◎翻譯
華語：山友們拉開嗓門，放開心胸，大聲地唱歌。
臺語：山友使喉聲，敨心肝，
　　　Suann-iú sái âu-siann, tháu sim-kuann,
　　　大母聲唱歌。
　　　tuā-bú-siann tshiùnn-kua.
．使喉聲sái âu-siann
★一般生活上，「使sái」用足濟位。
．使目尾sái-ba̍k-bué/bé：查某囡仔共人「使目尾」。
　　　無一定查某囡仔，逐家攏會當「使目尾」。
．使暗步sái àm-pōo：共人害，用較暗、較無光明的一寡手段。
．使性地sái-sìng-tē/tuē：這个逐家都較會曉。
．使三角肩sái sann-kak-king：一般攏是講敢若誠囂俳(hiau-pai)，
　　　彼个肩胛頭，行路按呢，誠囂俳。
　　　註：《台文華文線頂辭典》：『大搖大擺』。
．曷使a̍h-sái：曷使講？這曷使驚？這曷使按怎？
．敨tháu：敨開、敨放的意思。
．大母聲tuā-bú-siann：佮「阿母a-bú」無關係，是強化「大」。
．大母漢tuā-bú-hàn：講伊高長(ko-tshiâng)大漢，會講「大母漢」。
．大母四界tuā-bú-sì-kuè：表示逐四界、規四界。

華語：挑戰聖稜線很艱辛，爬到鞋子都開口笑。
臺語：挑戰聖稜線真硬篤，
　　　Thiáu/Thiau-tsiàn Sìng-lîng-suànn tsin ngē/ngī-táu,
　　　“足百”甲鞋仔都開喙。
　　　peh kah ê/uê-á to khui-tshuì.
． 挑戰thiáu-tsiàn，thiau-tsiàn：兩个音攏會使。
．硬篤ngē-táu，ngī-táu：這腔口差，攏會使。
．“足百”peh：“足百”山的“足百”，按呢寫。
　　　華語『爬山』，彼字臺語漢字是「爬pê」，毋是「peh」，
　　　咱peh山是用peh的，毋是「爬pê」的，一定愛好好解說。
　　　例：“足百”(peh)山，“足百”(peh)樓梯。
　　　有彼號起落，對下跤到頂面，頂面到下跤，這就是“足百”(peh)。
　　　例：佇塗跤爬tī thôo-kha pê
　「“足百”peh」佮「爬pê」，咱會去予華語影響，字是無仝款的。
　　　逐家愛知影，啥物是用→“足百”(peh)的，啥物是用→爬(pê)的，
　　　毋通寫毋著字，意思差大碼。
．都to vs. 攏lóng：會當用一个簡單的想法來想，
　　　攏lóng，一定全部按怎，無一个減的。
　　　都to，共想做佮華語的『都』是仝意思，到這个程度。
．都to vs. 就tō：因為華語無第7調，這種調，這種音，
　　　一般若是較袂曉講，較無咧講臺語的人，伊會變做講
　　　「“足百”甲鞋仔tō開喙。」變做「就tō」仝音。這兩字用法無仝款，咱這馬定定會花去。

華語：鞋子陸續都出狀況，束帶、黑色膠帶，甚至連鐵絲，都成為搶救工具。
臺語：束帶、theh-phuh、鉛線，
　　　Sok-tuà, theh-phuh, iân-suànn,
　　　攏捎捎來鬥救鞋。
　　　lóng sa-sa--lâi tàu kiù ê/uê.
．束帶sok-tuà
．theh-phuh：『膠帶』若是莫分足幼的來講，咱一律講theh-phuh，
　　　抑是「黏帶liâm-tuà」嘛是有人講。
　　　theh-phuh是外來語，音譯，對英語轉日語式，咱才閣吸收。
．捎sa：嘛是「提the̍h」的意思，有小可無仝，
　　　一般是較緊、較凊彩的速度，抑是較緊急的狀況，彼款提。
　　　例：足緊急的，我烏白捎，烏白捎，捎捎來。
﹡目眉毛捎袂起。Ba̍k-bâi-mn̂g sa bē/buē-khí
　　　這應該是古早的講法，這咱這馬聽袂著這个講法矣。
　　　意思是「敢若對人無真看上目，看在眼內」彼種形容。

華語：爬到搖頭，直呼下回不敢了。
臺語：“足百”甲幌頭叫毋敢。
　　　peh kah hàinn-thâu kiò-m̄-kánn.
．叫毋敢kiò-m̄-kánn：看起來敢若足簡單普通，一般臺語定咧講。
　　　因為這種的華語敢若較少，無這款結構。
　　　例：食免驚tsia̍h-bián-kiann
　　　　　喝袂行huah-bē/buē-kiânn
　　　　　拍無哀phah-bô-ai

華語：聖稜線不走回頭路。
臺語：行聖稜線無咧踅翻頭。
　　　Kiânn Sìng-lîng-suànn bô leh se̍h huan-thâu.
．踅se̍h：可能有一个中心點，抑是有一个範圍，
　　　佇四箍輾轉(sì-khoo-liàn-tńg)行、走，抑是振動。
．踅se̍h vs. 轉tńg：。
　　　轉tńg：一般來講，你有咧振動，無一定像踅按呢，
　　　有圍一个中心，抑是有啥物範圍，無一定，身軀可能有咧轉，譬如講轉90度、180度等等。
　　　例：我欲來去外口踅踅咧。
　　　　　彼个輪仔佇遐一直轉，轉袂停。家己踅圓箍仔號做轉。
．翻頭huan-thâu：可能有時仔受華語影響，會講「回頭」，咱較臺語氣的講法，是「翻頭」。

華語：在這條壯麗的巨稜之上。
臺語：佇這逝lè-táu的大山陵/岭面頂。
　　　Tī tsit tsuā lè-táu ê tuā suann-niā bīn-tíng.
　　　咱一般講山，若毋是講「山」，就是「山嶺suann-niá」，
　　　遮用「山陵/岭suann-niā」的講法。
　　　有人認為是「特定講上尖的『山脊』的所在」，
　　　嘛有人講因為「尖」，會當共當做表示「山」的意思。
．山陵/岭suann-niā：因為漢字有替代用字，有無仝的寫法，這馬較捷看著的是這兩種寫法。
　　　咱普通時免去到山頂，嘛會當看著一寡「陵/岭niā」，
　　　例：湧陵íng-niā：海湧過來予你看著敢若上懸的所在。
　　　　　魚陵hî-niā：『魚鰭、魚背』的部份。上懸的所在。
　　　　　牛陵gû-niā：牛的尻脊骿(kha-tsiah-phiann)上懸的所在。
．lè-táu：古早攏有咧講，一般本來較形容一个地頭，較大的所在，有可能是風景區，
　　　嘛會當講建築物，或者是較大的所在，會當講真氣派，起甲真好看，真lè-táu。

二、講予你知：“足百”(peh)山
◎“足百”山的定義
　毋管按怎“足百”，咱攏號做「“足百”山」，其實“足百”山會當按照“足百”幾工，
　欲“足百”的彼个山地形無仝款，有無仝的講法。
　以幾工佮地形無仝，分做：
＊hiking：一工會當行來回的低海拔活動
　　　譬如講咱這馬講的「步道」等等，屬於hiking的部份。
＊trekking：地形較複雜，1~2工的活動
　　　有懸懸低低，無仝款的地形，較複雜，可能一工無法度來回，
　　　有可能1工到2工的活動，這種號做trekking。
＊backpacking：行3~5工的活動
　　　共你的揹仔揹咧，這是愛行3工至5工的“足百”山。
＊mountaineering：有冰、雪、岩石地形相濫的“足百”山活動
　　　這種“足百”山，愛“足百”著有冰、落雪、岩石等等，這款地形相濫的“足百”山活動，
　　　這種上困難的。
　　　按呢看起來，咱臺灣可能只有佇寒天，有一寡山有積雪，才會當符合上尾一種。
以上是普遍的分類。

◎山地的管制
＊總督府為著探勘佮畫地圖的需要
　臺灣的山遮爾濟，過去的政府對山的管理，是管制的。
　一開始，臺灣開始“足百”山，是佇日本時代。
　總督府為著欲探勘，佮畫地圖的需要，才入去山內面。
＊「臺灣山岳會」到「臺灣省體育會山岳協會」
　若是佇民間，一般人想欲“足百”山，就愛參加有特別許可的團體，
　譬如講日本時代，號做「臺灣山岳會」，到中華民國政府來到咱臺灣，
　改做這个號做「臺灣省體育會山岳協會」。這寡攏差不多有官方性質的社團。
＊救國團中國青年“足百”(peh)山協會
　這寡是半官方的團體，愛得著特別許可的團體，才會當入山。
＊1950年代開始探勘3000公尺以上懸山
　慢慢仔開始，有一寡民間的團體成立，會使講是佇1950年代，
　咱臺灣人開始探勘3000公尺以上懸山。

◎1970年代
＊『中央山脈大縱走』佇七彩湖會師
　到1970年代，累積的資料已經非常濟。
　這个時陣，咱臺灣的“足百”山界，有一个足大的活動，非常重要，號做『中央山脈大縱走』，
　這是按照華語來講。
　共過去20年，逐家所收集的資料，做整合，來辦這个活動，對中央山脈，北爿到南爿，
　攏共行一逝，這非常長，彼个時陣，分做兩隊，一隊落南，一隊上北，佇中央七彩湖會師。
＊“足百”山記錄佮山岳圖說資料，已經真完整
　這个活動非常重要，共“足百”山的記錄佮山岳圖說的資料，攏真完整呈現，
　而且閣開發出這種的行法。
＊『北三段縱走』→『南三段縱走』→百岳
　真濟“足百”山的人攏知影，這足困難的就是『北三段縱走』，『南三段縱走』。
　尾仔，因為這款經驗，選出咱臺灣一百粒3000公尺以上懸山，
　就是真濟人可能當咧行這號做「百岳」。
＊3000公尺以上：懸山；中級山；1500公尺以下：郊山
　因為這个活動，咱臺灣開始有足清楚的定義，
　3000公尺以上，咱就號做「懸山」；
　1500公尺以下，咱就號做「郊山」；中央的號做「中級山」。
　這是這馬上蓋清楚的分類。
＊2003年行政院體委會（體育署）發表小百岳
　行百岳3000公尺以上，實在是傷歹行，僫行，無體力，因為有真濟人攏是按呢。
　佇2003年，行政院亻因有發表一个「小百岳」，你行無遮懸，
　你會當對較細粒的山開始來行起，真濟人這馬攏咧行這。

◎山林解禁
＊過去政府用「封山」管理兼阻擋
　過去的「山」有禁止的效果，過去政府用「封山」做法來管理，講「管理」是好聽，
　其實是欲阻擋咱逐家入去山內。
＊鼓勵民眾親近山，知影通欣賞佮珍惜
　日本是咱臺灣的10倍大，但是佇日本，3000公尺以上的懸山，才20幾粒，
　咱臺灣有268粒3000公尺以上的懸山，遮爾濟。
　對咱臺灣人來講，“足百”山是一个真好的活動，咱有真好的條件。
　因為過去這款的管理態度，最近行政院已經發布，這馬咱臺灣的山林欲解禁矣，
　就是為著欲鼓勵民眾會當親近山，知影咱有遮濟寶山通欣賞，知影會當珍惜。
＊國防必要、地形破碎、原住民聖地、保育地，其他解禁
　包括國防必要、地形破碎、原住民聖地、保育地等等，除了這寡條件以外的山林，
　這馬攏解禁矣。
＊提高山厝、步道、通訊的服務品質
　解禁的意思，就是無欲阻擋你，政府會當提懸山厝、步道，甚至“足百”山的時，通訊的服務，
　會當提懸品質。
＊做好準備、自主管理、承擔責任
　這馬的政策是按呢，政府做好服務，嘛是提醒咱所有的臺灣人，去山內，愛家己做好準備，
　政府無欲共你管甲夠夠夠，咱愛家己自主管理，看咱的體力有夠無，咱愛承擔責任。
　這寡攏是自細漢，透過教育共逐家講的。
　這就是咱這馬臺灣「"足百“山」簡單的情形，講予逐家了解。

◎語詞：
．探勘thàm-khàm，thàm-kham：兩个音，大部份聽著kham較濟。
　　　探勘thàm-kham，兩字攏愛合喙，這是讀音的問題。
．相楗sio-kīng：就是互相支持的意思。
　　　例：咱去“足百”(peh)山的時陣，確實愛相楗。
★山的講法：
．山脈suann-me̍h：有人講「一支」山脈，嘛有人講「一條」山脈。
　　　因為比較上，敢若較長，長長的感覺。
．山陵/岭suann-niā
．山嶺suann-niá：會當講「一支山」爾，或者是幾若支做伙，有山有嶺連做伙。
　　　到底欲算一支，抑是幾若支，攏會使。
　　　欲講「規片的山嶺」，這馬攏是啥物款的花、樹仔、景色，抑是欲講「一支山嶺」。
．山厝suann-tshù：這馬若去“足百”山，有當時仔愛過暝，就是愛蹛佇「山厝」。
．舊漚舊臭kū-àu-kū-tshàu：真正足破爛、足舊的，傷久無去整理。
　　　例：這馬有一寡山厝，無整理，舊漚舊臭。
．弄險lāng-hiám：一般華語『探險』，咱就講→探險thàm-hiám。
　　　臺語有一个講法叫做「弄險lāng-hiám」，共抾轉來用。
．𣮈頭山khu̍t-thâu-suann：𣮈khu̍t，本來意思是毛足短足短足短。
　　　𣮈頭khu̍t-thâu：無啥樹仔，無啥物物件佇頂面，敢若袂輸禿頭。
．崩山pang-suann：佮華語的詞序『山崩』倒反。
．水崩山tsuí-pang-suann：這就是一般講的「塗石流」，
．內山斗底lāi-suann-táu-té/tué：這是一个形容，表示這个所在，深山林內，足無好行。

三、俗諺 sio̍k-gān
◎欲好，龜“足百”壁；欲敗，水崩山。
　Beh hó, ku peh-piah; beh pāi, tsuí-pang-suann.
　若欲好，袂輸龜“足百”壁，遮爾仔慢，沓沓仔“足百”；
　若欲敗，連鞭水崩山。
## [2020.06.18《台語講世事》：太陽能發電](https://youtu.be/3PHU5IW_TzM)
★果子足濟用「刣thâi」的。
★看著(khuànn-tio̍h#)按怎 = 看甲(khuànn kah)按怎
　　　不管腔口，著(tio̍h)算無變調。
　看著khuànn--tio̍h = 華語『看到』，著(tio̍h)頭前有輕聲符號。
　註：會當參考[2020.03.26《台語講世事》：植物肉](https://youtu.be/P90-ZGAj2tQ?t=407)　6：47
　　　https://youtu.be/P90-ZGAj2tQ?t=407
　　　內底有解說「著tio̍h」，愛讀本調，佮讀變調的無仝意思。
．細kâinn塊仔
．貯水té/tué-tsuí：漢字愛會曉寫。
．儉水khiām-tsuí：漢字愛會曉寫。
．核能hi̍k-lîng
．沙漠sua-bo̍k：這是讀音的問題。
．實捅捅tsa̍t-thóng-thóng　 ←→　空閬閬khang-lòng-lòng　
．狹櫼櫼e̍h/ue̍h-tsinn-tsinn　←→　闊朗朗khuah-lóng-lóng、闊莽莽khuah-bóng-bóng
．冗霍霍(līng-hòo-hòo)表示佮「絚ân」的對應。
．thênn/thînn目∥thênn/thînn ba̍k

一、看新聞講臺語：用火龍果來發電　嘉義大學風神展
　有夠厲害，提咱臺灣的果子嘛會當發電。
　這馬足濟有創意的發電方式咧試，未來的生活值得咱逐家期待。
◎翻譯
華語：剖面看起來，讓人垂涎欲滴的紅肉火龍果。
臺語：紅肉種的火龍果，共刣開，
　　　Âng-bah-tsíng ê hué-liông-kó kā thâi--khui,
　　　看著予人癮甲流瀾。
　　　khuànn-tio̍h# hōo lâng giàn kah lâu-nuā.
．刣thâi：火龍果是用「刣thâi」的，主要是欲講『剖面』，因為若講共「刣」開，
　　　看著彼个面，咱強調這个狀況。
　　　刣的時陣，頭一刀就是中央共破開(phuà--khui)，當然欲用「切」的，毋是講袂使，
　　　強調共伊較澈底(thiat-té/tué)予你看著彼个面的彼種形。
　　　「切」無一定切甲完全，「刣」一定是規个有足清楚的面予你看著。
★果子足濟用刣(thâi)的，咱較捷用著的可能是刣西瓜、刣王梨。
　椰子用「破phuà」的，感覺愛閣較大力。
　會使講你無用刀仔共伊「刣」，抑是共伊處理，就無才調食。
★看著(khuànn-tio̍h#)按怎 = 看甲(khuànn kah)按怎。
　不管腔口按怎，著(tio̍h)算無變調，看(khuànn)愛變調。
　看著khuànn--tio̍h = 華語『看到』，著(tio̍h)頭前有輕聲符號，看(khuànn)無變調。
註：會當參考[2020.03.26《台語講世事》：植物肉　6：47](https://youtu.be/P90-ZGAj2tQ?t=407)
　　https://youtu.be/P90-ZGAj2tQ?t=407
　　內底有解說「著tio̍h」，愛讀本調，佮讀變調的無仝意思。
．癮甲(giàn kah)按怎：癮giàn，就是比「興hing」閣較嚴重。足癮的，就是足想的。
　　　癮甲流瀾giàn kah lâu-nuā：就是予你一直想欲食。
　　　其它的物件嘛會當「癮giàn」，
　　　例：癮咖啡、癮酒、癮薰、癮檳榔、癮上網，等等。
.
華語：切成小塊，加入酒精萃取出花青素。
臺語：切做細kâinn塊仔，摻酒精，
　　　Tshiat tsò/tsuè sè-kâinn-tè-á, tsham tsiú-tsing,
　　　落去抽出花青素。
　　　lo̍h-khì thiu-tshut hue-tshenn/tshinn-sòo.
．細kâinn塊仔：「足細塊」的意思，kâinn，是「一个」的意思。
　　　例：伊一kâinn佇遐，毋知咧創啥。
　　　敢若是「一个」的較無遐正經，抑是正式，半耍笑的講法。
　　　「一箍」、「一kâinn」的意思。
．「落去lo̍h-khì」按怎：嘛會使講「去khì」按怎，但是，加一个「落lo̍h」，
　　　較有(臺語)氣佇咧遐。
　　　例：咱愛全精神「落去」創啥物代誌。
.
華語：靜置一段時間後把它取出來。
臺語：頓一下了，共提出來。
　　　Tǹg--tsi̍t-ê liáu, kā the̍h--tshut-lâi.
．頓tǹg：有幾若種意思，幾若種用法。
　　　佇遮的用法「囥一段時間」，袂輸共伊提起來，頓咧桌頂。
　　　咱一般可能會共湯、菜、飯，小頓一下，等伊涼的意思。
　　　例：這煮好矣，我先共提去桌頂頓一下，小等逐家才來食。
　註：《教典》頓：6.動詞：『指放置重物於平臺上。』
.
華語：一般常見的矽基材，或是薄膜式太陽能電池。
臺語：四常看著的si-lí-khóng底，
　　　Sù-siông khuànn--tio̍h ê si-lí-khóng-té,
　　　抑是薄膜式的太陽能電池。
　　　iah-sī po̍h-mo̍oh-sik ê thài-iông-lîng tiān-tî.
．四常sù-siông：定定按怎，often，咱會當講「四常」。
★四常，有幾若个講法：
．定定tiānn-tiānn：可能這馬上濟人講。
　　　例：這間店我定定去。
．不時put-sî：
　　　例：這代誌伊不時嘛咧講。
．常在tshiâng-tsāi，tshîng-tsāi：可能較少人講矣。有兩種音，腔口差。
　　　例：我常在佇電視看著你呢！
．時常sî-siông：嘛會使用，這咱臺華共通(的語詞)。
．si-lí-khóng：這是外來語silicone『矽利康』，對音譯來的。
．底té：表示「一種基礎」的意思。基本是按怎，基礎是按怎。
　　　例：譬如講咱去食餐廳，我欲去彼間餐廳是『XX風』，
　　　　　『意大利風』敢會使講「意大利底」？
　　　但是這有兩款，「意大利底」有可能是講
　　　這个頭家可能「意大利」是伊的故鄉，抑是伊的國家，
　　　若是講『XX風』，咱可能會講「su-tài-luh」(スタイルstyle)
　　　啥物款「su-tài-luh」，這有小可無仝。
　　　例：這个菜是意大利底的。就是意大利料理的方式去處理。
．薄膜po̍h-mo̍oh，po̍h-mooh：讀音的問題，較無遐懸的嘛有。
　　　例：一重膜tsi̍t-tîng mo̍oh。
.
華語：以天然染劑取代人工染劑，才會受到國際期刊的重視。
臺語：共換做天然的染劑，
　　　Kā uānn tsò/tsuè thian-jiân ê ní-tse,
　　　毋才予國際期刊看有上目。
　　　m̄-tsiah hōo kok-tsè kî-khan khuànn ū tsiūnn-ba̍k.
．染ní：染頭鬃（毛）ní thâu-tsang（mn̂g/moo）。
　　　染ní（白話音），閣有一个文言音jiám/liám。用文言音來講：
　　　例：汙染u-jiám/liám
　　　　　傳染thuân-jiám/liám
　　　　　染病jiám/liám-pēnn/pīnn
．上目tsiūnn-ba̍k：就是有去注意著，看有上目，抑是看無上目。
.
◎俗語
　白白布染到烏。Pe̍h-pe̍h pòo ní kàu oo.
.
二、講予你知：太陽能發電
　講著電，全世界攏仝款，咱人類這馬無電，真正無法度生活。但是電對佗位來？
　今仔日欲來講其中一項：太陽能發電。
◎臺灣電力的來源
＊Gá-suh佮塗炭占一半
　臺灣電力來源，當然非常濟，逐家知影遮濟的電，遮濟來源，上重要的是gá-suh佮塗炭。
　gá-suh佮塗炭，這兩項加起來，占咱臺灣電力來源一半遮濟，
＊空氣汙染、地球暖化，燒過的水排入海，影響海洋生態
　gá-suh佮塗炭的（電力）來源，有真濟問題佇咧，包括會造成空氣汙染、地球暖化，
　燒塗炭的時陣，燒過的水排入海，嘛會影響海內面的海洋生態，種種的問題。
＊核能電量占無濟，有核廢料汙染
　敢毋是有核能發電？核能發電的問題閣較濟。
　核能發電的電量，佇咱臺灣電力來源占無講真濟，閣有核廢料汙染等等的問題。
＊太陽能發電量，一年一年咧提升
　慢慢仔，咱臺灣愈來愈重視綠能發電，包括太陽能發電，而且發電量是一年一年提升當中。
.
◎太陽能發電兩種方式
　太陽能發電，是真深的學問，分兩種足專業的名詞，簡單來講。
＊聚光式太陽能熱發電
　◇愛有夠額土地佮日頭光→沙漠
　　頭一項，需要愛有夠額的土地佮日頭光，才會合。這款方式，大部份囥佇沙漠，
　　但是咱臺灣無沙漠。
＊光伏技術
　◇基本裝置是太陽能電池→較合臺灣
　　這種技術，就是咱這馬看著真濟人的厝尾頂，會囥這種太陽能電池的枋，較合咱臺灣使用。
.
◎太陽能發電的優點
＊太陽才消磨本身能量2%，幾十億年袂變
　太陽這馬才開著伊本身能量的2%爾，按照科學家講的，閣幾十億年攏袂變，
　所以是一个真正好的來源。
＊無空氣汙染，袂加添溫室效應，無核輻射
　太陽能無空氣汙染，嘛袂加添溫室的效應，無核輻射的問題。
◎太陽能發電的欠點
＊安裝、技術、設備真傷本
　有淡薄仔貴，譬如講裝電池的時，有無仝的條件，成本就無仝。技術嘛足需要，設備攏真傷本。
＊受天氣影響
　因為需要太陽，所以受著天氣的影響足深，若是落雨天，抑是暗時，就無法度發電。
＊電枋的製造佮回收會造成汙染
　需要發電彼个電池的電枋，咧做佮回收的時陣，會造成汙染。
　這个問題嘛是愛來解決才會使。
.
◎臺灣的太陽能發電發展
　到目前為止，無任何發電的方式，是一點仔汙染都無。
　所以講起來，太陽能發電應該算是上蓋環保的一種。
＊2000年開始，捒：大型、厝頂型、塗跤型
　臺灣佇2000年，長長短短，開始捒太陽能發電，欲發展太陽能供電站，有大型的，
　囥佇厝頂型的，有塗跤兜型。
＊厝頂型因為法規放冗發展較緊
　厝頂型是囥佇逐家的厝尾頂，只要法規來放冗，發展會較緊，塗跤型的會較慢。
＊塗跤型牽涉農業、生態土地有爭議
＊2019年熱天中晝的太陽能發展超過核能
　對2000年開始捒，時間過了真長，這三五年才開始有一寡發展。
　2019年，熱天中晝的太陽能發展(電？)，已經超過核能，
　按呢看起來，臺灣的太陽能發展，慢慢仔向前行矣。
＊已經有齊全的太陽能電枋回收清理體系
　閣有一个好消息，就是咱這馬已經有齊全的太陽能電枋回收清理的體系，完全建立起來矣。
　咱會當好好仔做伙期待，咱臺灣太陽能發電，會愈來愈好用。
.
◎語詞：
．gá-suh：外來語gas音譯→『瓦斯』，寫法就是按呢。
．ga-sóo-lín：外來語gasoline音譯→『汽油』。
．臭油tshàu-iû：鼻起來氣味無好，足臭的油，愛燒炭。
　　　這馬較無咧用的油，臭油是以前的人提來點燈，
　　　會寒的時陣，可能日本人較濟，厝內面用彼來焐燒的。
．貯水té-tsuí，tué-tsuí：有腔口差。漢字愛會曉寫。
　　　例：提鼎去貯水。
．儉水khiām-tsuí：欲停水矣，咱愛去共水加承寡，號做「儉水」。漢字愛會曉寫。
．核能hi̍k-lîng：這馬家應該漸漸仔攏唸慣勢矣。
．日頭光ji̍t/li̍t-thâu-kng：咱臺灣因為真濟所在，日頭光攏足強的，
　　　可能閣較適合發展太陽能發電方式。
　　　有人講「日光」，嘛是會使，咱會講「日頭足炎(iām)的」，會講「日頭光」。
　　　月娘干焦會講「月光」。
　猶閣有「星光」。
．輻射hok-siā：這是讀音的問題，加唸幾遍，逐家就會較熟似。
　　　例：這个物件有輻射線。
．沙漠sua-bo̍k：這是讀音的問題。
　　　沙漠sua-bôo（Ｘ）。
．沙崙sua-lūn：咱這地名有足濟有沙崙的，淡水就有一个矣，臺南遐嘛有，足濟所在攏有。
　　　咱臺灣無沙漠，有沙崙仔，加一个「仔á」，因為攏無大，嘛有沙埔仔(sua-poo-á)。
　　　這就是咱臺灣較有的地形。
．實捅捅tsa̍t-thóng-thóng：咱臺灣，人足濟的，足實(tsa̍t)的，
　　　攏滿矣，“甲夾”(kheh)甲規个。
　　　例：實鼻tsa̍t-phīnn
　　　佮「實捅捅」倒反的講法，是「空閬閬khang-lòng-lòng」，
　　　表示足空的，無啥物物件。「實」佮「空」會使對應。
．狹櫼櫼e̍h/ue̍h-tsinn-tsinn：蹛甲狹櫼櫼，表示足狹。
　　　「狹櫼櫼」倒反的講法，是「闊朗朗khuah-lóng-lóng」，
　　　嘛會當講「闊莽莽khuah-bóng-bóng」。
　　　冗霍霍(līng-hòo-hòo)表示佮「絚ân」的對應。
．櫼tsinn：細支柴杙仔彼種物件，細塊的，共「櫼落去」的用法。
．thênn/thînn目thênn/thînn ba̍k：鑿目(tsha̍k-ba̍k)，表示光足強的。
　註：《台文華文線頂辭典》、《台日大辭典》thênn/thînn→瞪。
．傷siong /傷重siong-tiōng：表示「用足濟」的意思。
　　　「傷本」相對應的就是「省本síng-pún」。
　相對應的例：傷時(sî)、傷錢(tsînn)、傷力(la̍t)、傷工(kang)
　　　　　　　省時、省錢、省力、省工
## [2020.06.25《台語講世事》：鯪鯉(lâ-lí)](https://youtu.be/kG6hUHoPWwk)
★臺灣五日節，鯪鯉的傳說，台中有，高雄嘛有。
．鯪鯉(lâ-lí)其它的名，濆(?)仔bùn-á，塗龜、石鯪魚、步山虎。
　註：《教典》：濆bùn：『湧出』。
◎穿木屐/柴屐，蹔鯪鯉，
　Tshīng ba̍k-kia̍h/tshâ-kiah, tsàm lâ-lí,
　食肉粽，配麻穎。
　tsia̍h bah-tsàng, phuè muâ-ínn.
◎這个節日到底欲按怎講
．虯儉khiû-khiām
．出盡磅力tshut tsīn-pōng-la̍t
　　　= 『費盡吃奶之力』、『費盡九牛二虎之力』。
．逐家會曉講「我欲來張(tng)鳥鼠仔」，可能毋知是這字。
．兜tau vs. 厝tshù
．生驚tshenn/tshinn-kiann vs. 驚kiann
．偷走監thau-tsáu-kann
．陰陰gân∥im-im-gân　
　註：《台日大辭典》、《甘字典》用「凝gân」。
　另：《楚辭大招》天白顥顥，寒凝凝只。《註》凝凝，冰凍貌。
．跤gân手gân
．墊仔tiām-á vs. 苴仔tsū-á
．印象ìn-siōng、印象ìn-siōng、印象ìn-siōng，愛唸3遍。
　　　象siōng，第7調，後面若有字，變調7變3調。
．地理tē-lí vs. 風水hong-suí

一、看新聞講臺語：暝尾鯪鯉家己來　覕咧借燒真可愛
◎翻譯
華語：穿山甲躲在駕駛座下面，身體蜷曲成球狀。
臺語：鯪鯉覕佇運轉位下跤，
　　　Lâ-lí bih tī ūn-tsuán-uī ē-kha,
　　　身軀虯做一球。
　　　sin-khu khiû tsò/tsuè tsi̍t kiû.
．覕bih：覕起來的「覕bih」，就是按呢寫。
．運轉ūn-tsuán：這个詞是對日語來的，
　運轉位ūn-tsuán-uī：就是佇運轉彼个坐位。
　運轉手ūn-tsuán-tshiú：以前咱號做運轉手，就是運將、司機。
　運轉(ūn-tsuán)機器，運轉公司，欲講無形的「運轉」嘛會使。
　　　例：這間公司已經運轉兩年外。
．虯khiû：《教典》：『收縮、蜷曲的樣子。』
．虯毛khiû-moo/mn̂g：咱一般攏講「虯毛」。
　　　例：你有自然虯，虯毛，我嘛有自然虯，
　　　　　無夠虯，閣去叫人電一下閣較虯咧。
．虯儉khiû-khiām：「虯khiû」敢若「束sok」起來，較細以外，
　　　「虯儉」就是「過頭儉」的意思。
.
華語：警方花了好一番力氣才逮到他。
臺語：警察是出甲盡磅力才共張著。
　　　Kíng-tshat sī tshut kah tsīn-pōng-la̍t tsiah kā tng--tio̍h.
．盡磅力tsīn-pōng-la̍t：咱一般定定咧用。
　　　到上貼底(tah-té/tué)、上蓋大的範圍。
　　　例：路行到盡磅，上蓋尾溜矣。
　　　咱嘛會當按呢用「出盡磅力tshut tsīn-pōng-la̍t」：
　　　= 『費盡吃奶之力』、『費盡九牛二虎之力』這類。
　　　例：伊工課做甲盡磅忝。
　　　例：伊哀甲盡磅聲，足大聲。
　　　共「盡磅」佮其它的形容、動詞鬥做伙，嘛是會使。
．張tng：咱一般知影姓「張Tiunn」，足𠢕(gâu)「張tiunn」的。
　　　有一个白話音「張tng」，有等待機會的意思。另外意思，
　　　一般是有啥物家私，有啥物陷阱，欲去掠啥物物件。
　　　這个動詞逐家會曉講「我欲來張(tng)鳥鼠仔」，可能毋知是這字。
　　　例：「張」鳥鼠tng niáu-tshí/tshú：愈看敢若一个人名。
　　　　　鳥鼠「張」niáu-tshí/tshú-tng：掠鳥鼠的彼个物件。
　　　例：張機會tng ki-huē

華語：深夜跑到民眾住家的車庫，不請自來，嚇壞屋主。
臺語：暝尾走到人家厝仔的車庫，
　　　Mê-bué/mî-bé tsáu kàu jîn-ke-tshù-á ê tshia-khòo,
　　　厝主煞著生驚。
　　　tshù-tsú suah tio̍h-tshenn/tshinn-kiann.
．暝尾mê-bué/mî-bé：「暝mê/mî」的上尾溜，欲天光的進前。
．人家厝仔jîn-ke-tshù-á：人家厝jîn-ke-tshù，無「仔á」嘛無要緊。
　　　就是『民宅』的意思。
．兜tau vs. 厝tshù：兜tau，較強調「家庭」的意思，
　　　厝tshù，是厝殼，抑是厝的本身。
．著生驚tio̍h-tshenn/tshinn-kiann：生驚 vs. 驚
　　　生驚：敢若雄雄去予啥物貨驚著，去掣(tshuah)著，叫生驚。
　　　驚：毋是雄雄的彼種的，一般就講「驚kiann」。
　　　例：蛇予我拍驚。Tsuâ hōo guá phah-kiann.
　　　　　意思是「我驚蛇。Guá kiann tsuâ.」，「蛇tsuâ」這个物件，
　　　　　會予我驚，已經驚足久矣，毋是這馬才驚，只要想著、看著攏會驚，毋是雄雄驚。
　　　例：蛇予我著生驚。Tsuâ hōo guá tio̍h-tshenn/tshinn-kiann.
　　　　　意思就是「雄雄看著蛇出來，予我著生驚。」

華語：穿山甲的力氣，大到撐開鐵籠，成功逃獄。
臺語：力草飽甲會用得共鐵籠弓開，
　　　La̍t-tsháu pá kah ē/uē-īng-tit kā thih-láng king--khui,
　　　偷走監成功。
　　　thau-tsáu-kann sîng-kong.
．力草la̍t-tsháu：形容力量、氣力的意思，就是「力的狀況」。
．弓king：原本若是講名詞，就是「射箭」彼个「弓king」，
　　　抑是弓蕉的單位，其中有一个「弓」。
　　　但是遮是動詞，意思是共展開(thián--khui)，予伊變做較大，抑是較冗。
　　　衫仔弓的「弓」，咱普通時仔嘛會曉用。
　　　例：弓布篷king pòo-phâng、弓蠓罩king báng-tà
．偷走監thau-tsáu-kann：可能過去無一定按呢講。咱過去會講
　　　例：偷走課thau-tsáu-khò
　　　　　偷走學thau-tsáu-o̍h
　　　　　偷走厝thau-tsáu-tshù

華語：似乎天氣太冷了，所以躲在腳踏墊下取暖。
臺語：可能天陰陰gân，
　　　Khó-lîng thinn im-im-gân,
　　　伊tsua̋nn勼佇跤墊仔底咧借燒。
　　　i tsua̋nn kiu tī kha-tiām-á té leh tsioh-sio.
．陰陰gân∥im-im-gân：因為有的辭典會寫「凝」的漢字，音gân。
　註：《台日大辭典》、《甘字典》用「凝gân」。
　　　表示足寒足寒，敢若一直攏是低溫，寒甲袂振動。
　　　例：跤gân手gân，意思就是跤手冷，比冷閣較冷，比寒閣較冷，gân牢咧，寒甲袂振動矣。
．跤墊仔kha-tiām-á：『腳墊』。
．墊仔tiām-á vs. 苴仔tsū-á：有的所在的人無咧講「墊仔」。
　　　例：你共苴咧。鼎苴。
　　　例：跤墊仔、椅墊仔、苴茶甌的茶甌墊仔、鼎墊仔。
．借燒tsioh-sio：本來意思是愛起火，予咱敢若溫度較懸。
　　　「借燒」用佇遮，是欲予家己較燒、較溫暖。『取暖』

華語：穿山甲的麟片，具有祛風除溼、活血散瘀的功效，時常被中醫拿來用藥。
臺語：鱗有去風溼，通血路的效果。
　　　Lân ū khì hong-sip, thong hueh/huih-lōo ê hāu-kó.
　　　漢醫定定共用來敆藥仔。
　　　Hàn-i tiānn-tiānn kā īng lâi kap-io̍h-á.
．鱗lân：可能逐家知影文言音lîn，毋知影白話音lân。
．拍鱗phah-lân：欲共魚的鱗處理掉，是用「拍」的，或者是「掃鱗sàu-lân」。
　　　一般魚鱗攏用「拍」的。
．敆藥仔kap-io̍h-á：藥方可能會寫著「欲用鯪鯉的鱗」做路用。
．敆kap：以前的藥仔攏是囥鬥陣，足濟項濫做伙，幾若方面的物件濫做伙，毋但一个，
　　　會當講「敆kap」。
．敆桌kap-toh：欲共兩塊桌仔，幾塊桌仔囥做伙，囥鬥陣。
．敆單kap-tuann：可能有無仝的單，欲敆做伙，攏會當用「敆」。

二、講予你知：鯪鯉
　咱臺灣的五日節，有一个足特別的風俗，號做「蹔鯪鯉」。
　可能真濟人毋捌看過「鯪鯉」，咱先來熟似鯪鯉。
◎ 鯪鯉
＊Bùn-á/塗龜，有鱗的飼奶動物
　鯪鯉有足濟名的，頭一个號做「濆(?)仔Bùn-á」，因為伊足𠢕濆(bùn)的。
　註：《教典》：濆bùn：『湧出』。
　嘛有人叫伊「塗龜thôo-ku」。鯪鯉是一種有鱗的飼奶動物。
＊前爪大，好“足百”樹，尾的鱗插入樹身
　鯪鯉的外形，伊頭前的爪非常大肢，“足百”樹仔非常好勢，特別的是伊尾溜後跤爪，
　顛倒非常細肢，無法度𢯾(mooh)樹仔，伊欲“足百”樹仔的時，頭前的爪𢯾(mooh)樹仔，
　用尾溜的鱗，插入去樹身，“足百”起去。
＊用踅(se̍h)的起去，倒退攄(lu)落來
　“足百”起去的時陣，用踅的（方式）踅起去，較特別的是，若欲落來，是倒退攄落來。
＊喙瀾黏黐黐，長喙舌食狗蟻
　鯪鯉是食狗蟻，伊共狗蟻岫挖開了後，因為伊的喙舌黏黏，喙瀾黏黐黐，用伊的長喙舌來食狗蟻。
＊拄著危險勼做一球
　鯪鯉若拄著危險的時陣，會規个勼做一球。

◎蹔鯪鯉的傳說
＊臺中南屯(Lâm-tūn)（犁頭店），地理是鯪鯉穴
　蹔鯪鯉的傳說是對佗位來的？
　是佇臺中南屯，以前號做「犁頭店」，聽講彼个所在的地理，是鯪鯉穴。
＊鯪鯉活動佮庄頭興衰有牽連 /金鯪鯉
　當地的人感覺塗跤內面，蹛足濟鯪鯉，這鯪鯉有活動、無活動，對犁頭店來講有興旺、
　無興旺，非常有關連。
　以前，亻因相信當初去遐開墾的時，遐有蹛一隻金鯪鯉，只要熱天，逐家希望會當共鯪鯉叫精神，
　莫予覕空睏冬睏傷久。
＊五日節透中晝愛共鯪鯉吵精神
　尾仔，變做佇五日節透中晝，逐家著愛來共鯪鯉吵精神，予伊反身，按呢地方才會興旺。
＊走標、蹔地、銅鼎生鍋敲出聲
　欲按怎共鯪鯉吵精神？有各種方式，這馬包括走標、蹔塗跤，抑是共厝內面的銅鼎生鍋，
　攏共摃出聲、敲出聲，欲共予吵精神。
　這是臺中的風俗。
＊高雄Namasia區Kanakanavu族嘛有
　除了臺中以外，佇高雄Namasia(那瑪夏)區，
　有一个部落號做Kanakanavu(卡那卡那富)族，亻因嘛有鯪鯉的傳說。
　講有鯪鯉挖一空，救亻因的族人。

◎現實生活欲絕種？
＊佇臺灣捌強欲孤毛絕種
　既然鯪鯉佇咱臺灣的傳說內面，是一種好的動物，但是佇現實生活內面，鯪鯉強欲絕種矣。
　咱若有印象(ìn-siōng)，佇咱臺灣，鯪鯉捌強欲孤毛絕種去。這是欲按怎講？
＊1950年代開始大量掠，肉、皮、鱗
　雖然這馬咱的鯪鯉，會使講是世界上密度上懸的，若是時間轉去到1950年代，
　彼的時陣，臺灣人足愛掠鯪鯉的，因為有人講鯪鯉的肉通血路，伊的鱗通奶腺，閣較重要的，
　是鯪鯉的皮，色水足媠的，所以真濟人掠鯪鯉，欲出口伊的皮，
　彼的時陣，生理做甲足大足大，真濟臺灣的鯪鯉攏予掠了了。
＊1975年，《瀕臨絕種野生動植物國際貿易公約》
　到1970年代，變做臺灣已經無鯪鯉矣。彼的時陣，真濟廠商，對其它的國家進口鯪鯉，
　做鯪鯉皮，才出口趁足濟錢的。
　1975年，世界性的號做《瀕臨絕種野生動植物國際貿易公約》，內面規定，
　已經無法度進口鯪鯉，按呢猶無夠，猶閣有人想欲食伊的肉，佮伊的鱗。　
＊1989年，《野生動物保育法》共訂做保育類動物
　好佳哉，1989年的時，咱臺灣《野生動物保育法》通過了後，共鯪鯉訂做保育類動物，
　鯪鯉才通一工一工愈來愈濟。

◎這幾年的保育觀念
＊臺東Sazasa部落提倡鯪鯉保育
　佇臺東Sazasa部落，亻因特別欲來保護鯪鯉。
＊2008年Sazasa成立巡守隊，來保護鯪鯉
＊2009年經過調查，Sazasa部落是全球野外鯪鯉密度上懸的所在。
＊保育意識佇逐所在發穎
　除了這个部落以外，咱臺灣真濟所在，保育意識漸漸仔發穎。
＊無細膩走來人家厝，受傷，照顧了放生
　真濟人會共無細膩，走去厝內面的鯪鯉，共保護起來，伊若受傷，閣共醫治了後，才放出去。
　（保育）意識，逐家有矣，但是逐家嘛毋通傷過（無）細膩，
　這幾年有新聞發現，猶是有人繼續咧掠鯪鯉。

三、語詞：
　這算做中部五日節的風俗，相關的俗諺語：
◎穿木屐/柴屐，蹔鯪鯉，
　Tshīng ba̍k-kia̍h/tshâ-kiah, tsàm lâ-lí,
　食肉粽，配麻穎。
　tsia̍h bah-tsàng, phuè muâ-ínn.
　其實會使推廣到其它所在，只是較可惜，麻穎就是較中部才有，
　抑無，會當種較濟咧，看會當銷到南部、北部無？變做咱代替在地風俗，五日節的一款文化。

◎鯪鯉(lâ-lí)其它的名：
．bùn-á：「bùn」對下跤到頂面，抑是對頂面到下跤，速度足緊，出出入入，鑽來鑽去，
　　　跳出來，鑽出來，叫做「bùn」。
　　　伊足𠢕(gâu) 濆(?)bùn的，咱臺語慣勢加一个「仔á」。
　註：《教典》：濆bùn：『湧出』。
．塗龜thôo-ku
．石鯪魚tsio̍h-lîng-hî
．步山虎pōo-suann-hóo
.
◎這个節日到底欲按怎講，講過足濟遍，閣共逐家提醒一下。
．五月節Gōo-gue̍h-tseh，Gōo-ge̍h-tsueh
．五日節Gōo-ji̍t-tseh，Gōo-li̍t-tsueh
．肉粽節Bah-tsàng-tseh，Bah-tsàng-tsueh：食肉粽所以按呢講。
◇較文言音就講：
．端午節Tuan-ngóo-tseh
．扒龍船pê-lîng-tsûn：「龍船」是用「扒pê」的這款動作。
．香芳hiunn-phang：『香包』，加一寡物仔囥咧芳芳。
　　　以前的芳，可能就是用「香hiunn」的芳，用香(hiunn)粉。

◎地名相關：有時仔，地名袂使干焦看漢字讀。
．南屯Lâm-tūn：臺中的「南屯區Lâm-tūn-khu」。屯tūn，第7調。
．草屯Tsháu-tùn：南投的「草屯Tsháu-tùn」。屯tùn，第3調。
　　　袂使讀佮「南屯Lâm-tūn」仝款。
．白沙屯Pe̍h-sua-tun：伊的在地的攏講「白沙屯(tun)」。
　　　應該講在地地名，無一定攏是用這个漢字。
．地理tē-lí vs. 風水hong-suí：
　　　地理：一般是講人蹛的環境，狀況按怎。
　　　風水：一般是講墓地的狀況按怎。
　　　活的人蹛的是「地理」，死的人蹛的是「風水」。
．穴hia̍t：例：龍穴、鯪鯉穴

◎這是咒讖(tsiù-tshàm)，抑是罵人的詞：
．孤毛絕種koo-moo-tse̍h-tsíng、孤𣮈絕種koo-khu̍t-tse̍h-tsíng
　　　本來孤毛、孤𣮈，攏較形容孤癖(phiah)、孤佬(láu)的意思，
　　　佮「絕種」連做伙，比較較咒讖。
．無傳bô thn̂g：「傳thuân」的白話音是“thn̂g”。
　　　無傳(thn̂g)落去，就是無生湠，無囝孫仔，意思就是絕種。
　　　以前真正足重視這款物件。
．鱗lân：提醒白話音的讀法。
．銅鼎生鍋tâng-tiánn senn-ue/sinn-e：這讀音嘛予逐家讀一下。
## [2020.07.02《台語講世事》：芳療](https://youtu.be/8HavX1Q0yBY)
．擔領tam-niá：承擔、承受的意思。
．囡仔疕gín-á-phí
．出身命tshut-sin-miā
．荏lám vs. 弱jio̍k/lio̍k
．搟hián
．掠鯪鯉lia̍h lâ-lí
．麻芳斜muâ-phang-tshua̍h、麻芳範muâ-phang-huān：『菱形』。
．植物si̍t-bu̍t、植物si̍t-bu̍t、植物si̍t-bu̍t，愛讀3遍。　（Ｏ）
　植物ti̍t-bu̍t、tsi̍t-bu̍t　（Ｘ）俗唸。
．撨tshiâu
．蔭身ìm-sin／人殼lâng-khak
◎俗語：
．甘願擔領一斗米，毋願擔領一个囡仔疕。
．人跤，狗鼻，和尚頭。
．人信字，牛信鼻。
◎佮「芳phang」有關係的俗語
＊注意讀音
.
一、看新聞講臺語：檢測壓力鼻芳氣　心肝就通放予開
◎翻譯
華語：把臉輕輕地靠著儀器，等待拍照。
臺語：共面好禮仔靠佇儀器，
　　　Kā bīn hó-lé-á khò tī gî-khì,
　　　等翕相。
　　　tán hip-siòng/siàng/siōng/siāng.
．『輕輕』：除了「輕輕khin-khin」，咱會當講「好禮仔hó-lé-á」。
．好禮仔hó-lé-á：這是形容，輕輕仔，足好禮，一定袂粗魯。
　好禮仔囥hó-lé-á khǹg：就是「輕輕仔囥」。
　　　例：你著愛共物件好禮仔囥。
　好禮仔講hó-lé-á kóng：毋通傷歹，愛好禮仔講。
．翕hip：除了「翕相」以外，嘛有用佇其它的意思。
　翕熱hip-jua̍h/lua̍h：天氣足翕熱，較無通風。
　翕油飯hip iû-pn̄g、翕豆菜hip tāu-tshài：
　　　翕啥物物件，用蓋崁一段時間，予燒氣袂走出，才閣開。

華語：把身心承受的無形壓力，變成數字。
臺語：共身軀、心肝擔領的無形壓力，
　　　Kā sin/sing-khu, sim-kuann tam-niá ê bû-hîng ap-li̍k,
　　　變成數字。
　　　piàn-tsò/tsuè sòo-jī/lī.
．擔領tam-niá：承擔、承受的意思。
◎俗語：甘願擔領一斗米，
　　　　Kam-guān tam-niá tsi̍t táu bí,
　　　　毋願擔領一个囡仔疕。
　　　　m̄-guān tam-niá tsi̍t ê gín-á-phí.
　　　　表示：𤆬(tshuā)囡仔，足忝的，愛負責伊的成長。
．囡仔疕gín-á-phí：《教典》：小毛頭。指小孩，但含有貶意。

華語：要讓民眾『清楚了解健康狀況』。
臺語：身命勇抑荏，看甲明明明。
　　　Sin-miā ióng iah lám, khuànn kah bîng-bîng-bîng.
．身命sin-miā：通常「身命」較用佇較長期的狀況，毋是一時的。
　　　身體，可能較一時的；身命，較長期的，體質等等。
　調養身命tiâu-ióng sin-miā
　出身命tshut-sin-miā：拚命的意思。
　　　敢若袂輸共你長期的一寡物件，攏共摒出來。
　　　例：你嘛毋免為著趁錢，按呢遮爾出身命，性命愛顧。
＊荏lám：有人講敢毋是「弱jio̍k/lio̍k」？用法無啥仝。
　　　除了「身體荏」，咱定定咧講，別項物件嘛會當荏。
．桌仔荏：可能桌仔舊矣，佗位有搖來搖去，會搟(hián)，無勇。
．厝荏：可能欲倒矣，無遐爾䆀，無勇。
　　　除了有形的物件，無形的物件嘛使講。
．工夫荏：這猶袂當的，工夫荏，直接講「師傅荏」嘛是會使。
　　　厝tshù，是厝殼，抑是厝的本身。

華語：不用透過按摩，用聞精油的方式。
臺語：免閣掠龍，精油共鼻芳一下。
　　　Bián koh lia̍h-lîng, tsing-iû kā phīnn-phang--tsi̍t-ē.
．掠龍lia̍h-lîng：過去是講「ma-sà-tsì」(massage→マッサージ)。
．掠猴lia̍h-kâu：毋是真正去掠猴。嘛是形容。
．掠鯪鯉lia̍h lâ-lí：這可能較濟人毋捌聽過。
　　　有的無欲直接講，用一種敢若欲予你臆謎猜。
　　　意思可能是鯪鯉的形，伊的鱗，尖尖一片一片的感覺，
　　　佮筍仔生出來的形有成，足有想像力的，
　　　意思是「偷挽筍仔」。這應該是較古早的講法。
．鼻芳phīnn-phang：「鼻phīnn」一下的“phīnn”按呢寫。
　　　鼻氣味以外，咱有俗語。
◎俗語：
．人跤，狗鼻，和尚頭。
　Lâng kha, káu phīnn, huê/hê-siūnn-thâu.
　跤、鼻、頭，這幾个部位，算上外口，予人直接會當看著的所在，
　其實是咧講這幾个所在攏「驚冷」，袂輸講是「弱點」，上荏的，較會寒著的部位。
　咱人的跤上早冷，狗的鼻，和尚頭無頭毛，上快感覺寒。
．人信字，牛信鼻。
　Lâng sìn jī/lī, gû sìn phīnn.
　這當然為著鬥句。
　抑無，有時仔，看著這句感覺牛誠可憐，是講咱攏會共牛貫鼻，貫(kǹg)鼻拖伊走，
　欲去犁田，創啥，敢若袂輸人信文字的路用，
　牛有貫鼻，才會當做啥物代誌，才有路用。

華語：如果透過芳療，只是聞，只是吸收這些香氛。
臺語：若做芳療是有鼻著、
　　　Nā tsò/tsuè phang-liâu sī ū phīnn-tio̍h,
　　　有欶著遮的芳氣就好。
　　　ū suh-tio̍h tsia-ê phang-khuì tō hó.
．欶suh：用鼻仔、喙，攏會當共啥物物件欶入去。
　　　「欶管suh-kóng」的「欶suh」。
　　　例：欶血suh-hueh/huih：蠓仔欶血，抑是傳說中的欶血鬼。
　　　　　欶奶suh-ling，suh-ni，suh-lin：攏有人講。囡仔欶奶。
　　　　　欶薰suh-hun：食(tsia̍h)薰。會使用欶，嘛會使用食的。
　　　　　噗薰pok hun：是欶較短、較急的，用「噗pok」的。
　　　　　單純「欶入去」彼薰的部份是用「欶」的。
．芳氣phang-khuì：咱一般較捷看著是人名有這字「芳phang」。
　　　人名的時，是讀「芬芳hun-hong」的「芳hong」，文言音。
　　　「芳phang」，白話音，愛會記得漢字按呢寫。
＊佮「芳phang」有關係
．麻芳muâ-phang：咱過去古早的一種甜料，摻麻仔lueh做。
．麻芳斜muâ-phang-tshua̍h：一種形狀，『菱形』。
．麻芳範muâ-phang-huān：一種形狀，『菱形』。

二、講予你知：芳療
　有真濟精油，芳氣會予人輕鬆。精油是芳療足重要的媒介之一。
◎芳療是啥物？
＊芳氣療法（Aromatherapy）的簡稱
＊精油是媒介之一
＊掠龍、浸有芳氣的洗浴水、點芳氣薰等方式
　掠龍的時陣，摻一寡精油，予咱的氣氛、精神，攏會非常輕鬆。
　嘛會使佇洗身軀的時陣，浸佇有芳氣的水內面，嘛算其中一種。
　點芳氣香等等，攏是咱熟似的方式。
＊透過喘氣、皮膚來吸收
　會當透過喘氣、皮膚來吸收精油的成分。
＊予精神放鬆、對健康有幫贊的自然療法
　芳療需要有專業智識，毋是買精油來使用就是「芳療」。

◎芳療的古歷史
＊植物芳氣上早的運用記載是佇埃及
　芳療的歷史是非常久，若對歷史記錄來看，上早有記錄的，是佇埃及。
　彼个時陣，埃及人用有芳氣的植物(si̍t-bu̍t)，提煉精油。
＊治病、宗教儀式、製作蔭身(ìm-sin)／人殼(lâng-khak)
　提煉出來的精油，除了日常生活以外，佇治療病嘛會用著，
　各種儀式，希望逐家討論代誌的時陣，心情較平靜咧，代誌會當撨(tshiâu)予好勢，
　就用一寡精油。
　抑是，有當時仔，欲相戰的時陣，欲予逐家閣較有精神，嘛會用一寡精油。
　欲拜神的時，佗一寡神是用特別的精油，這个神是用這个精油，各種無仝款的用法。
　埃及上蓋有名的，就是「蔭身／人殼」，這嘛是用精油去製作，
　共糊佇屍體(si-thé)頂懸，予伊袂爛去。
＊阿拉伯醫生發明激精油的技術
　尾仔，用精油的這款技術，進入阿拉伯的世界。
　有一个醫生，研究了5、6百種的精油，寫一本書。了後，閣發明「激精油」的技術，
　對精油來講，是非常重要的發展。
＊十字軍征東共技術紮轉去歐洲
　隨著十字軍征東，共這个技術紮去歐洲，芳療佇歐洲發展。

◎芳療的近代歷史
　芳療的近代歷史，一定愛講著歐洲。
＊現代芳療之父：法國化妝品科學家Gattefosse薰衣草的故事
　法國有一个人號做「現代芳療之父」，這个法國人Gattefosse，是一个畫妝品科學家，
　有一工，伊咧做實驗，無細膩，竟然爆炸，去燒著手，趕緊共手浸佇邊仔的一桶薰衣草精油。
　想袂到浸落去了後，竟然袂疼，無啥物傷痕等等。
　這个時陣，亻因才知影，原來透過精油，會當予皮膚吸收，進入咱的循環系統等等
　有這款的醫療效果。
＊1928年頭擺提出「芳氣療法」觀念佮實驗證實
　1928年芳療之父就提出「芳氣療法」的觀念，閣有實驗來證明。
＊1960年代英國摩利夫人推動芳氣療法：美容、保健、日常生活
＊德國重精油成份分析，上早結合神祕心理學
　德國的發展，是較重精油成份的分析。
　有當時仔，做塔羅牌抑是水晶球的時陣，攏會結合精油，這嘛是德國發展出來的，
　亻因上早結合「神祕心理學」這部份。

◎臺灣的芳療
　精油、芳療，毋是干焦予人的心神四序，閣有醫療的效果。
＊觀念進入臺灣嘛有20年以上
＊對「芳氣掠龍」到了解有治療效果
＊各種芳療學院美容中心
＊臺大病院2009年成立輔助整合醫學中心
　2009年，臺大病院成立輔助整合醫學中心，有一个諮詢單位，佮芳療有關係。
＊臺東聖母病院共芳療排入療程
介紹這个觀念予逐家了解，咱普通時仔，使用的精油嘛有療效，只是需要閣較濟的專業智識，
毋是凊彩，一定愛提著執照，才會當來實行。

三、語詞：
．蔭身ìm-sin／人殼lâng-khak：仝意思，用精油去做mummy，『木乃伊』，
　　　咱臺語號做「蔭身」。
　　　人殼，干焦有一个殼，無性命。這是咱臺語的講法。
．豉sīnn：等於用一寡料，去予伊浸一段時間了後，…...
　　　咱一般「豉」是料理，是煮啥物物件，蔭豉仔(ìm-sīnn-á)、
　　　蔭豉蚵、蔭豉啥物，彼類的。「豉sīnn」是按呢寫。　　　
．蒸餾tsing-liû：精油「蒸餾」的方式。
　　　有時仔，有一寡詞會用漢字，臺語讀音去共讀，直接讀。
．激kik：有人講佮「蒸餾」類似，就是看你用佇佗位。譬如講
　　　「激酒」，可能有蒸餾的過程，所以有人會講「激精油」。
　　　一般較知影的是「激酒」，精油嘛會當用「激」的，
　　　激kik，可能包括所有的程序，有包含蒸餾的部份。
＊全是仝意思，嘛有淡薄仔無仝款，有人分較幼，有人濫咧用。
．藥方io̍h-hng：方hng，是白話音。是寫出來的字，彼个內容。
．方頭hng-thâu
．藥單io̍h-tuann：寫藥方的彼張單。
．藥帖io̍h-thiap：寫藥方佇頂面。
　　　檢采欲分較幼，藥方、方頭，算較倚；藥單、藥帖彼張紙。

◎佮「芳phang」有關係的俗語：
．本地香無芳。Pún-tē/tuē hiunn bô phang.
　　　　敢若袂輸外地的較芳，比本地閣較芳。
　　　　對照華語俗語『外來的和尚會唸經。』

．俗香兼芳。Sio̍k hiunn kiam phang.
　　　這無分本地、外地，是俗閣芳。
　　　意思是俗物，有價值，無一定貴才是好。
　　　大碗閣滿墘。Tuā uánn koh buán kînn.

．花開滿天芳，
　Hue-khui muá-thinn phang,
　結子才驚人。
　kiat-tsí tsiah kiann--lâng.　(尾字音讀第1調)
　咱一般可能攏會欣賞開花的媠，花開甲規个，滿天芳，足芳、足媠的。
　後壁重點，「結子才驚人」具體的意思是
　伊開花其實是為著後壁愛結子，先開花後結子。較重視「我有收成，有果子通食」。
　若用佇形容人，有人講「查某人媠，猶無算啥，愛會曉生囝」，會生囝毋才較𠢕(gâu)。
　這古早人就是按呢，好看頭猶閣無夠，一半爾，愛有結子。
　才驚人，重點是「驚」，意思是「予人會感覺肯定」，
　所以後壁的「人--lâng(讀第1調)」是輕聲。
　遮的「驚人kiann--lâng」毋是驚著人，表面上看起來是，
　但是咱用佇遮的意思，予你感覺掣一趒，無簡單，足驚人的。

＊注意讀音：
．美容bí-iông
．鬆sang：輕鬆、放鬆，精油會當予咱有這个功能。
．迵thàng：『貫穿』、鑽過(tsǹg--kuè/kè)。迵過去。
．提煉thê-liān：精油有提煉的過程。
## [2020.07.09《台語講世事》：臺灣的鮕鮘(koo-tai)](https://youtu.be/yFVVZsW7XsQ)
．的確tik-khak
．怙kōo
．擛ia̍t vs. □phia̍t （猶無字）
＊介紹魚的部位：
　．魚擛hî-ia̍t
　．魚岭hî-niā：魚陵/岭
　★魚鰓hî/hû-tshi：魚鰓的「鰓tshi」，可能真濟人袂曉唸。
　　咱應該攏自細漢應該愛唸，會曉唸，因為是足四常的物件，但是咱袂曉唸，加唸就會曉唸。
　　魚鰓hî/hû-tshi、魚鰓hî/hû-tshi、魚鰓hî/hû-tshi，讀3遍，真重要。
＊臺語講塗濫水，按呢爛糊糊，敢若爛塗彼種形，足濟講法。
．淘井tô-tsénn/tsínn
．活魚栽hua̍t-hî/hû-tsai
．大鮕鮘tuā koo-tai vs. 大箍呆tuā-khoo-tai
★散種suánn-tsíng vs. 散種suànn-tsìng，無仝意思。
　兩字攏是第2調　　　兩字攏是第3調
註：散散仔suànn-suànn-á，「散」兩字變調讀起來無仝，誠趣味。

一、看新聞講臺語：自然生態疼命命　才有歡喜鮕鮘兄
華語：牠游泳的時候，不見得靠尾鰭。
臺語：伊泅水的時，
　　　I siû-tsuí ê sî,
　　　免的確著愛並尾叉。
　　　bián tik-khak tio̍h-ài phīng bué/bé-tshe.
．的確tik-khak：「一定，一定愛」的意思。
　　　免的確 bián tik-khak：無一定愛。
．無的確bô-tik-khak：無一定。
．並phīng：這字足臺語氣的。佇遮是「靠、倚靠啥物」的意思。
　　　這字咱定定咧用，只是毋知按呢寫。
　　　例：我並你較躼。Guá phīng lí khah lò.
　　　　　意思是「比較」。
　　　例：毋通並佇壁。M̄-thang phīng tī piah.
　　　例：你毋通並佇車門，門一下開，你就落出去。
　　　　　這是身體實際的動作，你「靠」佇啥物所在。
　　　例：伊並愛哭的。I phīng ài khàu--ê.
　　　　　意思是「伊足愛哭的。」
　　　　　嘛是「比較」，敢若咧佮人競爭，佮人比愛哭會贏。
　　　例：伊並早起的。

華語：還靠了胸鰭這樣拍打拍打。
臺語：怙魚擛按呢phia̍t咧phia̍t咧。
　　　Kōo hî-ia̍t án-ne phia̍t--leh phia̍t--leh.
．怙kōo：有人無咧用，有的人就講「用iōng/īng」。
　　　例：我怙行的就好。就是「用行的」。
　　　例：怙講的、怙烘的、怙啥的。　　
．魚擛hî-ia̍t：『魚的胸鰭』，魚仔邊仔彼兩片，有一點仔親像翼股。
　　　例：擛風ia̍t-hong、擛手ia̍t-tshiú、擛旗仔ia̍t-kî-á
．phia̍t咧phia̍t咧phia̍t--leh phia̍t--leh：
　　　例：phia̍t翼phia̍t-si̍t、魚咧phia̍t、phia̍t手巾仔
　　　佮「擛ia̍t」有寡仝款以外，phia̍t比「擛ia̍t」較大的動作，
　　　敢若有聲的感覺phia̍t、phia̍t按呢，可能有風的聲。
　　　這兩个動作，外形可能差不多，程度上，phia̍t動作閣較大。

華語：鮕鮘有強力的胸鰭，和發達的鰓蓋。
臺語：魚擛有力，魚鰓有耐。
　　　Hî/hû-ia̍t ū-lat, hî/hû-tshi ū-nāi.
＊介紹魚的部位：
．魚擛hî-ia̍t
．魚岭hî-niā：『魚的背鰭』。
　　　註：魚陵/岭hî-niā：『魚鰭、魚背』的部份。上懸的所在。
　　　　　陵/岭niā：因為漢字有替代用字，有無仝的寫法。
　　　　　會當參考　影片11：42　有解說
　　　　　[2020.06.11《台語講世事》：臺灣“足百”(peh)山活動](https://youtu.be/wMl3mpg4dVo?t=702)
．魚鰓hî/hû-tshi：喘氣咧用的。這字可能真濟人袂曉唸。
◎俗語：鯽仔魚食水，鰓下過。
　　　　Tsit-á-hî/hû tsia̍h-tsuí, tshi ē kuè/kè.
　水就對鰓下按呢過，一直過，一直過。
　落尾，延伸做像講「過，就袂記得。」，「忘恩背義」的意思。
　所以這馬若咧講這句，大部份攏是講忘恩背義。
．耐nāi：有擋頭(tòng-thâu)，足勇。
　　　這字咱嘛定定用，大部份較無用一字，單獨「耐」較少。
　　　例：這雙鞋仔敢有耐？
　　　　　Tsit siang ê/uê-á kám ū-nāi?
　　　例：忍耐jím/lím-nāi、耐操nāi-tshau、
　　　　　耐 𧿬nāi-thún：按怎 𧿬都袂歹，足堪得 𧿬。

華語：即使離開水面，也能在爛泥巴裡面存活。
臺語：無水，有漉糊糜嘛通活。
　　　Bô tsuí, ū lo̍k-kôo-muê/bê/muâi mā thang ua̍h.
＊臺語講塗濫水，按呢爛糊糊，敢若爛塗彼種形，足濟講法。
　．爛溝糜nuā-kau-muê/bê：「糜muê/bê」定定看著。
　．湳溝糜làm-kau-muê/bê
　．塗糜膏thôo muê/bê ko：因為可能膏膏按呢。
　．塗糜漿thôo muê/bê tsiunn：閣較水咧。
　　　真濟講法，這可能有地方差，有人厝內就是按呢講。

華語：臺灣人只顧著拚經濟，『卻犧牲了環境和這些鮕鮘魚』。
臺語：煞予環境佮遮的鮕鮘來坐數。
　　　Suah hōo khuân-kíng kah tsia-ê koo-tai lâi tsē-siàu.
．坐數tsē-siàu：明明毋是伊欠的，就是共伊掠來，叫伊負責任。
　　　會當參考　影片16：36　有介紹：坐數。
　　　[2020.04.23《台語講世事》：全民健保](https://youtu.be/y70sfFDGIQc?t=996)
　　　例：伊欠人錢，煞叫老母去坐數。
　　　　　I khiàm lâng tsînn, suah kiò lāu-bú khì tshē-siàu.
　　　　　老母誠衰(sue)，有當時仔，嘛會變老爸，嘛有可能(是)某。
　　　例：喙食，予尻川坐數。
　　　　　Tshuì tsia̍h, hōo kha-tshng tshē-siàu.
　　　　　你食物件，食好料，攏「喙」咧食，結果，落(làu)，是「尻川」咧落(làu)。
　　　　　喙咧享受，尻川咧出力。

二、講予你知：鮕鮘(koo-tai)
　佇咱真濟諺語，抑是囡仔歌內面，攏會當聽著「鮕鮘」這種魚。
　為啥物這馬咱敢若足罕得看著鮕鮘？。
◎熟似鮕鮘
＊臺灣在來魚種：七星鱧
　鮕鮘是咱臺灣在來的魚種，是咱臺灣種的。
　鮕鮘有一个正式的名，號做「七星鱧tshit-tshinn-lé」。
　這種鱧魚是一種種類。
＊20~30公分（上長40公分）
　鮕鮘差不多20公分至30公分遮爾長，上長記錄到40公分。
＊蹛佇埤仔、溝、清氣的溪溝
　鮕鮘蹛佇埤仔、溝、清氣的溪溝，以前攏會當看著鮕鮘。
＊有頂鰓，會使佇水面喘氣
　鮕鮘，應該講「鱧魚」，有一个足特別的所在，佇尻脊骿遐，攏有「頂鰓tíng-tshi」，
　若是水足淺的，會使佇水面頂懸喘氣。
＊食細尾魚蝦、蟲豸(thâng-thuā)
　鮕鮘是食一寡細尾的蝦仔、魚，抑是蟲豸。
　鮕鮘其實足歹的，有當時仔，會互相咬來咬去，互相食來食去。

◎農村社會真看重鮕鮘
＊放一尾佇鼓井食蠓蟲
　以前農村時代，逐家食水，愛食鼓井的水，會佇鼓井內面，囥一尾鮕鮘，
　因為鮕鮘食蠓蟲，予水較清氣。
＊流頭夆放毒隨發現
　共鮕鮘囥佇鼓井內面，閣有一个作用，若是流頭去夆放毒，逐家隨會當發現，
　因為鮕鮘佇內面，若是有毒，鮕鮘隨死去。
　所以鮕鮘非常重要。
＊寒天井水咧退愛注意
　有當時仔，佇寒天，井水較淺的時，逐家會去注意著這件代誌，千萬毋通予鮕鮘死去。
＊淘井(tô-tsénn/tsínn)
　寒天，井水咧退的時陣，逐家會非常注意，井愛洗予清氣，
　淘井的時，會共鮕鮘好禮仔請起來，井共創予清氣了後，閣好禮仔共請轉去。
　以前的囡仔，想講鮕鮘足趣味，想欲共釣起來𨑨迌，按呢會討皮疼矣。
　以前真正足看重鮕鮘。

◎鮕鮘走佗去？
　遮爾夆看重的鮕鮘，這馬是走佗去？
　因為咱臺灣，慢慢仔行到現代社會，農村社會已經慢慢仔較少矣
＊建設開發致使棲地受破壞
　真濟建設，抑是開發，鮕鮘的棲地受著破壞。
＊外來種大尾、無天敵、無人欲食
　有外來種來共(鮕鮘)食去。
＊介紹兩種外來種予逐家了解：
　Ａ泰國鱧：泰國種的超過80公分。鮕鮘上長的記錄才40公分爾，無伊一半遐爾長。
　　當初有人引進，希望食伊的肉，結果塗味傷重，逐家無愛食，就烏白擲，
　　所以泰國種入來咱臺灣。
　Ｂ魚虎：閣較大隻，上大會到130公分遮爾仔大隻。
　　當初時是欲看好看，共伊引進的。
　　嘛是仝款，烏白放生，影響著咱的鮕鮘。
　這兩種魚佇生態頂懸，攏會共咱的鮕鮘威脅著。
　Ｃ是咱臺灣種的鮕鮘，咱看鮕鮘的尾溜遮，有一个烏點，
　　有人講是土地公共伊做記號，因為有一回土地公行毋著路，毋知欲按怎行，
　　鮕鮘共𤆬(tshuā)路，土地公欲共伊感謝，共頓一个記號佇遮。
　鮕鮘走佗去？因為這寡外來種，又大尾，閣無天敵，無人欲食，
　所以漸漸仔共咱的鮕鮘一个仔一个消失去。

◎鮕鮘的復育
　鮕鮘的代誌嘛有人咧注意。
＊2007年彰化、2011年臺中，攏有人活魚栽hua̍t-hî/hû-tsai
　佇2007年，彰化有一位老師，2011年佇臺中，
　攏有人咧活(hua̍t)鮕鮘的魚栽，聽講（復育）有成功，但是咱猶是無聽著尾仔的消息。
＊2014年，農委會才有鮕鮘復育計畫
　一直到2014年，農委會才有這个「鮕鮘復育」計畫。
＊散種的猶是少
　雖然有這款計畫，有人復育，但是散(suánn)種的，就是野生的鮕鮘猶是真少，
　猶是真罕得看著鮕鮘。
＊棲地無去 / 汙染致使食物減少 / 外來種共掠來食
　為啥物鮕鮘會按呢無去？
　棲地無去矣，亻因無所在通蹛；
　佇外來種入來進前，鮕鮘就已經枵甲差不多矣，因為汙染，亻因欲食的魚仔、蝦仔攏無去，
　所以亻因的食物減少。
　閣來，是外來種共亻因掠來食。
　這三个問題，有真濟咱臺灣的物種，攏拄著仝款的問題，
　今仔就借鮕鮘，提出來予逐家思考一下。
.
三、語詞：
．井底鮕鮘tsénn-té/tsínn-tué koo-tai：佮『井底之蛙』仝意思。
．鮕鮘吵家koo-tai tshá-ke：因為鮕鮘足歹的，互相閣會咬來咬去，
　　　形容「吵甲根本袂收煞」，足吵、足歹的。
◎俗語：
＊鯽仔魚，釣大鮘。Tsit-á-hî, tiò tuā tai.
　　　這馬攏提來用：你用足少的本，結果去趁大錢。抑是
　　　你用足少的啥物款物件，去換足有價值的啥物款物件。
　　　這款的攏會當講「鯽仔魚，釣大鮘。」，就是用細隻魚去釣大隻魚。
＊大鮕鮘，炒韭菜。Tuā koo-tai, tshá kú-tshài.
　　　自細漢攏是講「大箍呆」。這是有人按呢講，意思是講...
　　　咱袂使用「身體、體材」來講耍笑，來共人歧視，
　　　慧盈老師欲抗議：為啥物阮著愛炒韭菜？
　　　應該是「大隻鮕鮘，提來炒韭菜。」然後走音去，
　　　「大鮕鮘tuā koo-tai」變做「大箍呆tuā-khoo-tai」。
．尾bué/bé：毋是干焦咧講「尾溜bué/bé-liu」的「尾bué/bé」，是咧講「量詞」。
　　　例：一尾魚tsi̍t bué/bé hî、
　　　　　一尾蛇tsi̍t bué/bé tsuâ、
　　　　　一尾蟲tsi̍t bué/bé thâng，有時仔用「尾」來算，愛看伊的狀況，
　　　　　這个蟲應該愛長長的，較長形的，才會當講一尾，用「尾」來算。
．鰓tshi：魚鰓的「鰓tshi」。咱應該攏自細漢應該愛唸，會曉唸，因為是足四常的物件，
　　　但是咱袂曉唸，加唸就會曉唸。
　　　例：頭家，這魚鰓共我提掉。
．鼓井kóo-tsénn/tsínn：拍鼓的「鼓kóo」，毋是古早的「古」，
　　　有的物件是看形體，感覺敢若「鼓」圓圓按呢。
　　　「鼓亭kóo-tîng」嘛是，以早有一个拍鼓的亭仔。
　　　比古早的「古kóo」小可較有道理。
．流頭lâu-thâu：水流的源頭，就是水源、水源頭。
．放毒pàng-to̍k：「毒to̍k」是用「放pàng」的，就是「毒thāu」。
　　　例：這鳥鼠仔共毒毒咧。
．淘井tô-tsénn/tsínn：共「井tsénn/tsínn」創好清氣。
　　　清內面有啥物款積牢的物件，共清清咧。
　　　厝尾頂的水塔是用洗的，無仝款。
．活魚栽hua̍t-hî/hû-tsai：毋是讀白話音「活ua̍t」，是讀文言音「活hua̍t」，
　　　是一个動詞，共創予活，就是對細尾的，欲共伊飼予大尾。
　　　活hua̍t，讀的時，愛變低，佮「處罰」的「罰hua̍t」仝音。
　　　例：這个囡仔足活潑(hua̍t-phuat)的。
　　　例：共粿撋(nuá)予發(huat)。是發粿的「發huat」，無仝。
　　　例：活樹栽hua̍t-tshiū-tsai
★散種suánn-tsíng vs. 散種suànn-tsìng，兩種意思，兩種讀音。
　兩字攏是第2調　　　兩字攏是第3調
．散種suánn-tsíng：野生的種(tsíng)。
　　　例：散狗suánn-káu：流浪狗，以前是號做「散狗」。
．散種suànn-tsìng：種tsìng，是種物件的「種tsìng」。
　　　意思就是「四界分散，散散仔種」。
註：散散仔suànn-suànn-á，「散」兩字變調讀起來無仝，誠趣味。
## [2020.07.16《台語講世事》：]()