# 《台語講世事》2019.04~06 文字稿
## 2019.04.18《台語講世事》：白色恐怖
一、看新聞講台語：50年代最大白色恐怖案，鹿窟事件65週年
＊翻譯
1.華語：回憶起17歲那年被抓走，來不及見到母親最後一面，泣不成聲。
　台語：想著17歲彼冬夆掠去，
　　　　Siūnn-tio̍h tsa̍p-tshit huè hit tang hőng lia̍h--khì,
　　　　袂赴見著老母最後一面，
　　　　bē hù kìnn-tio̍h lāu-bú tsuè-āu tsi̍t-bīn,
　　　　悲傷淋淚啼。
　　　　pi-siong lâm-luī-thî.
　﹡『泣不成聲』，一般這種形容攏是表示講「哭甲誠悽慘」，
　　當然「哭甲誠悽慘」有幾若種講法。
　　這个講法有較文藝性，欲共加強彼个悲慘的狀況，所以咱講「悲傷淋淚啼」。
　　較口語有另外一个講法「四淋垂sì-lâm-suî」：
　　例：伊哭甲目屎四淋垂。I khàu kah ba̍k-sái sì-lâm-suî.
　﹡啼thî，意思本來是講叫聲，有聲音，咱有咧講啼哭(thî -khàu)，哭出聲的意思，
　　佇遮是講「哭甲毋成聲，無成一个聲調」，是一个形容，不管「四淋垂」，
　　抑是「淋淚啼」，就是一直哭，一直哭，敢若予雨淋，敢若雨一直淋落來。
　　﹡淋lâm，目屎流足濟足濟；啼thî就是有出聲。

2.華語：65年過去了，過去受白色恐怖陰影，還歷歷在目。
　台語：經過65冬，
　　　　King-kuè la̍k-tsa̍p-gōo tang,
　　　　往過白色恐怖受害的烏影，
　　　　íng-kuè Pe̍h-sik Khióng-pòo siū-hāi ê oo-iánn,
　　　　親像猶閣佇目睭前。
　　　　tshin-tshiūnn iáu-koh tī ba̍k-tsiu-tsîng.
　﹡『歷歷在目』：親像猶閣佇目睭前。
　﹡『過去』：往過、較早、以早、古早，嘛有人講往擺、頂擺。

3.華語：拿竹竿對著臀部照打，打到無法走路。（字幕）
　台語：（受訪者述說）
　　　　竹箍仔攑咧，
　　　　Tik-khoo-á gia̍h--leh,
　　　　尻川䫌 uân-á 撼，
　　　　kha-tshng-phué uân-á hám,
　　　　撼甲袂行路。
　　　　hám kah bē kiânn-lōo.
　﹡「竹箍仔」就是規塊的，「箍」是竹仔切予圓圓短短一節tsat，
　　伊毋是足長，是短短「一箍」。
　﹡「uân-á」，咱普通時口語嘛有定咧講，有彼个「猶原按怎」的意思。
　　佇遮應該是咧講彼種共伊刑的人，不管伊按怎，猶原提這个物件一直共撼。
　﹡「…甲按怎」一般攏是可能有一个動詞，動作形容，然後致到啥物程度的意思。
　　「啥物甲…」就是「有某一種的動作、狀態，致使到按怎。」
　　這是咱臺語氣口的講法。

4.華語：國防部保密局接獲密報，帶著1萬多名軍警上山，將鹿窟對外道路封鎖。
　台語：國防部保密局接著暗稟，
　　　　Kok-hông-pōo Pó-bi̍t-kio̍k siu-tio̍h àm-pín,
　　　　共萬外个兵仔警察𤆬上山，
　　　　kā bān guā ê ping-á kíng-tshat tshuā tsiūnn-suann,
　　　　鹿窟對外的路攏共閘起來。
　　　　Lo̍k-khut tuì-guā ê lōo lóng kā tsa̍h--khí-lâi.
　﹡『密報』，咱講「暗稟」。「稟」就是稟報、稟告的意思。
　　一般攏是下司對頂司，抑是序細對序大，才會用著這字。
　﹡「𤆬上山」，𤆬一陣人，就是有人𤆬隊就著啦。
　﹡「閘tsa̍h」，只要有咧表示講共啥物貨擋咧，阻止，彼款攏會使講「閘」。
　　例：我咧看電視，你毋通共我閘咧。
　　咱一般厝啦，抑是啥物所在，咱可能會做一个「雨閘仔」，欲閘雨淋落來。

5.華語：修正補償條例與國安法，才能讓受害者得以上訴、洗刷罪名，落實轉型正義。
　台語：補償條例佮國安法著愛修正，
　　　　Póo-siông tiâu-lē kap Kok-an-huat tio̍h-ài siu-tsìng,
　　　　受害者才通上訴、
　　　　siū-hāi-tsiá tsiah thang siōng-sòo,
　　　　共罪洗清，
　　　　kā tsuē sé-tshing,
　　　　轉型正義做甲到。
　　　　tsuán-hîng tsìng-gī tsò kah kàu.
　﹡補償póo-siông：逐家對這个「償siông」較毋知影發音。
　﹡著愛tio̍h-ài：就是必須愛按怎，一定愛按怎。
　﹡才通tsiah thang：著愛按怎，才通按怎。
　　例：咱著愛設法，咱才會通生存。
　　頭前愛按怎做，才會當按怎。

二、講予你知：白色恐怖
講著轉型正義，咱就一定愛先了解，白色恐怖佇咱臺灣的影響。
◎戰後臺灣重要年份
　欲來了解白色恐怖，咱一定愛知影戰後咱臺灣幾个重要的年份。
＊1945年，日本投降，二戰結束
＊1947年，發生二二八事件
＊1949年，5月20日，陳誠宣佈臺灣省戒嚴令
　1947年，二二八事件，但是戒嚴是佇咧1949年。
　一般來講，「戒嚴」就是國家發生戰爭，抑是動亂等等，
　有的人講「戒嚴是因為二二八事件」，二二八事件的時陣，確實嘛有戒嚴一遍，
　但是這个後壁，影響咱遮爾久長的戒嚴，其實佮二二八事件毋是真直接的關係。
＊1949年，12月中華民國政府徙來臺灣
　1949年5月宣佈戒嚴，1949年12月中華民國政府徙來臺灣，所以
　咱知影臺灣去夆宣佈戒嚴的時陣，中華民國政府猶未規个徙來。

◎戒嚴令：戒嚴欲來宣佈，一定是國家有戰爭，抑是動亂
　但是佇咧咱臺灣彼个時陣，其實並無這款情形。為啥物會去予宣佈戒嚴？
＊原因：中華民國發生國共內戰
　因為中華民國亻因佇咧亻因的大陸地區，當咧發生中國國民黨佮中國共產黨的內戰，
　咱臺灣其實離戰場是真遠，所以亻因中國規區先宣佈戒嚴了後，
　咱臺灣足晏的才夆宣佈戒嚴。
＊臺灣人無奈夆限制自由佮基本人權
　（集會結社、言論出版、旅遊等）
　非常的無奈，咱夆宣佈戒嚴，半年以內，規个中華民國就徙來咱臺灣，
　結果變成因為國民黨佮共產黨內戰，影響咱臺灣30、40冬，咱臺灣人非常無奈，
　去夆因為戒嚴，限制自由佮基本人權。
　包括集會結社、言論出版、旅遊的自由攏總無，這攏去夆剝削去。

＊通過針對中共「特別刑法」：
　《懲治叛亂條例Tîng-tī Puān-luān Tiâu-lē》→二條一：唯一死刑
　除了戒嚴以外，上蓋重要的就是戒嚴了後，中國國民黨又閣通過濟濟的法律，
　其中有一个非常重要、非常惡質的，就是《懲治叛亂條例》，
　這个條例講起來是針對中國共產黨，欲完全消滅共產黨一个特別的刑法。
　這个條例內面有一个非常有名，佇咱臺灣，彼號做「二條一」，
　內面有講著，你若是意圖欲創啥創啥了後，你唯一死刑。
　這个「意圖」的意思就是「伊講你有就有」，這是一个非常惡質的法律。
　咱臺灣有真濟人就是因為這个「二條一」，性命就烏有去。
＊1991年5月22廢止
　這个條例是佇1991年5月22廢止，這个年份算講是咱白色恐怖結束的時間。

◎凊彩掠人、凊彩考銃
　因為拄才所講的法律，條件、背景之下，佇咧三、四十冬內面，咱臺灣人予人凊彩就掠去，
　凊彩就夆銃殺去。比如講，
　你若參加一个讀冊會，政府就會講「你有意圖」，就共你掠去。
　掠去了後，有當時仔無審判，就算講有審判，嘛是真簡單的軍法審判，
　甚至無公開，嘛定定有直接搝去銃殺。這是非常的濟。

＊抓耙仔通得著沒收財產35%做賞金
　而且閣有一條，彼个抓耙仔，你若是去掠著一个人，你會當提著伊沒收的財產35%做賞金。
　咱知影這款的制度之下，逐家攏互相無信任，你若佮一个人有冤仇，
　你就隨時會當去共做一个抓耙仔。
＊臺灣人基本權利無保障、性格夆扭曲
　所以這規个社會，攏非常恐怖的氣氛，咱臺灣人基本的權利攏無受著保障，
　而且逐家的性格攏夆扭曲。
　逐家定定聽著，咱每一个人心肝內，攏會家己檢查家己，我按呢敢有犯著啥物罪？
　這是非常的恐怖，到這陣攏有這款的影響。
＊官方報告：受軍審有20萬人以上
　咱官方的報告講，彼个時陣受著軍法審判，有20萬人以上，這閣是有審判的，
　咱就免講彼無審判的矣。
＊1960年，12萬6875人行蹤不明
　佇咧1960年彼个時陣，有12萬6875个咱臺灣人失蹤去，咱就知影這个影響有偌爾仔大。

◎共轉型正義做甲到
　雖然白色恐怖到這陣已經結束矣，嘛開始咧做一寡賠償的工課。
＊儘量賠償受害者
＊真濟事實無法度稽考
　可能序大毋敢共序細講，事實烏有去矣，抑是講
　有真濟人甚至揣無伊的親人，會當來共伊做主。
　所以講有真濟代誌，咱已經揣無去矣，就算講真好運，有提著補償，
　但是咱共想看覓，一个人的一生，按呢夆蹧蹋去，咱規个社會予按呢侮辱，
　真正賠償會當做到偌濟，這逐家會當思考。
＊四六事件／鹿窟事件
　這白色恐怖的代誌，咱逐家應該攏愛來了解，佇遮咱提供兩个事件，予逐家去調查一下，
　這馬網路時代，真濟資料咱攏會當揣會著，咱來看有「四六事件」、「鹿窟事件」，
　逐家會當去了解。
＊愛了解歷史，臺灣社會才通對無正常當中行出來
　轉型正義非常重要，對自色恐怖，每一个人咱攏應該愛來了解，
　按呢咱轉型正義才會當做甲到，咱臺灣的社會才會當對無正常當中行出來。

◎語詞
．網路bāng-lōo，毋是「蠓路báng-lōo」。(我家己加的。)
．信仰sìn-gióng：「仰gióng」有一个濁音的子音”g” 「仰gióng」，
　　　看著”g”就是有一个濁音。
．無奈bû-nāi：「無bû」佇遮因為是較抽象的形容，所以咱用文言音來講。
　這个”b”嘛是濁音。
．剝削bak-siah：攏是入聲，臺語特色之一，但是就是無仝款的喙形，
　　　一个是舌根的pak，一个是喉窒音siah。　　　　
．叛亂puān-luān：這个大部份人嘛攏毋知，咱這个是「叛puān」，
　　　咱一般以前定定聽著「phàn-luān」，彼是予華語影響。
　　　因為這字「叛puān」是伊的文音，「反叛huán-puān」。
．肅清siok-tshing：嚴肅的「肅siok」，這个名詞叫「肅清」。
．烏有去oo-iú--khì：講咱真濟臺灣人的性命，就按呢烏有去。就是無去。
．考銃khó-tshìng：夆銃殺，號做「考銃」，這嘛有腔口差，嘛有人講khónn-tshìng。
　　　這有兩種意思，咱遮當然是講銃殺的意思，
　　　但是嘛有人講「拍銃」，欲射銃的代誌，會當講「考銃」。
．抓耙仔jiàu/liàu-pê-á：有兩種意思，
　　　彼支扒癢(pê-tsiūnn)的家私，嘛有人俗稱「抓耙仔」。
　　　（《教典》：『指在背地裡打小報告、通風報信的人。』）
．沒收bu̍t-siu：咱一般生活上較無咧用。「沒bu̍t」仝款有濁音”b”。
．賞金siúnn-kim：咱這馬攏予「著獎」的「獎」影響，所以攏想講「著獎」就「獎金」，
　　　但是咱臺語本來是說「賞金」，賞你幾箍，幾圓的「賞金」。
．扭曲niú-khiok

三、看戲齣(hì-tshut)講台語
◎棺柴扛上山，無燒嘛愛埋。
　Kuann-tshâ kng tsiūnn-suann, bô sio mā ài tâi.
＊有的人無講「棺柴」，干焦講「送出山」爾，無一定講棺柴。「送出山，無燒嘛愛埋。」
　意思就是講「代誌做到遮矣，你著一定愛處理矣。」
　彼是形容到某一个地步，無按呢做無法度，都已經做到遮矣。
＊棺柴kuann-tshâ：臺語的語詞有的用法有真濟種的，譬如：
　　　一般上四常應該講「棺柴」，但是有的人對棺柴有禁忌，
　　　無愛直接講「棺柴」，所以可能講「大壽」、「大厝」，
　　　嘛是有人講「四塊枋」，所以進前咱臺語俗語有人講
　　　「生會過，雞酒芳；生袂過，四塊枋。」

◎聽某令較贏拜神明
　Thiann bóo līng khah-iânn pài sîn-bîng.
＊這句嘛是鬥句，「令līng」佮「明bîng」有鬥句。
＊咱較捷聽著的，是另外一句：
　聽某喙，大富貴Thiann bóo tshuì, tuā hù-kuì.。嘛是有鬥句。
　這款講咱某足重要的，閣有另外一句：
　一个某，較贏三个天公祖。
　Tsi̍t ê bóo khah iânn sann ê Thinn-kong-tsóo.
　按呢閣較偉大，比拄才彼兩句，咱愛加講幾遍矣。
## 2019.05.16《台語講世事》：媽祖佇台灣
慧盈老師：「好勢好勢」無「好勢」遐好勢。
林默娘Lîm Bi̍k-niû
插頭櫼仔tshah-thâu tsinn-á
包括 pau-kuat
一、看新聞講台語：超級有個性，白沙屯媽祖拄著插列，毋予軁轎跤
＊翻譯
1.華語：上萬名信徒，也聞風而至，空拍鏡頭可以看到。
　台語：萬外个信徒，聽著風聲嘛隨趕--來，
　　　　Bān-guā ê sìn-tôo thiann-tio̍h hong-siann mā suî kuánn--lâi,
　　　　對半空中翕相的鏡頭內會使看著。
　　　　uì/tuì puànn-khong-tiong hip-siòng ê kiànn-thâu lāi ē-sái khuànn--tio̍h.
　﹡『上萬名』，就是「萬外个bān-guā ê」超過一萬个。
　　若是無超過蓋濟，嘛會當講「萬捅个bān-thóng ê」，
　　若是無夠一萬个，會當講「成萬个」、「倚萬个」。

2.華語：排隊等著要「鑽轎腳」的民眾，將操場繞了一圈又一圈，場面擁擠。
　台語：排隊等欲「軁轎跤」的民眾，
　　　　Pâi-tuī tán beh ”nǹg-kiō-kha” ê bîn-tsiòng,
　　　　共運動埕圍甲一輾閣一輾，
　　　　kā ūn-tōng-tiânn uî kah tsi̍t-liàn/lìn koh tsi̍t-liàn/lìn,
　　　　規場是狹櫼櫼。
　　　　kui tiûnn sī e̍h-tsinn-tsinn.
　﹡『操場』：咱一般攏講「運動埕」。
　　是學校內面，予學生運動的所在，講「運動埕」較實在。
　﹡『一圈又一圈』：「一輾閣一輾」。
　　你若講圍做敢若一个箍仔按呢是會使，毋過無直接講「一箍」，
　　彼是咧算錢「一箍兩箍」，才有「一箍」。
　﹡櫼tsinn：共物件「櫼入去tsinn--ji̍p-khì」彼个櫼，毋但做動詞，嘛會當做名詞。
　　窒細縫的物件，就是櫼。
　　比如講有啥物空，你感覺彼空愛共補起來，填起來，就是用彼个。
　　譬如講這馬真濟厝內面有幼嬰仔的家長，可能驚囡仔去耍插頭，
　　插頭愛共窒一个物件入去，佇插座遐有一个物件窒咧，按呢就無法度用，
　　彼叫做「插頭櫼仔tshah-thâu tsinn-á」。
　　《教典》櫼tsinn：塞、擠。例：櫼入去。

3.華語：原本排隊排得好好的，卻不斷有人插隊，場面更混亂。
　台語：原本的隊伍排甲好勢好勢，
　　　　Guân-pún ê tuī-ngóo pâi kah hó-sè-hó-sè,
　　　　猶是直直有人插隊
　　　　iáu-sī ti̍t-ti̍t ū lâng tshah-tuī,
　　　　予場面變甲亂操操。
　　　　hōo tiûnn-bīn pìnn kah luān-tshau-tshau.
　﹡「好勢hó-sè」，本底就是足臺語的講法。
　　「排甲足好勢。」這是一種講法。
　　「排甲好勢仔好勢hó-sè-á hó-sè」加一字「仔」嘛是會使。
　　「好勢好勢」嘛算好勢，程度算是無「好勢」遐好勢，差一點點仔。
　﹡咱臺語古早攏是講「排列」，毋是講「排隊」。
　　「你愛排列喔！」
　﹡「直直按怎」佮「一直按怎」是攏會使。

4.華語：人潮擠爆，神轎班人員，為了維持秩序，只好扯開嗓門大喊，不要插隊。
　台語：人陣”甲夾“甲實捅捅，
　　　　Lâng-tīn kheh kah tsa̍t-thóng-thóng,
　　　　神轎班的人員為著維持秩序，
　　　　sîn-kiō-pan ê jîn-uân uī-tio̍h î-tshî tia̍t-sū,
　　　　只好大聲喊喝，毋通插隊。
　　　　tsí-hó tuā-siann hán-huah, m̄-thang tshah-tuī.
　﹡「插隊」怪怪，應該是華語詞，因為咱是講「排列」，
　　若照「排列」的講法，應該是「插列」才著。

5.華語：慢動作再看一次，神轎劇烈搖晃，像是媽祖婆也看不下去了，
　　　　「頻頻搖頭」。
　台語：慢動作閣看--一-改，
　　　　Bān-tōng-tsok koh khuànn--tsi̍t-kái,
　　　　神轎幌甲起雄，
　　　　sîn-kiō hàinn kah khí-hiông,
　　　　若像媽祖婆嘛看袂落去，
　　　　ná-tshiūnn Má-tsóo-pô mā khuànn bē/buē lo̍h--khì,
　　　　一直幌頭。
　　　　it-ti̍t hàinn-thâu.
　﹡「閣看--一-改」，中央仔有輕聲符號，重點是「看」，意思是「閣看」，
　　毋是強調幾擺的問題，看幾改無重要，是「看」。
　　比如講「閣看兩、三改矣。」嘛是會使，這就是輕聲符號的用法。
　﹡起雄khí-hiông
　　這「起」字誠趣味，咱臺語有足濟「起X」，
　　咱一般可能大部份咱會感覺像攏較負面的，
　　譬如講「起痟」、「起歹」、「起番」。
　　其實嘛無完全負面，
　　譬如講「起行」，就是咧講欲出發的意思；
　　「起磅」，就是敢若足有精神、足振奮的。
　　「起」主要是「開始按怎」，「起啥」、「起番」、「起畏寒」。

6.華語：白沙屯鑾轎不給鑽轎腳了，掉頭就離開。
　台語：白沙屯鑾駕無愛予人軁轎跤，
　　　　Pe̍h-sua-tun luân-kà bô-ài hōo lâng nǹg-kiō-kha,
　　　　踅頭就離開。
　　　　se̍h thâu tiō lī-khui.

二、講予你知：媽祖佇臺灣
講著媽祖，算是咱臺灣足重要足重要的信仰之一，只要媽祖一出巡，真正信眾滿滿是。今仔日咱就簡單來講一下，臺灣痟媽祖，到底是為啥物。
◎媽祖信仰的形成：
＊臺灣人「三--月痟媽祖」
　講著媽祖，逐家攏知影伊姓林，
　實際上「林默娘Lîm Bi̍k-niû」這个名字，愛到足後壁，中國明代的時陣，
　有一本小說《天妃顯聖錄》內面有記載，逐家才知影原來媽祖伊的名叫做「林默娘」。　
＊原福建湄洲人，女性，宋代皇帝封做「天妃」，伊就開始變做神矣。
＊明代神話小說《天妃顯聖錄》記載「林默娘」
＊清國施琅贏戰爭，皇帝封做「天后」
　媽祖為啥物佮政治開始有關係？
　大清國彼的時陣，施琅過去是鄭成功的人，但是伊走去清國了後，替清國共臺灣拍落來，
　伊贏戰爭了後，因為伊足驚仔皇帝會共怨妒，伊就講毋是伊的功勞，這攏是媽祖顯聖，
　臺灣才會當拍落來。所以就按呢，清國的皇帝就共咱的媽祖封做「天后」，
　（地位）愈來愈懸。
＊「神權君授」的中國政治
　對這个例，咱就知影，中國亻因的觀念是按呢「神權君授」，
　佮西方的「君權神授」是顛倒反的。

◎媽祖信仰佇臺灣
＊16、17世紀，原鄉信仰綴漳泉移民渡過烏水溝
　16、17世紀，中國的泉州人，抑是漳州人，足濟人對亻因的原鄉來到臺灣開墾。
　彼的時陣，烏水溝是非常非常的危險，
　有一个講法，「10去，6死，3留，1回頭」，這个比例非常的懸。
　所以真濟人對亻因的原鄉欲來臺灣的時陣，亻因就請亻因的信仰過來。
　包括(pau-kuat)有開漳聖王、廣澤尊王，抑是保生大帝，當然閣有媽祖。
＊海上女神媽祖成做先民渡海的心靈寄託
　因為彼的時陣，非常需要媽祖共咱保庇，做一个心靈的寄託。
＊做貿易的行船人嘛拜媽祖求平安
　彼的時陣，臺灣有足濟生理人攏是行船的，做貿易的行船人，嘛攏愛拜媽祖來求平安。
　就按呢慢慢仔慢慢仔，媽祖信仰佇咱臺灣就愈來愈興。
＊清國政府利用媽祖宣傳統治正當性
　因為媽祖逐家足信的，而且這步閣不止仔有效。

◎媽祖信仰本土化：一个信仰會當愈來愈興，佮在地有關係
＊二戰期間，臺灣各地媽祖顯聖的傳說故事
　譬如講媽祖替逐家共飛彈接落來，這馬佇彰化天后宮，嘛猶有一个未爆彈佇咧遐。
＊媽祖庇蔭共破病的人醫好勢，顯聖的故事，咱嘛定定聽著。
＊臺灣媽祖的慈愛母親形象
　咱知影伊其實是一位少女，但是來到臺灣了後，咱發現臺灣媽祖的形象，
　變做是母親的形象，這就是咱臺灣非常特別媽祖本土化，一个足有代表性的一件代誌。
＊政治歸政治，媽祖歸媽祖
　閣來，提醒逐家，當然信仰歸信仰，媽祖共咱保庇，這是一件代誌，
　過去可能無民主，統治者講啥，咱就信啥，但是這馬無仝款矣，
　咱的信仰歸咱的信仰，政治的代誌，咱愛家己有判斷的能力，
　千萬毋通閣親像古早仝款，予媽祖去予政治綁票，咱就規个攏相信。

◎語詞
．痟siáu：對一項代誌足迷。「痟啥物」、「興啥物」。
　　　「興hìng」主要是講有趣味，佮意啥物，程度無仝款。「痟」是閣較痟。
　　　「痟」猶閣有其它的意思，
　　　譬如講「彼隻狗當咧痟。」一般是咧講狗母，若是狗公就是當咧𪁎tshio。
　　　若是「痟啥物」是無分公的佮母的，
　　　若是「起啥物」，就有分，母的「起痟」，公的「起𪁎」。
　　　嘛有人共用佇咧講人。
．信仰sìn-gióng：「仰gióng」愛有一个濁音“ｇ”，這是咱臺語足重要的。
．生根senn-kin/sinn-kun：兩个音攏會使，是腔口差。
．林默娘Lîm Bi̍k-niû：
　　　「沉默tîm-bi̍k」的「默bi̍k」，可能逐家無蓋熟，是第8聲的「默bi̍k」。
．神姐sîn-tsiá：媽祖以前是一个「神姐」的信仰。
　　　「神姐」就是替人看未來好䆀的這款代誌（的人）。
　　　華語是共翻譯做『女巫』，或者是『巫婆』彼種，
　　　毋過，若是佇平埔族的傳統，伊是叫做「尪毉ang-î」。
　　　咱媽祖這種是共叫做「神姐」，是講媽祖這个角色。
．預測ī-tshik/ū- tshik：「神姐」會當替人預測未來的好䆀。
．託夢thok-bāng：毋是「脫夢thuat-bāng」，愛唸予著。
．顯聖hián-sìng：咱這是用文言音去讀這个詞。
．飛彈hui-tuânn：「彈tuânn」嘛是文音。

三、看戲齣(hì-tshut)講台語
◎佗一條筋去袚--著？
　Tó tsi̍t-tiâu kin/kun khì phua̍h--tio̍h?
＊「袚phua̍h」動詞有兩種意思，
　a.跤相袚，手相袚。《教典》：交叉相疊。
　　「跤毋通相袚，歹看。」
　b.共面巾、共衫袚起來。
　　《教典》：披、掛。例：伊共面巾袚佇肩胛頭。　　
＊「你有掛一條袚鍊(phua̍h-liān)。」
　　《教典》：串、條。計算項鍊等鍊狀物品的單位。
　　譬如講：袚巾、袚鍊，袚一个啥物貨，彼叫做「袚phua̍h」的動作。
＊這句話意思是講筋去「袚phua̍h」著，無正常。

◎三年一閏，好歹照輪。
　Sann nî tsi̍t jūn/lūn, hó-pháinn tsiàu lûn.
＊舊曆來講，三年就會加一个閏月。
　意思是講這馬是你好，可能後擺無一定好，
　意思就是「風水輪流轉Hong-suí lûn-liû tsuán」。
　這馬好，著毋通傷𪁎趒(tshio-tiô)，到時陣會閣輪就著矣。
## 2019.05.23《台語講世事》：反滲透法Huán-siàm-thàu-huat
．滲透siàm-thàu
．包括pau-kuat：「括」是讀做「kuat」
．華裔huâ-è
．買收bé /bué-siu，毋是「收買」

一、看新聞講台語：國家機密保護法三讀，涉密人員出境管制最長6年
＊翻譯
1.華語：最受矚目的條文，包含涉密人員出境需管制3年，
　　　　可延長一次，也就是說，往後最長管制6年。
　台語：上唌人目的條文，
　　　　Siōng siânn lâng ba̍k ê tiâu-bûn,
　　　　包括牽涉著機密的人員出國愛管制三年，
　　　　pau-kuat khan-sia̍p tio̍h ki-bi̍t ê jîn-uân tshut-kok ài kuán-tsè sann nî,
　　　　會使延長一改，就是講，以後上濟管制六年。
　　　　ē-sái iân-tn̂g tsi̍t-kái, tō/tiō-sī kóng, í-āu siōng tsē kuán-tsè la̍k nî.
　﹡『最受矚目』：「上唌人目siōng siânn lâng ba̍k」。
　　上受注意，上受關注，嘛是會使，咱用閣較口語的講法「上唌人目」，較媠氣。
　﹡唌人siânn--lâng：
　　例：伊都袂當食甜，你毋通閣提糖仔共「唌siânn」。
　　唌人目siânn lâng ba̍k：敢若人的目睭欲予伊唌去，注意彼个物件。
　﹡『包含』欲講「包含pau-hâm」嘛是會使，但是定定足濟人共『包括』照華語音讀，
　　所以佇遮講一下，是「包括pau-kuat」，佮「決定」的「決kuat」仝音。

2.華語：洩漏或交付國家機密於外國、中港澳或敵對勢力，可處3~10年有期徒刑，
　　　　如果洩漏或交付屬於「絕對機密」，最重可處15年。
　台語：共國家機密漏洩抑是交予外國，中港澳，
　　　　Kā kok-ka ki-bi̍t lāu-sia̍p iah-sī kauhōo guā-kok, Tiong-káng-ò
　　　　抑是敵對勢力，
　　　　iah-sī ti̍k-tuì sè-li̍k,
　　　　會使判三年到十年的有期徒刑，
　　　　ē-sái phuànn sann nî kàu tsa̍p nî ê iú-kî-tôo-hîng,
　　　　若是漏洩抑是交的是「絕對機密」，
　　　　nā-sī lāu-sia̍p ia̍h-sī kau--ê sī "tsua̍t-tuì ki-bi̍t",
　　　　上重會使罰十五年。
　　　　siōng tāng ē-sái hua̍t tsa̍p-gōo nî.
　﹡『洩漏』：咱是用「漏洩lāu-sia̍p」。

3.華語：要把長久以來，臺灣對於保護國家安全的漏洞，把它補起來。
　台語：長久以來，
　　　　Tn̂g-kú í-lâi,
　　　　臺灣對保護國家安全的空縫
　　　　Tâi-uân tuì pó-hōo kok-ka an-tsuân ê khang-phāng,
　　　　愛共伊補起來。
　　　　ài kā i póo--khi-lâi.
　﹡「空縫khang-phāng」，「空khang」佮「縫phāng」佇概念上是仝款的。
　　「空」嘛有大細空，「縫」嘛有大細縫，「隙」嘛有大細隙。
　　「隙khiah」，坐捷運定定會聽著「空隙khang-khiah」。
　﹡愛共伊補起來。彼个「伊」會當省略，「愛共補起來。」。

4.華語：執政黨立委強調，出境限制並不是針對中港澳，且往後的涉密官員，
　　　　也通通會受到管制。
　台語：執政黨立委強調，
　　　　Tsip-tsìng-tóng Li̍p-uí kiông-tiāu,
　　　　出國限制毋是針對中港澳，
　　　　tshut-kok hān-tsè m̄-sī tsiam-tuì Tiong-Káng-Ò
　　　　閣再講，以後牽涉著機密的官員，
　　　　koh-tsài-kóng, í-āu khan-sia̍p tio̍h ki-bi̍t ê kuann-uân,
　　　　嘛攏會受著管制。
　　　　mā lóng ē siū-tio̍h kuán-tsè.

5.華語：執政黨祭出甲動表決通過，搶在國會席次變更前，守住主權防線。
　台語：執政黨發出甲級動員表決通過，
　　　　Tsip-tsìng-tóng huat-tshut kah-kip tōng-uân piáu-kuat thong-kuè,
　　　　趁早佇國會席次有變動進前，
　　　　thàn-tsá tī kok-huē si̍k-tshù ū piàn-tōng tsìn-tsîng,
　　　　共主權的防線守予牢。
　　　　kā tsú-khuân ê hông-suànn tsiú hōo tiâu.

　﹡『甲動』華語傷過簡縮，予人毋知是啥物，咱是講「甲級動員」，講愛講予較清楚。
　﹡『搶在……之前』，「搶佇咧啥物時陣」，可能嘛是有人按呢講。
　　咱講「趁早」，是佇時間上，趁猶閣真早的時，來做這件代誌。

二、講予你知：反滲透法護臺灣Huán-siàm-thàu-huat hōo Tâi-uân
◎中國統戰滲透的威脅
這馬的世界局勢，有真濟國家已經開始提出亻因的法案，為著欲防止中國政府抑是中共，滲透入去亻因的政治、經濟制度，咱臺灣這方面做了如何？
＊臺灣受著上大的正面威脅
　到今，咱臺灣針對這款代誌，攏無一个完整的法案。
　雖然講這馬有真濟團體、學生組織等等，攏咧要求政府，這方面一定愛提出家己的做法。
＊世界局勢已經轉向
＊反滲透法案精神毋是禁止，毋是限制自由
　但是這个法案咧捒的時陣，閣有足濟的立法委員，徛佇咧較倚中國彼爿的立法委員，
　講「這款的《反滲透法》其實是一種禁止，抑是限制自由的做法。」
　這種反滲透法案精神毋是禁止，毋是限制自由。
＊反滲透法要求「事先愛予資訊公開透明」

◎美國的反滲透法：
　這馬當咧推捒的草案，是根據美國、參考亻因的反滲透法來做的。
＊《反中國政府佮中共政治影響力運作法》
　舊年，美國的眾議員提出的一个法案，因為美國發現中國政府利用美國的民主社會、
　自由開放的機制，當然包括（pau-kuat）言論自由、新聞自由等等，利用這寡代誌，
　推捒中國亻因家己政治的影響力。
　為著這款情形亻因提出這个法案，要求美國政府愛制定策略。
＊制定長期策略，反擊中國的政治影響力運作
＊保護華裔（huâ-è）、Uyghur（維吾爾）和Tibetian（圖博）移民
　防止亻因受著中國政府組織的攪擾。
＊用政府的力量檢驗機關敢受著中國買收抑控制
　美國發現中國會利用各種公開，抑是無公開的機會，去影響這寡亻因感覺有影響力的機關
　抑是個人，譬如講政治人物、商業人士，抑是學術界、媒體等等，所以美國希望這个法案
　會當要求，用政府的力量來檢驗這个機關敢有去受著中國的買收佮控制。
＊「外國代理人」愛公布伊佮中國的關係和資金往來
　這非常的明顯，譬如講「孔子學院」這款機構，就應該註冊講伊是「外國代理人」，
　一旦註冊了後，亻因這个機關就一定愛公布，伊佮中國的關係，猶閣伊背後的資金往來，
　清清楚楚，予逐家看予清楚，看這个機關敢是為外國人做工課。

◎澳洲（Ò-tsiu）立新法預防外國勢力干涉（kan-sia̍p）
　2018年，亻因家己有一个報告，提出亻因受著中國影響非常的深。
＊中國干涉澳洲政治十外冬
＊新法案嚴格禁止外國政治獻金
　這馬in閣提出兩个法案，要求嚴格禁止外國人政治獻金，按呢才袂當去影響in澳洲的政治。
＊強制遊說團體說明背後的勢力
　若是遊說的內容是針對外國，一定愛好好仔、清清楚楚說明背後的勢力。
＊對外國的例看臺灣
　對這兩个老牌的民主國家美國佮澳洲來看，咱臺灣啥物時陣，咱才會當朝野共同仝心，
　以這種法案來保護臺灣。
＊全民團結保護國家
　看起來，需要執政黨佇咧立法院多數的力量，閣來是人民絕對愛來做監督，共同來推捒
　這款的法案，保護咱的臺灣。

◎語詞
．局勢kio̍k-sè：看著尾仔有p、t、k、h，就是入聲。
．威脅ui-hia̍p：「脅hia̍p」仝款嘛有入聲p，入聲是咱臺語的特色，一定愛學起來。
．滲透siàm-thàu：這其實是新詞，因為以前無這款的現象。
　　　「滲siàm」生活中有咧用，一點一滴一直出來，沓沓仔滴落來，彼叫做「滲」。
　　　譬如講「滲水siàm-tsuí」、「滲尿siàm-jiō/liō」、「滲屎siàm-sái」。
．鼓吹kóo-tshui：仝款這个漢字有另外一个音kóo-tshue/ kóo-tshe，
　　　是「歕鼓吹」的「鼓吹」。咱遮講的毋是樂器，是講咱欲來鼓舞人按怎的意思。
．買收bé/bué-siu：華語佮咱臺語的詞序顛倒反的，咱是講「買收」。
．老牌láu-pâi：美國佮澳洲是老牌的民主國家。
　　　通常是咧講佇生活上，咱攏是講「老店」，或者是「啥物款的品牌」。
　　　咱無講「老lāu」牌，因為這个「老láu」的意思，是有歷史久，蓋有經驗，
　　　可能信用誠好彼款的，會用「老láu」，是這字「老」漢字的文言音，其中的一个文言音。
　　　會當講「老牌子lāu-pâi-tsú」，干焦這兩字，愛講「老牌的láu-pâi--ê」，
　　　「這个公司是老牌的。」譬如講「你的臺語誠老。」就是咧呵咾。
．攪擾kiáu-jiáu/kiáu-liáu
．澳洲Ò-tsiu：照漢字讀，不管有水字爿，抑是無水字爿，這字攏是「ò」。
　　　誠「奧妙ò-biāu」，「蘇澳Soo-ò」，「澳底Ò- té」。
．干涉kan-sia̍p：一个是舌尖的喙型「干kan」，一个是合脣的「涉sia̍p」，閣是入聲。

三、看戲齣(hì-tshut)講台語
◎你目空赤喔。
　Lí ba̍k-khang-tshiah ooh.
＊這句咧講怨妒（uàn-tòo）的意思。
＊「目空赤」有幾若種講法，上普遍聽著的「目空赤」，
　嘛有人講「赤目」，「紅目」、「目赤」、「目紅」。

◎我袂輸白跤蹄咧。
　Guá bē/buē-su pe̍h-kha-tê/tuê--leh.
＊「白跤蹄」直接的意思，就是跤蹄是白的。
　不管啥物動物的跤蹄是白的，咱就講伊是「白跤蹄」。
　人無「跤蹄」，人是有「跤盤」。
　這个用法是佇戲劇上，意思是形容這个人敢若會共人帶衰，敢若會夆無好的代誌、
　歹運這類的。
　但是以早佇傳統觀念，主要攏是咧講查某人，會共人帶衰的查某人。這是算較古早的講法。
## 2019.06.06《台語講世事》：南北粽大戰
一、看新聞講台語：肉粽無包肉，包鬼頭刀，臺東魚粽漁村美食
＊翻譯
1.華語：扒開外表散發油亮光澤的粽子，竟然聞到一股濃郁的海味，
　　　　因為裡頭包的可不是普通的內餡，而是一塊塊厚實的鬼頭刀。
　台語：共外表金滑光爍爍的肉粽敨開，
　　　　Kā guā-piáu kim-ku̍t kng-sih-sih ê bah-tsàng tháu-khui,
　　　　煞鼻著足厚的海味，
　　　　suah phīnn tio̍h tsiok kāu ê hái-bī,
　　　　因為內底毋是一般的餡，
　　　　in-uī lāi-té m̄-sī it-puann ê ānn,
　　　　是一塊一塊結實的飛烏虎。
　　　　sī tsi̍t-tè-tsi̍t-tè kiat-si̍t ê pue-oo-hóo.
　﹡金滑光爍爍kim-ku̍t kng-sih-sih：可能是足油的款。
　　咱一般會講「皮膚足金滑的」，抑是啥物物件足釉(iu)的，嘛會講「金滑」。
　﹡敨開tháu--khui：就是強調「敨tháu」的動作。
　　敨開tháu-khui：「敨」變調，是共開開(khui--khui)的意思，「開」強調。
　﹡餡ānn：餡本身，一定是佇內底，咱講「餡」就會使。無「內餡」、「外餡」。
　﹡『一塊塊』：一塊一塊tsi̍t-tè tsi̍t-tè，咱的第一个「塊」愛變調。
　　一杯一杯tsi̍t-pue tsi̍t-pue
　　一个一个tsi̍t-ê tsi̍t-ê
　﹡『鬼頭刀』：這就是魚的臺語名「飛烏虎pue-oo-hóo」。
　　咱有一寡動物會講「啥物虎」，表示對彼項物件有威脅性。「飛烏虎」愛食飛烏。

2.華語：蒸籠上白煙裊裊，打開蓋子，一顆顆飽滿的魚粽好誘人。
　台語：籠床當咧衝煙，
　　　　Lâng-sn̂g tng-teh tshìng-ian,
　　　　共蓋掀開，
　　　　kā kuà hian-khui,
　　　　一粒一粒飽滇的魚粽足唌人。
　　　　tsi̍t-lia̍p tsi̍t- lia̍p pá-tīnn ê hî-tsàng tsiok siânn--lâng.
　﹡『蒸籠』：咱是講「籠床lâng-sn̂g」。
　　佮「眠床」的「床tshn̂g」，漢字仝款，是白話音「sn̂g」。
　﹡「當咧」按怎，「當咧衝煙」，一直衝起來，衝起來。
　﹡「衝煙tshìng-ian」：「衝起來」的「衝」，是這字漢字，毋是tshiong。
　﹡華語『打開』，『打開蓋子』，遮有語法的問題，
　　咱是講「共蓋拍開」，「共蓋掀開」，「共啥物」做一个動作。
　﹡『一顆顆』：一粒一粒tsi̍t-lia̍p tsi̍t- lia̍p。
　﹡『飽滿』：飽滇pá-tīnn。
　﹡足唌人tsiok siânn--lâng，一定愛強調「唌siânn」，因為你無需要強調「人」。

3.華語：肉質鮮嫰的鬼頭刀魚，醃製成鹹魚後，每到端午節也能入粽，更成為餐廳的特色料理。
　台語：肉質鮮閣𩚨的飛烏虎，
　　　　Bah-tsit tshinn koh khiū ê pue-oo-hóo,
　　　　豉做鹹魚了後，
　　　　sīnn tsò kiâm-hî liáu-āu,
　　　　逐冬五月節/肉粽節嘛會當提來縛粽，
　　　　ta̍k-tang Gōo-gue̍h-tseh/Bah-tsàng-tsueh mā ē-tàng the̍h-lâi pa̍k-tsàng,
　　　　閣變做餐廳的特色料理。
　　　　koh piàn-tsò tshan-thiann ê ti̍k-sik liāu-lí.
　﹡『鮮嫰』：「鮮閣𩚨tshinn koh khiū」，彼个口感。
　　「𩚨khiū」是咱臺語一个字，寫做這个漢字，愛注意聲調，是第7聲，
　　毋是英文字母Q (khiu)的聲遐爾懸，因為華語無中長音，才變懸去，走音。
　﹡「豉sīnn」是按呢寫，「蔭豉仔ìm-sīnn-á」的「豉sīnn」，毋是「鼓」。
　﹡「節」的講法，有人講「五月節」、「五日節」，嘛有人講「肉粽節」。。
　　tseh / tsueh 是腔口差，無仝的講法。
　﹡「縛粽」，咱粽是用「縛」的，毋是「包」肉粽。

4.華語：連包裹的葉子都很特別，不是竹葉，而是用月桃葉，讓濃濃的海味外，
　　　　多了股淡淡的月桃香氣。
　台語：連縛粽的葉仔都真特別，
　　　　Liân pa̍k-tsàng ê hio̍h-á to tsin ti̍k-pia̍t,
　　　　毋是竹葉仔，是用月桃葉仔，
　　　　m̄-sī tik hio̍h-á, sī iōng gue̍h/ge̍h-thô- hio̍h-á,
　　　　予肉粽除了有厚厚的海味，
　　　　hōo bah-tsàng tû-liáu ū kāu-kāu ê hái-bī,
　　　　猶閣有淡薄仔月桃芳味。
　　　　iáu-koh-ū tām-po̍h-á gue̍h/ge̍h-thô phang-bī.
　﹡「連…都…(liân…to…)」的句型，這馬誠濟人袂曉用，愛共抾轉來用。

5.華語：其他地方少見的魚香肉粽，被形容鮮而不腥。
　台語：別个所在罕得看的魚肉粽，
　　　　Pa̍t-ê sóo-tsāi hán-tit khuànn ê hî-bah-tsàng,
　　　　予人講是有鮮閣袂臭臊。
　　　　hōo lâng kóng sī ū tshinn koh bē tshàu-tsho.
　﹡『少見』就是「罕得看hán-tit khuànn」，「稀罕hi-hán」的「罕hán」。
　　「這件代誌足罕的。」
　　「足罕的」，就是發生的機會足少的。
　﹡有鮮閣袂臭臊 ū tshinn koh bē tshàu-tsho
　　「臭臊tshàu-tsho」本來是咧講魚抑是肉，彼款動物才有的氣味。
　　「臭tshàu」是一个形容，是相對的。譬如講，植物就無啥物味，
　　動物就有，無仝款的動物，無仝款的一寡特殊的氣味，所以講「臊tsho」，彼種味。
　　講「臭臊」的時陣，是講這个物件特有的「鮮」的味，動物的味，無一定講是歹去。
　　「臭賤tshàu-tsiān」嘛佮「臭」無關係，意思是敢若講較無人欲愛，抑是較無價值。

二、講予你知：南北粽到底有啥物無仝
◎在地食食（tsia̍h-si̍t）文化：
＊臺南肉圓用炊的，彰化肉圓用糋的
＊嘉義人食冷麵愛摻白醋（美乃滋mayonnaise）
＊臺中人食煎包愛共醬料灌入去內底

◎南部粽佮北部粽
＊縛粽的葉仔無仝
　南部：麻竹葉，較有芳味
　北部：暗黃色的筍殼
＊煮法無仝
　南部粽：生米包熟的料，才閣煠甲熟
　北部粽：米佮料愛先炒甲半熟，才閣炊予熟
＊餡無仝
　南部粽：精肉、三層肉、香菇、卵仁、紅蔥頭、口味較單純
　北部粽：豬肉、豆干、竹筍、滷卵、香菇、蝦米等等，滋味較厚

◎空氣在人激
＊食物毋但是欲食予飽，佮人對土地的感情有關係
＊嘛佮逐家的生活經驗有關係
＊佮意就好
＊肉粽是秫米（tsu̍t-bí）做的，毋通食傷濟

◎語詞
．炊tshue：『蒸』，北部粽就是用「炊tshue」的，炊予透。
　　　炊飯，九層炊káu-tsàn-tshue。
．糋tsìnn：『炸』，就是咱臺語的「糋tsìnn」。
．炸tsuànn：炸豬油。
．煠sa̍h：一鼎燒水，共物件擲入去（煮予熟）。愛講「煠青菜」。
　　　小可仔成Shabushabu（『涮涮鍋』）按呢，共菜小「燙thǹg」一下。
　　　《教典》
　　　﹡煠：『以白水煮。把食物放入滾水、不加其他佐料的一種烹飪法。』
　　　﹡燙：『一種烹調方法。將材料在滾水中快煮後撈出。』
．縛粽pa̍k tsàng：絕對愛強調，咱毋是講『包粽』，咱是講「縛粽」。
．粽箬tsàng-ha̍h：葉仔有分「葉hio̍h」佮「箬ha̍h」。
　　　「箬ha̍h」是較𠕇的，外口彼沿的。
　　　縛粽用的葉仔，有一種是較幼的，一種較粗的，彼種粗的就是「粽箬」。
　　　《教典》箬ha̍h：籜ㄊㄨㄛ\。竹莖外、筍殼外或是植物莖稈外的硬葉。
．三層肉sam-tsân-bah /三層sam-tsân /三層仔sam-tsân-á：攏會使來講。
．卵仁nn̄g-jîn：無人咧包卵清（nn̄g-tshing）的乎？
　　　這馬可能有人包規粒滷卵的款。
　　　卵切塊，可能咱會當講「卵角」（兩角？^^），可能較細塊，「塊tè」可能較大塊。
．秫米tsu̍t-bí：『糯米』
．滯滯tù-tù：食秫米若是食傷濟，可能較會按呢「滯滯」，胃滯滯，抑是溢刺酸。
．溢刺酸it-tshiah-sng

三、看戲齣(hì-tshut)講台語
◎文言音：
　一人之智不如兩人相議。
　It jîn tsi tì put-jû lióng jîn siong gī.
　有較成歌仔戲、布袋戲就是採用這種的，文言音的講法。
　白話音：
　一人智毋值兩人議
　Tsi̍t lâng tì m̄-ta̍t nn̄g lâng gī.
　咱一般人就講這句，這是白話音的。
　意思就是「一个人的智慧，較輸兩个人互相參詳，得著的這个想法。」
　一个人想的角度，絕對有一寡無想著的部份，啊若兩个人鬥陣想，
　一寡鋩角可能會想著，可能會當「掠長補短lia̍h-tn̂g-póo-té」。

◎伊欲共我借這跤手環去轉踅一下。
　I beh kā guá tsioh tsit kha tshiú-khuân khì tńg-se̍h--tsi̍t-ē.
＊這「跤kha」手環，手環是「一跤一跤」。
　一「跤」襪仔(bue̍h-á)、一「跤」手指(tshiú-tsí)、一「跤」皮箱(phuê-siunn)
＊手「環khuân」，愛用白話音讀。
　本來有文言音「環huân」，一般用佇咧比較較新的，抑是生理這種物件。
＊轉踅tńg-se̍h：
　a.佇遮是「周轉tsiu-tsuán」的意思。
　b.這个空間敢若無夠「轉踅」。好比講，
　　你的車欲停咧車庫，彼个車庫足狹(e̍h/ue̍h)，這个空間敢若無夠「轉踅」。