# 2019.08.15《台語講世事》：原住民族日
## 一、看新聞講台語：正名25週年！「原住民族展覽」回顧正名歷史
1.華語：正名運動的訴求，包含要求成立原住民族事務的專責機關。
　台語：正名運動的訴求，
　　　　Tsiànn-miâ ūn-tōng ê sòo-kiû,
　　　　包括要求愛成立原住民事務的專責機關。
　　　　pau-kuat iau-kiû ài sîng-li̍p Guân-tsū-bîn sū-bū ê tsuan-bûn ki-kuan.
　　﹡「愛ài」字，佇咱臺語內面足重要的，定定咧用，有足濟意思。
　　　a.我「愛ài」你，你「愛ài」我，其中一種意思。
　　　b.這句的「愛ài」，一定愛按怎，無按呢袂使。
　　　c.親像講「你欲愛啥物貨？」就是「你需要」抑是「欲得著啥貨」想欲挃。

2.華語：臺灣原住民族從自己的土地上失去權力，到1980年代族群覺醒。
　台語：臺灣原住民族
　　　　Tâi-uân Guân-tsū-bîn-tso̍k
　　　　對家己的土地上失去權力，
　　　　tuì ka-kī ê thóo-tē siōng sit-khì khuân-li̍k,
　　　　到1980年代才有族群覺醒。
　　　　kàu 1980 nî-tāi tsiah ū tso̍k-kûn kak-tshínn.

　　﹡豐惠老師佇過去，對早期有參與一部份原住民運動的一寡事件，敢若是1989年左右，
　　　有原住民團體佮長老教會的一寡組織發起，去華西街救援「幼妓」，
　　　是按怎欲去遐？因為彼當陣，有足濟原住民查某囡仔夆賣去華西街做「幼妓」。
　　　有這个事件、運動，所以阿惠老師對咱原住民族的運動，佇1980年代有淡薄仔參與。

　　﹡「原住民族Guân-tsū-bîn-tso̍k」是一个總稱。
　　　族群覺醒tso̍k-kûn kak-tshínn，早期的覺醒是「漢原」之間的覺醒，有漢人的侵入，
　　　踏入去亻因的土地了，產生「原漢」的對立，有外人入來，才有想講家己是啥物族，
　　　別人是「外人」，但是彼當陣主要是單一的族，好比講泰雅，抑是布農，
　　　猶無形成一个集體的「臺灣原住民族」的這款觀念，是愈來愈有。
　　　早期咱講是9族，慢慢仔愈來愈濟族，亻因有家己的文化認同。
　　　這馬「原住民委員會」認定有16族，猶有足濟平埔族猶未列入。

3.華語：歷經10年的抗爭，終於在1994年，將「山胞」更正為「原住民」。
　台語：經過10冬的抗爭，總算佇1994年，
　　　　King-kuè 10 tang ê khòng-tsing, tsóng-sǹg tī 1994 nî,
　　　　共「山地人」改做「原住民」。
　　　　kā “Suann-tē lâng” kái-tsò “Guân-tsū-bîn”.
　　﹡『山胞』→『山地同胞』是華語的講法，
　　　咱一般臺語會講「山地人Suann-tē lâng」，或者是
　　　進前有其他的前輩有講「山內人Suann-lāi lâng」，這是早期，
　　　差不多佇1920、30年代彼陣，咱臺語社會內面有按呢共亻因叫。
　　　《臺灣文化協會》的先輩蔡培火先生，伊的批都有用羅馬字講
　　　「山內人按怎按怎」遮的代誌。

　　　所以咱臺語是講「山地人」、「山內人」，這是過去的講法。
　　　若是閣較過去，譬如有人講是「番huan」，有人感覺這字有歧視，
　　　早期來講，有兩種寫法的「番」，一个是日本人用艸字頭的「蕃」，
　　　咱大部份是無艸字頭的「番」。頭起先攏是咧講在地的『土著』，
　　　抑是在地的人。頭起先原本意思是為著欲區別，以日本人來講，
　　　看臺灣在地的人，閣分「生蕃」佮「熟蕃」。

　　　「生蕃」意思是講較原形，閣較濟無受「教化」彼款意思。
　　　到落尾，若像就是一種歧視，較落尾愈來愈刻板印象種種的關係，
　　　所以，愈來愈有感覺講講「番仔」敢若較無尊重。
　　　「番」這字，佮咱無仝款的行為、思考方式，外國來的，
　　　外地來的，無啥物了解，真生份的彼款人，有可能共當做番仔，
　　　咱臺語當中攏會用這字「番」，
　　　例：你今仔日毋通共我起番喔！你毋通番番！
　　　　　你足番的，講攏講袂聽。

4.華語：1997年第四次修正憲法，進一步正名做「原住民族」，
　　　　2016年行政院也特地核定8月1日「原住民族日」。
　台語：1997年第四改修正憲法，
　　　　1997 nî tē-sì-kái siu-tsìng hiàn-huat,
　　　　進一步正名做「原住民族」，
　　　　tsìn tsi̍t pōo tsiànn-miâ tsò “Guân-tsū-bîn-tso̍k”,
　　　　2016年行政院也特地核定
　　　　2016 nî Hîng-tsìng-īnn mā ti̍k-pia̍k hi̍k-tīng
　　　　8月初一「原住民族日」。
　　　　8 gue̍h tshe-it sī “Guân-tsū-bîn-tso̍k ji̍t”.

　　﹡主要是因為「8月初一」就是1994年8月1日修憲，共憲法內底
　　　所謂「山胞」這種名來共改做「原住民」。
　　﹡「原住民」佮「原住民族」有啥物無仝？
　　　原住民，敢若是強調蹛佇遮的人民。
　　　臺灣「原住民族」較強調整體、集體的族群權這款的概念，包括規个文化、血統等等。
　　　而且確實有足濟族。

## 二、講予你知：原住民(族)日
　◎8月初一「原住民(族)日」：
　　原住民族是上早佇臺灣這塊土地生活的民族，但是佇過去，亻因的地位佮亻因的權利，
　　煞是定定去予人放袂記。
　　過去，咱稱呼亻因，是用「番仔」、「高砂族」、「山胞」這款的名，
　　這寡名攏毋是經過原住民亻因的同意。
　＊1984年「臺灣原住民權利促進會」
　＊推動「正名運動」
　＊1994年修改憲法，正名「原住民(族)」
　　會當修改憲法這工，就是八月初一，這就是「原住民(族)日」的由來

　◎接紲進行的「正名運動」
　＊個人正名：無欲閣用漢字名
　　咱原住民族的朋友佇咧身分證頂懸，會當莫閣用漢字名。
　　因為每一个原住民族，in 號名攏有亻因家己的文化佮精神佇咧內面，
　　過去攏是強迫in 一定愛用漢字名，這馬會使用in 家己的族名。
　＊族名的正名：太魯閣族Truku
　　例：Taroko族，in是蹛佇花蓮，過去，in攏夆歸佇咧泰雅族(Atayal)
　　　　內面，但是亻因慢慢仔建立起家己文化的認同了後，就來申請講
　　　　亻因欲家己一个族，號做Taroko族。這就是族名的正名。
　＊行政區域的正名：吳鳳鄉→阿里山鄉
　　例：嘉義縣有一个阿里山鄉，佇過去夆叫做「吳鳳鄉」。
　＊山地佮河川的正名
　　山佮河這馬嘛當咧進行正名當中。

　◎破除汙名佮轉型正義
　　正名才拄開始爾，原住民族亻因閣有足濟代誌佮工課愛來進行，
　　包括愛破除汙名佮轉型正義。
　＊「吳鳳」神話造成的汙名
　　這馬的「阿里山鄉」，以前號做「吳鳳鄉」的吳鳳神話來講起。
　　相信真濟人攏聽過吳鳳的故事，以前閣囥佇咧國小的課本內面，
　　講彼个時陣，有一个官員，為著欲苦勸原住民族莫閣刣人，來服祀
　　神明，所以伊就犧牲家己的性命。

　＊日本時代凸顯原住民的未開化佮為國犧牲的奉公精神
　　但是後來，逐家就發現吳鳳的故事，其實是對日本時代開始宣傳的。
　　日本政府為著欲來突顯原住民in未開化，因為按呢才會當做in
　　當初時「理蕃政策」的理論基礎，閣來就是欲宣傳日本人非常重視的
　　為國犧牲的奉公精神，所以就共「吳鳳的故事」提來做宣傳。
　＊固有文化予人曲解
　　文獻記載當中，確實有吳鳳這个人，但是這攏是漢人的角度來看，
　　佇彼个所在的原住民族，in家己的傳說，抑是in流傳落來的記錄，
　　就佮漢人的角度是無仝款的。
　　所以「吳鳳的故事」予原住民族in固有文化予人扭曲(niú-khiok)去。
　　甚至有濟濟的原住民族的子弟，攏感覺家己的身份是無好的代誌。
　　這濟濟的物件攏是咱原住民族愛來處理的代誌。
　＊土地權、自治權嘛是原住民轉型正義的重點

結語：
　咱臺灣是一个多族群、多文化的社會，所以毋管你是早來，抑是慢到，
　我相信咱若尊重每一个族群的文化、歷史，這應該是咱所有臺灣人民
　應該有的價值才著。

　◎語詞
　．綿爛mî-nuā：一般是講足專注佇啥物代誌，足認真專注，閣足堅持。
　　　　程度閣較重的，閣較深的，就是「綿死綿爛mî-sí-mî-nuā」。
　　　　日常生活當中，你若講啥物人做代誌，足投入，足認真、頂真，
　　　　按呢就會使講「伊做代誌足綿爛的。」
　．拍獵phah-la̍h：對動物這个部份。
　．服侍ho̍k-sāi：有兩款意思，
　　　　一款意思就是好比講「服侍序大人」，有孝爸母這款的。
　　　　另外一種是講「奉待(hōng-thāi)神明」的意思。
　　　　例：你坐佇咧遐，是欲等人服侍喔？算第一種意思。
　．嚇驚heh-kiann：你毋通共我「嚇驚」。
　．厄運eh- ūn：咱有咧講災厄(tsai-eh)，出車厄這類的，無好的歹代誌。
　　　　原本是「車厄」，這馬逐家攏變做用彼个「禍」來取代。
　　　　啥物代誌出意外，就是「啥物厄」，無好的。
　．信仰sìn-gióng：這字「仰gióng」，一定愛有濁音“g”。
　　　　“g”是咱臺語的特色“濁音“。若是無“g”，就是綴華語音去矣。
　．精確tsing-khak：
　　　　咱毋但做代誌愛求正確，閣較愛精確，意思是攏愛足注意細節，毋通凊彩。
　　　　干焦「正」確，猶無夠，愛「精」確。
　．記載kì-tsài：嘛有一个音「記載kì-tsāi」攏會使。（《教典》無收這个音）
　　　　本身用「載tsài」，猶閣有另外一種用法：
　　　　親像掠魚，就是希望會當「滿船載」，就是規船攏載滿滿魚仔。

## 三、看戲齣(hì-tshut)講台語
.
　◎生理做袂成，仁義原在。
　　Sing-lí tsò/tsuè bē/buē sîng, jîn-gī guân-tsāi.
　　．仁義，敢若較少人用矣。這馬聽著的，「咱做人愛有道義。」
　　　「仁義」、「道義」可能強調的物件無啥仝，重點小可無仝。
　　　 -「道義」可能講究做人的道理，做代誌愛有講究義氣，這類的。
　　　　咱講「道義」敢若死釘釘，敢若無感情佇內面，愛按怎就按怎，照規矩來，
　　　 -「仁義」這个「仁」較強調有慈愛，有寬容、包容這方面。
　　　　有一个「仁」敢若人的味較濟，小可有這个意思。
　　．原在guân-tsāi：這馬可能較少人咧用。
　　　例：有啥物菜蔬煮較久，營養原在。

　◎你上好莫佮”亻因”有交插。
　　Lí siōng-hó mài kap in ū kau-tshap.
　　．交插kau-tshap：咱以早攏有咧講。
　　　咱一般會聽著人講「你莫插伊都好」、「你莫佮伊鬥陣」、
　　　「你莫佮伊做伙」、「你莫佮伊往來」等等這種講法，
　　　這馬攏講「交往」、「往來」、「鬥陣」、「做伙」等等。
　這句話就是攏莫有任何的接接、接觸，莫有啥物關係，一點仔都莫沐著，就是「莫有交插」。