# 《台語講世事》文字稿2020.01~04
※ 頁面索引,在頁面右側下方,淺灰色格子裡
## 每一集的標頭共點落去,有Youtube的影片連結
## [2020.01.02《台語講世事》:冬節由來佮意義](https://youtu.be/QATE2gTVKt8)
一、看新聞講臺語:府城冬節菜包配圓仔,食鹹配甜
◎翻譯
華語:外型呈現半月形,有點像餃子。
臺語:形生做像月眉,
Hîng senn/sinn-tsò tshiūnn gue̍h/ge̍h-bâi,
閣有淡薄仔成水餃。
koh ū tām-po̍h-á sîng tsuí-kiáu.
﹡『外型』直接講「形」就會使,若是欲講「外形」嘛是會使。
﹡生做senn/sinn-tsò:蓋口語的。
例:我生做真古錐。
﹡像tshiūnn、成sîng:兩句有一个像,一个成,意思仝款。
毋過,像tshiūnn,是白話音,成sîng,顛倒是文言音。
例:你佮伊足成的。
成sîng,愛寫做「成功」的「成」這字,逐家愛知影。
﹡月眉gue̍h/ge̍h-bâi:敢若目眉彼个形的月娘。
華語:蘿蔔絲和花生粉
臺語:菜頭簽佮塗豆麩
tshài-thâu-tshiam kah thôo-tāu-hu
﹡真濟咱普通時食的物件,有華語名佮臺語名,咱愛共救轉來,臺語名袂使予無去。
﹡簽tshiam:這種物件足臺語氣的,當然講一絲一絲嘛是會使。
咱礤(tshuah)出來的彼,咱就講「礤簽tshuah-tshiam」。
用「菜礤tshài-tshuah」去礤,礤起來就是簽的形。
「簽」是用礤的,佮「礤冰tshuah-ping」仝款。
﹡研麩gíng-hu:「麩hu」是用「研gíng」的,用這个動作。
﹡菜脯米tshài-póo-bí:菜脯做的物件,嘛是一絲一絲。
鼠麴粿tshí/tshú-khak-ké:草仔粿內面有菜脯米。
米bí:毋是一絲一絲,像講茶米、蝦米,嘛無算一絲一絲。
無一定干焦一粒米粒仔,細的、幼幼、小可長。
★食食正名tsia̍h-si̍t tsiànn-miâ:有兩層意思,
第一,「名」去夆搶去:譬如講「蘿蔔絲」佮「花生粉」這種的。
閣有一種是「讀音」去夆搶去:咱臺灣有真濟好食的物件,
譬如講『蚵仔煎』、『碗粿』、『菜脯蛋』,咱愛有這个意識,
因為食食的物件是足重要的文化,咱愛共輸出去全世界。
華語:這個皮是純糯米,沒有加粉的。
臺語:正秫米,無透粉的。
Tsiànn tsu̍t-bí, bô thàu hún--ê.
﹡正tsiànn:正經的、真正的意思,「正」的,毋是「假ké」的。
例:你是正高雄人,我是正臺北人,無假的。
﹡透thàu:本來是講「透濫thàu-lām」,透濫啥物物件,
摻tsham:是用佇量較少的。
例:親像咖啡欲摻糖無?
毋是摻糖欲規杯攏總,比咖啡較大量,是一點仔都好。
透種thàu-tsíng:人、植物,抑是啥物生物,透濫。
透冷水:這水傷燒,愛透冷水。
華語:業者和顧客都說不出個所以然。
臺語:頭家佮人客攏講無路來。
Thâu-ke kah lâng-kheh lóng kóng bô-lōo-lâi.
﹡講無路來kóng bô-lōo-lâi:「路」是理路,有條理,有理路。
講無一个條理,講無一个啥物物件,就是講袂出來。這就足臺語氣的。
逐家臺語攏退化去矣:講無路來 → 講袂來(kóng bē/buē lâi) → 講袂出來
講無理路來,講無路理來,攏會使。
毋通退化到傷少的語詞去。
二、講予你知:冬節
◎冬節
*一年內底暗暝上長的一工
冬節是一年內底暗暝上長的一工。
*用這工的天氣來預測過年的天氣,「焦冬節,澹過年」
咱有一个習慣,用這工的天氣,就會當知影過年的天氣好抑是䆀。
有一句話是按呢講的:焦冬節,澹過年Ta Tang-tseh/tsueh, tâm kuè/kè-nî.
若是冬節這一工,好天,焦焦,過年彼工就會澹澹。
*歇喘、養生食補的時機,愛有滿滿的食糧通囤
講著冬節,因為古早時,逐家攏咧作穡、作田,寒天的時陣,作物已經收起來矣,
逐家就利用冬節開始歇喘、養生、食補等等,彼的時陣,逐家攏愛攢足濟物件,
愛有滿滿的食糧(si̍t-niû)通囤。
*食圓仔、水餃佮扁食
佇這工,逐家攏會慣勢食圓仔,有的所在食水餃,有的愛食扁食。
無仝的所在,有無仝款食的物件。
◎糊圓仔丁、祭冬佮土地契約:這馬毋知敢閣有人按呢做?
*圓仔黏佇車窗仔、櫥仔、水井、豬牢頂頭
佇冬節的時陣,猶閣有一个習慣,愛糊圓仔丁,就是共圓仔,創一粒一粒細粒細粒,
共黏佇咧車窗仔、櫥仔、水井、豬牢頂頭。
*生查埔囝、囡仔嘛會𠢕大漢
因為「丁」這字,按呢厝內面就會生查埔囡仔、會生查埔囝,囡仔攏會𠢕大漢。
*祭冬:拜公媽、祭祖,辦桌「食祖」
除了食圓仔、糊圓仔丁以外,冬節猶有一个足重要的代誌,就是咱愛祭祖,祭冬。
咱厝內面愛拜公媽,譬如講宗親會,抑是祖厝,就會祭祖。
祭祖了後,逐家攢甲足腥臊,就來食飯、辦桌,號做「食祖」,等於是講予祖先來請的意思。
*作田人佮地主決定來年土地買賣
咱對古早流傳來,佇冬節這工,有真濟人來年土地欲按怎處理。
因為彼的時陣,真濟人是作田人,到這个時陣,農作物已經收成,明年欲繼續種無?
抑是這田欲買賣無?攏佇這个時陣來處理。
◎節氣
*中國人照「日頭」一冬的運行所訂的
冬節算是24節氣內面的一个。
講著24節氣,這是古早時漢文化箍仔的人,照日頭一冬的運行,來訂的節氣。
*作田人作穡的曆法根據
用這个物件,會當予作穡人,作田人,作穡的時陣有根據,啥物時陣愛創啥。
*2016年予UNESCO列入「人類非物質文化遺產」
佇2016年,予聯合國教科文組織UNESCO,列入去
「人類非物質文化遺產」。
*臺灣有家己的24節氣時間
這个節氣是按照中國的黃河,彼个所在規个的氣候來處理的,
但是咱臺灣毋是按呢,臺灣有較南爿,是亞熱帶,規个氣候攏無仝。
佇咧2011年,咱臺灣有根據過去的24節氣,有做一个調整,
所以咱臺灣有咱家己的24節氣的時間,有淡薄仔無仝款,
相信無講,逐家毋知影。
希望逐家有閒,會當了解一下,咱臺灣冬節的時間,佮古早時的冬節時間,有啥物無仝款。
◎語詞
.祭冬tsè-tang:意思就是冬節祭祖,拜公媽。
.食祖tsia̍h-tsóo:(頂面有介紹。)
.歇喘hioh-tshuán:招逐家看這兩字按怎寫。就是歇睏的意思。
歇一下,喘一下。
例:你欲歇喘一下無?
.糊圓仔丁kôo înn-á-ting:愈來愈罕見的款,過去是有這个風俗。
共圓仔糊佇咧窗仔門頂懸,足濟所在,看你欲糊佗,門窗,
抑是豬牢,糊豬牢予豬仔生較濟,看你欲糊佗就糊佗。
.食補tsia̍h-póo:冬節這款季節,寒sih-sih,愛食補。一般人逐家攏按呢。
咱臺灣冬節的時陣,敢若無講足寒,是借這个時陣窒喙空,窒趣味,
窒起毛摺(khi-móo-tsih)。
.圓仔粞înn-á-tshè/tshuè:咱咧挲圓仔的時陣,白的紅的一大塊。
粿粞kué-tshè/tshuè,嘛是這个「粞tshè/tshuè」,
做粿,做圓仔,攏是需要秫米(tsu̍t-bí)磨做漿(tsiunn),
了後,袋入去布袋內底,用石頭仔抑是啥物重的物件去硩。
重點就是伊有水,要共排除。
咱做菜頭粿,就毋是用粿粞,毋免用焦焦,是米漿這種的。
.挲so:是挲圓仔,毋是用「浞tshio̍k」的。挲足細力的,輕輕仔挲。
耎luán:愛較大力淡薄仔,可能範圍會閣較大。
.扁食pián/phián-si̍t:本來的音應該是pián,有的時陣會小可走音去,
有人會講phián-si̍t,pián-si̍t,攏有人講。就是「毋是餛飩」。
看字有人凡勢會講「餛飩」,因為菜單寫「扁食」的無濟。
.豬牢ti/tu-tiâu:主要是這个字「牢tiâu」。
例:我欲共你攬牢牢。仝款是這个「牢tiâu」。
.公媽kong-má:這毋是「阿公、阿媽」的意思。
◎節氣名:24節氣的名,有的無好讀,有時仔趣味的,就是講無一定完全文言音,
嘛無一定完全白話音,是看啥物詞。
.雨水ú-suí:用文言音。
.驚蟄kenn-ti̍t:這是文言音。
.芒種bông-tsíng
.立夏li̍p-hē:有「立夏補老爸」這款的俗語。
.處暑tshù-sú
.小寒siáu-hân
.大寒tāi-hân
三、看戲齣(hì-tshut)講臺語
◎你喙真俏乎?
Lí tshuì tsin tshio honnh?
按呢講通常攏是咧共人剾的。
你蓋𠢕講話彼个意思,喙花足媠的,誠有喙水(tshuì-suí),足𠢕講話。
.俏tshio:一般是講色緻(sik-tī)足豔麗,足濟色,彼款的形容。
除了喙講話足媠氣以外,咱嘛會使講…
例:你今仔日穿甲足俏的呢!
◎莫按呢姿勢了了啦,緊講。
Mài án-ne/ni tsu-sè--liáu-liáu--lah, kín kóng.
.了了--liáu-liáu:完全按怎,全部按怎。
食了了(liáu-liáu):攏共食予完的「了了」。你共食了了。這哪予你食了了去?
你莫姿勢了了(liáu-liáu),就是莫遐濟姿勢,攏全姿勢。
姿勢了了(--liáu-liáu)是強調姿勢,「了了」輕聲,一般按呢用。
例:你莫按呢借口了了(liáu-liáu)。
這个腔可能對「了liáu」較無禁忌,因為有的人對「了liáu」足有禁忌,
講「了liáu」就會「了liáu」的感覺,彼嘛是一種觀念,足驚「了liáu」的。
## [2020.01.09《台語講世事》:美麗島事件40週年](https://youtu.be/gHaCCkhM-is)
一、看新聞講臺語:美麗島事件40週年
◎翻譯
華語:重回事件現場,舉辦盛大的遊行活動。
臺語:重閣轉來到事件現場,
Tîng koh tńg--lâi kàu sū-kiānn hiān-tiûnn,
辦奢颺的遊行。
pān tshia-iānn ê iû-hîng.
﹡辦奢颺的遊行:「奢颺」是一種講法,嘛會當講「盛大」。
盛大sīng-tāi:較文言,較書面語。
奢颺tshia-iānn:較口語。
除了規模足大以外,一般來講,人足濟,可能口號、標語,
抑是啥物款的妝娗(tsng-thānn),足豐沛、足濟項、足多元。
誠濟人會曉講,袂曉寫,「奢颺」就是這兩字。
盛大sīng-tāi:書面語的講法,嘛是有咧用,口語較無咧用。
主要是「盛sīng」這字,可能會佮成功的「成sîng」的音,
可能會濫摻(lām-tsham),嘛有可能因為華語的影響,讀做「sìng-tāi(X)」,
愛讀做「sīng-tāi(○)」,是第7聲變做第3聲。
華語:立委頭綁布條,共襄盛舉。
臺語:立委頭紮布條來鬥鬧熱。
Li̍p-uí thâu tsat pòo-tiâu lâi tàu-lāu-jia̍t.
﹡紮tsat:這馬用一个動詞,可能逐家普通時無一定有聽過,
咱講「頭紮(tsat)布條」,毋是講「頭縛(pa̍k)布條」,
咱普通時講「縛pa̍k」佮「紮tsat」,意思是無精差偌濟,
生活中,咱會講「縛索仔」、「縛粽」,用法可能按呢。
古早時代,纏足濟輾的彼種物件,親像著傷,愛紮藥水布。
用啥物款的帶(抑是布)去縛,縛足濟輾、足濟輾,按呢。
「跤紮kha-tsat」嘛是仝款。
「紮tsat」藥水布,「紮tsat」跤紮仔 ←《教典》。
做兵的時陣,愛「紮跤紮仔」。
例:你敢有紮跤紮仔?
Lí kám ū tsat kha-tsat-á?
華語:讓人意識到民主的可貴。
臺語:閣較予人智覺著民主的可貴。
Koh-khah hōo lâng tì-kak tio̍h bîn-tsú ê khó-kuì.
﹡智覺tì-kak:會當講佮「發現huat-hiān」仝意思,
嘛有人講「意識著啥物代誌」。算是一个動詞。
例:蓋久無看著,我有智覺,你無智識喔?伊變足瘦呢!
有人變瘦,我攏無智覺。
華語:緬懷民主前輩所做的努力。
臺語:數念民主sia̋n-pái的拍拚。
Siàu-liām bîn-tsú sia̋n-pái ê phah-piànn.
﹡數念siàu-liām:想已經過往的人,咱會講「數念」。
大部份的人可能感覺講攏是用佇這種場合,其實無限制,無講干焦用佇彼號所在。
數念,就是思念的意思,有人講「數念」閣較臺語氣。
例:我足數念阮後生。無一定是佇國外,足遠的所在。
掛念khuà/kuà-liām:佮思念、數念,是差不多,有的人感覺講
「掛念」會閣較強調「操煩」、「煩惱」啥物貨,較加強彼个感覺,有淡薄仔無仝,
一寡仔精差。
﹡ sia̋n-pái:咱用臺語羅馬字寫,當然是臺語的字,臺語的語詞。
但是伊本來的語源是對日本來的,sia̋n-pái,第9調。
日本字:せんぱい(先輩),日本人讀這个詞的調,可能佮咱所講的臺語調,
無完全仝,已經共吸收,是臺語矣。
例:你欲食phí-sah無?這「phí-sah」就是臺語字。
可能有的人會講你哪會咧講英語啊?伊原本嘛毋是英語,是義大利語,
毋是一定按呢讀,毋過咱聽著,共轉做臺語化的講法,就變做「phí-sah」,
吸收外來源頭,外國話來的一个臺語詞。
義大利語:pizza。
二、講予你知:美麗島事件40週年
對咱臺灣的歷史佮民主來講,非常重要的,號做「美麗島事件」。
遮爾重要的事件,咱大部份的臺灣人,可能毋是真了解,希望今仔日的介紹,逐家會當有閣較深入的認捌。
「美麗島事件」到今,已經40年矣,這件代誌是按怎來發生?
◎事件的起頭
*高捷美麗島站就佇事件發生地附近
高雄的捷運站,有一站號做「美麗島站」,這个站非常的媠。
為啥物會號做「美麗島站」?就是因為這个所在,拄好就是「美麗島事件」發生的所在。
*黃信介一陣人辦《美麗島》雜誌
1970年代,臺灣民主拄拄仔欲開始,真濟黨外的雜誌一間一間一直出現。
彼个時陣,黃信介有一陣人就辦一个雜誌,號做《美麗島》雜誌。
*設分社,有勢頭,佮保守派起衝突(tshiong-tu̍t)
這个雜誌一下辦落去,全臺灣各地攏有設分社,而且足有勢頭,佇咧寫文章,抑是行動頂懸,
攏有針對家己的理念,佮保守派有起足濟衝突。
*1979年12月初10辦「人權日」活動,請無過
1979年差不多佇8月的時陣,辦起來了後,
佇1979年12月初10「世界人權日」這工,
《美麗島》雜誌亻因決定欲來辦一个活動,亻因訴求就是欲爭取自由、民主,
希望戒嚴會當解除等等。
請這个活動,結果一直無消無息。
◎事件的經過
*12月初1申請,12月初9警備總部禁止集會
佇咧12月初1申請了後,一直攏無共回答,一直到12月初9,高雄市政府突然間宣佈,
in佇12月初9的第2工,有一个演習,所以逐家攏袂當集會。
這个代誌傳出來,逐家感覺哪會突然(tu̍t/thu̍t-jiân/liân)間欲按呢?
*12月初9鼓山事件
﹡宣傳車夆擋,人夆掠,拍著傷。
12月初9,《美麗島》雜誌社有一寡義工,決定活動嘛是欲進行,
亻因就派宣傳車出來共逐家講,講第2工的活動嘛是欲進行。
結果,宣傳車來到市區咧宣傳的時陣,就去予警察共擋起來了後,義工又閣去予警察掠去,
閣拍著傷。
這个事件就號做「鼓山事件」,因為這就是佇鼓山來發生的。
這件代誌傳出去了後,雖然講人有放轉來,逐家攏非常受氣,
就閣較堅定講第2工的活動,一定愛共辦落去。
*12月初10美麗島/高雄事件
﹡活動照辦,予憲警圍起來封鎖。
﹡佇市區發生嚴重的衝突
註:中山中正敆路的圍環仔、瑞源路佮大同路的斡角,雜誌社高雄服務處門口
第2工就是初10,就是辦活動這工,「美麗島事件」就出現矣。
彼工的中晝時(tiong-tàu-sî),高雄市就開始遮嘛擋,遐嘛擋,攏總圍起來,共封鎖,
但是逐家繼續辦。
照計畫,佇暗頭仔開始遊行,因為本來欲辦活動的公園,去夆封鎖,所以逐家就遊行,
行到「美麗島事件」發生的所在,就是佇中正路佮中山路,敆路的圍環遮,就佇遮演講,
佇演講的中央仔,就發現警察、憲警攏共圍起來,逐家非常受氣,尾仔有足濟衝突,
猶有催淚瓦斯等等,是非常嚴重的衝突。
◎事件發生了後
*國民黨政府共責任捒予美麗島人士
代誌發生了後,國民黨政府共所有的責任,攏捒予美麗島人士。
*面對欹空(khia-khang),12月12記者會有喙講無話
第2工,12月12,面對國民黨政府的欹空,亻因開記者會,但是有喙講甲無話,
因為彼个時陣,規个媒體攏是國民黨來控制的,國民黨完全都講「這攏是美麗島人士,
亻因的陰謀。」。
*12月13政府全臺灣掠人,服務處查封
對12月13開始,國民黨政府全臺灣掠人,服務處攏共查封起來。
彼當時是非常大的事件,掠足濟人,用判亂罪欲共亻因判罪,甚至有死刑。
*律師、輿論、國際壓力:無判死刑
佇律師、抑是逐家的看法,閣有國際壓力之下,才無判死刑。
但是這个事件,就予臺灣的社會真大的影響。
◎事件予咱的啟示
「美麗島事件」予咱臺灣社會非常大的影響,咱臺灣規个社會開始關心民主。
「美麗島事件」了後,猶有「林義雄事件」、「陳文成事件」,逐家愈來愈感覺民主的路,
一定愛共行落去。
*目今的民主自由無簡單
以這馬的角度來看,目今的民主自由,真正是無簡單。
*Sia̋n-pái的血佮目屎換來的
是真濟Sia̋n-pái用亻因的血佮目屎換來的。
*政府早就咧監視雜誌社
對資料會當發現,彼个時陣,原來《美麗島》雜誌社的代誌,政府早就咧監視雜誌社,
雜誌社的文猶袂出來,政府就已經知矣。
咱就知影彼个時陣,「自由」是偌爾仔弱,偌爾仔恐怖的時代。
*傳承自由的火把,予火繼續著(to̍h)
徛佇咱這馬有自由、民主的社會,咱一定愛閣較堅定,共自由的火傳承落去,
予火繼續著(to̍h)落去。
相信這是咱所有的臺灣人民共同的責任。
◎語詞
.一陣人tsi̍t tīn lâng:陣tīn是較會當去算數量的用法,算會出來,算幾个。
一陣風tsi̍t tsūn hong:陣tsūn是較無法度去算數量。
這个時陣(tsūn),這嘛袂算的。
.勢頭sè-thâu:就是「勢力sè-li̍k」的意思。
咱臺語有一寡詞,攏有「X頭thâu」,親像手頭、力頭,
這寡詞算是咱臺語較特殊,無佮華語用仝款的字詞。
.憤慨hùn-khài:咱直接講「憤慨」嘛是會使。
閣有一个較少人聽著的詞「不目put-ba̍k/bo̍k」,差不多意思。
就是看著啥物無公平的代誌,你可能有一寡啥物款的情緒。
例:你看著啥物代誌,感覺足不目的。
例:逐家感覺足不目的,一定愛起來共反(píng)。
.敆路kap-lōo:佇中山路佮中正路「相敆的所在」。
咱這嘛可能講「相叉路」,這是另外一个講法。
這足臺語氣的,相敆,兩條路共敆鬥陣,就是「敆路」。
.斡角uat-kak:咱講轉彎踅角,斡角的所在。
例:彼个斡角,你看著啥物斡角,你都正斡入去。
.欹空khia-khang:一般來講,咱可能會口語干焦講「欹khia」。
例:伊蓋𠢕共人欹,共人欺負。
有的人干焦講「欹khia」,有的人講「欹空」,攏會使。
空khang,意思就是敢若揣啥物縫,共你陷害,共你指責。
挖一个空,欲共你陷害,共你欹。
.譴責khián/khiàn-tsik:仝這个漢字,有兩款的音,用佇無仝所在。
譴損khiàn-sńg:意思是迷信,抑是有啥物禁忌,「厚譴損」。
.目今ba̍k-kim:現此時(hiān-tshú-sî),這馬這个時陣。
目金ba̍k-kim:目睭有看的,目睭看會著的人。『明眼人』。
目暗ba̍k-àm:順紲講著。
.火把hué/hé-pé:因為美麗島事件,遊行的時,遊行者有攑火把。
三、看戲齣(hì-tshut)講臺語
◎腳數好,無跋一下仔輸贏是袂煞的。
Kioh-siàu hó, bô pua̍h tsi̍t-ē--á su-iânn sī bē/buē suah--ê.
.腳數kioh-siàu:過去本來是咧講「啥物角色」,佇咧舞台頂,咧搬戲的時陣,彼的角色,
這个腳數,彼个腳數。
這馬逐家攏講做「你腳數足好的。」,可能『很有膽識』,足有guts,足有氣魄的。
.無跋一下仔輸贏→跋輸贏pua̍h su-iânn:
意思就是「跋筊pua̍h-kiáu」,希望會當贏。看是輸,抑是贏
.是袂煞的sī bē/buē suah—ê:「煞suah」這字嘛足臺語氣的。就是講「袂結束」。
◎規工穿甲pha-lí-phá-lih,
Kui-kang tshīng kah pha-lí-phá-lih,
嘛毋知咧變啥魍。
mā m̄ tsai teh pìnn-siánn/sánn-báng.
.pha-lí-phá-lih:目前有一个講法,無蓋有證據證明。
有人講彼是佮「巴黎」有關係,因為巴黎是Phá-lih,
袂輸講「足巴黎的」,足時髦的,足時行的,足有Fashion的彼種穿插。
有人按呢講,毋過嘛無足確定一定是按呢,但是有這種講法。
.變啥魍pìnn-siánn/sánn-báng:
「魍báng」是妖魔鬼怪,毋是「蠓仔」的「蠓báng」。
## [2020.01.16《台語講世事》:馬拉松](https://youtu.be/cxVMjCLlgwA)
一、看新聞講臺語:虎尾馬拉松,興食雞肉假走標
◎翻譯
華語:虎尾馬拉松,『因為烤雞爆紅』。
臺語:因為雞肉烘衝紅
in-uī ke-bah-hang tshìng âng
﹡『烤雞』:雞肉烘ke-bah-hang。
當然你欲講「烘雞」、「烘雞肉」攏會使,但是因為咱以早有一寡物件攏是動詞囥後壁,
所以咱逐家來講看覓「雞肉烘」。
咱臺灣傳統食的物件,彼个物件名詞囥頭前,煮法動詞囥後壁,變做另外一个名詞。
米粉炒bí-hún-tshá
豆乾糋tāu-kuann-tsìnn
白菜滷pe̍h-tshài-lóo
蚵仔煎ô-á-tsian
做法攏囥佇後壁,這都是足臺語氣的唸法。為啥物會按呢?
例:烘雞肉 vs. 雞肉烘
若是名詞嘛是「烘雞肉」,按呢會佮動詞分袂清楚。
問:你欲挃啥? 答:我欲「烘雞肉」。
叫是你欲去「烘」雞肉?抑是你欲食「烘雞肉」?會有這款誤解。
所以咱足巧的,做法囥咧後壁,按呢較有分別。
例:頭家,我欲一塊『雞排』→ 雞排糋(tsìnn)。
華語:感覺好像嘉年華會。
臺語:袂輸是踩街迎鬧熱。
bē/buē-su sī tshái-ke/kue ngiâ-lāu-jia̍t.
﹡袂輸是...:這嘛足臺語氣的,這馬足濟人攏無啥會曉講。
逐家講「敢若是」,抑是「親像是」,當然攏會使,毋過,這是一个足傳統的講法。
袂輸是…,就是講袂輸伊,佮伊平就著矣,敢若是袂輸伊。
例:彼个馬拉松的選手,妝甲袂輸一隻雞咧。
佮雞來比,袂輸一隻雞。
﹡『嘉年華會』,這馬有人直接共這三字讀做「ka-liân-huâ」,
若準講欲佮原音差不多,「ka-liân-huâ」猶無講足倚。
﹡踩街tshái-ke/kue:若咧迎神,抑是啥物大活動,出動車隊人陣,足濟鬧熱的陣頭,
去宣傳啥物代誌,過去就號做「踩街」。
現代嘛是有共這个用法,用佇若像踅街、遊街這種講法。
﹡迎ngiâ:注意「迎ngiâ」的聲母”ng”,「迎媽祖」的「迎」。
華語:用大聲公提醒
臺語:用放送頭咧點拄
Īng/iōng hòng-sàng-thâu teh tiám-tuh
﹡放送頭hòng-sàng-thâu:『大聲公』這馬咱會使講伊是放送頭。
咱過去「放送頭」有足濟用法,
本來是咧講廣播電臺咧放送的彼種機器,抑是廣播站,彼个喇叭,彼號做「放送頭」。
嘛有人講彼叫做鬥喇叭放送。
其實是日本時代的「放送局」轉的,咱抾轉來用。
例:伊這个人是「放送頭」。
按呢表示講足愛四界放送人的消息,人的代誌伊攏足清楚,四界去共人講。
例:你毋通做「放送頭」。
﹡點拄tiám-tuh:咱較罕咧聽。點tiám,佮「拄tuh」是兩个動作。
合起來用,咱這馬意思是「提醒」,嘛有人用佇「暗示」,毋是足公開的提醒,
可能是私底下共你點一下,拄一下。
華語:我們要面對現實。
臺語:看/相較真咧
khuànn/siòng-khah tsin--leh
意思是你愛注意,毋是干焦袂輸你覕起來都無代誌,你就是真正愛去看,真正去相。
例:這个查埔人你愛看較真咧,毋通干焦看面。這是現實面。
華語:馬拉松的「花樣越來越多」。
臺語:齣頭愈變愈濟。
Tshut-thâu jú pìnn jú tsē
﹡『花樣』 → 齣頭tshut-thâu
﹡愈變愈濟jú pìnn jú tsē:變pìnn,是處理的意思。本來可能無遐濟,這馬愈變愈濟。
愈變愈濟,伊毋是「變piàn」文言音,是「變pìnn」白話音
變猴弄pìnn-kâu-lāng
變啥魍pìnn-siánn/sánn-báng
變鬼變怪pìnn-kuí-pìnn-kuài
看起來,若親像負面的,「變」本身無負面,是中性的,就是處理。
二、講予你知:Ma-lá-sóng(『馬拉松』)
◎歷史由來
*需要體力佮擋頭的「走標(tsáu-pio)運動」
欲走馬拉松,體力愛真好,而且愛足有擋頭,這毋但干焦身體上,心理、精神上嘛愛足有擋頭,
這款的走標運動。
*對古早時代的希臘來的
馬拉松愛走足久足久,足長足長的,到底伊是按怎來的?
是古早時,對希臘(Hi-lia̍p)來的。
彼个時陣,亻因發生一場戰爭,佇馬拉松這个所在。
*馬拉松之戰:戰贏了,兵仔對東北方馬拉松,走40公里轉去雅典
兩爿咧相拍,戰贏的彼爿,有一个阿兵哥,對馬拉松這个所在,
愛走轉去亻因國家的首都「雅典Ngá-tián」,去共逐家講,就按呢走走走,走40公里。
*宣佈勝利了,煞隨斷氣
走到雅典,去共逐家講了後,煞隨斷氣。
為著欲紀念這个阿兵哥,所以有這款的比賽。
這就是馬拉松比賽的由來。
*比賽的距離長度「馬拉松到雅典」的40公里
比賽的距離長度,是因為馬拉松到雅典,拄好是40公里。
◎奧運佮世界各種的Ma-lá-sóng
Ma-lá-sóng已經到全世界攏足衝足衝的,到底這馬的發展是按怎?
*1896年頭一屆奧林匹克運動會變做正式項目
Ma-lá-sóng佇頭一屆奧林匹克運動會,算是現代的奧林匹克比賽,
佇1896年的時陣,頭一遍就已經變做正式項目。
對彼个時陣開始,逐家就足認真看待Ma-lá-sóng運動。
*1921年才明確規定做42公里195米,抑是26英里385碼
佇1921年進前,逐家攏是走40公里左右。
但是一个比賽,若是無固定的長度,是欲按怎確定紀錄按怎保持。
所以佇1921年才明確規定長度,毋是40公里,愛42公里195米,
用另外一種英里的方式來算,就是這款的長度。
*世界各國逐冬有超過800个Ma-lá-sóng比賽
規模上大的六个:波士頓、紐約、芝加哥、倫敦、柏林佮東京
這馬講起來,全世界各國有幾場Ma-lá-sóng比賽?真正濟甲。
世界各國逐冬攏有超過800个Ma-lá-sóng比賽,你就知影,興這个比賽的人有偌爾仔濟。
這800場比賽當中,這馬有分級,有金級、有銀級、有銅級的,甚至聽講今年開始有白金級的。
這寡比賽看伊的規模無仝款,伊的服務無仝款等等,其中規模上大有六个:美國的波士頓、
紐約、芝加哥,英國的倫敦,德國的柏林,佮日本的東京,這六个城市所辦的Ma-lá-sóng,
算講是有咧做這種運動的人,絕對一定愛去參加的。
*超級Ma-lá-sóng(Ultramarathon)超過42公里的走標比賽
除了這寡比賽,有全馬,半馬(就是走一半的),猶來有一種號做「超級Ma-lá-sóng」,
就是42公里對in來講,攏是小case,會超過42公里。有當時仔,超級Ma-lá-sóng
會走6、7工遮爾久。
*1980年開始流行,通人知的選手是林義傑,佮南極超馬的陳彥博
咱臺灣有兩个通人知「超級Ma-lá-sóng」的選手,就是林義傑佮陳彥博這兩位。
◎主題趣味的Ma-lá-sóng
*梅多克Ma-lá-sóng:
沿路有23場品酒會,啉葡萄酒,食鮮蚵仔,鵝肝,和cheese
法國,梅多克(Medoc)這个所在,辦一个Ma-lá-sóng,
伊本來都是咧出一寡紅酒的所在,所以亻因辦的Ma-lá-sóng,
規路有23場會當啉葡萄酒,食大粒的鮮蚵,鵝肝佮cheese,非常趣味。
*水底Ma-lá-sóng:
穿55公斤的藏水沫服裝,兩禮拜內佇「尼斯湖」完成
佇水內面走Ma-lá-sóng,
所以你愛穿55公斤的藏水沫的衫,愛佇水內面一直走,走兩禮拜,
是佇蘇格蘭「尼斯湖」遮進行。
*2019年嘉義舉辦25公里的半程Bì-lù Ma-lá-sóng,食烘雞閣啉啤酒
咱臺灣嘛有辦,除了佇雲林辦的,2019年佇嘉義嘛有辦過一場,這是一半的Ma-lá-sóng,
啉bì-lù的Ma-lá-sóng,食烘雞閣啉bì-lù。
這馬有足濟Ma-lá-sóng會當參加,若是有興趣的觀眾朋友,嘛會當揀一、兩場仔來參加看覓。
◎語詞
.Ma-lá-sóng:咱的主題,是外來語來的,這種的用音譯就會使,就是照伊原本的音,
用咱臺語的習慣去講Ma-lá-sóng。
親像這種外來語,有三个音節的,tha-khú-sih(計程車)、
hoo-té-luh(飯店、旅社)、goo-lú-huh(高爾夫球),咱臺灣人攏會7-1-4,
因為遮的例是對日語來的。
Ma-lá-sóng無一定是對日語轉的,愛看原本的字母,組合,是啥物款。原音的字母,
上尾是on,咱無on的音節,毋過,咱有ong,所以若有on的,應該會共講做若像ong。
.擋頭tòng-thâu:做啥物代誌,會當持續足久,繼續足久的,會擋的。
.走標tsáu-pio:這个動作是「走tsáu」,以早比賽上尾站遐,
攏會有一支敢若標竿的物件,插佇遐,表示目標到矣,著向這个目標,骨力走,
看誰走較緊,上緊走到目標遮。
這就號做「走標」。
.捙拚tshia-piànn:是這个漢字「捙tshia」。「拚piànn」咱知影。
「捙拚」閣較有欲佮人一下拚輸贏,有時仔有彼種刁工欲按怎,
「捙」就是欲共捙予倒,捙倒,一定愛予對方倒去。
.距離kī/kū-lī/lî:算做較書面語,咱一般口語無咧講。
但是這馬現代,足濟所在會拄著這个詞,咱會當照字唸。
.通人知thong-lâng-tsai:逐家攏知。
通人,就是逐家,所有的人的意思。
例:通人呵咾。
「通人按怎」愛共抾轉來用。
.藏水沬tshàng-tsuí-bī:一般咱若講藏水沬,會較強調閣較深的所在,
毋是干焦泅水禁氣爾,猶閣藏去到足深的水底、海底,去做啥物活動。
較對應『潛水』的意思。
有人這个音「藏水覕tshàng-tsuí-bih」藏佇水內面,覕起來。
可能有地方差,咱辭典是收「藏水沬tshàng-tsuí-bī」。
.bì-lù,bì-luh,麥仔酒be̍h-á-tsiú:
bì-lù,bì-luh是外來語,有時仔會有無仝款的音。
咱一般會講「麥仔酒」。
「麥仔酒」強欲無去,逐家干焦會曉講bì-lù/luh,『啤酒』,
「麥仔酒」愛共會記得。
.晏uànn vs. 暗àm:這是咧比較時間。
例:時間誠晏,等一下欲轉去矣。時間足晏,這是晏uànn。
「暗àm」一般是咧講「天色暗矣。」
毋過這兩字嘛有人濫咧用。
例:我較暗會轉去。
嘛無啥物毋著,因為較暗的時陣,就是時間較晏矣。
「晏uànn」是寫這个漢字。
無一定愛講「遲到tî-tò」,咱會當講「晏到uànn-kàu」。
例:我今仔日都較晏來。
較晏起床、較晏到。按呢足有臺語氣的。
.晏uànn vs. 慢bān:慢,是動作慢的意思。速度、動作。
晏,猶原是時間的狀況(tsōng-hóng)。
我今仔日會較晏來。(O)
我今仔日會較慢來。(X)對臺語來講,小可較無妥當。
毋是講你跤手趖,當然有的人欲強調「跤手趖」。
慢來,咱會想講你是行路的時陣,是足慢的,抑是按怎。
火車車幫是講「慢分bān-hun」無毋著。
.起鼓khí-kóo:就是開始。因為以早傳統的戲劇,抑是活動,欲開始進前,攏會有鑼鼓,
予你知影講這戲欲開始矣喔!緊來喔!落尾共這个延伸的意思提來用,
任何代誌欲開始,攏會當講「起鼓」。
臺語是文化的寶庫,對這个詞,咱就知影,以前就是任何代誌攏愛起一个鼓。
三、看戲齣(hì-tshut)講臺語
◎惡馬惡人騎。
Ok bé ok lâng khiâ.
閣較無好,閣較惡質的啥物物件,抑是啥物人,一定有比伊閣較歹的來治伊。
你閣歹啊!有人比你閣較歹!
◎無彩人的物。
Bô-tshái lâng ê mi̍h.
對應另外一句俗語:
杜猴損五穀。
Tōo-kâu sńg/sún ngóo-kok.
.無彩人的物:這明明好食的、好啉的物件,你也食無滋味,你閣嫌歹食。
杜猴嘛仝款,五穀遮好的物件,去予杜猴食去。
徛佇杜猴的角度來講,杜猴都享受,感覺足好食的。
但是對人來講,這予杜猴食去,實在足無彩,足浪費的。
## 2020.01.23 過年,停播
## [2020.01.30《台語講世事》:湳地](https://youtu.be/qbUPa-GDIA8)
一、看新聞講臺語:香山湳地顧生態,行步道看蟳仔
◎翻譯
華語:螃蟹利用大螯,不停挖著沙土。
臺語:蟳仔的跤真大管,直直咧挖塗。
Tsîm-á ê kha tsin tuā kóng, ti̍t-ti̍t leh óo thôo.
﹡『大螯』:咱一般攏講「蟳管tsîm-kóng」,彼兩肢,足大肢的。
攏總是跤,毋過,彼兩肢特別大肢,咱會講「蟳管」。
因為伊嘛是跤,所以嘛有人講「蟳管跤tsîm-kóng-kha」,
敢若「夾仔ngeh-á」,號做「蟳管夾tsîm-kóng-ngeh」
﹡孽譎仔話gia̍t-khiat-á-uē:囡仔食蟳仔——興管。
Gín-á tsia̍h tsîm-á——hìng-kóng.
一般攏干焦講頭前,
例:這个人伊就是囡仔食蟳仔,意思就是興講話。
華語:在場的大小朋友都好驚奇。
臺語:大人囡仔攏感覺真奇巧。
Tuā-lâng gín-á lóng kám-kak tsin kî-khá
﹡『大小朋友』:咱講「大人囡仔」都好。
﹡『驚奇』:因為伊看的物件感覺足奇巧,『驚奇』愛看用佇佗,
佇這个所在,咱會當用「奇巧」這个詞,表示足罕得看著,
足濟細節,足濟幼膩(iù-jī)的物件會當看,這就會使講奇巧。
華語:因為很少有機會,能這麼近距離看螃蟹出沒
臺語:因為罕得有機會,
In-uī hán-tit ū ki-huē,
通看蟳仔振動看遮倚。
thang khuànn tsîm-á tín-tāng khuànn tsiah uá.
﹡罕得hán-tit:「罕咧」按怎,這馬嘛足罕咧聽著人講矣。
原本是「罕得」,抑是其它口語,「會用得」→「會用咧」,攏是簡化去。
例:我足罕得去的。←→ 我足捷去的。
這是足臺語的詞,愛共抾轉來用。
﹡振動tín-tāng:你毋通攏無「動」。(X)
你毋通攏無「振動」。(O)
﹡看遮倚khuànn tsiah uá:有的時陣,一句話會當有幾若種講法,
毋是一定干焦會當講一種講法。
華語:步道特別挑高
臺語:刁工牚予懸
tiau/thiau-kang thènn/thìnn hōo kuân
.牚thènn/thìnn:共伊托(thuh)予懸。
無一定用托的,可能有各種辦法,予伊較懸,攑懸。
運動會一種運動項目:『撐竿跳』→牚懸跳thènn/thìnn-kuân-thiàu
這馬一寡比賽項目,臺語欲按怎講,咱慢慢仔愛共伊規定出來。
﹡『招潮蟹』→管仙仔kóng-sian-á,有彼个管,伊的管足大肢的。
『彈塗魚』→ 花鮡hue-thiâu
『文蛤』→ 蚶仔ham-á:是按呢寫的。
有另外兩種講法:「蟯仔giô-á」,抑是「粉蟯hún-giô」,
有一寡咧飼的,抑是漁民,亻因會有這種講法。
華語:夕陽落下時,更是美得像一幅畫。
臺語:日頭落山的時,媠甲若一幅圖。
Ji̍t-thâu lo̍h-suann ê sî, suí kah ná tsi̍t pak tôo.
﹡『夕陽落下』→日頭落山,上口語。
夕陽si̍k-iông:,照字讀,是si̍k-iông,注意變調。
嘛有人講「黃昏的日頭」,有的所在會講「日頭落海」,
你若去淡水看,可能看著「日頭落海」矣。
﹡西照日sai-tsiò-ji̍t/li̍t:西照日的時間較長,就是差不多過晝(tàu)了,
有的所在,若日頭較猛(mé),都可能會有西照日,
這無一定是日頭欲落山才有。
日頭落山、黃昏的日頭時間算做較短,西照日時間基本上較長。
例:阮兜有西照日。亻因兜可能邊仔無厝,可能窗仔向西爿。
二、講予你知:世界湳地日
每一年的2月初2,就是「世界湳地日」,啥物是湳地(làm-tē)?
◎湳地是啥物
*三大生態系統:森林、海洋、湳地
咱地球頂懸,有三大生態系統:第一个是森林,比樹林仔閣較大,海洋、湳地。
對這字「湳làm」,咱就知影伊可能是一寡漉糊糜(lo̍k-kôo-muê),
但是湳地毋是遮爾仔簡單爾。
*鳥類的樂園:水鳥生湠、搬徙
「湳地」有真濟鳥仔,譬如講真濟水鳥,攏佇遐生湠、搬徙,
所以有人講「湳地」是鳥仔類的樂園。
*地球的腰子:有淨水的功能
「湳地」閣有一个名,號做「地球的腰子(io-tsí)」,遮爾媠的名。
因為湳地有一个足厲害的功能,就是伊有淨水的功能,敢若咱的腰子仝款。
*澹水地tâm-tsuí-tē/tuē、海墘、溪墘khe-kînn/khue、潭墘、埤pi
湳地猶有足濟種的,譬如講有澹水地,抑是海墘hái-kînn 仔類,溪墘仔類、
潭墘仔thâm-kînn-á類的,埤,這寡攏會使號做湳地。
◎湳地的定義
到底湳地是啥?定義足歹講,因為湳地佇水抑是土,佇咧中央仔就著,各種的生態系統,猶閣有各種學科的人,佇遮的研究,重點攏無仝款,所以欲定義嘛真困難。
*《國際溼地公約》的定義
這个定義就誠闊。
*天然/人工、長久/暫時、鹹水/汫水
這寡湳地,毋管是天然的,抑是人工的;抑是有當時仔有,有當時仔無,
是暫時的,抑是一直佇遐的,長久的;抑是有當時仔是鹹水的,有當時仔是汫水的,
攏會使號做湳地,攏包括(pau-kuat)在內,無一定是按怎。
*水是恬的、小可流振動
這寡湳地的水,有當時仔恬tshinnh-tshinnh,有當時仔小可流振動。
*洘流的水深無超過六公尺
這寡號做洘流的水,水深無超過六公尺
遮規个攏有包都著矣,這攏號做「湳地」,這是《國際溼地公約》,對湳地的定義。
◎湳地的作用
湳地就是漉糊糜,這款地敢有保留的意義?
*渡鳥、魚蝦、水草、蓮藕、蘆竹
經濟上,湳地有足濟鳥仔,有魚、蝦仔,水草、蓮藕、蘆竹等等,這寡攏會當利用。
*垃圾(lah-sap)物坐清、毒物予分解去
除了這以外,內面有足濟生態系統佇咧運作,足厲害的所在,就是一寡垃圾物件,
攏會當佇湳地的所在坐清,用天然的方式,來共毒物(to̍k-bu̍t/mi̍h)分解去,攏是天然的作用。
*調整水流,防止洘旱、做大水
因為湳地佮地下水有相透(thàu),閣會當調整水流,
會當防止真濟所在洘旱(khó/khò-huānn),抑是做大水。
*紅樹林:防止海岸蝕去,閘風
咱臺灣有真濟所在有紅樹林,紅樹林就是佇湖口,抑是海口邊,
會防止咱的海岸,去予海波浪蝕(si̍k)去,猶閣會當閘風。
◎《國際溼地公約》
*1950~1970年,德美用湳地來處理癩“疒哥”(thái-ko)水
*1971年2月初2簽署《國際溼地公約》
這馬全世界的人攏知,愛好好仔來保護、保存地球的腰子湳地。
這个公約,是佇1971年2月初2來簽署。
*定做「世界湳地日」
所以佇簽的這工,全世界就共2月初2定做「世界湳地日」。
*2013年通過《溼地保育法》,2015年實施
咱臺灣佇2013年,已經通過《溼地保育法》,2015年實施。
臺灣有足濟湳地,有的是國際性的,有的是地方性的,各種的湳地,逐家攏知影愛好好仔來保護,今仔日共湳地的智識,講予逐家知影,共同來保護地球的腰子。
◎語詞
.湳地làm-tē,湳仔地làm-á-tē,溼地sip-tē,澹水地tâm-tsuí-tē,湳地有足濟講法。
地tē/tuē。
因為咱臺灣沿海,足濟所在攏有湳地,講的是仝款的物件。
咱臺灣有足濟所在攏有湳地,所以足濟所在的地號名,嘛佮這有關係,但是攏夆改去矣。
例:枋橋有一个夜市仔,足有名的,這馬攏看漢字,讀做「湳雅夜市」,
其實就是「湳仔夜市」,表示彼个所在以早地勢低,有較溼的所在。
觀眾朋友會當想看覓,是毋是有一寡所在,伊的地號名號做「湳雅」、「啥物湳」,可能以前遐就是湳仔地。
.漉糊糜lo̍k-kôo-muê/muâi/bê/bêr:以早咱較無親近湳地,抑是袂講愛去湳地,
可能較無觀念的時陣,就是一窟漉糊糜爾,欲種啥也袂當種,欲飼魚,水濁濁(lô-lô),
按呢是欲按怎用?
水閣袂啥流動,敢若毋是啥物好所在,以早觀念佮這馬有變化,
因為漉糊糜是臺灣足濟所在,四界攏看會著,有足濟講法,無仝腔口差,有無仝的講法。
糜muê/muâi/bê/bêr:拄著「糜」有無仝的腔口差,照你的腔口讀。
.湳塗làm-thôo,爛塗nuā-thôo,爛溝糜nuā-kau-bê,路溝糜lōo-kau-bê
這攏是過去對湳地無了解,有一寡誤解,有冤枉都著矣。
當然湳地內底,有一寡所在,確實咱看感覺是漉糊糜,彼是無毋著,
只是講毋是規个湳地,攏共叫做漉糊糜。
這是以前咱就是按呢咧叫「湳地」。
.潭thâm:有天然的,嘛有人工的。毋是規个潭,攏叫做湳地。
有時仔是交界邊緣的所在,潭仔墘thâm-á-kînn遐可能較湳地
若規个(落去)lueh,攏水。潭來講,一般較深。
.埤pi:一般來講,可能小可較淺,毋過這無絕對。因為逐个所在,用法、叫法,無一定仝款。
咱有足濟地名,嘛攏有埤。譬如講這馬捷運有一站「後山埤」,
高雄遐有一个大埤,逐家攏毋知原本叫「大埤」,落尾夆改名,叫做『澄清湖』,
其實就是大埤。
落尾,逐家感覺講彼敢若「湖」咧,哪會無愛加一个「湖」?所以閣變做「大埤湖」,
在地的攏講「大埤」,嘛有大埤路,埤,足濟縣市攏有這个地號名,逐家會當去揣看覓。
真濟的地號名,因為咱過去毋知按怎寫,無了解伊的意思,都共伊改名,烏白改,
所以咱臺灣足濟物件攏需要正名。
.汫水tsiánn-tsuí:鹹佮汫,「汫」這字逐家較毋知欲按怎寫。
.蓮藕liân-ngāu:佇湳地,可能有這種植物(si̍t-bu̍t)。
愛注意藕ngāu的注音”ng”,擽擽ngiau-ngiau,嘛是”ng”。
.坐清tsē-tshing:足濟物件,攏會沉落來,『沉澱』的意思。
這足厲害,湳地會當予水坐清,自然的方式。
坐清除了用佇咧水以外,有的人講可能會當用佇延伸的意思,澄清(tîng-tshing)的意思,
毋過,嘛無一定是澄清的意思,
欲予啥物代誌,抽象的,是『沉澱』的意思,嘛會當用坐清。
.洘流khó-lâu vs. 滿流muá-lâu,滇流tīnn-lâu:攏有人講。
這種名詞足濟,有足濟講法,是舉較濟人講的。
海,抑是河,攏會使。『退潮』佮『漲潮』。
三、看戲齣(hì-tshut)講臺語
◎臺羅對照
昨昏阮翁做忌 Tsa-hng gún/guán ang tsò/tsuè-kī/khī,
我兩手空空 guá nn̄g tshiú khang-khang,
連門「攏」猶未踏入去 liân mn̂g lóng iáu-buē/bē ta̍h--ji̍p-khì,
就予人戽戽出來 tō hōo lâng hòo-hòo--tshut-lâi,
連一支香「攏」無點著 liân tsi̍t ki hiunn lóng bô tiám—tio̍h.
﹡攏lóng → 都to:佇遮應該是「都to」,毋是「攏lóng」。這字「都」足臺語的。
.做忌tsò/tsuè-kī:若有人過身的紀念日,來共拜,來共數念的意思
.戽hòo:這字誠趣味,一般講的是「戽水」的動作,共水戽出去,共水潑出去。
「戽」這字,不管鬥啥物字,差不多攏有這款意思,佮水有淡薄仔關係。
親像以早的「戽斗hòo-táu」、「戽杓 hòo-sia̍h」,這攏是用貯水的器具。
戽戽出來,就是趕出去的意思。
共水戽出去,共人戽出去。
## [2020.02.06《台語講世事》:臺灣音樂家 蕭泰然](https://youtu.be/baCVXlD07BI)
一、看新聞講臺語:蕭泰然音樂會美國演出
◎翻譯
華語:悠揚琴聲
臺語:合聽的琴聲若流水,
Ha̍h-thiann ê khîm-siann ná lâu-tsuí,
﹡一般講『悠揚』攏是咧呵咾的,所以咱講「合聽的琴聲若流水」。
﹡合聽ha̍h-thiann:「合X」,足臺語氣的。
例:你今仔日這軀,足合軀的,這衫仔褲足合軀的。
這物件足合用的。
這足合口味的。
﹡若流水ná lâu-tsuí:這足口語的講法,水咧有流振動,就是流水。
流水的另外一種用法,是咧講海水的『潮汐』,
就是洘流、滿流,嘛是號做「流水lâu-tsuí」。
文言音是「流水liû-suí」,口語是「流水lâu-tsuí」。
華語:從指尖不斷地流出
臺語:對指頭仔尾共揤出來
tuì tsíng-thâu-á-bué kā ji̍h/tshi̍h—tshut-lâi.
﹡鋼琴是用「揤ji̍h/tshi̍h」的,因為是共琴子共揤落去,才有聲。
華語:蕭老師臨終前說,
臺語:蕭老師欲去進前講,
Siau lāu-su beh khì tsìn-tsîng kóng,
﹡有關死亡的講法有足濟,有的人講「轉去」,「去矣」,
遮就講「欲轉去」,「欲去」進前。
華語:希望不要跟人家收錢,這樣他的音樂就可以揚名世界。
臺語:希望莫共人收錢,
hi-bāng mài kā lâng siu-tsînn,
按呢伊的音樂就通名聲迵四海。
án-ne i ê im-ga̍k tō thang miâ-siann thàng sù-hái.
﹡迵thàng:透(thàu)過、穿(tshng)過,對這爿一直到彼爿。
通常攏是咧講較長的,抑是可能彼个形容較無邊界,較無了,
意思就是足長足長,足遠足遠,足闊的彼个感覺。
例:這个磅空(pōng-khang)會使迵過一粒山,迵到彼爿。
國庫迵黨庫。
﹡四海sù-hái:這是用文言音讀,雖然看起來是數字「四」,
毋是一定是一二三四的「四」,是足濟的意思。
華語:除了國立臺灣交響樂團,還請來旅美的臺灣聲樂好手。
臺語:國立臺灣交響樂團掠外,
Kok-li̍p Tâi-uân Kau-hiáng/hióng Ga̍k-thuân lia̍h-guā,
閣邀請徛蹛美國的臺灣聲樂
koh iau-tshiánn khiā tuà Bí-kok ê Tâi-uân siann-ga̍k
高手/懸手。
ko-tshiú/kuân-tshiú/kuâinn-tshiú.
.對較濟字的名詞,到底按怎唸?臺語發音到底啥物款斷詞的原則?
Kok-li̍p Tâi-uân Kau-hiáng/hióng Ga̍k-thuân
咱看這八字,長落落,一般來講,若超過4字以上,一定會切,
切的意思,你可能欲強調伊的主詞,伊的啥物名詞,有幾種讀法。
Kok-li̍p-Tâi-uân-Kau-hiáng/hióng-Ga̍k-thuân
八字黏做伙,會感覺頭前若像傷濟字,會較聽袂清楚,
規个黏鬥陣,愛有變調,規个變調,最後一字無變。
國立、臺灣、共強調,交響樂團四字共黏做伙講。
Kok-li̍p# Tâi-uân# Kau-hiáng/hióng Ga̍k-thuân 立、灣無變調。
這是切長長長的名詞,因為傷濟字一般會較聽袂清楚頭前是啥,你可能後壁知,頭前是講啥。
﹡『除了...以外』→ 掠外lia̍h-guā。
﹡『旅美的...』→ 徛蹛美國的...khiā tuà Bí-kok ê…
「徛」佮「蹛」會當講仝意思,徛佇佗(tueh)、蹛佇佗(tueh),
會使講『住在哪裡?』的意思。
﹡高手ko-tshiú:咱一般可能捷聽著「高手」,
古早嘛有人講 → 懸手kuân-tshiú,因為「懸」是較白話講法。
懸山kuân suann,所以有人講「懸手kuân-tshiú」。
懸手kuâinn-tshiú,是腔口差。東垵(uann)會講kuâinn-tshiú。
註:澎湖縣望安鄉(Bāng-uann-hiong)有「東垵村」。
◎語詞
.鋼琴kǹg-khîm:西洋琴se-iûnn-khîm、洋絃琴iûnn-hiân-khîm、
銅線琴tâng-suànn-khîm、phi-á-nooh
.琴子khîm-jí/lí:鋼琴頂懸,白色、烏色、白色、烏色,號做琴子,一子一子。
嘛會使講 → 琴遏khîm-at。
.琴遏khîm-at:無一定是鋼琴爾,咱會當講絃樂,欲共絃創振動,
會用一个「遏仔」去共伊振動,彼叫做「遏」,
所以講「琴遏」嘛會使。
.彈琴tuânn-khîm:會使講「揤琴ji̍h/li̍h-khîm」,「掠琴lia̍h-khîm」
例:啥物人咧「揤ji̍h/li̍h」 phi-á-nooh?
.合奏ha̍p-tsàu:有人講佮挨吹唱e/ue-tshue/tshe-tshiùnn仝意思,
但是嘛有人講「挨吹唱」是一種形容,表示啥物攏會曉,足𠢕(gâu)的,幾若項,
會曉挨,會曉吹,也會曉唱,嘛有人按呢去用。
﹡拍拍phah-phik:『打拍子』,咱嘛會使講「嘹拍liâu-phik」,
但是嘛有人講「嘹拍」是「節奏tsiat-tsàu」的意思,
「嘹liâu」佮「拍phik」攏是某一種節奏,有淡薄仔無仝款,
「嘹liâu」有的講是較弱,有的是講長短差、有的是強弱差,
都是攏無仝款的節奏,一種是「嘹」,一種是「拍」。
延伸:無嘹無拍bô-liâu-bô-phik,平平,無啥物節奏。
有嘹有調ū-liâu-ū-tiāu,表示節奏、調,攏蓋有特色佮變化。
二、講予你知:臺灣的音樂家蕭泰然
◎音樂這條路
*1938年佇高雄出世
蕭泰然是佇高雄出世,是高雄人,亻因兜是一个教會家庭,
伊爸爸是齒科,媽媽是音樂家,所以伊自細漢對教會音樂,古典音樂攏真有認捌。
*對阿母遐音樂啟蒙
伊是對阿母遐得著音樂的「啟蒙khé-bông」。
*臺灣省立師範學院音樂專修科、日本武藏野音樂大學
蕭泰然大漢了後,科班出身,伊有去讀等於這馬師大音樂系的前身,
也就是臺灣省立師範學院音樂專修科。讀了,伊嘛去到日本進修,
去到日本有夠有名的這間學校武藏野音樂大學,去進修。
*1977年移居美國閣提著碩士;列入烏名單之一
學校讀完了後,伊就開始做老師,差不多做十年左右,因為厝內面的關係,
1977年去美國蹛,佇遐提著碩士(si̍k-sū)。
因為非常思念臺灣,做真濟歌曲,結果有一條歌予變做烏名單之一,
真長的時間攏無法度轉來臺灣。
◎音樂特色
*臺灣拉赫曼尼諾夫-最後的浪漫主義鋼琴詩人
講著蕭泰然,逐家攏有予伊一个封號,講伊是臺灣拉赫曼尼諾夫,
這是一个露西亞(lōo-se-a)人,是最後的浪漫主義的鋼琴詩人。
因為蕭泰然老師感覺應該對家己的母土,家己土地的音樂來蒐集,來創作,這點伊都做有夠。
*交響曲、協奏曲、歌劇、聖樂、鋼琴曲、小提琴曲、合唱曲、歌詩、藝術歌曲
蕭泰然老師伊的作品非常多元,交響曲、協奏曲、歌劇等等,伊攏做有夠。
*「我的音樂風格,就是有臺灣特色。」
有人問講蕭老師,你的音樂特色是啥物?
伊講伊的音樂風格,就是真有臺灣的特色。
*佇創作內底加入祖國臺灣的音樂元素
咱聽作品就知影,蕭老師共真濟臺灣的音樂,囥佇所做的音樂內底。
佇創作內底,加入咱祖國臺灣的音樂元素。
*臺灣民族風格佮西方音樂結合了真鬥搭
蕭老師共現代的音樂、西方的音樂,佮臺灣的民族風格做結合,而且閣結合甲真鬥搭。
*嘛有創作的心思,佮藝術文化的深度
◎作品佮著獎
有捌聽過蕭泰然老師的作品,你都知影,一下聽都真有臺灣氣。
*臺灣歌謠《望春風》、《黃昏的故鄉》、《思想起》改編做演奏曲
藍泰然老師佇美國的時陣,非常數念臺灣,伊的作品內面囥足濟伊思念的歌曲,
譬如講《望春風》、《黃昏的故鄉》、《思想起》
伊攏共改編做演奏曲。
*創作臺語歌謠:上媠的花、永遠的故鄉、毋通嫌臺灣等等
真濟會當唱出來的歌,譬如講《上媠的花》、《永遠的故鄉》、《毋通嫌臺灣》等等,
這攏是咱蕭泰然老師的作品。
*《出頭天進行曲》佇戒嚴期間夆列入烏名單
藍泰然老師佇美國的時陣,感覺講彼个時陣,真濟活動、運動,臺灣人無一條進行曲通好唱,
所以伊就提《出頭天》的文來創作,寫一个曲出來,變做《出頭天進行曲》,咱欲出頭天,
尾仔這條歌佇咱臺灣,真濟社會運動、街頭運動,攏會當聽著臺灣人民咧唱。
就因為按呢,伊佇戒嚴時期,去夆列入烏名單。
*《1947序曲(臺灣翠青)》、《福爾摩沙》交響曲
蕭泰然老師的作品非常多元,其中包括較大型的作品嘛有譬如《福爾摩沙》交響曲、
《1947序曲(臺灣翠青)》。
*行政院文化獎傳統類金曲獎「最佳作曲人獎」、「特別貢獻獎」
蕭泰然老師佇咱臺灣得著非常濟的獎,譬如行政院頒發文化獎予伊,
金曲獎嘛有頒發「上好作曲人獎」、「特別貢獻獎」。
*家己寫詞寫曲的《點心擔》佮《出外人》予人印象深刻
蕭泰然老師寫詞寫曲的《點心擔》佮《出外人》,這兩條歌上趣味的所在,
就是頭前咱講的歌曲,有可能蕭泰然老師干焦寫曲,寫旋律的部份,
但是《點心擔》佮《出外人》,攏是蕭泰然老師家己寫詞,家己寫曲,
所以這歌詞內面,充滿伊對臺灣的數念,臺灣食的物件,猶閣有伊的心情。
◎語詞:
*《點心擔》的歌詞
.心涼脾土開Sim#-liâng pî-thóo# khui.:啉著咱臺灣特色的飲料、
茶湯,就「心涼脾土開」,這蓋口語,定定攏有聽人咧講。
這是一个形容。脾土pî-thóo,算「胃口」的意思,予你胃口足有的。漢字是按呢寫。
「心sim」佮「土thóo」,咱欲強調,所以兩字攏無變調。
.天差地thinn-tsha-tē:
啉著美國汽水,佮咱臺灣的飲料是欲按怎比?天差地。
咱普通時仔嘛會使提來講,感覺差足濟,就是講「天差地」。
例:哎喲,你佮伊是欲按怎比?真正是天差地。
.真正𤺪tsin-tsiànn siān:足濟出國的朋友,攏有這个體會,講咱臺灣物件上好食,
食著外國的物件,感覺真正「𤺪siān」,厭𤺪(ià-siān)的意思,心想欲啉咱臺灣的飲料。
有足濟意思,有當時仔是心情頂懸的「𤺪siān」,有可能是身體疲勞。
例:我今仔日人𤺪𤺪(siān-siān)。
𤺪篤篤siān-tauh-tauh、軟𩛩𩛩nńg-kauh-kauh。
.楊桃湯iûnn-tô-thng:愛注意的是,咱用「湯thng」來講飲料。
.冬瓜茶tang-kue-tê:茶,無代表是『tea』,佇遮茶佮湯攏是飲料。這真正足臺語氣的。
湯,無一定有摻鹽,毋是煮湯的彼个湯,茶,無一定有茶葉。
這馬逐家干焦知影欲啉『珍珠奶茶』、「XX汁(tsiap)」。
↓↓歌內面是無講著,因為咱枵饞(iau-sâi),感覺好食,所以共囥入來。
.薁蕘ò-giô:逐家可能較無熟似這个字,原本是講ò-giô,「愛玉」是落尾才生出來的。
giô這字華語無,伊欲按怎轉,毋知按怎轉,就新號一个名。
咱這馬共伊救轉來,應該講是「薁蕘ò-giô」。
.粉圓hún-înn:這馬逐家干焦知影「真珠tsin-tsu」,去到日本,嘛是足紅的,
毋是號做真珠,亻因日本人家己閣共號一个名,
無彩,因為這个物件原本的名,是號做粉圓,臺灣的粉圓。
.貢丸kòng-uân:主要是咧講規个若球。
.肉圓bah-uân:因為肉圓無一定是彼个形,可能有的扁的,
有的三角的,無一定是圓(înn)的一丸。
這兩个「uân」,哪會無仝「uân」?
咱知影這兩種物件無仝,
一个是規个肉內底,閣有摻其它啥物貨去做,
肉圓是粉類的物件,皮閣包餡(ānn),所以是無仝的物件。
*《出外人》的歌詞
.言語會通心袂通giân-gí ē thong sim bē thong:
雖然伊會曉講英語,毋過感覺心猶是袂佮外國人相通。
咱若有出國去蹛過的人,攏應該有這種的心情。
三、看戲齣(hì-tshut)講臺語
◎掩來扯去,嘛賰無偌濟。
Am-lâi-tshé-khì, mā tshun bô juā/luā/guā-tsē.
.掩來扯去am-lâi-tshé-khì:這愛四字連做伙,所以「來lâi」愛變調。
掩am:就是崁(khàm)起來。例:共目睭「掩am」起來。
你嘛會當講「am」,抑是講傷濟共創予較少的。
扯tshé:本來是搝(khiú/giú)的意思。
扯本來是較少的共創予較長的。
所以是「掠長補短lia̍h-tn̂g-póo-té」的意思。
共掩過來,閣共扯出去,掩來扯去,嘛是仝款,賰無偌濟。
◎卯死!卯死!你這个不死鬼!
Báu--sí! Báu--sí! Lí tsit-ê put-sú-kuí!
.不死鬼put-sú-kuí = 豬哥ti/tu-ko、豬哥神ti/tu-ko-sîn
= 痴哥tshi-ko、痴哥神tshi-ko-sîn
= 姼仔詼tshit-á-khue,足𠢕(gâu)詼姼仔的。
欲詼姼仔,因為姼仔媠,想欲佮伊按怎,
所以有彼種想法的感覺,所以有人講姼仔詼。
例:彼个查埔的是不死鬼。佮男女之間有關係。
例:伊是一个姼仔詼,足𠢕(gâu)『撩妹』。彼就是「詼姼仔」。
## [2020.02.13《台語講世事》:延平郡王 鄭成功](https://youtu.be/BRDD7bNL8gc)
一、看新聞講臺語:萬年季大齣頭 攻炮城
◎翻譯
華語:炮竹砰砰聲響,此起彼落
臺語:炮仔聲pin-pin piàng-piàng放無歇
Phàu-á-siann pin-pin piàng-piàng pàng bô hioh,
﹡pin-pin piàng-piàng,確實有這个聲的感覺。
毋但講炮仔聲,有當時仔,咱嘛會講
例:你毋通按呢pin-pin piàng-piàng。
敢若創甲足吵的,攏會當用。
﹡咱臺語對這个聲,一寡字、詞,攏會當形容甲足好的。
咱一般所謂的「狀聲詞tsōng-siann-sû」,就是欲描寫啥物聲音,
親像鳥仔咧叫,是啥物款聲?吱吱嘎嘎ki-ki ka̍h-ka̍h、
唧唧啾啾tsi̍h-tsi̍h thiu-thiu這類的,攏是咧講聲音。抑是
鐵仔、銅仔的物件拄做伙,可能會
鏗鏗鏘鏘khing-khing khiang-khiang,鑼啦、鼓啦彼類的。
例:這个椅仔敢若怪怪,inn-inn歪歪(inn-inn uainn-uainn)。
攏是咧講聲,這攏號做「狀聲詞」(擬聲詞gí-siann-sû )。
華語:一名中年男子一舉攻進炮城,
臺語:一个中年查埔,一下手掔入炮城,
tsi̍t ê tiong-liân tsa-poo, tsi̍t-ē-tshiú khian-ji̍p phàu-siânn,
﹡因為欲掔炮仔,共掔入去,掔入炮城。
﹡一下手tsi̍t-ē-tshiú:就是「一下仔tsi̍t-ē-á」都按怎,
做啥物動作,一下仔都按怎。咱臺語這種的足濟。
例:伊一下來,都動跤動手。
一下手,抑是一下創啥,有時仔後壁彼个無一定愛講,當然欲講嘛是會使。
﹡掔khian:提物件共伊「掔」落去。漢字就是按呢寫。
因為咱手的動作足濟,這其中一種,一般可能有小可攑懸,足大力擲對較遠的所在,
按呢叫做「掔」。
華語:贏得滿堂彩
臺語:眾人仝一聲共呵咾。
tsìng-lâng kāng tsi̍t siann kā o-ló.
﹡『滿堂』→意思講足濟人咧按怎。
眾人仝一聲,意思就是逐家攏仝款感覺按怎,仝一聲共呵咾。
華語:技巧是線要短一點。
臺語:鋩角是線愛較短咧,
Mê/Mî-kak sī suànn ài khah té--leh,
﹡鋩角mê/mî-kak:漢字就是按呢寫。
鋩mê,這字咱普通時敢若足罕得看,本意是刀仔尖的部份。
華語:然後要看著那個洞,
臺語:彼空愛相予準,
hit khang ài siòng hōo tsún,
﹡相siòng:就是「看」的意思。
有閣較特別強調「一直斟酌看,一直佇彼个目標。」,特別針對彼个物件,就是「相」。
袂使干焦「相準」,咱臺語咧講,愛講「相予準」。
﹡予hōo:看予真,認予明。這足臺語氣的。
例:咱愛食予飽,睏予飽。
食予伊飽 → 食予飽,睏予伊飽 → 睏予飽,
其實攏有彼个「伊」,咱共「伊」省略,對象省略。
這馬真濟人這个「予」攏無去矣。
華語:相傳是鄭成功訓練士兵,投擲火藥。
臺語:傳說講是鄭成功訓練兵仔,
Thuân-suat kóng sī Tēnn/Tīnn Sîng-kong hùn-liān ping-á
掔銃藥。
khian tshìng-io̍h.
﹡銃藥tshìng-io̍h:「銃tshìng」是這字。
華語:後來民間就仿效,
臺語:落尾民間趁樣,
lo̍h-bué bîn-kan thàn-iūnn,
﹡咱除了講「後來」以外,嘛會當講「落尾lo̍h-bué」按怎。
﹡趁樣thàn-iūnn:趁thàn,就是→共學kā o̍h,共模仿kā bôo-hóng。
有樣看樣,無樣家己想。Ū iūnn khuànn iūnn, bô iūnn ka-kī siūnn.
= 有樣「趁thàn」樣,無樣家己想。
華語:演變成攻炮城的遊戲。
臺語:變做攻炮城的耍奕。
piàn-tsò kong phàu-siânn ê sńg-ī.
﹡耍奕sńg-ī:例:你欲「耍sńg」 這無?你欲「奕ī」 這無?
本來單獨用是OK,落尾這兩字鬥起來,當做「遊戲iû-hì」。
華語:決賽奪冠拿走一萬元獎金的…...
臺語:決賽著頭名共一萬箍賞金“扌冒”--去…...
Kuat-sài tio̍h thâu-miâ kā tsi̍t bān khoo siúnn-kim mooh--khì
﹡頭名thâu-miâ:第一名、冠軍。
冠軍kuan-kun,算是書面語,落尾愈來愈普遍,嘛是會使,
「頭名」較口語,莫共袂記得。
﹡賞金siúnn-kim:咱以早就講用「賞siúnn」的,賞幾箍,賞偌濟,
「欣賞him-sióng」→賞sióng,文言音;賞siúnn,白話音。
﹡『拿走』→“扌冒”mooh,咱用「“扌冒”mooh」可能是有較譀,
毋過就是一个形容,袂輸講足濟足濟的意思,都愛用“扌冒”,
咱知影“扌冒”的動作,敢若袂輸足濟,你都愛用“扌冒”,
你毋是干焦「提the̍h」,毋是干焦按呢「拈ni」的,
用「提」的感覺少少仔,用“扌冒”的,哇~足濟的,較歡喜。
二、講予你知:鄭成功
講著鄭成功,佇咱臺灣,真正是囡仔大人攏捌伊,實際上到底鄭成功是啥物款的人?
◎鄭成功的身世
*老爸中國福建人,老母日本長崎人
鄭成功伊老爸,非常的有名,是中國福建遐的人,號做鄭芝龍,
講是海賊嘛會使,海商嘛會使,佇彼个時代,非常有影響力。
伊的媽媽是日本Nagasaki(ながさき長崎)遮的人。
*日本出世,七歲才轉去福建泉州
鄭成功伊是佇日本出世,佮媽媽生活七年。
七歲了後,才予亻因爸爸𤆬(tshuā)去福建泉州栽培教育。
*南明唐王重要將領,賜國姓朱、名成功
彼个時陣,大明國連鞭就欲滅亡去矣,所以佇中國的東南爿,
有幾个仔王繼續明國的政治。
佇南爿有一个叫做「唐王」,就是鄭芝龍咧共支持。
唐王佮鄭芝龍互相需要,所以鄭芝龍共伊的後生鄭成功介紹去,
變做唐王的重要大將,唐王賜伊一个國姓「朱」,名成功。
*老爸投降清軍,清軍共伊老母刣死
唐王失敗了後,想袂到鄭芝龍投降清軍,鄭成功無欲投降,
勸袂聽,閣加上彼个時陣,大清國的軍隊,共亻因老母刣刣死,
鄭成功非常受氣。
*改支持桂王,受封「延平郡王(Iân-pîng Kūn-ông)」
鄭成功就改支持另一个王「桂王」,受封「延平郡王」。
◎鄭成功過臺灣的歷史
*佮清軍相戰失敗,欲揣軍事基地
彼个時陣,鄭成功佇中國東南爿的海岸遮,佮大清國對抗。
鄭成功佇「南京戰爭」戰敗了後,就足急的,想欲揣一个所在,
繼續伊軍事的基地。
毋是為著欲拍荷蘭人,才來臺灣,其實伊是欲揣一个軍事基地。
*臺南鹿耳門起山,戰贏荷蘭
鄭成功相著臺灣,經過伊完整的計畫,來到臺灣臺南鹿耳門起山。
*成做漢人佇臺灣頭一个政權
來到臺灣了後,戰贏荷蘭,變做漢人佇臺灣頭一个政權。
*軍隊穿鐵甲𠢕(gâu)戰,袂輸鐵人
鄭成功的軍隊,訓練甲非常的厲害,穿鐵甲,閣足𠢕(gâu)戰,
袂輸鐵人仝款,有非常濟的傳說。
◎鄭成功佇臺灣的傳說
*鐵砧山(Thih-tiam-suann)劍井、新北鶯歌石、基隆仙洞
臺中鐵砧山聽講有一个井,為啥物佮鄭成功有關係?
因為彼个時陣,鄭成功軍隊去到鐵砧山的所在,無水通啉欲按怎?
鄭成功提伊的劍,佇塗跤揬一下,就一个井走出來矣。
鐵砧山的劍井(Kiàm-tsénn/tsínn)就變做一个傳說。
閣有真濟所在嘛有,譬如講新北市的鶯歌石、基隆的仙洞,
佮鄭成功聽講有關係。
*鄭成功毋捌離開臺南
根據歷史上的文獻記載,鄭成功根本都毋捌離開過臺南。
*佇臺灣四個月就過身
鄭成功來到臺灣了後,四個月就過身去矣。
*傳說無影無跡
*反映漢人共伊看做開基祖
漢人感覺鄭成功是來咱臺灣開基祖,才有真濟佮伊有關係的傳說。
◎鄭成功的歷史定位
鄭成功確實是對臺灣非常重要的一位人物,影響咱臺灣歷史,非常深,非常遠,咱應該愛好好仔來共研究一下。但是咱過去,咱看鄭成功攏足簡單幾个形象,這个形象攏是政權予咱的。
*清國:忠義典範 → 日本:合理化殖民 → 國民黨:民族英雄
明明鄭成功佮大清國咧相戰,但是清國來到臺灣了後,竟然講
伊是一个忠義的典範,按呢方便大清國會當來統治。
所以大清國佇臺灣足濟所在,有起廟,欲來拜鄭成功。
到日本時代,換日本人來了後,日本人為著欲合理化亻因的殖民,
因為拄好鄭成功的媽媽是日本人,欲共廟攏改做「神社」。閣來,
國民黨戰輸,來到臺灣,閣因為鄭成功佮亻因有淡薄仔相siāng,
因為鄭成功就是欲佇咧臺灣,拍轉去中國,國民黨有仝款的思想,
所以就講鄭成功是民族英雄。
咱知影鄭成功毋是為著欲拍荷蘭人,才來臺灣,伊是欲揣基地。
*臺南市民族英雄鄭成功祭典
這馬佇臺南,每一年攏有辦「民族英雄鄭成功」祭典,辦了足久,
本來攏是臺南市咧辦,尾仔,內政部派內政部長來做主祭官。
*無注重原住民歷史
但是這項代項,原住民的朋友感覺無合理,對亻因來講無尊重,
因為鄭成功佇臺灣的時陣,確實傷害真濟原住民。
*取消派內政部長做主祭
這馬的做法,為著欲注重多元的意見,這个祭典閣轉去臺南市,
內政部無閣欲派人來做主祭官。
鄭成功足濟代誌,咱需要好好仔來研究,但是咱這馬知影,咱若看歷史,看歷史人物的時陣,毋通有一種對統治者的角度來看,咱應該愛還歷史人物應該有的面貌。
咱(民視)【臺灣學堂】有一个節目,號做《臺灣的覺醒》,內面講著鄭成功,講甲足詳細的,歡迎觀眾朋友會當去看。
◎語詞:
.郡王kūn-ông:介紹逐家按呢的讀法。
郡kūn,單字是kūn,第7調。後壁有→王,郡就愛變調。
.毋是勢m̄-sī-sè:普通時愛按怎用?
會加一个「看」,較濟,就是「看毋是勢」。
例:看毋是勢,緊愛旋。毋是勢 = 看毋是勢。
準算無「看」,嘛是意思「看」省略,判斷講無啥拄好,
所以按怎。運用上口語猶是有一个「看」的意涵佇遐。
例:哎喲,你佮伊是欲按怎比?真正是天差地。
.鹿耳門Lo̍k-ní-mn̂g:臺南遐的地號名,介紹讀音予逐家知影。
.起山khí-suann:這敢若較罕得聽著,是對船頂起去岸頂的意思,
所以是「登陸ting-lio̍k」。
*這字「起khí」,咱臺語非常重要的一个字,有足濟意涵,譬如講
.起魔公khí-môo-kong:起痟khí-siáu,逐家就知影。
按呢嘛好,抑無,逐改攏講→痟查某,這馬有一个公的出來。
例:你毋通閣起魔公矣!
「起番顛khí-huan-tian」的意思。
.起油khí-iû:(兩位老師無講著,《台日大辭典》內底有兩條。)
.起雷khí-luî:佮「開始」仝意思,開始咧霆雷。
.一起官司tsi̍t khí kuann-si:就是「一件、一項」的意思。
這毋是華語『一起官司』有用,臺語嘛會使按呢用。
.價錢出較起咧kè-tsînn tshut khah khíleh:這「起」是啥物起?
意思:你較阿莎力(あっさり)a-sá-lih咧,你著緊講講咧!
毋但講價數會使起較起咧,
例:你這杯你嘛啉較起咧!欲啉,bua̋i啉,緊咧,一句話。
.背反puē-huán:應該是佮「反背huán-puē」仝意思,兩種講法攏有
三、看戲齣(hì-tshut)講臺語
◎真正欲佯恬恬?
Tsin-tsiànn beh tènn/tìnn tiām-tiām?
這足口語的,但是這馬「佯tènn/tìnn」,逐家攏袂曉「佯」矣,
逐家較會曉「激kik」的款,激恬恬、佯恬恬,意思仝款。
.「激kik」佮「佯tènn/tìnn」,意思仝款,
「激」,刁工欲按怎,「佯」的本意是假影按怎的意思。
例:佯恬恬,佯毋知,佯死,佯空佯痟,佯生,佯睏。
所以「佯」攏較恬,「激」會較激動。
.恬恬tiām-tiām:主要是合喙音”m”,華語無。毋是莫講話,喙閣愛合起來。
◎莫佇遐數想/戇想,
Mài tī hia siàu-siūnn/gōng-siūnn,
較早睏較有眠。
khah tsá khùn khah ū bîn.
字幕的華語是寫:『不要做白日夢!』
## [2020.02.20《台語講世事》:全國客家日](https://youtu.be/PmkXxX4eYPY)
﹡每一年舊曆的1月20,「天穿日tienˊ conˊ ngidˋ」是全國客家日。
﹡華語句型「V + 著」,是『進行式』,臺語按怎講?
咱的用法佮華語無仝款,毋是按呢講,是其它講法。
﹡客話嘛是會使用「臺羅」來寫,咱照彼个音,照臺羅規則來寫。
﹡『苜蓿芽』→苜蓿bo̍k-siok(?),金花菜kim-hue-tshài(?)
這款較現代、逐家咧用的物件,毋管按怎講法,咱愛有一个單位,來共確定落來,
按呢較好勢。
.X氣:活氣ua̍h-khuì、媠氣suí-khuì、緊氣kín-khuì、䆀氣bái-khuì
.毛斷môo-tn̄g:兩个漢字讀臺語音,來標寫外來語的做法,音譯。
這个詞毋是咱發明的,日本時代就有矣。
.X氣X觸:會當參考
[《講台語當著時》:重疊的四字詞2017.08.31](https://youtu.be/ct6bfuqXGKA?t=292)←有連結
一、看新聞講臺語:哈客嘉年華 鄉親歡喜鬥鬧熱
◎翻譯
華語:後頭跟著迎親的隊伍,
臺語:後壁迎親的人陣綴咧
Āu-piah ngiâ-tshin ê lâng-tīn tuè--leh,
﹡華語句型:V + 著,臺語按怎講?
例:『他吃著好吃的東西。』 → 伊當咧食好食物。
這馬真濟人攏會講 → 伊食「著」好食的物件。
是「伊有食著」的意思 →『他吃到了...』
例:伊穿「著」一領媠衫。 (X)
華語「V + 著」是『進行式』,臺語毋是按呢講,是其它講法。
譬如講 → 啥物啥物綴咧,抑是講,當咧按怎,咱的講法無一定是「啥物著」。
咱若講「啥物著」,譬如講:
伊有食著,別人攏無食著。→『他吃到了(,別人沒吃到)。』
咱的「著」是按呢用的,佮華語無仝款,逐家毋通濫做伙。
以這个句做例,『後頭跟著迎親的隊伍』,
咱臺語→後壁迎親的人陣「綴咧」,咱共「綴咧」囥後壁,有一个用意,
因為臺語通常大部份後壁是重點,講到上後壁彼个重點,所以咱共伊囥後壁。
當然你若欲頭前囥,嘛是會使,後壁「綴」迎親的人陣,就毋免「著tio̍h」,
毋免「綴著」。
華語:熱熱鬧鬧的展現出客家人迎娶時的盛況。
臺語:共客人鬧熱滾滾的大場面
Kā Kheh-lâng lāu-jia̍t-kún-kún ê tuā tiûnn-bīn
總搬出來。
tsóng puann--tshut-lâi.
﹡『客家人』,咱講「客人」, 𪜶家己嘛講「客人hagˋ nginˇ」。
「客家人hagˋ gaˊ nginˇ」是特別欲強調,一寡歌詞內底有講著,
其實 𪜶口語攏講「客人hagˋ nginˇ」,咱講「客人」就會使。
例:客菜、客人、客話。
﹡搬tsóng:一般是「搬徙puann-suá」的「搬」,
「搬戲puann-hì」的「搬」,嘛有「展現tián-hiān」的意思。
咱佇遮用「搬」袂䆀(bái)。『展現出來』→總搬出來。
華語:撐起油紙傘
臺語:油紙傘攑咧
Iû-tsuá-suànn gia̍h--leh
﹡拄才「綴咧」仝款,咱這馬講「攑咧」,啥物貨「攑咧」,
啥物物件這个動作囥佇後壁。
雨傘是用「攑gia̍h」的。
華語:把山歌生動描繪出客家山歌的情景。
臺語:共客人山歌內底的情境
Kā Kheh-lâng san-ko (客話sanˊ goˊ) lāi-té ê tsîng-kíng
跳予真活氣。
thiàu hōo tsin ua̍h-khuì.
﹡咱的句型:共…...按怎。
﹡山歌san-ko:照客話的音,咱用「文言音」唸san-ko。
若用白話音suann-kua就佮客人 𪜶的音差傷濟。
﹡活氣ua̍h-khuì:咱以前嘛講過,「X氣」,例:媠氣。
跳予真活氣,有人感覺講「跳甲真活氣」,毋是袂使。
「予hōo」足臺語氣的。
例:我今仔日穿予誠媠氣。
共伊罵予真落氣。
補充:X氣:活氣ua̍h-khuì、媠氣suí-khuì、緊氣kín-khuì、䆀氣bái-khuì。
華語:皮是用粄條做的,包一些小菜。
臺語:皮是粿仔(客話:面帕粄mien pa banˋ)做的,
Phuê sī kué-á(mién-phá-pàn) tsò/tsuè--ê,
包一寡物配。
pau tsi̍t-kuá mi̍h-phuè.
﹡『粄條』,就是咱臺語講的「粿仔kué-á」,
若是客語,咱特別講一个「面帕粄mién-phá-pàn」。
客話嘛是會使用「臺羅」寫,咱照彼个音,照臺羅規則來寫。
﹡『包一些小菜』,就是咱臺語講的「包一寡物配」。
通常咱咧配飯、配糜的一寡小菜,彼種攏講 → 物配(mi̍h-phuè)。
若無按呢講,就愛共學起來。
華語:還有苜蓿芽
臺語:閣有苜蓿芽/金花菜、有肉酥。
Koh ū bo̍k-siok-gê/kim-hue-tshài, ū bah-soo.
﹡『苜蓿芽』,這是外國來的物件。
有一寡新的名詞,咱會照漢字講彼个臺語漢字的發音就是。
按呢是小可較奇怪,因為咱講芽的物件,譬如講「豆菜」,咱袂講「豆菜芽」。
敢若較無人講過,可能某一个所在有講,就是「金花菜」。
這款較現代、逐家咧用的物件,毋管欲按怎講法,咱愛有一个單位,來共確定落來,
按呢較好勢。
華語:很有現代感,現代又古典。
臺語:“毛斷”閣有古早味。
môo-tn̄g koh ū kóo-tsá-bī.
﹡「毛斷môo-tn̄g」英語modern的音,用臺語漢字的倚音共寫出來,
兩个漢字讀臺語音,來標寫一个外來語的做法,音譯。
這个詞毋是咱發明的,日本時代就有矣。
例:墨擔羅Ba̍k-tann-lô,以漢字的臺語音,寫外來語的音。
彼个品牌,若是彼陣入來咱臺灣,咱臺灣社會是臺語社會,
有可能就是按呢寫,用臺語音去翻。
有廣告的,咱袂使講出來,食”和肉佮hām-bah-kah”的所在。
註:和肉佮hām-bah-kah:請參考 [2017.09.21《講台語當著時》:台語的腔口差](https://youtu.be/Nvo3Z4_b7mE?t=1360)
二、講予你知:全國客家日
每一年的舊曆1月20,就是全國客家日。
◎族群佮信仰
*臺灣第二大族群,荷蘭殖民時期就佇臺灣
客家族群是咱全臺灣第二大的族群。
根據歷史資料來看,客家族群佇荷蘭殖民時期,就已經來到臺灣。
尾仔,大清帝國禁止一寡客家族群來臺灣,所以伊人數較擋牢的。
但是慢慢仔佇咱臺灣繼續生活。
*信仰土地公(Thóo-tī-kong)、龍神、三山國王(Sam-san-kok-ông)、
三官大帝(Sam-kuan-tāi-tè)和義民爺等
𪜶有足濟信仰,包括咱這馬看著的土地公,算是上有名的。
咱若講著客家族群,攏知影 𪜶信仰土地公,號做→伯公bagˋ gungˊ
*義民信仰大量出現佇林爽文事件了後
義民信仰對客家族群來講,是非常重要的信仰。
「義民」就是古早時代,若是發生戰爭,抑是民變等等,
真濟當地的人士,民間的人士,為著欲保護家鄉,出來犧牲性命,
這就變做是「義民gī-bîn」。
雖然毋是干焦客家族群有「義民廟」,但是大部份攏出現佇客家族群生活的地區。
義民信仰大量出現佇林爽文事件了後,因為彼時陣,民變非常濟。
*舊曆七月20義民節普渡
客家族群對義民信仰,就表現佇舊曆七月20,攏有義民節普渡。
佮咱普通所知影的普渡,真濟風俗攏仝款,但是有一个足特別的,
就是 𪜶佇這工,有賽豬公,抑是比羊仔角啥物人較長,這款傳統。
◎客家料理特色
客家族群的特色,嘛會表現佇 𪜶的料理頂懸。
*勤儉無愛討債食物
客家族群勤儉,無愛討債物件,所有的材料,攏會用到上尾仔。
所以發展出一種講法,四炆四炒si vùn si tsháu。
*四炆四炒si vùn si tsháu
這款出菜的形式。
*四炆:是鹹菜燖豬肚,燖炕肉,排骨燖菜頭,肥湯燖筍乾
炆vùn,有淡薄仔親像「燖tīm」的感覺,就是大鼎煮了後,
閣共翕(hip)幾分鐘仔,予伊溫度有夠,共物件會當燖甲較爛的。
四炆:就是有四齣用「炆」這款方式所做的菜,包括:鹹菜燖豬肚,燖炕肉(khòng-bah),
排骨燖菜頭,肥湯燖筍乾
*四炒:是客家炒肉,豬腸炒薑絲,鴨血炒韭菜,豬肺王梨炒木耳
◎語言文化保存佮「全國客家日」
*臺灣客話分做四縣、海陸、大埔、饒平、詔安等腔口
臺灣客話分做足濟腔口,有四縣、海陸、大埔、饒平、詔安等等。
佇二次大戰進前,真濟客家社區,講客語來溝通,是四常的代誌。
這个國民政府來到臺灣了後,就實施『國語政策』,所以真濟客家族群的朋友,
就開始慢慢仔『講國語』,閣有真濟客家朋友蹛的所在,講臺語的人較濟,
所以嘛有真濟客家族群就變做講臺語。
*客家文化落坐(lo̍h-tshē)
所以 𪜶的客話就慢慢仔落坐。
*2001年六月成立客委會,2017年通過客家基本法
2001年六月,政府有成立客委會。
閣佇前幾年仔,2017年通過《客家基本法》。
所以這馬,毋管是組織,抑是法律頂懸,攏有濟濟的資源,予客家族群會當繼續保存、
復興 𪜶的文化佮語言。
*每年舊曆1月20「天穿日tienˊ conˊ ngidˋ」,定做「全國客家日」。
◎各地客家文化活動
*五月新北、桃園、新竹、臺中、彰化、南投,七縣市「客家桐花祭」
*七月各地義民廟「全國義民祭」
*客庄12大節慶
歡迎咱所有的朋友會當去參與,更加來了解客家族群的文化。
◎語詞:
.土地公Thóo-tī-kong:這是咱這爿的講法。
𪜶的音叫做伯公(bagˋ gungˊ)。
.豬公ti/tu-kong:專門飼拜拜欲用的彼種大隻豬。
大隻豬才會使號做「豬公」,專門飼足肥、足大隻彼種的。
若是查埔豬,是號做「豬公ti/tu-kang」。
仝款漢字,大隻欲提來拜的,才號做「豬公ti/tu-kong」。
.義民廟Gī-bîn-biō:濁音“g”、“b”,三字攏有,濁音攏愛發出來,
濁音若落(lak)去,咱臺語真正毋成臺語,無特色。
.桐花祭Tông-hue-tsè:桐tông,是文言音,有人講會當讀白音tâng
油桐花iû-tâng-hue、iû-tông-hue,攏有人講。
﹡料理的時陣,會用啥物款方式?
.用翕(hip)的,用 燖(tīm) 的,這个音算是臺語特色,就是合喙。
不管是短音入聲hip的“p”,抑是長音tīm的“m”,攏愛合喙,這嘛是臺語的一種特色。
翕hip:用蓋共崁起來,共翕一段時間,共翕較熟一下。翕無一定有開火。
翕相hip-siòng/siōng,嘛是這个「翕hip」。
燖tīm:嘛是需要時間,慢慢仔去炕(khòng)、去燖,有開火。
﹡對客家無仝腔來講這个菜有無仝款的講法,
親像咱會干焦講「韭菜kú-tshài」,但是 𪜶有腔口差,
海陸(hái-lio̍k)的,伊會講「韭菜kiú-tshái」←客語giuˊ coiˇ。
四縣腔的就是講「快菜khuái-tshai」←客語kuai coi
.天穿日thian-tshuan-ji̍t:是欲教這个名詞按怎講,咱用文言音讀。
「女媧(lú-o) 補天」的彼个日子。
客家族群對「天穿日」非常重視。
人愛歇睏,土地嘛愛歇睏,誠環保的一个概念。
用臺羅來寫「客話」的音,咱有寫變調,對客語來講,
伊大部份是一个字啥物調就是啥物調,大部份免變調。
三、看戲齣(hì-tshut)講臺語
◎阮這乎~號做「相欠債」。
Gún/Guán tse honnh hō-tsò ”sio/sann-khiàm-tsè”.
.乎honnh:驚仔逐家無啥會曉讀。《教典》取這字。
這種「語母」的一寡較表達情緒、感嘆啥,會使考慮用羅馬字寫,因為伊都是一个聲爾。
honnh,“nn”要帶鼻音,尾字“h”是入聲,愛較短咧。
.相欠債sio/sann-khiàm-tsè:意思是互相有欠錢,抑是欠啥物貨,無一定是錢,
這个所在是咧講感情上,若用「相欠債」來講,通常是翁仔某,抑是愛人仔,
這中間有足濟債,亂操操,理袂清楚,足亂,足複雜,用「相欠債」一句話就講完矣。
◎我就是「大嚨喉空」啦!
Guá tō/tiō/tsiū-sī “tuā-nâ-âu-khang”--lah.
.大嚨喉空tuā-nâ-âu-khang:佮「放送頭hòng-sàng-thâu」無仝款。
這个是大聲爾,咧講聲音,無一定是愛四界講。
◎假仙假觸
ké-sian-ké-tak
.臺語疊詞,有一類就是ABAC這款組合。
觸tak,無特別的意思。
佇這个句來講,伊是欲講「假仙」的意思,只是鬥一个聲爾。
.X氣X觸:會當參考[《講台語當著時》:重疊的四字詞2017.08.31](https://youtu.be/ct6bfuqXGKA?t=292)
## [2020.02.27《台語講世事》:二二八事件](https://youtu.be/3v3tcItzXp4)
﹡『跨年』,這馬開始有人講「迒年hānn-nî」,共「年」迒過。
﹡遊戲iû-hì:日本時代就有直接取這个字,按呢讀。
﹡虛擬hi-gí:這是照字,可能逐家較毋捌唸,較罕得唸。
這馬這兩字定定出現,咱愛會記得,叫做「虛擬hi-gí」。
擬gí,是佮臺語的「語gí」仝音。
﹡引導ín-tō:導tō (O);導tó (X)。
.賠償puê/pê-siông (O);俗唸作puê-/pê-sióng (X)。
.衝突tshiong-tu̍t:突 tu̍t (O);突 thu̍t (X)。
一、看新聞講臺語:虛擬遊戲 予學生迒時空學歷史
◎翻譯
華語:手拿解謎手冊,
臺語:手提臆謎猜手摺簿仔
Tshiú the̍h ioh-bī-tshai tshiú-tsih-phōo-á,
﹡手摺簿仔tshiú-tsih-phōo-á:『手冊』。
這馬嘛足時行「手冊tshiú-tsheh」這个講法,因為有的人
共手摺簿仔當做細本的記事簿仔,嘛是會當講細本的啥物冊。
摺tsih:摺衫(tsih-sann)、摺被的摺。所以「摺」是足細本的。
﹡謎猜bī-tshai:若受著華語影響,會讀做「bê-tshai」←(X)。
伊有另外一个音bē-tshai。
註:這个音bē,佇《揣台語》內底有看著。
這字「謎bī」本調是第7調,佮「迷人」的「迷bê」,無仝。
華語:準備跨越時空
臺語:準備迒過時空
Tsún-pī hānn kuè sî-khong
﹡『跨越』,有真濟人想講用「跨khuà」這字嘛是會使,
因為咱有一个閣較口語的講法「迒hānn」。
若是「跨過時空」,都完全是華語漢字唸的。
華語是『跨』,咱臺語是「跨khuà」,變調「跨過時空」,
袂當講毋著,口語上無臺語氣,會當共「迒」提來用。
咱本來臺語就有「迒hānn」這字,愛共抾轉來用。
例:遮有水溝仔,你共迒過去。
遮有一个戶橂,你共迒過。
﹡『跨年』,這馬開始有人講「迒年hānn-nî」,共「年」迒過。
明年開始,咱就來講「迒年hānn-nî」,「迒hānn」第7調。
華語:要找尋受難者的資訊
臺語:欲搜揣受難者的資訊
Beh tshiau-tshuē siū-lân-tsiá ê tsu-sìn
﹡『找尋』,表面上來看,是「揣」,抑是「走揣」,是無毋著,
佇遮用搜揣(tshiau-tshuē),有特別欲強調「搜tshiau」的動作。
.搜tshiau:意思就是規个攏共戽戽出來,可能足濟足濟物件,
對內底愛搜,愛反(píng),愛規个共足幼膩(iù-jī)的,去共揣。
較「澈底thiat-té/tué」來揣。
例:這个物件愛共搜予鬆鬆。
華語:結合線上、線下的資源
臺語:線頂、線下的資源敆做伙
Suànn-tíng, suànn-ē ê tsu-guân kap-tsò-hué
﹡會當講「線頂、線跤」嘛無啥物毋著,但是白話「頂」佮「下」,
例:頂面←→下面,頂港←→下港,頂輩←→下輩
「頂」佮「下」是一組的白話音。
﹡敆做伙kap-tsò-hué:無仝款的物件鬥做伙,按呢就是「敆kap」。
例:你這張紙共伊敆咧內底,敆鬥陣。
進前咧選總統,有三組,『XX配』,咱就是用「敆」。
『蔡賴配』→蔡賴敆,『韓張配』→韓張敆,
『宋余配』→宋余敆。
啥物人和啥物人敆,所謂華語的『配』,咱會當用「敆」。
按呢閣較有臺語氣,較成臺灣總統咧選舉,後回就按呢用。
華語:更加認識事件的背景跟來龍去脈。
臺語:(更加)認捌事件的背景佮頭尾。
(Kìng-ka) jīn-bat sū-kiānn ê puē-kíng kah thâu-bué.
﹡『來龍去脈』→頭尾,意思就是對頭到尾的狀況,簡單講頭尾。
華語:進而要遵循
臺語:紲落閣較照起工
Suà--lo̍h koh-khah tsiàu-khí-kang
﹡有當時仔,毋是這个詞對彼个詞,完全對應,咱愛看前後的意思。
佇遮,咱是欲講...針對頭前,咱可能搜揣資訊,有一寡做法了,
咱是毋是欲「照起工」,有包含順序(sūn-sū/sī)、方法、原則種種
鬥做伙,咱照按呢來做。
伊就是『遵循很多東西』,就是咱「照起工」。
華語:透過虛擬遊戲來引導
臺語:透過虛擬遊戲;引導
Thàu-kuè hi-gí iû-hì;ín-tō
﹡遊戲iû-hì:日本時代就有直接取這个字,按呢讀。
﹡虛擬hi-gí:這是照字,可能逐家較毋捌唸,較罕得唸。
這馬這兩字定定出現,咱愛會記得,叫做「虛擬hi-gí」。
擬gí,是佮臺語的「語gí」仝音。
﹡引導ín-tō:導tō (O);導tó (X)
華語:要把塵封的記憶打開。
臺語:共坱埃的記持拍予開。
Kā ing-ia ê kì-tî phah hōo khui.
﹡坱埃ing-ia:逐家其實會曉講,可能這兩个漢字較罕得看。
有名詞佮形容詞兩个用法。
例:彼遮去沐(bak)著坱埃,緊拭拭(tshit-tshit)咧。
二、講予你知:二二八事件
今仔日欲講的題,非常嚴肅,就是二二八事件。
每一年的二二八,全國攏有放假,真濟人可能毋知啥物是二二八事件
◎事件的起頭
*1947年2月27,查緝(tsa-tsi̍p)私薰一死一傷
二二八事件是發生佇1947年,佇二二八的前一工,就是2月27,
佇臺北的大稻埕遮,發生一件事件,就是有兩个警察查緝私薰,
結果,查薰的事件爾,就造成一死一傷,非常嚴重。
*六七百民眾圍警察局、專賣局
彼个時陣,有六、七百个民眾,就走去圍警察局,佮專賣局,
叫 𪜶共警察交出來。
*2月28民眾去長官公署請願,衝突擴大
尾仔,佇第二工2月28,民眾又閣去到這个長官公署請願,結果,
發生閣較嚴重的衝突,真濟民眾去夆銃殺,有人死亡,有人受傷。
*占領電台放送,鼓舞反抗政府
佇2月28發生的規件代誌,因為透過民眾占領電台去放送了後,
鼓舞全臺灣來反抗政府。
這是基本的一个背景。
◎事件的過程
*暴亂湠全臺灣,嚴重武裝衝突
暴亂湠規臺灣,毋是干焦臺北市,各地攏有非常嚴重的武裝衝突。
*仕紳成立委員會向望和平解決
情形遮爾仔緊張,彼个時陣,全臺灣地方的頭人,真濟仕紳,
𪜶成立委員會,欲來佮政府談判,希望會當和平解決。
*陳儀半奸忠騎雙頭馬,調援兵
彼个時陣,政府的長官是陳儀,是一个半奸忠的人,伊一方面
共委員會答應,放冗(pàng-līng)處理,一方面閣向中國調援兵。
*中國兵來臺灣鎮壓,實施清鄉
所以中國兵就開始來到臺灣,對基隆起來了後,開始全臺灣鎮壓
實施清鄉,死足濟人,會使講開始大屠殺(tôo-sat)的情形。
*上新報告:攏總死1.8~2.8萬人
這馬上新的報告,二二八事件攏總死1.8~2.8萬人。
這是規个二二八事件的經過,上基本的概念。
◎發生事件的原因
二二八只是一个查私薰爾,哪有可能一个死,一个傷,可能是意外,為啥物會變做規臺灣,遮爾大的衝突?咱愛了解,這其實是文化衝突
*文化衝突(tshiong-tu̍t)
1947年彼个時陣,二戰結束,日本人走了後,咱足濟臺灣人期待
日本人走,換咱家己的人欲來。結果,逐家攏非常失望,
這款的文化衝突,毋是咱尾仔講的足淺的彼種,有人講
中國兵來的時陣,穿甲離離落落(li-li-lak-lak),規个攏無規矩,
毋是遮淺的物件。
*臺灣行政長官公署
伊閣牽涉著規个統治階層的衝突,包括彼个時陣,佇臺灣,
中華民國開始設一个號做「臺灣行政長官公署」,權力非常大,
臺灣人發現講起一間日本人的總督府,走了後,閣來一个
佮總督府平大,甚至比總督府的權力閣較大的公署,欲來管咱,
而且所有的公署,統治階層的,攏是對中國彼爿來的,就是講
日本人殖民了後,變做是中國來殖民。
*官員歪哥無規矩,大陸外省人占絕大多數,公家專賣總貿,市草末
政治上,規个高層的統治階層,攏是中國人,莫講以外,
官員因為規个文化無仝款,官員歪哥無規矩,譬如講
這个病院、這个單位,可能一半以上,攏是這个長官 𪜶兜的人,
一个牽一个,一个牽一个,閣有收錢等等,攏無規矩。
大陸的外省人占絕大多數,所以臺灣的民眾攏非常受氣。
經濟上,彼个時陣,公家的專賣總貿,非常濟物件攏愛公家專賣,
若是是一个清廉(tshing-liâm)的時陣,可能猶閣無問題,
但是彼个時陣逐家歪哥(uai-ko),所以市草䆀。
*戰後沓沓仔粒積不滿
規个不滿,佇戰後沓沓仔粒積(lia̍p-tsik),才會發生這款的代誌。
◎咱對二二八愛有的認捌
*國民黨長期禁止,黨外人士挵破(lòng-phuà)黨國體制
二二八事件咱愛有一寡認捌,因為這款的話題,佇國民黨的時間,
長期來禁止,佳哉有濟濟的民主前輩,黨外人士挵破黨國的體制,
咱才通公開來討論。
*1980年代後期通公開討論
*1995年李登輝代表政府會失禮,1997年訂做和平紀念日
*紀念碑、紀念園區、愛難家屬賠償(puê/pê-siông)
*轉型正義
按呢做敢有夠?其實猶有濟濟的代誌,包括尾仔真濟白色恐怖等等
真濟事實猶無看著,猶未解密,轉型正義的代誌到今,猶做無完全
代誌若無圓滿,事實若無清楚,欲講原諒,欲講向前行,
這是無可能的代誌,所以轉型正義,咱愛繼續加油。
◎語詞:
.查緝tsa-tsi̍p:主要是發音的問題。
查tsa/tshâ,有兩个音。佇遮用tsa。
緝tsi̍p:第8調,後壁若有字,愛變調,愛變低。
例:我查緝著一个歹人。
.衝突tshiong-tu̍t:主要是第2字,可能受華語影響,突thu̍t(X)。
突tu̍t(O),無氣音的聲母。
.半奸忠puànn-kan-tiong:一半奸,一半忠。
半啥,半啥,佇咱臺語定定看著,親像講
逐家足愛食半精白(puànn-tsiann-pe̍h),較瘦的肉,較肥的肉
半生熟puànn-tshenn/tshinn-si̍k,可能猶無完全熟。
逐家生活當中會當提來運用。
.騎雙頭馬khiâ siang-thâu-bé:馬有雙頭,行這爿會走,彼爿嘛會走
佇這个形容來講,佮「半奸忠」有一點仔類似,
可能這爿也欲姑情,彼爿嘛欲,兩爿攏會當走。
有所謂的『牆頭草』,抑是『西瓜派』彼類的講法。
.鎮壓tìn-ap:這是讀音的問題。
.歪哥uai-ko:就是「提錢」,「貪汙」,「食錢」。
歪膏揤斜uai-ko-tshi̍h-tshua̍h:足歪的。
仝音無仝意思。
.市草tshī-tsháu:市場的狀況,抑是景氣這類。市草好䆀。
「X草」,就是「啥物的狀況(tsōng-hóng)」。
例:漢草hàn-tsháu、路草lōo-tsháu、花草hue-tsháu。
.末bua̍t:一般可能較無捷拄著,因為咱這馬攏較口語的講法,
因為這較文言的講法。
這都配合「市草」,講→市草末,意思是市草䆀,市草無好,
䆀甲到尾仔,已經到直欲到尾仔的感覺。
.銃桿tshìng-kuáinn/kuínn:這是讀音的問題。
銃桿tshìng-kuáinn,銃桿tshìng-kuínn無仝腔。
桿kuáinn/kuínn:就是中央有空,可能長篙長篙(ko)。
秤仔桿tshìn-á-kuáinn
註:《教典》無收kuínn
.起反khí-huán,起反khí-píng:仝款漢字,有兩个讀音,意思無仝。
咱遮是「起反khí-huán」,開始欲「反huán」矣。
.抓耙仔jiàu/liàu-pê-á:一般是咧講去共人報啥物代誌的彼个人。
報鳥鼠仔冤,敢若講有一點仔報馬仔,但是報馬仔是報消息,
這个是講「共人抓,欲予你無好空」。
普通時提來抓的彼支扒癢(pê-tsiūnn)的,嘛會使講→抓耙仔。
三、看戲齣(hì-tshut)講臺語
◎你明仔載來,愛穿懸tah-lù。
Lí bîng-á-tsài lâi, ài tshīng kuân-tah-lù.
﹡『高跟鞋』:有幾若種講法:
1.Hái-hì-lù(ハイヒール)hái-hì-lù:對英語high heels日語化講法。
戲劇內底的講法,毋知是毋是懸踏佮hái-hì-lù敆做伙?
2.懸踏仔(鞋)kuân-ta̍h-á(ê):講懸踏鞋較少,因為這種物件一定是鞋
3.懸踏的kuân-ta̍h--ê:
4.懸屐仔kuân-kia̍h-á:敢若柴屐彼个後壁,有一支較懸的。
◎按呢乎,袂見眾,無禮貌啦!
Án-ne honnh, buē/bē-kìnn-tsìng, bô lé-māu--lah!
﹡見眾kìnn-tsìng:「會當予人看」的意思。這馬敢若較少人講。
用法:會見眾、袂見眾。
例:你按呢真正袂見眾,卸世卸眾(sià-sì-sià-tsìng)。
◎沓沓仔趁是欲趁到底時/底當時/當時?
Ta̍uh-ta̍uh-á thàn sī beh thàn kàu tī-sî/tī-tang-sī/tang-sī?
﹡底時tī-sî:就是當時(tang-sî),底當時(tī-tang-sī),攏仝款意思。
## [2020.03.05《台語講世事》:世界衛生組織](https://youtu.be/FrymZEsWM10)
.「索仔湠股」soh-á thuànn-kóo
.腹肚會飽,力頭會飽,米飽,戲嘛會飽。
★狀況tsōng-hóng:況hóng、況hóng、況hóng,誠重要,愛講3遍。
註:路況 lōo-hóng、情況tsîng-hóng、車況tshia-hóng。
.袂用得、袂當、袂使、毋通
.較贏khah iânn
.拚尾帖藥仔piànn bué-thiap-io̍h-á
.代先(tāi-sing)排喙罨予醫護人員。
.『阻攔』→攔閘nuâ-tsa̍h。
.聲援siann-uān:援uān,漢字本身是第7調。
.癢tsiūnn vs. 擽ngiau
因為這馬疫情的關係,這个W.H.O.定定佇新聞內面有講著,但是咱對伊的了解有偌濟?
偌一般的國家,欲入去W.H.O.開一个仔會,敢若足四常的代誌,但是咱就是遮爾仔困難。
一、看新聞講臺語:藍綠仝聲 呼籲予臺灣入W.H.O.
◎翻譯
華語:疫情蔓延之後,各國挺臺灣加入W.H.O.的力道越來越大。
臺語:疫情湠開
I̍k-tsîng thuànn--khui
.『蔓延』:咱用「湠thuànn」這字來講,「湠開thuànn--khui」。
這字足臺語氣的,除了疫情,一般生物攏會當用「湠」。
例:這野草湠甲規片。
火燒厝,湠足濟間的,規个庄仔頭攏湠去矣,足恐怖。
索仔湠股soh-á thuànn-kóo:以早較有咧用,這馬較罕。
意思是索仔變做、恢復做干焦一條一條按呢,
本來索仔是愛足濟條共伊縛鬥陣,才變做一條索仔。
恢復做干焦賰彼一絲一絲、一條一條按呢。
意思是講一个組織崩盤,就是伊散開去矣。
『分崩離析』,變做是干焦單獨的,無啥好的意思。
華語:力道越來越大
臺語:力頭愈來愈飽
La̍t-thâu jú lâi jú pá.
.力頭la̍t-thâu:足臺語氣的一个詞。
.飽pá:力頭會當飽,咱的腹肚會飽以外,閣有其它物件嘛會飽。
例:米誠飽(bí tsiânn pá),袂冇冇(phànn-phànn)空空,
食起來較實(si̍t)。
註:《教典》飽漿pá-tsiunn的近義詞:飽米pá-bí。
例:這个戲真飽,意思就是誠豐富,誠精彩(tsing-tshái),
內容誠飽滇(pá-tīnn)。
華語:臺灣在疫情威脅的前線,『不應該使防疫出現破口。』
臺語:防疫袂用得有空縫。
Bē/Buē-īng-tit ū khang-phāng.
.『破口』,就是「空縫khang-phāng」,袂當有任何的空縫。
.『不能』,就是「袂用得」按怎。
bē/buē-īng-tit,又唸作bē/buē-īng-tsit、bē/buē-īng-lit、bē/buē-īng-eh
明明就是一个足四常的講法,但是這馬逐家共袂記去矣。
近義詞可能逐家較捷講:袂當、袂使、毋通,
若照以早先輩分法,可能會當分閣較幼,毋是所有物件通用,
愛看啥物狀況(tsōng-hóng)是「袂當」,啥物狀況是「袂使」。
.袂當bē/buē-tàng:一般攏較是講「能力」方面的,
.毋通m̄-thang:比較上,較強制語氣,較命令式的,較會用毋通。
這馬攏用甲無夠幼,敢若攏仝款,攏會使,其實小可有精差,
用法上,抑是用佇無仝款的對象。
袂用得按怎,咱日常生活嘛共抾轉來用一下。
例:暗時袂用得食傷飽。
.下跤這句的意思無仝矣,仝款字無仝意思,讀法嘛無啥仝。
例:這枝筆袂用得。
Tsit ki pit bē/buē-īng--tit.
「無法度用」,可能無水,抑是按怎,無法度閣寫,歹去矣。
華語:健康應該擺在政治之上
臺語:顧健康較贏拚政治
Kòo kiān-khong khah iânn piànn tsìng-tī.
﹡佗一个較重要?顧健康較重要,所以咱講「顧健康較贏拚政治」。
.較贏khah iânn
.拚piànn:猶閣有其它幾種嘛會使「拚piànn」的:
拚輸贏piànn-su-iânn:佇政治上拚輸贏。
拚血piànn-hiat:這足恐怖的,就是血流足濟,血一直出來。
拚汗piànn-kuānn:汗流袂停。(註:《教典》:『盜汗』。)
拚尾帖藥仔piànn bué-thiap-io̍h-á:可能啥物方法攏試過矣,
來看上尾帖藥仔試看覓,看有效無,閣共拚看覓。
華語:臺灣利益優先
臺語:臺灣利益排代先
Tâi-uân lī-ik pâi tāi-sing.
.『優先』→排代先tāi-sing。規个來講,你第一个。
「代先」這个詞嘛足臺語氣的,這馬真濟人無啥會曉用。
咱日常生活嘛會使提來講,譬如講...
例:請你行代先。
一般咱若講「代先 + 動詞」,比較是事先的意思。
例:我代先食。我代先講。
例:代先排喙罨予醫護人員。
意思:第一要緊是愛予醫護人員喙罨,代先愛排這件代誌。
若是「動詞 + 代先」,
例:做代先,行代先。意思是頭一个去做,去行。
華語:臺灣一直遲遲無法加入,
臺語:直直延延
Ti̍t-ti̍t iân-tshiân
.延延iân-tshiân:iân佮tshiân是仝意思,就是時間一直延後。
iân是文言音,tshiân是白話音。這種的例有真濟,
仝一个漢字,文言音+白話音,抑是白話音+文言音,
無仝讀法,變做另外一个詞。(註:譬如講:接接、食食。)
註:請參考[2011年4月30日《台語社》](https://www.facebook.com/groups/Taigisia/permalink/126530314090834/)版主鋪文(有豐惠老師家己的留話)。
華語:跟中國的阻攔有關係。
臺語:佮中國的攔閘有關係。
Kah Tiong-kok ê nuâ-tsa̍h ū kuan-hē.
.『阻攔』→攔閘nuâ-tsa̍h。
.閘tsa̍h:閘車(tsa̍h tshia);你毋通共我閘著。
.攔nuâ:佮「閘」仝意思。無仝字,仝意思,共鬥做伙。
例:攔路nuâ-lōo:人咧行,你中央(tiong-ng)共閘起來。
攔轎nuâ-kiō:轎咧行,你共閘起來,無愛予伊行。
攔人nuâ-lâng、攔車nuâ-tshia,攏會當「攔nuâ」。
二、講予你知:世界衛生組織
這馬全世界,逐家攏咧要意,就是這个「新冠病毒」的問題。
今仔日欲來介紹全世界上蓋重要防疫的機構,就是「世界衛生組織」,號做W.H.O.。
◎世界衛生組織(World Health Organization)→W.H.O.
*聯合國的專門機構之一
*疾病防治佮醫療、公共衛生、國際標準等等
伊的工課非常濟,包括病症的防治、醫療,全世界的公共衛生,
各種藥仔等等的國際標準,攏是W.H.O.訂出來的。
*予全世界人民佇身體、精神、社會生活保持上好水準
這是伊的目標。
*總部設佇瑞士日內瓦
*非洲、歐洲、東南亞、東地中海、西太平洋佮美洲攏有分部
這个組識拄才講的是硬體的部份。
◎世界衛生大會(World Health Assembly)
*逐冬五月佇瑞士召開一禮拜的會議
這个組織上蓋重要的,是逐年五月攏會佇瑞士,開一禮拜的會議,
這个會議號做「世界衛生大會」WHA。
*是世界衛生組織上懸的決策機構
這个大會非常重要,真濟代誌攏佇這个大會頂懸來決定,
是世界衛生組織上蓋懸的決策機構。
*三種資格:會員國、準會員國、觀察員
WHO是聯合國的一个機構,會當參加的有三種資格,
就是會員國,準會員國、觀察員。
會員國:因為伊是聯合國的組織,雖然有幾个仔國家有一寡精差,
基本上攏是仝款的,只要是聯合國的會員國,
你就是會當參加WHA。
準會員國:就是這寡會員國 𪜶的殖民地(si̍t-bîn-tē/tuē),
只要伊的母國,同意 𪜶來參加, 𪜶嘛是會使來參加。
*觀察員無投票權、人事分配權,無法度提著重要文件
咱臺灣佇2008~2016年,咱有受邀請做觀察員。
觀察員佮會員國有啥物無仝款?
觀察員你是來觀察的,所以你足濟權利攏無,佇大會內面,
你無投票的權力、佇組織,你無人事分配的權力,權力差真濟,
過去,佇2008~2016年,咱干焦會當做觀察員。
*臺灣佇2008~2016年捌受邀請做觀察員
◎臺灣佇W.H.O.參與的情形
為啥物臺灣佇W.H.O.的參與,遮爾仔無資格?因為佮聯合國有關係
*中華民國佇1971年失去聯合國席次
中華民國過去是聯合國的會員,但是佇1971年失去聯合國席次,
了後,咱就佮W.H.O.的官方關係,按呢就斷去矣。
中央就無法度參與。
*1997年臺灣推動參與失敗
雖然佇1997年,有推動咱臺灣應該愛參與才著,但是推動失敗。
*2003年SARS期間
咱來想一下,佇2003年的時陣,有一个SARS,咱普通時仔,
無參加W.H.O.,但是搪著世界性遮爾仔嚴重疫情的時陣,
有參加、無參加就差真濟。
*夆拒絕參加防疫會議
彼的時陣,仝款,去夆拒絕,袂當參加這个世界性的防疫會議。
*和平病院群聚感染,才有視訊會議資格
尾仔,因為咱臺灣和平病院發生感染,才予你參加一个視訊會議。
*陽明病院感染控制了好,才受邀請去分享
閣來,因為咱臺灣表現了袂䆀,陽明病院感染控制了真好,
所以受著邀請,去分享一下。
這就是咱臺灣的現狀(hiān-tsōng)。
◎面對新冠(武漢)肺炎
這馬全世界攏咧面對新冠肺炎,這新冠肺炎遮爾嚴重,世界各國攏咧交換經驗,但是咱臺灣仝款,嘛是袂當參與。
*根據「一个中國原則」,無愛予臺灣參與專家論壇
因為這个肺炎,本來是W.H.O.臨時欲來辦一个專家論壇,
咱臺灣仝款是袂當來加入。但是咱臺灣明明就是佇中國邊仔,
遮爾仔重要的位,竟然無法度參加。
*國際聲援:日本安倍首相、W.H.O.執委會美、加等會員國
國際逐家攏來共咱聲援,包括日本首相,W.H.O.執行委員會,
美國、加拿大這寡會員國,攏共同講袂使,咱一定愛予臺灣參與。
*上尾佇線頂參與專家論壇
尾仔,咱會當線頂來參加專家論壇
*對臺灣人民無公平,嘛是全世界的損失佮防疫空縫
想想咧,這敢有公平?全世界所有的國家,逐家攏咧討論的代誌,
咱臺灣去夆排除佇外口,對咱臺灣的人民是非常無公平的代誌。
除了對咱臺灣的權益,咱公共衛生的權益,有受著影響以外,因為
咱臺灣這馬防疫,做了非常好,對全世界來講,是全世界的損失。
也會使講是防疫的空縫。
*全民愛共同解決關鍵阻礙
咱做一个臺灣人,除了受氣以外,咱愛來共同思考一下,
阻擋咱的關鍵,到底是啥物,咱愛來想辦法解決,
就是這个「一个中國原則」。
咱是臺灣,彼確實是一个中國,所以咱知影佇憲法等等,
世界是按怎看咱臺灣的,這个問題一定愛解決的,抑無,
一直按呢落去,對咱臺灣,對世界攏是無好的代誌。
◎語詞:
.干涉kan-sia̍p:主要是音的問題。
毋過若後壁有字的時,彼个「涉sia̍p」愛變低,干涉啥物人。
例:你毋通干涉我的感情。
.干預kan-ī/ū:↑差不多意思。
若欲比這兩个詞來講,可能「干涉」較口語化,「干預」譬如講新聞頂懸,
較書面語,用「干涉」較聽有,較口語。
嘛會當講閣較口語、白話,就講「插手tshap-tshiú」,
例:你毋通共我「插手」喔!
.爆發po̍k-huat:嘛是讀音的問題。
「干涉kan-sia̍p」佮「爆發po̍k-huat」,這種字咱愛注意的是,
後壁有字的時陣,「涉sia̍p」是變低,「發huat」是變懸,
因為 𪜶的調無仝,咱看羅馬字就知影矣。
爆「發huat」疫情,發是第4調,後壁有字,愛變第8調。
.迸piàng:「爆發」的另外一種講法,足口語的「迸piàng」。
例:哇~這件代誌「迸piàng」出來矣!
可能逐家想講是「煏piak」,「煏」嘛是會使。
迸piàng,較有狀聲詞的感覺,主要毋但是干焦這个用法爾。
除了佮「爆發」仝意思,猶閣有足口語的,進前捌聽人講,
例:我迸矣,迸矣。意思是「我慘矣,慘矣,害矣,害矣。」
.聲援siann-uān:這是讀音的問題。
聲siann,有人讀文言音「聲sing」。這馬逐家較慣勢白話音。
援uān,漢字本身是第7調。
聲援啥物人,聲援你,聲援伊,「援uān」愛變調。
.相伨sio-thīn:「聲援」的另外一个講法,足口語的「相伨」。
例:咱來相伨。
相伨sio-thīn,逐家較𠢕講,聲援siann-uān,逐家較袂記得。
.空縫khang-phāng:本來意思,「空」、「縫」、「空隙」仝意思。
佇遮用的意思,是「有啥物無注意著、落勾的彼个狀況」。
.防堵hông-tóo:一个是講讀音,一个是講過去的辭典有收這个詞,
是用佇咧講「邊防」,防堵兵,意思就是咧做邊防的兵。
佮咱這馬的用法無啥仝款,毋過其實有相關,就是共閘起來,
「邊防」就是予人莫來侵入,佮疫情嘛是會當提來用。
.準講tsún-kóng按怎:假設(ká-siat)啥物情形。
準講你明仔載欲去,伊嘛講欲綴。
三、看戲齣(hì-tshut)講臺語
◎害阮按呢那看電視,
Hāi guán/gún án-ne/ni ná khuànn tiān-sī,
手無通好振動,癢甲/擽甲。
tshiú bô-thang-hó tín-tāng, tsiūnn ka̍h/ngiau ka̍h.
﹡癢tsiūnn:是予蠓仔咬著,才會癢甲。足具體,
啥物蟲咬,皮膚按怎,彼才會「癢tsiūnn」。
擽ngiau:心理上較抽象,足擽的,嘛毋知佗位咧癢。較心理性的。
用兩个對照,有寡人「癢」佮「擽」會花去,兩个無仝款。
佇這个戲劇的狀況(tsōng-hóng),照講是「擽ngiau」較合,
因為是咧講「啊都無通好做,想欲做。」按呢。擽ngiau按呢寫。
註:會當參考2018.10.04《台語講世事》:電動競技 3:47
.癢tsiūnn:一噗就會癢,癢就去抓(jiàu),會解決的叫做→癢。
.擽ngiau:癢想欲抓,袂當解決的叫做→擽。像講心肝頭擽擽,嚨喉擽擽。
.華語無分,攏是『癢』。
◎人是咧認真咧做穡頭。
Lâng sī leh jīn-tsin leh tsò/tsuè-sit-thâu.
.穡頭sit-thâu:過去農村咧做種作(tsìng-tsoh)的工課,
但是這馬的時代,所有的工課、工作,攏會當講「穡頭」。
## [2020.03.12《台語講世事》:個人防疫](https://youtu.be/bELqfrcakXU)
.十全tsa̍p-tsn̂g
.加圇ka-nn̂g
.加圇食ka-nn̂g-tsia̍h
.加圇錢ka-nn̂g-tsînn
.伊真加圇ka-nn̂g
.洗手七字訣(kuat):面、盤、叉、研、大、徛、節。
★大tuā→大頭拇tuā-thâu-bú,慧盈老師:大拇公,《教典》無收。
.透仔thàu-á
.瀾鬚nuā-tshiu:這兩字哪會遮古錐,會予人想著彼个形,誠好笑。
.接觸tsiap-tshiok (O),俗唸作tsiap-sio̍k (X)
.焦洗手ta-sé/sué-tshiú (O),毋是「乾kuann」洗手。
*用雪文較贏用酒精
.手節tshiú-tsat = 手腕tshiú-uánn
提醒逐家,個人的防疫,愛做啥物代誌。
洗手的時陣,愛那唱《生日快樂歌》,閣愛唱3遍,愛洗有夠久,
愛洗一分鐘,毋通烏白沐一下。
一、看新聞講臺語:掛喙罨,捷洗手,防疫做予齊
◎翻譯
華語:要唱好唱滿3遍,洗手細節也要顧到。
臺語:唱予十全,洗予加圇。
Tshiùnn hōo tsa̍p-tsn̂g, sé/sué hōo ka-nn̂g.
﹡咱有兩个詞攏咧講「完全」、「全體」,抑是「攏總」的意思。
.十全si̍p-tsuân:「十全」大補湯,彼是文言音。
.十全tsa̍p-tsn̂g:佇這種意思來講,咱是講「十全tsa̍p-tsn̂g」。
這个詞咱普通時嘛定定會當用,只要欲表示足完整、足完全。
例:你愛唱予十全。
你這物件愛攢(tshuân)予十全。
.加圇ka-nn̂g:佮十全(tsa̍p-tsn̂g)仝款意思,另外一種講法。
.加圇食ka-nn̂g-tsia̍h:
例:這隻雞愛加圇食。
意思是雞頭、雞尾椎,啥物部位攏總共利用,攏愛共食食咧。
.加圇錢ka-nn̂g-tsînn:
例:我所有的錢是偌濟,我加圇錢就幾百箍爾。就是所有的。
例:我這馬足散(sàn)的,加圇錢干焦五箍。
.伊真加圇:佮頭先講的「完整」意思無仝,這馬較罕得聽人講。
毋過辭典有收,是「足孤僻,較無愛佮人做伙」的意思。
例:伊真加圇,攏無欲佮咱講話。
華語:洗手的細節要顧到
臺語:洗手細節顧齊著
Sé/sué-tshiú sè/suè-tsiat kòo tsiâu-tio̍h.
.齊著tsiâu-tio̍h:就是「齊tsiâu」的意思,加一个著,臺語的用法。
.定著tiānn-tio̍h:彼个狀態真定(tiānn)的意思。
臺語:洗手七字訣(kuat):這佮華語的無仝。
Sé/sué-tshiú tshit jī kuat:
面、盤、叉、研、大、徛、節。
bīn, puânn, tshe, gíng, tuā, khiā, tsat.
﹡連(liâm)做伙讀,頭前著變調。
﹡中央防疫中心先出華語版的,咱家己出臺語版,民間就按呢對應。
.面bīn,是「手面tshiú-bīn」,毋是講咱的「面」,『手掌』。
.盤puânn,就是「手盤tshiú-puânn」,『手背』。
.叉tshe,是指頭仔 交叉(tsíng-thâu-á kau-tshe),空縫愛浞浞咧。
.研gíng,是關節的所在,指頭仔尾溜(bué/bé-liu)佮指頭仔規枝,
共研研咧,攏愛注重清潔。註:《教典》研:磨。
.大tuā→大頭拇tuā-thâu-bú:(慧盈老師:大拇公,《教典》無收。)
愛注重虎口也好,大頭拇規枝也好,攏愛注重,洗予清氣。
.徛khiā,指頭仔徛咧,因為尾溜、指甲縫,嘛是愛注重,
愛清氣,愛共浞(tshio̍k)。
.節tsat,就是「手節tshiú-tsat」,『手腕』,這个部份嘛愛注意,
有的人較無咧洗遮。
﹡面bīn、盤puânn、叉tshe、研gíng、大tuā、徛khiā、節tsat。
分開七字的唸法。
連(liâm)做伙讀較親像唱歌,嘛是愛斷句:面盤#、叉研#、大徛節#。
逐家愛會記得,洗手的時,愛那唸,那洗,那唱《生日快樂》歌。
華語:酒精的濃度要達到75%,才能有效達到消除病菌的作用。
臺語:(酒精的)厚度愛有75%,
(Tsiú-tsing ê) kāu-tōo ài ū tshit-tsa̍p gōo pha,
才有消毒殺菌的效果。
tsiah ū siau-to̍k sat-khún ê hāu-kó.
﹡酒tsiú,咱攏講幾%、幾%的厚度(kāu-tōo),偌厚(guā-kāu)。
例:你是啉厚酒?抑是啉bih-luh(ビール)?
這厚酒(kāu-tsiú),就是伊的厚度偌厚?
酒精的『濃度』,咱會當用「厚度」來講。
註:會當參考[2017.12.14《台語講世事》台灣的空污問題](https://youtu.be/TgBqjsthUgM?t=1110):
.厚kāu v.s. 濟tsē/tsuē
.消毒殺菌siau-to̍k sat-khún:「消毒siau-to̍k」可能逐家較知,
殺菌sat-khún,彼个「細菌sè/suè-khún」的「菌khún」。
逐家較袂曉讀,所以提醒一下。
華語:可以使用稀釋的漂白水
臺語:會使共漂白水透予薄
Ē-sái kā phiò-pe̍h-tsuí thàu hōo po̍h.
.透thàu:佇咱臺語內面,有足濟用法。
佇這个例,是講共伊摻(tsham)水,予伊的厚度變低,變較薄。
例:這燒水透一寡冷水,抑無,袂啉咧。
例:這條路透車頭。透→通去到tueh(佗位)。這是一種用法。
.透雨thàu-hōo:佇落雨的狀況(tsōng-hóng)下,我去做啥物代誌。
.透暝thàu-mê/mî:規暝攏按怎。
例:透暝無睏。
透暝咧趕工課。
.透仔thàu-á:這較罕得人講,以早有人咧講,算某一種抓耙仔、抑是報馬仔彼種的。
.薰吹透hun-tshue/tshe-thàu:通「薰吹」的物件,是一个家私。
二、講予你知:個人防疫
這馬全世界,攏咧關心這个「武漢肺炎」。
逐家攏知影,咱臺灣就是愛按照「中央疫情指揮中心」的指示,做一寡疫情防治。但是,上蓋重要的是咱個人的防疫,一定愛毋驚麻煩,愛共做予好勢。
個人的防疫到底愛做啥物代誌?
◎病毒按怎傳播
咱逐家毋通綴咧足驚惶的,咱愛知影原理到底是按怎來的,病毒到底按怎來傳播,這是重點的重點。
*對鼻目喙入來嚨喉空、肺管
這个病毒是對佗位入來咱的身軀的?是對咱的鼻、目、喙,入來嚨喉空、肺管,
來造成感染,所以咱做個人防疫的目的,就是愛共這件代誌阻擋起來。
咱來看啥物款的情形,會造成這款的問題。伊有兩種的傳播方式:
*傳播原因
.瀾鬚傳播:瀾鬚直接去予別人的瀾鬚噴著,抑是去沐著。
針對這个予人噴著的情形,咱愛掛喙罨,就是咧防這个物件。
.接觸傳播:咱的手,去沐著有病毒的瀾鬚了後,咱閣烏白摸,摸咱的鼻、喙、目睭,
摸面了後,就會造成感染。
欲來防治這个部份,咱著愛捷洗手。
*防治方式:掛喙罨、捷洗手,這是上基本的,相信逐家攏知影。
◎捷洗手
*摸著比予人噴著的機率較懸
專家攏共逐家講,雖然逐家這馬攏非常在意(tsāi-ì)喙罨買有著無,
但是閣較重要的是愛捷洗手。
用想的就知影,因為瀾鬚有重量,袂得咧空氣當中飛來飛去,所以有一个距離了後,
就會落咧塗跤,抑是落咧啥物所在,除非是誠近距離,若無,你去夆噴著的,
比你去摸著的機率較低,
摸著比予人噴著的機率較懸。所以才講捷洗手,才是閣較重要的。
*食物件進前,用便所了後,嗽、擤鼻,去病院,出外轉來
啥物時陣愛洗手?遮有幾个仔原則,就是:
食物件進前,去便所了後,你有呿呿嗽、擤鼻,抑是去病院,出去外口轉來等等,
攏愛來洗手,當然洗愈濟愈好。
*「面、盤、叉、研、大、徛、節」一分鐘。
咱洗手嘛有一个規則,遮有幾个仔口訣。
.面bīn,是「手面tshiú-bīn」愛洗洗咧。
.盤puânn,就是「手盤tshiú-puânn」嘛愛洗洗咧。
.叉tshe,(共指頭仔)叉開,共你指頭仔中間的空縫,嘛愛洗洗咧。
.研gíng,是愛用你的關節遮,佇手面研研咧,共洗予清氣。
.大tuā,佇你的大頭拇仔遮,嘛攏愛洗予清氣。
.徛khiā,手指頭仔尾的所在,嘛愛佇手面頂懸,共伊研研咧。
.節tsat,就是「手節tshiú-tsat」,攏愛洗予清氣。
愛洗一分鐘,洗手的時陣愛按呢。
*用雪文較贏用酒精
咱這馬出去外口,攏會用著→焦洗手ta-sé/sué-tshiú,就是用酒精。
焦洗手當然嘛會使,因為酒精會共病毒刣予死,但是閣較有效、
閣較重要,因為咱是欲洗瀾鬚,所以用雪文來洗,較贏用酒精。
這个觀念,逐家一定愛有。
◎掛喙罨
*外科喙罨就有夠,嗽、拍咳啾愛掛罨
喙罨足濟種,只要外科喙罨就有夠,毋免掛予你喘氣困難的彼種。
*目的是欲閘瀾鬚
咱普通時有喙罨當然共掛起來,但是無喙罨的時陣,你若有嗽、
拍咳啾,嘛愛緊共遮咧,千萬毋通講「無喙罨就完全袂當防治」
只要共你的瀾鬚閘(tsa̍h)起來,這攏是有效的。
*官方宣導當時(tang-sî)愛掛喙罨:
去病院、本人發燒、呼吸道有病症,抑是免疫力䆀,
無通風的空間內面,長時間近距離接近人,這攏是愛掛喙罨。
*根據疫情做調整
當然這是目前,咱愛隨疫情,聽中央疫情指揮中心指示,做調整。
◎喙罨清潔(tshing-kiat)
當然咱希望喙罨數量絕對攏有夠,因為喙罨上好毋通一直重複使用。
萬不二,喙罨若是無夠,喙罨欲按怎來做清潔?
*纖維(tshiam-î/uî)佮靜電(tsīng-tiān)
喙罨會有效,原理是因為喙罨內面,纖維佮靜電兩个部份來影響。
*56度20分鐘/酒精,會當刣死病毒
有的人講喙罨共提去創予燒,因為病毒56度,你共燒20分鐘,病毒就會死去,這是無毋著。
*咧餾咧熱的時,毋通破壞纖維
這个部份一定愛注意,咧共創予燒的時陣,毋通破壞伊的纖維。
*酒精會予靜電暫時失效,毋過會當清潔
有人講用酒精來共消毒,敢會使?酒精會當共病毒刣死,無毋著,
嘛有人講酒精可能會影響喙罨內面的靜電,按呢是欲按怎?
酒精干焦會予靜暫時失效,但是酒精確實會當提來做清潔佮消毒。
*上好是數量有夠,毋通重複用
這个部份提供予逐家來思考,咱就是愛捷洗手,掛喙罨,
希望喙罨的數量有夠,上好是毋通一直重複使用。
◎語詞:
.鼻目喙phīnn-ba̍k-tshuì:一般來講,咱攏講毋通去摸目睭、鼻仔、喙,按呢分開講。
但是有另外一个詞就是叫做「鼻目喙」,其實講起來是「五官(ngóo-kuan)」,
抑是「面容」的意思。
這馬咱雖然攏講「毋通烏白去摸你的鼻目喙。」,咱是講
「毋通去摸你的鼻仔、目睭佮喙。」,分開三个部位講。
但是以前講「鼻目喙」,是外口看起來的五官,抑是面容。
.肺管hì-kńg:本來是誠普通的詞,毋過敢若愈來愈濟人袂曉講。
.手節tshiú-tsat = 手腕tshiú-uánn。
.瀾鬚nuā-tshiu:這个詞誠趣味,有的人可能會感覺講就是喙瀾。
有小可無仝,伊的意思是(喙瀾)噴出來足幼的,敢若鬚。
喙瀾有可能是一糊(kôo)的,這馬講的是一絲一絲的,
按呢較親像喙鬚(tshuì-tshiu)的感覺,較幼,無一定看有。
.沐bak:可能有人會講「莫摸」,但是這个「沐」意思閣較無仝。
就是你有磕著(kha̍p--tio̍h)、接觸著(tsiap-tshiok--tio̍h),
不管你是毋是用摸的,彼就是「沐bak」。
例:啊!去沐著手矣。
你毋是刁故意(tiau-kòo-ì)的,無細膩創一下,去沐著手。
「沐bak」這字嘛足臺語氣的。
.喙罨tshuì-am/om:有腔口差,有人講「喙罨tshuì-om」。
這嘛算較新的詞。
以前的人,喙罨這个詞是有的,但是攏是狗佮牛咧掛的物件。
「牛喙罨gû-tshuì-am」、「馬仔喙罨」彼類的。
.浞tshio̍k:「浞浞咧」彼个動作,衫、紙攏會使用「浞」。漢字按呢寫。
註:《教典》浞tshio̍k:『將物品在水中稍微搓揉、攪動。』
臺語試翻譯:共物件佇水裡小可揉撋、抐振動。
.擤鼻tshìng/tshǹg-phīnn:腔口差,攏有人講。漢字按呢寫。
.雪文sap-bûn/茶箍tê-khoo:有人講這兩項無仝。
.雪文sap-bûn:外來語來的。
.茶箍tê-khoo:有人講是茶籽粕,可能原料無啥仝。
.拍咳啾phah-kha/ka-shiùnn
.嗽sàu:有人講「咳嗽ka-sàu」,或者是「歁嗽khām-sàu」。
三、看戲齣(hì-tshut)講臺語
◎欲學人去做落翼仔毋?
Beh o̍h lâng khì tsò/tsuè làu-si̍t-á m̄?
.落翼仔làu-si̍t-á:原本伊兩種意思,
頭先「落翼」是講鳥仔的翼股(si̍t-kóo)斷去,著傷(tio̍h-siong)。
落尾,變做「偷走厝的少年查某囡仔」,一定愛是查某囡仔。
以早的環境,偷走厝的,可能足濟攏去做非法的性交易工課,
所以變做講所謂的彼款性交易工作者,嘛變做叫做落翼仔。
這馬可能嘛是有一寡離開厝的,偷走厝的查某囡仔,無一定有做這種工課。
但是以前就是攏按呢講。
.毋m̄:啥物啥物「毋?」,應該是對啥物啥物「是毋?」來的。
啥物啥物「是毋?」的「毋」,是輕聲,
啥物啥物「毋?」的「毋」,原調上尾字m̄,第7調。
足臺語氣的講法。
◎無彼个尻川,就莫食彼个瀉藥。
Bô hit ê kha-tshng, tō mài tsia̍h hit ê sià-io̍h.
﹡這算俗語。無彼个才調,就莫做的意思。
.尻川kha-tshng:介紹「尻川」予逐家熟似,是這兩字,按呢寫。
## [2020.03.19《台語講世事》:行動支付](https://youtu.be/r2Ez2d5xIDA)
.捾袋kuānn-tē
.荷包hâ-pau:「hâ」是啥物貨?是毋是動作?
.sa-bì-suh/sù
.pha̋-siàn-tòo
.『現金回饋』:錢額相送。
*錢大百,人落肉。Tsînn tuā pah, lâng lo̍h bah.
.散工suánn-kang vs. 散工suànn-kang
.觱卡pi-khah、扌回卡huê-khah
.斟茶thîn tê:這馬逐家攏用「倒tò」的。「斟茶」較文雅。
這馬真濟人買物件,毋免提錢,攏用「啥物pay」,直接來pay。
這馬上新的,就是手機仔提出來pay,就是行動支付,用手機仔就會當買咖啡。佮信用卡到底有啥物無仝?
一、看新聞講臺語:行動支付真利便,少年人佮意用
◎翻譯
華語:上班族外帶咖啡。
臺語:赴上班,咖啡捾走。
Hù siōng-pan, ka-pi kuānn tsáu.
.『外帶』:「欲包beh pau」、「紮走tsah tsáu」。
因為一般飲料,逐家時行用飲料袋仔「捾袋kuānn-tē」,
有一个「耳hīnn/hī」通捾,所以咱講「捾走kuānn tsáu」,用「捾kuānn」的。
.『外帶』的統稱,「欲包beh pau」、「欲紮走beh tsah tsáu」。
例:兩粒肉圓欲包。兩粒肉圓欲紮走。
華語:懶得掏錢包,找零錢。
臺語:貧惰對荷包撏錢。
Pîn/pûn/pân-tuānn tuì hâ-pau jîm/lîm tsînn.
.貧惰pîn/pûn/pân/pān-tuānn:有腔口差。
.荷包hâ-pau:「hâ」是啥物貨?是毋是動作?縖皮帶的「縖hâ」?
仝彼个音,是『荷包』,咱白話講「荷包hâ-pau」。
有人講「皮包仔phuê/phê-pau-á」,有其它無仝講法,
這是過去有捌按呢講,嘛是會當共逐家紹介,動作愛注意。
註:《教典》:『錢包』。
.撏jîm/lîm:袋仔、包仔較有深度,小可深度,共提出來的意思。
例:你對你的橐袋仔、褲袋仔,撏一寡銅kòng出來。
撏jîm/lîm,就是這字,嘛有腔口差。
華語:行動支付『有紅利點數』。
臺語:有sa-bì-suh/sù的點數。
Ū sa-bì-suh/sù ê tiám-sòo.
﹡會當用sa-bì-suh/sù的講法,有可能送的,予你後擺較俗彼類的。
「紅利âng-lī」這馬嘛是有人綴華語,直接用臺語音讀。
華語:要祭出最高20%的現金回饋
臺語:予你上濟20%的錢額相送
Hōo lí siōng tsē/tsuē jī-tsa̍p pha ê tsînn-gia̍h sio-sàng.
.『現金回饋』:錢額相送,欲送你錢就著矣。
.20%∥jī-tsa̍p pha:pha是簡化的講法,以早講較完整pha̋-siàn-tòo。
這馬攏講「pha」爾。
.錢額tsînn-gia̍h:金錢的數額(siàu-gia̍h),彼个數目(sòo-bo̍k)是按怎。
這馬咱定定聽著廣告,『現金回饋』這四字,這足現代,定定咧講的,
咱臺語嘛愛共翻予著,咱按呢講「錢額相送」。
咱的頭家會記得喔,後擺欲講『現金回饋』就講→錢額相送。足臺語氣的。
華語:等同打了八折的優惠
臺語:袂輸是拍八折
Bē/Buē-su sī phah peh/pueh tsiat.
.袂輸bē/buē-su:袂輸按怎。
這馬咱逐家攏干焦會曉講「等於tíng-î」,等於拍八折。
咱會當講「袂輸bē/buē-su按怎」,這足臺語氣的。
例:你今仔日穿按呢,袂輸是欲去參加喜宴。
袂輸按怎按怎,逐家一定愛共抾轉來用。
華語:能否成為振興商圈的特效藥?
臺語:敢通成做街市再興的好藥?
Kám thang thiânn-tsò/tsuè ke/kue-tshī tsài-hing ê hó-io̍h.
﹡因為是疑問句,所以是→敢按怎按怎?,足基本的,咱定定咧講。就是華語的「嗎」莫講。
例:你敢通按怎?
.敢通kám thang:無一定後壁有字,有時仔後壁無字嘛會當。
啥物狀況你看著,講:「敢通(kám thang)?」
例:A:這予你食。
B:敢通?
A:抑無我食好矣。
.『振興商圈』:欲『振興』可能這馬較無遐好勢,可能生理無好,
咱講「街市再興ke/kue-tshī tsài-hing」這个講法會當參考,
閣予「興hing」起來。
這馬當然嘛有人按呢講「商圈siong-khuan」,但是以前,
例:這个街市誠鬧熱。這足臺語氣的。
二、講予你知:行動支付
以前,咱買物件的時陣,一定共咱的皮包仔提出來,佇內面揣錢,揣銅kòng,抑是揣信用卡。但是這馬愛揣你的手機仔,緊共提出來。
◎行動支付是啥物
*無用「現金、支票、信用卡」
你毋免用現金、支票、信用卡來買物件,是用一種行動裝置來買。
*行動裝置hîng-tōng tsong-tì:手機仔、手錶等
「行動裝置」是英文Mobile device,會當徙來徙去的一款裝置。
包括手機仔,這馬有的人用手錶仔,這攏算是行動裝置一部份。
*簡訊,透過網頁,app等
無用信用卡、現金來買物件,這款方式佇幾年進前就已經開始,
一開始,有人用簡訊來買物件,有的是用電腦透過網頁來買物件,
這馬閣較濟是用咱手機仔內面的app。
app號做「應用程式ìng-iōng tîng-sik」,電腦內面,手機仔內面,
攏會有這種app應用程式。
*條碼、QR code縛定
咱若手機仔提出來了後,揣著咱欲用的App,就知影用條碼,
有可能是QR code,就是一个四四角角、烏色的物件,
按呢共觱(pi)一下,掃一下,馬上就會當付錢,這就是行動支付。
為啥物條碼,抑是QR code,掃一下就會當付錢?
因為App已經佮你的信用卡,甚至會當連到你的口座(kháu-tsō),
這有一个特別的名詞,號做「縛定pa̍k-tiānn」,已經縛定,
這就是為啥物咱會當用手機仔,抑是手錶仔來付錢的一个方式。
◎優點
咱為啥物欲按呢做?當然有伊的好處佇咧。
*免找錢,免紮遐濟張信用卡
咱買物件的時,免找錢,時間省誠濟,免紮遐濟張信用卡佇身軀,
你攏總共囥佇手機仔內面就會使,非常方便。
*安全機制、交易愛認證
咱用App來付錢的時陣,伊有一个安全機制,會當共咱控制,
每一擺做交易的時陣,攏愛有一个認證,所以是非常安全。
*方便記錄,了解消費習慣
消費者家己,攏會當透過手機仔來了解,你做啥物款的消費。
會當方便記錄,了解這個月開偌濟錢佇啥物所在,等等。
當然頭家、店頭,𪜶嘛通會當利用這款App,來了解消費者消費的習慣,
才來共消費者做一寡建議,等等。
*辨識系統減少受偷用
對店頭來講,閣有一个上大的好處,以前用信用卡,抑是錢,有可能去予人偷用,
這馬用App了後,因為有辨識系統,所以會減少夆偷用的現象。
◎發展現況(hiān-hóng)
*各國政府咧推動檢討法規
這馬看起來敢若是人類社會的趨勢,各國政府攏一直咧推動矣,
毋但硬體愛講究,各種的法規嘛愛講究,各國政府攏咧推動,
嘛咧檢討這馬的法規有夠,抑無夠。
*臺灣已經普及,傳統市場嘛通用
咱臺灣這馬嘛已經足普及矣,佇百貨公司、大賣場等等的所在,
欲用行動支付,攏非常簡單,甚至佇傳統市場,這馬嘛通用矣。
手機仔提出來,共觱(pi)一下,就通好付錢矣。
*瑞典對無現金社會的檢討
這真正敢遮爾仔好?有真濟國家開始檢討,譬如講瑞典,
瑞典這个國家真特別, 𪜶這个行動支付,是行甲足緊的,甚至
瑞典人有的已經共晶片,種佇咧身軀內面,連手機仔攏免提出來,
手一下伸出來,都通付錢矣,行遮爾仔緊。
但是瑞典這馬嘛開始檢討,這款無現金社會,敢真正愛行遮爾緊?
*利便性、穩定性佮隱私(ún-su)問題
這有幾个仔問題,當然「無現金」看起來,敢若誠利便,無毋著,
但是牽涉著老大人,抑是外國來的人,可能使用就無遐爾方便。
講著「穩定性」,咱知影用機器,萬不二無連線,抑是按怎,突然間無法度付錢。
「穩定性」這馬嘛真濟人猶閣咧討論。
閣來,「隱私」的問題,因為用App,用行動支付付錢了後,啥物人付,佇佗位付,
付偌濟錢,攏看甲明明明,這就是隱私的問題。
各種問題,這馬咱人類社會猶閣咧討論當中,咱臺灣嘛是仝款,那發展,那檢討,但是可能這會是一个趨勢,未來,你欲用現金付,用信用卡付嘛是會使,欲用行動支付來付嘛是攏會使。
◎語詞:
.荷包hâ-pau:可能有人講荷花(hô-hue),荷蘭(Hô-lân),
咱較知影這字「荷hô」的音,伊有另外一个「hâ」的音,
有的人講「荷包hâ-pau」,嘛是閣較濟人講無仝款的講法。
.錢袋仔tsînn-tē-á:袋tē,嘛有人講→包pau,錢包仔tsînn-pau-á。
.銀袋仔gîn/gûn-tē-á:以前是囥金銀財寶的袋仔,
可能有銀票(gîn/gûn-phiò),票包仔(phiò-pau-á)嘛捌有人講,
較四常是聽著「皮包仔phuê/phê-pau-á 」。
例:你的皮包仔佇遮。
皮包仔無一定是「皮phuê/phê」做的,彼是一个通稱。
*錢類的講法:
.大張的tuā-tiunn--ê:錢若是講一千箍的,咱這馬攏會講「大張的」。
意思當然有細張的,這細張的著愛看時代,以早有5箍,幾箍的,
咱這馬是一百就算「細張的sè/suè-tiunn—ê」, 這是相對的意思,
有的人講一百箍足大張的,嘛袂使講毋著。
.大百tuā-pah:是咧講「足濟」。所以咱會當講
大百錢tuā-pah-tsînn,意思就是足濟錢。
例:這間厝開伊大百錢。
*俗語:[錢大百,人落肉。](https://chhoe.taigi.info/search?method=basic&searchMethod=contains&spellingMethod=poj_input&taibun=%E9%8C%A2%E5%A4%A7%E7%99%BE%EF%BC%8C%E4%BA%BA%E8%90%BD%E8%82%89)Tsînn tuā pah, lâng lo̍h bah.
意思是趁足濟錢,毋閣身體可能無好去,用「肉bah」去換。
「消瘦落肉siau-sán-lo̍h-bah」的「落肉」。
*較少金額的:
.小票sió-phiò
.散票suánn-phiò,毋是suànn-phiò。
散工suánn-kang:是零星工。
散工suànn-kang:是做了矣,工課做煞矣,會當散(suànn)會、會當四散。
.零星的lân-san--ê:可能有包含銀角仔,無一定是銀角仔,可能細張的紙票,
就是找予開的,金額較細的。
.銀角仔gîn/gûn-kak-á:一定是銅kòng。
*動作:錢欲按怎予人
.納la̍p:納錢la̍p-tsînn,這不止仔臺語口語化的講法,足臺語氣。
例:你這个錢納抑未?
你這个費用納抑未?
.繳kiáu:繳學費kiáu-ha̍k-huì。
.交kau
.付hù
*使用「卡khah」的動作:因為咱一般華語是看著『刷』,
有人講用「鑢lù」的,毋過「鑢lù」的動作小可傷大力。
是用棕鑢仔(tsang-lù-á)欲共鑢予歹按呢的感覺,有較奇怪。
.觱卡pi-khah:大部份攏有一个聲音,予伊觱(pi)一下。
.扌回卡huê-khah:較輕咧,予伊過都好,扌回一下。
這是咱現代定定會用的一寡動詞。
三、看戲齣(hì-tshut)講臺語
◎你激一个面腔予我看
Lí kik tsi̍t ê bīn-tshiunn hōo guá khuànn
.激面腔kik-bīn-tshiunn:本來「面腔」就是「看起來按怎」,
毋過大部份咱會用佇咧較歹看面,抑是受氣,彼種較負面的,
較無好看的彼款狀況,就會講激一个面腔。
普通時仔,咱一般來講,面腔無一定有好有䆀。
例:伊的面腔誠好。嘛是會使按呢講。
伊本來是中性的,毋過咱的應用上,煞大部份用佇較負面的。
以早,佮鼻目喙、面容(bīn-iông)是仝款的意思。
激一个面腔,就是歹看面的意思。
◎我斟茶予你啉
Guá thîn tê hōo lí lim.
.斟茶thîn tê:主要是欲共逐家強調「斟thîn」這个動作,
這馬逐家攏用「倒tò」的,用兩手「倒tò」,無就是倒吊。
倒tò,是欲抨(phiann)掉,無愛矣。
斟茶較文雅,「斟thîn」這字就是按呢寫。
◎平本都無夠。
Phênn/Phînn-pún to bô-kàu.
.一般攏會佮「本」做伙,phînn本,抑是phênn本。
彼句口白「平本都無夠。」,攏囥佇咧跋筊(pua̍h-kiáu)用途較濟。
phênn/phînn本,意思是欲共伊的本錢提轉來、贏轉來。
基本上攏是用佇跋筊,袂定定用著就著矣。
註:[《台文華文線頂辭典》平本](https://chhoe.taigi.info/search?method=basic&searchMethod=contains&spellingMethod=poj_input&taibun=%E5%B9%B3%E6%9C%AC):『回本、撈本、翻本』。
## [2020.03.26《台語講世事》:植物肉(人造肉、未來肉)](https://youtu.be/P90-ZGAj2tQ)
.痟貓siáu-niau vs. 痟媌/猫siáu-bâ
.挃ti̍h/ti̍nnh
.挑戰,有人講:挑戰thiáu-tsiàn,有人講:挑戰thiau-tsiàn。
*食著按怎,動詞後面有「著tio̍h」,愛讀本調。
註:《教典》著tio̍h:6.動詞補語,後接形容該動作的狀態描述。
.畜牧業thiok-bo̍k-gia̍p
.環境khuân-kíng
.百百X∥pah-pah-?
.茄茉菜ka-bua̍h-tshài、厚茉菜kāu-bua̍h-tshài、牛皮菜gû-phuê-tshài
.植物si̍t-bu̍t (O),俗唸作ti̍t-bu̍t、tsi̍t-bu̍t (X)
一、看新聞講臺語:電商賣「人造肉」 搶600億商機
◎翻譯
華語:風靡全球的植物性蛋白人造肉
臺語:全世界咧痟植物性卵白「人造肉」
Tsuân sè-kài leh siáu si̍t-bu̍t-sìng nn̄g-pe̍h “jîn-tsō-bah”.
.『風靡』,咱講「痟(siáu)啥」就好矣。
例:三月痟(siáu)媽祖。
就是這字痟(siáu),就是講足興(hìng)的,比興的程度閣較懸,
比興閣較興,所以才會當達到痟的程度。
.痟貓siáu-niau vs. 痟媌/猫siáu-bâ:這是咧形容人。
不管「女字爿」、「犭字爿」,攏是叫做「媌/猫bâ」。
例:果子猫kué/ké-tsí-bâ,就是「犭字爿」的。
*貓niau,佮「媌/猫bâ」有啥物差別?囥咧人來講,有兩種講法。
過去,有人講「貓niau」是講查埔的,「媌/猫bâ」是講查某的。
所以罵查埔人足痟的,會講伊是「痟貓siáu-niau」,
罵查某人足痟的,會講伊是「痟媌siáu-bâ」,
以早攏會感覺講「媌bâ」這字較歹聽,較罵人的,字本身佮意思是咧講無好的,
所以「女字爿」的,就是較無好的查某人,但是就是有按呢的講法。
例:彼个人敢若一隻痟貓。應該是咧講查埔。
這馬現代來講,因為日本時代有「烏貓姊仔」、「烏狗兄」,
所以咱會想講「貓應該是咧講查某咧?」,這應該有時代差。但是以前就是按呢講的。
例:你的一个面若痟貓咧。
這个詞嘛不止仔古錐、趣味,會使閣共提出來用。
華語:要來挑戰肉食者的接受度。
臺語:挑戰興食肉的欲挃無。
Thiáu/Thiau-tsiàn hìng tsia̍h-bah--ê beh ti̍h/ti̍nnh--bô.
.挑戰,因為「挑」有兩个音,一个thiáu,一个thiau。
有人講:挑戰thiáu-tsiàn,有人講:挑戰thiau-tsiàn,攏會使。
.興食肉hìng tsia̍h-bah:誠有趣味食肉。
興食肉,聽起來較正常,若是講
痟食肉,可能彼程度無肉(食)會死,愛食足濟足濟。
.挃ti̍h/ti̍nnh:足口語化臺語的講法。有腔口差,無鼻音佮有鼻音的。
例:你欲挃毋挃(m̄-ti̍h/ti̍nnh)?
例:這你欲挃無?
例:我欲挃彼,欲挃這項。
這个「挃ti̍h」逐家敢若袂曉用矣,攏袂記得矣,愛繼續用。
華語:它的口感就像真肉一樣,而且零膽固醇、無激素、無抗生素。
臺語:食著親像正肉,
Tsia̍h-tio̍h# tshin-tshiūnn tsiànn-bah,
煞無膽固醇、hoo-lú-bóng、抗生素。
suah bô tánn-kòo-sûn, hoo-lú-bóng, khòng-sing-sòo.
﹡食著按怎,通常這个動詞後面有「著tio̍h」,愛讀本調,
表示若像動詞的「補語」,後壁愛接一个形容的講法。
毋是講你「食著tsia̍h-tio̍h」,抑是「食毋著tsia̍h-m̄-tio̍h」,
毋是彼个『到』的意思,是咧形容,「食起來」親像正肉。
這个「著tio̍h」敢若這馬的人無啥會曉用,較困難用。
註:《教典》著tio̍h:6.動詞補語,後接形容該動作的狀態描述。
.正肉tsiànn-bah:『像真肉一樣』。
正tsiànn,有足濟意思,遮是講真實的,是正的,毋是假的。
﹡煞無suah bô:有時仔嘛是會予「卻」代替去,『卻』的意思。
咱臺語會講「煞suah」按怎。
就是講伊無肉的彼款膽固醇、hoo-lú-bóng、抗生素等等。
華語:人造肉水漲船高,價格比真肉還要貴。
臺語:「人造肉」真搶市,
”Jîn-tsō-bah” tsin tshiúnn/tshiónn-tshī,
價數比正肉閣較貴。
kè-siàu pí tsiànn-bah koh-khah kuì.
.搶市tshiúnn/tshiónn-tshī:有腔口差,大部份的人講→搶tshiúnn,
臺南遐講→搶tshiónn。
.價數kè-siàu:是予逐家看這兩字,寫出來的漢字。
華語:有一度供貨不順
臺語:有一站仔,貨出袂赴賣
Ū tsi̍t-tsām-á huè/hè tshut bē/buē hù bē/buē.
.有一站仔ū tsi̍t-tsām-á:一段時間的意思。
例:有一站仔,我攏無愛食肉。
例:我有一站仔無看著伊矣。
二、講予你知:植物肉
◎臺灣食菜的人比例誠懸
*宗教影響,抑是健康因素
咱臺灣食菜的人有兩種原因,一種是因為宗教影響,抑無,
是健康因素。
*服務佮商品百百款
佇臺灣,食菜的服務已經是百百款矣,食菜的產業非常大。
這馬嘛有規个市場,攏是咧賣素食的,甚至逐年攏有辦素食展。
素食餐廳非常濟,商品佮服務百百款。
*素肉食品加工產業發達
為啥物會按呢?咱臺灣世界有名的,素肉食品加工產業非常發達。
◎未來肉
植物肉佮咱的素肉,有啥物無仝款?植物肉是未來肉。
*比爾蓋茲佮李奧納多投資
十幾年前,佇歐美國家, 𪜶開始來發展的。
譬如講前一站仔,佇咱臺灣有餐廳,共比爾蓋茲-美國大有錢人,
微軟公司的頭家,佮電影明星李奧納多, 𪜶有投資公司未來肉,
都引進來到咱臺灣。
*驚豆仔的生氣,用小麥、荷蘭豆為主
未來肉佮咱所食的素肉,有啥物無仝?咱先講伊的原料。
臺灣的素肉,咱知影是豆仔類,有豆奶、豆皮等等,
咱臺灣人食甲足慣勢的豆仔類,來做這个原料。但是
外國人驚豆仔的生氣(tshenn/tshinn-khuì), 𪜶用的材料就無仝款,
𪜶用的是麥仔(be̍h-á)的小麥、荷蘭豆(hô-lân-tāu)來做主要材料。
*用菜汁染血色閣有肉汁
一个足重要的部份,這个未來肉,是欲做「肉」, 𪜶會用菜汁,
共染有血色,所以共切落去,閣有血水走出來,有肉汁佇咧。
*毋是為著宗教的理由
這个未來肉,佮咱臺灣的素食肉,無仝款,毋是為著宗教的理由,
才會做甲佮肉遮爾仔成。
◎世界趨勢(tshu-sè)
*2006年聯合國報告
2006年聯合國報告出來,講咱人為著欲食肉,飼牛、飼羊等等,
這个號做「畜牧業thiok-bo̍k-gia̍p」,影響著地球的環境非常大。
*畜牧業溫室氣體超過汽車業,佮森森爭地
畜牧業造成的溫室氣體,已經超過做車的人的汽車業,而且,
飼牛、飼羊等等,會佮樹林仔、森林搶地,毋但搶地,
樹林仔本來會當改善地球的溫室氣體,所以顛倒是第二遍的傷害。
*2050年全球人口達到100億,加緊對環境(khuân-kíng)的負面影響
2050年連鞭就到矣,全地球的人口會達到100億遮爾仔濟,
到時陣,有足濟人攏需要食卵白質,需要食肉,若飼遮濟豬,
飼遮濟牛、飼遮濟羊,攏會對環境造成真大負面的影響。
*「未來肉」會當取代畜牧業
為著這款代誌,歐美國家就開始準備,開始發展未來肉,
希望佇未來會當取代畜牧業,抑是加減做一寡未來肉,
免飼遐爾濟牛、羊、豬等等。
◎臺灣按怎看
*本底就有素食傳統
講著飼牛、飼羊、飼豬這種畜牧業,對環境的傷害,這款代誌
佇咱臺灣可能無遐爾仔嚴重。
對西洋國家來講, 𪜶食素食肉可能真大的影響。但是對咱臺灣,
因為咱本底就有食素食的傳統,欲招咱臺灣人來食素食肉,
無遐爾仔大的影響。
*主要考慮的是健康
*莫用傷濟油和調味料
因為咱這馬知影毋通食傷油的物件,醬料嘛毋免摻遐爾仔濟。
*臺灣2017年開始做植物肉
*免加卵、奶、植物膠來共黏做伙
咱做植物肉的時陣,毋免佮素肉工廠仝款,免加卵、奶、植物膠,
免做這寡物件來共伊黏做伙,直接用材料就會當做一條一條、
一塊一塊,敢若肉仝款來使用。
*敢會當變「平民肉食」愛等市場決定
咱臺灣嘛有咧發展,這馬來看,成本是較懸,價數嘛較懸淡薄仔,
未來敢會變做咱普通人取代肉的一種食物?咱慢慢仔等市場決定。
◎語詞:
.食菜tsia̍h-tshài:『吃素』。
例:我食菜的,你有食菜無?
「食菜」有另外一个意思,敢若主人咧勸人客盡量食。
例:食菜啦!食菜啦!盡量食!盡量食!
一般咱講『素食者』,就是講「食菜的」。
使用的時間點無仝款,意思就無仝款,
咱講無食肉的人,是食菜的。
.食臊tsia̍h-tsho:
例:你有食臊無?
我有食臊。
例:你是食菜,抑是食臊?
.百百款pah-pah-khuán:
橫直講啥物種類、幾項,攏會當講「百百X∥pah-pah-?」
例:百百樣、百百種、百百項。
.茄茉菜ka-bua̍h-tshài、厚茉菜kāu-bua̍h-tshài、牛皮菜gû-phuê-tshài
歐美人 𪜶做人造肉的時陣,會囥甜菜,因為甜菜紅紅,
共做甲敢若血水仝款。
這無啥仝,這華語寫做「葉甜菜hio̍h-tinn-tshài」,應該無仝。
可能大類算仝類,毋過佮「甜菜」無仝種的菜。
伊的形較厚,後壁有叫做「厚茉菜」,葉仔本身較厚。
嘛有的形容講敢若牛皮,佮牛皮仝款厚,無遐爾厚,是形容。
.生氣tshenn/tshinn-khuì、腥氣tshènn/tshìnn-khuì
咱一般咧講食物類的一種氣味。
各人(kok-lâng)對氣味的感受無啥仝,有的人講彼袂歹鼻,
有的人講彼足歹鼻。
生氣tshenn-khuì,生氣tshinn-khuì,腔口差,攏會使唸。
一般是講食物類,腥氣(tshènn/tshìnn-khuì)較會用豆仔類。
可能嘛有無仝款的講法,有的人講攏是腥氣,無分動植物,
有的人是植物(生氣)、動物(腥氣)按呢分。
腥嘛有tshenn、tshinn的音,可能因為按呢,有的人濫咧用。
有人講動物的較臭臊(tshàu-tsho),彼種羶(hiàn),較強的味。
植物(si̍t-bu̍t)的就講生氣(tshenn/tshinn-khuì)。
有幾若種解說,反正這个物件猶未熟,有一種臭氣、臭味。
.荷蘭豆hô-lân/jîn/lîn-tāu:這是翻譯,荷蘭豆hô-liân-tāu嘛有人講,
有人認為是荷蘭來的豆。豆仔類有的人嘛舞無清楚。
荷蘭豆皮較薄,豆莢(tāu-ngeh)較薄,內面子(tsí)嘛較細粒。
.敏豆仔bín-tāu-á
.凡勢huān-sè:凡勢按怎,就是有可能按怎。無定著按怎。
.畜牧業thiok-bo̍k-gia̍p:主要是這个音,遮愛用文言音講。
咱看古裝戲,有時仔會聽著「畜生thik-senn/sinn」。
.煮食tsú-tsia̍h:佇厝內家己煮,煮菜、煮飯、煮湯,
例:你有咧煮食無?
三、看戲齣(hì-tshut)講臺語
◎你是欲按怎過日/度日/度活啦?
Lí sī beh-án-tsuánn kuè/kè-ji̍t/tōo-ji̍t/tōo-ua̍h-lah?
.過日kuè/kè-ji̍t、度日tōo-ji̍t、度活tōo-ua̍h,這幾種講法攏會使。
『你是要怎麼過活?』→過活kuè/kè-ua̍h(X),
戲齣內面講毋著。
◎橫直喔,你不受教就準拄煞。
Huînn/Huâinn-ti̍t--ooh lí put-siū-kà/kàu tō tsún-tú-suah.
.橫直huînn-ti̍t,huâinn-ti̍t:是腔口差。
.不受教put-siū-kà,put-siū-kàu,是白音kà、文音kàu 的差別。
逐家細漢的時陣,定定去予驚著,
例:你這个不受教的,無聽話!
.準拄煞tsún-tú-suah:基本上有兩種意思,
一个是講過去的代誌準拄煞,莫閣講,莫閣計較,莫閣想矣。
有時仔用佇錢銀方面,一般若講欠數,人共你討數,結果
你干焦還一部份,就敢若講予我還按呢,你就準拄煞。
## [2020.04.02《台語講世事》:台灣的石虎](https://www.youtube.com/watch?v=bYaldU9bl3E&list=PLe8vfIFNtjRdtsPxY3r-Q644ipqw9bFKC&index=3&t=4s)
.㾀勢命khiap-sì-miā
.㾀勢khiap-sì
.㾀khiap
.打揲tánn-tia̍p
*石虎的三大特色,有點白斑、畫白巡、圍白框。
.特徵ti̍k-ting、特徵ti̍k-ting、特徵ti̍k-ting,「徵ting」x3遍
.巡sûn vs. 逝tsuā
.鳥鼠niáu-tshí/tshú:鳥niáu是文言音。
若寫做「貓niau」彼字,調無合,因為咱臺語愛變調。
.貓豹niau-pà
.蹺蹊khiau-khi:《教典》蹊蹺khi-khiau:2.『挑毛病』。
一、看新聞講臺語:石虎貓仔花膏膏 分袂清楚
◎翻譯
華語:額頭都有撕裂傷
臺語:頭額摖甲大空細裂
Thâu-hia̍h tshè kah tuā-khang-sè-li̍h.
.頭額thâu-hia̍h、額頭hia̍h-thâu,額仔(hia̍h-á)無講「頭」嘛會使。
.摖tshè/tshuè:規个共鑢(lù)過去,無一定愛足大片,小可嘛是摖,有破皮的彼種狀況。
例:伊都跋倒(pua̍h-tó),摖一下破皮。
.大空細裂tuā-khang-sè-li̍h:一般四字連做伙讀,頭前三字愛變調。
大空,較大的空;細裂,干焦裂開。
.裂li̍h:通常就一个敢若縫,敢若線按呢,較細的狀況。
.空khang:當然小可較大,這是一个形容,無一定真正有空,
意思就是大大細細的空喙攏有。
華語:獸醫們把牠麻醉。
臺語:動物醫生共(伊)注麻射。
Tōng-bu̍t i-sing kā (i) tsù bâ-siā.
.麻射bâ-siā:有麻藥的射。
.注射tsù-siā,這个講法愛注意一下。
.預防射ī/ū-hông-siā,
.葡萄射phû-tô-siā:注葡萄糖的射。例:葡萄射來一管。
.吊大筒tiàu tuā-tâng
這攏是以前,咱咧講一寡醫療的時陣,會當用的詞。
*共kā:臺語足定講「共(kā)啥物,做啥物代誌」。
這个代名詞,通常毋免講,省略起來。譬如講
「共伊講」,你會當講「共講」。
例:你緊共講。←「伊」省略。
例:你莫共拍。←「伊」省略。
華語:小心翼翼地幫牠動刀。
臺語:輕跤細手共動刀。
Khin-kha-sè/suè-tshiú kā tāng-to.
.輕跤細手khin-kha-sè/suè-tshiú:一種形容,形容輕、細。
.輕聲細說khin-siann-sè-sueh、khin-siann-suè-seh
仝款愛連起來,頭前三字愛變調。
.大空細裂tuā-khang-sè-li̍h
.尖跤幼手tsiam-kha-iù-tshiú:敢若做代誌敢若大小姐的感覺。
華語:這隻石虎命運多舛。
臺語:這隻石虎㾀勢命。
Thit tsiah tsio̍h-hóo khiap-sì-miā.
.㾀勢khiap-sì:若準講形容人,是咧形容若毋是足䆀,抑無就是可能伊有啥物欠缺,
可能伊身體有啥物款的㾀勢(khiap-sì)。
面容,抑是鼻目喙,嘛會當講可能跤手有小可無方便。
.㾀勢命khiap-sì-miā:意思是足歹命,命運足䆀。
例:我哪會遮㾀勢命?
.㾀khiap:䆀的意思。
例:伊㾀去矣。 I khiap--khì--ah.
伊變䆀、變歹去矣,伊缺角(khih-kak)去矣。
例1:伊做人足「㾀」。 I tsò/tsuè-lâng tsiok khiap.
這佮拄才講的無仝意思,毋是變歹,是凍霜(tàng-sng)。
2:伊這个人哪會做人遮㾀?
.較㾀(khiap)啥物啥物,後壁閣有接物件。
這是一个這馬的人應該攏較少用矣。
這佮「較贏啥物」、「較輸啥物」,仝款的狀況,咱這馬換一个「㾀」這个形容。
華語:被民眾送去給獸醫救治。
臺語:予民眾送去予醫生打揲。
Hōo bîn-tsiòng sàng khì hōo i-sing tánn-tia̍p.
*打揲tánn-tia̍p:有幾款意思,
佇遮的意思是「處理(tshú-lí)」,抑是「物件共修理」。
另外一種是共「處罰」,抑是「共拍」彼類。
例:伊去予 𪜶老爸打揲,摃一下足慘的。
按呢是「修理」的意思。
.打(tánn)佮揲(tia̍p)若準動作來講,單字攏是「拍」phah的意思,
嘛有另外意思:
.打現金tánn-hiān-kim:這較罕咧聽,「換算按怎」。親像講:
例:我原本想講欲請你食飯,時間攏撨(tshiâu)袂好勢,
我規氣(kui-khì)打現金予你,你家己去食好料的。
例:這寡衫你打現金看偌濟錢?
.揲甲真悽慘tia̍p kah tsin tshi-tshám:修理抑是拍,彼類的意思。
會當干焦講「揲」,嘛會當講「拍揲」。
例:伊予 𪜶爸母揲甲足悽慘的。
華語:石虎的三大特色,有『白斑點、白條紋、白紋圈』。
臺語:點白斑、畫白巡、圍白框。
tiám pe̍h-pan, uē pe̍h-sûn, uî pe̍h-khing.
*華文的這種句法,咱共小可振動一下,就是講共動詞囥頭前,
了後,再共特徵(ti̍k-ting)寫出來,點白斑、畫白巡、圍白框。
.巡sûn:這馬逐家嘛攏足罕得用矣,可能逐家較知影動詞「巡」。
「巡巡看看咧。」這逐家較知,伊嘛會當用這種名詞的,
例:重巡tîng-sûn:目睭(皮)兩條線。「巡sûn」有線的意思。
.巡sûn vs. 逝tsuā:這馬較濟人會講「條tiâu」。
逝tsuā:一般來講有兩種意思,一个意思是線,線的彼个形。
另外一種,「一逝路」按怎。一逝路長落落,足遠的路。
「遮有一逝字」嘛是會使講。
二、講予你知:石虎
臺灣本來野生動物非常非常濟,但是因為咱人無站節,真濟過度開發等等的問題,使咱臺灣野生動物一直減少去。
咱探討這个問題,對石虎開始。
◎石虎
*臺灣眼前唯一的原生貓科物種
石虎是臺灣眼前唯一的原生貓科物種,為啥物是「眼前」?表示以前猶閣有別種,
以前猶閣有佗一種?就是號做→臺灣貓豹。
*臺灣貓豹已經滅絕
因為臺灣貓豹已經滅絕,這馬干焦賰石虎,咱著愛好好來共保護。
*石虎1930~1940年猶分佈佇臺灣全島
佇1930年代到1940年代,經過調查,彼个時陣,佇咱臺灣全島,猶閣攏有。
*目前數量賰無1000隻
◎石虎消失的原因
*淺山棲地大量開發,予𪜶的低海拔棲地消失
石虎伊蹛的所在,佮伊食的物件,攏出現問題。
石虎蹛佇咧較低的海拔所在,但是𪜶蹛的棲地,因為咱人無站節,大量開發了後,
𪜶的棲地就消失去,蹛的所在無去矣,當然𪜶的數量就一直減去。
*無細膩(bô-sè-jī/bô-suè-lī)食著中毒的鳥鼠仔
石虎是食鳥鼠仔,但是鳥鼠仔因為真濟做穡人、作田人,𪜶為著欲毒鳥鼠仔,
內面攏有毒藥,石虎因為食著中毒的鳥鼠仔,煞無細膩嘛去予毒(thāu)著。
*刣來買賣動物皮
有真濟人竟然會去掠石虎,刣來欲買賣伊的皮。
*去予車挵(lòng)、軋(kauh)--死
石虎竟然嘛會去予車挵(lòng)死、抑是去予車軋(kauh)著死亡。
◎欲按怎保護石虎
*2008年列入瀕臨絕種保育動物
石虎佇2008年已經是瀕臨絕種保育動物,了後並無受著重視。
*2011~2019年交通事故造成死亡96筆
2011年開始,真濟交通事故內面,竟然聽著一直去挵著石虎,慢慢仔受著社會重視,
真濟保育團體,抑是政治人物,開始呼籲,咱愛來保護石虎。
2011~2019年交通事故造成石虎死亡有96筆,遮爾仔濟。
*2019年,中興大學機械系佮特有生物保育中心合作
這馬逐家已經有這个觀念,2019年就是舊年,中興大學機械系,
佮特有生物保育中心有做一个合作,真趣味, 𪜶發展一个系統,
這个系統一開始會共石虎的形體,各種其牠動物形體的資料,會當輸入去系統內面,
然後共一種物件號做「聲光波」,囥佇石虎,猶閣有其牠動物定定出入的車路口。
若是這个系統發現頭前有車來矣,這爿又閣有石虎,其牠動物,類似形體的動物來,
這个機器就會射出聲波,抑是光波,等於有一个青紅燈的效果,欲共這个動物,
包括石虎,共警告,講這馬有車來矣,你毋通過來。
*聲光波事先警告科技發揮17擺作用
佇2019年5月到9月,短短的4個月,發揮了17擺的作用,這確實有作用佇咧。
*苗栗《石虎保育自治條例》三讀通過
佇科技上,咱已經有咧拍拚矣,法律上,咱嘛愛綴咧行。
舊年(2019年),佇苗栗,已經三讀通過《石虎保育自治條例》。
法律有矣,科技嘛有矣,繼續就是咱社會上逐家的觀念,是毋是會當綴咧行?
這攏是咱愛保護石虎足關鍵的代誌。
這馬開始,慢慢仔逐家的觀念愛改,共同來關心石虎愛按怎保護。
◎語詞:
.無撙節tsún-tsat,無站節tsām-tsat:攏有,兩个攏會使。
咱人這馬攏做代誌無撙節,害石虎按呢一直消失去。
撙節tsún-tsat,站節tsām-tsat,意思本來差不多,是講分寸。
你若無守分寸,意思就是無控制。
例:你啉酒毋通無站節。
.站節tsām-tsat:以前佇日本時代,咱若看《台日大辭典》,
竟然無咱這馬所講的「分寸」的意思。
若照伊的解說,本來意思敢若講文章的段落,用佇遮嘛有合,
原本可能無一定是「分寸」,仝款有一段一段,表示有某一个分寸,抑是撙節,
嘛是會使講通用。
以前無「分寸」的用法,這馬咱就是攏會使用。
.石虎tsio̍h-hóo:以早捌聽人講叫做「山貓suann-niau」,
袂輸佇山內的貓,因為是貓科的,確實有成。
.貓豹niau-pà:「雲豹hûn-pà」的意思,咱這馬可能攏講雲豹,
以早有一个名叫做「貓豹」,嘛是貓科。
.鳥鼠niáu-tshí/tshú:這有腔口差。鳥niáu是文言音。
若寫做「貓niau」彼字,調無合,因為咱臺語愛變調。
.果子猫kué/ké-tsí-bâ:「猫bâ」佮「貓niau」字倒爿無仝款。
.屠殺tôo-sat:人類若無撙節,對環境破壞,若親像共石虎「屠殺」。咱是咧講讀法。
.挵lòng:足大力共「挵lòng」lueh。
.軋kauh:共伊對頂面硩(teh)過去。兩个動作無仝。
*有無仝講法:
.強欲kiōng-beh/bueh:
例:我強欲袂赴矣。
例:伊強欲死矣。「強欲死」就是伊袂死。
.直欲ti̍t-beh/bueh:例:直欲到矣。
這攏是仝意思,但是無仝所在有無仝講法。
.咧欲teh-beh/bueh,又唸做tih-beh/bueh:
.得欲tit-beh/bueh:
例:伊得欲死矣。「得欲死」就是伊小等就會死。
有淡薄仔精差。
.熱jia̍t/lia̍t:有腔口差。就是講溫度足懸的。讀音逐家愛會記得。
例:逐家討論這个議題足熱的。
例:鼎熱矣,你緊囥物件lueh(落去)。
例:鼎熱矣,身軀嘛一直熱起來。溫度懸矣。
例:咱的感情一直熱起來。
「熱」佮「燒sio」氣味無仝款。
若是天氣,咱就愛講「足熱(jua̍h/lua̍h)的」。熱的白話音。
以早人講「發燒」,嘛有人講「發熱」。
.呼籲hoo-io̍k:這是讀音的問題,後壁有字「籲io̍k」愛變低。
.三讀sam-tho̍k:文言音→讀tho̍k,第8調,後壁若有字嘛愛變調。
三、看戲齣(hì-tshut)講臺語
◎進前敢毋是有一个sia̋n-pái一直共你蹺蹊?
Tsin-tsîng kám m̄ sī ū tsi̍t ê sia̋n-pái it-ti̍t kā lí khiau-khi?
.蹺蹊khiau-khi:揣你的毛病,揣你的空縫,共你刁難。
刁工欲共你創治的意思。
註:《教典》蹊蹺khi-khiau:2.『挑毛病』。
蹊蹺khi-khiau,有仝意思的用法,嘛有另外無仝意思的用法。親像講有感覺怪怪按呢。
例:伊今仔日毋知是毋是有啥物代誌,哪會按呢看起來蹊蹺?
這个時陣意思是講有啥物奇怪的代誌,無啥親像平常時。
◎下昏暗只有叫二手先鬥相共啦!
Ē-hng-àm tsí-ū kiò jī-tshiú sing tàu-sann-kāng-lah!
.二手jī/lī-tshiú:一般咱攏是講「助手tsōo-tshiú」的意思。
猶未變做頭手(thâu-tshiú)進前,有人講「師仔sai-á」嘛會使。
有人感覺講「師仔」佮「二手」是毋是閣無啥仝,
嘛是有人可能按呢分:「師仔」是猶未出師,「二手」可能比彼閣較懸,技術較好。
## [2020.04.09《台語講世事》:台灣的火箭](https://youtu.be/-Jfv2oeuvYM)
.煞心氣sannh-sim-khuì
.無X無X:參看[2017.08.31《講台語當著時》:重疊的四字詞](https://youtu.be/ct6bfuqXGKA?t=428)
.帶著tuà-tio̍h,毋是「帶著tuà- -tio̍h」
.衛星uē-tshenn,uē-tshinn:
衛uē (O);uī (X)。
★註:《教典》無收「衛uī」單字音,語詞又閣有收「衛uī」音。
.箭tsìnn (O);kiàm (X)。箭tsìnn,佮「劍kiàm」差足濟。
.發射huat-siā:放射pàng-siā、放pàng、射siā,意思攏仝款。
.專有名詞「獵風者Lia̍p-hong-tsiá」咱用文言音讀。
拍獵phah-la̍h
.激氣kik-khì,激氣kik-khuì:意思無仝。
一、看新聞講臺語:民間自製火箭 天氣䆀試射擋恬
◎翻譯
華語:遠遠地透出亮光
臺語:拍殕仔光遠遠炤落來
Phah-phú-á-kng hn̄g-hn̄g tshiō--lo̍h-lâi.
.表示遠,光線閣無強,咱用「拍殕仔光phah-phú-á-kng」來講。
拍殕仔光phah-phú-á-kng:天猶未光,咧欲光,猶未完全光,足弱的光彼个狀況。
本來是講「黎明lê-bîng」的意思,這馬提來用佇遮。
.炤tshiō:這馬較少人用,用電火抑是手電彼類的物件照。
例:你毋通一直提手電共我炤。
例:咱來去炤水雞。
華語:民眾摸黑在一公里外的安全距離,『屏息以待』。
臺語:煞心氣咧等待。
Sannh-sim-khuì teh tán-thāi.
*表示足想欲去創啥,想欲做啥物代誌,足希望按怎的意思。
.煞sannh:有鼻音,閣有入聲。
註:《教典》2.心理受到強烈衝擊,或渴望、迷戀某些事物。
華語:滂沱大雨下不停。
臺語:大雨phin-phín phiàng-phiàng落袂煞。
Tuā-hōo phin-phín phiàng-phiàng lo̍h bē/buē suah.
*咱臺語有足濟擬(gí)聲詞、狀聲詞咧描寫聲音。
毋但雨會當phin-phín phiàng-phiàng,嘛會使講人,仝款愛連起來,頭前三字愛變調。
例:你毋通踮遐咧phin-phín phiàng-phiàng。
意思是講足濟足吵的聲音。
華語:試射場也遲遲沒有動靜。
臺語:久久攏無聲無說。
Kú-kú lóng bô-siann-bô-sueh/seh.
.無聲無說bô-siann-bô-sueh/seh:無任何聲音,無啥物聲說。
無X無X,這咱臺語嘛足濟的,咱可能較捷聽著
無依無倚bô-i-bô-uá、無攬無拈bô-lám-bô-ne、
無大無細bô-tuā-bô-sè/suè、無風無搖bô-hong-bô-iô
無鹹無汫(?)註:《教典》無鹹無纖bô-kiâm-bô-siam、
無代無誌bô-tāi-bô-tsì
會當參看:[2017.08.31《講台語當著時》:重疊的四字詞](https://youtu.be/ct6bfuqXGKA?t=428)
華語:『眾所矚目』的火箭試射。
臺語:火箭試射萬耳萬目。
Hué/hé-tsìnn tshì siā bān-ní-bān-ba̍k.
.萬耳萬目bān-ní-bān-ba̍k:一萬蕊目睭佮一萬蕊耳空,形容足濟的。
足濟人咧注意、關注,遮爾濟目睭咧看,遮爾濟耳仔咧聽,彼種形容。
耳ní,文言音;目ba̍k,是用「目睭」的「目ba̍k」白話音,一个文,一个白。
例:某某影星欲來,機場萬耳萬目攏咧等伊。
例:咱是一个萬耳萬目的節目。
華語:天公不作美。
臺語:天公無帶著。
Thinn-kong bô tuà-tio̍h.
*這馬可能愛較老沿的,較濟歲的先輩,才會曉講這个詞。
但是看咱的節目,就是會當知影,毋是「無帶著bô tuà--tio̍h」。
.帶著tuà-tio̍h:意思敢若講帶念(tài-liām)伊的面子,顧伊的情份。
《台日大辭典》內面的例
例:你拍狗無帶著主人。
這馬若看漢字,可能會想講「奇怪,拍狗哪愛帶主人?」
「欲共主人帶去欲創啥?」。毋是這个意思。
意思是無顧主人的情份、面子,你敢共拍。
咱生活上嘛會使提來用。
例:我就是共你有帶著(tuà-tio̍h),所以才算你遮俗。
華語:只能期待下次再接再厲。
臺語:干干仔著等後擺閣再拚。
Kan-kan-á tio̍h tán āu-pái koh-tsài piànn.
.干干仔kan-kan-á:「干仔kan-á」嘛是會使。
干干仔按怎,有一種「刁故意、抑是偏偏按怎」這款的意思。
伊有無仝的用法,嘛有彼種用法,嘛有「干仔按怎」的用法。
例:叫你莫去,你都干干仔欲去。
一般咱足捷聽著的是這種用法,足刁工的彼種的。
例:干干仔著等後擺。
例:干干仔著明仔載才會當看著伊。
是「干焦kan-na」的意思。
二、講予你知:臺灣的火箭
◎臺灣的衛星佮火箭
*臺灣有製造衛星的實力
臺灣佇太空頂懸的發展,已經有30年左右的歷史,
咱這馬有製造衛星的實力。
*Formosa系列氣象衛星對1999年運作
咱定定聽著咱的衛星,譬如講Formosa系列的衛星,對1999年開始運作,
這馬已經做到第7號矣。
*目前福五、福七猶咧運作
這馬福七佮福五,猶閣佇天頂運作當中。
*送衛星上天的火箭毋是MIT
咱的衛星雖然做了袂䆀,但是欲共衛星送上天的火箭,歹勢,就毋是咱臺灣家己做的,
毋是MIT的。
◎臺灣製造火箭的實力
*國家太空中心
咱臺灣會曉做衛星,是毋是袂曉做火箭?
其實,咱臺灣有一个「國家太空中心」,這已經30年的歷史,一直攏咧發展這个物件。
*1998年,「探空火箭」發展成功→載科技儀器
佇1998年的時陣,咱已經有發展成功,一種號做「探空火箭」,
這个「探空火箭」算講是火箭內面,非常基本的一種型態,
伊是咧載一寡科學儀器,起去頂懸做實驗等等。
*上新的11號:「混合式火箭技術」→太空旅行
這个「探空火箭」,咱已經發展了袂䆀,這馬上新的是11號的「探空火箭」,
這馬是欲來發展這種太空旅行,毋但載機器,去太空旅行用的技術,
號做「混合式火箭技術」,當咧發展當中。
*2007年,載衛星火箭技術,受政治佮國際情勢干擾
按呢發展了袂䆀,咱敢有共火箭射出去的經驗?
對2007年,咱已經有這个技術,有一个計畫發展出來,但是,彼个時陣,受著種種因素影響,
譬如講有政治佮國際情勢的干擾,譬如講彼个時陣,忽然間政黨輪替,
無就是預算去夆減去等等,抑無是其它的國家,講 𪜶嘛欲來參與等等,所以受著干擾,
一直到這陣,攏無成果。
*2012年,民間、學界家己研發設計(交大、成大)
◎太空產業的重要性
為啥物咱臺灣欲來發展這个太空產業?有啥物重要性?
*提升科技產業技術佮生產價值
太空產業若做了好,規个國家科技產業的技術、生產的價值,攏會規个提高。
*齊全產業鍊、衛星、控制、發射
用一个衛星來講,若做予好勢,有足濟產業鍊會當來發展,
譬如講衛星本身,抑是你欲按怎控制衛星,按怎發射出去,這攏總愛顧予齊全,
對規个國家科技產業,非常重要。
*南韓太空預算是咱國的十倍
國家 太空預算 全球排名
韓國 4.6億美金 11
臺灣 0.5億美金 36
↑經濟排名第26
咱臺灣經濟排名第26名,佇太空發展預算頂懸,竟然才排36名,咱就知影,這是非常無夠。
◎咱的贏面佮未來發展
*臺灣太空人才濟,新加坡欲來「占跤」
逐家可能毋知,咱臺灣太空人才非常濟,甚至其它國家都想欲搶,包括新加坡攏想欲來占跤。
*增加預算規模,訂《太空法》,方向予定
既然有遮爾好的發展條件,為啥物到這陣,敢若發展了無蓋好勢?
因為有種種原因,這著愛政府先𤆬頭,愛共方向定好勢,當然包括預算部份,著愛增加,
規模愛較大咧,嘛愛較穩定咧。
閣來,咱來看其它國家,包括韓國嘛有,就是這个《太空法》,到這陣,咱猶無。
但是逐家攏咧呼籲,若欲真正發展太空產業,這个部份一定愛有。
*2019年核定第三期計畫,國防部、中科院當咧做
2019年,咱的行政院已經核定第三期計畫,欲繼續來發展衛星,抑是火箭,
包括國防部、中科院攏有當咧做當中,咱會當期待,當然《太空法》等等嘛愛繼續來拍拚。
*氣象衛星「獵風者」明年上天
咱有另外一个衛星,號做「獵風者」,佇明年咱欲予伊上天矣。
◎語詞:
.衛星uē-tshenn,uē-tshinn:這是讀音提醒逐家愛注意。
因為華語的『ㄨㄟ\』,『因為』按怎,『為什麼』咱較熟,
所以足濟人就直接聯想「uī」,這字「衛」無uī的音,
干焦有「uē」的音。
★註:《教典》無收「衛uī」單字音,語詞又閣有收「衛uī」音。
例:衛生紙uē-sing-tsuá,佮衛星的「衛uē」仝一字。
警衛kíng-uē、保衛pó-uē、徛衛兵khiā-uē-ping
.火箭hué-tsìnn,hé-tsìnn:這是腔口差。
箭tsìnn,一般當然運動項目是「射箭siā-tsìnn」。
有一種菜蔬叫「箭竹tsìnn-tik」,有的人會讀做「kiàm-tik」。
箭tsìnn,佮「劍kiàm」差足濟,逐家愛知影,
若講射箭,予箭射著,可能一空,若予劍射著,就穩死的。
.上天tsiūnn-thinn:白話音的讀法。
例:火箭飛上天、飛龍飛上天。
上天siōng-thian:這是文言音。咧講「神」彼種的。
例:咱愛飛上天(tsiūnn-thinn),去見上天(siōng-thian)皇帝。
.發射huat-siā:這是動作。
咱會當講發射、放射pàng-siā、放pàng、射siā,意思攏仝款。
欲共放出去,欲共射出去。咱用火箭來做例,咱會當講
「發射火箭」,嘛會使講「放射火箭」、放火箭、射火箭,
精差是用啥物貨予伊有power,通走去遐遠,原理、構造無仝,
意思上攏相仝,攏會使提來用。
.軌道kuí-tō,khuí-tō:這是讀音的問題。
.齊全tsiâu-tsn̂g:白話音;tsê-tsuân:是文言音,兩種攏會使講。
.咱國lán kok:『我國』欲按怎講?「我國ngóo kok」。
ngóo kok,咧食的「五穀」。
咱會當用「咱國」來講,按呢是較親切,是咱的國。
.贏面iânn-bīn:
例:這件代誌你有贏面無?抑是攏輸面(su-bīn)?
.核定hi̍k-tīng:這是文言音,讀音的問題。
例:核能發電hi̍k-lîng huat-tiān
.獵:文音是lia̍p,白音是la̍h。
專有名詞「獵風者Lia̍p-hong-tsiá」咱用文言音讀。
拍獵phah-la̍h
三、看戲齣(hì-tshut)講臺語
◎阮這馬咧佮你激氣呢!
Gún tsit-má teh kap lí kik-khì neh!
.激氣kik-khì:一般是講「足受氣的」,受氣的意思。我咧氣你。
華語『賭氣』,嘛會當講是「激氣」。
文言音的「氣khì」,就是受氣的意思。
激氣kik-khuì:意思是激某一種派頭,激某一種的姿勢,
白話音的「氣khuì」,表示激一个派頭的意思。
例:你毋通激一个氣(khuì)!
◎你欲替阮出氣喔?
Lí beh thè gún tshut-khuì--ooh?
.出氣tshut-khuì:一般攏是講「發洩啥物情緒」的意思。出一口氣。
可比講「拍伊出氣」,就是透過拍,發洩你的怨氣、情緒。
◎莫想欲共查某囝伸長手,
Mài siūnn-beh kā tsa-bóo-kiánn tshun-tn̂g-tshiú,
尤其是跋筊這款漚古代。
iû-kî sī pua̍h-kiáu tsit khuán àu-kóo tāi.
.伸長手tshun-tn̂g-tshiú:手伸甲足長的按呢,意思是欲討錢。
這馬的人「伸長手」,「長」彼字無去矣,「伸手」。
例:莫共人伸手。以早是講伸長手。
伸手較一般,干焦彼个姿勢;這馬咧講討錢的意思,伸長手。
愛做一个區別,討錢一定愛有「長」。
.漚古代àu-kóo tāi:漚àu,講「人」會使,講「物件」嘛會使。
若講物件,一般是咧講無價值的、足破、足舊的彼種。
若講人,當然意思是足䆀、足惡質,彼个人足漚的,漚人。
「漚古」就是「漚」。
.代tāi:這馬「代誌」逐家會曉講,可能較袂曉較簡束的「代」。
例:這就是一个歡喜代。
## [2020.04.16《台語講世事》:台灣的王梨](https://youtu.be/pmIVxOxwDQQ)
.撩柴liâu-tshâ:古早一个行業。
.撩肉liô-bah vs. phue肉(phue-bah)
.外盤guā-puânn,和盤hô-puânn,無啥盤bô-siánn-puânn,
算袂和盤sǹg-bē/buē-hô-puânn。
.小故事:這馬咱臺灣人若是做喪事,有當時仔會做罐頭塔,
為啥物會做罐頭塔?
.酵素kànn-sòo,酵素kànn-sòo,酵素kànn-sòo:這字讀做酵kànn。
註:《教典》酵kànn,又唸作kà。
.發酵huat-kànn
★王梨ông-lâi vs. 旺梨ōng-lâi
.磚仔角擘去
.冇石快擘phànn-tsio̍h khuài-peh
一、看新聞講臺語:王梨車拋拋走,一工趁五萬
◎翻譯
華語:黃色的小貨車
臺語:黃黃貨物仔車(發財仔車)
N̂g-n̂g huè/hè-bu̍t-á-tshia (huat-tsâi-á-tshia)
*咱會當講車是「貨物仔車」,嘛有人講「發財仔車」。
咱會當講「細台貨車」,「貨物仔」強調這个「貨」,
.黃黃n̂g-n̂g:形容黃色。
「黃黃的n̂g-n̂g-ê」彼字「的ê」,定定會當省略。
華語:它整車都是黃色的,相當搶眼。
臺語:規隻車黃錦錦,真唌人目。
Kui tsiah tshia n̂g-gìm-gìm/n̂g-gím-gím, tsin siânn-lâng-ba̍k.
.規kui:足臺語氣的。規隻,就是全部。這台車全部按怎。
例:規工咧遐賴賴趖(luā-luā-sô)。規kui,全部的意思。
若接數字的時陣,意思是「接近彼个數字」。
例:遮有規百个人。按呢是接近一百个人。
例:規十个,就是接近十个。
.黃錦錦n̂g-gìm-gìm,嘛有人講n̂g-gím-gím,兩个無仝調的疊詞。
華語:老闆『切掉後車廂,變成車斗』。
臺語:頭家共車「廂仔撩起來做後斗」。
Siunn-á liâu khí-lâi tsò āu-táu.
.撩liâu:咱一下看,有人想講共按呢掀起來,其實毋是。
意思是「用啥物器具去切、割這款的動作」。
撩liâu,佇咱臺語是「切」的意思。
﹡古早有一个行業號做「撩柴liâu-tshâ」,彼就是咧鋸柴,共樹木、木材,
看按怎切、割較細塊,會當來做利用。
.撩liô:去買菜的時陣,買豬肉,共頭家講「這油共我撩起來。」
「撩」有兩个讀音,讀音無仝,意思無仝,動作欲倚欲倚。
撩油liô-iû、撩肉liô-bah,會當想像彼支啥物家私、刀仔,
敢若共切,但是「撩liô」就是特別較幼、較薄的面積。
撩肉liô-bah:嘛有人講phue肉。
撩liô,會使直撩,嘛會使橫撩。
phue肉:愛平平共物件切予一片一片,薄薄按呢。
有小可無仝款。
華語:到產地去批發鳳梨。
臺語:到產地盤王梨。
Kàu sán-tē puânn ông-lâi.
.盤puânn:咱一般所知影的,大盤tuā-puânn,外盤guā-puânn,
和盤hô-puânn,無啥盤bô-siánn-puânn,是名詞的部份。
這字會使做動詞,咱遮所用的是動詞。
算講是去共批發(phue-huat)、割(kuah)的意思。
.算袂和盤,就是算袂和(sǹg-bē/buē-hô),可能支出佮收入算袂和。
例:這盤生理算袂和,伊毋是一个和盤。
.無啥盤bô-siánn-puânn:意思是無啥物收入,無啥物錢。
註:《台文華文線頂辭典》無盤:『無利可圖』。
例:這盤生理趁無啥物錢,無啥盤,袂和盤。
華語:擅自變更車體會罰錢。
臺語:亂使改車身是會罰錢--得。
Luān-sú kái tshia-sin sī ē hua̍t-tsînn--tit.
.亂使luān-sú:後壁有字,「使sú」愛變調。
普通時仔,咱嘛會當用,這馬可能較罕得聽著人講。
臺語過去有這个詞,「亂使」啥物貨,會當接一寡動詞。
例:衫亂使穿,當然會感冒。
例:你毋通亂使來,亂使舞,亂使講,亂使創啥,接動詞。
.會罰錢得:會ē + 動詞 + --得tit,會按怎得,誠臺語的語法。
會罰錢得(li),li是tit的音變,嘛是仝款的意思。
二、講予你知:臺灣的王梨
王梨這个果子,相信逐家攏非常熟似,這个酸甘甜的滋味,毋管是做罐頭,生食,抑是加工,攏真受歡迎。
而且「王梨」這个名,因為倚音的關係,所以定定拜拜的時陣,嘛攏會攢王梨。
◎早期的王梨
*17世紀尾進口
王梨毋是咱臺灣的種,是佇17世紀尾仔,荷蘭時期進口到臺灣的,
彼个時陣,王梨種佮這馬的非常無仝款,號做在來種。
*在來種樹子芳味真厚,枝葉真勇,熱天烏陰攏有擋
佮咱這馬食的王梨,有真大的無仝。
*日本時代發展產業
王梨發展產業,是對日本時代才開始發展的。
*鳳山王梨工廠是起頭
彼个時陣,是對這馬高雄鳳山遮,一个王梨工廠做起頭。
*進口新品種解決罐頭加工問題
彼的時陣的王梨,就是在來種,雖然芳味真厚,但是果子較細粒,而且嘛較柯(kua),
若欲做罐頭,足厚工的,愛削皮,愛切一寡奇怪的形,所以非常麻煩,
因為按呢,日本時代就開始,對夏威夷、東南亞這寡所在,進口新品種,
來解決罐頭加工的問題。
◎日本時代的王梨
*臺北大稻埕「葉金塗」王梨王
日本時代,彼个王梨罐頭工廠是日本人開的,咱臺灣人敢有參與?
當然有,佇臺北大稻埕,有一个做生理的先生,號做「葉金塗」,
彼个時陣,伊有一个名號,號做「王梨王」,著知伊做王梨偌有名,
伊上旺的時期,佇全臺灣有六間工廠。
*上旺的時期有六間工場
小故事:這馬咱臺灣人若是做喪事,有當時仔會做罐頭塔,為啥物會做罐頭塔?
聽講佮葉金塗先生有關係,伊是做王梨罐頭的,伊過身的時,用王梨罐頭做祭品,
創一个罐頭塔,都按呢開始,咱臺灣人這馬喪事,有罐頭塔的慣勢。
*1935年臺灣合同王梨株式會社外銷市場世界第三大
葉金塗先生佇1935年,創一个「臺灣合同王梨株式會社」,共所有做王梨的業者,
集合起來,做甲生理非常大。
彼个時陣,外銷市場是世界第三大。
*1941年太平洋戰爭爆發受影響
無彩的是,過無幾冬,太平洋戰爭爆發,真濟工廠去予美軍破壞,
抑是日本政府無支持等等,這个產業就按呢結束。
◎戰後的發展
*1946年,臺灣行政長官公署接收「臺灣合同王梨株式會社」
*1955年,「臺灣王梨股份有限公司」正式成立
這就是咱所知影的「台鳳公司」,彼个時陣,政府非常支持,真濟有利的政策一直出來。
*1970年代,臺灣王梨產業佇世界排頭名
彼个時陣,臺灣做王梨罐頭的工廠,有百幾間,非常旺。
1970年代,咱臺灣的王梨產業,佇世界排頭名,非常厲害。
*10年內工商業發展漸失競爭力
但是真無彩,十年內,因為臺灣經濟的關係,咱的型態無仝款矣,譬如講人口流入來都市,
抑是做工的工資起價等等原因,咱臺灣的罐頭產業,漸漸仔失去競爭力。
◎農業試驗單位進行品種研發
拄才講的攏是罐頭產業,王梨除了食罐頭以外,閣有啥物方式通食?咱這馬食王梨,大部份攏是生食,雖然罐頭產業有落差(lo̍h-tshe),但是生食的部份非常拍拚,咱看著「農業試驗單位」,進行真濟的品種研發。
*蘋果王梨、釋迦王梨、芳水王梨、甘蔗王梨、甜蜜蜜王梨、金鑽王梨、牛奶王梨
這每一種王梨,有的提來做罐頭較適合,有的生食較適合,有的較甜,有的較酸,
種種的滋味攏無仝款。
*臺灣外銷果子王,年出口總額有美金4308萬
目前來看,咱臺灣的外銷果子王,猶閣是王梨,一年出口總額,總共有美金4308萬遮爾仔濟。
*王梨酥、王梨酵素嘛搶市
除了生食以外,逐家出國,送外國朋友,上愛買的王梨酥,王梨酵素等等,攏非常搶市。
王梨真正毋但伊的名倚音「旺旺來」,伊真正本身旺旺來,為咱臺灣的經濟產業,帶來真濟的利益,真正是「旺旺來」。
◎俗語:
﹡食樹子拜樹頭Tsia̍h tshiū-tsí pài tshiū-thâu:
咱毋是攏講「食果子拜樹頭Tsia̍h kué-tsí pài tshiū-thâu。」?
.樹子tshiū-tsí:樹仔生出來的果子的意思,佮果子仝意思,
佮果子無仝的用法,意思仝款。
.厚kāu:以前的王梨,氣味較厚。華語『濃郁、濃厚』。
芳味會當厚,酒精會當厚。
﹡起頭興興,尾手冷冷Khí-thâu hìng-hìng,bué/bé-tshiú líng-líng:
.起頭khí-thâu:意思是「拄開始的時」。
.興興hìng-hìng:熱撲撲(jia̍t-phut-phut),對啥物貨足有趣味。
到尾仔,都規个冷去。
這俗語咱嘛會當用佇生活中。
.酵素kànn-sòo:愛有鼻音kànn,看著有兩个”nn”,就是有鼻音。
.發酵huat-kànn:咱若做麭(pháng)的時陣,麵粉著愛先予伊發酵。
愛加唸幾擺矣。
.予你食了會「紲喙suà-tshuì」:一喙接一喙,一喙紲一喙的意思。
紲suà:接紲的紲,繼續落去。
例:紲攤suà-thuann。
「紲喙」就是寫這兩个漢字。
★王梨ông-lâi vs. 旺梨ōng-lâi:主要是因為腔口差。
王梨ông-lâi,變調了後,ông第5調變第3調、第7調。
旺梨ōng-lâi,變調了後,ōng第7調變第3調,有人無按呢講。
若欲用腔,兩个腔攏會合的狀況來講,大王的「王ông」較合。
.擘皮peh-phuê/phê:這嘛是腔口差。
講以前的王梨,欲食,欲做罐頭,愛擘皮,擘甲足辛苦。
擘peh,擘開,擘柑仔。目睭擘開嘛是擘。
這字古早時,以前猶有其它的意思。
.磚仔角擘去:敢若欲去擘磚仔角,愛出偌大力,毋是啦。
這是足趣味的形容,敢若予人擘落來,落落來(lak--lo̍h-lâi)。
古早時,擘毋但咱會當家己來擘,敢若袂輸去夆擘開。
.冇石快擘phànn-tsio̍h khuài-peh:石頭若冇冇,連鞭都擘開矣。
三、看戲齣(hì-tshut)講臺語
◎夭壽喔!欲予你做新婦仔喔?
Iáu-siū--ooh! Beh hōo lí tsò sin-pū-á--ooh?
.新婦仔sin-pū-á vs. 新婦sin-pū:
本來若講有加「仔á」,應該攏是敢若較無物的,較無價值,較細等等。
所以有人會共「新婦仔」單獨用佇華語的『童養媳』。
若是無「仔á」,「新婦」就是後生的某。
加一个「仔á」,就是細漢共𤆬來厝內飼,佮後生做伙大漢,大漢欲做後生的某。
這是過去的一个社會現象,這馬應該無這種矣。
以前予人做新婦仔,著愛足卑微的,
例:你毋通一个新婦仔體。
這是過去制度留落來的詞。
有人過去家庭為著家己足歹維持生活,查某囝生傷濟个,
若分予家境較好的,雖然是去做新婦仔,毋過上無食會飽,
嘛有這款的家庭,有人對新婦仔足好的,嘛是有。
◎啥物時代矣,閣有老爸掠查某囝拄數。
Siánn-mih sî-tāi-ah, koh ū lāu-pē lia̍h tsa-bóo-kiánn tú-siàu.
.拄數tú-siàu:準做共數攏還清矣,查某囝送你,等於賣你,我提著啥物錢。
◎真正死無人哭!
Tsin-tsiànn sí-bô-lâng-khàu!
.有時仔,臺語咧罵、怨嘆、咒讖(tsiù-tshàm),有足濟種講法。
這是其中一種,意思是「你死矣無人會哭,無人會悲傷」。
因為咱過去的觀念,人死的時陣,身軀邊無囝孫仔圍咧,按呢是足歹命的,
逐家會感覺是人生上大的侮辱(bú-jio̍k/lio̍k),這是過去的一个觀念。
## [2020.04.23《台語講世事》:全民健保](https://youtu.be/y70sfFDGIQc)
.顯明hián-bîng:佮「明顯bîng-hián」無啥仝。
.「提早」一工 (O);「提前」一工 (X)
.注文tsù-bûn
例:我欲佮總經理見面,我有共伊注文。(6:00)(?)
註:[「注文」的討論](https://www.facebook.com/groups/Taigisia/?post_id=3037056296371540),會當參考《臺語社》裡4月初9,TWkid Lai的鋪文
.老罔老,閣會「掰塗豆」 Lāu bóng lāu, koh ē pué/pé thôo-tāu
.做親情tsò/tsuè-tshin-tsiânn。
一、看新聞講臺語:防疫系統升級 健保卡通查行踏史
◎翻譯
華語:健保卡插下去,螢幕上立刻跳窗顯示,有沒有到過中港澳旅遊。
臺語:先插健保卡,螢幕頂隨跳窗仔出來,
Îng-bōo tíng suî thiàu thang-á tshut--lâi,
顯明有去過XXX無。
hián-bîng ū khì-kuè XXX--bô.
*「跳一个窗仔出來」,這若無咧用電腦的觀眾朋友,可能想講是啥物人對窗仔門跳出來。
這个「窗仔」是電腦的用詞,就是Window,咱若用電腦,伊就會一个一个一直跳出來,
咱直接翻做「窗仔」就會使。
像螢幕,有人用英語講Monitor,當然「窗仔」講Window嘛有。
講「窗仔」敢若較古錐。
*這馬咱咧用電腦,抑是現代的科技,嘛定定會出現一寡字,咱臺語欲按怎講?
.『滑鼠』→鳥鼠仔niáu-tshí/tshú-á:彼个形有像鳥鼠仔,若直接講,
愛配合是咧講電腦的物件,愛看前後句。
.keyboard『鍵盤』→齒盤khí-puânn,因為伊一齒一齒,閣有合音。
.Hard Disc『硬碟』→há-ti,硬碟(ngē/ngī-tia̍p)嘛有人講。
碟tia̍p,小可佮另外一个字,共人「擉tia̍k」,擉甲足悽慘,閣倚音。
例:你硬欲共擉。
所以講「há-ti」,算是英文翻過來的,較簡化。
.顯明hián-bîng:佮「明顯bîng-hián」無啥仝。
有足明白的表示,抑是顯示啥物貨,顯示甲足明的。
例:你顯明有去過XXX。
抑是啥物代誌有顯明。
例:你這馬定定佮伊出去食飯,顯明你已經無愛我矣。
華語:提前一天,把預約的名單送到健保署,我們會回報給醫院。
臺語:提早一工,
Thê-tsá tsi̍t kang,
共注文的名單送到健保署。
kā tsù-bûn ê miâ-tuann sàng kàu Kiān-pó-sú.
.『提前』:咱是講「提早」,咱本來就有提早的講法。
時間是講「早tsá」佮「晏uànn」。
.注文tsù-bûn:咱若是事先共人預約彼種的,會當講「注文」。
例:我有注文一个雞卵糕。買物件的彼種注文。
這種約會,人佮人見面,本來原意是無按呢用,攏干焦用佇買物件。
毋過,這種外來語,引進來臺語內底的時陣,有時會共延伸,有一寡變化,
抑是創新一寡意思。
例:我欲佮總經理見面,我有共伊注文。
華語:只要醫師授權給藥師或護理人員,就…...
臺語:凡若醫生有放權予藥劑師…...
Huān-nā i-sing ū pàng-khuân/kuân hōo io̍h-tse/tsè-su……
.凡若huān-nā:「凡若按怎」就是「若按怎」的意思。
就是有「凡若huān-nā」這種講法。
例:凡若見著你,我就足歡喜。
例:凡若看著咱的節目,咱的臺語就會進步。
.『授權』:咱會當講「放權pàng-khuân/kuân」。
華語:要弄清楚病患旅遊和接觸史。
臺語:患者行踏、往來的情形掰予清。
Huān-tsiá kiânn-ta̍h, óng-lâi ê tsîng-hîng pué/pé hōo tshing.
.行踏kiânn-ta̍h:旅遊就接觸矣,但是閣較口語,會當講「行踏」,
因為行踏可能比旅遊範圍閣較闊,閣往來按呢。
「行踏」就是你有行到佗,踏到佗,無一定是去旅遊,範圍較闊,
意思是去到佗位都著矣。
.患者huān-tsiá:愛注意,咱可能看華語會想講是「病人」,
但是咱對日本時代開始,傳統臺語是用「患者」這个詞。
這嘛是對日語來的,這馬咧教醫用臺語的醫生、老師足堅持,愛用傳統的「患者」,
聽起來敢若嘛較專業的感覺。
.掰pué/pé:共物件,本來是講敢若撥(puah)開按呢,
掰會pué-huē:共伊理路用予清楚。
例:共目屎掰予離。→掰目屎pué/pé ba̍k-sái,
例:掰去邊仔pué/pé khì pinn-á
動作是差不多,伊叫做「掰塗豆pué/pé thôo-tāu」。
﹡老罔老,閣會「掰塗豆」Lāu bóng lāu, koh ē pué/pé thôo-tāu。
嘛有人講老罔老,閣會「擘塗豆」。這敢若有變形,毋是毋著。
攏是講「雖然年歲較濟,毋過猶閣足勇健」的意思。
有去請教種過塗豆的前輩,
古早,共塗豆仁囥lueh(落去)了,會共塗掰予崁(khàm)起來,
是咧做彼號種塗豆的代誌。塗豆囥落去,用跤共塗掰掰咧。
「掰塗豆」變做是一个種塗豆的動作。
古早真濟人愛做的一个動作,「種tsìng」一定愛有做著這步,
表示你猶有法度做穡,就是勇健。
二、講予你知:全民健保
這回,武漢肺炎,咱的健保制度,發揮真大的功能,今仔日簡單來介紹,對咱影響非常大的制度。
◎健保的實施
*實施進前:職業社會保險、私人健保
會記得健保實施進前,咱臺灣人欲看醫生等等的費用,攏真懸,有真濟人看袂起醫生。
彼个時陣,大部份攏是私人的健康保險來出錢。
敢有社會保險?當然嘛是有,譬如講農保、勞保、軍保等等,依職業的社會保險,
但是這个社會保險給付的項目,佮咱這馬所知影的健保,有真大的無仝款。
以前看醫生,真正是非常開錢。
*1994年,通過《全民健康保險法》
但是咱到1994年,通過法律《全民健康保險法》。
*1995年正式實施
一直到1995年正式實施了後,咱這馬臺灣的健保制度,會使講是世界有名,
對咱的生活非常有幫贊。
*目前主管機關:行政院衛福部健保署
這馬是2020年,這中央經過20幾年,有真濟變化,但是目前,
咱的主管機關就是「行政院衛生福利部健保署」。
◎面對財政危機
*醫療支出超過保費收入真濟
若去看健保的時,咱是毋是攏干焦付掛號費,佮部份負擔的費用?
所以一開始,這款情形,健保佇拄開始有出現過一寡財政的危機,
就是發現醫療支出超過保費收入非常濟。
彼个時陣,醫療院所亻因報偌濟,健保署著愛共付偌濟,結果發現按呢袂使得,
就出現一个新制度,號做「健保總額支付制度」。
*健保總額支付制度:就特定範圍的醫療服務代先協商
簡單講,就是病院佮健保署,會就特定範圍的醫療服務,代先協商,先訂一个額度出來,
若是醫療院所尾仔請的錢,比額度較低,健保署著愛付錢,
若是(比額度)較懸,才來協商,按照比例來付錢。
這是對支出方面來做控制。
這个制度出現了後,猶是無夠,所以對收入方面,嘛愛做改變。
*2013年,二代健保:薪資掠外的所得愛納補充保費
對2013年,出現號做「二代健保」。
啥物是「二代健保」?
就是除了你的薪資掠外的所得,愛納補充保費,譬如講你有大筆的賞金,抑是你有兼職,
抑是你的股票、股仔囝的錢,租金等等,這攏愛另外閣納補充保費。
這个部份算是稅金的概念。
◎破產的疑慮
到目前為止,逐家對咱的健保是毋是會破產,有真濟疑慮。
健保署共咱講,對源頭收入佮支出,攏有咧處理矣。
*開源措施:總額支付制度→二代健保
針對咱的健保,是一層一層的保護。
*開會決定隔年醫療支出額度
每一年開會來決定,隔轉年醫療支出的額度是偌濟。
*健保安全準備基金(4個月給付)
咱閣有一个健保安全準備基金,佇咧遐。
目前是猶閣有4個月的給付,這已經是超過法律的規定。
所以目前來看,猶閣有夠。
*基金2022年開了,著愛調整保費
若萬不二,真正基金佇2022年開了了,了後,才有可能調整保費。
當然這馬逐家是往這个「毋通閣調整保費」的方式來進行,
毋但政府愛拍拚,咱人民嘛愛配合。
◎予健保行久長,有真濟代誌愛來做
*2003年全面IC卡、2010年雲端藥歷
佇2003年,咱的健保卡已經全面IC卡化矣,內面會當看著咱過去一段時間,
你去佗位看醫生,你食啥物藥仔,攏看會著,這就號做「雲端」,用藥仔的歷史,藥歷。
*雲端記錄幫贊推動分級醫療
這个記錄會當幫贊咱啥物?因為醫生看會著,醫療院所攏看會著,會當幫贊咱推動分級醫療。
*政府開源,也著民眾節流
*有病去診所,重症才到病院
啥物是「分級醫療」?咱愛知影「有病去診所,重症才去病院」。
嘛著愛咱民眾有這个觀念,莫予醫療資源開甲遮爾仔緊。
咱的健保真正是真好的一个制度,需要咱,你佮我,共同來努力拍拚。
◎語詞:
.健保署Kiān-pó-sú:是讀音的問題。署(sú)逐家凡勢猶無遐爾熟。
若準講後壁閣有物件,署長sú-tiúnn,署(sú)第2調變第1調。
.掠數lia̍h-siàu:掠一个數字的意思,就是看數(siàu)的狀況按怎。
數siàu,是這个漢字,白話音。可能有人會寫做「帳tiòng」,
毋是「掠帳lia̍h-tiòng」,是「掠數lia̍h-siàu」。
.坐數tsē-siàu:就是「認數jīn/līn-siàu」,抑是承擔責任的意思。
就是進前,可能醫療院所會講出來的,健保署攏欲坐數,這馬慢慢仔無欲按呢。
一般以早咧用,若用佇錢的,大部份是代替人付錢的意思。
例:伊欠人錢,煞掠亻因老母來坐數。
﹡諺語:喙食,予尻川坐數Tshuì tsia̍h, hōo kha-tshng
意思是差不多,延伸做「負擔責任」的意思。
.支理tsi-lí:是「支付」的意思。
.請錢tshíng-tsînn:申請啥物錢的意思。欲去共啥人請一筆錢。
.打錢tánn-tsînn:本來是欲予你啥物物件,落尾用錢來代替。
例:我本來想欲送你一領衫,落尾想講我無時間去揀,我打錢予你好矣。
.給付kip-hù:這是音的問題,月給gue̍h/ge̍h-kip、供給kiong-kip。
後壁有「付hù」,「給kip」的音要攑懸。
.所得sóo-tik/tit:這嘛是音的問題,有兩个音。
「得tik/tit」這个字本身,這兩个音攏有,唸佗一个攏會使,
聽著較濟的敢若是「所得sóo-tik」,嘛有人講「所得sóo-tit」。
.做件tsò/tsuè-kiānn:算是一寡散工(suánn-kang),看(做)一件幾箍,
彼叫做「做件」的。就是『按件計酬』。
嘛有可能做「作家tsok-ka」、「畫家」,嘛是攏做件的,
看做幾件來算錢,彼嘛是散(suánn)工,無固定的月給。
.股仔囝kóo-á-kiánn:足趣味的,有咧投資股票的人就會知,就是「股票的利息」的意思,
一股會生囝,股仔囝,股利。
.利息lī-sik:這是讀音的問題。
.錢仔囝tsînn-á-kiánn:錢會生出利息,錢生出來的囝。
三、看戲齣(hì-tshut)講臺語
◎ 做你無閒。
Tsò/Tsuè lí bô-îng?
﹡兩種腔,意思就是「你都莫插我,做你無閒」。
這个「做」字,有足濟種用法,其中一个用法:隨在人按怎。
這个「做」足臺語氣的。
有當時仔,規氣講「你做你,你做你」,毋是叫你做你家己,是講「你無閒你的」。
上捷用就是:做工課、做代誌、做親情(tshin-tsiânn)這種的。
做風颱、做大雨這種的,嘛會當用,是咱普通知影的「做」,
咱遮的「做」,就是「隨在你」的意思。
例:你哪會使做你去?
◎咱查某人是菜子仔命。
Lán tsa-bóo-lâng sī tshài-tsí-á-miā,
凊彩掖,凊彩大。
tshìn-tshái iā, tshìn-tshái tuā.
﹡這是古早時的觀念。
菜子仔命tshài-tsí-á-miā,到底是啥物命?
因為菜子,愛看別人共菜子掖佇tueh(佗位),伊就佇tueh,
伊袂講走去別位,是掖菜子的人決定的,無家己決定的權利。菜子無家己決定命運的權利。
﹡凊彩掖,凊彩大。Tshìn-tshái iā, tshìn-tshái tuā.
按呢,查某人足厲害的。這个意思是會使按呢解說。
因為菜子,閣有另外一个意思,足粗俗的,毋是足貴的物件,
閣俗,閣凊彩人掖佇tueh(佗位)。
這真正是古早人的觀念,這馬就無這个觀念。
.凊彩tshìn-tshái:無講一定按怎,tsù在人按怎。漢字是按呢寫。
.凊tshìn:冷的意思。例:凊飯。抑是黯淡的意思。
.掖iā:蓋臺語氣的。
例:共掖落去。佇遮是「掖種子」的意思。
但是普通時,咱生活嘛有另外一个用法,生活中嘛捷用著。
例:囡仔遮爾濟,共𨑨迌物掖甲規四界。
例:掖甲規塗跤,也毋收收咧。
## [2020.04.30《台語講世事》:薁蕘](https://youtu.be/CLTqyMimQDA)
*這个物件『QQ的』,應該是欲講臺語的「𩚨𩚨khiū-khiū」。
.薁蕘ò-giô,漢字就是按呢寫。
*句型:用(名詞)落去(動詞)
.捏tēnn/tīnn vs. 捻liàm
.笑黃色tshiò-n̂g-sik、笑紅tshiò-âng、笑青tshiò-tshenn/tshinn
.𩚨嗲嗲khiū-teh-teh:漢字是按呢寫,疊詞嗲嗲寫法猶有爭議。
.熁hannh
*薁蕘樹有分做公的,佮母的。
*按怎看是毋是正的薁蕘
.特徵ti̍k-ting、特徵ti̍k-ting、特徵ti̍k-ting,讀3遍,足重要。
.水浸粿tsuí-tsìm-kué/ké → 『蒟蒻』。
.粉鳥舅hún-tsiáu-kū
.萎去ui--khì vs. 蔫去lian--khì:
.伴手phuānn-tshiú vs. 等路tán-lōo
一、看新聞講臺語:薁蕘仙草真退火 教你分別真抑假
◎翻譯
華語:咕溜咕溜,ㄉㄨㄞ ㄉㄨㄞ的愛玉。
臺語:滑溜閣“食丘”的薁蕘
Ku̍t-liu koh khiū ê ò-giô.
*這个物件『QQ的』,應該是欲講臺語的khiū-khiū,
因為華語無彼款第7調的中長音,所以才變做「QQ」,走音去。
「𩚨」的漢字就是按呢寫,逐家愛看予清楚。
.薁蕘ò-giô:有人感覺這个「蕘giô」足歹講,愛有彼个濁音“g”。
建議逐家,「薁蕘ò-giô」漢字就是按呢寫。
主要是讀音,逐家可能攏看漢字「愛玉」,就按呢讀「ài-gio̍k」,其實是「薁蕘ò-giô」。
華語:採用天然的愛玉籽揉洗,在水裡揉洗出果膠。
臺語:用天然的子仔落去洗,
Īng thian-jiân ê tsí-á lo̍h-khì sé/sué,
浸水捏予有膠。
tsìm tsuí tēnn hōo ū ka.
*句型:用(名詞)落去(動詞),
這生活中定定咧講,會閣較強調彼个動作的感覺。
這馬逐家攏會講:用(名詞)+(動詞),「落去」無去矣,這嘛是算一種講法。
例:用青菜落去,佮雞做伙炕(khòng)。
例:你毋通用手落去烏白抐(lā)。
.捏tēnn/tīnn:有捏頷頸tēnn/tīnn ām-kún。
.捻liàm:取較細塊的物件,共捘(tsūn)lueh(落去)。
比較上,「捏tēnn/tīnn」手的動作會較大。字嘛無仝款。
.
華語:真的愛玉呈淺棕色。
臺語:正的薁蕘是笑黃色。
Tsiànn ê ò-giô sī tshiò-n̂g-sik.
﹡這色是較主觀,無一定你看感覺是咖啡色,可能我看感覺是黃色。
遮所謂的『淺棕』,當然『棕』,咱一般可能講「咖啡ka-pi」,會當講「淺咖啡」。
過去古早,有一个講法「笑黃色」,表示是淺黃色的意思,可能以前無咖啡,干焦有薁蕘。
.笑黃色tshiò-n̂g-sik:毋是共黃色笑。這「笑」是淺淺的的意思。
古早可能誠四常按呢用,這馬逐家攏袂記得,愛共抾轉來用。
例:笑紅tshiò-âng、笑青tshiò-tshenn/tshinn
粉紅色,嘛有人講「笑紅色」,聽起來足文雅。
華語:口感『過度Q彈』,吃起來『像果凍』。
臺語:“食丘”嗲嗲,袂輸菜燕。
Khiū-teh-teh, bē/buē-su tshài-iàn.
.𩚨嗲嗲khiū-teh-teh:漢字是按呢寫。
疊詞「嗲嗲」是毋是一定按呢寫,可能有爭議。因為是擬聲,敢一定愛用這个字,
這可能是揣一个較倚(音)的。
*『口感』,較口語的是講「喙尾tshuì-bué/bé」,一寡喙尾的講法:
.韌布布jūn/lūn-pòo-pòo:咬袂斷,韌布布。
.爛糊糊nuā-kôo-kôo
.軟膏膏nńg-kô-kô:無一定咧講口感,嘛會當形容人的姿勢。
.𠕇硞硞tīng-khok-khok
.『果凍』佮菜燕(tshài-iàn)敢有仝款?
較早期干焦菜燕,無像這馬分足濟種,以早彼種物件就是菜燕。
華語:果膠和礦物質『結合起來結凍』。
臺語:相濫堅凍。
Sio/Sann-lām kian-tàng.
﹡共無仝的物件,兩个以上,濫做伙,咱會講→相濫sio/sann-lām。
.堅kian:予伊變𠕇(tīng)這款的狀況,會當講是「堅」。
有另外一種用法,毋是予伊𠕇,是予伊失去水分,焦去。
例:堅疕kian-phí:一般攏講「空喙khang-tshuì」。
有空喙了,這馬堅疕,堅疕進前毋通共抓。
較屬於失去水分的用法:堅堅做一塊kian-kian tsò tsi̍t tè。
華語:加熱的時候,比較容易融化。
臺語:若共熁燒較快溶。
Nā kā hannh-sio khah khuài iûnn.
.熁hannh:燒燙著,是熁;日頭去共烘,是熁,因為有懸的溫度,
天氣足熱的,咱嘛會講:這日頭足熁的。
.快khuài:誠緊。例:快焦、快歹。
二、講予你知:薁蕘
熱天一下到,真濟人攏愛食薁蕘,食的時陣,閣愛參一點仔檸檬汁,甘甜仔甘甜,非常好食。
◎薁蕘
*薁蕘果洗過,削皮,烘予焦
薁蕘果對樹仔挽落來了後,愛先洗過,愛閣削皮,才閣烘予焦。
*共黃金色的細粒薁蕘子擘落來
烘予焦了後,伊果內面,有黃金色的細粒薁蕘子,才共擘落來。
*佇水內底輕輕仔浞
擘落來了後,共囥佇水內底,輕輕仔浞浞浞,水內面開始有一寡淺淺的咖啡色,
這就是「薁蕘水」。
*共薁蕘水囥咧予堅凍
才閣共薁蕘水囥佇咧遐,囥予伊堅凍,逐家就知影欲按怎食矣。
共伊切開,才閣參蜜、參檸檬汁來食。
這就是薁蕘做出來的情形。
◎薁蕘樹的特性
逐家攏知影食薁蕘,但是敢知影薁蕘樹生做啥物款?有啥物特色?
*是臺灣特有亞種,佮榕仔仝種
薁蕘樹是咱臺灣特有亞種,就是咱臺灣才有的種,佮榕仔仝種。
*主要產地是南投、雲林、嘉義、高雄的中海拔山區
薁蕘樹,有當時仔會生做不止仔懸。
*有分公的、母的
薁蕘樹有分做公的,佮母的,一般人看袂出來。
愛對伊的花來看,公的佮母的攏會生薁蕘果,伊的花就藏佇薁蕘果內面,
公的薁蕘果內面的花,花粉愛傳到母的薁蕘果內面的花。
*靠一種比狗蟻閣較細隻的蜂弄花
伊的花是足細蕊足細蕊,著愛靠一種蜂,這種蜂比狗蟻閣較細隻,來授粉弄花,
咱才有薁蕘通食。
這種蜂足趣味的,佇公的薁蕘果規个猶未著時的時陣,蜂先共卵,生佇公的薁蕘果內面,
等公的薁蕘果到分必開了後,這蜂就大漢,就飛飛飛,飛到母的薁蕘果內面的花來授粉,
授粉若成功,咱才有薁蕘通食。
◎正港的薁蕘真珍貴
*干焦會當散發袂使種
薁蕘樹干焦會當野生的,袂當用種的。
*愛“足百”(peh)樹,抑是“足百”(peh)壁採收
你欲去共挽,閣毋是凊彩就會當挽,你著愛“足百”樹仔,抑是愛“足百”壁,才會當採收。
而且毋是凊彩欲挽著會使,愛有證照等等,毋是遮爾仔好提著。
市面上,咱會食著一寡菜燕薁蕘,抑是水浸粿薁蕘這款的,真正的薁蕘是真僫食著。
*按怎看是毋是正的薁蕘:
正的薁蕘的一寡特徵(ti̍k-ting)
﹡較濁、有紅色幼絲、切愈幼愈出水
﹡佇滾水內袂隨溶去,食起來較軟“食丘”(khiū)
◎薁蕘的文化
*佮原住民的拍獵文化真有關連
薁蕘果到分的時陣,攏會唌一寡動物來食,佮原住民的拍獵文化真有關連
*薁蕘的名是佗位來的?
咱臺灣各族原住民,對薁蕘,𪜶攏有家己的名,這族有這族的名,彼族有彼族的名。
咱為啥物欲共這个物件,號做「薁蕘」?
薁蕘的名到底是對佗位來的?有足濟講法。舉兩个例:
﹡連雅堂《臺灣通史》
連雅堂伊寫的這本書號做《臺灣通史》,內面伊有講著:
當初時,有一个人,發現薁蕘這款物件,共伊提來賣,真受歡迎。
逐家就問伊:這項物件號做啥物?這个人想想咧講:我有一个15歲的查某囝,
感覺佮薁蕘足成的,查某囝號做薁蕘,所以這个物件就號做「薁蕘」。
問題來矣,因為《臺灣通史》內面寫的是「愛玉」,就是這馬通人知「愛玉」這兩字,
但是這兩字讀起來就毋是薁蕘。
﹡薁蕘?唉喲?
有人問講:這好食的物件號做啥物?這个人就講:
唉喲!遮好食著!所以逐家講「唉喲」佮「薁蕘」足成的,所以就共號做「薁蕘」。
﹡有人講「薁蕘」這个名,是咱平埔族的講法,這馬猶無得著證實。
◎語詞:
.薁蕘ò-giô:「蕘giô」“g”的音愛注意,共逐家強調一下。
有的所在是講「子仔jí-á」,毋但是臺南遐的人講的,算是地方差。
.『果凍』,咱一般以早攏講「菜燕tshài-iàn」。
.散發suànn-huat:意思是「野生的」。予伊家己散出去、發出去。
註:《教典》、《台文華文線頂辭典》散發sàn-huat。
.水浸粿tsuí-tsìm-kué/ké:佮薁蕘敢若有淡薄仔成的物件。
這馬可能一般嘛是華語較時行,叫做『蒟蒻』。
『蒟蒻』咱臺語有講法,就是「水浸粿」,以早就有的講法。
.粉鳥舅hún-tsiáu-kū:是對日語こんにゃく(Konniyaku)來的。
粉鳥舅是較落尾,算做音譯,但是小可有走音。
.浞tshio̍k:用手輕輕仔,袂講足大力,去予伊形有變化。
.𩚨khiū:注意彼个聲調,是第7調。
𩚨𩚨khiū-khiū,頭前第7調愛變做第3調,毋是QQ。
.到分kàu-hun:果子有夠熟,到熟的狀況矣,通食矣。
.滾過kún--kuè/kè:有經過「滾kún」的這个程序、過程。
.𣻸siûnn:就是一點仔澹澹、黏黏的感覺,就是這字。
.萎去ui--khì:毋是wiki,是ui--khì。
一般來講,攏是敢若變化彼个形,變較細,本來較尖變較鈍。
例:喙齒萎去,愛來重做喙齒。
.蔫去lian--khì:較偏向植物,花、樹仔、草,這種的。
.時行sî-kiânn:足流行的。
例:這馬臺語當時行。
.伴手phuānn-tshiú vs. 等路tán-lōo
這兩个各所在的用法無啥仝,有的所在是共這兩个詞當做是仝款,
我欲來拜訪你,我紮一个伴手也好,紮一个等路也好,攏會使。
有的所在會分,伴手是我欲紮去予主人的禮物,
等路是主人欲予人客紮轉去的禮物。
有的所在無,這有地方差。
◎俗語
*俗物無好貨
Sio̍k-mi̍h bô hó huè.
意思是「貪俗,可能買無啥物好的物件,品質可能無好。」
是講咱的薁蕘,這馬其實成本誠懸,毋是俗物,「俗物無好貨」,可能食著假的,毋是正的。
.
*俗物食破家
Sio̍k-mi̍h tsia̍h phuà ke.
嘛是仝款「貪俗」,結果可能有兩種:
你看這个物件足俗,就買規堆,買足濟,開足濟錢。
另外一種,可能你一時買一項物件,感覺足俗的,後壁可能愛修理,愛按怎,
可能有一寡付出代價閣較大,閣較損失。